第十三章 學者風範無噯歸隊
獻堂仙一場祖國夢
（1949～1953）
50
對聰明仙來講，民國34～42年，伊做台大醫學院e院長，民國43年～55年做高雄醫學院e院長，伊做這二擺「頭傢」，攏總20年，伊是國寶級e仁物，對台灣人e醫學教育，盡心盡力，有影是咱e福氣，毋閣伊佇台大這段時間，經過幾落擺e動亂，互伊心情真艱苦，「做院長如坐針氈」，做細粒官爾爾，做甲艱苦坐卦，逐工安呢「煩惱東、煩惱西」，實在有失尊嚴甡張，尾溜也，佮臭頭仔決裂，退出國民黨，去高雄醫學院做十年頭傢，才漸漸有蕃薯仔e甡張地位。
二次世界大戰尾期，日本仔這欲失敗e時瞬，做為智識份子聰明仙來講，有咧暗想講，台灣e前途逗底吓行對佗位？第壹，台灣是太平洋戰區，暫時互美國托管，抑是聯合國托管，日後才閣投票。第貳，繼續互日本人界管半年到一年，才閣公民投票。第參，直接併入中國戰區，做中國e一省由中國大陸直接統治台灣。第四，親象朝鮮仔仝款，台灣獨立，台灣人講台灣話，伊毋是東京話，嘛毋是北京話，是按怎朝鮮吓使，台灣叨袂使？
結局e瞬呤，頂頭四項攏摃龜，台灣最後e運命，是去互浙江仔蔣家班統治，伊是「外來政權」，是「流亡政權」，是「反中共政權」，佇二二八佮白色恐怖，互台灣人驚落底，知影這班浙江人真偉大，這批外來統治者e優越感重到這嗎2005年，來台灣已經56年矣，台灣三大佛教名仁，聖嚴、惟覺、星雲，宛那拒絕用台語傳教，一副殖民統治e優越感 ,無彩伊阿彌陀佛，看台灣人豬狗猙牲仝款，这佮馬偕博士，干礁來台四月日，叨有法度用台語傳教，有影差臹贅。
聰明仙真有祖國觀念，民國二年欲刺殺袁世凱，民國五年佇大阪加入「中華革命黨」，真正標準e愛國者，比這嗎王金平閣卡愛國，毋閣祖國e散赤佮動亂，宛那互伊真頭疼，1947民國36年三月上旬，逶福州派來台灣「平定228」e國軍21師，一路逶基隆到台北城，暗時仔無地睏，來尋聰明仙想辦法，按算欲蹛台大醫學院過暝，聰明仙頭一擺看著阿山兵e形相身體瘦tio，面貌悲苦，營養不良滿面菜色，宛那不止也同情，聽兮講有e阿兵哥，是去互人掠來e，大部份e阿山兵，營養醜、學識低、素質差，無法度佮日本時代e兵丁肖比憑，想起來这是時代背景無仝，宛那無法度哩！
民國36年3月，台灣發生二二八事變，這陣阿山兵仔真敖肖摋，「成果豊碩」，臭頭仔真歡喜，哎！摋台灣人真簡單，真好勢，滴滴答答，機關槍掃落，免三二半手叨互伊款去配，毋閣佇大陸「對匪戰事」，奚叨塗塗塗，花洛洛、迭迭扑輸，是「兵敗如山倒」，無外久大陸赤化，國民黨自那掣遐敗兵殘勇，強占台灣，做為「反攻復國基地」，开始戒嚴殖民統治，台灣人互日本人統治五十冬了後，又閣互浙江人蔣家班統治約四十冬，壹直到1987，民國76年解除戒嚴為止。
「仁情na樹鋸，有來叨有去」，咱人總是有情有義，去人兜噯紮等路才是禮數，若紮了有好勢，叨互人糖甘蜜甜真感心，若無對路，叨囥兮倉庫嫌鎮地，这好醜介人e主觀，叨真歹講哩！1895，日本人來管台灣e時瞬，紮四項禮物來。第壹項，紮藥品來治熱病瘧疾霍亂。第貳項，紮仁材錢銀來造南北縱貫鐵路。第三項，奴化教育，全力推行東京話，日後定著是欲打壓台灣話，抑無我大日本帝國咧做假e是毋？第四項，全面政治奴化，台灣人袂使有投票權，被使有議會，袂使有中學、大學，袂使有家己e報紙，袂使支援祖國！
毋閣，1949年，浙江人蔣家統治台灣，宛那紮來四項禮物，第壹項叨是，送汝一佰萬「忠貞愛國之士」互汝飼，600萬欲飼100萬宛那真硬斗，第二項送汝戒嚴令，噯全力支持浙江人蔣公，抑無送汝去綠島唸小夜曲。第三項，佮日本人仝款，送汝「國語」教育，來打壓本土文化，先強逼汝學北京話，續落e瞬呤，講汝北京話無標準，所以汝無水準，來看輕台灣人，保持尹e優越感。第四項禮物叨是，全面e經濟壓榨，逶台灣人做牛做馬e血汗錢，給嗍互伊礁，安呢叨吓凍支援大陸”剿匪”戰爭，嘛吓使貪污腐敗，致使講好e頭路，互尹占了了，另外民國38年初經濟崩盤，台幣改制，四萬換壹箍，「台人財產，一夜之間，傾家蕩產，無飯可吃者眾！」
另外佇文化方面，日本人佮浙江人e壓迫，二爿攏有拚路，真正「陳皮蘇黨」半斤八兩安呢，阿本仔為著控制台灣意識，施行奴化教育，佇1920大正九年，將大部份地號名給更改，甚至改做日本式地名，如松山、名間（湳仔）、瑞穗（水尾仔）、岡山……，台灣人衰甲叫毋敢，尹講台灣地號名三字改做二字，吓凍省時省力，我想日本人e姓名有四字、五字，若改做三字，毋是卡省工？另外阿山仔將台北市e市街攏用大陸地名，尤其是浙江省上贅，也叨台灣人互浙江人蔣家統治e關係，如杭州南路、舟山路、寧波西街、青田街、溫州街、金華街、吳興街、嘉興街、一江街……，又閣為著「王陽明」，逶草山改名陽明山，互台灣暢e，知影阮浙江人e偉大！
杜聰明佇光復了後這幾年，舞著光復接收，二二八、白色恐怖了後，見識著祖國「偉大」e一面，真正互伊這个受日本教育e蕃薯仔，看甲目睭肖犮，心肝必博彩，規粒頭殼茫茫踅驚兮咧等，這條老命卦佇半空中，真正驚惶安呢，有時也半暝嘛吓做惡夢叨著，聰明仙這位自來叨愛國e人，呾這嗎出現了真歹紡e十字路口，台灣是欲行去佗位，按怎叫「祖國」二字赫尼沈重？聰明仙食一世人，受著二擺外來政權e tun踏，一擺東京話來，一擺北京話來，好歹長短，定著心肝內有按算，哎！日本人若知影台灣人受祖國安呢創治，這聲拍算吓笑甲婁下頦去！嗯才e瞬呤，聰明仙嘴內，一工到暗咧喃〔nau5〕「日本中國」「日本中國」簡那咧唸經仝款！
毋閣日本人e外來政權，佮浙江人e外來政權，差甲有看e，奚真是聰明仙上介煩惱e所在，阿本仔e政權，佮母國肖連，支援利便互相呼應，浙江人外來政權，佮母國斷裂，甚至變仇仁，台灣人鏘彩孤單苦苦無甡張，講卡歹聽e，伊掣一陣人叫汝飼，又閣欲扑汝苦毒汝，真正「坐人e戶碇，扑人e囡仔」，安呢是真無禮貌，另外一點叨是中國共產黨已經佇北京，成立「新中國」，實行共產主義，尹咁吓用武力扑台灣，強迫併吞？台灣是毋是吓死真贅人？是毋是閣有慘烈e鬥爭？
致使講聰明仙，夾佇國共中間咧做石磨仔心，實在真歹做人，伊若甚過偎國民黨，到時共產仔來，定著吓受著慘烈e報復，汝給看，連許強、郭琇琮醫師，干礁加入組織爾，並無武力反叛，叨互國民黨判死刑，這聲對方共黨若是得著政權，絕對吓來報仇，所以講聰明仙「左右為難」真歹做人，伊若矯袂好勢，泛勢吓先互國民黨毒害嘛無明確，這款代誌，聰明仙逶民國35年煩惱到民國39年，已經四年外矣，有影真恐怖，許強是39年5月掠去，北京政權，共產黨按算佇39年7月初登陸台灣，以五十萬部隊人海戰術攻扑，台灣人是驚甲疲疲搐，毋閣天公伯仔真靈聖，共產7月初一欲扑咱台灣，聖聖韓戰遂6月25開扑，美軍第七艦隊共同防衛台灣，呾鐵門一下關，共產仔無法咧，拄拄好差一禮拜，有影好佳哉！
台灣外在危機，共產黨登陸雖然安心矣，毋閣內部e鬥爭真正激烈，尾溜也，六四事件、李友邦事件、孫立人事件……宛那互國民黨舞規晡，咱聰明仙是一个頭殼真好e學者，伊經過這幾年佮國民黨e經驗，伊感覺真艱苦，所以對官場厭倦，無欲閣再做落，算講逐傢無緣，佮臭頭仔「門扇板咧逗袂峇」，伊無去登記「民國40年黨員規隊」，算講退出國民黨叨著，來展一下仔氣魄，這聲費氣矣，杜聰明仙ga退黨以上，自那離開官場，落來做一个平頭百姓，安呢自民國10年到民42年，攏總做32年的「官」，這嗎退出官場，伊自那落下港，去開創另外一番事業，去設立「高雄醫學院」安呢！
51
聰明仙，叨親象伊e名安呢，真「聰明」，伊早叨佇帝大醫學部開始招生e時瞬，略略也知影中國人真歹舞，社會返捯，朋友摯接e中間，噯真張弛注意，抑無，迭迭吓「恩將仇報」，代誌吓揙甲袂收山攬尾e，醫學部第一屆收四十學生，台灣人互人看輕, 干礁收十四人爾爾，其中有李鎮源、許強、邱仕榮、蕭道應、彭明聰……，其中蕭道應上愛國，少年人鏘鏘滾熱撲撲，有時仔互汝真煩惱，煩惱甲拳頭母叨欲出油去。
民國25年，學生入學，杜聰明做「頭傢」，領導這40个學生讀冊，隔返年民國26年秋天，學生蕭道應簡那食毋著藥仔，遂欲休學，欲「投身軍旅」，僎欲渡海去唐山，幫忙中國人去抵抗日本人e侵略，彼時「蘆溝橋事變發生，抗戰軍興」，阿道仔滿腹熱血，欲去佮日本仔兵鏘一斗仔，伊這款毋驚死e精神，袂輸二十年前聰明仙，刺殺袁大頭仝款猛，彼个時瞬，聰明仙馬上給苦勸，呾少年人毋倘甚衝磅，汝是一个仁材，學業為先，等求功名有成就了後，才閣拍算，蕭道應佇風火頭，博士e話聽袂落去，自那唗去唐山大陸。
蕭道應到上海、浙江彼箍圍仔，壹心欲報國，毋閣伊是外位仔人，腔口、習慣、動作，一聲叨去夅掠著，有密探報去中國軍部，無外久叨知影伊是台灣來e反日志士，毋閣中國人多疑性，這聲恩將仇報，硬講伊是日本特務，欲給處死刑叨著，這時瞬按怎講叨無效，尾溜也拄好台灣名仁丘念台宛那佇遐，自那拜託丘念台講情做保，勉強赦伊一命，蕭道應是衰甲叫毋敢，趕緊逃離唐山，才知影「中國」e偉大，毋是汝所想e！
另外一層代誌，叨是和尚洲（蘆洲市）李友邦事件，李友邦是日本時代上介拥護祖國（中國）e好額人子弟，伊是和尚洲所在e望族，李友邦事件發生了後，尹兜e厝建築美麗壯觀，真有古早味，這嗎做為二級古跡，是咱大台北真罕看e古董安呢。1923，日本統治台灣這欲三十年矣，社會慢慢來進步，友邦雖然是好額人子弟，毋閣伊是有正義感，真正拥護祖國，痛恨日本人e殖民統治安呢，民國十三年，伊18歲，對日本仔警察作威作福，看甲袂作e，自那佮鄉民，聯合起來攻擊警察所，逶警察大仁給拍著傷安呢，日本人欲給通輯圍捕，李友邦無法度呤，自那化裝偷辿去唐山。
李友邦真愛國，無外久，伊到廣東，看著祖國e廣告，徵求熱血青年來救國，伊自那佇民13年秋天，就讀黃埔軍校第2期，尹佮林彪是同學，彼時國共合作，訓導主任周恩來，頭傢是蔣介石，尾溜也，李友邦嘛參加北伐東征，佳哉無死，吓使講一氏人為國民黨賣命，用心計較含心敆命來為黨國奉獻，抗戰期間，宛那佇浙江省成立台灣義務隊，佮國民黨、共產黨雙方攏有來往，民34年8月底抗戰勝利，伊逶唐山提返來頭一面中國國旗，而且佇台灣成立「三民主義青年團」，一心熱愛祖國，不在話下。
一年了後，中國行政長官陳儀烏白亂來，引起二二八事變，陳儀為著緩和局面，叫李友邦踮電台廣播，友邦疼心時局給「婉拒」，陳儀火焯，自那四界捕殺「三民主義青年團」幹部佮成員，而且佇3月10日全島清鄉時，友邦遭到柯遠芳、陳儀拘捕送往南京矯摵，好佳哉尹嫫嚴氏有夠力，給救返來，自安呢李友邦對「祖國」失望閣憤慨。民國41年4月，以匪諜案，佇台北槍殺，这是「莫需有」e罪名，尹家屬無看著判決書，李友邦冤死，真正是「恩將仇報」，汝割肉互人食，人猶嫌臭臊哩！這二年馬英九主席訪問「蘆洲李宅」時，對彼時白色恐怖壹案，有給安慰佮道歉，毋閣甚慢矣！
杜聰明做過二个朝代e「官」，知影日本人佮中國人e性質無仝，尹這二个外來政權，攏是看袂起台灣人，聰明仙知影，伊做高等官時e薪水比日本人卡尐，醫學部學生第一屆, 日本僑民才25萬爾，叨有26个名額，台灣人有六百外萬人，才有14个名業，这叨是差別，阿山兮來台灣e時瞬，中央研究院有15个名業，其中14个互阿山兮，台灣人勉強互汝一个名業爾，親象這款代誌，身為台灣人e聰明仙，真正嘛大嘴開闊濶無伊法。
52
杜聰明身為台灣島最高醫療負責人，對瘧疾、霍亂又閣大流行e代誌，煩惱甲袂食袂睏e，毋閣这是國家e悽慘代，一時間欲解決真正硬斗，瘧疾malaria佇台北大流行，霍亂佇基隆、台南、宜蘭湠甲真食力，尤其是台南e疫情，真正艱苦，逶灣裡一路傳到台南市，死三百外人，規e社會是哀父叫母，真正心酸，這个時瞬逐傢又閣懷念日本人e醫療政策。
流行病吓大流行，主要是無智識佮散赤，台灣人叨歹命哩，一代傳一代，干礁食飯叨大問題矣，無法度兼顧衛生健康娛樂，破病吓揙做短命，人若短命叨無法度粒積財產，致使著「代代散，代代苦」，形成惡性循環安呢甡，彼時e台灣婦女，手抱紅嬰仔e時瞬，叨咧按算講「是毋是有法度給飼大漢？」，这大部份攏是破病來兮，1895三月，日本兵攻澎湖e時瞬，為著霍亂，一工死一百外兵士，十外工呤，戰死無二十人，毋閣死佇霍亂超過一千外人，阿本仔是衰甲叫毋敢，另外佇1874牡丹事件之後，日本兵嘛是破病死臹贅，排灣族勇士顛倒無代誌。
光復初期，台北咧流行malaria瘧疾，互人印象深刻，彼時瞬日本人剛唗，雖然台北有真贅醫療所，毋閣治療藥「金雞納霜」銷售e管道，互人阻礙，致使講有錢，買無藥仔，著急甲拳頭母捏甲欲出油去，这叨是日本戰敗，規个國際情勢混亂，藥品無法度入來，若是有藥品e所在，大部攏「惜命命毋甘來賣」安呢，彼个時瞬，顛倒給軍方討卡有，軍方趕緊做一寡仁情，互社會e秩序慢慢來恢復，人佮人中間e感情態度化解袂尐。
彼个時代，吓使講，暗時仔若無牽蚊罩，叨大部份吓著malaria，这無法度，時代叨是即尼酷行，若著malaria，無一定吓死亡，看汝e抵抗力佮運氣，上出名叨是1895日本征台軍總司令北川親王，伊是明治天皇e小弟，宛那佇台灣所在，仲malaria死亡，阿本仔是毋甘甲嗎嗎嚎，哎！人e運途，互汝袂鐵齒咧！
十年前有齣鄉土電影，是侯孝賢導演e，講一寡光復初期e「陳年逸事」，伊是布袋戲天王李天祿主演，李天祿講，光復了後，日本返去，規个社會混亂，伊佮尹後甡二人都仲著malaria瘧疾，拍燒拍寒，真正艱苦，伊na搬戲na顫〔zun3〕，互人扛落來，市面買無藥仔，連大病院嘛無，無定著有人屯貨e款，無外久，伊e病好矣，毋閣尹後甡遂來過身去，真正嚎甲毋臹聲調，汝看一个稍寡毛病爾，叨吓奪去一條寶貴e性命，呾這嗎e人，實在互汝想袂到呢！
1945～1949，这四年中間，咱台灣簡那無政府e款，社會上普遍散赤，失業e人規車路，百姓對中國仔漸漸失望，尤其是民國37年尾到38年初，經濟崩盤，有彼款「四萬換一箍」e慘痛經驗，有影講，台灣人一夜之間「傾家盪產」，前途充滿烏暗，这時瞬阿山兮戰爭，國共戰爭，國民黨兵敗如山倒，台灣人散赤閣無前途，又閣驚共產黨扑來，逐工艱苦坐卦，祈求媽祖婆來肖媵，尾也，韓戰爆發，第七艦隊保護台灣，勢面才漸漸安定。
53
來給講到「抗日大師」叔公獻堂仙，做人慷慨有禮數，連阿本仔叨比大頭拇，毋閣去舞著阿山兮，有影去踢著鐵枋，真正衰甲叫毋敢。咱給看，日本時代五十年當中，有二个敖人，一个是杜聰明，伊吓使講一代人倚日本人官勢佮幫贊，榮華富貴，一个叨是尹叔公，林獻堂先生叨著，獻堂仙雖然一世人佮阿本仔捙拚有著，為台灣人流汗流血，毋閣最後嘛是敗佇阿山兮手頭，搪咧衰弱e時瞬，猶互人罵伊是「台奸」，真正冤枉，獻堂仙佇光復了後，二二八事變，受著真贅委曲，致使講伊對祖國，真正失志，真正傷心，1949民國38年9月，獻堂仙以治療胃腸e名義，搬去日本東京蹛，壹直到民國45年8月過身為止，甘願死叨無噯返來台灣，汝看伊對阿山兮外憤慨叨著，「抗日大師」揙做「親日大師」，哎！天公伯仔，汝嘛稍矯一下！
獻堂仙，吓使講是咱台灣人e民族英雄，雖然咱對霧峰林家佇1864左右，借官勢凌治洪欉佮戴潮春，感到憤慨，毋閣奚是「下厝」做e，獻堂仙是頂厝系統，伊智勇雙全，為著台灣人e權利，佮日本仔殖民政府捙拚，來爭取台灣人e政府地位，这是在熚熚，仁仁仁e代誌，咱台灣人欠伊一个情，伊離開世界已經五十冬矣，佇茲，咱給致最大敬意，感謝閣再感謝！嘛映望獻堂仙e在天之靈，吓凍保庇咱蕃薯仔，閣卡旺廣、發展、大葩尾安呢！
日本占領台灣彼年1895，獻堂仙拄好十五歲，少年傢仔爾，伊頭殼真巧，目色真銳，伊無讀日本書，一氏人無愛講日本話，無愛穿日本和服，毋閣伊靠家己自修，吓使得著世界性e寶貴知識，「千金奧買量早知」，伊二十外歲仔，無人給講道理，伊叨知影「大日本帝國殖民統治」e惡毒，佮台灣一四界食虧e事實，嗯才e瞬呤，伊佇1913年，民國2年，亦叨是杜聰明就北欲莿袁世凱彼瞬仔，叔公獻堂仙家己提家族e錢，來砌「台中一中」，培養世界級e仁材，這間中學佇民國4年完成，轟動全台灣，隨人謳咾甲欲触舌去，真正「犧牲小我，成全大我」叨著。
1911獻堂仙邀請梁啟超來台灣考察，啟超仙對日本政府真謳咾，呾日本人界管台灣才十五年爾，叨吓凍控制傳染病，吓凍造南北鐵枝路，吓凍財政平衡，這時社會安定「國勢」強勢，伊真正欣賞安呢，毋閣獻堂仙解破，台灣人受日本殖民統治，比香港閣卡害，台灣人無投票權，無議會議員，無家己e報紙，無家己e中學、大學，無家己e社團組織，無家己e政黨，無家己台語e教育體制，台灣人干礁做奴隸爾，做人e腳架仔爾，永遠下消運命袂超生安呢，所以台灣人絕對噯拚，噯鏘，噯潦，噯拂，政治權利家已噯矯噯摵！
嗯才e瞬呤，1918民國七年，獻堂仙領導群眾，抗議日本殖民法規「六三」惡法，伊「高高在上」，台灣人一絲仔 講話e機會叨無，阿本仔歹歹叫，定著無咧給汝信斗，毋閣心肝內宛那幵始耽耽矣！咱家己日本國內有議會，台灣遂無，蕃薯仔一口喟袂透，尹俍卡好，早慢吓出代誌，汝才給看覓e！平平父母甡兮，毋倘給人惼搭底，日本仔嘛有忠厚e情理人，尹咁吓攽恬恬？何況對方獻堂仙，好額和合家世強，宛那毋是軟仔呢！
1920左右，獻堂仙春秋四十，「身強體壯、意志堅定」，不時來往台灣佮日本中間，為著台灣人e政治權，佮著咧行灶腳le，伊甚至包船仔，互留學生，生理人來往，服務台灣人真週到，1918杜聰明船頂搪著林雙隨，嘛是獻堂仙e功勞安呢，也叨獻堂仙不時咧行日本，嘛結交真贅日本議員，呾俑仔標便便，有錢到地也，代誌免驚袂好勢。1921元月，獻堂仙提著台灣各階層敖人e簽名，送到日本東京，拜託遐e國會議員，送互日本國會，奚叨是「台灣議會設置請願書」，這擺規模真大，人數真贅，雖然最後無成功，毋閣宛那互日本天皇驚甲袂食睏e，互台灣總督氣甲嘴鬚拍袺。
續落e齣頭，叨是1921民國十年七月，佇台北圓環邊靜修女中，成立「台灣文化協會」，仝款是獻堂仙做嗣大，蔣渭水做「老貳」，嘛揙甲有聲有色，尾溜也社會主義入來，協會分裂做左派右派，咱獻堂仙是地主資本家，定著「門扇板咧逗袂峇」，嗯才協會作用落坑無效，無要緊，六年了後，民16年7月，規陣人宛那佇台中成立「台灣民眾黨」控訴日本殖民政策，阿本仔見羞返想氣，自那將伊強制停黨，無外久，蔣渭水著重病傷寒，安呢欲死動亥矣，「家己揹皇金，欲哪給人看風水」，阿渭仙死了後，民眾黨嘛倒笪矣！
叔公獻堂仙，逶民國10年到23年中間，台灣有十四擺請願欲設議會，其中有十一擺是獻堂仙領導e，伊e功勞有影真猛真有拚喟，叨看現現哩，總講一句，規个日本時代，簡那是獻堂仙e表演場，咱獻堂仙志氣揚揚，有影擎甲夯袂稠安呢，不而顧呢，光復了後，阿山兮來矣，二二八互獻堂仙見識著祖國偉大e「戲齣」，台灣敖人真贅互阿山兵摋死，獻堂仙是氣甲胃出血，甚至陳儀猶講伊是漢奸，獻堂傷心搭底，無法度消透，伊自那民國38年9月東渡日本東京定居，「祖國啊！祖國！」汝為何叫落赫尼沈重，我實在承擔袂起，獻堂仙壹直到民45年秋天過身，攏無憖返台灣，可見伊怨阿山兮外深，聽兮講伊佇日本暗中幫助台獨團體真贅錢，這聲「抗日大師」招牌換做「親日大師」連日本人嘛真著驚！
獻堂仙閃去日本了後，無外久，臭頭仔佇唐山兵敗如山倒，掣一陣軍民團體難民百萬人，擠入來台灣島避難，臭頭仔佇民國39年3月「復行視事」開始又閣做總統矣，彼个時瞬成立國防部總政戰部，由蔣經國、谷正文主持，專門掠匪諜，採取嚴厲e殺害政策，叨頻若有共產思想，或者參加匪黨組織，雖然無武力反叛，嘛壹律殺害，抑是無期徒刑，上輕兮判十年以上，臭頭仔驚國民黨倒笪，互共產仔筴去配，宛那有伊e心苦病疼，這段歷史壹直延到民42年，咱叫做「白色恐怖」，真贅人枉死，進前「台大醫院醫師事件」叨是範例，另外佇教育界嘛發生「四六事件」，宛那真悲慘。
民國38年3月20日，師範大學有二个學生仔，騎一台腳踏車，踮兮路中亥來亥去，去互中山派出所警察給掠去，主管謝庭長給尹私下動刑，造成著傷，消息傳返來師大呤，逐傢心狂火焯氣噗噗，二百外學生拚到警察局，欲佮伊輸贏，彼時社會動亂，經濟崩盤，統治者國民黨貪污腐敗，剛二二八了後，官方壹切以武力佮恐怖矯摵，3月29日，台大、師大e學生集中「台大法學院」，設螢火晚會，全力詈罵政府無能腐敗，二爿仇恨愈結愈深，衝突隨時發生。
這个時瞬，陳誠、傅斯年、謝東閔感覺學生造反代誌食力，決定以武力強迫壓落底，4月6日暝半三更，軍警包圍師大學生宿舍，到二、三點呤，強行進入掠人，攏總掠二百外人，首謀周慎源乘機逃脫，其他e人「依情節輕重」，有十人槍決死刑，另外二十外人判十年以上，另外逃走e周慎源嘛佇三年後，佇竹東互軍警圍捕摋死，這个代誌叫「四六事件」，有真贅人冤枉受難，自安呢了後，台灣e學潮行入地下，省籍仇恨閣卡食力。
民國42年到72年間，13％e外省人統治87％e台灣人，權利結構發生失衡，台灣人佮外省人感情拍歹，有幾落新e「台語名詞」流傳社會。(1)「阿山兮，阿山仔猴，阿山婆仔」，彼瞬外省人台北有首民歌流傳著「阿山兮阿山兮賣豆干，豆干真歹食，阿山兮賣壹柴屐，柴屐真歹穿，阿山兮做人無路用。」(2)「老芋仔」，這句話是咧罵人，意思是「老豬」，並毋是蕃薯芋仔e意思，“胡亞”是豬，見連橫書台灣語典。(3)「臭頭仔，金光頭兮，破媌」暗指老蔣佮夫人。(4)「豬標兮，咬柑仔e」暗指外省同胞。(5)「華西街」，暗指副總統嚴家淦。(6)「豬公架」暗指嫁外省人e台婦，地位直低，佮痟查某、青番婆、茶店仔仝款，台北有諺「嫁互阿山，叨put互豬食」。(7)「呆鑼仔兵」指剛來台之大陸兵，外表無好。
抗日運動領蔣渭水逝世75周年時，民進黨佮國民黨仝齊佇民95年8月初5辦紀念會，名歷史家李筱峰有一篇文章「假使蔣渭水不早逝」登佇過返工8月6日自由時報A19版，下腳是節錄數段做參考。
「回到蔣渭水時代，他以中華民族的論述抗日，對國民黨期望一點都不奇怪……，但蔣渭水及同志們，到國民黨來了之後又是怎樣下場……。假使蔣渭水不早逝，而能親眼看到「祖國」來臨，他會不會很失望？絕對會的……，我們可大膽斷定，假使蔣渭水不早逝的話，也絕對逃不過二二八災難，何以見得？看渭水家人及同志在二二八遭殺害壓迫就可明白……，渭水的民眾黨同志廖進平、楊元丁、黃賜、阮朝日在二二八遭殺害，渭水文化協會的林茂生博士、陳炘也遭殺，渭水的醫學校的張七郎及二个兒子在花蓮被殺，舊同志陳旺成、張晴川、白成枝、郭國基……都被列入「二二八在逃首張名冊」當中，蔣渭水的親弟弟蔣渭川，被國民重捕殺，子彈打到他女兒而死亡，渭水三兒子蔣時欽也被通緝逃亡，女婿鍾吉東也都被槍殺……」「蔣渭水的家人及同志，在二二八紛紛遭國民黨殺害，如果渭水不早逝，能逃得過二二八嗎？能躲過白色恐怖嗎？……」
二二八事變六十年後，這嗎國民黨宛那有繫失禮佮反悔，而且228受難者每人嘛補償六百四十萬NT，算講有平反叨著，近來臭頭仔佮阿國仔e棺柴，欲扛去內湖五指山公墓補殆，二二八e家屬真想氣，無惜佮民進黨阿扁仔揙面，尹講「二二八家屬毋是少數人e家屬爾，奚是全台灣人e代誌，台灣人若袂曉合和，後回仔汝若受難，仈人嘛袂來肖媵……」，事實上外省人嘛有真贅正義之士，親象雷震、殷海光……攏是，叨算講國民黨內部，宛那有張其昀這款e好人，日後對退黨了後e杜聰明，伸出最大e幫贅，互聰明仙高雄醫學院提早成立，這點宛那噯給人勞力叨著。
第十四章 下港鄉親多熱情
拍拚牽成醫學院
（1954～1966）
54
民國40年，國民黨實行「黨員總登記」，聰明仙因「二二八代誌」Kimo袂爽，以最大e勇氣，拒絕去登記，等於佮臭頭仔翩盤，人講「門扇板咧逗袂峇」，致使講聰明仙噯離開官場，去社會上做一个「平頭老百姓」，家己討趁家己生活，卡有尊嚴甡張，嗯才e瞬呤，民國四十二年七月卅一日，聰明仙自那離開「台大醫學院院長」e職務，專心做一个普通百姓矣！
剛離開官場，聰明仙真正ut卒，彼年拄好過六十歲甡日，伊經驗豐富春秋鼎盛，若是伊一氏人食到94歲來講，六十歲不而顧簡那四十捅爾，身體搪勇，有影是國寶級e好仁材，無好好來給請教，展示伊e材能，有影拍隕叨著，彼瞬聰明仙佇台北所在，行來行去搪咧無聊e時瞬，身邊e好朋友叨給講「呾聰明仙啊！汝嗯著去下港行行e，遐有真贅機會，互汝發展材能安呢！」
實在講，聰明仙早嘛有興趣，欲來下港辦一間醫學校，定著这噯私人辦兮，也叨聰明已經無佮官廳兮來往矣，佇進前，台灣省藥劑師公會葉理事長，嘛有來拜託，伊講咱台灣無藥劑系e學校，汝聰明仙是葉理專家，是毋是吓使來設立學校？彼時教育部長是程天放，伊有初步答應，毋閣私立學校，上要緊e叨是董事會噯有銀錢，彼个時代普遍散赤，嘛無啥乜財團欲來興學，所以理念真好，毋閣開嘴頻若講著俑仔標，叨恬恬無三無二矣！
代誌真拄鏘，有一擺陳江山醫師，來台大病院拜訪杜聰明，有講起欲踮下港高雄設立學校e代誌，咱茲下港鄉親；逐傢攏臹熱情，希望利用杜聰明e材能，吓凍為高雄台南廣大地區，設立一所南部e醫學院，來造福地方，互咱下港所在，有家己e教育場所，洗刷「文化沙漠」e歹名；陳江山是東港人，鄉土觀念真重，佮杜聰明愈講愈續嘴，叨長尻倉坐落，規下晡講到盡磅逗搭，歡喜落斗。
嗯才e瞬呤，民國43年6月30日，杜聰明佮陳江山坐夜快車落高雄無外久，去拜訪議長孫媽諒，孫議長一下聽著聰明仙有意思，來咱高雄設立醫學院呤，歡喜甲袂講了了，哈哈哈！貴仁來囉！唉! 尹俍咧，咱高雄暢e，自來叨互人看無到重，無文化無甡張，連一間卡吓孝孤e學校叨無，真正嚥氣（不勝感慨）有影，人奚杜聰明，台大院長做八年矣，日本時嘛做十外年矣，是這方面e專家，台灣無第二个叨著，所以孫議長馬上設宴招待，另外緊提出土地，佇林德官所在，有一塊水田，將來欲設公共設施，吓使來做醫學院e校址，毋知聰明仙意見如何？
佇半路e中間，經過陳啟川大頭傢e公館，伊是杜聰明老朋友，一行人自那入去拜訪，啟川是一下知影杜聰明欲來辦醫學校，當場欲寄付二甲地做校舍用地，聰明仙婉轉給講辦學校、地皮無夠，啟川是馬上講，三民區郊外有一塊水田十甲地，伊身為地主，願意無價捐出，聰明仙聽一下，目睭噴金星，險兮昏倒，啥乜？有人欲寄付十甲地（時值百外萬箍）？天下有即尼慷慨e代誌，才知影下港人e熱情，真正互汝想袂到，互汝袂鐵齒咧！這聲興建醫學校有望矣！
咧看土地彼幾工，聰明仙受著鄉親真熱忱e款待，一攤又閣一攤e飯菜酒桌，熱情敬酒，歡喜甲流目油，袂輸看著救世主仝教，呾土地e問題，初步解決，安呢醫學院e設立，叨輕鬆一半矣，聰明仙嘴笑目笑心花僬開，無外久，伊到台南，尋老朋友韓石泉內科，幵冓拆字數，韓石泉講著二二八時瞬毋驚危險，「婁孤帆兮」去佮阿山兵談判e代誌，心肝內猶真著驚，聰明仙真佩服韓醫師安呢大智大勇，互台南市e損失降到上低，這款人一甲子宛那出無幾个！二人講起三十冬前醫學校校長堀內次雄e恩情時，一時鼻酸目燒，真正捶心肝安呢，也叨過身十外冬矣，「高山仰止」永遠互人懷念、尊敬！無外久又閣去高雄拜訪老朋友彭清靠，不在話下。
無外久，聰明仙返來台北矯代誌，又閣拄著貴仁，伊叨是教育部長張其昀，呾這嗎欲開學校，定著噯佮官廳兮跋撋，摯接，嘛吓拄著一寡困難，这是無法度e代誌，抑無，教育部咧開假e呢？實際上，聰明仙欲申請學校，真正無軟斗，也叨民國四十年，老K改組e時瞬，無歸隊再入黨，這聲無定著吓夅刁難安呢，毋閣貴仁叨是貴仁，人奚行情叨有夠遐哩，聰明仙無錢無勢無基金，干礁一塊無保證e土地爾，張其昀一聲答應伊籌備，互聰明仙嘴笑目笑真歡喜，袂輸仲獎券仝款！
7月11日佇高雄市，開「高雄醫學院籌備委員會」，由杜聰明做主任委員，暫時內定陳啟川做董事長，另外聘陳啟清、孫媽諒、唐傳宗、何禮棟做為董事，教育部有答應，佇真正困難e情形之下，吓使佇民國43年10月開始招生入學，目前是以醫學為主，後擺若發展好勢，噯漸漸來楦大做「高雄大學」安呢，實際上欲辦一个學校，是千頭萬緒厚頭路，無赫尼簡單，聰明仙嘛是心肝頭耽耽「戰戰兢兢」，一步一腳印，寬寬也進行，真正硬斗，其中有一位是醫界元老翁瑞恆，寫公文互教育部，公開反對杜聰明，伊講高雄醫學院，亦無錢，亦無厝，亦無教室圖書館，亦無實驗室，干礁借小學一間禮堂爾，是欲按怎辦大學？真正欲笑破人e嘴閣？
佇教育部這方面，宛那真費氣，翁瑞恒所講e，真有道理，毋閣私人興學，無用著公費，做教育部長e人責任卡輕，教育部是徛佇輔導e立場，樂觀其成，尾溜也，張其昀ga有欲媵杜聰明以上，高雄醫學院e籌備工作矣，宛那繼續進行，無咧管外界e質問安呢，張其昀有下腳六條理由來幫助伊！
(一)鼓勵私人興學，这對財源無倘外好e政府來講，有這个必要，政府袂使事事反對，阻礙學術發展。
(二)陳啟川是高雄地區上好業e地主，伊e財力有法度支援。
(三)大學開始時瞬，無校舍、實驗室、圖書館……無要緊，慢慢吓凍給砌起來，这責督董事會叨無代誌矣！
(四)目前中學、大學攏集中台北市、高雄嘛有必要設立大學。
(五)杜聰明有捍頭台大病院二十年e經驗，全台灣無第二个比伊卡敖。
(六)南部天氣炎辣多病害，培養醫界仁材，有迫切e需要，袂凍閣拖遷落。
叨安呢，張其昀部長，以「四兩撥千斤」e架勢，逶反對者給戽返去，橫直是百姓出錢，官廳兮目睭金金看鬧熱，到時瞬列席貴賓來接收成果叨好！咱這嗎徛佇客觀e立場看代誌，事實上張其昀，吓攽手互杜聰明去舞高雄醫學院，这是真正確e做法，也叨以第壹流經營者杜聰明，配合第壹流好額人，這款代誌才吓成功，抑無，仈人來做，成功e機會真尐，若安呢來講，下港人咁叨免破病是毋？這个罪過有影無人擔吓起叨著。
呾e瞬呤，經過一月半日e籌備，佮官廳兮張其昀e幫忙以上，咱「高雄醫學院」第壹擺e董事會。順序佇民國43年7月21日舉行，教育部正式有認定，董事長陳啟川，常務董事杜聰明、唐傳宗、孫媽諒、何禮棟為董事，學校按算10月16日招收第一屆學生，教授e聘請方面，由杜聰明去負責，何禮棟為教務主任，陳江山為訓導主任，實際上陳江山e貢獻真大，大部份e連絡工作，伊攏吞忍捙拚任勞任苦無第二句話，伊犧牲家己台北e開業業務，互聰明仙深深e感動，另外伊做人宛那真客氣，伊堅辭去一席董事，伊講伊無出錢，干礁「跑腿」爾爾，歹勢占人e席位，害聰明真歹勢，也叨聰明嘛是無出錢啊！陳江山有監察委員e身份，辦代誌真方便，致使高雄醫學院e校務，真正「橫長直破」鏘鏘滾安呢！
55
無外久，杜聰明佮孫媽諒議長，逗陣去拜訪謝掙強市長，拜託市長稍解決教室e問題，因為開學這欲到矣，是著噯借教室，尾也佇三民區愛國國小有一間禮堂佮教室，借互高醫第一屆學生上課來用，汝看外可憐叨好。另外一方面唐傳宗董事，出大批水泥佮建材，趕緊佇校園砌新學舍，按算二年了後，咱高醫叨有大間樓仔厝倘上課安呢。
民國43年九月初，高雄醫學院，佇真克難e環境之下，開始招生第壹屆醫學生，伊借省立雄中學做考試場，有三百外人來應考。考試科目有國文、英文、數學、化學、三民主義，攏總錄取六十名新生，十月十六日，佇愛國國小所借e禮堂，做開學典禮e會場，咱聰明仙，意氣揚揚勉勵茲新生，恁e責任真正重大，而且以家己為範例，說明醫學校e前途佮發展，另外董事長陳啟川嘛就台做簡單e冓演，教育部方面嘛有派人來「共襄盛舉」，这是咱下港所在，超時代超學術e大條代誌，袂使稱彩咧！
高雄醫學院成立了後，伊吓凍提高咱南部e學術氣氛，互咱茲下港朋友，有甡張有自尊，才袂事事吓叫台北人做阿伯，伊嘛定位做熱帶醫學e研究重鎮，比喻講傳染病方面，公共衛生、毒物學……，攏真正利便來研究安呢，所以講伊e責任，宛那真重大，後日仔，咱台灣欲佇國際上有甡張，高雄醫學院定著噯占一个大埠頭，安呢做落、拂落才吓起磅叨著。算講佇彼个古早e時代，高雄叨欲開一个大學，實在真稀罕，真幵錢叨是！
第壹屆醫學生，佇民國43年十月開學無外久，咱聰明仙做總司令，叨漸漸現出伊奚日本精神來辦教育，認真拍拚負責，清氣，事事第壹，項項代先，一絲一毫，清清楚楚，絕對袂使顛誕去，咱聰明仔有時家己嘛潦落做模範，互茲學生仔真謳咾佩服，後日仔出社會，絕對是方面大將軍！早期e高醫教學系統，條件艱苦，捙拚喟重，有一寡想法，嘛吓凍互咱做參考咧！
高醫e校舍，全新砌造，su當時是以「高雄大學」e規模來設計e，落尾也發現困難重重，改恢復醫學院e規模叨好勢，伊e建築物非常e先進，嘛真堅固，伊有長遠e先見之明，伊砌三樓e地基，毋閣才砌二樓e厝屋爾，按算講後擺仔，隨時吓凍搭三樓叨著，第壹排e校舍砌好e時瞬，省衛生處處長顏春暉來參觀，伊講「聰明大兮，汝砌e校舍，有夠冒險有夠先進呢？」
高雄醫學院，學台大病院e制度，無外久中間，民國46年6月，成立「高醫附設醫院」，噯倩真贅醫生佮職員，幵銷真大，險險兮倒笪，毋閣學生實習e壓力真重，閣卡艱苦嘛著噯忍耐，所以講私立學校，經營硬斗，宛那有伊e心苦病疼置咧！
民國46年秋天，第四屆醫學生入學矣，這个時瞬財源有卡另矣，學校嘛卡有制度，嘛卡有捍頭e經驗，自那學台大醫學院，趕緊設齒科學系，佮藥學系，咱給看，高醫確實無簡單，吓使講伊真偉大，嘛無到佗位哩！汝看台大醫學院，安呢百年老店，安呢財源豐富，赫尼大間，嘛才民國44年設齒科系，咱高醫無錢無柳，嘛是民國46年叨設齒科系，差不多也食平好咧，有影無簡單！
另外設藥學系，宛那是真「迫切e需要」，人咧講「燒倒頭香」矣，全台灣三、四千間e藥房，關係著全民e健康，毋閣真尐是藥學e專業仁材，致使講規个社會e水準無好，袂凍佮先進國家比憑，聰明仙本身出身藥理學e專家，伊知影藥理e重要性，所以佇高醫當中，趕緊設立藥學系，吓使以上低e成本，培養出大量e藥劑仁材，高醫藥學系成立時間真早，聰明仙貢獻袂尐。
聰明仙佇民國43年冬天，叨實施「週休二日制度」，咱一般社會是到民國91年左右，才全面週休二日，杜聰明e辦法，是比照美國e制度行情，來提高行政效率，不而顧聰明仙這款e做法，小弟並無贊成，也叨五十年前e社會，散赤無甡張，以「勞力密集」為主，真歹趁食，彼時e制度是「月休二日」，叨是一月日歇二工，叫「大禮拜」，噯拍拚工作才有飯食，咱是歹命囝，袂使親象阿啄仔安呢，歇睏閣歇睏，叨親象目前民國94年來講，實行「週休二日」，小弟宛那反對，理由真簡單，咱是資源無額e小國，真正危險，認真拍拚做，叨無到用矣，哪有倘「週休二日」？少年人袂前未趁錢，叨pe性命敖幵，安呢是欲哪粒積財產？目前「週歇二日」，小弟真感慨，佇茲做臭人，講一句得失人e話「奚是公務人員壓榨勞苦大眾e一款手段！」，世間無拚哪吓成功？
杜聰明佇高醫初期，彼段物質無額e艱苦年代，宛那有注意「學校食堂」e節省辦法，真正無簡單，學生囡仔贅，卡早攏是採用定桌定食e方式，一桌坐十人，幾項菜幾項湯，安呢做效率無好，有時仔學生食無飽，影響體力，有時仔吓偆真贅菜尾仔，瓊瓊去飼大豬，宛那拍隕，杜聰明「觀察入微」知影代誌欲按怎處理，伊建議用自助餐方式，準備真贅盤e菜色，互學生自由揀選，逐工飯後處理菜尾e時瞬，叨研究佗一項菜甚贅，甚尐，明仔載叨吓使來改進，安呢，逐工e偆菜叨揙真尐，來節省社會資源，佇彼个乏搭e年代，宛那功勞一層叨著。
另外，杜聰明受日本教育，所以對學生e仁格教育，真正注重，做人噯忠厚老實，刻苦耐勞，這款話語雖然是逐工咧講，毋閣一定噯做吓到，佇少年時代，叨噯養成一款「頂天立地」e大無畏精神，來做社會e大枝龍柱，這款代誌，噯對上細步e所在，嚴格執行，等到慣習了後，定著吓現出高貴e仁格特質，安呢後擺到社會e時瞬，頻若咱高醫出身兮，隨人嘛醫德高尚做人成功叨著啦！
續落上要緊e代誌，叨是按怎聘請教授，佮創立教授會議e權威性，也叨高雄吊遠台北四百公里，彼个時代無高速公路無高鐵無飛機，來往真正無方便，欲聘請優秀e教授，恐驚也南北奔波來往硬斗，這个時瞬，聰明仙真正要緊，伊噯提出私仁e交情、感情、寬寬來說服社會e專家，落高雄教育英材，這个代誌表面上看袂出來，毋閣杜聰明私下確實含心敆命，用心計較，一科一科，一个一个去拜託去唗尋，宛那無快活安呢，咱聰明仙噯趕緊拍落好e基礎，閣卡辛苦嘛噯吞忍，食苦簡那食補e，安呢才對吓起董事會，逐傢目睭金金，望聰明仙擔起這个千斤萬重，尾溜也聰明仙嘛壹壹解決困難，互最初幾屆e學生真擻念叨著。
聰明仙佇台大醫學院，逶民國34～42年，捍頭八年，伊有一項真要緊e新制度，叨是「教授會議」，這个代誌佇日本時代真正要緊，伊權力真大嘛發揮真大e功能，毋閣佇中國仔時代，卡無咧注重这，伊是單純e聯誼性質，逐傢食飯幵冓爾爾，相差真贅，杜聰明沿襲台大，嘛佇北醫實行教授會議。这叨是日本時代e官員，繼續落來e真大好處，伊這个教授會議，有研究，選課、批評、發展……各種效果，對高醫e學術進步，真正要緊，咱聰明仙頻若想著茲，叨嘴笑目笑，心肝頭歡喜咧等安呢！
聰明仙咧捍頭高醫e時瞬，宛那真注重仁情世事，伊逐年攏有舉辦「解剖祭」，來感謝佮超渡，互學生實習解剖e大體佮尹e家屬，一爿坐遺體e家屬，一爿坐醫學生，感謝，就香，法師超脫唸經，互社會e慈悲佮犧牲吓起示，吓現出仁性e光輝佮情義，永遠遺留社會安呢。
56
呾民國43年10月，招生第壹屆醫學生，佇咱聰明仙無暝無日拍拚以上，用心計較，經營捍頭，日子一工一工過去，一年閣一年，民國49年6月，第一屆醫學生卒業矣，聰明仙真正歡喜，董事長陳啟川閣卡志氣揚揚，辛苦經營這嗎已經收成矣，定著是歡喜wewe聰明仙佮啟川董e，哪行哪看，踅過校園一遴，想起初期開創e心酸，日屑自那滴落來，想著這幾年來，張其昀、陳江山，佮眾董事e肖媵，心肝頭真正感謝萬千，這間學校，尾溜也徛起來矣！勇起來矣！強起來矣！
聰明仙想起第一屆招生e過往，彼時瞬無校舍，是借三民區愛國國校e禮堂來上課，入學考試是借用省立高雄中學教室，錄取六十名新生，開學是民國43年10月16日，聰明仙e記池猶真新，哎！時間真緊，一聲叨欲卒業矣，杜聰明有寫一首詩集來歡迎新生。
「立志青雲夢，乘車到港城，學園佳士壤，杏葉看新萌」
「苦讀寒窗掛榜中，揚揚意氣前高雄，學醫生學為人道，師友歡迎喜氣融」
「龍門鯉躍到高雄，抱有學醫濟世衷，萬卷圖書須要讀，兮從首業好研攻」
呾時間真緊，民國49年6月，第一屆醫學生卒業矣，畢業典禮e時瞬「四路英豪，冠蓋雲集」，这是咱高雄地界e大代誌，咱高雄人這聲tu破草笠出頭昊矣，咱港都人是有材情有格調e，袂凍互人看輕e，逐傢拍拚認真，共同創造美好e遠景！杜聰明佇典禮會場，有寫一首詩來肖送。
「一片水田變學園，樹人樹木壯芽根，六年今見花含笑，濟世為醫要出門」
聰明仙去高雄，交陪陳啟川、孫媽諒，欲來高雄醫學院，彼年1954，吊遠伊出世1893，伊已經62歲矣，想講落下港捙拚，宛那ut著一條老命落去碾〔qing4〕，落去拂，真正咧拚氣魄組兮，佇彼个艱苦短命e年代，聰明仙願意潦落，來貢獻終身所學，宛那互人真正欽佩叨著。第一屆醫學生卒業e時瞬，伊已經68歲矣，吓凍看著親身晟養e畢業生，真正是伊終生上大e安慰，彼个時代，仁材臹尐，親象聰明仙這款優秀e仁材，吓凍落下港貢獻所長，宛那是遐e人福氣，人講「千金難買早知影」，有一寡代誌，這嗎看起來無啥乜，毋閣佇彼个智識乏搭e年代，聰明仙有先見之明，實在無簡單！
呾月落星移，一冬一冬過去，咱北醫嘛卒業十外屆矣，咱聰明仙「功在杏林」漸漸來老囉，伊噯考慮退休e問題，家己責任到矣，讓賢互少年人去捙拚，人講「食老袂哺塗豆」，記池嘛一工一工退化，也叨年歲e問題，宛那有姑不而衷哩，嗯才聰明仙決定佇民國55年九月退休，彼年1966年，春秋74，吊遠1903年進入滬尾公學校，有63年久，吊遠求功名提博士1922年，宛那有44年赫久，算講仁生有目的矣！有到磅矣，真正台灣人做了有起，袂去卸著咱杜家e面子矣！
民國55年9月13日，董事會通過杜聰明辭職院長e案件，十月初一，正式舉行移交典禮，會場上，聰明受著各界貴賓佮董事e推崇，伊e功勞，逐傢永遠吓懷念，伊e離開毋是力量e消失，顛倒是力量e擴大，互咱茲氏細永遠記e，聰明仙唅著目屑，鼻頭一瞬e酸軟，模糊e屑影，看著蹼仔聲直直催落去……。
第二工透早呤，聰明仙又閣去高醫校園內，做離開前最後e巡禮，哎！時間過了真緊，燃眉十二年安呢一聲叨過去矣，哎！歲頭增加嘛加臹臭老，想十二年前，剛到高雄e時瞬，受著陳啟川、孫媽諒e熱情紹待，彼瞬滿腹熱情，意氣洋洋，落尾也又閣受著張其昀部長e禮遇，尹茲人e恩情如山，我實在無法度報答，聰明仙佇校園踅一遴，目燒鼻酸，真正感慨，茲e一草一木，攏是有感情啊!聰明仙呆呆徛佇遐……。
咱聰明仙攽落高醫繁重e校務，這嗎無事一身輕，過著閒雲野鶴e生活，聰明仙受日本教育，一世人上介清廉，汝干礁看伊e面相叨知影，伊這个人「一絲不苟」，勤儉認真拍拚，對錢項兮是清清楚楚，絕對毋敢貪人甲一鍼五遴，茲有伊壹生感到上介憤慨e代誌，叨是有人佇伊退休了後，告伊侵占高醫e財務，聰明仙氣甲噗噗跳，馬上發表嚴重e聲明，咱講實e，杜聰明e仁生，毋是這款人，伊本身好額人，對錢項e代誌，無特別e注重，伊若看錢重，叨無需要來高雄拍拚醫學院，咱台北趁錢e機會滿四界，伊若來高雄跋撋，叨無需要看錢項，也叨孤鳥插人群佇下港所在，絕對毋是拚路安呢甡。
聰明仙做人勤儉認真拍拚，伊e面尺足成日本人，安呢「堅毅不屈，刻苦耐勞」彼型兮，伊若愛錢，su當時去京都帝大讀冊時，伊叨吓使用公費，最後伊用私費，六年半幵銷四仟箍左右（合這嗎600～800萬NT），橫直返台灣了後，公費私費攏無差啦，攏是做教授一條路爾爾，伊佇台大病院時，叨嚴格規定出納系統噯真清氣，絕對袂使有一絲顛誕逐傢謳咾有著，到高醫e時瞬，砌校舍佮學生餐廳，嘛是連番再次咧規定，絕對袂使貪錢貪錢，伊要求仈人嚴格，仝款「律己甚嚴」，杜e老父佇北新庄嘛無惜錢財，不時救助時近散赤人哩！
57
我迭迭咧研究，杜聰明實在是一个「天公仔囝」，天公伯仔對伊真好安呢，伊退休e時瞬已經「高達74歲」矣，毋閣伊最後食到94歲，猶有二十年e歲月，所以人e運氣叨歹講哩！目前台北e壽命，男74歲、女77歲，所以我講聰明仙e基因，實在是有夠好，咱吓使來研究，杜聰明細漢時瞬，是一个細粒籽（小个仔），甚至讀醫學校e時瞬，入學會議無欲互伊讀，是按怎伊規氏人身體赫尼勇，伊咁有啥乜撇步是毋？
實際上講起來，伊e家族遺傳真好，尹無癌瘤e因子，無心血管e因子，無糖尿e因子，所有e器官，攏真「耐用耐tun4」，致使講伊一氏人，袂去互病魔佮伊交關，真正互人欣羨，毋閣伊宛那有幾落項好習慣，吓使互各位參考一下。
(一)伊非常推廣泅水e運動，伊逶十外歲，壹直到七十外歲，差不多逐工泅水，这是真光彩e代誌，佇彼个時代，宛那徛佇時代e先鋒安呢（這嗎e時代，無希罕），伊大概也用蛙式，人咧講平游叨著，這款e泅水，卡省體力，卡吓耐久，卡適合各階層e人來運動，尹規傢人攏興這路e，互相看顧水路危險，真正好勢。
(二)伊足噯洗「冷水浴」，伊e想法叨是，冷水浴吓凍莿激身體e反應，互體內反應，增加血路e循環功能，伊自細漢到老伙仔攏安呢，嘛真尐毛病叨是。
(三)伊對任何代誌，攏真搰力，看落著做，抾起來叨做，致使講伊e累積運動量袂尐，定呢體重卡袂甚肥，这是伊一世人e慣習，聽兮講尹老母叨吓真搰力真玲琍。聰明仙也叨一世人袂肥，所以真贅毛病攏無伊e份，安呢才吓長歲壽。
(四)伊是愛「拉單摃」來鍛鍊體力，这逶細漢e時瞬，教官叨教甲真入腹，做甲真好勢。
杜聰明佇高雄醫學院，已經是七十歲左右e老大人，毋閣這十二年e中間，每禮拜有三擺，攏去西仔灣海水浴場游泳，辣昊時仔海水浴場有幵放，無啥乜要緊，毋閣寒天這聲叨費氣矣！無外久伊熟似場長王先生，申請台南軍管區e通行證，所以寒天，聰明仙嘛去泅水，是毋是海水吓冷，聰明仙講下港所在，普通比台北燒辣，叨頻若海水二十度以上，伊攏敢落海泅水，是稍寡冷，毋閣慣習矣叨好，这叨是逶細漢苦練e結果，聰明仙咧泅水e時瞬，夫人攏捸佇身邊觀察，防止事故發生。
杜聰明少年時代，佇台北e時瞬，攏去淡水沙崙海水浴場泅水，也叨伊本身叨是淡水人，對淡水e山川地理，是捌甲有偆去，尤其伊佇台大醫學院（民34～42）這段時間，吓使講逐工叨去沙崙海水浴場交關，彼時伊卡”少年”才六十歲左右爾，嘛泅甲鏘鏘滾，互少年傢仔真欣羨安呢！尹有一擺佇淡水返來台北e時瞬，看著路中有一个阿啄仔駛車拋錨，踮兮咧大粒汗細粒汗舞規哺，聰明仙自那真好意給載返來台北，伊吓曉淡薄也英語，雙方吓凍溝通，落車了後，自那分開，並無互相問姓名地址，尾溜也有一擺聰明仙提著WHO獎金欲美國時，佇美國大使館簽證時，才知影彼工拋錨e阿啄仔叨是主審官，伊看著聰明仙一个面簡那清水祖師e，一聲嘛認出來，伊真熱誠佮聰明仙打招呼叨著。
民國55年退休到民國75年謝世，這二十年e退休生活，咱聰明仙宛那過了「多彩多姿」，伊活到94歲，一氏人無啥乜病疼，这一方面是伊e遺傳真好，一方面嘛是後天保養，这隨人e運命真歹講安呢，中間除了夫人林雙隨逝世彼段時間卡憂傷以外，大部份攏真幸福，伊e囝孫宛那真有孝，仁生活了有價值叨著，聰明仙逶高雄退休，搬返來台北了後，雖然已75歲老翁，宛那一禮拜去再春游泳池，兒童樂園游泳池，沙崙海水浴場泅水，實在是「老當益壯」，仁生衝了有起安呢甡。壹直到80歲以後，囝孫袂放心e，才漸漸無去泅水，這段故事，吓使互鄉親嗣大做一个仁生e參考咧！
聰明仙，自1903～1909讀公學校，1909～1914讀醫學校，1915～1922讀博士，了後做十四年e台北醫專教授，1936～1953做十七年e台大醫學院長，1954～1966做十二年e高醫院長，退休又閣20年，1986謝世。伊這氏人充滿特殊、奇巧，全世界欲尋安呢e貴仁，宛那臹希罕叨著。
第十五章 雙隨辭世心傷悲
故鄉孫科于右任
（1966～1973）
30
1966年十月，杜聰明已經74歲，伊辭去高醫院長e職位，過著退休e悠閒生活，毋閣呢，伊雖然退出江湖，身體又原真勇健，目金頭殼清，算講國寶級e大枝龍柱叨著，政府定著噯好好給重用安呢，伊受聘為「教育部醫委會常任委員」，以六十年e醫界經驗，含心敆命用心計較，來為後代e醫學教育奉獻。
為著欲實現「百年樹人」e理想，教育部有一筆經費，迭迭吓指派學者，去歐美各國考察最新e教育方向，來做國內教學系統e參考，互咱國內教育，佇國際競爭激烈捙拚e噹中，才袂失志落坑，這款代誌，佇醫學方面，交互聰明仙去做上介好勢，咱聰明仙自民國11年做台北醫專教授到呾，有45年e教學經驗，真正台灣地尋無第貳口灶，嗯才e瞬呤，教育部拜託聰明仙，佇1967民國56年3月，去歐洲佮美國做醫學考察，倘保護咱國內e醫學教學發展。
人客啊！汝吓講聰明仙，真正「天公仔囝」做了有起，祖公仔靈聖有咧燒好香，才有法度去歐洲美國考察兼憩陶，有影，这人e運途八字無仝，真正互汝袂鐵齒e！咱聰明仙這世人噹中，到呾有三擺去歐美考察，其中以第壹擺上介僥擺，上介稀罕，佇民國14年彼个「古早時代」，伊受阿本仔總督府委託，坐大船環球一遴，去歐美考察，彼瞬伊三十捅歲，去憩陶兮真正有影，伊逶台灣坐船到日本、美國，才閣坐到歐洲，週遊德英法國，才閣坐船經蘇伊士運河，中東、印度、香港回台灣，也叨少年「血氣方剛」，中途險兮佇瑞士高山跋落坑崁，事後驚甲一身軀肉，伊這款e享受，佇八十年前e孫中山時代，實在是希罕甲無聲無示，連做皇帝e，叨捸伊袂著安呢！
25年了後，杜聰明58歲e中年人囉！阿山兮來管，臭頭仔宛那真尊重伊，佇1950年12月，以WHO名義派伊出去考察，这是伊第二擺e歐美考察，算講給聰明仙「安慰、補償」伊二二八時瞬e受驚，唉! 伊俍卡好，陳儀來台灣，青狂白狂烏白舞，安呢歹歹叫狠介介，一个面仔揙揙揙，恁父驚甲十二條魂魄唗了了，這條命險兮去互伊款去，這嗎臭頭仔採取溫和笑面攻勢，派聰明仙去歐美考察兼遊覽，半年了後返來台灣，這擺卡進步，改坐飛機，佇彼个散赤e時代，宛那算「富豪級」e享受安呢。
哎！這回教育部派聰明仙去歐美考察，伊已經75歲矣，歲月無情，吊遠頂回民國39年嘛17年矣，這段時間內，歐洲美國e醫學進步真贅，台灣為著欲捸著世界e腳步，「昊內無坎，嘛噯去」絕對袂便漏喟e，嗯才e瞬呤，民國56年3月16日，聰明仙逶松山機場起飛，仝款舊路線，台灣、日本、夏威夷、美國、歐洲，這擺增加義大利、西班牙、泰國，這擺e考察，罔看罔看，，橫直歲頭亦食甲七十五，仁生宛那有夠本矣叨著。
也叨煩腦厝內e關係，這擺歐美e考察，心情並無快活，毋是伊e問題，這嗎尹嫫雙隨女士e健康「亮起紅燈」，聰明彼瞬雖然75歲，毋閣伊肉草好，食到94歲，所以猶閣「真少年」無顛誕，呾尹嫫這爿叨無仝款矣？伊先天摕糖尿，六十歲呤叨欲死動亥，百病僬到，互聰明仙真正煩腦安呢甡，哎！人e運途身命，受自嗣大遺傳先天，宛那姑不而衷，聰明仙看佇眼中，苦佇心內，不時嘛半暝咧流目屑，雙隨佇三四十歲時瞬叨費氣艱苦，尤其甡第三胎時瞬，險險兮不幸，其中心苦病疼，深深來莿棘著聰明e心肝芛仔。
日本時代時瞬，報名人壽保險，雙隨才三十外歲爾，叨互會社給拒絕，也叨糖尿關係，保險會社卯贏無卯輸安呢，聰明仙耽耽也，心中暗暗鼓勵祝福，糖尿病若嚴重e時瞬，是一款真正麻煩e症頭，伊吓互咱人e「結締組織」規組害了了，伊是一款「戰略性」e症頭，毋是「戰術」性局部e，叨頻若有結締組織e所在，攏吓崩盤落坑，有e人一絲仔空嘴叨袂好，有e血路循環無好，烏腳症噯踞腳，有e目睭無看e，有e腰籽無好，高血壓，有e心肌梗塞，有e中風……真艱苦叨著。
夫人雙隨佇杜聰明「高醫」時代，糖尿惡化，聰明仙「點滴在心頭」，定著知影，伊彼瞬，雙隨才五十捅爾，尿中有蛋白質，聰明仙不止也著驚，家己是醫生，呾腰籽出代誌矣，袂使互汝秤秤彩彩準過去，尾也用足贅苦心，才互這个問題改善，毋閣無外久，心肌梗塞佮肝炎又閣發作矣，聰明仙有步揙甲無步，民國五十年左右，行高醫附屬病院，簡那咧行灶腳le，也叨糖尿e併發真贅款，落尾也血壓嘛楦懸（變高了），有一擺去台大內科尋翁廷俊醫師，翁醫師看看e，講伊血管已經硬化，噯注意心臟，毋閣最後雙隨是死佇中風這關。
民國56年3月，聰明仙奉教育部命令，做第三擺e歐美考察工作，出發進前，叨真煩惱雙隨e身體，毋知吓擋e抑袂，松山機場坐飛機去日本e時瞬，半路嘛壹直咧想這个問題，二月日了後，聰明返來台灣，好佳哉雙隨情形袂醜，暫時隱定叨著，聰明真正歡喜，毋閣心肝中宛那耽耽也，尾溜也，代誌無赫快活，糖尿病原本叨硬斗。過返年，民國57年3月29日早起，雙隨搪咧整理行李e時瞬，洶洶遂昏倒，「不省人事」真正恐怖，聰明照顧佇身邊，大查某囝淑純緊叫翁廷俊、陳烱明來診，十外分了後睜神矣，毋閣一腳一手半身不遂矣，無外久邱仕榮院長來探望，馬上蹛入病房看護，這个時瞬，聰明仙知影代誌大條矣，心肝內有所按算，生死空縫呤，隨時噯接受嚴厲e考驗。
雙隨蹛院了後，情形有稍寡快活，第三工，聰明仙又閣當選台灣省醫師公會理事長，雙隨神智清楚，嘛真歡喜安呢，毋閣第六工透早四點，伊起來攽尿e時瞬，洶洶大喚一聲頭真痛，隨後覆倒在地，杜聰明佇身邊，馬上起身給扶，毋閣十分鐘了後斷喟死亡矣，伊1901年甡，1968四月四日病逝台大醫院，食68歲，聰明仙感覺無限e哀疼，是伊壹生中最大e打擊安呢！
59
四點鐘了後，移靈民權東路殯儀館，館長一下聽著杜聰明夫人呤，馬上做「最優厚e待遇」，不在話下，有二組仁員幫贊，一組趕緊給雙隨擦澡，換衫、化裝。另外一組仁員，趕緊成立治喪委員會，由蔡培火做主任，邱仕榮總幹事，魏火曜、閻振興、李鎮源……做委員，逐傢分工合作。聰明仙也叨昨暝無閒規暗，身體疲勞，暫時歇睏，伊e「挑李滿天下」，這方面e代誌，定著有真贅人來幫贊，暗頭仔e時瞬，聰明仙返來現場，悲苦哀愁，佮諸位幫贊功勞者，唅著目屑，壹壹答謝。
雙隨四月四日，蒙主恩召，按算四月十八日入殮，二十日公祭佮出山，聰明仙「念妻心切，感情篤厚」，嗯才e瞬呤，伊決定每暗佇館內守靈睏眠，表示最大e哀思安呢，連續十二工，搭搭搭，仁仁仁，連茲館內e員工，通人嘛比大頭拇，謳咾甲吓触舌，伊講，世間哪有即情義e尪婿，安呢無暝無日咧為嫫發落，我想这叨是杜聰明偉大e所在，伊e志氣，伊e仁格，佇茲表現甲盡磅逗搭，壹切發至內心，無咧假e，叨世間感情氣魄，真正互汝吓謳咾咧！
咱天良講，聰明仙彼个年代，有「法度」e人，攏真愛娶細姨，表示伊好業有材情真正光榮，偏偏咱聰明仙無愛這款「光榮」，給伊讓互仈人，家己做一个「忠貞不二，至死不渝」e情理人，雙隨若地下知影，一定含笑無遺憾矣！算起來杜聰明這世人甚過長歲壽，所以一路發落喪事真贅擺，五六歲時瞬姑丈過身，親目料理，十歲e時瞬老父杜日鳳過身，聰明仙親身佇舊厝大廳觀看儀式，嚎甲毋臹聲調，二十一歲時恩師小竹校長病逝，宛那守靈規暝。二十五歲佇京都稅厝時，上疼伊e阿媽洶洶過身，伊嘛「抱屍痛哭」，經過五十年了後，這嗎老嫫過身，伊已經76歲矣，聰明仙忠直義氣，對夫人思念，發自內心，迭迭嘛目屑貢貢流，真正捶心肝安呢！
哎！時間過了真緊，佇1918年頭一擺佇船內看著雙隨，到今仔日蒙主恩召1968，拄拄好50年，這段長時間內，聰明疼嫫感情真好，「竄筋入骨是威威鑽」年久月深膠膠膠，在在在，真正無人吓比憑e，聰明仙彼暗仔，目睭頻若kue5，叨浮起少年時代e形影，佮著走馬仔燈仝款，一幕閣一幕出現矣！這場因緣，1918年由蔡培火踮船頂紹介，五十年後e治喪主任委員，宛那由蔡培火主持，仁生上深處e意義佇佗位？聰明仙感慨無量，「生死壹線，見事壹層膜」，看著昊邊一蕊一蕊雲彩，仙兮怢怢〔qan6〕徛佇遐，心肝頭一瞬e感傷，哎！按怎即尼緊？即尼緊，實在叨想袂曉哩！
聰明仙印象上介深，意志上介堅強，叨是京都帝大最後二年e生活，彼是大正八年到十年（1919～1921），彼瞬，一方面是博士e論文壓力，一方面已經深深去敮著雙隨矣，一方面雙隨e老父並無贊成這層婚姻，嗯才聰明仙咧吐大喟，qenqen袂消肫（無可奈何狀），規个仁生，踏入烏暗e階段，伊身處外國所在，他鄉外里，深更暗暝時分，真正滿腹心事暗暗滴屑，有時也佮好朋友外出，佇街路深巷所在，一瞬冷風吹來，勾起伊無限e傷悲佮幻想，哎！雙隨啊！雙隨！
經過四年e奮戰，「有情人終成眷屬」，1921年底，聰明仙彼款「一絲不苟，滿面嚴肅」e面腔，漸漸現出笑容，雙隨有希望矣，哎！時間真緊！仙兮啊！1921秋天e婚禮，汝咁猶吓記咧，規間江山樓鬧熱滾滾，意氣洋洋e場面！汝咁吓記咧，醫學校e學生團，給汝祝恭喜唱歌納曲舞規暗e場面？
雙隨啊！汝咁吓記咧，淑純出氏時瞬e歡喜？叨身處公務噯擔起醫專教務，穡頭硬斗，嗯才幾落擺出國深造e時瞬，互汝真正辛苦來晟養囝兒，有時仔想起來，宛那心肝威威鑽，汝咁吓記兮我初次去歐美e旅程，汝趕來香港，二人見面e歡喜？呾这已經是四十年前e代誌矣！哎！這擺汝洶洶離開世間，真正互人想袂到，呾囝兒攏大漢矣，汝吓使放心，半冬前佇香港買e皮包，汝上介甲意，這擺宛那陪伴汝e身邊，後日汝佇天國世界，宛那吓歡喜啦！
為著欲表示對雙隨最大e敬意，聰明仙親身掣囝兒，仝齊到大稻埕隆順壽器行，買取彼時全台灣上貴重e香杉棺木，伊e氣味比檜木卡芳，世間珍品安呢，民57年4月20日做告別式，依基督教典禮，引葬淡水第一公墓，哎！聰明仙叨淡水人，「落葉規根」是完滿e代誌，典禮「冠蓋雲集」有仟外人，黨政軍醫學商僬到，連「華西街」副某某嘛親自行到，真正哀榮無地比安呢？
叨安呢，雙隨民國57年過身，聰明仙又閣「守寡」18年，壹直到民國75年才謝世，享年94年，比雙隨加26年，真正長歲壽，聰明仙一氏人忠直義氣，伊有日本精神「一絲不苟」，嘛有台灣精神「水牛港認真拍拚」橫長直破，尾溜也這十八年e單身生活，聰明仙寄情詩文寫作，互人真佩服，也叨思念雙隨心切，有時三更暝半，嘛吓夢起六十年前，頭擺佇船頂見著雙隨e綺麗畫面，睜神了後，「泣不成聲」，枕頭棉被僬霑，伊做人忠厚專情，咱茲後世e少年仔，噯佮伊學，毋倘鐵齒呢？
60
1970民國59年，杜聰明已經退休4年矣，歲頭嘛食到78矣，毋閣伊身體勇硈硈〔ket〕，慢唗，扭單槓，泅水，山……逐項攏吓曉，袂輸這嗎王永慶，食甲90歲，猶吓凍參加台塑運動會慢跑，真正無簡單安呢，聰明仙一氏人洗冷水浴，提神行氣安呢嚬嗙叫，真正怪仁一个，暗時e時瞬，迭迭寫詩，寫回憶錄，學問臹好，1970年有發生二件轟動國際社會e新聞事件，互聰明仙真著驚，一件是正月e時瞬，聰明仙上好e朋友彭清靠，尹後甡彭明敏，揙做政治犯佇特務軟禁e情況下，化裝逃亡出境，流亡到瑞典，另外一件叨是4月24日，台灣留學生黃文雄、鄭自財紐約暗殺蔣經國案。
1909，杜聰明以第壹名成績；考稠總督府醫學校時瞬，「轟動武林，驚動萬教」，彼時二年級e學長彭清靠，真正欣賞咱聰明仙天才型e資質，佇學校e時瞬，對聰明仙非常e照顧，疼痛。真正客氣、真正牽成，致使講聰明仙宛那真感恩，二人感情足好e，卒業了後，宛那不時咧連絡安呢，落尾也聰明去留學京都帝大，彭清靠返去高雄，開一間婦產科醫生館，造福地方，卒業二十三年後聰明仙咧做台北帝大醫學部教授，每年趁歇辣（暑假）e時瞬，攏掣囡仔落下港，沿路拜訪朋友，順續遊山玩水，聰明仙頻若到高雄e時瞬，叨到彭清靠e厝內幵冓過暝，回想二十外冬前醫學校e生活東西，真正懷念，安呢糖甘蜜甜。
彼瞬，杜聰明佮彭清靠攏是四五十歲e中年人，聰明仙e大查某囝淑純，佮彭清靠e屘囝彭明敏，平平攏是民國十二年出氏e，叨規陣囡仔耍甲真歡喜，有一擺淑純叨問彭明敏e姊妹，奇怪，彭明敏哪吓「表情嚴肅，無噯講話」？彼時民國27年左右，淑純佮彭明敏攏咧讀中學，二个家族，熟甲有偆去，1936民25年聰明仙佇台大醫學部捍頭，第一屆學生，有李鎮源、邱仕榮、許強、彭明聰（彭清靠大后甡），真正「親上加親」。三十外年了後，彭明敏揙政治犯，偷渡到瑞典轟動國際，莫怪杜聰明佮仝歲e淑純，真正著驚安呢甡。
彭清靠e細漢囝彭明敏，自細漢叨頭殼聰明，醉心文學藝術，也叨大囝彭明聰已經讀台北帝大醫學生，所以彭清靠亦無勉強，伊自那去日本留學，先入去關西學院讀政治系，彼瞬二次大戰上介激烈，伊一擺坐船佇長崎時瞬，去互美軍飛機e炸彈炸著，正手炸裂鮮血直流，好佳哉有四个台灣留學生給輸血，這條命勉強保稠e，毋閣手遂減一枝去矣，真正悽慘，無外久，美國佇長崎撣落原子彈，彭明敏親身有看著爆炸，哎！大時代e悲劇，真正無法度哩！原子彈炸後，彼四位捐血e台灣人嘛死亡，這層代誌互彭明敏真傷心，真正捶心肝哩！算講這回來日本讀冊，拄好搪著日本戰敗尾期，彭明敏去掃著風颱尾，真正衰甲叫毋敢。
呾彭明敏返來台灣了後，入台大政治系讀冊，佇民國37年畢業，中間拄著二二八事變，感覺仁生艱苦，幵始對國民黨這个外來政權臹感冒安呢甡，尾溜也伊佇政治系做一个助教，又閣歹運拄著經濟大崩盤，也叨四萬換一箍，台灣人「一夜之間，傾家蕩產」，彭明敏「悲憤」到地也，自那去法國留學，獲巴黎大學博士學位，伊e專長是國際公法、太空法。目前全世界所用e「國際公法」，大部份攏是伊e貢獻。
1958，民國47年，彭明敏以35歲e少年傢仔，榮登台大政治系主任，真正少年叨著，無外久得著「十大青年」獎章，臭頭仔不止也歡喜，有意思欲牽成大官互伊做，達到「以台制台」e最高謀略！尾溜也彭明敏「叛變臭頭仔」！所以大官改互戽斗輝仔（李登輝）做，这「陰差陽錯」一念之差，彭明敏佮總統命絕緣，抑無，戽豆輝仔是第二順位爾爾，人吓叫「彭總統」叨真正有影叨著。
經過二二八，白色恐怖了後，臭頭仔僥擺wewe咱「政治系主任」真正摯載袂稠，尤其是二二八時瞬老父彭清靠，去互高雄要塞司令彭孟輯侮辱e故往，閣卡互伊心狂焯真正夯狂，代誌是安呢，民國36年3月6日，彭孟輯e兵隊向火車頭、市政府、大肆屠殺，引起彭明敏激烈e憤慨，這款阿山兵，對外敵無法度，摋百姓考第壹，彭清靠做過高雄市議長，伊是高雄e敖人，無外久做調解委員，有一暗，兵仔給彭清靠縛起來，夯槍欲給莿殺味是（的樣子），第二工才給攽出，害彭清靠返厝以後，真正艱苦，對中國人真感冒，「以做華人為恥」，展開台獨思想，这無法度哩，烏仔魚去互濁水激著矣，為著生存，這聲無拚袂煞矣哩！
民國47年～53年這六年，彭明敏做台大政治系e主任，伊愈想愈毋著，有時想甲心肝mi鼓必噗彩，血壓擎到二佰貳，叨台灣人毋是奴隸來哩，按怎噯做人e腳架仔？按怎噯著「戒嚴法」這款物件，來壓迫忠厚e台灣人？13％e逃難中國人，來統治87％e本地人，安呢咁合理，彭明聰真勇敢，佇民國53年4月提出「台灣人民自救運動宣言」宣揚台灣獨立理念，無外久，伊佮尹學生謝聰敏、魏廷朝，叨去互臭頭仔掠去，判軍法判八年。講伊背叛國家，按怎按怎。
毋閣臭頭仔這聲去踢著鐵枋矣，咱彭明敏毋是壹般e政治犯，伊進前留學過法國、加拿大等民主國家，學問真好，朋友真贅，伊是國際法e權威學者，一下聽著臭頭仔欲給關八年呤，茲國際仁士跳出來肖媵，尤其是「國際特赦組織」，閣卡拍拚來挽救，拜託e，一个壹流大學e系主任，哪吓使秤彩互人掠去做政治犯？尹俍卡好，恁父「國際特赦組織」叨無咧開假e咯？
臭頭仔ga有互國際壓力以上，宛那毋敢聳鬚，哎！關一个國際學者，真正袂孝孤e啦！趕緊特赦，無欲給關兮攏仔內，毋閣派人二十四兵給軟禁，伊徛傢e四周，永遠有特務咧給監視稠e，互伊起腳落手臹無利便，來防止伊「叛變」，叨安呢，彭明敏去互人軟禁幾落年，壹直到1970，民國59年正月，伊得著國際仁士e支援，有人暗中給化裝，提仈人e護照，佇特務24點鐘監視下，逶松山機場，辿逃出境，24點鐘了後，伊佇瑞典出現矣！國際上e報紙，大篇報導，真正轟動武林，驚倒萬教，這聲臭頭仔滿面全豆花，卸世卸眾真正有影，遐監視e特務，擻个仔掠起來摃尻倉！
落尾也，彭明敏返來美國本土，受各界台灣人e歡迎，伊做FAPA e頭傢，是台獨e頭號領袖，伊e學門、仁格、志氣，互全世界知影台灣人e苦楚心酸，為著脫離北京話統治者e艱苦，對台灣獨立e好醜長短，講互國際仁士鼻芳一下，彭明敏佇美國流亡二十外年，互美國方面，「獨派」佮「統派」起嚴重e對立，逐傢「戽牛仔照角」，強欲舞甲袂收山攬尾e，另外一方面臭頭仔佇台灣，宛那真費氣，逐擺為著台灣，外省人e問題，舞甲目青面黃，真正「頭大面肆方」，毋知欲按怎才好！
二十二年了後，台灣戒嚴戒除矣！臭頭仔嘛死矣！阿國係嘛去做仙矣！彭明敏嘛七十歲矣，民國81年伊返來台灣，受著英雄式e歡迎，三年了後，互民進黨提名做總統候選仁，雖然選無稠，宛那互社會提高民主意識，伊e壹生真正互人佩服叨著。民國59年，彭明敏偷唗去外國，彼年杜聰明78歲，伊返來e時瞬，聰明仙已經過身矣，也叨22年實在甚久矣！聰明仙歲頭一把矣，是等袂赴矣！伊袂凍看著少年時上好e朋友彭清靠e囝兒返來台灣，宛那真怨歎！彭明敏轟轟烈烈，e代誌，宛那互伊真著驚！
三月日了後，有一工聰明仙咧看報紙，有一條真驚惶e新聞，奚叨是「四二四事件」，民國59年4月24日，台灣留學生黃文雄、鄭自財，為著反對國民黨外來政權，殖民統治台灣，夯槍莿殺彼瞬搪佇美國訪問e臭頭仔囝蔣經國，彼時，黃文雄鄭自才干礁欲教示伊爾，無欲造成死亡，互代誌大條袂收山e，所以槍籽挑工扑歪去，二名「凶手」自那互美國警方掠去，落尾也交保、流亡，一氏人前途烏有來犧牲。
臭頭仔囝彼瞬猶未做總統，互人用槍警告，心肝內才知影台灣人咧反矣！噯好好來收給民心，抑無，勢面是欲按怎矯落去，汝看，臭頭仔做一世人總統，我閣再做一世人到死，哎！這嗎是啥乜時代，真正袂孝孤拄e啦！閣卡講宛那是一句話，13％袂曉講台灣語e外省人，是欲哪界管87％e台灣人？这宛那硬斗哩！我佇美國夆暗殺e時瞬，台灣人宛那忖忠厚，近距離內挑工扑歪去，無欲造成死亡，互代誌袂收山e，這个代誌逐傢互相讓一步叨好，致使講阿國仔總統尾期，有來取消戒嚴令，宛那有改進叨著。
61
杜聰明八十歲左右，伊e家鄉拄著二擺危機，一擺閃無離，一擺閃有過，互伊心肝頭真ut卒，源頭叨是大屯山巴拉卡所在，風景好，地理贊，这是做百年歲後陵寢e絕佳地，真正國寶級e好所在，早叨引起大官虎e痟想，逐傢排隊，想空想縫欲來卯一塊仔好空兮，聰明仙氣噗噗，巴拉卡是我e故鄉，恁父叨咧殆甲無夠用矣（我自己都還不夠用），哪有倘偆互恁這陣阿山仔猴來tun踏？伊俍卡好，真正食人夠夠，聰明仙愈想愈氣，氣甲嘴鬚拍袺，雙手sisi顫〔zun3〕，血壓擎甲二佰貳，叨無卡擢哩！
人客啊！大屯國家公園，逶巴拉卡到竹仔湖，（這嗎e巴拉卡公路含有大屯自然公園），風景真嫷，雨水真厚，伊沿路毋但是展望好，原始森林，逐欉捙拄昊（參天大樹），鳥隻真贅，蝴蝶滿昊飛，天氣涼爽，不時雨水嘛逶規粒山頭，洗甲清氣清氣，人佇中間憩陶，袂輸簡那仙境e，是咱台灣最佳避暑勝地佮賞雪勝地，伊條件甚好，風景甚嫷，真正互汝謳咾甲三工三暝叨袂倦，毋閣呢，中國人真自私，早叨有人給大官講，這款所在「風水好」是百年了後做墓場e好佳城，呾叨卡趕緊e！咧燒倒頭香矣噢！這欲袂赴矣！茲有欲求國寶級 好風水e「黨國元老」家屬東西，隨人是拚甲疲pee喘，是拂甲「地昏地暗，日月無光」鏘鏘滾。
民國57～61年左右，這場竹仔湖墓園爭奪戰，最後e結果是安呢，「黨國元老」于右任勝利，殆佇巴拉卡中段地點上好e所在，吓使「西望大陸神州」真正尹俍卡好e，杜聰明逐擺返去故鄉巴拉卡e時瞬，暗時仔難免「尸居氣餘鬼影幢幢」。另一位「黨國元老」孫科，伊是孫中山e囝，亦想欲來創一塊仔，按算欲殆佇竹仔湖，这是民國60年左右e代誌，聰明仙心狂火焯，反對搭底，給戽去邊仔喘，孫科算失敗，另外一个「元老」胡宗南將軍，伊e家屬有卡巧，有卡低調，伊選佇竹仔湖陽明書屋e身邊，也叨毋是必經道路，無人去抗議，算講「偷渡成功」叨著。另外，「土生土長」e杜聰明，雖然一世人學問好道德文章，宛那無法度殆佇故鄉，互眾人來瞻仰；外來政權e統治，連這點叨毋攽汝煞！
是按怎講，于佑任吓「成功」，孫科吓「失敗」，这宛那噯看彼時臭頭仔e年歲佮體力，隨人喟運咧踅咧行，無仝款叨著，先給講于右任「这位仁兄」，金光頭兮「白髮蒼蒼」，佇民國40～50年代真正出名，掠著黨國元老e名義，「吃喝玩樂考第一」，伊壹生中間，鬧過真贅e笑話，立法委員李敖上愛給創治，講伊辛亥革命e時瞬，無去衝鋒陷陣，顛倒咧拍納涼，一時互人掠包，伊來台灣了後，以書法家居功，出名社會。
于右任雖然「道貌岸然」文藝書法，毋閣伊有一項小小e毛病。叨是伊「生性××」，彼時e人叫伊「老××」，佮楊×逗一笪，叨半斤八兩，性好此道，去夆嫌甲臭屎，宛那笑咪咪，真正黨國元老做了有起，叨互汝擻个仔凝甲目睭肖犮，嘴鬚拍袺安呢甡。
于右任另有一个笑話，叨是伊有做過一任e「總統」，民國76年冬天咧選立委e時瞬，謝長庭佇太原路e辦事處，圍一堆人咧看鬧熱，有一个助選員咧講笑話，伊講「各位鄉親」五年前，按怎有一隻飛行機佇三義頂頭茖落來，死佰外人，这有因緣置e，有一擺臭頭仔去天國見國父，國父講，汝有民主無否？臭頭仔講有有有！第壹任總統蔣介石，第貳任是「于右任」，第三任是「吳三連」，第四任是「趙麗連」（英文專家），第五任是蔣家不幹「原家幹」，……國父大怒，枴仔頭自那給摃落去，飛機自那逶”三義”栽落來，也叨「三民主義」欠了「民主」，定著偆「三義」，爾爾……。
叨安呢，臭頭仔家己做五任，又閣傳互囝蔣經國，到民國75年，咱杜聰明欲死動亥，蔣經國仝款糖尿欲死動亥，彼時發生接班e問題，這个空縫，國父看甲袂作e，趕緊來阻擋伊e計劃，下腳人問「皇位要傳給啥人？」，彼時阿國仔拄好尿急，印講「你等會兒，（我先去廁所）」下腳人一下聽著馬上大喚「是李登輝」啦，這聲戽斗仔才有倘做總統，民國89年選總統，佇天庭有人問國父，互啥人做卡好？國父講「隨便啦，隨便啦」，這聲凡間有人聽曾「水扁啦！水扁啦！」
于右任這个人「吃香喝辣」，享受仁間榮華富貴，猶未翹奈（死亡）進前，叨有安排欲占三位台灣上好e風水地，囥伊e骨頭，抑是伊e銅像，「逶家已e快樂，建立佇仈人e艱苦身軀頂」，真正中國人e封建思想做了有起呢，互伊點選e所在，隨人衰韶甲欲吐大腸頭，專制時代，安呢無伊法度哩！
第壹位叨是大屯山巴拉卡所在，伊風景上嫷，伊欲殆骨佇茲，萬世英豪，無咧煩惱恁台灣暢e，暗時仔驚鬼？第二位叨是玉山山頂，有3950米懸，安呢「君臨天下」才知影恁父于右任是台灣上懸e人，上偉大e人，第三位叨是台北市敦化北路佮南京東路三角窗，遐上有貴氣安呢，這三位當中以玉山山頂e銅像，上介僥擺，伊欲君臨天下，逶蕃薯仔踏佇塗腳兜，台灣人定著不服，嗯才e瞬呤，有黨外仁士，「不辭勞苦」，扛電鋸去玉山頂，ui 4于右任銅像，一塊一塊給鋸落來，撣入萬丈坑坎，關於這點，李敖嘛給tu4臭，給虧甲無一塊去。
民國56、57年彼瞬，于右任e墓園，尋到杜聰明e家鄉，杜聰明是著氣甲嘴鬚拍袺，詈甲無一塊好去，毋閣彼瞬臭頭仔佮聰明仙攏「少年」哩，聰明仙「馬力無夠」，拚輸臭頭仔，叨安呢，于右任e死人骨頭，自那殆兮巴拉卡公路e中站，遐e風景真正吓謳咾e，揙做「風景名勝」，安呢「採天地精華，取日月靈氣」，日來受雨，夜來凍露，加減卯一塊仔！
呾民國60年，孫科翹奈矣，「歪腦筋」又閣動到竹仔湖這爿來，尹想講頂回仔，于右老叨好勢好勢，簡那俺公咧食雞肫le，這回嘛欲「依樣畫葫蘆」，欲逶墓園造踮竹仔湖叨著，毋閣這擺踢著鐵枋矣，咱聰明仙足想氣e，佮伊捙拚搭底，落尾也，規庄頭反對e人甚贅，孫科e親族自那撤退，哎！茲大官虎，汝嘛卡差不多e，一門墓給恁父鎮稠e，暗時仔欲返去巴拉卡，這聲叨哭苦矣，彼个時瞬臭頭仔已經卡老也，無噯管茲閒仔事，而且孫科一箍tutu54，無人緣無人緣，家己四兩ng仔噯除le。
聰明仙有一點真厲害e所在，叨是伊e記池真好，佇伊八十歲左右e時瞬，寫回憶錄，對細漢e代誌「鉅細靡遺」，寫甲盡磅逗搭真幼工，互咱後世e人，袂輸佇古早彼个情景，真正無簡單，互人真佩服叨是，伊一世人e故事赫尼贅，而且伊嘛有法度真詳細寫出來，这是伊這世人對台灣上大e貢獻叨著。
第十六章 壹生壹世台灣人
清國日本中國情
（1973～1986）
62
呾聰明仙退休了後e生活，逐傢真有興趣，也叨伊民國55年退休，75年謝世，這中間有20年，是一段真長e時間，逗底伊咧揙啥魍？除了民國55～57中間，夫人破病佮仙逝e艱苦，無閒莿莿以外，偆e時間，有時寫詩，有時寫回憶錄，咱今仔日吓凍看著即尼詳細e回憶錄，宛那是拜伊e身體勇健所致應e，伊佇八十歲猶咧寫文章，寫東寫西，實在無簡單。
聰明自細漢，叨有讀漢文，日本時代佇小學，醫學校，宛那有漢文這个課程，可見阿本仔對漢文，嘛是有給注重，聰明仙一氏人e漢詩寫了真讚，下腳三首，吓凍欣賞看覓e！
(1)送畢業生
春風秋雨校庭青，曾照螢光七載經，
此去各行千萬里，惟餘師德永堪銘。
(2)宜蘭景福會
蘭陽旭日昇東海，再聚螢窗見一更，
五十年前猶絲角，至今濟濟滿頭霜。
(3)冬天水泳
滿山黃藥落皆空，如雪寒濤攜北風，
十里海濱人不見，蛟龍水上做英雄。
雖然聰明仙一世人風光，毋閣佇高醫尾期，宛那有沓著牛屎，受委屈流目屑e艱苦時光，伊長期食官庁頭路照品照行，叨讀書人毋知社會烏暗e一面，落尾也舞甲滿面全豆花，險兮「前功盡棄」，真正冤枉叨著，人咧講「吓使共艱苦，袂使共富貴」，好空兮通人搶，歹空兮逐傢閃離離，聰明仙壹心報國，事事求好，加減吓去礙著仈人e甡張，擋著人e財路，遂來受著真大e打擊，「燒爐添炭，著力閣歹看」，仙兮食到七十外，才來互好朋友「恩將仇報」，吊脰搶後腳，有影衰甲叫毋敢。
這層代誌，叨是「民國51～55年中間，高醫內鬨，院長董事長鬥爭糾紛」，彼幾年內e報紙寫甲真贅，聰明仙以一介學者，佇眾多生理人橫壓以上，自尊受嚴重莿傷，身心煎熬，互後世e人，叨頻若「熱心公益，捙拚認真」e人，噯有警惕心，「割肉互人食，人猶嫌臭臊」，汝盡做盡獻，人猶毋攽汝煞，真正噯張弛haa！話頭講到民國43年，聰明仙落下港，有心欲來創醫學院，受著陳江山、何禮棟、陳啟川、孫媽諒、唐傅宗……大力支持，另外拄著貴仁張其均部長，鼎力相助，高雄醫學院佇民國43年10月16日，第一屆醫學生開學典禮，眾人祝福，不在話下，彼時大地主陳啟川捐十一甲地，功勞真大，逐傢尊循伊做董事長，聰明仙做院長，雙方合作逗搭順序，逐傢謳咾有著安呢！
聰明仙，民國43年創立到民國55年退休，攏總做12年e院長，頭前八年，因為逐傢毋捌醫學院經營方式，由聰明專業經營，伊含心敆命用心計較暝日艱苦捙拚，給辦甲有聲有色，院長董事長「雙方合作愉快」！这是蜜月期，毋閣到民國51年左右，醫學院已經開八年矣，董事會對學校e經營，已經摸甲清清楚楚，開始欲享受「甜美」e果實，聰明仙親「人老珠黃e糟糠」，漸漸失去利用e價值，尹壹直想欲給硈掉〔ketdiau，除去〕來獨卯高醫e美景，早叨逶聰明仙「開創時期」e血汗艱苦一筆勾銷，致使講聰明仙「傷心欲絕」，姑不而衷到地也，佮董事會（主要是董事長）捙拚搭底。
這个時瞬報紙雜誌，加油加醋湠開內鬥新聞，真正影目，雖然高醫e學生界真同情聰明e困境，毋閣董事會e權力真大，欲叫汝落台叨落台，仈人真歹睬嘴，哎！聰明仙是讀冊人爾，毋知影好朋友吓揙冤仇人，叨安呢，「高醫院董鬥爭」壹直纏壹直拖，雙方攏舞甲青頭黃面，有影卸示卸眾，一个是全國最出名e醫學博士，一个是咱下港上好業e地主，有時透早搪著e時瞬，假影無看著閃開，哎！十外年e朋友呢！
董事會安呢做，並無毋著啦，毋閣「不夠厚道」，仁生短短也，燃眉汝我骨頭好拍鼓矣，何必計較赫贅，「利之所趨，兄弟揙臉」這款代誌，社會不時嘛咧出現，这對一氏人不重錢財，干礁研究學問e聰明仙，真正著驚嘛霧霎霎安呢，董事會方面有六款招式來打擊聰明仙。(一)講「聰明仙長期把持高雄院長，有財務不清之虞」，暗指聰明仙貪錢。(二)制定退休條款，以65歲為限，上贅加五年，彼時民52年聰明仙71歲，欲利用這條款強迫聰明仙落台。(三)將董事會內底，卡倚杜聰明派e董事唐徐罷何四人給排斥出局，來架空聰明仙。(四)由董事會設立「高醫學院管理處」，所有人事、財產、建設、收支、事務、全部由董事會控制，徹底架空聰明仙院長e權利。(五)利用財力，儘量巴結記者，寫一寡對董事會有利e新聞，來打擊聰明仙。(六)利用杜阻止教授在外開業給伊反擊。
董事會雖然拋落「彌天大網」，欲來逼聰明仙自動走路，毋閣聰明仙本身仁格高尚認真拍拚，社會自有公論，尤其高醫學生佮校友，暝日逗陣七年，杜e壹切行為，逐傢看甲清清楚楚，哪叨閣講？也叨董事會提袂出「強而有力」e證據，致使講社會壹般輿論，宛那卡同情聰明仙，對財大氣粗e董事會「表示緘默以對」。以上六點中間，以第四點佮第六點，聰明仙上介傷心，七十外歲e老學者；哎！真正有影。
第四點是董事會欲設「高醫管理會」，叨頻若學校e仁事，財產收支、建設、外交，壹律由管理會負責，完全架空院長e權限，佇這條款列之下，聰明仙連欲任用一个教授叨無權利，欲買一台機器嘛噯請示「上級」……壹切架空了後，哪叨噯設院長？若是安呢了後，年久月深，聰明仙定著自動職辭矣！安呢講，董事會方面，有影「不夠厚道」，做人互相尊重，噯支持專業，抑無，寧可董事長自兼院長叨好矣！
另外第六點，叨是，杜聰明為著顧全學術水準，袂使互院內教授在外開業，得失真贅本院同仁，聰明仙「擋人財路」，反對派吓使利用這點給偃倒，借勢扳勢叨免了半兩力哩！聰明仙逐擺講到茲，叨目屑流目屑滴，伊安呢做是完全顧慮著學校e前途，汝給看院內e教授，若是隨人攏去外口開業，佇市面專心趁錢以上，安呢醫學院e院務，是欲按怎推行，这毋是我一个人e代誌爾，宛那是對全社會e責任，閣卡艱苦，閣卡得失人，嘛噯做吓到！
其他四點，對聰明仙e傷害，無講外大，第壹點來講，暗批杜聰明財務不清，这無合常理，以聰明仙e身份，佇彼个時代，欲「趁錢」e機會真贅，伊e親友故舊好額人塞倒車路。根本無需要專工落下港，十年八年了後才來「趁錢」！所以這點指控，對清廉自持，堅貞不二e聰明仙來講無啥效果，上起碼董事會噯提出證據，講伊佗一條賬無清楚按怎按怎，抑無，顛倒吓傷著家己。第二點，超過七十歲袂使做院長，这對私立學校來講無啥乜意義，注意！这是「私立學校」呢，欲掠欲食，家己發落叨好矣！董事會若”欲”，一百歲嘛吓使，董事會若”無愛”，隨時吓凍汰淘（革職），四十歲嘛無效！哪著啥乜條款？
董事會開始e時瞬，橫長直破鏘鏘滾，新聞播出，社會大眾咧看笑話，毋閣時間一下久，真理慢慢出現矣！杜聰明以一介老翁一介辛苦創辦人，身受資方層層打擊，慢慢引起社會e同情，叨頻若飼過囝兒叨知影，晟養囝兒e艱苦，聰明仙e心苦病疼，逗逗也引起知識份子e關心，尤其是高醫e校友會，閣卡是心狂火焯，哪雞母跳破卵，氣甲噗噗跳，上書教育部，要求平反。
實際上董事長陳啟川，宛那真尊重聰明仙，二人中間並無啥乜深仇大恨，是干礁聰明仙做甚久，萬年總統，看落袂作e爾，董事會開始e時瞬動作甚大，有卡超過，去舞著聖仁級e聰明仙，互社會反感，踢著鐵枋，落尾也董事會方面有卡落軟，對聰明仙有卡尊重，聰明仙亦無閣計較，所以「高醫內鬨，院董糾紛」一睏仔連續逶民國51年到55年，拖遷四年赫尾久，比這嗎民視「親戚勿計較」閣卡長，閣卡精彩，事實上私立學校院董糾紛，吓凍拖即久，表示陳董事長宛那心肝軟，有腹腸、有情份，並無想像中赫醜。
高醫學院校友會會長李憲章佇民52年9月5日，有上書教育部，全力維護杜聰明e崇高地位，勿互董事會來迫害，伊對董事會公款一仟二佰萬e代誌，有所說明，嘛說明Su當時董事長捐十一甲地，是這欲互政府放領互佃農e土地，價值才七十萬左右爾！這篇陳情文，互杜聰明拍一枝強心針，精神百倍，落尾也杜聰明嘛請求法院，逶杜佮陳啟川二人攏總互法院調查，來保護伊e清白，抑無，伊無法度來面對這七十年來e醫界朋友。
呾這棚戲，搬到民55年9月煞戲矣！雙方各扑五十大板，董事會決議。(一)杜聰明院長辭職獲准，由魏火曜來暫時代替。(二)董事長陳啟川辭職獲准，由洪壽南代理。十二年e感情，叨安呢煙消雲散，無痕無跡矣！哎呀是咧揙啥碗膏啦！「荒腔走板」ham4甲有偆實在有影哩！
63
民國66年～69年期間，彼時臭頭仔已經死矣，由蔣經國捍起台灣e統治權，彼時台灣e經濟搪咧起飛，仁口占八成半e台灣人，欲向國民黨討返來政治權，佇戒嚴令e時代，真艱苦咧捙拚，民國66年，e省議員選舉，選出林義雄佮張俊宏二位黨外e議員，幵始對國民黨外來政權嗆聲，互國民黨真歹看，壹直想法度，欲來教示台灣人，这離民進黨成立，猶有九年之久，政治吓進步，噯有真贅人犧牲奉獻安呢！
民國68年12月20日，發生「高雄事件」，國民黨借機掠黨外仁士欲判刑，这是二二八了後，台灣人佮國民黨外來政權捙拚e實景，過返年，佇美麗島（高雄）事件，軍法審判e當中，2月28日發生林義雄母女滅門血案，互台灣人佮外省人e仇恨閣卡加深，彼年聰明仙88歲，身體猶原勇健，早起佇林森路厝內，真正怨歎真正傷悲，台灣人佇日本時代真尐這款代誌，按怎祖國來矣，問題一大拖！
過一年，民國70年初夏，台大數學系留學生陳文成，返來台灣了後，去互人謀殺，死佇台大圖書館頂頭，落尾也有人講是警總刑求致死，證據是安呢，文成博士死e時瞬，腰帶縖甲真凌亂，這點吓看出老K做e，而且皮鞋又閣留一張一百箍銀票，这毋是謀殺是啥乜？老政治犯林樹枝講，警總掠人時，吓叫伊腰帶提落來，無的確刑求致死，一時匆忙，秤彩逶腰帶縛去，互伊真凌亂安呢，逗底林義雄母女命案，陳文成是啥人摋死，尾溜仔掠無出來，毋閣三年了後，美國e江南事件，證實是外省竹聯幫做e，有人懷疑以上這二个案件，是毋是亦是烏社會做e？
民國71年，聰明仙90歲矣，年歲e關係，身體漸漸來落坑矣，人是肉做e，这是無法度e代誌，聰明仙自細漢六、七歲壹直到八十歲，親身處理過真贅喪事，真贅擺攏是「面對面」處理遺體，所以對仁生「甡死」e問題看臹開矣！伊佇八十外歲e時瞬，叨逶壽衣，壽鞋，甡死e物件，僎甲真好勢，嘛有交待按怎來辦好後事，可見伊是一个真實在e人。
另外一點，聰明仙煩惱尹囝孫，為伊佰年歲後e墓地傷腦筋，特別四界去看墓園佳城，態度鎮定眼光真遠，落尾也聰明仙決定，咱是淡水人，也叨「落葉規根」，所以主張日後e墓場，噯殆佇淡水第一公墓，伊欲佮夫人林雙隨殆逗陣，嘛欲逶老母陳愛e骨頭，抾來仝葬一位，算講三个人合葬一處叨著，因為十外年前已經創好勢雙隨e墓，所以放擺聰明仙e墓地真方便好處理，尹茲囝孫嘛真幸福安呢！
聰明仙佇九十歲了後，叨壹直蹛佇台大病院內科918室，伊身體自然衰老，这姑不而衷，尹主治醫師許大夫講，聰明仙是一位真合作e病人，先生稍寡吩咐呤，叨含心敆命認真拍拚去做去矯，尤其是每一工透早e內庭公園散步，逐日照起工做，風雨無論兮，另外佇各种檢查，自來叨毋捌喚艱苦，拍算是伊早年身體鍛鍊，互伊「刻苦耐勞」真正袂hau韶e！呾聰明仙，也叨年歲已大，漸漸來衰弱，伊宛那以最大e意志力來克服病魔e侵入，伊一氏人佮醫學咧跋撋，年老e時瞬宛那真巴結（忍耐時）真合作安呢！
聰明仙佇民國72年中間，不時叨咧肺炎，時好時醜，不止也艱苦，彼時伊91歲矣，行路無方便，噯用鐵梯扶助，伊e體質真好，真韌命，佇病房拖遷四年之久，这叨是伊少年e時瞬身體顧了有勇，噯泅水，拉單槓，洗冷水浴，肉本真好叨著，伊e身命袂醜，連醫師嘛真著驚，有影自歎不如……。時間一工一工過去，二年後天公伯仔欲來肖送矣，民國74年冬天，聰明仙除了反覆性肺炎以外，迭迭吓昏迷，到尾溜也，身體洶洶叨歹去，退化真緊，厝內e氏細，加減嘛有心理準備，也叨老命拖沙，真正姑不而衷哩！
民國75年2月26日聰明仙真正好命，伊佇暗時仔無痛苦自然死亡，叨是咱古早人咧講「壽終正寢」，第二工醫生看著伊e面容時，伊面露微笑，真正慈祥來離開這个世界，總計1893～1986，攏總食到九十四，伊e三子一女攏真壯材贅讀冊，學問真好叨是，伊一氏人對台灣e影響太大太深e，真正是國寶級e仁物，伊e告別式佇民權東路第壹館，仝款「冠蓋雲集」鬧熱滾滾安呢。
64
昊地欲創治人，有影真拍隕，民國75年尾，聰明過身，伊袂赴看著「研究北投石」e李遠哲佇半年了後提著Nobel獎，伊嘛袂赴看著頭一个台灣人e政黨「民進黨」e成立，奚是民國75年9月28日e代誌，呾聰明仙一世人拄著真贅ut卒e代誌，活欲規百歲，無法度親自看著李遠哲得獎，民進黨成立，解除戒嚴，台灣人做總統，有影無福氣真可惜安呢。
日本人岡本要八郎佇1906左右發現「北投石」，得著國際名聲，这毋是干礁咱台灣e光榮，宛那吓使看做日本強大國力e展現，1905居禮夫人得Nobel獎，說明鐳e放射性能，日本仔馬上”還以顏色”，互西洋人著驚，呾放射線咁恁西洋人「專利」？「騙人咧毋捌研究學問呢！」阿本仔展一下仔工夫互啄鼻仔看，互西洋人知影，放射線礦石，毋是干礁出產佇非洲剛果深部礦坑，佇北投所在磺堀e表面，宛那有出產，这是一个思想觀念e改變。
杜聰明十外歲少年時代，1909左右叨佮小竹恩師，北投石e岡本真熟似，嘛佇伊e宿舍，看著規厝間e礦物標本，聰明仙對岡本e研究精神真謳咾，55年了後，清華大學研究生李遠哲，研究北投石e放射性成分，聰明博士迭迭咧行踏北投、淡水，定著知影這个代誌，毋閣聰明仙佇民75年2月尾仙逝，李遠哲佇10月得Nobel化學獎，干礁差七月日爾爾，博士無法度親身看著李遠哲領獎，有影真拍隕安呢！
第二項代誌，叨是聰明仙無法親目看著民進黨e成立，仝款差半年爾爾，聰明仙一氏人上介艱苦e代誌，叨是1947二二八事變e時瞬，一寡好朋友、學者，去互阿山兵槍殺e過往，伊驚甲一世人暗時眠夢攏吓夢著，半暝咧流凊汗安呢甡，台灣人自受東京話外來政權佮北京話外來殖民統治，聰明仙心肝頭咧滴血，叨僅干礁無伊法度嘿！台灣人e傷悲，聰明仙身為蕃薯仔毋是毋知，叨怨歎台灣人無路用，無家己政黨政治勢力爾，代表台灣人尊嚴e政黨，自從民國16年，蔣渭水佇台中成立「台灣民眾黨」，1931民國20年去互日本軍伐全力消滅了後，叨無閣再有台灣人e政黨，1986年九月二十八日，台灣人政黨「民進黨」成立，毋閣聰明仙剛過往半年爾，袂赴來看伊e成立。
1986年民進黨成立，外來統治e國民黨政府，彼時真正想氣，想欲掠人，來阻擋伊e成立，毋閣「形式比人強」，彼瞬美麗島事件已經六、七年矣，該掠e掠，該摋兮摋，87％台灣人互13％外省人統治，这總是事實，尐數界管多數，叨已經四十外冬矣，氣數盡磅矣，簡那清朝退位，有伊姑不而衷e時代背景，而且彼時瞬「阿國仔」，著嚴重e糖尿病，燃眉腳袂行e噯坐輪椅，燃眉目睭無看e，燃眉这疼奚疼，規組害了了矣，姑不衷稍做讓步，互後世人給繃一絲仔面皮，蔣二世「阿國仔」死佇1988年，毋閣佇1987年辣昊，伊解除戒嚴令，算講宛那有做寡「功德」叨著。
台灣人受著蔣介石統治30年（1945～1975），蔣二世統治十二年（1976～1988），以北京話來壓迫台灣話，實行戒嚴統治，台灣人定著不服，二二八了後，省籍仇恨加深，臭頭仔失去二擺向台灣「示好」e機會，頭一擺叨是，蔣夫人趕緊學台灣話，向台灣人示好，也叨蔣宋美齡，原本海南島文昌人，遐e語言屬閩南語系，佮台灣話（福佬話）有八、九或仝款，或者近音，蔣夫人叨頻若佇公共場合，臨時惡補幾句台語佮百姓幵冓，叨吓緩和台灣人仇外e心理，第貳擺機會叨是民國38年槍殺陳儀時瞬，名義錯誤，講伊「投匪」，應該講伊「二二八元凶」卡妥當，安呢才有法度安撫民心，互省籍e衝突降到上低，這二點臭頭仔攏無想著，干礁硬熚熚，橫柴夯入灶，掠閣掠，摋閣摋，戒嚴再戒嚴，台灣人「著驚」佮「怨恨」爾，顛倒退出江湖e日本人，匿佇壁後咧偷笑，互人比憑落，真正袂孝孤e啦！
蔣二世「阿國仔」佇謝世進前，有取消戒嚴令，互台灣人敨一口喟，暫時有「幸福」e感覺，尹宛那有重用台灣人李登輝先生，培養台藉仁材，後來因省籍問題，戽斗輝仔（李登輝）踏著機會，一步一步高陞，伊先做台北市長，培養行政經驗，落尾做副總統，民國77年元月，阿國仔翹奈，夫人派奪權失敗，政權茖落戽斗輝仔手中，雖然猶是「國民蟲」，毋閣政權漸漸轉入台灣人矣！
戽斗輝仔一下掌權了後，漸漸現出伊e「日本武士道」e精神，伊佮阿山兮國民黨捙拚，算講「窩裡反」，算講「藍皮綠骨」叨著，伊e台灣主體思想總統直選，互阿山仔著驚，感覺規組害了了矣，落尾也國民黨分裂做「國民黨」佮「新黨」，新黨以外省人為主，伊主張趕緊佮中國合併，幵始e時瞬宛那聲勢真好，得著袂尐e選票，新黨佇民國83年左右成立，伊ga是反對李登輝以上，呾國民黨分裂，定著有好戲倘看。
國民黨雖然政權漸漸落坑，毋閣佇經濟方面，宛那做最後e「反撲」，第壹，「老賊」老國代老立法退休，每人領五、六佰萬。第貳，由「戰士授田證」名義，逶台灣稅金850億分互外省人（含少數台灣人）。第參，民國81、82年左右，王建瑄做財政部長，主張「土地增值規公」，表面上真合理，事實上，彼時「公」，代表「軍公教」，是外省人卡大陣，增值規公，等於台灣人一氏人e財產，忽然間流入外省族群e橐袋仔，台灣人不管國民黨、民進黨壹律不服，尾溜也欲修法律，佳哉無通過，減少一場省籍e大捙拚！
65
杜聰明死十三年了後，1999年戽斗輝仔提出「兩國論」，「戒急用忍」，佮阿山兮拚一斗真大斗，連美國仔叨著驚真險，是按怎戽斗仔猶佇國民黨內底，叨即尼大膽來翩撇？戽斗仔e出身是按怎？咱噯了解，佇二次戰後，社會主義e思想，侵入台灣文教界，偏偏蔣介石絕對反共，頻若掠著共產仔，絕對無欲攽伊煞，戽斗仔是台北人，彼時瞬有參加郭琇琮醫師社會主義e外圍組織「讀書會」，毋閣伊無加入共產黨，彼个時代e少年人，有e同情勞苦大眾，有社會主義理想e看法，戽斗輝仔為著替散赤人抱不平，有時仔思想卡左傾，宛那是彼時代e現象。
戽斗輝仔運氣真好，一路互蔣彥士、牛港仙牽成，落尾也做到台北市長、副總統，彼時阿山兮毋知也伊有”反骨”，閣歡喜wewe，想講有一个”忠黨愛國”e台灣人來接任，萬事ok啊！其實原本臭頭仔是有欲牽成彭明敏，彼瞬給提名「十大傑出青年」，無疑講彭明敏尹老父，二二八e時瞬去互阿山兵虐待，彼條命險兮休去，阿敏仙真qet韶老k，無外久發表「台灣前途宣言」，佮尹學生謝聰敏，魏廷朝掠去判罪，呾臭頭仔牽成彭明敏無效，尹囝阿國仔只好提名另一个台灣囡仔一戽斗輝仔，这是姑不里衷e代誌，抑無，欲哪對87％e台灣納稅人交待！
民國85年，彭明敏代表民進黨，佮戽斗輝仔代表國民黨，咧競選總統，二人立場「衝突」，八年了後，戽斗輝仔逶日本醫心臟返來，彭明敏佇機場歡迎李登輝，雙人握手意見仝款，平平台獨組兮。杜聰明是看彭明敏大漢矣，聰明仙趁每年歇辣落來下港，拜訪彭清靠議長e時瞬，彭明敏十六、七歲爾，無疑悟講尾溜也吓舞甲赫大條。
杜聰明另外一个學生李鎮源博士，佇聰明仙過身十年後，宛那以老邁之身，佮國民蟲，舞一睏真大睏，伊彼瞬已經八十捅歲矣，為著「刑法一百條」，e廢除問題，迭迭就街頭抗議，彼時伊是中央研究院e院士，佇國際間真有名望，伊是研究蛇毒e專家，佇世界上地位真懸，伊做人忠直義氣，「一絲不苟」，是聰明仙上介器重e學生，伊嘛險兮變成聰明仙e囝婿，李鎮源博士佇民國90年2001年過身，春秋87宛那長歲壽，所有咱茲黨外e民主鬥士攏真懷念伊e精神，聰明仙若地下有知，是著吓感到真榮幸才著。
杜聰明這位國寶級e仁物，佇仙逝了後，咱無法度給做一門真大門e墓園，真正拍隕，順續嘛噯給做一間「杜聰明紀念館」來紀錄伊e壹生，雖然佇高雄醫學院，有伊e紀念室，毋閣遐甚遠，並無方便，以小弟e意思是，佇聰明仙e舊厝巴拉卡車埕遐，重新造一个杜聰明墓園區，身邊設一間紀念博物館，互茲來參觀e人客。吓凍知影一百冬前，日本人寢來台灣時e種種設施，教育制度，这是真要緊e代誌，到呾民進黨已經執政二任總統矣，連这叨做袂到，哎！實在有影！
宛那有人建議講，佇三芝（小基隆）所在，尋一个所在，風景卡嫷e，專門做「李登輝、杜聰明、盧修一」綜合紀念館，詳細記錄尹e事跡，互後出氏e人知影，成本低效果大，真正吓使考慮e，講到茲，另外黨外大家長信介仙，死去了後，宛那「草率了結」無三無二，安呢無妥當啦，信介仙為人親切隨和佇美麗島前後，散盡家財，差點犧牲性命，為「黨外罪魁之首」，替台灣人賣身賣命，死了後，淒涼無比，這點來講陳水扁總統，噯負上大e責任，人奚臭頭仔庙叨砌甲赫大間，台灣人哪吓赫下消？
民進黨對家己e頭兄無欲肖媵，顛倒民間e生理人有來燒香點火，有一个關渡人，叫陳進棋議員，伊佇小基隆市區（三芝鄉），砌幾落批e販厝，叫山水居易，販厝e中間有个公園，中間叨是囥杜聰明e銅像，實在真正互人謳老，實際上陳進棋佮杜聰明並無關連，雙人e嗣大攏無肖捌，實是徛佇仝台灣人e立場，來尊敬杜聰明e志業爾，抑無，伊亦毋是總統，國父，揙這齣是欲創啥碗膏？進祺仔佇北投這角勢真出名，大細漢人面真闊，民國91年選市議員e時瞬，互人佇芝山站前e餐廳暗殺，舞甲代誌真大條安呢。
有一擺有一个高醫方面e朋友咧幵冓，小弟有問起有關三十年前高雄醫學院e糾紛代誌，呾這嗎按怎？伊講，無人咧講這方面e長短矣！當事仁大部份攏無置e，代誌早叨煞去，船過水無痕，事實上目前高醫e董事會猶搦佇「陳中和－陳啟川」家族手中，陳家原本忠厚人，嘛真尊循杜聰明e仁格，目前高醫某大樓二樓，有專門一間杜聰明文物館，陳家真正尊重叨著，吓使講若無杜聰明e拍拚，陳家佇後日，無法度徛起高醫，陳家竭竭是第貳个霧峯林家或者基隆顏家爾爾。
依小弟e看法，伊講e話應真合理，高雄有三大家族，王玉雲倒中興銀行幾佰億，判七年，這嗎猶咧上訴，朱安雄聽兮講欠政府二三佰億，通輯唗路當中，干礁陳中和系統上介忠厚，無倒公錢，遂來造福地方，这是事實，咱噯給道謝！是非公道，自在人心，做人儘量卡忠厚e，安呢吓代代狀元出好囝孫！
杜聰明佇民國42年離開台大病院了後，「後繼發生斷層」真贅醫師毋捌聰明仙，毋閣第壹線e醫政長官，大部份攏伊e學生，如李鎮源、彭明聰、邱仕榮、魏火曜、林天佑……，伊e地位宛那在在在，無論按怎，伊佇台大病院界管17年（日本9年、國府8年），高醫界管12年，教育英才無數，伊本人道德高超，互人真吓信任e，連日本人赫尼嚴格e人，嘛比大頭拇，所以佇高醫董事會反經e時瞬，宛那得著社會大眾e信任，这是真正無簡單e代誌，伊一氏人e志業仁格，永遠互人懷念叨著，這款人，「智仁勇」三全，全台灣真罕著e！
66
人客啊！台北杜聰明e故事，佇茲欲做一段e結束，杜聰明是台灣有史以來，上介傳奇性e仁物，伊活過四个年代，經過真贅危機佮福運，汝給看，伊佇民國14年叨世界一週旅行，真正連皇帝嘛無幾口灶做吓到，汝給看，佇二二八時瞬，伊又原勇敢逃亡，汝給看，民國42年，勇敢離開國民黨，佮臭頭仔分開，連退休金叨無噯，這款人真特別安呢！伊有几个特點，互咱真給擻念安呢！
第壹，伊做人認真、拍拚、忠厚、負責，對錢項e物件看真輕，伊e智商又閣真懸，真正是標準e學術仁材，伊安呢認真拍拚，連真嚴格e日本人，宛那真佩服伊，實在無簡單。第貳，伊e勇敢，仝款做官來講，做日本官伊做搭底，做中國官叨半途踉港，佮臭頭仔袂洽，講唗叨唗，伊e勇氣我佩服。第參，伊對傢後雙随，真正無話講，一氏人忠貞不二，疼嫫惜嫫，互後世e人真謳咾。第四，伊對文學e素養真好，佇醫生e背景來講，伊寫e詩文真嫷，而且真寫景，確是無簡單。第五，伊寫e回憶佮言論集真贅，逶彼个時代e背景，交待甲真清楚，好佳哉伊有即尼贅著作，咱才吓凍了解彼時e社會情形。
好矣，這本書寫到茲為止，內底e資料，九成半以上完全正確，佇寫作進前，小弟宛那有參考真贅資料，儘量附合彼時瞬e實景，算起來宛那緣份，四十年前阮外媽有咧講，互人安呢疼惜真歹勢，呾咱是歹命人，這世人嘛無法度報答人，我講無問題啦，杜聰明佇地下世界，嘛袂想著講淑女e外孫，吓來寫伊e故事安呢！道謝。
（全文完）
目 錄
台語長篇小說 台北杜聰明
一 四朝怪傑傳神奇，有緣拜會今古人…………… 1
二 滬尾山頂囡仔巧，亂世清國日本人…………… 20
三 淡江美景千古醉，小竹恩師跋生死…………… 42
四 醫學校有幸考狀元，北投石岡本大公無私…… 63
五 五年寒窗醫學院，雙明暗殺袁世凱…………… 77
六 京都帝大求功名，異國風情苦中樂…………… 103
七 船頂交陪姑娘仔，原本霧峰林家人…………… 120
八 醉宴台北江山樓，風起雲湧民主潮…………… 138
九 遊學歐美增學識，蔣渭水含悲謝世…………… 151
十 名師高徒李鎮源，戰時疏幵真硬斗…………… 169
十一 病院接收喬摵硬斗，二二八險兮見祖公……… 186
十二 院長室特務掠人，保密防諜氣氛嚴…………… 205
十三 學者風範無愛規隊，獻堂仙一場祖國夢……… 221
十四 下港鄉親多熱情，拍拚牽成醫學院…………… 237
十五 雙隨辭世心傷悲，故鄉孫科于右任…………… 254
十六 壹生壹世台灣人，清國日本中國情…………… 272
台語長篇故事
台 北 杜 聰 明
Taiwanese literary works
Taipei Do Chong-Ming