第五章 五年寒窗醫學校
雙明暗殺袁世凱
（1909～1914）
19
杜聰明佇1909～1914讀總督府醫學校，攏總五年e時間，初步得著醫生e資格，伊逶「清朝」讀到「民國初年」，明治讀到大正，彼个時瞬，吊遠這嗎欲規百年矣，咁有一寡代誌佮現主時e制度無仝款？咁有啥乜特別安呢？有人批評講，聰明仙e博士身份有問題，伊連學士、碩士叨無提著，按怎有「博士」？人講「博士博，頭殼戴紙橐」，这完全是時代e關係，無毋著，聰明仙確實無學士碩士，「台北帝國大學醫學部」到1936民國25年才成立，毋閣聰明仙佇1922民國十一年，叨提著京大博士，定著袂赴(來不及)提學士矣！
咱跋白e，頂頭e批評猶算客氣，若欲論真講（以現主時e標準），聰明仙連「初中文憑，高中文憑，學士、碩士」四項攏無，叨吓使逶小學畢業，馬上透過醫學校（五專）直接提博士？这宛那真奇怪安呢甡，另外一个問題，若是聰明仙得著「台灣第壹醫學博士」，按怎比伊早二年卒業e王受祿博士，無法度得著這項光榮？原因叨是王受祿卒業時瞬，日本人規定「噯留學德國，才吓使提著醫學博士」，王受祿苦讀德文照規矩留德，1925民十四年得博士，慢二年卒業e杜聰明真好運，彼時日本已經扑贏甲午戰爭、日俄戰爭、併吞朝鮮、一次大戰、大尾矣發角矣，國強民富擎甲夯袂稠，自尊心強「免留學德國，咱日本國嘛吓使頒發醫學博士」安呢，聰明仙踏著機會，遂「一名透京城」，出名溜溜，伊若卡早出示咧，抑是卡慢出士咧，叨攏無機會哩，所以講人e運命，天公伯仔註定兮，真正互汝袂鐵齒咧安呢。
聰明仙佇台灣地，無經過中學、大學，叨直接讀博士，毋閣佇日本國內，並毋是安呢，尹宛那有中學、大學e制度，台灣地也叨殖民地e關係，歹命人爾爾，無需要食甚好，稱彩應付應付，小學叨吓使啦！若毋是台灣地厚毛病（瘧疾霍亂）歹統治，甚至連醫學嘛免啦！也叨設立學校教育，噯大批e俑仔標（錢），我阿本仔叨毋是戇伯仔gr！台灣人癩膏爛癆，無智識兼無衛生，做奴隸叨好啊！毋免讀甚贅書，抑無到時管袂稠，飼齧鼠咬布袋，來反對我大日本帝國e殖民統治，安呢叨規組害了了矣！安呢規齣甲午戰爭舞規晡，叨無彩工矣！
嗯才e瞬呤，佇東京話外來政權e殖民統治以上，對台灣人e教育政策，必須採用「奴化教育」，才袂去礙著「大和民族高高在上」e日本帝國權益。優秀e日本人佮講台灣話e本島人，噯分互伊清楚。（第壹）台灣所在，設小學（公學校）叨好，免設中學、大學，主要e目的欲教台灣人講日本話，一方面吓凍互殖民統治有利，一方面吓凍互台灣人無自尊，幾代了後用教育消滅台語化，用日本話來同化台灣人，（第貳）為著帝國殖民統治。噯設立醫學校，來控制熱帶病佮民眾衛生，才有利日本e統治，抑無一四界垃圾癩膏，日本人嘛毋敢入去統治界管。
（第參）噯設立農業學校，利用台灣地燒辣e昊氣，增加大日本帝國e資源，嘛互台灣人腹堵吓飽，卡袂起來作亂。（第肆）噯設立國語（日語）師範學校，培養台灣人e日語教員，達到「以台制台」，全面同化台灣人日本化e目的。（第伍）絕對袂使設立法律、政治、軍事、經濟有關e學校，抑無，台灣人大尾了後，恐驚也吓抾仝心，合和來反抗日本e殖民統治，所以無需要設立大學教育。
了解頂頭所講，外來政權殖民統治e要領，咱叨吓了解，日本仔並無真心佇台灣設高等教育，干礁願意「日語同化」e公學校（小學）爾爾，這款e愚民教育是看現現li，抑無，是按怎世界壹流強國，佇統治台灣50年當中，壹直到第41年（民25，1936）才設立「台北帝大醫學」？莫怪咱聰明仙袂赴提「學士」矣！日本人統治台灣e初期，無噯設中學，無外久叨引起台灣人e警覺，若安呢落去，台灣人著永遠衰韶做腳架仔（奴隸），嗯才霧峰林家望族，「抗日大師」林獻堂家族有提錢出來，設立「台中一中」，算講尹宛那有對台灣人真大e貢獻叨著。
呾話頭翻返來講，聰明仙e醫學校，是總督府初期所設e醫學，農業、師範三款學校之壹，仈項學校因無合殖民統治需要，並沒設立，毋閣時間一工一工過去，日本e僑民愈來愈贅，為著欲教育下一代e日本僑民，日本人佇統治台灣25年彼瞬。1920左右有設立中學、小學，專門互日本僑民來讀。（台灣人嘛有尐數去讀），所以1921左右「醫學校」改做「台北醫專」，收一寡中學畢業生，算講升級叨著，又閣15年了後，1936民25年，設立台北帝國大學時，改做「醫學部」正式頒發學士證書，杜聰明逶日本提著博士，返來台灣了後，踏著機會，做台北醫專e教授，了後，又閣順勢做台北帝大醫學部e教授，光復了後，「順理成章」接受台大e資源做院長，毋閣並無快活，佇國民黨統治年代，經過228，白色恐怖，聰明仙宛那做甲腳手肉疲疲搐〔cua5〕，東京話無效，換學北京話矣！
1909，算講是清朝尾年矣，杜聰明開始讀 「總督府醫學校」，壹直讀到1914（明治三十七，民國三年）才卒業，這五年e中間，有一寡古早e「點點滴滴」宛那吓互人感到真心適安呢，彼時瞬，醫學校設佇東門身邊。（目前仁愛路台大醫學院邊），教室是新砌e，日本人定著有幵一寡錢，外觀真好看，臹有派頭叨著，學生壹律蹛宿舍，管理真嚴格，宿舍e外口是一遍e水田（現時臭頭仔廟，東門彼箍圍仔），春秋二季，頻若播田了後，青景景風光嫷，水田簡那明鏡咧，水波跳影，真有庄腳e氣味安呢。
聰明仙剛(daa2)入醫學校e時瞬，留頭鬃尾仔（辮仔），真正「清國奴」做了有起，壹直到貳年e時才鉸掉，初時宛那感覺袂慣習安呢，伊佇公學校已經留六年矣，這嗎已經18歲矣，呾嘛咧hau3矣，1910日本人已經界管台灣十五年矣，猶允淮台灣人留頭鬃尾仔，宛那有幵明啦，这拍算是進前乃木總督e寬大政策e款，台灣人無感覺。留頭鬃尾是清國人e牛角（象徵），真正御示卸眾，卸搭底矣！另外一點，彼時瞬用毛筆寫字，所以迭迭咧磨墨盤，簡那漢文班e「老學究」le，呾这是清朝年間e教育，免啥計較啦！佇學生時代，聰明仙為著欲練身體，足愛吊單槓佮洗冷水身軀，大漢了後幾十年攏安呢。
醫學校佮咱目前e「五專」差不多，伊頭一年是醫預科，尾溜四年是醫學本科，下腳叨是彼時e醫學課程佮目前七年制e醫學系有啥乜無仝，这叨一佰年前e代誌矣，罔比較比較，宛那心適叨著。(一)醫預科：1909是一年e課程。東京語、數學、地理、歷史、物理、有機化、無機化、體操，目前2006是二年課程：北京語、英文、微積分、物理、化學、有機、分析、動植物、比較解剖、心理學、體育，對研究e基礎拍真在。(二)本科：1909是四年課程有解剖、生理、生化、細菌、病理、內科、外科、婦人科、耳鼻喉科、眼科，2006是五年課程：（課程如上）加齒科導論安呢，佇醫學校e物理佮化學，彼時瞬無實驗課，本科無齒科醫學介紹，規个日本時代e醫學教育，並無齒科佮法醫佮外文，致使講戰後，台大醫學院真正費氣（麻煩）。
病院e實習問題，牽涉到統治者大和民族，佮被統治者台灣民族，產生微妙e族群增差置e，本來日本人初統治台灣時，病院設佇大稻埕河溝頭遐（縱貫鐵路起兵大概中興醫院、忠孝國中彼箍圍仔），尾溜仔徙來東門（中山南路）茲，叫台北病院，日本人有優越感，無愛互台灣籍實習醫生看病，嗯才e瞬呤，醫學校高木校長真正為難，頭殼摩咧燒，趕緊想一个辦法，另外開一間赤十字社病院，專門互醫學校e學生實習，日本患者若無慣習互伊實習者，吓使去台北病院，安呢叨好勢矣！算講赤十字社病院專門實習，台北病院專門診療，「各司所職」，壹直到1936台北帝大醫學部成立，台北病院才專門做附屬病院安呢！
杜聰明佇醫校時瞬，成績是好e，伊上好e朋友號做郭東周，原本豐原e客人仔，做人忠直義氣，佮聰明仙暝日逗陣，峇峇峇仁仁仁，簡那司公仔神杯咧，吓使講一氏人生死之交，卒業了後，返去下港開業，落尾也又閣去日本讀冊，宛那得著博士，伊e智慧袂輸聰明仙，毋閣卡慢得著博士，遂袂出名，伊45歲死佇急性肺炎，聰明仙大哭數日，歲頭食無聰明一半，真正怨歎。
另外早聰明仙二屆e王受祿佮彭清靠，宛那是伊足好e朋友，王受祿，台南人，彼瞬提博士噯去德國，伊出去了後日本遂有設博士，等杜聰明提著博士（互外國人第壹擺）後，王受祿才返來，已經慢一腳步矣，才咧怨歎仁生運命安呢，日本若卡早授博士互外位人，安呢王受祿早叨是台灣第壹个醫學博士，聰明仙是著無份矣！另外一位彭清靠為人客氣有禮，伊二个囝，小弟攏有看過，一位是小弟讀台大醫學院時e教務長彭明聰，另外一位叨是鼎鼎有名e政治家彭明敏，伊佇1970主張台灣民族自決，台獨意識明顯，尾也國民黨欲給掠，自那化裝逃出台灣，避居瑞典，伊欲離開台灣e前一暝，給囝兒量身長，表示「一去不回」e故事，永遠互人感動再三。
慢杜聰明一屆，有一个宜蘭人號做蔣渭水，伊一氏人佮日本人外來政權捙拚，1921民國10年e「台灣文化協會」，1927民16年「民眾黨」成立，積極來爭取台灣人e權利，控訴日本政府壓霸政策，阻撓國民革命軍北伐……。阿本仔真頭疼，真正無伊法度，伊佮杜聰明真好，有參詳欲謀刺大陸袁世凱稱帝，不幸1931年以43歲病逝台北，目前2005年，南港到宜蘭e高速公路（雪山遂道），尊稱「蔣渭水公路」來給紀念呢甡。
1911，杜聰明讀總督府醫學校三年級e時瞬，霧峰林家林獻堂邀請梁啟超來台灣訪問，獻堂仙這位「抗日大師」規頭殼”祖國啊祖國”，彼瞬滿清政府這欲倒笪矣，有二派人想欲革命，一派是國民黨（中華革命黨）方面欲用武力，硬給摃倒。另一派是保皇黨，用溫和辦法，扶清德宗，去除慈禧太后，二爿講來攏有道理，保皇黨方面，主要是康有為、梁啟超來拺動，彼年獻堂仙32歲爾，春秋鼎盛，有錢有勢，一時無聊，自那提淡薄也鍼頭(金錢)來心適一下。
二人言語袂通，靠「筆寫漢字」來溝通，這位保皇黨仁物，真煩腦清國（中國）方面e前途，散赤、落後、破病、青瞑牛（文盲），中國人無啥前途，貪污、腐敗、軍閥，毋知欲按怎才好，梁啟超看著日本才統治台灣15年爾，叨事事項項「上軌道」，不止也欣賞，日本人來台灣，干礁六年，叨財政穩定，十捅年爾叨免閣靠日本內地e支援，實在無簡單，獻堂仙一心關懷祖國「不在話下」，嘛真討厭阿本仔政權e殖民統治，毋閣事實排佇眼前，清國人安呢無法度叨是無法度，宛那姑不而衷，雙人「惺惺相惜」，尾溜也獻堂仙佇江山樓（現時重慶北路、歸綏街口偎延平北路彼頭）設宴請客，獻堂仙e心情真正沈重，日本一工一工進步，中國方面內戰不斷一工一工衰韶，唉，是欲按怎才好！
20
1911年左右，清（中）國方面e局勢真正危險，人咧講「中國花洛洛」真正有影，中央政府腐化敗爛，對外戰爭逐擺輸甲忝忝，科舉官員，之乎者也，貪污無能，一絲叨無現代知識，百姓是艱苦坐卦，破病衰弱土匪夯狠，南方e革命黨員已經摯載袂稠矣！這聲港潦落去矣，忖死e矣！中國e內戰隨時爆發，這聲扑甲昊轟地肉翩，毋知欲死外贅人le，百姓財產e損失，生態e破壞，規个國家欲死動亥，真正死死爛去叨無拗蠻li，清朝這欲滅亡矣！中國長期分裂內戰e齣頭，呾這棚戲是無caa6袂煞，中國人e苦難開始矣！中國大地動（地震）矣！連萬里以外e殖民島台灣，嘛受著真厲害e影響！
杜聰明讀醫學校e這段時間，1909～1914，拄好是中國革命內戰，改朝換代e空縫，伊活佇殖民地台灣，毋閣宛那真關心祖國e革命事業，伊毋知佗一條筋肖犮〔pua4〕，佇1913民國2年七月，佮翁俊明二人，遠走北京，想欲暗殺袁世凱，來阻止伊皇帝夢叨著，這條代誌牽涉著杜聰明、翁俊明、蔣渭水、黃玉階、蘇樵山、曾慶福。另外師範學校e李根盛……，吓使講是「台灣集團」安呢，落尾也代誌無成功，毋閣这是日本時代上大條e祖國事件，噯給詳細了解，大概講起來，日本統治台灣這五十年，拄好是中國上介衰韶e五十年，台灣縱貫鐵路1908通車，對岸福建鷹廈鐵路1958才通車，一睏仔差五十年，台灣人互東京話抑是北京話，外來統治e因緣「福份」，白有公論，哪著鐵齒呢！
1911三月尾，廣州正式爆發革命，奚叨是「廣州黃花崗七十二烈士」，國民黨講是尹e功勞，無外久，清庭下令四川、湖北鐵路國有政策，引起百姓真大e反感，這聲革命勢力摯載袂稠矣！尹俍冽，港潦落去，忖死e矣，佮伊拚一个生死le，看欲死豬哥，抑是豬母，五月底，四川e「同盟會」配合在地「哥老會」，開始興兵起義，夯槍攻擊官方衙門，也叨四川e仁口贅，地方偏僻，管顧袂著。清朝驚甲一个面仔青恂恂，趕緊派湖北e兵仔頭瑞方，率領湖北新軍，進入四川省「平亂」，致使講湖北e防務空虛，这是千載難逢e好機會，湖北e革命勢力，趕緊趁虛攻入武昌城，这叨是「十月十日武昌起義」，清朝尻倉去互人挖一空，這聲大碗（糟了）矣！
這个時瞬，「國父」孫中山猶搪咧夏威夷食漢堡飲咖啡，享受仁生，是看著報紙，才知影中國發生革命矣！所以有e歷史家咧講，國父領導革命，这是膨風e代誌，唉！仈人e囝死袂了，真正有影！三工了後，清朝馬上派袁世凱出兵，反攻武漢來打倒革命軍，安呢鋩角才矯吓返來，彼時袁世凱搪咧破病休養，雖著清庭欲叫伊出兵攻扑革命軍，心肝內歡喜咧等「哈哈哈哈！」恁父機會來矣！清朝欲叫我去平定革命軍，我吓使趁機會，「雙爿通食，狗甘仔魚溜總掠」，到時瞬利用矛盾，恁父叨吓使做全中國e皇帝矣！哈哈哈！恁父愈想愈歡喜，有影運氣咧行，仙閃叨閃袂離安呢！哈哈！」
嗯才e瞬呤，1911武昌起義，革命軍10月11日占領武漢三鎮，毋閣三工了後，10月14日，袁世凱嘛率領清軍南下，強力反攻武漢e革命軍，彼个時瞬，袁世凱心存貳心，並無認真來作戰，伊哪扑哪等待，哪佮革命軍暗中議和，伊控制局面，無欲互革命軍翩笪，而且叫革命軍策動各省獨立反清，最後才由袁世凱一个人「坐收漁利」，來做大總統、大皇帝，致做講一个武漢三鎮，攻七禮拜才「攻煞」矣！到1911年12月31日，武漢再度落入清軍袁世凱e手中，到茲叨按兵不動，毋閣過返工1912年1月1日，孫中山叨佇南京就任「第一任中華民國臨時大總統」矣！這棚雙方搬「戲」配合了袂醜，搬了有嫷气，革命軍佮袁軍雙方攏滿意！
袁世凱反攻武漢，暗中拖遷，革命軍利用這七禮拜e「黃金時間」，暗中佮袁世凱清軍講通，「隔江而治」，互相利用，這段時間有15省紛紛獨立，省城官軍紛紛投降，真正大勢已去！革命軍方面「從容布署」佇南京召開全國大會，選出第一任臨時大總統－孫中山，本臹是黃興e呼聲卡懸，黃興身先士卒，槍林彈雨出生入死，對革命功勞真大，毋閣軍漢出身容易獨裁，外界形象不佳，「國父」孫中山雖然卡驚死無咧肖戰，毋閣伊外交好，吓曉英文，占著宣傳e利便，文仁掌政佇國際上卡好聽安呢！這聲孫中山抾著矣，所以講人e運命真歹講哩！
1912元旦，南京新政府成立，選出孫中山做「中華民國第一任臨時大總統」，毋閣這个新政權（雖然犧牲真贅革命先烈）真下消，遂無一个國家來承認，互孫中山卸世卸眾，面子真歹看，彼个時瞬才知影仲了袁世凱e奸計，袁世凱大笑「哈哈！果然仲恁父e計謀矣！等恁革命軍逶半粒中國矯好勢，恁父才來「坐收漁人之利」，我早叨給北京城e各國大使館通知，叫尹「稍安勿躁」，毋倘介入中國內爭，尹定著袂來承認南京新政權，這聲孫逸仙變孫假仙矣！無效矣！功德做佇亡仔埔，哈哈！尹俍卡好，恁父早叨看出，絕對欲抴（誘）恁來大船入港，抑無，我老奸臣咧做假e是毋？哎！欲做大總統，大皇帝，恁父家己叨咧做無夠矣！ta有倘偆位換汝孫逸仙做，汝食卡醜咧！「哈哈」。
無毋著，叨安呢「功德做佇亡仔埔」「皇金等甲欲甡sui才綰走」（功敗垂成），半粒中國革命事業，犧牲真贅烈士性命……，所有e功勞，叨去互袁世凱一个人kat了了，「袁世凱以逸待勞，竊取革命成果」真正互夭壽骨e老奸臣袁世凱提了了，革命黨，尤其孫逸仙真正凝，凝甲欲吐血去！落尾也袁世凱回北京了後，做國務大總理，實際掌握北京政府大權，「挾天子以令諸候」，擎甲夯袂稠, 無人敢搧伊e腹堵邊安呢，外國大使館，攏看伊e面尺咧徛起！半月日了後，袁世凱返厝e時瞬，遭受暗殺，衛士死十外人，袁無死，懷疑孫中山主謀，種落1913七月「二次革命」孫袁戰爭e主因。
呾孫中山佇1912元旦，踮南京就任「第一任臨時大總統」，世界各國無人來承認，孫兮氣甲一个面簡那肫le，用武力亦扑袂贏人，嗯才姑不而衷到地也，又閣翻返頭佮袁世凱妥協，伊給袁講，若逼清帝退位，叨欲扶袁世凱做總統，袁世凱大喜，「哈哈，我等汝這句話等臹久矣，哎！規粒中國五億人，地尺千萬里，嘛是我袁世凱一人總卯！哈哈！」
1912年2月12日袁世凱強迫清帝退位，結束268年e滿清政權，落尾也「臨時參議會」嘛選袁世凱做大總統，3月10日就任「第二次臨時大總統」，也叨占北京城是首都e方便，世界各國才紛紛來承認新政權，孫中山失去總統名位，失志無甡張，踮南京、廣東咧返倒跋擱，「鬼混鬼混看時機」唉！講起來宛那可憐，所有e革命大業，落尾也攏總互袁世凱一傢人綰了了，真怨歎！
呾一年了後，1913二月，根據「臨時約法」，噯開國會會議，這个時瞬，袁世凱做大總統，毋閣國會議員當中，國民黨占多數，這聲袁世凱尻倉逗柄矣，頭摩咧燒矣！毋知按怎才好，四月份，真拄好，國民黨大粒頭宋教仁，忽然間遭暗殺身亡，這時瞬「南京政府」e國民黨真正摯載袂稠氣甲袂講了了，國際上嘛對袁世凱真贅批評，1913七月孫中山率國民黨佮袁世凱大戰，孫戰敗，退回廣州，組織「護國政府」，細間廟子，罔龜一下，渡一下仔時機才看覓咧，人ga下消以上，叨無法度哩！
二年了後，1915四月，袁世凱發動「全國請願聯合會」，敦請伊做皇帝，十月伊做「中華帝國」皇帝，洪憲元年，尾溜仔全國不滿，蔡鍔佇雲南起義，隔返年袁世凱氣死皇座，這棚慪戲才煞戲，毋閣佇孫中山方面e風評嘛是無好，1949國民黨敗退台灣了後，扶孫中山叫「國父」，伊e風評「見仁見智」，謳咾伊e人，講伊是民族e救星，世界e偉人，袂輸天公伯仔，反對伊e人，是給鄙相甲無一塊去，辛亥革命時，伊貪生驚死，革命士拚死拚活，艱苦坐卦呤，咱「國父」搪咧美食牛排吹冷氣，真正享受哩，佳哉伊捌英文，看報紙才知影國內咧戰爭矣！唉！實在有影！
「國父」有二擺來台灣，據台灣歷史學者李敖佇民93選立委時，有咧講，國? 這款人豬哥神重，有影卸世卸眾，佇台北車頭邊梅敷旅社睏暝e時瞬，言語袂通，寫一張紙條互服務生，寫「有花姑娘否？」，聽兮講這張字紙，這嗎囥佇國史館，尹俍客兄公卡好，這款人亦配做國「?」？1912年伊當選中華民國第一任臨時大總統時，聽兮講無國家來承認，有影漏气漏觸啊？另外孫逸仙，愛用「孫中山」，这「中山」字是日本話，外省人有e看落嘛袂爽！
21
呾話頭分二爿，杜聰明讀醫學校三年級e時瞬，拄好中國發生武昌起義，所以彼二年，孫中山佮袁世凱鬥爭e故事，尹攏知影甲真詳細，尹這陣醫學校e學生有杜聰明、蔣渭水、翁俊明、蘇樵山，師範學校有李根盛，這陣少年智識份子，逐工咧關心「祖國」e革命大勢，透早起來，叨趕緊看報紙，看祖國e革命進展到啥乜程度？有歡喜嘛有怨歎，民國初年、二年、1912～1913年間，南軍、北軍互相對抗，孫中山佮袁世凱，文鬥武鬥，是戰甲「天昏地暗，日月無光」，簡那電視連續劇le，索腳撚手死伍ket，是看甲互汝目睭肖犮〔pua4〕，心肝嗶噗彈，學生真關心「中國」政治，宛那無簡單安呢！
以杜聰明尹這陣學生囡仔來講，尹卡同情南軍孫中山這个勢力，真反對北軍袁世凱集團，尹認定講袁世凱偷提革命e成果，自封（皇帝）臨時大總統，真正可惡安呢！囡仔人思想清純，滿身熱血，事實上袁世凱嘛是有卡奸巧，叨真正”老奸臣做了有起”呢！起代先，1911三月黃花崗之役，尹叨真支持革命軍到武昌起義，各省獨立，這陣學生看報紙真歡喜，落尾也孫中山當「第一任臨時大總統」時，逐傢感到「祖國」有望矣！歡頭喜面嘴笑目笑安呢！彼是1912年1月1日e代誌。
毋閣無外久中間，嘛才二個月呤，3月10日孫中山叨換袁世凱做「第二任臨時大總統」，尹真正著驚，哎！这咁是咧辦公伙仔（辦家家酒）？哎！噹時也（原來）革命e成果去互袁世凱一个人占了了，抑無，世間哪有一任總統才做二月日叨落台？佮赫下消，尹真正同情南軍孫中山e遭遇，這个袁世凱真正該死，伊是清朝e爪扒仔將軍，利用南北對抗e勢面，「不費一兵一卒」叨逶南方革命軍e犧牲成果，完全獨卯，規碗總捧去，涼勢也涼勢叨筴去配，嗯才茲醫學校e學生，真正心狂火焯，氣甲袂講了了，尹迭迭逗陣集會，討論國家大勢，最後尹有欲摋袁世凱，為「國」除害e想法，哎！少年傢仔，七少年八少年爾，毋知世間複雜，叨衝磅潦落無想後步，叨實在有影哩！
這陣醫學校e學生，佮師範學校e同志，不時集合，佇和尚洲下湳仔所在（今蘆洲市下湳里仁愛國小附近），討論政局，尹壹律用台語發言，日本仔警察無給張弛，毋知講這陣猴囡仔，搪咧計劃「暗殺外國總統」驚天動地e國際事件，這个代誌定著真大條，萬壹若發生，吓互日本政府滿面全豆花面子盡卸，佇國際上真歹交待，閣卡講，彼時台灣嘛是日本e領土，尹是「日本人」，这毋是中國e內戰，南軍北軍赫尼軟斗！另外一方面，學生仔單純，絕對噯保守秘密，抑無消息洩露，恐驚吓顛倒互中國方面制裁，安呢嘛毋是頭路，總講一句，代誌歹紡矣！恐驚也吓發生天大地大事變，順續逶日本仔給牽牛落湳，拚落！鏘落！拂落！結落！咧驚啥韶？
這六、七个學生，除了一擺佇艋甲平樂遊飯店集會外，攏佇和尚洲下湳仔遐集會幵冓，也叨艋甲地警察贅閒人贅，有所不便，匿去庄腳卡好勢，講話嘛卡大聲卡逗搭，逶大稻埕碼頭坐鴨母船仔，落和尚洲下湳仔，嘛才七公里爾爾，流水退流半點鐘叨到矣，逐佇講話吓洽〔ha4〕吓逗句，講到心適，歡喜落斗。
少年人毋驚死，真正欲來給鏘一斗仔，看欲死豬哥抑豬母，这叨是震驚全台灣e「1913杜聰明，翁俊明暗殺袁世凱事件」，規e事件e爆發點是1913年宋教仁被殺，這聲衝突表面化，雙方攏無退路e空縫，學生尹規陣人，決定欲派人去北京暗殺袁世凱，來救國家救民族，這棚戲比柯俊雄咧搬「英烈千秋」，閣卡愛國！
代誌是安呢，民國元年元旦南軍孫中山就任第一任總統，無人來承認，自那攽軟，叫袁世凱翩倒清庭退位，3月10日忍痛讓位互袁世凱做第二任總統，引起南軍北軍心結，民國二年照臨時約法開國會，這時瞬南軍國民黨議員占多數，引起北軍袁世凱甕肚（妒忌），無外久國民黨宋教仁忽然被暗殺，南軍孫中山真正想氣，帶兵佮北軍戰爭，这叨是「二次革命」，好矣！國民黨宋教仁忽然互人暗殺e消息傳到台灣這陣醫學校e耳空e時瞬，逐傢心狂火焯，本來叨對袁世凱不滿，這聲閣卡食力，嗯才暗殺袁世凱e計劃，實際進入實行e作業階段！
民國二年，1913年5月，佇台北州，和尚洲下湳仔所在，有六个學生，決定欲派人去中國北京暗殺袁世凱，这無咧忖後步兮，港潦落矣！無做袂煞安呢，上熱心兮有杜聰明、蔣渭水、翁俊明、蘇樵山。代誌決定了後，逐像隨人四界募款，互這擺e任務吓凍完成。
「呾各位好朋友，袁世凱這个夭壽骨露暴尸，壹定噯給教示，伊這个人甚狠啦，仈人咧犧牲奮鬥，伊咧抾便兮，享受仁生榮華富貴，規碗總捧，甚超過啦，代誌若無矯，社會正義袂凍起示……。」
「南軍e宋教仁去互人暗殺，这著是袁世凱做e心機，伊e仁格青狠喔哫，無材調來領導祖國e政治，伊干礁是軍漢爾爾，吓給咱祖國帶入淒慘e地步，這款人噯除掉，才袂礙著國民族e甡張……」。
「咱決定欲派人去北京暗殺袁世凱，代誌吓成袂成歹講，毋閣噯拍拚，噯認真，噯冷靜，去北京，一條路車拄昊(路程遙遠)，噯有金錢佮體力，初步決定領用霍亂菌colera，撣入去北京自來水儲水池，來毒殺袁世凱，書生報國，這擺e任務真正沈重，才映望天公伯仔吓凍逗牽成，社會大眾給咱支援……。」
為著欲教示袁世凱，宜蘭出氏，減杜聰明一屆e蔣渭水，上介熱心，伊佇公園門口，租一間店面，賣寡文具圖書雜貨仔，宣傳民主政治e要點，提高民眾e智識水準，另外倩一个北京話e老師，臨時惡補北京話，抑無去北京欲創啥，欲去做「員外」是毋？这是真硬斗e代誌，毋是汝我想兮，赫尼簡單安呢甡，另外一方面四界去募款，互代誌進行吓順序完滿。
規e「教示袁世凱」e計劃是安呢，彼時咱台北e自來水廠採幵放e管理，無論啥乜人攏吓使行偎去參觀，尹按算北京e自來水廠嘛仝款，咱吓使派人撣入去霍亂菌，袁世凱飲著這款水了後，叨吓婁屎全身脫水，來就西天，尹俍卡好咧，互伊知影豬母肉爛抑脆！最後決議由杜聰明佮翁俊明（旅日明星是翁倩玉e阿公）二人，遠赴北京，執行任務。
杜聰明冒性命e危險，欲去北京教示世凱仔，這點互蔣渭水真感心，吓使講感動甲目淚流目淚滴，自古時勢造英雄，呾平平父母甡兮，杜聰明是醫學校e狀元，亦毋是羅漢腳仔無路用腳擻，伊按怎叨去犧牲性命？所以講佇上介危險e坎站，叨吓使看出一个成功者e崇高仁格，伊吓凍看破生死為著正義潦落這堀，宛那互後世e人鼻酸目燒感動再三，亦互抗日大師蔣渭水，佇日後杜聰明倚日本官勢榮華富貴，嘛毋敢甚給勉強，吓使溝這擺e生死關頭，互蔣謂水謳咾搭底一氏人，遵循甲命命命，仁仁仁，叨無第貳句哩！
親象這款「慷慨歌燕士，從容做楚囚」e案例，這一百年以來有四回，除了以上杜聰明、翁俊明以外，另外一擺叨是大稻埕辜顯榮，伊無惜性命去水返腳(汐止)，佮日本兵講和，互台北城減去一場大屠殺大衝突，（这進前有講過，無欲重複），另外一擺叨是民國36年二二八事變時，嘉義人欲派人去佮阿山兵交涉時，恐驚吓犧牲，無人敢去，這个危險時瞬，許世賢挺身而出，冒險拯救規嘉義市，嗯才講伊「嘉義媽祖婆」做了有起！另外一擺叨是台南二二八時瞬，韓石泉醫師無惜危險，挺身而出，去佮阿山兵談和，互台南e犧牲全省上尐。
無外久，杜聰明佮翁俊明，雙人去拜訪大稻埕黃玉階區長，黃玉階佮杜聰明e老父杜日鳳，二代是世交感情真好，杜聰明佇十年前嘛來拜訪黃玉階公館，去拜過佛堂，這聲來拜訪氏大，真給尊循叨著，玉階仙彼瞬已經六十捅矣，猶禮數僬僬，真客氣來按內聰明仙，伊謳咾聰明仙真敖讀冊，互伊嘛真有面子，又閣懷念起杜日鳳矣，日鳳已經過身十多冬矣，不止也擻念叨著，聰明仙有給玉階仙講起，欲教示袁世凱e代誌，玉階仙真正贊成，伊宛那有民族觀念叨是，伊給聰明仙講，「這回危險坐卦萬項噯卡敏醒細膩e，噯目清耳明事事張弛！」講煞，提淡薄也銀兩「嗒，这稍袋一下，外口遠路頭總是不便」聰明堅持再三，最後勉強收下，玉階仙目眶僬紅，久久無法度講話。
杜聰明讀醫學校e時瞬，有修過細菌學，有培養細菌e技術能力，貳年級e時瞬，伊佇總督府細菌研究室做研究員，雖然地位無懸，毋閣有機會出入研究室，提著茲吓致病e菌種，聰明仙佇出國e前二工，順序”提”著菌種、培養器、試管、物件僎好勢了後，囥行魔法瓶內底，倘僎欲去北京荼(tau 6 下毒)袁大頭安呢甡，這款故事講起來奇巧，毋閣伊確實是1913 ,大正二年七月初，實景e代誌。
對這擺e「旅行」，聰明仙給老母講，伊欲去日本內地，做暑假旅行，这定著是欺騙e言辭，杜家有傢業，厝內飽飽，呾聰明仙嘛21歲矣，去日本行行e，嘛是無到佗位啦，所以老母嘛同意伊出國叨著，佇聰明仙家己e看法，這擺去中國，嘛是半旅行半囥毒菌，無壹定出生入死赫尼嚴重啦！我家己吓看時機來準節〔zat〕，免驚啦！
七月初，杜聰明欲北京教示袁世凱，出發進前一暗，心情真正感慨，亦真矛盾，我好好讀醫學，哪吓潦落這堀，哎！無法度啦！人e運命天註定e，殘殘脆脆做二塊，互伊好勢矣！聰明仙最後檢查行李，錢銀、細菌魔法瓶，有關證件，滿州e醫界同仁，隨身藥品，唉，明仔載叨欲「出國」唉！
22
叨安呢，1913民國二年七月初，杜聰明佮翁俊明，提著霍亂菌e魔法瓶，坐大船欲去北京教示袁示凱，彼年伊21歲，醫學校四年級學生爾，少年人衝磅，青瞑仔毋驚槍，欲去佮「北洋政府」袁大頭，拚一下仔輸贏e，哎！這棚戲是欲按怎搬落去！伊e安全如何，真正互人忍甲一身軀肉！
尹二人坐火車到基隆，才發現蔣渭水、蘇樵山早已經佇車頭咧肖等，聰明仙真正感謝，蔣渭水嚴肅，給聰明仙交待一寡代誌，上主要是給聰明仙講，萬事安全上要緊，毋倘潦甚深，若看兮毋是勢，叨趕緊撒退，也叨中國方面資料不明，咱給掠，袁世凱嘛毋是戇人，無赫尼簡單叨互汝筴去配安呢甡，代誌袂成功亦無關係啦！當做是旅行憩陶啦！
「呾聰明仙啊！這擺真勞力，汝來做這款偉大e空課，來教示北京袁大頭，毋閣萬項噯細膩，若稍寡發現代誌不妙，叨趕緊撤退，身體安全上要緊，呾叨也大人大種矣，噯卡有氣魄甡張一下！」「我知影啦，免驚，这是咱e想法爾，無壹定吓成功，京城皇帝所在，絕對防務嚴密，佳哉我是綰一寡玻璃儀器爾，毋是夯刀夯槍，袂去夆懷疑按怎啦，这是半耍半做爾，當做旅行，互仁生一个經驗嘛好啦！」「聰明啊！我這嗎上介煩惱e代誌，叨是汝e北京話無夠輦返，汝頻若開嘴，一聲叨爆空矣！噯注意，儘量莫開嘴，抑無一聲叨去夆摠去！」「知啦，咱e背景，台灣話，日本話有卡熟，若北京話，我吓真注意叨著！」
中晝時分，杜聰明佮翁俊明叨坐信濃丸大船，離開基隆港，向目的地神戶港出發，為著驚人佮蹤，嘛為著省錢，尹雙人買三等船艙e票單，e瞬呤，這个流擺噯卡匿鬚（viciu 41低調）e，絕對毋倘展有錢甚僥擺，卡袂犯人e目，也叨少年傢仔搪青春，食卡醜e，哪有卡差啦！少年人有風景倘看叨好啊！莫閣想東想西，山雞想水鴨，叨安呢，四工了後，順序佇神戶港登陸，二人踏就日本e土地，嗍著空氣真清涼，山川秀麗，四界大樹，環境清幽，百姓客客氣氣，感覺真舒適，心情臹好安呢甡。
彼个時瞬，台灣地到大陸，噯申請護照，毋閣台灣到滿洲，毋免護照，彼瞬滿州國猶未成立，日本逶「滿州」給當作王南仔(“虛”e國家)，無屬於中國，嘛無屬於日本，另外滿州連接大陸地，所以有一个漏空，叨是台灣欲去大陸，汝若逶滿州踅一遴，叨免辦護照，若直接去大陸，叨噯護照，杜聰明去北京，叨是用「經過滿州」，這个撇步，無辦護照叨著，這嗎e問題，叨是返來e時瞬欲按怎？
杜聰明佮翁俊明，一下落船呤，袂顧兮神戶港都景緻嫷，叨緊坐車到大阪市上本町，訂一間旅社，按算欲蹛三工叨著，彼暗欣賞夜景異國風光真正心適，佮故鄉台灣無肖仝，这對二十歲e囡仔頭來講，「別有一番e感受」安呢！第貳工透早，叨緊去書局買北京e詳細地圖，佮中國e地圖，而且噯了解北京附近e基本民情風俗，若安呢，到北京了後，才袂甚離經叨著，這本地圖紅皮箍金絢，真正好看，二个少年人，瞋閣再瞋，瞋甲目睭欲肖犮去，攏給記咧頭殼內底安呢。
尹二人為著欲閃避甡人目，佇旅社登記e時瞬用假名，吓曉講溜順e日本話，頭傢亦無給懷疑，嘛毋知尹對台灣來兮，閣卡毋知尹e目的，佇彼个時代，無咧計較茲啦，橫直有錢倘趁叨好矣！管待尹兜三代人！尹二人佇旅社內底，搪著一个台灣人，伊是台中人，咧做舊衫e生理，伊號做盧安頭傢，伊毋知杜聰明e底細，嘛毋知杜e目的。
三工了後，杜佮翁二人，坐神戶開往大連e船隻，經過72點鐘了後，踮大連港就陸，杜聰明頭一擺踏入滿州e土地，感受著滿州北國e風俗氣味，大連港山海肖連，風景真嫷，杜聰明佮翁俊明佇市區踅一遴，氣氛臹好，遐e街路真正曠闊，山崙仔展望真好；呾八、九年前，日本，俄佇茲發生戰爭，聽兮講破壞甲真厲害安呢。
二人繼續行，照約束e時間，去拜訪孟天成醫師，順續蹛遐幾落暗，受著孟醫師熱忱e招待安呢，孟醫師是醫學校e先輩，伊追隨尾見外科教授來滿州執業，看著故鄉仁士來訪，真正親切，哎，卡講嘛是血跡地卡有感情，三人幵冓規暝，真逗搭安呢，尹按算後一站欲去奉天（瀋陽）、北京，毋閣 ,毋敢講出欲教示袁世凱e大條代誌。
幾工了後，孟天成到火車頭送行，杜聰明佮翁俊明二人繼續就北，坐火車到奉天市（瀋陽市），沿路大部份是平洋，遠遠e所在 ,有一寡山崙仔，有真贅低厝仔，蹛著散赤人，火車進入奉天城e時瞬，鐵枝路真贅條，奉天是古城，嘛是滿州人e發源地，內底有真贅古跡，杜聰明落車了後，才知影遐無電車，干礁有馬車爾爾，杜聰明用奚青份e北京話，去稅（租）一台馬車，去參觀古跡皇陵、城樓種種東西印象真深，佇暗頭仔e時瞬，到邱鳳儀醫師e公館拜訪，佇遐幾落暝，哎！咱在家靠父母，出外靠朋友，道謝啊！邱醫師對同鄉真正熱情，出外人叨平平安呢哩！
落尾也，杜佮翁二人，逶奉天坐火車入北京城，奚是民國二年七月二十左右e代誌，彼時袁世凱已經就任大總統一年四月日矣！北軍佮南軍，既連合又閣鬥爭，規个國家是虛lele，進前三月日，南軍國民黨要角宋教仁洶洶被暗殺，懷疑是袁世凱主使，南北仇恨加深，孫中山退回廣東組織「護國政府」南北對抗，所以講彼个時瞬，袁世凱得失真贅人，欲暗殺袁大頭e人，是排列排到巷仔尾，杜聰明無三無二，連北京話叨矯袂好勢，欲暗殺袁大頭，是無爾簡單啦！另外一方面，袁世凱軍警，特務嘛顧甲真嚴，杜聰明若無注意，泛勢去夆筴去配, 嘛無的確，算講杜佮翁e行情宛那真危險叨著，这硬拄硬，針把捲草蓆，互汝袂鐵齒咧叨著。
第貳工，杜聰明叨佮翁俊明二个，按地圖去尋水源地，算講欲撣入霍亂菌互自來水廠叨著，這个時瞬杜聰才發現代誌歹紡矣，噹時仔（原來）北京e水源地佮咱台灣無仝款，伊毋是開放式，伊e封鎖真正嚴密，無論啥乜人叨袂使接近，遐e特務佮軍隊來迴巡查，若有差錯顛誕，馬上掠人甚至開槍摋人，杜聰明洛倯洛倯，連北京話叩袂好勢，卡加汝十條命嘛無夠赴死！
起代先，杜佮翁二人漸漸靠倚水源地，無外久一个便衣兮行過來，大聲咻喚，杜聰明聽無，自那退回原路，便衣兮看杜無夯武器，干礁包袱仔（內藏細菌）爾，嘛無閣追倚來，毋閣目睭壹直掠杜、翁二人sut，杜、翁心肝內耽耽，有影驚兮咧等，袂輸簡那夆監視仝款，這个時瞬，杜真巧，馬上有反應，知影安呢落去，早慢吓出代誌，專制時代，散兵游勇，摋人佮著lue3死一隻蚼蟻呢！这互汝袂假仙咧！
嗯才e瞬呤，佇這个要緊e空縫，杜馬上佮翁人快步離開，連頭嘛毋敢斡返來看，杜聰明才知影代誌想落甚單純矣！台灣因為政治安定，無人吓去破壞水源地，所以自來水廠採開放式，無論啥乜人攏吓凍參觀，毋閣北京皇城，自來是非之地，專制君主，仈項無半撇，毋閣上驚死，對特務、軍事真正考第壹，莫怪汝聰明仙閣卡聰明，嘛干干礁無伊法度！这叨是各國e國情無仝款爾，參考參考，一擺經驗一擺乖，算講來北京憩陶憩陶，旅行故都嘛是袂醜啦！
聰明仙刺殺袁世凱e行動，最後結局是失敗矣，呾猴免弄矣，聰明仙佮翁俊明二人自那肖掣去遊皇城、古跡，橫直意到叨好矣，讀冊人宛那學業第壹優先，實在講起來，咱蹛佇台灣，屬於日本界管，佮中國無啥關係，關心關心叨好矣，免甚計較啦！北京城耍幾落工了後，決定欲南下江南，返來台灣，結束這段唐山所在e經驗。
續落e瞬呤，杜翁二人叨坐「京滬鐵路」就南，到上海了後才閣盤大船返來台灣，這條鐵路有1800公里，經過河北、山東、江蘇，壹直到「江南魚米之鄉」，沿途風景臹嫷，一幕又閣一幕，聰明仙看甲目睭欲tua4窗去，爽甲叫毋敢，互汝三工三暝叨擻念哩，聰明仙佇上海落車了後，趕緊去外國租借區佮和平飯店，去繞繞e，看看e，落尾也才坐「上海→基隆」e大阪商船返來台灣。
大船漸漸來靠近台灣島矣，八里分觀音山嘛愈來愈近矣，聰明仙真正歡喜，離開台灣二十外工，又閣返來血跡地點，聰明仙搪咧歡喜e中間，哎！哭枵啊！這聲費氣啊？也叨聰明仙，翁俊明二个無護照，出去簡單，返來時瞬，日本政府嚴格，可能以偷渡罪掠去關，到基隆港e時瞬，二个人疲疲搐，心肝mi鼓咧動動亥，心肝頭真正著驚叨著，欲知後事如何，請看下腳分解。
搪佇這个危險e空縫，好運又閣來矣！真正福氣到甲毋知去！（杜、翁二人佇海關無護照），由北極探險返台灣e白瀨中尉，搪咧講伊e探險趣事心適，講到嘴角全波，規陣警察圍佇遐，聽甲耳空搕搕，無注意尹二人e不法入境，叨pass准尹就陸，杜聰明佮翁俊明險險逃過一關，真正天公伯子有保庇，好矣，杜聰明教示袁世凱e故事，這棚戲叨佇茲煞戲矣！煞鼓矣！道謝！
～ ～ ～
※各位看倌，人客啊！杜聰明欲教示袁世凱e代誌，實在伊一氏人e欠點，無彩伊頭殼赫好，哪吓連这上基本e問題，叨矯袂好勢安呢。這款代誌，吓互後延e囝孫笑甲婁下頦，真正是譀甲有偆去，有影「荒謬至極」，歷史上e暗殺事件，無人安呢做法，實在是「前無古人，後無來者」。聰明仙啊！汝咁有考慮下腳問題？
第壹，聰明仙北京話真孱〔lam4〕，孤鳥插人群，一聲嘛去互人掠著。
第貳，聰明仙是「日本人」，萬一刺殺袁世凱真正吓變做國際糾紛。
第參，霍亂菌萬一湠開，吓錯殺一大陣無辜平民，「於心何忍」！
第肆，袁世凱是「皇帝」，定著有試食官，無壹定「能幹掉」。
第伍，聰明仙家庭映望真深，萬一身亡，按怎對吓起氏大人。
第陸，聰明仙何忍欺騙母親，擱偷唗去北京教示袁大頭。
第柒，彼時聰明仙醫學校四年級，差一年叨吓卒業，萬一身亡，國家減一个仁材。
第捌，彼年伊21歲，少年人「血氣方剛」，袂使即衝磅，無忖後步。
第玖，台灣話、北京話、東京話相差真贅，汝按怎知台灣佮中國仝國？
第拾，聰明仙尾溜也做博士，形象清新e文仁，揙做奚暗殺者，有損形象。
第六章 京都帝大求功名，異國風情苦中樂
（1915～1921）
23
1914，大正三年春尾，杜聰明醫學校卒業矣，這五年e學業成績第壹名，受著學校真正給看重，嗯才e瞬呤，卒業生致謝答詞。由聰明仙代表宣讀，这是伊一氏人上介至揚e代誌，伊第壹名考入來，嘛第壹名卒業，真正無簡單，毋閣現場有二个人袂凍來，互伊真正傷心，一个叨是老父杜日鳳，已經過身十二冬矣，伊若吓凍來現場，毋知欲外歡喜e，另外一位叨是剛〔daa2〕過身半年e小竹校長，小竹壹直培養聰明仙，看伊吓凍做醫生未，這嗎袂赴看著聰明仙光榮卒業，聰明仙徛佇教室後壁，想著滬尾公學校暝日逗陣e情景，一瞬鼻酸目燒，目淚流目淚滴，真正運命肖舛，叨無伊法哩！
呾醫學校卒業矣，排佇聰明仙面頭前，有二條路呢！一條是行臨床醫療，踏入社會實際看病來趁錢，吓使家已開醫生館，嘛吓使去「大間e病院」看門診領薪水，另外一條是行基礎研究，生理、病理、細菌、藥理，目的欲提博士，做教授，研究真艱苦硬斗，而且噯幵錢無收入，毋閣成功了後，定著名利雙收，四界受人尊敬，咱聰明仙逗底欲行佗一條路？以聰明仙e條件，二條路攏真好揀選叨著。
也叨聰明仙學校成績自來真好，卒業總成績第壹名，所以赤十字病院，台北病院，佮私仁診所，攏肖爭欲倩伊去服務，行情臹好叨著。毋閣呢！咱聰明仙「卻擻讚，有甡張」，( 男子漢 ,有骨氣)伊無咧貪圖開業優厚e利純，伊有學者e風度，欲閣進一步e研究，來充實家己e學問，这一方面是杜家生活富裕，俑仔標便便，食飽穿燒無壓力，另外一方面是伊少年e時瞬，受著「北投石」學者岡本要八郎e感召，佩服伊研究學問，無暝無日含心敆命e精神，另外又閣讀一寡西洋醫師研究佮道德感動！嗯才伊決心欲行入研究e艱苦路，叨安呢聰明仙離開血跡 ,就日本求功名，苦讀七年才提著學位，享譽全國，互伊這氏人光彩、捙贏、四界夆尊敬。
聰明仙想欲行研究路線，毋閣代誌無赫尼簡單，發生了身份認定資格大問題，也叨原本「總督府醫學校」，是日本外來政權對殖民地e臨時產物，毋是正式e學校系統，佇台灣島內行醫無代誌，毋閣欲去日本，抑是德國留學e時瞬，叨吓發生「妾身不明」e遺憾，汝資格無到，人無壹定噯互汝入學，伊毋是高中，嘛毋是醫專，嘛毋是大學，麼逗底是啥碗膏？哎！三項攏毋是，真正怨歎，頭前有講過，日本初期界管台灣「落後荒島，百業待興」，趕緊設三个教育機構「總督府醫學校」「總督府國語（師範）學校」「總督府農業學校」，这有淡薄也臨時性e殖民政策，致使講伊e卒業生有卡食虧，台灣到1921才有醫專成立，1936才有帝大醫學部成立，咱聰明仙1914卒業，這聲代誌大條，是欲以啥乜身份去大學讀研究所提博士？
呾聰明仙，壹旦ga欲行研究路線，叨噯真認真去唗尋機會，尋貴仁來逗牽或安呢甡，杜聰明佇醫學校時瞬，對細菌學真正趣味，成績臹好，將來想欲做細菌學教授學者，伊親身去拜託堀內校長，看有倘進入總督府細菌研究室去研究未？堀內一看，聰明仙原本成績優秀，而且醫學校時間叨大量研究細菌學，徛佇栽培後進e立場，叨真好禮來任命杜聰明仙入去這間研究所研究，有薄薪每月十八箍安呢，聰明仙拄著貴仁，真正歡喜，毋閣噯注意，茲是細間研究單位爾爾，伊毋是大學，無法度得著學位叨著。
聰明仙「頭路」有按算了後，拄好日本咧舉辦「東京博覽會」，好朋友廈門阮順永佮大稻埕永裕茶行頭傢，肖招伊去參觀，聰明仙提淡薄也銀兩，捸尹去日本憩陶，一月日中間行遍東京、大阪、京都、神戶，精神爽快，真正歡喜安呢，返台灣了後叨入去，總督府細菌研究所研究，無外久頂司派小泉來做指導教授，研究寄生蟲，半年了後，聰明仙感到家己學問無夠，無法度做卡深入e研究，自那決定欲去日本留學，來求學問求功名，伊又閣拜託堀內校長介紹日本e研究機構，校長真為難，也叨醫學校毋是醫專一聲欲紹介去大學，仈人吓驚，最後勉強紹介互京都帝大賀屋教授，跋伊e運氣去「試看覓」一下！本臹堀內好意，欲用公費留學，咱聰明仙「婉拒」，安呢日後卡袂縛腳縛手。
叨安呢，大正四年三月（1915民國4年），聰明彼年23歲，提著堀內校長e紹介批，逶基隆港坐大阪商船到神戶港，又閣轉入京都帝國大學醫學部，離開台灣時，厝內大細攏來送行，老母、大兄、二兄親情溫新，依依不捨，唉！這擺離開台灣，毋知置時才吓閣見面。尤其老母，歲頭已經真贅矣，互我真袂放心e，欲求功名嘛是無法度啦，噯卡巴結（堅強）一下。「聰明啊！出外三不便，噯照顧家已，萬項卡吞忍e，毋倘心苦病疼，早日完成學業」離別e時瞬，聰明仙唅著目淚，雙手佮老母，握甲拫拫拫，这咁是最後e離情，哎！第二年呤，1916秋天，老母叨不幸過身矣！彼瞬聰明仙搪咧京都帝大研究藥理。
大船離開基隆e時瞬，天空茫茫海天壹色，聰明仙對家己e前途，真正煩腦，也叨干礁憑堀內校長e一張紹介批，是欲哪去京都帝大學跋撋（出入作為），咱是醫學校爾，毋是醫專抑是大學卒業，差人一气真大气，大學咁欲收留咱？咱是殖民地e囡仔爾，咁吓夆看就卻？萬一若功名求無，又閣洛倯洛倯返來（狼狽而規），安呢嗯著卸示卸眾！聰明仙踮甲板頂頭，行來行去，阿伯仔講咧行腳花，心肝頭想東想西，ut卒寫兮面摸頂，真實兮，這擺e留學真正硬斗，萬項噯拍拚忍耐，拚落！拂落！結落，港欲潦叨潦卡深咧！這嗎無退路矣呢！
叨安呢，聰明仙到京都帝大時瞬，提堀內校長e紹介批，去拜見賀屋教授，彼時欲入京都帝大讀研究所，有分等級，大學卒業者叫”副手”，醫專卒業者叫”介補”，咱聰明仙一箍餾餾，伊毋是大學，嘛毋是醫專，干礁醫學校爾，賀屋真正為難，逗底是欲收抑毋收？落尾也賀尾叫松尾助理教授出題目，考驗聰明仙，考了真好，賀屋教授大大歡喜，真客氣收留伊，是為”介補”，叨安呢，聰明仙捸賀屋教授，研究一年e內科學，日本人對內科e檢驗真正詳細，醫局討論嘛臹認真逗搭，互聰明仙真佩服，內科學介補修一年了後，杜聰明轉入藥學研究所，捸森島大教授研究藥理學，壹直到1922冬提著博士為止。
事實上，杜聰明來日本是欲學基礎醫學（細菌、藥理、生理）……，毋是欲學臨床醫學（內科、外科、婦科……），毋閣身份地位低，到日本了後姑不而衷讀一年臨床（內科），这毋是伊e本意，無外久，伊有機會叨吓進入基礎醫學研究，所以這嗎進入藥理學研究，这是「順理成章」e代誌，是有絕對噯做無法度閃避叨是，抑無，千里迢迢來日本，咧來假e是毋？致使講聰明仙入藥理研究所e時瞬，是嘴笑目笑，笑喜甲袂講了了，民國五年到十年，杜聰明e藥理學博士研究，是伊一氏人上要緊e關鍵性歷程。
聰明仙佇京都帝大，藥理學研究所，有二位恩師影響伊真大，一个是森島教授，另外一个是尾崎副教授，尹二人攏是做代誌認真，對人真客氣e仁格者，對待聰明仙e教育，幼秀詳細盡磅逗搭，「溫文儒雅」，對科學分析是條理分明，清清楚楚，一絲叨無顛誕，嘛真看重聰明仙，袂講伊是台灣人，來看輕伊安呢，規e研究所充滿活力，頂下合心，熱情認真，祥和，佇這个場合來做研究，真正福氣叨著，彼个時瞬，杜聰明研究e題目是「一價汞佮二價汞對人體e反應」，真認真去做，而且研究e方法真優秀，森島教授是臹給謳咾，另外，聰明仙利用研究這段時間，逶德文佮英文讀甲真入腹，算講日本這六年e留學生涯，累積了真贅智識叨是。大正五年，聰明仙剛入學時，名牌掛佇上尾溜，等到大正十年這欲畢業e時瞬，伊排到頭前矣！
另外講著尾崎助教授，對聰明仙真照顧，不時嘛請聰明仙去大橋料亭食飯，抑是去高屋、大津遊覽風景，才閣返去尹公館過暝，吓使講比親兄弟閣卡親，聰明仙又閣想起滬尾公學校小竹校長e恩情，尾也杜聰明返台灣做教授時，有二擺邀請伊來冓演佮遊覽，毋閣真拍隕，尾崎教授英年早逝，聰明仙頻若想著伊，叨鼻酸目燒、感慨萬千，心肝頭真艱苦安呢！
24
聰明仙佇日本留學，差不多有七年（1915春～1922春），大部份攏蹛京都、大阪e關西地界徛起，有即尼長e時間，變做講完全接受日本文化e洗禮，聰明仔「中毒」真深，吓使講半个日本人e款，咱這嗎來給看，八九十年前日本京都方面e風土仁情，甡了按怎款？茲e代誌佇伊e回億錄有留珍貴e紀錄。
進前有一擺，叨是聰明仙剛醫學卒業時，佮廈門阮順永，台北茶行陳朝煌，逗陣來日本看「東京博覽會」時，有來過京都，對京都有頭一擺e印象，这是「異鄉」e心適，是一个進步國家e牛角（象徵），到京都e時瞬，拄好搪著嵐山線電車開通e儀式，真正鬧熱，人群佳繹，是金光鏘鏘滾，暗時蹛兮一間日本式e旅社，斡角出巷仔口，叨是真鬧熱e市街，有店面、電影院、食仔店、餐廳……，人群出出入入，閣行無久呤，看著一板石橋，遐有電車，自那坐車去瑟琶湖遊覽規下晡，感覺真舒適安呢。
大正四年四月，來京都帝大留學，这算是第三擺來京都，頭一擺是二年前，欲去北京教示袁大頭，無幾工呤，又閣坐船拚去滿州，所以印象無深，花花霧霧也，算過路客爾爾，第二擺叨是舊年來參觀「東京博覽會」，順續來京都，看伊古早e日本文化，嘛順路遊瑟琶湖，呾這擺是第三擺，正式欲來讀冊求功名，咱跋白e，這嗎毋但是蹛京都爾，而且是規个人攏噯”融入”日本社會文化，这互汝袂假仙e，噯比日本人閣卡”成”日本人，安呢才有法生存，抑無，燃眉汝叨吓互人”getout捙奮斗”，卡加汝嘛衰甲虛lele，噯返去「往回食家己」！
致使講聰明仙佇京都蹛，壓力真重，這聲尻倉逗柄矣，無拚袂煞，無鏘袂直li，嘴齒筋咬le，橫長直破，克服各種生活上e難關，这佮前二擺純粹觀光e過路客，心情完全無仝叨著，呾千里迢迢來到日本，這聲港潦落矣！無法度抽退，噯拚一斗仔輸贏le，互恁知影，恁父聰明仔宛那有貳步七仔，毋倘看「貓兮無點」！嗯才e瞬呤，這嗎生活上馬上噯解決二項代誌，交通問題佮稅厝（租屋）問題。
聰明仙稅厝，逗底噯離京都帝大外遠才是妥當？稅厝有啥乜原則否？有啥乜撇步否？茲e問題，對一个洶洶去外位讀冊e少年人來講，真正無簡單，迭迭戇戇霧霧去夆掠糊（上當）嘛毋知，尤其這嗎佇外國，这閣卡硬斗哩！毋閣咱聰明仙智商真懸，真正「聰明」無咧叫假e叨著，伊馬上訂出五个原則，第壹，主動去尋台灣籍留學生或者生理人，共同來合租，安呢毋但是吓互相照顧互相幫忙，閣吓凍降低租金。第貳，離京都帝大e校區，儘量卡近e，省時省力，上好是腳踏車，稍寡輦一下叨到位。第三，安全性噯考慮防盜防火災咱出外噯張弛，厝邊頭尾人群贅贅e所在卡好勢，稍喚一聲逐傢攏噯有聽兮。第四點，儘量吓凍”稅卡久”e優先考慮，也叨讀博士求功名噯六七年，迭迭搬厝是真艱苦費氣e代誌。第五點，厝稅貴無要緊，毋閣厝主上好是忠厚慈悲好逗陣。
1915彼个時代，京都市有五十萬仁口，咱台北市猶無十萬，所以講世界e標準給節，宛那是大都市安呢，市區e電車，有二間會社咧經營，彼時自動車猶未普遍，市區坐電車是上利便e交通工具，大阪e市區真正鬧熱，毋是咱茲「外國」留學生吓凍痟想，致使講，初頭也時瞬蹛佇郊區相國寺附近，而且佮二个台灣人合租兮，無外久叨搬來黑谷，這擺真心適，佮福建來e中國留學生蹛做伙，逐傢福建話吓通，互相照顧，感情袂醜，落尾也又閣搬來吉田e高橋氏厝屋e貳樓，高橋厝毋但是價賬俗，而且奧利桑真忠厚客氣，「視聰明仙如己出」，一月日連蹛包食頓壹在內，攏總才五箍爾，茲離京都帝大藥理教室真近，來去返捯真正利便，這聲聰明仙拄著貴仁矣，自那壹直蹛落去，到1922年初提著博士學位，離開日本為止。
聰明仙民國四年到京都留學，離這嗎差不多九十年矣，彼瞬出生e紅嬰仔，這嗎亦九十外歲矣，是大部份無佇世間矣，叨「千年田地八佰主」，“物換星移”世間免啥計較啦，所以講這嗎看聰明仙回憶資料，推算九十冬前e日本異國情調，宛那真正趣味，咱給看，聰明仙佇台灣是好業人e家族，按怎佇日本宛那噯儉腸筴肚，食穿凍霜，用錢鹹甲無啥無示，才知影九十年前，日本e「消費物價」叨已經足懸e，日本世界壹等強國，工商發達，閣再「地砈（狹）頭嘴贅物資乏搭」，定著物價是貴，貴、貴、貴甲互汝皮吓liu3（捲曲），互汝心肝搭三下，叫毋敢。
以小弟e看法，聰明仙自費來日本留學，可能有所顛誕，伊彼瞬寧可著聽堀內校長e好意，用公費留學叨好勢，橫直返去台灣，無論自費公費，攏是壹律做醫專教授教育英材爾，彼時台灣醫學教學猶「處女地」，仁材真尐，聰明仙若無返來叨無講，壹旦ga返台灣以上，定著是做台灣醫學e領導者，算講十个聰明仙嘛無夠倩，哪叨噯計較公費私費，聰明仙彼瞬讀京都帝大，生活費、學費，一年噯四、五佰箍日圓，伊讀七年，大概三仟外日圓唗袂去，彼瞬「台北江山樓」總舖司（廚師）一工嘛才一箍銀，所以聰明仙所幵e錢，大概合這嗎新台幣600萬～800萬中間，真正是天文數目，提台灣錢去日本幵，宛那鼻筋吓giu6安呢。目前西元2000年，嘛是真尐人自費去日本讀碩士、博士，也叨費用甚貴，去日本讀比美國卡貴，有影算袂和啦！
三十外年前，小弟母校，台大牙醫系，宛那發生肖仝e代誌，日本人統治台灣五十冬，雖然醫學教育真認真咧做，毋閣真遺憾，無設立齒科部門，台灣人嘴齒宛那吓疼，壹直拖遷到民國44年（1955九月），才姑不而衷台大牙醫系頭一擺招生，嘛才招著五个爾爾，算講「嘴唇皮肖款待」，阿山咧講「湊合湊合，將就將就」無咧給咱信斗，致使講齒科醫學佇台灣有斷層e危機（目前則是過剩），過返年台南名醫韓石泉公子韓良俊考入來，六年卒業了後，去日本深造，學問真好得著博士，這位優秀e仁材，日本人想欲給留落來，踮日本服務，良俊仙「左右為難」，日本人「盛情難卻，客氣再三」台灣牙齒界則「一片荒蕪，極待人才開拓」，真正是八十年前「杜聰明e牙醫版」，良俊仙欲按怎才好！
最後，韓良俊主任決定返台灣，對幫助台灣齒科「一片荒蕪」e乏搭款勢，領導台灣齒科界互伊大葩尾旺廣，才袂學術斷層安呢！也叨伊有真大e使命感，台灣齒科界才有今仔日e成就，佇國際上佮人「平起平坐」，伊e精神，有點仔親象李遠哲佇出名了後，「婉拒國外高薪」，壹心返來故鄉服務仝款。小弟1973佇台大病齒科部門實習e時瞬，良俊仙做阮e教授，伊教學認真，做人親切謙虛，真正愛護學生，對患者是客氣有加，是小弟一氏人上介佩服e仁格者。
九十年前，聰明仙最後一擺e稅厝，是佇吉田e「高橋厝」遐，也叨環境真好，厝稅閣俗，嗯才壹蹛落去，連環後續壹直到離開日本為止，高橋厝算講是聰明仙e第貳故鄉，第貳e血跡地，嘛無到佗位，致使講聰明仙對遐感情真深，對厝主高橋氏大，閣卡是感恩閣再感恩，勞力閣再勞力，一氏人恩情搭搭搭，仁仁仁，互伊七十年後仁生尾路時想起高橋氏，宛那目眶僬紅「泣不成聲」！出外人叨少年哩！親象「寒天飲水，點滴在心頭」，番薯仔叨重感情哩，佇伊上艱苦上乏搭e時瞬，大力幫忙汝，閣卡鐵齒e人，嘛摯載袂稠哩！
高橋氏厝屋，壹樓蹛厝e高橋夫人，已經五十歲矣，另外有阿媽七十捅，佮二个囡仔，攏總四个人，貳樓稅互聰明仙蹛，高橋規傢人善良客氣，真好逗陣，對聰明仙臹親切，互伊真感心，這時聰明仙身強力壯，不時嘛給樓腳大細，看頭看尾逗顧厝，袂輸簡那一傢人仝款。
算講聰明仙認真學業卡無張弛著，壹直到有一回，伊去大阪旅行e時瞬。樓腳e阿媽忽然來過身去，斷气進前猶壹直咧擻念聰明仙，無外久呤，聰明仙返來才知驚，目淚遴遴擱抱屍痛哭真正感傷安呢甡，哎！聰明仙真正「早熟」，才二十外歲爾，叨經過阿姑、老父、小竹、高橋阿媽，面對面親身料理後事，互伊性格真正特殊，人生看甲真開，佇中年e時瞬，叨逶家已e墓地看好勢矣，袂輸古早e皇帝仝款，有影真特別啊特別！
彼个時代，京都人無咧食豬e內臟，聰明仙佇街頭巷尾，賴賴趖，看著尹遐e店，處理豬肝豬心價賬真俗，嘴齒瀾答答津，也叨這款物件佇咱台灣地，真正高貴安呢，壹般e食法是炒麻油抑是薑絲真補身閣好食，爽甲叫毋敢，不而顧呢，阿本仔無咧信這套，聰明仙掠著這个空縫，迭迭嘛去買遐物件，看欲爆炒抑是焄鹹打打牙祭，孝孤一頓仔膳饈（唸叉操）咧。
聰明仙去買豬肝豬心e時瞬，攏騙阿本仔講，是欲學校做實驗用兮，才袂去夆啼笑伊是野蠻人，嘛卡袂逶台灣人攏罵參落，这宛那是各國e行情無仝，無稀罕，一百年了後e今仔日，美國嘛臹贅所在，無食豬e內臟，照安呢給看，一百年前e京都，尹e經濟袂醜，無需要為著食穿甚過硬斗，中國支那人叨無仝款，到這嗎西元2000年矣，廣東料理猶有「龍虎鳳套餐」，取蛇、貓、雞混合火鍋，食了補補補，柬埔寨人有食「炸蜘蛛」，看落汝吓翩腹吐大腸頭！
關於稅厝e厝主，高橋夫人身體真好，民國11年，杜聰明返來台灣了後，有迭迭連絡，大東亞戰爭了後，遂失去音訊，毋閣聰明仙想著少年彼段日子，真正感心懷念，二次戰後，杜聰明舊地重遊，重新查伊e新地址，閣再見面時，夫人已經頭毛僬白，毋閣聲音气口攏無變化，聰明仙嘛五十外歲人矣，「二人相見，不勝感慨」，唉！歲月無情宛那姑不而衷，聰明仙拜訪了後，又閣佇附近仔行行e，規个人感覺少年二十外歲，總是連肖續蹛六、七年，伊e感情竄筋入骨是威威鑽，年久月深是膨膨英，印象定著臹深。
25
聰明仙留留學日本，是1915-1921, 民國四年到十年尾，也叨「孤鳥插人群」，長年蹛佇異鄉外國，不時吓想起家鄉e景物風格，三更暝半迭迭嘛眠夢驚醒，有時夢著滬尾迓祖師公大拜拜，有時夢著老父過身時e法事，輕輕啌啌，有時夢著醫學校教官e訓練……，睜神了後，目淚流甲規頭枕，这是「人之常情」，閣卡講嘛是血跡地上介親切，嗯才e瞬呤，聰明仙，對台灣e人佮事務真正敏感，頻若台灣來兮，攏當做寶貝，台灣來e留學生，閣卡親切，佇茲吓凍聽著台灣話，吓凍食著台灣菜，吓凍聽著故鄉e民俗故事，求功名真硬斗艱苦，意志堅強噯吞忍。
大正四年（1915），杜聰明寢到京都e時瞬，台灣來e留學生有二十外人，大部份讀志主中學，落尾也仁數增加，到伊離開日本大正十年時，已經有五六十人矣，其中呂阿墉是伊上好e朋友，阿墉真敖讀書，最後佇日本法院做法官，真正無簡單，替咱台灣人鋪面子，另外佇醫學方面，同窗廖煥章，離開京都帝大，唗去中國南京省立病院，前途袂醜致使講京都帝大，干礁偆我一人爾，不止也希微，彼時e「台灣同鄉會」不時有咧逗陣，嘛吓傳達家鄉台灣e音訊，逐傢見面，真正歡喜，日後回憶起來，是著真心適，趣味安呢！
聰明仙毋但是對台灣e留學生真好禮，而且對中國大陸去e留學生，宛那真噯交陪，對尹真好奇叨著，因為這層關係，落尾也遂引聰明仙入去國民黨e前身「中華革命黨」做黨員，亦著是講，伊認同中國e革命，徛佇南軍這爿叨著，也叨三年前（民國2年7月），伊曾經佮翁俊明二人就北京欲教示袁世凱，猶印象深刻li，聰明仙佇大正五年辣昊，（1916年約8月）由夏建安紹介，正式加入「中華革命黨」，受黨國革命教育e洗禮。
算講聰明仙雖然是台灣人，毋閣宛那有關心中國大陸e政治大局，呾天地悠悠，法輪常轉，佛說因果報應，有時真正互汝袂鐵齒e，三十年了後，1946三月，彼時台灣二二八事變，阿山兵搪咧四界掠人，聰明仙茲藏遐閃，真正匿甲無位倘去，性命真正危險，尾溜仔臭頭仔派白崇禧將軍來台，伊知影杜聰明是資格上老e國命黨員「中華革命黨員」馬上真客氣，自那落軟歡喜，叫伊去做省府委員，聰明仙「化險為夷」，真正人e運命。
代誌e源頭是安呢，1909明治四十二年，聰明仙剛考稠總督府醫學校e時瞬，雖然考著狀元，毋閣身體烏礁，不吉不吉，教官會議嫌伊細粒，體格「丙下」，無欲互伊入學，好佳哉主席長野「力排眾議」，堅持互伊入學，这是聰明仙真大e恩情人，尾也1916聰明來日本留學e時瞬，長野宛那退休佇大阪，離京都帝大無外遠，長野教授知影聰明仙，考稠醫學校第壹名，卒業嘛第壹名，壯材磊斗先天帶命，卻款人日後絕對甡毛發角，金光鏘鏘滾安呢，對聰明杜真正好禮，嗯才e瞬呤，佇大正五年暑假，紹介聰明仙去大阪醫科大學血清藥院，加減學一寡血清，治療天花、毒蛇……，算講佮本行藥理嘛真有牽連叨著。
聰明仙佇大阪醫科大學血清院，熟似一陣中國大陸留學生，余岩、汪尊美、瞿鈞、夏建安，佮尹互相尊重，講話吓siapa15，吓烘合吓投緣，逐傢感情臹好，叨頻若坐落幵冓，叨牽山伴林講到歡喜落斗，長尻倉坐落，規晡安呢袂起來，講話e當中，定著吓講起，中國爛敗，社會衰韶長短，百姓艱苦坐卦e困境，聽甲聰明仙耳仔搕搕，這陣中國留學生，壹直給聰明仙灌思想，「荼神經」，聰明笑笑也這「唉！恁講e我攏知影啦，有關南軍北軍，孫中山佮袁世凱e對抗，我是捌甲有偆去，抑無，我三年前哪吓冒險欲去刺殺袁世凱！」嗯才e瞬呤，夏建安鼓吹聰明仙，加入「中華革命黨」（國民黨前身），聰明仙講「真好！」，所以，杜聰明佇夏建安e紹介以上，佇1916八月加入中華革命黨，伊領著黨證e時瞬感到真光榮安呢。
了後，長野教授對聰明仙非常e客氣，除了紹介伊去大阪醫科大學血清藥院以外，嘛迭迭邀請聰明仙去尹兜做客，算講奧利桑真正看重少年傢仔，咱聰明仙e行情真好，人緣真好叨無話講，致使講聰明仙，迭迭佇禮拜日e時瞬，坐車去大阪拜訪長野教授，長野真客氣真惜情。僎真高貴料理請伊，互伊真歹勢，暗時睏眠呤，二人仝睏一領蚊罩內底，尹e感情袂輸「親兄第」仝款，聰明仙不時感動落淚，壹直逗陣到禮拜壹，噯趕返去京都上課，也叨杜聰明佇日本e所在，受著真贅日本人e恩情，一氏人攏真感動，壹直到大東亞戰爭，二次大戰，聰明仙宛那想袂曉，即尼溫情好禮清氣負責e優良民族，按怎吓一步一步潦落戰爭e毒淈，是按怎無奚敖人來阻擋來停損，互日本受著敗戰e艱苦？
另外一層代誌，叨是彼時大阪並無中國菜館，「無魚蝦嘛好」，長野教授，吓記咧，有幾落擺佇台灣e時瞬，有食著二十四菜齣e台式筵席，真正懷念安呢，台灣菜色，油煎炸炊，香氣中足，有特別e風味，佮日本料理無肖仝，長野教授講，伊想欲招待二桌日本朋友，借問聰明仙咁有法度做出來？聰明仙趕緊印講「有法度，有法度，絕對袂失禮」這个時瞬，壹定噯展氣魄組兮，叨「昊內無坎，嘛噯beh去」，港無潦袂煞le，這个流擺台灣齣頭全靠汝矣！
嗯才e瞬呤，聰明仙「卸駕親征」，家已菜籃仔綰le，一陣人拚到大阪市川口中國街，去買豬腳、鮑魚、香菇、豆腐……，真贅物件。返來了後，又閣拜託京都女留學生周慈好姑娘仔，來做助手共同料理，攏總舞三點外鐘，做好二桌台灣料理，安呢芳貢貢，油滴滴紅紅幼幼，人客是食甲碗空盤離，盡磅逗搭，燒酒是飲甲紅膏赤ci4，嘴油舌甘，推落！鏘落！拚落！逐傢飽拄拄，是爽甲叫毋敢，嘛有人客順勢咧問「咁吓凍來阮兜辦一桌仔？」哈哈！咱聰明仙做了一擺真成功e國民外交，奚大約是民國六年e代誌。
戰爭了後，消息斷絕，民國44年，聰明仙重回日本e時瞬，長野已經過往矣，見著夫人時，已經75歲矣，雙人攏流目淚，聰明仙想看三十外年前e代誌，「猶歷歷在目」，感慨無量，民國52年，1963，最後一擺拜訪夫人時，已經83歲矣，夫人感動「親友故舊」干礁偆汝一个人來訪爾爾，聰明仙目屑四湳垂，呆呆徛佇遐……。
聰明仙1915醫學校卒業e時瞬，想欲來日本留學，堀內校長看伊是一个仁材，卒業考第壹名，自那真熱誠給紹介去京都帝大深造，造成聰明仙一氏人e光彩佮名聲，聰明仙真感恩，伊佇京都帝大讀書e時瞬，堀內校長，不時返來日本（公事）出張，逐擺聰明仙得著消息了後，攏「必恭必敬」去神戶碼頭迎接，回程時仝款去碼頭送行，堀內校長真正客氣，聰明仙e感覺，叨簡那會晤家己e老父仝款，堀內嘛紹介伊留德時好朋友市川博士，伊是細菌專家，對霍亂、天花真有研究，聰明仙得著袂尐知識，尾溜仔去高野山看滿山櫻花真嫷，算講大幵眼界安呢。
1921年10月初（大正、民國十年），杜聰明博士論文完成，自那返來台灣，第貳年，京都帝大正式頒發博士證書，算講互「外國人」（非日語系）頭一擺e博士，聰明仙做助教授，全台灣歡喜we we，由台灣人e專家來領導台灣醫學發展，定著吓盡磅逗搭，吓真好勢叨著，攏總給算，聰明仙佇1915春天到日本，1921冬天回台灣，總共用6年半才著博士，伊用自費大約幵三四仟箍日圓以上（合這嗎六百至八佰萬NT），算起來宛那真硬斗，看伊求功名，毋是看「俺公仔食雞肫脆脆」赫尼簡單，尻倉後嘛是千辛萬苦，含心敆命咧捙拚安呢甡。
第七章 船頂交陪姑娘好，原本霧峯林家人
（1919～1922）
26
民國11年5月22（1922），台北江山樓，人群佳繹，喜氣沖天，金光鏘鏘滾，遐搪咧舉辦一場盛大e「世紀婚禮」，這對新人，查甫兮是台灣頭一个醫學博士「杜聰明仙」，彼年春秋30，查某e是霧峯林家望族林文察將軍e間仔孫（玄孫）林雙隨小姐，彼年22歲，吓使講「郎材女貌」，這對尪仔嫫，烘合登對盡磅逗搭，真正適配安呢甡，這擺e婚事，真正特殊奇巧，咱來一條一條給解說，宛那真心適，算講台灣奇談，嘛無到佗位li，其中內容複雜萬分，真正特別，呾這棚戲齣，按怎搬落去，咱斟酌給看一下。
這二位少年夫妻，逶1918（民國七年）年初熟似到1922，攏總四年e「愛情長跑」，過程是不止也心適，二爿「陳皮蘇黨」，真正有繃安呢，一个是北部人，一个是中部人，一个是讀書人醫學博士，文質彬彬，一个是霧峯林家望族林文察將軍e間仔孫，貴氣中足，一个是佛教背景，一个是基督教無夯香兮，一个是泉州腔，一个是漳州腔，呾這門親事是按怎結合？二十冬後，尹e查某囝又閣嫁互板橋林家望族，有影「親上加親」，財源豐富囝孫滿堂，聰明仙活欲規百歲，社會仁脈豐沛，黨政學商醫「盤根錯節」，叨出名人人面真闊，隨人是捌甲有偆去。
呾e瞬呤，聰明仙到日本留學，亦已經第四年矣，心肝內不時嘛想著血跡地台灣e食穿生活，社會長短，致使講大正七年（1918）歇辣，伊決定返來台灣探親，看一下仔親戚五十，食一下仔燒肉粽le，順續給過身二年e阿母燒香祭拜，唉！不孝子聰明仔返來矣，為著求功名，姑不而衷留學他鄉外里，無法度佇最後一口气來奉孝，有影真正遺憾，彼年聰明仙叨也二十六歲矣，做人親切逗搭，學問飽飽，矯摵代誌完滿嫷气，是社會標準e好青年，呾聰明仙佇1918七月初逶神戶港，坐大船”America丸”，返來基隆港。
這隻大船離開神戶港e時瞬，聰明仙e心肝頭，真正激動，看著岸邊e厝屋山崙仔，漸漸來消失，又閣想起三年前就陸時e歡喜，伊徛佇船頂甲板遐，看著海天壹色，看著白雲蕊蕊，看著遠遠e海鳥，真正茫閣醉，哈哈！這台船欲駛對台灣，想落叨歡喜，搪咧看風景，看甲神嗯神（看得入神）e時瞬，洶洶有人來搭伊e肩胛頭，行倚來佮伊幵冓，伊毋是仈人，正正是好朋友蔡培火，彼年31，做人海派真有義氣，好禮慷慨無地講，對聰明仙是照顧簡那兄弟le，培火仙宛那讀冊人，迭迭陪林獻堂咧做「文化協會」e政治活動，不時嘛咧出入日本，簡那咧行灶腳咧。
呾蔡培火ga是聰明仙e match以上，呾這聲聰明仔叨袂無聊矣，培火講「呾這台船仔駛對台灣去，嗯才e瞬呤，內底大部份是留學生佮生理人佮尹e家屬，船內真贅人我攏有肖捌，若有啥乜代誌，才講一聲，儘量我叨吓凍……」，咱聰明仙袂輸孤鳥插人群e，真孤單安呢，這嗎有培火仙做擋撇，做靠山，心情真正安定，事實上聰明無講外清楚，這台船e旅客來去東西，大部份攏捍霧峯林家e大家長獻堂仙e手頭，規帆人迭迭出入日本，集體安排船班卡好勢叨著，蔡培火算講尹這个集團e連絡人，外務人，真得獻堂仙e疼痛，彼年獻堂仙40歲，伊主張以和平e方式抗日，爭取台灣人e政權，有「抗日大師」e稱呼。
大船一下行入瀨戶內海呤，蔡培火叨宣佈，盈暗欲佇船頂舉辦「盛大e懇親晚會」，有冓演、唸歌、跳舞、答嘴古……種種節日，一方面來排除船頂無聊，一方面嘛吓凍互茲台灣e留學生，逐傢肖捌，後日仔返台灣互相牽成。」嗯才e瞬呤，茲台灣留學生臹歡喜，隨人索腳撚手；莿耶耶，拚身拚命，金光鏘鏘滾，欲踮暗時仔「晚會」來展一下仔腳手咧。
晚會無外久呤，叨輪著聰明仙就台冓演矣，聰明仙臹久無看著這个場面矣，伊心情真好，聲調提懸，大聲冓演，伊e內容豐富，气口心適，「口若懸河」講到嘴角全波，下腳e留學生，逐傢是聽甲耳空搕搕，醉茫茫安呢，呾平平是台灣人，仝佇一隻船仔頂頭，志氣揚揚心情蘇爽，規个舞台氣氛真好，留學生一个一个就台，袂輸「搬王剪」（一幕接一幕好戲）le，逐傢歡聲雷動，目睭看甲肖犮〔pua4〕，蹼仔聲是摧甲叫毋敢去！
其中有一个小留學生，叫林雙隨，這位姑娘仔彼瞬18歲，搪青搪少年，伊是霧峯林家，林文察將軍e間仔孫，伊噯叫獻堂仙「叔公」，噯叫林文察「阿祖」，這台船ga是獻堂仙來捍頭以上，這位高貴e小留學生，坐尹e船返台灣，这是定著e代誌安呢甡，林雙隨這位小姑娘仔，伊佇日本讀「青山女學院」，讀音樂科，對唸歌方面，真有飽學，嗯才e瞬呤，彼暗仔船頂e「留學生晚會」，伊嘛就台演唱歌曲，伊連肖續唸二條歌，下腳蹼仔聲嚬嗙叫，風聲喚喊真謳咾！
坐佇台下e聰明仙，看著林雙隨咧唸歌，心肝摵一下，哎！哪有即尼嫷e姑娘仔，雙隨仔彼時十八歲，面模仔嫷閣明，皮膚白泡泡，氣質真好，人講「近水樓台先得月」，咱聰明仙嘛二十六矣，看落心肝必噗彈，對伊真意愛，想欲娶伊來做牽手呢！也叨彼段關係，改變了杜聰明一氏人e前途，嘛間接影響著台灣官學醫三界e行情安呢，所以人e運命昊註定，真正互汝袂鐵齒咧。
「懇親晚會」開到一半e時瞬，暫時來歇睏，這个時瞬，聰明仙趕緊行倚去林雙隨身邊，尋機會佮伊問好套關係，先給謳咾，講伊真敖唸歌，音樂素養真好，聰明仙態度親切，意志堅強，又閣是醫生e資格，宛那引起雙隨e注意，這段情囥佇心肝頭，暫且不表。
呾杜聰明初步佮林雙隨接觸e時，馬上知影伊袂曉講台灣話，規台船仔干礁伊一个台灣人袂曉，聰明仙是巧巧人，在場叨反應，伊是毋是日本出世e？抑是真細漢叨到日本蹛？抑無大人大種矣，台灣人哪吓袂曉母語？留學生艱苦，欲食欲蹛真硬斗，我聰明仔來日本，三年爾叨已經舞甲青頭黃目，呾这囡仔痞，是咧揙啥魍啦？結局無毋著，雙隨仔比聰明閣卡偉大，汝聰明仔來三年，毋閣我雙隨「小朋友」爾，叨已經來留學十一年矣！日本氣質在在在，仁仁仁，阮「霧峯林家」e派頭，汝咁無稍探聽一下！
彼暗仔，聰明仙踮兮咧拋車蹸睏袂去，規粒頭殼膨膨英（傷腦筋），閣卡講嘛是雙隨仔e形影，壹直佇面頭前踅來踅去，簡那走馬仔燈仝款，呾這聲聰明仙桃花開矣，雙隨姑娘仔e影身，竄筋入骨威威鑽，直攻聰明e心房，呾聰明仙自細漢叨第壹名，仁生猶毋捌失意去，逗底伊有法度得著這段因緣否？这真正歹講！彼暗仔聰明仙睏袂去，另外一點，也叨起風雨，船身亥甲真厲害，嘛互聰明仙感到臹袂自在！
27
船頂e時間，干礁偆三工，叨欲駛到基隆港矣，致使講聰明仙心肝內，真正著急，一方面趕緊尋機會佮雙隨接近，人有接觸，叨加減有感情，希望卡吓成功，這个流擺(場合)，情書叨無卡擢，趕緊互姑娘仔好印象卡要緊，另外一方面，趕緊去尋蔡培火想辦法，培火仙一下看著聰明仔戇神戇神，「心不在焉」心肝頭叨按一半矣，「果然不錯」，聖聖互我掠準準，這箍戇兮是咧歃著姑娘仔e款呢！「呾聰明啊！汝是咧揙啥魍啦！哪吓……」
聰明仙ga有培火全力幫忙以上，欲娶雙隨e代誌，定著咧夯龜蓋（有所徵兆）矣！毋閣这是1918民國7年e代誌，正經娶嫫是民國11年e結果，中間宛那拄著真贅困難，這四年e矯撼返捯，聰明仙真正「食苦簡那食補」le，咱跋白e，一个醫生人，娶嫫娶甲赫艱苦，宛那互人真正感慨，上主要e原因，叨是老父林仲衡真看重林雙隨，有欲給贅尪e打算，这嘛是無法度e代誌，也叨連甡四个查某囝，宛那真硬斗叨是，毋閣聰明仙定著無欲互人招，嗯才，「世紀e婚禮」，揙做「世紀e歹矯」。
蔡培火佮獻堂仙真好，雙隨噯叫獻堂仙「叔公」，霧峯林家e長短，培火仙知甲有偆去，其中e矛盾困難，培火仙真正煩惱，對聰明仙來講，這个空縫壹定噯幫忙搭底，抑無二爿攏真歹交待，我培伙仔咧做假e是毋，嗯才佇大船停靠基隆港進前，培火做了三件代誌。第一點，伊掣聰明仙去見雙隨，儘量給伊灌甜湯，講咱聰明e學問佮做人東西，互伊對聰明仙有好印象，安呢欲結親戚叨卡有緣。
第二件叨是掣聰明仙去見獻堂仙e夫人「楊嫂仔」，彼瞬獻堂林家無佇船頂，見著楊嫂仔，叨等於佮「最高領導人」交陪仝款，規e霧峯林家，這嗎攏是獻堂仙咧捍頭，若是佇老父林仲衡面頭前，講寡好話，嘛是真有幫助哩，第三件代誌，叨是利用二點鐘e時間，對霧峯林家e興衰，做徹底e說明，互聰明仙知影好醜長短，人講「娶嫫看娘ne4」，了解家庭e情形，總是加減有卡好叨著。
霧峯林家，佇同治年間，1860～1870，分做頂厝佮下厝二个族群，下厝出二个武將，叫林文察將軍佮林文明將軍，彼時清朝搪咧為太平天國e「叛亂」，舞甲滿面全豆花，軍兵衰韶敗經，強欲袂收山攬尾e，林文察將軍互清朝派往唐山去扑長毛尾賊「太平天國」，立下袂尐e戰功，清廷方面宛那互尹家族真贅商業利純，致使講無外久，變做全台灣上好額e家族。
林文察後甡叫林朝棟，伊佮頂厝系統e獻堂是仝輩e，林朝棟e後甡叫林仲衡，為人海派慷慨，噯吟詩作對，是咱霧峯所在大學問家，仲衡佇1901明治三十四年甡林雙隨，所以講林雙隨噯叫獻堂仙「叔公」，規e日本時代，獻堂仙真正活骨敖跳踏（很外向），四界朋友交陪人面真闊，伊真有民族意識，不時嘛佮阿本仔咧「一枝長一枝短」，主張和平改革，阿本仔嘛無法度哩！逐傢尊伊「抗日大師」，伊迭迭出入日本，所以這台船e懇親會，佮伊嘛真有關係安呢。
1895清國甲午戰敗，日本兵進占台灣，一四界義民義軍，規陣咧陣拚，咱霧峯e林家望族，呾好命人，驚死驚觸，嗯才e瞬呤，規傢人搬返去廈門避難，林朝棟掣尹囝林仲衡，惦泉州蹛一睏仔，無外久仲衡，娶一个「書香門第」莊小姐為妻，也叨身軀邊洘洘，財源豐富，自那搬去北京、上海、四界遊學，仲衡噯詩噯古董文物。
1901生海所在，甡落林雙隨，落尾也搬來台灣蹛，又閣甡幾落个查某囝，佇彼个時代，这是真食力e代誌，致做講仲衡心肝頭，有咧按算，將來林雙隨噯用招贅e方式來傳香煙，抑無，我林家e香爐無人綰？这宛那是姑不而衷e代誌，無想著「半路殺出个程咬金」，意志堅強e杜聰明，硬欲掣林雙隨，互林仲衡真正「左右為難」，心頭真疼講袂出嘴，另外聰明仙嘛感到真硬斗，想講娶一个嫫，哪吓即尼艱苦，壹直互人刁古董（被刁難）叨著，算講「扛轎兮嫌艱苦，坐轎兮嘛嫌艱苦」！嗯才蔡培火佮獻堂仙聽著這个消息呤，才咧頭大面肆方，毋知欲按怎矯才好勢！
e瞬呤，林仲衡這名詩仙，海內外返捯十外年，漸漸知影阿本仔e厲害，嘛理解日本絕對是世界第壹強國，伊這十五年內，連肖續扑贏甲午戰爭，併吞朝鮮，扑贏日俄戰爭，扑贏一次大戰、國勢強，經濟發展，照這个扮勢落去，滿州一百萬平方公里，早慢嘛吓互阿本仔食落去，日本人擎甲夯袂稠，伊安呢橫長直破鏘鏘滾，亞洲絕對搶第壹，仲衡想想e，呾叨「西瓜偎大爿」矣，這聲叨緊來做「日本人」啊！安呢才有法度提高身份、繁榮、進步、清氣、文化，咱攏噯追隨阿本仔，才袂下消安呢甡。
呾愛女林雙隨，一工一工大漢矣，為著欲改變伊e氣質，林仲衡決定送雙隨去日本讀冊，講日本話，加減倚附日本文化，安呢才有法度徛佇時代e先鋒，來發揚我林家e名聲著，嗯才e瞬，1907年，林雙隨才七歲呤，仲衡仙叨給閃離大嫫，暗中掣雙隨去日本東京，寄養佇日本人e家庭，定著亦幵袂尐e銀兩，大嫫（雙隨甡母）逐工思念，逐工煩惱，嘛是無卡擢，雙隨留學日本，逶1907到1919這十二噹中，嘛才返台灣二擺爾爾，一擺民國5年，一擺叨是這四佮杜聰明仝船。已經十八歲矣，大人大種矣！這擺返來，四月日了後，老母叨破病身亡矣，算講最後一擺e見面叨著，这是仁間e大悲劇，呾仲衡仙是咧揙啥魍啦？仁命關天，真贅人對仲衡真袂諒解安呢！
林雙隨佇七歲e時瞬，去日本讀幼兒園，尾也讀隱原小學，14歲e時瞬讀「青山女學院」伊讀音樂學科，壹直到1919卒業了後，返來台灣彼个時瞬，杜聰明是趇甲嚬嗙叫，林家嘛是真正為難，雙隨姑娘仔返來台中了後，做大里公學校老師，教音樂佮日本語，壹直到民國十一年1922嫁去台北為止。
另有，有關霧峯林家e故事，宛那噯了解，霧峯林家表面上真捙營(不可一世)真好額，毋額這个家族實在是悲劇落場，尻倉後有真贅悽慘e典故，吓使講林家e業產，是林文察佮林文明二條命換來e，林家e悲慘毋是尹一傢人e代誌爾，嘛是全台灣人e悲劇，台灣人袂記咧教訓，定著1947e「二二八事變」又閣歷史重演矣，台灣人佇清朝這个外來政權e剝削以上，台灣人真正苦啊苦啊！
28
西元1680左右，歐洲e牛頓，茉勃尼慈發現微積分，轟動武林，驚動萬教，佇東方e「大清帝國」，嘛有一項偉大e”成就”，叨是以武力強行併吞台灣島，毋閣大清帝國，爛敗飯桶，無半路撇，根本無能力界管台灣，致使台灣地變做無政府e勢面，一四界土匪，食錢、鱸鰻、族群械鬥、欺侮散赤軟呰百姓、鴨母吞塗蚓，閣再加上破病、營養醜，咱台灣e百姓這二百外年噹中，袂輸活佇地獄仝款。
叨安呢，混亂e局面，連肖續二百外年，到1860左右，咱台灣中部，漸漸發展出草屯洪欉家族佮阿罩霧林家，二个家族對立e勢面，草屯e洪欉家族仁員，財產稍寡占優勢，引起阿罩霧林家e危機感，恐驚安呢鬥爭落去，吓夆筴去配，嗯才決定欲佮清朝官廳合作，來摃倒洪欉，求取囝孫萬代興旺，清朝彼瞬搪咧為太平天國，艱苦坐卦，舞甲滿面全豆花，一下聽著林家欲合作扑洪欉，宛那真歡喜，橫直死是死台灣人爾，咱大清帝國噯一个一个給捻，袂凍互地方武力坐大，才袂閣來台灣版e「太平天國」作亂。
1862秋，台中北屯戴潮春「叛亂」，兵丁攻入彰化城，大甲、嘉義，清朝官兵摯載袂稠，強欲倒笪味是，這个時瞬，清朝有欲考驗阿罩霧林家e兵丁實力，自那由福建水師官兵，佮林家林文察、林文明兵力合作，共同來反攻戴潮春e軍隊，果然無顛誕，林家兵丁戰力真強，無外久叨逶戴潮春「叛軍」給消滅撣sat，同治皇帝真歡喜，哈哈哈，台灣人摋台灣人，臹敖臹lau4，阮大清王朝，勤政愛民，免四兩力，叨吓「坐收漁翁」之利！
戴潮春夆消滅，这是「小case」爾，這嗎上介要緊e，叨是按怎來解決「洪欉」佮「林家」e決鬥e大問題，洪欉佮林家，無論財產、田園、仁員、兵力，攏是「半斤八兩」，一山不容二虎，早慢噯發生族群e決鬥，嗯才e瞬呤，清兵丁曰健聯合阿罩霧林家兵丁，佇1864九月，向洪欉家族青狠進攻，洪欉方面嘛堅守陣地寸土不讓，这叨是有名e「北勢湳戰役」（現時草屯鎮、北勢、中原二里），這回e戰事真正慘烈，雙方死傷慘重，也叨關係著族群生死存亡，無拚袂煞，最後阿罩霧林家有官方幫忙，扑贏戰事，占領真贅洪欉家族e田園、厝屋、水源，變成全台灣上好額e家族，消息傳回北京，同治皇帝真歡喜，下令噯閣扑甲工夫e，逶洪欉殘餘e勢力，給完全消滅，以絕後患，同治皇帝毋是欲幫忙林家，伊是欲留互洪家真大e冤仇，後日仔欲捽掉林家時，倘來叫洪家報仇「留下伏筆」安呢甡。
阿罩霧林家，有二位兄弟，清廷冊封林文察將軍，佮林文明將軍，尹二人真敖肖摋，尹佮清朝官軍聯合，一四界戰爭橫長直破嚬嗙叫，尹扑戴潮春、洪欉，進入福建扑太平天國，攏真成功，清朝真歡喜，毋閣佇台灣人e看法，霧峯林文察、林文明聯合外來政權，來屠殺家已同胞，真正是台奸做了有起，這款萬惡不赦e台奸，日後絕對噯報復，噯教示，佇另外一方面清朝來講，伊欲利用林文察、林文明兵力，逶台灣所有地方武力消滅了後，清朝才閣給（林家）消滅，「麻雀在後」，使講阿罩霧林家，表面上戰事勝利風光，實際上嘛潦落台灣人佮滿族外來政權e夾殺危險當中。
所以講，林文察、林文明一方面戰贏風光，占領田園財源，真揚真擎，一方面嘛漸漸潦落悽慘落魄家敗身亡e悲劇，这毋是矛盾，这是外來政權統治下必然e現象，彼時大清帝國身為太平天國所苦，陷入泥淖，對地方武力e坐大，真正敏感，當林家攏消滅台灣其他地方勢力時，最後林家嘛著噯被消滅，抑無，林家若叛變，是欲叫啥去給制裁？真可惜，林家猶戇戇毋知代誌e嚴重，伊認定「我功在黨國，功在清庭」，一心一意效忠國家。哎！真正是「忠厚有餘，而陰險不足」！所以講政治e烏暗，真正互汝袂鐵齒咧！
為著欲徹底毀滅洪欉勢力，清朝官兵佮林文明，又閣佇1965春天，發動上大e「萬斗六戰役」（現時霧峯高爾夫球場附近），佇二門美國南北戰爭e巨砲，日夜猛轟，配合地道巷戰，洪欉最後一絲e殘餘，嘛去互人「斬草除根」完全消滅。林文明真正歡喜，續落來，清朝按怎「恩將仇報」來捽掉林文察、林文明呢？
霧峯林家決定欲效忠清室e時瞬，1861咸豐年，太平天國已經扑到福建、江西邊界，清朝馬上派林文察將軍帶子弟兵「反攻大陸」，伊佇1861秋天渡過台灣海峽，深入唐山所在，佮太平天國e長毛賊作戰，「汀州之役」戰贏，逶太平天國趕出福建，清朝真正歡喜，賞賜袂尐，文察金牌附身返來台灣，擎甲夯袂稠。
1862又閣互清廷派去浙江省遂昌作戰，是伊「第二擺反攻大陸」，又閣扑贏替清廷解除危機，這擺清廷才是大大感恩，毋閣安呢對文察來講並無公平，逐擺攏派伊去扑，伊定著無可能每一擺攏勝利，这等於是逼文察去死，文察稍寡有覺悟，毋閣甚慢矣，第三擺1864渡海回唐山作戰時，太平天國恨尹入骨，佈下天羅地網，彼日果然漳州戰敗身亡，為大清帝國殉難，台灣人有影戇甲有偆去。
1862～1866，台灣島e局勢，漸漸來平定矣，台灣南北二路，無論台北小刀會、台中北屯戴潮春、草屯洪欉家族，佮一寡闌闌珊珊e小叛亂，全部攏互林文察、林文明給解決掉，吓使講，霧峯林文察、林文明，佇清朝e見證以上，完成「全島統一大業」呾全台灣e人, 攏咧看林家e面尺咧食穿，林家是揚甲起sampu，目斗看懸激奚三角肩，是擎甲夯袂稠安呢，1864林文察佇唐山漳州戰死，林家由小弟林文明將軍捍盤，繼續統領「阿罩霧王國」，不在話下。
彼時e彰化縣，地尺真闊，包含目前彰化、台中、南投三縣，物產豐富，頭嘴真贅，茲百姓真興拜媽祖婆，普普也，代表泉州人勢力e「鹿港媽祖」佮代表漳州人勢力e「南瑤宮」彰化媽祖肖抗衡叨著，毋閣隨人伏祀，眾神慈悲，嘛無啥乜衝突叨著。1870左右，阿罩峯林家「財大氣粗」，勢面真貓，無外久林文明，當選南瑤宮e爐主，按算欲佇1870三月十七（舊曆），率領五萬善男信女，徒步落笨港（北港），這个時瞬，清朝官方彰化衙門，開始欲來創治林文明將軍矣！
彰化衙門王文棨縣長佮凌定國、英桂遐老奸臣，發出戒嚴令，禁止三月十七落北港進香，尹咧講有人（暗指林文明）欲利用宗教進香，來「聚眾圍城謀反」，為著保護百姓，免受戰爭傷害，官廳兮姑不而衷禁止南下進香，清朝咧想林文明若贊成戒嚴，百姓勢必暴動起亂，因為落北港進香这是百年習俗，無論贊成，無贊成攏噯判伊有罪叨著，有影臹陰險。
落尾也林文明知影清官e陰謀，真正想氣，想講我林家，為清朝犧牲重大，嘛戰死一个兄哥，欲哪吓使安呢「恩將仇報」？毋閣現實情形嚴厲，林文明自那落軟，一方面安搭百姓群眾，一方面答應戒嚴，清官看著計劃無成，又閣設計，叫林文明來縣衙拍官司，當場給制裁，續落e瞬呤，派重兵埋伏，等林家來報復時瞬，一網打盡，另外向北京投訴，講伊興兵造反，才閣給滿門抄斬安呢，这叨是真正惡毒e連環計。
1870年三月十七日下晡四點外，林文明去彰化縣衙（現時孔廟附近）出庭拍官司e時瞬，老奸臣凌定國當場派人逶林文明斬死，文明冤死真毋甘願，这叨是清三百年「台灣第壹大案」，林文明公堂命案，这是外來政權必然e慪步，阿罩峯林家平定台灣e時瞬，叨是換伊噯互人斬殺e時瞬，呾這嗎林文察、林文明攏死矣，清朝安心矣，清朝即尼腐敗，壹直到1895日本人占台灣，勢面才好勢，林文明爐主死了後，彰化南瑤宮叨熄去矣，換鎮瀾宮南下北港，每年十萬人浩浩蕩蕩，到呾攏仝款，毋閣每年神轎經過彰化市e時瞬，攏吓發生「搶轎」e習俗，險兮肖扑味是，熱情e彰化善信，宛那懷念佮毋甘爐主林文明冤枉，一代一代留落來e苦情安呢！
同治三年，1864十二月佇福建漳州戰死e林文察將軍，尹後甡（兒子）叫林朝棟，（頂厝系統是林獻堂）林朝棟佇1884中法戰役，戰功標炳、劉銘傳真給謳咾，甲午戰敗，日本人欲進入台灣e前夕，林朝楝掣規傢人內渡夏門避難，尹後甡叨是林仲衡，無外久，林仲衡佮泉州名門莊小姐結婚，仲衡生性浪漫，精通詩詞，遨遊中原，南京、上海，佇1901甡林雙隨。
規个日本時代，霧峯林家e捍頭揙做「獻堂仙」，獻堂仙意志堅強，財力雄厚，待人親切有禮，以溫和e手段，向日本外來政權爭取台灣人e地位，又閣出錢設台中一中，宛那咱台灣人e英雄，毋閣1947發生二二八，氣甲流鼻血，尾溜也遠避日本，客死異鄉，「抗日大師」遂變「親日大師」！
29
呾杜聰明欲追求林雙隨e進展，這嗎到啥乜程度啊！杜聰明拜託蔡培火去林家提親，林家並無答應，有人吓講林家「自恃財大氣粗，目中無人」，實際上毋是安呢，財源豐富業大e老爺，尹e心苦病疼，叨毋是普通人吓凍來體會安呢！林仲衡溫和有禮，是位出名e詩仁，毋閣甡四个攏是查某e，佇彼个時代來講，「傳宗接代」發生問題矣！林雙隨是大查某囝，容貌秀麗氣質好，鼻目嘴仔真嬌，人聰明閣好禮，四个查某囝當中，上得老父e疼愛，致使講老父，早叨有想欲給招贅，來延長林家e香煙安呢！
所以講杜聰明e條件雖然好，毋閣佇林雙隨方面，宛那有伊e苦衷置e，另外一點叨是杜聰明壹直到民國十年年底，醫學博士才有一點仔鼻目嘴仔，離民國7年辣昊這班船，足足有三年半赫久，世事難料，無人按算吓到安呢，既然聰明仙e學業才完成一半爾，另外一半時間叨空思夢想，安呢這場桃花夢宛那袂勉強e，「有情人終成眷屬」，佇1918基隆落船時，定著是「遠在天邊」，蔡培火好朋友，算講跋氣魄組兮，嘛無卡擢哩！
民國八年，雙隨姑娘仔返來台灣，佇大里公學校教日本話佮音樂課程，順續嘛逶頭開始學台灣話，雙隨e語話有真厚日本腔，尤其對半鼻音，真正硬斗，叨庄腳人逐傢心適噯耍笑，迭迭嘛給創治，「呾姑娘仔，汝用台灣話講”聽聲看影，心肝想按怎？”」「哈哈哈哈……，無要緊啦!逐傢品無掠包兮……」台灣話e半鼻音，尤其是「接合性半鼻音」全世界「獨一無二」，日本人講「砂」佮「山」有時歹分清楚。
呾春來秋去，時間過了真緊，冬尾雨水鴨才去無外久呤，燕仔又閣來做巢矣！一年閣一年，燃眉叨過去，博士最後二年e課業，真正硬斗，聰明仙嘴齒筋咧li，發揮堅強巴結e「二枚腰」精神，鏘落、拂落、拚落、結落、伊e成績優秀，互森島教授真給謳咾，嘛互紹介伊去日本e堀內校長真有面子，1921秋天，聰明仙行情浮夯，眾望所規，提博士已經是在在在，袂輸佮著「桌頂捏柑」le，聰明仙志氣揚揚，哈哈哈！全世界攏恁父e，這聲出頭昊矣！
1921，民國十年九月，北國e秋天提早來臨，夜深時瞬，聰明仙徛佇學寮外口，街路暗暗，樹影斑駁，一瞬冷風吹來，聰明感慨萬千，唉，頭一擺看著雙隨姑娘仔，叨也三年外矣，時間直緊，毋知姑娘仔佇台中，生活了好勢否？街頭深巷e中間，聰明仙行來行去，心肝瞬瞬e酸軟，一絲一絲，充滿了淒美感傷e回憶！
為著欲娶著雙隨小姐，頭先，央蔡培火老大，去阿罩霧林家提親，毋閣效果無好，也叨隨人看昊月無仝，嗯才門扇板咧逗袂峇，佇杜聰明這爿來講，伊沈迷真深，非卿莫娶，毋閣佇女方這爿面，伊原先欲招尫照順序叨好，橫直霧峯林家人面闊，無啥乜煩惱這方面e代誌，蔡培火老仙兮，壹旦ga無效果以上，落尾也又閣央獻堂仙去講情，獻堂仙雖然真客氣去講，宛那無卡擢，對方林仲衡並無答應，也叨感情e問題，袂勉強e，尤其婚姻，雙爿攏有姑不而衷e心苦病疼，現實e問題咬稠e，有時仔真正無法度叨是無法度哩！
了後，杜聰明又閣央真贅地方上喚吓震動e敖人，去矯這項代誌，尹雖然盡心盡力拚身拚命去講，宛那無啥效果，問題Ka3佇，林仲衡甚過疼這个查某囝，毋甘伊離開身邊，卡有親切感。另外，佇彼个時代，招贅尫婿，嘛是普通e代誌，也叨聰明仙佮日本官方關係袂醜，有一擺民政長官下村宏有去矯雙隨e代誌，聰明仙這聲無步啦，下村宏真心適，無惜身份欲去講看覓，聰明仙真給勞力，唉！男女代誌，毋是官場人面吓凍解決e啦！
毋閣代誌有變化矣，民國十年秋天，聰明仙確定欲做博士矣，叨官學界風聲喚喊，行情浮夯，有影擎甲夯袂稠，這个時瞬，聰明仙娶雙隨e緣份，又閣咧夯龜蓋（有徵兆）矣！獻堂仙自那殘殘去給老父林仲衡遊說，獻堂是仲衡e阿叔，算講長輩叨著，比家已e囝卡熱心，看著獻堂仙即尼有誠意，安呢連番再次無惜面皮，來咧姑晟（請求），心肝宛那真歹勢，嘛歹勢當面拒絕，嗯才e瞬呤，提出四个結婚e條件，伊叨欲答應(1)噯提著博士學位(2)噯高等官(3)噯吓曉寫詩文(4)聘金五仟箍，這四个條件，佇彼个時代，宛那不止也硬斗叨著。
聰明仙一下知影這四个條件呤，真正歡喜，總是啊！有實景e代誌才有希望哩！實際上，除了第三條件做詩做詞以外，其他e條件聰明仙攏有法度達成，落尾也「有情人終成眷屬」，聰明仙有娶著林雙隨，毋閣佇後世e人給看，聰明仙付出e代價實在真大，第壹，杜聰明自細漢叨是佛教家庭出身，尤其老父杜日鳳，黃玉階區長攏是虔誠佛徒，毋閣伊e婚禮是順應基督教徒林雙隨，伊淡薄也杜家e叛徒，这佮夆招贅有啥無仝。第貳，尹嫫除了血緣台灣以外，其他語言、文化、血緣地，攏是日本式、中國式，無台灣風味。第三，林雙隨雖然留日學生，毋閣伊毋是經過考試，所以毋是特殊仁材。第四，林雙隨先天體質無好，夫妻壽命差26年，有影特別！
第八章 醉宴台北江山樓 風起雲湧民主潮
（1921～1922）
30
道光、咸豐年間，1840～1860，規个台北地區e經濟中心是佇艋舺，全部由泉州人咧捍盤，彼个時代，講泉州腔（鹿港腔）e人「滿坑滿谷」，顛倒講目前台語（廈門腔）e人士真尐，落尾也泉州人為著商業利純，造成內部族群e分裂，1853卡占優勢e三邑人，摃倒卡無錢e同安人，安溪人、同安人姑不而衷到地也，自那扶「霞海城隍爺」到大稻埕徛起，了後艋舺因瘟疫佮港口塞砂，一路下消衰韶落坑，大稻埕遂顛倒港路深，洋行生理好，顛倒有來趁大錢，所以講做人噯看卡遠e，「好歹利運三年照輪」，有時也真正互汝袂鐵齒咧！
1895阿本仔占領台北e時瞬，大稻埕揙做台北e經濟中心，所有重要e商號、病院、官衙、鐵枝路，茲攏有份，大稻埕e商業ga真正發展以上，呾日本人嘛是噯來交關，噯來摯接，大正時代1912～1925，日本正式進入「國際超級強國」e俱樂部，大稻埕定著變做台灣「壹粒壹」e消費地，所以佇民國初年（大正時代），佇大稻埕上介出名e餐廳，叨是「江山樓」，伊坐位佇目前重慶北路，規綏街e三角窗，卡倚延平北路這爿，伊是正港e台灣料理，佮日本料理差真贅，嗯才一寡日本人「王公貴族」，有錢人攏真愛來交關，享受異國風味，伊e風評讚價賑真貴，台灣人婚壽喜慶嘛臹愛來茲辦桌，真高尚有面子安呢！
所以講日本時代，大稻埕e「江山樓」，袂輸這嗎e圓山飯店、凱悅飯店安呢，落尾也倚「圓環」邊，佇法主公廟斜對面，另外有一間「蓬萊閣」餐廳，嘛是行高級路線，也叨經濟發達社會需要，一間一間bu5出來矣，1922左右，杜聰明留學日本求功名「載譽規來」，台灣e士紳、大官、學閥、醫界，佇短時間內，曾經連肖續三擺辦桌宴請，鬧熱滾滾喜氣洋洋，咱聰明仙真志揚真擎，一四界台灣人肖媵肖請，增差無穿軍服，叨吓變成「民族救星，世界偉人」爾爾，（講耍笑啦）！
第一擺台灣士紳佇江山樓，辦桌慶賀杜聰明，是佇民國10年10月尾e代誌，彼時聰明仙猶未提著博士證書，毋閣規个勢面真好，聰明仙行情燴甲夯袂稠，也叨伊e指導教授森島主任，對聰明仙是謳咾甲有偆去，森島佇日本學界地位真懸，伊「一言九鼎」，真正喚水吓堅凍，伊e意思，台灣日本二頭攏知影，實際上給掠，上第壹關心杜聰明，是毋是有提著博士，並毋是杜e親友（彼時台灣人大部份毋知博士e意義），搭搭是醫學校校長堀內次雄爾，堀內校長知影聰明仙考入醫學校時475人中考第壹名（錄取40），卒業時又閣第壹名，這粒鑽石袂使拍隕去，嗯才自那紹介聰明仙去京都深造。
致使講，上介關心聰明仙留學者，叨是堀內校長，堀內不時書信佮日本方面連絡，伊真驚聰明仙水土不服，學業無進步，安呢叨真歹勢呢，嗯才e瞬呤，留學e前二、三年，堀內心肝頭壹直驚兮咧等，尾溜也知影咱聰明仙成績優秀，學問鏘鏘滾，頭傢是謳咾甲有偆去，這聲堀內校長真放心，時間真緊，紹介聰明仙去日本宛那六年矣（1915～1921），堀內壹直追問聰明仙咁有法度提著博士學位？也叨彼時「醫學校」剛升「台北醫專」，堀內愛惜仁材，有按算欲聘請杜聰明回母校服務，出任教授來教育英材叨著。
森島主任e回答真簡單，聰明仙e博士無問題啦！咱日本人做代誌負責認真世界第壹，聰明仙閣卡拍拚，贏過阿本仔啦！免驚啦！杜聰明e博士論文佇1921年十一月五日向京都帝大醫學部申請，毋閣進前二十工，佇十月二十一日，叨任命杜做醫專老師矣！而且互總督府任命為「高等官七等」，彼時台灣人做到「高等官」，前進才二人，杜是第三个，算講真正希罕叨著。
1921 ,民國大正十年十月，杜聰明返台灣e時瞬，風聲喚喊鏘鏘滾，「一名透京城」，街頭巷尾通人謳咾，人群佳繹逐傢肖爭宴請交陪，袂輸歡迎「凱旅規來e大將軍」仝款，這个場面，看甲聰明仙目燒鼻酸，哎！老父杜日鳳，恩師小竹德吉若猶活在世，毋知欲外歡喜e。……尤其知影聰明仙這欲提著博士，這欲回醫專做教授，得著高等官呤，台北城有一陣士紳，辜顯榮、顏雲年、林熊徵、王慶忠，尹認定聰明仙是咱台灣人e英雄，替蕃薯仔繃面皮，互活佇日帝殖民下e台灣人，真有尊嚴，嗯才e瞬呤，發起佇江山樓辦桌，祝賀杜聰明e成就，彼頓飯局，眾人謳咾，肖爭敬酒慶祝，聰明仙一再道謝，燒酒一杯一杯是飲甲叫毋敢，碗盤肖ta4面紅舌滑，佇台灣地食台灣菜料，別有一番心情安呢！
坦白講，彼時雖然是日帝殖民統治局面，毋閣有堀內次雄校長即尼疼惜台灣子弟e日本人，宛那互人真正感心叨著，堀內校長安呢連番再次為台灣囡仔拍拚，真正發揮仁類無種族區分e大慈悲。九十年後e今仔日，連我這个「素不相識」e台灣人，宛那真著驚，伊看待台灣人簡那父子關係，疼痛出至內心，殖民統治e國度真尐安呢！
汝給看，堀內校長佇聰明仙讀醫學校e時瞬，全心照顧，毋閣卒業了後，又閣紹介伊去總督府做研究員，洛尾也，又閣紹介伊去日本留學，又閣欲供應伊公費，又閣驚伊水土不合學業無成，又閣關心伊返台灣，來台北醫專做教授，这佮父子感情，哪有差別。其實堀內校長「宅心仁厚，寬以待人」，落尾也「自由時報」，有一篇韓良誠醫師稿件，說明1916韓石泉讀醫學校時瞬，基於民族大義「同盟罷買事件」，差點互殖民政府開除，佳哉堀內校長強力保護，才無代誌，韓氏一家人群聚日本東京法禪寺追思恩人，其實堀內已經過身六十外年矣，猶有人千里迢迢逶台灣來追悼，堀內仁格崇高慈悲疼心，真正無話講！
這擺江山樓e宴會，是台灣士紳望族，對杜聰明材情e謳咾佮拥護，毋閣伊e好朋友「叔公獻堂仙，蔡培火氏大，好友蔣渭水」哪吓攏無出現，这出現微妙閣現實e問題，聰明仙做日本官，靠日本人來榮華富貴，對日本人畢恭畢敬，毋閣蔣渭水、獻堂仙這陣人，逐工咧反對日帝殖民統治，逐工枵飽吵，咧門扇板逗袂峇，定著無仝，尹表面上攏真客氣，毋閣內心e深處淡薄也有「心結」安呢甡。
31
第二擺佇江山樓辦桌，叨是1922年5月2日杜聰明博士e婚禮做式，这是咱聰明仙，一氏人上介光榮上介歡喜e日子，聰明仙自從佇船頂熟似雙隨了後，經過四年e「愛情長跑」落尾也丈人爸自那同意這層婚事，這个中間，心苦病疼宛那規米斗，不止也辛苦叨堵，原本是拜託蔡培火去講親，丈人講伊有苦衷，疼對心肝芛入去，有影無法度叨是無法度，落尾也央「叔公獻堂仙」去提親，獻堂仙是丈人仲衡e頂輩，丈人逼甲無法度，開出四个條件，(1)噯提著博士(2)噯做高等官(3)吓曉做詩文(4)聘禮五仟箍銀。
這四个條件，除了第三條卡硬斗以外，其他攏毋是問題，也叨講著做詩，聰明仙是醫學者，卡無時間去從事文學，毋閣这對聰明仙來講，早慢有法度完成，因為伊細漢e時瞬，有學過二年e漢文，以伊e資質佮拍拚，定著真有看路，哎！佐汝免驚啦，鏘落，拂落，卡拚勢e，呾流行歌「愛嫫毋驚艱苦」叨給唸落去！
聰明仙佮雙隨姑娘仔，佇大正民國十一年五月初送定，約束5月20結婚典禮，一寡結婚欲用e物件，噯趕緊僎互伊好勢，新娘房設佇台北市大正街六條通，土木司傅，搪咧暝日趕工，倘來圓滿5月20e結婚好日，抑若講到禮餅禮品，娶嫫e禮數，原則上照男方泉州系統去打節，女方無啥乜意見，毋閣男方聰明仙嘛做一項真大e讓步。奚叨是願意照基督教儀式來完成婚禮，这對佛教家族杜家來講，有影是「叛徒」做了有起，好佳哉聰明仙e父母攏無置咧，抑無這棚戲叨免搬矣！哎！準拄好啦，橫直聰明仙嘛三十歲矣，大人大種矣，出名wewe，啥人敢搧伊e腹堵邊，親戚五十，逐傢吐大气，嘛歹勢講啥乜！
娶嫫e進前一工，5月19日，聰明仙佇台北，去稅（租）－台禮車，先駛落台中霧峰，隔返工才迎娶，姑娘離開故鄉，一路往北，佇下晡三點外，到位YMCA台北基督教組合，早著有一陣男女雙方e氏大佮貴賓，來給祝福慶祝，問伊講「姑娘仔，咁願意廝守終身？」「願意」，OK！禮成，做式完畢，暫時歇睏一點鐘，呾夤暗佇江山樓e辦桌宴會，聽兮講鬧熱滾滾，這聲橫長直破嚬嗙叫，貴賓三四佰人「黨、政、軍、教、醫、商業巨子、地方霸仔……」按算欲舞一齣仔叉操叉操，才知影恁父聰明仙，博士無咧做假e呢！
也呾，宴會e時間到矣！大稻埕江山樓餐廳，內內外外攏是人，貴賓貴夫人，逐傢西米洛刁甲青青，禮服是拖甲嫷嫷嫷，逐傢芳水是hiu4甲貢貢芳，喜氣洋洋，金光鏘鏘滾！無外久中間，樂隊奏起音樂，新郎牽著新娘行出來矣！新郎主聰明身穿早安式禮服大帽，新娘仔雙隨身穿日本和服新娘盛裝，規間江山樓e禮堂，歡呼聲，蹼仔聲是催甲叫毋敢，這个時瞬「結婚禮砲」，陳矣！嚬嚬嗙嗙煙霧繚繞，磅甲厝蓋叨欲夯去！逐傢逗歡喜，給祝賀這對新人！这是1922民國十一年5月20暗頭仔，台北江山樓咧「娶新娘」鬧熱！
今仔日e人客貴賓臹贅，三百
外人，逶江山樓擠甲滇滇滇，尤其醫學校堀內次雄校長，一氏人疼痛聰明仙，連番再次，這八、七冬以來，毋知幫贊外贅擺，攏算甲袂記e！吓使講比家己e親甡囝閣卡親安呢，另外社會望族顧雲年、王慶忠、林熊徵……，普通時仔真奧見面，嘛紛紛出席肖媵，互聰明仙真感心，醫學校e醫生同僚蔣渭水、彭清靠、郭東田……抑若叔公獻堂仙，蔡培火、奚閣卡免講矣，佇阿阿罩霧林家望族，嘛來了袂尐e貴賓安呢，媒人李崇禮紳士，宛那在場，無閒起無閒落。
夤暗辦桌請人客，所有e料理是純台灣式e，全部菜色攏總十二齣，有照台灣人「辦新娘桌」e風俗，頭一齣「食新娘圓子」，湯圓擱芝麻紅豆粉，閣來冷盤，牽鹼炒魷魚，豬腳豐肉，鮑魚松茸……，等「加納魚」大大尾出現e時瞬，叨知影宴這欲完成矣，上尾齣是甜湯，內面有龍眼乾、蓮籽，祝福二位新人「食甜甜，明年甡後甡（兒子）」「食蓮籽，雙人連心，甡枝結籽」。
宴席e中間，有簡單e「雙方新人紹介」，簡單紹介聰明仙e出身、學歷，佮伊半世人e「豐功偉業」，紹介林雙隨姑娘e背景，伊是阿罩霧林家望族e後代，留學日本、精通音樂、日本語……，按下不表，咱聰明仙徛佇台頂，是著真光榮真志揚，哎！這氏人吓凍娶著雙隨，亦算我聰明仔有甡張，真正博士做了有起安呢甡，毋閣佇歡喜e中間，心肝頭宛那有所感傷，目尾略略也霑去，鼻頭一瞬e酸軟，哎！這个場面，這个流擺，老父、老母，攏無置e矣！做囡仔時瞬，壹心培養伊讀醫學e恩師小竹德吉，宛那無置e，細漢情境，又閣一幕一幕出現矣。哎！仁生啊仁生，真是感慨無量！尤其老母陳愛氏，嘛才過身四年外爾，這个空縫閃袂過，真拍隕呢！想落吓搥心肝！
男方e醫學背景佮官方學界，盛況空前，女方是中部望族，全台首富，宛那佳賓贅贅鏘鏘滾，這場世紀婚禮，喜氣洋洋鬧熱滾滾，貴賓賀詞祝福，「好話逗句」按下不表。呾戲閣卡好看，嘛有煞鼓e時瞬，「天下沒有不散的筵席」，暝暗矣，街頭深巷e所在，卡尐人咧行踏，佳賓貴仁嘛漸漸汕（散）去矣，佇這个空縫，早叨有人來通知，醫學校宿舍方面，有百外人專工開慶祝會，欲來邀請杜聰明夫婦安呢，杜氏「盛情難卻」，嗯才e瞬呤，杜氏離開江山樓了後，並無直接返去大正街六條通新厝，又閣「續攤」到東門遐，逐傢祝福歡喜安呢！
醫學校e學生，真正熱情，少年傢仔聲喉好，中气飽，大聲歡呼熱噗噗，嚬嗙叫，厝蓋強欲夯去，哎！無簡單呢，咱台灣第壹个醫學博士，咱台灣人毋是軟仔，宛那有仁材呢！佇日帝殖民體系e台灣，閣卡有特別e覓義，規陣學生搬一齣簡單e戲劇，又閣合唱三條祝福e歌，聰明仙真歡喜，有影暢甲叫毋敢！
聰明仙返到新房e時瞬已經真晏矣，也叨規工無閒莿莿玲瓏踅，不止也忝叨著，等心情有卡平順e時，仝款又閣想起老父杜日鳳，老母e慈悲陪伴伊半氏人，小竹校長e恩情……，尹今仔日無法度參加盛會，無的確佇西方極樂世界，宛那暗暗給咱祝福呢！
第三擺e江山樓宴客，是1922年十二月底，日本京都帝大正式頒發醫學博士證書互杜聰明仙，伊是日本國第955號，是攽互外國人（狹義）e頭一回，嗯才真正慎重安呢，彼時瞬欲提博士，噯去德國才有名望，日本人家己卡無信心，頒發互外地人閣卡希罕，聰明仙得著台灣頭一个醫學博士，國內國外大篇幅報導，無外久，一名透京城，人e運命歹講，这宛那是昊意e啦！嗯才茲台北士紳，又閣發起第二擺e慶祝會。
佇故鄉滬尾方面，閣卡有盛大e慶祝會，咱「滬尾公學校」吓凍來出一个「台灣第壹位醫學博士」，真正是咱滬尾人做了真有起呢！淡水出敖人，叨頻若朋友兒兄，幵冓烚燒茶中間，感覺真有面子安呢，另外佇醫學校方面，宛那有開慶祝會，袂輸古早咧歡喜狀元e感覺。哎！我聰明仔叨真好運哩，歷代祖先e庇佑，氏大人e栽培，學校師長e牽成，小弟聰明仔今仔日有法度得著功名來講，恁e大恩大德，我永遠記稠稠！
32
呾e瞬呤，話頭分二爿，搪噹杜聰明得著台灣第壹个博士，規粒台灣島喜氣洋洋鏘鏘滾呤，遂有一股暗流，有一个烏影，自那無張無弛侵入聰明仙e心肝芛仔，互伊心肝頭耽耽，食力e時瞬，宛那吓心肝頭噗噗彈，驚兮咧等，有時仔拄著台灣人學問者，洶洶問了真著縫，呾槍籽去扑著肚臍空，千千千，準準準，這時瞬聰明仙宛那面仔紅紅，無話倘印，叨腳手僬麻痺去矣！是啥乜代誌，來困擾伊？
也叨杜聰明e好朋友，無論叔公獻堂仙亦好，同窗兮蔣渭水亦好，仁格者蔡培火亦好，翁俊明亦好，攏是反對日帝外來政權，對台灣e殖民統治，尹請願，坐獄，結社結黨……，為台灣民主運動咧拍拚，流血流汗，干礁聰明仙一个人，為著功名利祿，借日本政府e勢力，榮華富貴遊世界，遂毋捌來蕀〔cak5〕東京話統治集團，實在有失智識份子e使命佮尊嚴，有淡薄也「台奸」e嫌疑，嗯才e瞬呤，叔公獻堂仙、蔣渭水、蔡培火……這帆好朋友，表面上客客氣氣，「嘴唇皮肖款待」爾，心肝頭有一絲仔看袂起聰明仙，伊漸漸來分裂囉，有心結矣囉，這聲聰明仙袂食袂睏，頭殼摩咧燒安呢甡。
反抗東京話殖民統治，這款簡單e代誌，聰明仙嗒吓毋知影，毋閣「人佇江湖，身不由己」，聰明仙ga有欲讀博士做教授以上，定著亦有規腹肚e心苦病疼，姑不而衷安呢甡，阿本仔毋是戇人，尹經過長時間e「觀察、考核、認定」，對聰明仙是釘拫拫（緊），瞵虎虎，稍寡有「風吹草動」夯龜蓋，尹e資料調查逗搭捌甲有偆去，佇這款情形之下，聰明仙是毋敢假仙，哎！巴結叨咧袂赴矣！無赫尼好膽佮阿本仔揙猴弄啦！
呾港潦叨潦落矣，抑無是欲按怎？叨已經去日本留學七年矣，幵赫贅錢銀，咁有可能閣來做小百姓？落尾也，叔公獻堂仙，蔣渭水宛那有來諒解聰明仙e苦衷，而且認定講伊「身在曹營」有所不便，伊是台灣人，宛那吓為台灣人才對，緊急e時瞬，無的確吓提供統治者e資料安呢，這嗎囥一个人佇官場，宛那不時用吓著，卡袂青瞑牛叨著，另外一層代誌，1913尹規陣人，欲派人去北京「教示」袁世凱時，这是摋頭生理，無人敢去，最後杜聰明家己出錢，欺騙母親，忖死忖活潦落去，佇這个「生死存亡」e空縫，蔣渭水真感心，嘛感覺欠伊一个情安呢。
杜聰明娶林雙隨，雙隨噯叫獻堂仙「叔公」，嗯才聰明仙嘛叫「叔公獻堂仙」，呾這位老先覺，是咱台灣地「日本時代」e敖人，厝內有錢，嘛佮阿本仔拂規世人，伊是台灣人e英雄，確實無顛誕li，連阿本仔叨比大頭拇，日本時代，若無獻堂仙咧捙拚，呾這聲叨「萬古如長夜」，台灣人是著乏〔ha4〕甲鼻水雙杠流，若無伊咧唗縱，擻个汝叨凝甲mo4鼻烏礁瘦；汝給看，平平有錢人，辜顯榮叨互阿本仔縛死死，袂伸腳出手e，真正互伊袂假仙！
日本人佇1895進入台灣了後，起代先，「軍政時期」，以軍兵統領全台灣島，落尾也有「六三法」，總督府e權利凌駕壹切，伊e權威十足，安呢歹擎擎，台灣人叨毋敢聳鬚，佇外來殖民統治以上，台灣人無起碼e政治權利，事事項項攏噯互阿本仔喚起喚落，無人敢搧伊e腹堵邊，台灣人下消溜溜，烏昊暗日真正矯袂落來，1920年左右日本人已經界管25冬矣，台灣人連基本e議會政治叨無，干礁倥倥戇戇做憖頭爾，這个時瞬，一寡佇東京留學e台灣青年，摯載袂稠，自那連絡島內e精英，成立「台灣議會設置請願」機關，向日本人要求欲設立起碼e議會制度，抑無，台灣人互人欺侮，烏仔魚去互濁水激著矣，定著拚一斗仔互汝看，安呢鋩角才矯吓返來。
嗯才e瞬呤，以「叔公獻堂仙」做頭人，佇民國大正十年一月三十日，向日本國會遞交「台灣議會設置請願書」，哎！毋倘看「貓兮無點」惼台灣人惼到這个坎站，安呢袂孝孤拄e啦！幾个仔議員互台灣人做，是無到佗位啦！毋閣台灣人雖然抗議規晡，宛那無效啦！日本人食汝食夠夠，惼汝惼忝忝，大日本帝國真正威風，金光鏘鏘滾，恁茲台灣暢仔，閃卡邊仔e，抑無，我大日本統治咧統假e是毋？
汝給看，叔公獻堂仙，確實是毋驚死，叨「青瞑兮毋驚槍」，伊意志堅定，做事照起工，一步一腳印，日本仔嘛無伊法，本臹日本人看伊是霧峰好業人，對伊不止也客氣「禮遇」叨著。毋閣獻堂仙無咧管這套，欲關叨關，欲摃叨摃，我台灣人和平抗議，有啥毋著，哎！這聲食官庁頭路e聰明仙真歹勢，干礁有法度踮邊仔秋稱看鬧熱叨著。半年了後，1921民國十年十月十七日，以獻堂仙佮蔣渭水來掣頭，有一百外附合者，佇雙連「靜修女中」遐成立「台灣文化協會」，來宣傳政治理念，教育咱茲百姓生活技術，一四界落鄉冓演，「啟迪民智」，效果袂醜，連雅堂嘛是其中e一位老師。
「台灣文化協會」成立了後，效果真好，喚醒台灣人噯爭取家己e政治權利，毋閣四、五年了後，內部漸漸來變質，這个時瞬，歐洲方面e社會主義思想，有所衝突，迭迭門扇板咧逗袂峇，協會內容，分做「左派」佮「右派」，嗯才e瞬呤，力量互消抵消，這聲宛那猴免弄矣！
民國16年7月，蔣渭水、獻堂仙、蔡培火這批民主仁士，集中佇台中市，正式成立「台灣民眾黨」，欲來佮日本人鏘一斗仔，輸人毋輸陣，輸陣歹看面，真正欲佮官廳兮（政府）輸贏，毋閣這个黨，毋倘看伊無點，伊宛那給日本政府e尻倉du3二空，互阿本仔臹無面子，一項是利用下班e時電報員毋捌英文，叩電報互「國際聯盟」，指責日本政府踮台灣公然推行鴨片，另外一項是指責日本軍閥阻礙國民革命軍北伐。
民國19年，林獻堂、蔡培火，又閣組織「台灣地方自治同盟」，互台灣e議會政治，閣卡進一步，伊佇民19年正月踮北投區八勝園開會，秋天才成立，以上茲政治團體、舞甲鏘鏘滾，聰明仙定著知甲真清楚，毋閣伊做日本高等官，無法度「關心」，只好暗暗也保庇茲「卡早e好朋友」，簡那媽祖婆仝款來發揮慈悲心叨好！