( Holo Taiwanese literature , Do CongMing , part 1 )
序 頭 前
杜聰明是台灣第一个博士，伊身體勇健，食甲九十四，貫穿清朝、日本、蔣介石、蔣經國四个朝代（1893～1986），是咱台灣地區真正關鍵性e仁物，真適合寫小說、傳紀，另外，真拄好小弟e外媽（婆），佇1896年左右佮杜家是厝邊，做囡仔時代e「玩伴」，嘛受著杜家真贅e幫贊！留落袂少e資料，咱「食人一口，報人一斗」，但願這本冊吓凍給博士致最大e懷念佮敬意安呢。
近三十冬前，小弟有親身拜訪過博士，印象猶新博士對後世最大e貢獻，叨是伊留落來伊少年時代真贅寶貴e資料，真正世間無第貳人，透過伊e書冊，咱佇茲有法度了解清朝到目前這一佰年e台灣社會變遷，真正詳細，小弟寫這本書，基本工作僎年外，寫作又閣一年，恐驚也寫了顛誕，心內吓真歹勢。另外, 本書所用漢字,有九成左右,佮2007教育部公告e閩南語漢字仝款, 請逐傢放心使用.
這本冊，有先天e困難，淡薄也硬斗，其中內容壹再修改，無論內容亦好，用字亦好，儘量吓凍寫互予好勢，各位台語界先進，若是寫了有顛誕，才拜託汝給阮指教一下。
[ 本書另有單行本 , ( 劃撥 19559803 茄苳出版社 ) 350 元 , 或 TEL (02 )28911432 ]
小弟 元興 敬白 2007 北投
─台閩歷史文學 33─
台 北 杜 聰 明
(1893～1986)
第壹章 四朝怪傑傳神奇，有緣拜會今古人
(1) 大屯山區，坐位佇台北市倚北爿十外公里e所在，也叨冬尾風佮種種關係，伊有咱台員地上介奇巧e氣候款勢，仈人上升一佰公尺氣溫降半度爾，伊遂吓使降到一度，致使講竹仔湖嘛才七、八佰米爾爾，佇過年時仔叨吓落雪，互咱茲副熱帶e民眾大開眼界，另外佇辣昊時仔，台北人搪咧「六月火燒埔，頭殼戴烘爐」，辣嗙嗙e時瞬，吓凍降七、八度，比吹冷氣卡涼勢，台北暢仔是爽甲叫毋敢，伊規粒山頭樹林am3茂雨水充足，莫怪有錢人e別莊，臭頭仔e避暑書屋，攏砌佇草山、大屯山地區，伊e喟口至揚 ,袂輸二仟公尺e懸山安呢甡。
也叨地理上e優勢，山清水明，致蔭著貴仁e誕生，人咧講「福地福人居，地靈人傑」，好所在e子弟，人e氣質面cio，無仝款叨是無仝款，真正互汝袂鐵齒e，1893年清朝光緒尾期，北方一道金光出現，大屯山腳巴拉卡所在e杜家，誕生一位天才紅嬰仔，號作「杜聰明」，做囡仔e時瞬，記池好頭腦清，受著天時地理日月精華，e致蔭，讀日本冊，考醫學校第壹名，卒業時瞬又閣第壹名。阿本仔校長看伊就卻(很能幹)，保伊去日本京都讀大學求功名，1922民國十一年得博士，是咱台灣地第壹个醫學博士，伊e壹生真正奇巧複雜，經過清朝，日本仔、臭頭仔、阿國仔、四朝元老，1986民國七十五年過身，食到九十四，伊規氏人榮華富貴好命溜溜，毋閣嘛幾落擺險險兮死無去，宛那互人忍甲一身軀肉，因為伊長歲壽e關係，伊是咱蕃薯仔近代史內底，真正關鍵性e知識份子，伊e壹生，吓使看做是一間活動e博物館無顛誕。
杜聰明，這个正正港港e清朝人，吓使講「今之古人」，做甲有偆去，伊若活稠e，今年拄好114歲，伊上幼齒e朋友，這瞬嘛九十外歲矣，伊讀冊e進前七年，攏留「豬尾溜」頭鬃尾仔，毋驚阿本仔笑，毋閣我今年才57，即尼「少年」，哪有機會見著博士，講來小弟（筆者）真正有福氣，互伊e姪兒杜麗煌紹介佮掣路以上，佇1977民國66年5月，親自拜訪這位清朝e貴仁，彼年我28歲杜博士85歲，我即尼少年，吓凍來參見這位歷史上e關鍵仁物，真正是我壹生當中上介光榮e代誌，伊充滿了神秘奇卡，嘛是推拺我寫這本冊，上大e原動力，真正福氣叨是福，擋嘛擋袂稠，冓古仙吳樂天有咧講「人叨歹講哩，有時運氣若咧通透，干礁飲汽水嘛吓去醉著。」所以人叨真歹講安呢。
「好歹八字，落塗時」，人e運命真正是昊註定e，有影”鏘仔去拄著戇仔”，運途若咧好，閃嘛閃袂離安呢，杜聰明仙若毋是甡佇好業人家庭，絕對無倘一氏人e光彩，伊若毋是出代佇1893，（日本占台員e前進二年）嘛無法度享受歷史上e大地位，伊若甡卡進前e，定著無法度讀著日本書，接觸世界文明做博士，伊若出世卡後尾e。頭前有人擋稠咧，定著「第壹博士」e頭銜，嘛著讓互仈人做，所以講伊e出甡八字，真正著縫叨是，真正講起來，「日本」仔這个異族，牽成聰明仔一氏人e ciahy62功名，抑無，靠勢清朝遐四書五經「歹銅舊錫」，竭竭是「鄉野村夫」爾，哪有卡擢e啦，聰明仙這一百年e歲月當中，活佇台灣話→東京話→北京話→台灣話e族群中間跋撋返捯，「人在江湖，身不由己」環境安排爾爾。
(2) 呾話頭來給講到1893（光緒十九年）彼冬，馬偕博士已經來滬尾所在傳耶蘇教二十一年矣，「唗西仔反」（佇滬尾港口扑甲起sampu 45），中法戰爭嘛九年搭搭，滬尾是國際性e港口，茲e世界文明，早叨致蔭著十公里外e杜家，杜家是好業人粒積勤儉幾落代人，蹛佇大屯山腳巴拉卡e車埕所在。（目前是台北縣三芝鄉北新莊興華國小，南側約一佰公尺所在），也叨彼年中元普渡e前進一工，七月十四下晡，阿俍拄好咧縛鹹粽，倘赴過返工來拜拜，忽然間肚尾艱苦，洶洶目睭跳金星，強欲摯節袂稠。「日鳳啊，緊來哦，我腹堵一瞬一瞬疼，簡那欲甡e款噢！」「好啦，卡忍耐咧，我緊叫生財去叫產婆來，卡巴結咧！」「唉呀……」叨安呢，1893農曆七月十四日暗頭仔e時瞬，杜日鳳e上細漢後甡，來到世間矣，這位紅嬰仔是咱台灣地百年來，上介要緊e關鍵性仁物，伊經過清朝、日本時代、臭頭仔、阿國仔四个朝代，影響真大，杜日鳳彼年五十歲矣，真疼惜這个屘仔囝。嗯才e瞬呤給號「杜聰明」這个名字，祈求後日仔吓凍聰明安呢甡，彼時瞬杜家漸漸有錢好額，佇地方上喚水吓堅凍，對這位紅嬰仔抱真大e映望，寄望伊吓光宗耀祖，互祖公真光彩叨著。
这叨是咱這本冊e主角「杜聰明博士」，佇茲代先給伊這氏人e經歷，加減給紹介一下，看這位庄腳囡仔，按怎來跋撋（出入運轉）世界舞台。1893～1902是伊做囡仔e年代，厝內好額富裕，食飽穿燒無煩無惱e快樂日子，逐工所看著e，毋是大屯山青翠高鏘e烏樹林，叨是一角一角山田仔流水嘓嘓叫，真正爽勢叨著，彼个時瞬，阿本仔cim才來爾爾，聰明仔宛那食一絲仔虧，徛咧匿土匪，日本兵來暫借厝安呢，花花也講起來，糖甘蜜甜e生活卡占大頭，出氏有錢人囝孫，真正無仝款哩。1903，伊十一歲矣，進入「滬尾公學校」讀冊求功名，為家己將來e前途咧捙拚，接受世界列強日本帝國大和民族e文化薰陶，頭一擺沐著異族e文化佮語言，伊好奇嘛真認真，伊血脈內底流著優秀品種e基因，1909年以四七五人噹中以第壹名e成績考稠總督府醫學校，真正英雄出少年，有影hy4倒道友，驚動萬教嘛互母校真有面子，聰明仔志氣揚揚，金光鏘鏘滾，是擎甲夯袂稠安呢，1914（民國3年），又閣提著畢業時總成績e第壹名，而且代表畢業生就台做謝師冓演，連校長叨著驚，人客啊，汝給看，咱聰明仔這个猴囡仔，做學問求功名，安呢橫長直破，卸卸叫嚬嗙叫，讀書這路有影叨袂hau韶e哩！彼年伊22歲爾。
嗯才e瞬呤，1915受著校長e紹介以上，坐船到日本東京都深造，專門研究藥理學，叨安呢「日來受雨，夜來凍露」，暝日捙拚認真拍拚到地也，成績優秀，日本仔教授真感心，佇1922十二月通過伊醫學博士e學位，这是咱台員人頭一个醫學博士，消息一下傳回台灣島呤。三佰萬同胞仝聲謳咾，一四界歡喜we we，佇街頭深巷e所在通人喚讚，真正蕃薯仔做了有起，鋩角矯甲順順順叨著。1922～1937這十五年e噹中，伊做醫專e教授，負責教育下代e任務，另外去歐洲佮美國三年，考察留學尹e學術優點，这佇八十年前來講，是真正稀罕e代誌。
民國18年左右，佇這嗎大同區涼州街遐，創立更生院，幫忙政府來戒除「鴨片煙中癮者」，宛那功德一層，咱跋白e，日本人叨來統治台灣島35年矣，按怎猶有鴨片煙e問題？这叨是痟鄙臉，為著財政e收入，做出這款無天良e代誌，抑無，以阿本仔e鐵血統治，早叨鴨母隨隻掠，掠甲無半隻安呢。醫專教授這十外年是杜博士上介志揚，上介光榮e歲月，毋閣佇另外一方面，伊e危機佮挑戰嘛漸漸來浮夯囉，台灣人反抗日本帝國主義e壓迫，一工一工咧興咧拚，伊e同窗兮蔣謂水醫師，佮阿叔仔林獻堂仙，連肖續成立「文化協會」、「台灣民進黨」、「自治聯盟」，毋驚生死佮阿本仔咧捙拚，尹要求台灣自決，議會政治種種非武力e革命，茲種種e代誌，互依偎佇日本政府牽成，四界享受榮華富貴e杜博士，真正為難，真正乏搭款（尷尪），仈人咧犧牲奉獻，汝咧大魚大肉，逶家己e幸福，建立佇仈人e艱苦頂點，咱聰明仙隨時吓互人鄙相，批評安呢甡。
1936，（民國25年，昭和11年），日本成立台北帝國大學，博士仝款做醫學部e教授，無外久呤，日本進攻中國大陸，挑起珍珠港事變，無張無弛佮阿啄仔咧捙拚，是咧揙啥魍啦？頭殼歹去是毋？日本仔e海軍空軍去夆摃甲歪篙莿斜，二次大戰尾期，為著避免空襲，逶珍貴e醫療設備疏幵到大溪佮北投郊區，宛那真正辛苦，光復了後，發生228事變，博士這款學問家，遂互阿山兮看輕, 見識著祖國「偉大」e一面，尾溜也雖然恢復台大院長e尊榮，毋閣kimochi袂爽，这定著ea，三年了後又閣經過白色恐怖，韓戰，博士忍耐閣忍耐，這時瞬日本時代「抗日大師」獻堂仙，閃去日本避難，變做「親日大師」，博士對老k心狂火焯，看甲袂作咧，自那佮老k決裂，門扇板咧逗袂峇，拒絕回規國民黨，佇民國42年暗然落台，做一个平常e老百姓，有影咧展氣魄組兮，真正蕃薯仔做了有起，落尾也落下港，得著貴仁幫忙，創立高雄醫學院，伊做董事長。到民國55年退休，退出江湖，1986民國75年春末佇台大病院過身，享年九十四。四月日了後本土e民進黨成立，五月日了後，李遠哲得Nobel獎，博士攏看無著，真正遺憾叨著。
杜聰明是清朝人，經過清朝、日本仔、臭頭仔、阿國仔四个朝代，食到94歲（1893～1986），宛那無簡單，伊「留頭鬃尾仔」去讀日本書，壹直到醫學校才剪去，伊宛那感覺拍隕，以這嗎e觀，實在是戇甲欲陌壁去！聰明仙佇1922民國十一年底提著京都帝大e博士，伊有三項佮現主時e人無仝款。(一)伊有博士，毋閣並無學士，伊相當以五專畢業生，直接讀博士，中間無學士、碩士，也叨台北帝大到民國25年才設立，聰明仙民國11年叨提著博士，定著袂赴讀學士矣！这是時代e關係。(二)彼時e醫學博士有卡「籠統含糊」，包含藥理、內科！公共衛生，無親象這嗎分科赫尼幼絲。(三)聰明仙一路受日本人e恩澤，嗯才e瞬呤，一氏人做上介死忠e親日派，互日本人來牽成做豆干（大官）榮華富貴，佮仝時代e智識份仔反抗日本外來政權e統治，氣味完全無仝。
(3) 以上所講e是咱聰明仙，一氏人粗淺e經歷，呾這嗎來給講到按怎小弟（筆者）有心適來寫這本故事，这是因緣，人咧講，因緣若到，真正叨互汝擋袂稠。因為阮外媽（外婆）高淑女比聰明仙加4歲，細漢e時瞬，蹛佇尹隔壁，囡仔人耍來耍去一世人感情臹好，日本人佔台灣前後二三年，1894～1898，大屯山腳北新庄仔車埕所在（今三芝鄉北新庄興華國小南側），樹林青更更，山田仔流水嘓嘓，真正詩情畫意，七歲e外媽迭迭偝著（背著aai）三歲e聰明仙，踮咧舊厝大埕，田岸間，牛車路，唗來唗去，嘻嘻嘩嘩，滾耍笑，規晡耍甲毋知暗，聰明仙是好業人囝，阮外媽叨散赤人，毋閣囡仔人無心機，逐傢感情臹好，也叨厝邊頭尾卡有仁情味哩。
所以才咧講，做人啊！天地來來去去！因果吓肖牽連，聰明仙，若知百年了後，淑女仔尹外孫吓來寫長篇小說記念伊，毋知欲外驚喜e！1896年這二位北新庄所在e庄腳囡仔伴，王子乞丐，運命大無肖仝，佇聰明仙這爿，好額溜溜，厝內財源豐富，囝孫滿堂，做囡仔叨真好命，另外高淑女這爿面叨顛誕矣，伊散赤人出身兮，互人做simbua（童養媳），養父無置e，養母叫紅柑，硬給飼大漢，厝內無錢，迭迭咧吊米甕，囡仔人七堵五堵嗎嗎嚎，紅柑一時火焯，不時嘛扑淑女來抵賬，厝邊杜家一下聽著囡仔咧哭，迭迭嘛捧飯來互伊食，囡仔人感恩一氏人記稠稠。唉！散赤人甡了毋著位，宛那是姑不而衷e代誌，彼个時代叨無法度哩，艱苦人卡占大面，真正是苦袂了啊！
1903聰明仙離開血跡地，去滬尾讀公學校，彼年十一歲矣，宛那噯求功名求成績，这硬拄硬噯蹛學寮叨著，脫離嗣大e照顧，聰明仙真礁肘（dadiu64精明幹練），一路高昇，是做官做肫鏘鏘滾，橫長直破真正摯節袂稠，這聲大尾矣，發角矣，四十年了後，1944～45，阮外媽淑女仔已經嫁來北投十八份（今泉源國小上頭），嘛甡七个囝兒，這時瞬聰明仙不時嘛來咧行踏匿空襲，二次大戰尾期，城內去互美國飛行機，炸甲大空細摛真正食力，聰明仙來十八份匿空襲e時瞬，臹疼茲氏細，佮囡仔嘻嘻嘩嘩，敆做一下，耍甲毋知天地，一絲叨無激一个面cio安呢，吓使講老大人囡仔性，真好逗陣叨著。
1970，民國59年，外媽已經81歲矣，彼年小弟22歲，過年e時瞬，有佮伊幵冓，講起古早做囡仔時代，無飯倘食，互紅柑給苦毒e艱苦代，是毋是有怨歎？外媽目眶僬紅，喉脘滇起來（喉頭哽），久久無法度印話，外媽毋但無怨嘆紅柑給苦毒，遂真正懷念真正給感謝叨著，比家已親甡父母閣卡感謝。
「唉！少年人恁毋知枵飢失頓e艱苦，汝無法度體驗彼个時代，晟養囝兒e偉大，恁這嗎食飽穿燒好命溜溜，一寡話定著聽袂入去，汝給想，一个軟呰查某，欲按怎來趁食唷飼，真正硬斗安呢，迭迭汝有一碗番薯糜倘食e時，嗣大已經枵（餓）一二工矣！枵甲暈倒田園無人知，年歲卡有e時瞬，知影社會長短，是感謝閣再感謝，哪吓怨嘆啦？唉！七、八十年前e代誌，親象走馬燈咧遨咧踅，簡那昨ng才發生仝款。」「阿媽對杜家，對紅柑二爿想法按怎？」「唉！歹命人艱苦坐卦，这是姑不而衷e代誌，人欲散赤艱苦，这昊註定e，啥人欲叫汝出氏佇茲，隔壁杜聰明，人伊蹛大厝，是有學問e好業人，咱出身艱苦是欲按怎佮人比？好佳哉聰明仙嗣大，無棄嫌咱，佇我上艱苦e時瞬給咱幫忙贊助，實在是感恩閣再感恩。」聰明仙佇1903年之後，去滬尾讀日本書，叨真尐閣來往矣，另外一方面，紅柑佇大正四年1915過身，外媽夯香捸拜e時瞬，是嚎甲毋臹聲調，紅柑過身時e面皮遼guegue，皮肉消py，表情艱苦，外媽一氏人記稠稠，壹直到七、八十歲，猶迭迭佇夢中看著，三更暝半枕頭僬霑安呢。
外媽「淑女仔」尾溜也嫁來北投十八份，聰明仙亦得著功名，名聲揚真正擎甲夯袂稠，是國寶級e仁物，全全交結大官虎大學者，淑女仔是一个普普通過e庄腳查某爾，嘛毋敢高攀漲懸價，毋閣聰明仙真惜情，逐擺行路返北新庄祖厝e時瞬，攏順路到淑女仔遐行行e，尤其是二次大戰尾期，空襲疏幵e時瞬，不時嘛來十八份行踏行路，感情真好安呢，阮阿舅「標仔」，佇民國38年逶海南島返來e時，聰明仙做台大醫學院院長，領給伊紹介頭路，後來雖然無成功，毋閣二个人規百年e感情，深深深，膠膠膠，宛那不時互茲散赤兄弟真感心安呢！
(4) 33年前，1973年十一月，小弟佇台大病院齒科實習e時瞬，厝內傳來歹消息，阮外媽淑女仔破病過身矣，佇昨暝二點外斷氣，享年八十四歲，聽兮講仙逝前猶口口聲聲喚喊小弟e名，害我彼中晝頭殼一片空白 ，心情艱苦食袂落飯，茫茫霧霧毋知欲按怎，外媽一氏人以外孫吓凍讀台大醫學院，感到真光彩，自我細漢到呾是疼命命，比家己內孫卡疼叨著，……出山彼工，我向根管治療部門藍萬烘醫師請假，自頭到尾，恭恭敬敬，送我上敬愛e外媽仁生最後e一程安呢甡。
叨安呢，有關外媽佮聰明仙e故事，自那漸漸來袂記矣，閣卡講，人伊是有錢有勢e大仁物，交結大官虎好業人叨咧無時間矣，咱是普通人爾，嘛無需要佮人甚交睬〔cap〕，才袂引起誤會，何況又閣增差二代人，逐傢無肖捌，定著漸漸淡忘矣，叨工業社會，一人一傢代，食飽穿燒顧三頓卡耍緊。毋閣代誌起「戲劇性e變化」，三冬了後，1976年小弟佇新北投山腳所在，開一間齒科店來渡生活，1976，民國65年十二月，無張無弛有一位互做杜麗煌e阿伯，來看嘴齒，伊一聲叨知影小弟佮淑女仔佮杜聰明e關係，伯仔彼年才六十捅爾，人瘦瘦也，毋閣講話真大聲真熱情，尾也才知伊是杜聰明仙e「大姪兒」，伊佮尹阿叔杜聰明，自細漢叨感情臹好，伊佇現場叨講出真贅聰明仙私秘e代誌，小弟是巧巧人，馬上知影伊叨是貴仁，互我「重新燃起對杜聰明e興趣」安呢，所以講，冥冥之中，神明e力量，真正互汝袂鐵齒咧，今年114歲e聰明仙，若是知影「兒時玩伴」淑女仔e外孫，佇佰年了後吓來寫伊e故事，毋知欲外歡喜咧！唉！仁生啊仁生！
落尾也才知影，杜麗煌這位阿伯仔，是日本時代，台灣人e知識份子，做過彼時代e記者，佇東京所在跋撋幾落年，中文日文攏真厲害，本來真「愛國」，臭頭仔來了後，受著「排擠」無甡張。二二八拄著大僥梟行，佳哉死無去，對阿山仔真感冒，真有蕃薯仔e精神，伊講話e中間真正投緣叨著，彼時瞬見面熟似（認識），感到真奇怪，伊是1915年出甡，按怎吓凍預知二十年前，1895年淑女仔佮杜聰明「玩伴e代誌」？伊哪吓知影富貴家族杜家佮散赤家族淑女仔e二代關係？伊哪吓知影小弟是淑女仔e外孫？以上三點若袂出破，阮叨無法度熟似有關聰明仙e代誌，也叨患者真贅來自四伍路人，小弟絕對無法度了解哩！所以講这絕對是天公伯仔有意思欲來肖晟肖逗，小弟拄著貴仁矣！这是我e福氣，所以講有時仔運氣咧行。閃叨閃袂離呢，杜麗煌阿伯茲茲是貴仁無顛誕，小弟寫本文已經是58歲老人矣，前進幾工去草山公園看櫻花e時瞬，半路搪著麗煌伯仔，伊已經九十捅矣，掣著老牽手，猶元精神臹好，大腳步大聲公，元氣十足，阮二人遂看起來平平老矣（一樣老），時間過了真緊，目睭暱一下，三十年叨過去矣，有影真感慨叨著。（註，「臭頭仔」一詞是彼時代一般台灣人對蔣介石e稱呼，伊e頭，親象歌仔戲「臭頭仔洪武公」（明太祖），並無歧視之意，目前「中正紀念堂」，民進黨叫伊「臭頭仔廟」）。
1977，民國66年年初，麗煌伯有一擺來看嘴齒e噹中，真正好禮，講欲掣我去見杜聰明博士，互我「受寵若驚」，真正是歡喜甲袂顧e，奚是三十冬前e代誌，這嗎想起來宛那糖甘蜜甜哩，小弟吓凍拜訪著清朝人杜聰明博士，是我壹生上介光彩e代誌，伊做過台大醫學院8年e院長，高雄醫學院10年e院長，醫學界e天霸王，「今之古人」嘛是「古之今人」，伊是咱佰年來e關鍵仁物，真正做了有起叨著。
叨安呢，民國66年四月尾，麗煌伯仔掣我去拜訪聰明仙，彼年我28歲，聰明仙85歲，我小弟仁生噹中特殊e體驗，早起十點捅呤，麗煌伯仔叨到位矣，去隔壁買一盒雞卵糕做等路，自那佮麗煌伯仔，坐計程車駛對台北彼方面去，伯仔仝款聲頭飽元氣充足，客氣臹有禮數，以兄弟之禮肖款待，害我真歹勢，真有咱台灣人舊時仁格者e客氣款勢，伊e年歲來講，做我e老父猶有偆咧，按怎對我即好禮，人e修養叨歹講li，互我內心再三感謝勞力安呢。
無外久中間，車駛到林森北路六十×巷仔口，貳樓安呢，結局e瞬呤，氣氛真正特別，規間厝攏是書冊，書架仔一排一排，暗暗懸懸，強欲袂tang-gng（透光）安呢，另外倚壁角，囥一箱一箱e象骨化石，聽兮講逶台南左鎮外集來e，規厝專書，真正博士無咧做假e！這个代誌互我印象臹深，互我三十年後夯筆寫稿，猶感到真奇巧，唉！人奚氣氛叨讚li，博士今年（2006）若活稠e，叨114歲矣，三十冬前e代誌，佮昨ng仝款。
博士坐佇左爿偎壁e所在，桌仔舊舊也，彼年伊85歲，猶「坐擁書城」宛那幸福，博士e面cio親象清水祖師，瘦瘦長長，精神臹好，對我這位「不速之客」滿面笑容來迎接，麗煌伯仔先開嘴「叔仔，淑女仔尹外孫元興仔，宛那咱台大卒業e齒科仙，真誠意欲拜訪，逐傢坐坐e，歡喜一下。」
「好，坐，坐，呾淑女仔是古早巴拉卡所在e好厝邊，七八十年e好朋友，噢，尹外孫即尼大漢矣，恭喜啊，台大卒業實在無簡單安呢，這嗎佇佗咧服務？」
家己佇新北投山腳彼角勢開一間齒科店，罔渡罔渡爾，才映望先進多多指教安呢！」，彼時淑女仔已經過身四年矣，佇博士面前，我歹勢提起。
博士e言談，泉州腔真重，伊佮阮阿舅e腔口仝款，所以無形中感覺真親切，博士講真贅古早北新庄舊厝，巴拉卡所在e故事，感覺「時光倒流佰年」真心適叨著，順續我有給博士感謝尹嗣大人，佇阮外媽上介乏搭艱苦e時瞬，給伊幫助，致最大e謝意安呢，博士講，嗣大人本晟叨拜佛善心，寬大慈悲，幫贊茲厝邊頭尾，是無到佗位去啦，哎！頭傢大人德大量，絕對吓大葩尾旺廣，代代出好囝孫。
落尾甡，我有請教有關伊少年時瞬欲莿袁世凱e故事，佮二二八險兮見祖公e代誌，另外白色恐怖時醫療同仁遇害e內幕，最後佮臭頭仔袂ha4，門扇板咧逗袂峇，暗然離開官場，嘛是博士這氏人過四个朝代，種種心苦病疼e空縫，嗯著挖（ya4）挖出來，互我这少年人稍鼻芳咧。
毋閣博士，無噯講這方面e代誌，拍算是卡敏感e款，抑是無噯閣再擸起卡早e傷悲，伊四兩撥千斤「顧左右而言他」，講對仈位去，這个時瞬，我心肝頭一瞬e絞滾，感覺真歹勢，也叨少年人毋捌代誌，小弟是氏細，是人客爾，不應該佇博士e面頭前，探查人e心酸佮艱苦，害人「無話無句歹應付」，真失禮叨著，所以佇十秒鐘內，馬上改變話題，講一寡「無關痛癢」e客套話，抑是生活上e闌冊代誌，安呢氣氛又閣熱場，佇麗煌伯仔逗講好話以上，逐傢歡歡喜喜，笑咪咪，客客氣氣來完成拜訪安呢甡。这是近三十年前e代誌矣，簡那三工前仝款，才咧怨嘆講，時間實在過了真緊，燃眉汝著囝孫滿堂，食老袂哺塗豆矣！彼擺e拜訪，真拍損，無紮翕相機，失去佮「前清遺老」博士仙共影e機會！
所以講，这叨是仁生e經驗，少年人真正互汝袂鐵齒e，做人隨時攏噯有「急智生變」付環境e步數，抑無汝叨乏甲無甡張，真正互人看袂起，彼時才二十外歲爾爾，佳哉應付有著縫，場面掠了有在安呢，卡袂對麗煌伯失禮，無論閣卡按怎講，咱歹勢躇博士面前，挑工講二二八，臭頭仔袂ha4，脫黨……茲敏感e話題咱噯考慮仈人e立場。也叨(一)小弟佮博士仙，「素不相識」，一聲叨莿棘人e敏感，去拐著人e筋，人「毋知熊抑虎」，是著無義務印汝。(二)博士佮淑女仔熟悉，並無佮我熟悉，差二代人，拜託咧。(三)博士朋友真贅，贅到無地算，無論財富地位相差真遠，汝老黃兮算幾分e螺絲啊。(四)茲敏感e代誌，事先稍問麗煌伯仔，叨吓知影八九分矣，何必叨踅一遴圓箍仔，踮博士面頭前咧為難？逐傢加艱苦咧！
……所以講自安呢了後，小弟對拜訪名人e代誌，攏真注意真細膩。
(5) 杜聰明博士e故事，伊上介心適e所在，叨是伊e背景按怎？意思叨是講尹老父杜日鳳，是毋是有受著環境e影響。來決定杜聰明e前途？主要e鋩角叨是「伊是滬尾人」，講卡詳細e，「伊拄好是日本人剛（daa2）來時e滬尾人」，伊若毋是滬尾人，叨絕對無後來e大成就，伊若毋是甡佇日本人剛占台灣e時瞬，嘛是無法度旺廣，伊若毋是有老父杜日鳳e傢伙（財產），嘛是無法度，伊若是無老父佮大兄e智慧，嘛已無法度，……这一切攏是天公伯仔咧安排，彼時瞬，滬尾是全台員上大e出入港口，伊代表國際文化e看板（kambang64），致使講杜日鳳有法度踏著時機，全力來培養主聰明求功名安呢，人咧講「天時（日本仔強勢文化），地利（滬尾港全台第壹致蔭著），人和（有錢）」三項僬到，這棚戲才搬吓落去。
杜日鳳e徛傢佇北新莊仔遐，離滬尾街十公里，也叨有錢人關係，不時嘛佇滬尾港咧跋撋，日鳳仙按怎受著滬尾文明，致使日後決定欲栽培杜聰明讀日本書求功名？伊雖然無讀啥乜冊，毋閣伊占著地理徛位台灣第壹港滬尾，享受著世界壹等e文明。
(一)伊受著滬尾馬偕博士e影響，知影世界文明e偉大，毋是清國大爛敗e文明系統捸吓著咧，永遠嘛捸袂著火車班，西洋方面物理、化學、數學、醫學、農業……種種方面e成績，真正互杜家大開眼界，杜日鳳三十歲e時瞬。1872，馬偕叨來滬尾傳教，一直到1901過身，熟似三十年，有影捌甲有偆法，馬偕佇1899年左右嘛聘請大後牲杜生財，去偕醫館遐教漢文，雙方合作真逗搭，这哪叨閣講。
(二)1884十月伊了解清法「滬尾戰役」e殘酷佮滬尾
港本身e重要性，也叨中法戰爭，仈位毋扑，哪吓扑到滬尾來，彼年杜日鳳杜好42歲，有一工去滬尾，偕醫館遐，看著真贅著傷e士兵，佇遐咧修養醫療，喚甲大聲細聲，日鳳仔看甲真可憐，捐出五箍銀來給幫讚，互杜日鳳真正著驚，咱滬尾宛那是世界要緊e所在，抑無哪吓蹛肖摋戰爭？身邊有一位鬍鬚溪仔，親身參加戰事，回想戰爭e殘酷，這場戰爭，雖然規模無大，毋閣是台灣兵打贏法國兵，佇清朝時代，宛那是無簡單e代誌，下腳叨是伊e講話內容。
「1884年10月初8早起十點外，李斯卑斯率領陣法國軍艦，向滬尾外灘進攻，砲彈真密真贅硝煙瞬瞬，轟炸下沙崙東北角（目前「漁人碼頭」到「淡海浴場」彼箍圍仔），而且分三路施行登陸，尹毋知影守軍孫開華，早著知影消息，伊命兵士匿佇海邊紅樹林腳，埋伏好勢了後，彼工法國兵強行登陸，埋伏e守軍「蜂擁而出」，敵明我暗，見一个摋一个，法兵知影中了圈套，趕緊撤退，毋閣茫茫大海無退路，又閣集結進攻，台灣兵占著優勢士氣大振，法軍嘛趕緊逶船上派員支援，雙方壹對壹肉搏戰，「寸土必爭誓死不退」，摋甲天轟地肉翩，日月無光輝，無外久雙方稍寡歇睏，甚矣，稍喘咧。」
「這个時瞬有士勇張李成率五佰義軍，斬對法軍後方，截伊e後路，法軍腹背受敵，士氣大驚，落荒逃走，孫開華率眾斬伊e旗官，法軍大驚退回船頂，台灣兵一路追殺”大獲全勝”，法軍死四佰餘人，元氣大傷，台灣兵嘛損失袂尐，規陣扛來馬偕病院醫療，這擺戰事，法軍情報不靈，又閣登陸甚尐兵士戰敗（噯三倍兵才有法度），互清朝真大e面子，張李成原本搬戲仔，犯死罪，改去肖摋，將功抵罪，嘛是奇巧……」
(三)伊親身知影滬尾直透大稻埕，e外貿價值，淡水河e重要性，嘛知影大稻埕西洋商人，採買茶米e好利純，咱給看，杜日鳳家族吓好業，毋是做田抑燒火炭致蔭著咧，伊純然是賣茶米互阿啄仔商人，賣去外國，趁西洋人e錢，算講國際貿易叨著。
咱給看，種茶米規台灣南北二路僬有，按怎杜日鳳有法度賣著好價賬，奚叨是滬尾所在利用淡水河，使直透到大稻埕，遐有真完善e外貿商業系統，利用大稻埕洋商咧趁錢，这是咱台灣十九世紀尾期，上大e收入來源，總講一句，杜家是淡水人，叨吓凍享受著大稻埕地理上e方面，其他下港所在，叨噯克服交通e限制，加互人趁幾落手，算起來利純東西卡醜安呢甡。
(四)伊了解日本帝國e強大，學習日文、叨吓凍佮世界文明接軌。
1901年，台北到滬尾e鐵路通車，1908年基隆到高雄鐵路通車，本來噯十工，這時八點鐘叨吓到，台北城e建設、總督府、法院、銀行、現代化e設備，一項一項設立，表現出日本帝國世界上勇，尤其是控制malaria（瘧疾），互台灣人死亡率大大降低，台灣人真感謝，另外佇治安方面，日本人嘛費真大e喟力，互茲散赤人，軟弱e人卡有保障，吓使講接觸日本，叨是接觸世界文明，阿本仔雖然外來政權殖民統治，宛那开一把仔本錢叨著，毋閣真拍隕，北淡火車通車無外久，杜日鳳叨過身矣，袂赴倘享受著。
杜日鳳壹生差不多，攏受著滬尾文化e洗禮，致使講佇彼个時代，伊了解絕對噯將杜聰明去讀日本書，才有法度求功名。才有法度接受著世界性e文明，才決定叨送杜聰明去讀滬尾公學校，自安呢一路橫長直破莿yaya，壹直到1922得著醫學博士，全台灣出名，全世界嘛出名，这是時代致蔭e，閃嘛閃袂離安呢，三年後台南王受祿嘛得著德國醫學博士，毋閣伊一氏人恬青青叨無法度享受這个光榮，人e運命叨歹講li。
毋閣世間嘛是有一寡對聰明仙，提出負面e質疑，聰明仙（1893～1986），食到94，歷經四个朝代，夾佇東京話佮北京話中間，夾佇國民黨佮共產黨中間，是定著得失袂尐e小仁，嘛有真贅人看伊袂起，隨人看昊月無仝爾。(一)仝時代e蔣渭水、獻堂仙、蔡培火……攏咧反抗日本殖民統治，要求自治議會政治，吞銅食鐵艱苦坐卦，汝聰明仙遂偎日本人勢力，榮華富貴，咁吓看咧。(二)228事變交待無好勢，咁是奸臣？(三)按怎攏無講著咱辜顯榮，这無合彼時常理。(四)汝連學士叨無，哪吓博士？(五)高醫財務是毋是穎誕？(六)一氏人行學術路線，哪吓無啥乜成就，迭迭出國引人目空赤。(七)囡仔財產分袂平，官司問題。(八)杜家篤信佛教，按怎尾溜也有基督教入來？
第二章 滬尾山頂囡仔巧，亂世清國日本人
(6) 1843年左右，地球e二爿，出氏二个敖人，加拿大e馬偕博士，佮台灣e杜日鳳頭傢，這二个先覺，仝款佇1902年左右過身逝世，平平活六十歲安呢，也叨萬里有緣來相會，二位敖人，掌握著20世紀初期台北e文化佮醫療資源，行情卸卸叫，金光鏘鏘滾，叨「福地福仁居」，滬尾地頭吓興吓旺，宛那天公伯仔來肖晟，暗中註定兮有影。
咱滬尾所在，地理上讚，附近山崙肖犮（pua4）港口磊斗，透早清風微微，黃昏日頭彩雲，江面跳影，文仁雅士詩情畫意，互人茫閣醉，暢甲叫毋敢，莫怪馬偕博士佇1872年頭一擺見面e時瞬，叨歡喜甲袂顧e，叨決心一氏人欲踮茲傳教，醫療佮設學校教育，这佇清朝飯桶卦車輦，佮日本人猶未來進前e空縫，對台灣人e現代化來講，有關鍵性e影響安呢，伊挽嘴齒二萬外齒，治療malaria（瘧疾），引進西洋藥材，解除真贅人e心苦病疼，咱噯大大給人感謝叨著。
另外一方面，佮馬偕平歲頭e杜日鳳，頭殼真好，伊佇日本人來管這五年內，知影日文吓使通透世界文明，決心培養屘仔囝杜聰明，無論幵外贅錢外贅困難，伊攏噯全力支持，吓使講杜聰明這一百年以來，佇台灣地吓使橫長直破莿yaya來講，絕對噯感謝老父杜日鳳e栽培佮先見之明，呾平平滬尾人，杜日鳳定著有互相受著馬偕仙e影響，嗯才e瞬呤，馬偕博士佇1899年有聘請杜日鳳e大後生杜生財，來醫館做漢文老師，順續杜聰明囡仔人，嘛有看著鬍鬚仙馬偕為人看病e實景，致蔭著日後做醫生e願望安呢。
馬偕佮杜日鳳，佇1902年左右先後離開世間，「蒙主恩召」去「極樂世界」，馬偕一氏人咧傳基督教e時瞬，杜日鳳叨標準e「阿海」，嘛信佛教信到真逗搭，逐工拜拜，伏祀觀音媽是無暝無日，跪拜誦經真虔誠，杜聰明才五、六歲e囡仔人爾，逐工看佇眼內，定著有所感應，杜日鳳粗淺捌寫漢字，若有閒工e時瞬，叨手夯毛筆，抄寫佛經，心堅意切真正誠心安呢甡，杜日鳳每日透早佮暗頭仔e時瞬，攏噯佇大廳兮燒香拜公天爐，杜家是泉州人拜天公爐，佇漳州人方面，嘛有早暗燒香拜「三界公」爐e習俗。咱北新庄巴拉卡所在，下冬昊仔厚雨水，透早、暗頭仔，昊時昏暗，外口雨絲仔噴噴，厝內腊燭gue仔影光交犮(pua4)，嗣大人架椅頭仔插香天公爐e情景影跡，杜聰明做囡仔e時代印象深深深，仁仁仁，真不幸，1902，十歲了後，杜日鳳仙逝，另外一方面去滬尾街讀日本書求功名，茲鄉土e代誌自那消身去矣！1902到1986這八十四年e中間，聰明仙做官做肫，揚名國際，頻若想著囡仔時代e代誌，迭迭嘛鼻酸目燒，目屑遴遴擱，有時暝半醒來，也叨枕頭僬霑，真正搥心肝安呢甡。哎，這氏人上介遺憾e代誌，叨是老父死了甚早，十歲叨無老父，活94有84咧空思夢想，功名利祿咁有卡擢？有影人e運命歹講li。
杜家原本福建同安人，乾隆尾期來台北討趁，佇五股坑、江仔嘴、竹仔湖，捙拚一大睏叨趁無食咧，到第三代杜日鳳e時瞬頭殼真精光，而且勤儉真耐艱苦，1860～1900中間，也叨時代致蔭著，天公伯註定滬尾人噯趁大錢，杜日鳳三十外歲e的時瞬。坐船到大稻埕（今貴德街迪化街延平北路），發現遐有臹贅阿啄仔洋行，吓使賣茶咪去歐洲美國，來趁傢伙(財產)安呢，這款代誌，叨親象現主時，「台積電」做電子，趁真贅啄鼻仔錢，傳統產業叨無卡擢li。杜日鳳返來滬尾山頂巴拉卡了後，規个家族pe性命種茶，做茶賣互阿啄仔趁錢。致使講1900左右，杜聰明八歲e時瞬，杜家已經粒積了袂尐e業產，杜家佮大稻埕咧生理交陪e時瞬，也叨佛教信仰e關係，去交著好業人黃玉階嗣大做朋友，黃玉階是中醫師，禮佛虔誠，尾溜仔日本時代e時瞬，做大稻埕e區長，接觸著彼時全世界上進步e知識佮技術，茲上介先進e知識，一嘴一舌，源源不斷e進入杜日鳳e耳空，致使講1900左右，杜日鳳毋但趁大稻埕e財富，嘛透過黃玉階得著全世界壹流e智識，這時瞬杜聰明仙才七、八歲囡仔爾，定著老父吓全力栽培，佇「天時、地利、人和」協調以上，杜聰明坐直昇機便便，無發展嘛袂煞li，这就是人e運命，互汝袂鐵齒e！
毋閣，不幸e代誌來矣！1902年十月，佇杜日鳳上介好額，上介至揚e時瞬，陰魂野鬼，漸漸來纏身杜日鳳e魂魄頂頭，哎！想落鼻頭吓痠，是按怎講杜日鳳這氏人禮佛赫尼虔誠，做人，赫尼慈悲，一氏人幫忙厝邊頭尾散赤人，哪吓來早死，無法度「仁者壽」，安呢好心無好報呢？1902，七月為著欲修理舊厝後壁e崎路，日鳳仙佇水沖（瀑布）邊，路滑跋落七、八丈深e坑崁，大聲哀嚎，茲厝邊頭尾給扛入厝內，內傷真重，彼年代無啥也醫術，干礁食一寡中藥爾，經過這層不幸了後，逐工倒佇厝內，茲疼遐疼，日鳳仙普通時仔心存慈悲，迭迭幫忙厝邊散赤人，逐傢暝日給安慰，暗暗流目屑，真正無法度。
明治三十五年，1902年十月底，杜日鳳吞落最後一口喟，來離開世間來投逶西方樂世界，享年六十歲，上大漢後生杜生財二十四歲，上細漢是杜聰明，干礁十歲爾爾，日鳳仙臨終時有口口聲聲交待，杜聰明這个屘仔囝，壹定噯全力培養，趕緊去讀日本書，來赴時代e變遷，看有倘大葩尾旺廣，互咱杜家萬世光移否？恩才e瞬呤，過返年，杜家逶杜聰明送入「滬尾公學校」，讀小學，離開血跡到外地求功名，杜聰明這个清國人，小學佮醫學校攏「留頭鬃尾」上課，佇日本人e昊年，宛那堅守清朝人e甡張，真正跋氣魄組兮。
呾巴拉卡舊厝咧辦喪事，庄腳人忠厚閣義氣，茲厝邊頭尾攏合來逗腳手，杜家人群佳繹出出入入，真正無閒安呢甡，匿佇壁角杜聰明小弟弟，彼年才十歲爾爾，踮遐流目屑，噌啞訄仔聲（暗泣），彼个時瞬，司公壇樂聲興，銅鑼鏘仔是摃甲叮噹叫，小吹哀樂是奏甲真叉操，鳥頭司公經文是唸甲咦噢叫，氣氛哀悲，聰明仙坐佇遐，頭殼茫茫無話無句，毋知欲按怎才好？即細漢叨死老父，後日仔欲按怎？哎！歹命囝真正艱苦，家已噯卡拍拚e，噯卡礁肘e（dadiu64精明），巧神e，鏘落，拂落，拚互伊起氣，噯聽阿母佮大兄e話求功名，互咱杜家萬世興旺，安呢阿爸在天靈聖叨吓歡喜。呾燃眉十一月前矣！咱小雞籠（三芝鄉）巴拉卡遐，逐工嘛咧落冬尾兩（東北季風雨），噴噴也，點點也，一瞬一瞬雨白仔，煙雨農莊，淒涼磊斗，一瞬冷風吹來尻冷損，閣卡加添大屯山腳這層喪孝e哀傷，呾聰明仔不而顧叨囡仔人爾，真正志氣，目屑拭拭e，嘴齒筋咬咧，打起精神元氣足，艱苦坐卦潦落捙拚無第二句話，人客啊！聰明仙e時代來囉！
(7) 呾杜聰明嘛才十歲囡仔爾，是欲按怎求功名，揚名後世？外口大環境咁有好勢？伊逗底欲「時代造英雄」，抑是「英雄創造時代」？杜聰明出身亂世，这是伊e哀悲，毋閣逶另一方面給看，这叨是伊e機會，人講「亂世出英雄」，莫講咱聰明仙出氏了有著縫，踏著機會嚬嗙hau4，橫長直破是卸卸叫，真正運氣咧行，竄筋入骨，互汝袂閃咧，呾聰明仙是按怎發展，是按怎起磅e？真值得咱給斟酌咧，給研究一下仔卡好勢咧！
先講，聰明仙逗底是佗一國e人？是中國人？是日本人？是清國人？是台灣人？支那人？中華民國人？这真正要緊，若矯袂好勢，這聲叨害溜溜，目睭花花，匏仔看做菜瓜，壹般人掠做講聰明原本中國人，日本占台灣，變做日本人，光復又閣恢復中國人，安呢講甚簡化，有影顛誕叨著，咱聰明仙出氏佇1893，原本是清國人，汝講伊是支那人嘛吓使，毋閣毋是中國人，抑無，國父孫中山欲「驅逐達虜，恢復中華」，啥乜人是韃虜？漢人e社會，自古以來叨講家己華夏、中原、清國、大明……真尐講家已是中國，1895甲午戰後，日本人占台灣，杜閣卡袂使講伊是中國人，彼瞬講「中國人」，遂顛倒是正港e日本人，也叨日本國有分幾落个地區，每區8～10縣左右，關東、關西、近畿、中國……。「中國」地區叨是本州上西爿幾个縣份，这話袂使烏白講e，日本仔猴叫杜聰明「清國人」，这實實在在e代誌，二次戰後，日本人撤退，蔣介石阿山兵占台灣，叫做「中華民國」，佮「中國」共產黨決裂，無咧來往。所以講杜聰明仙一代人攏毋是「中國」人，伊是清國人、日本人、中華民國人，伊一氏人噯對抗清國、日本、台灣國民黨、中國共產黨、真正食力真正硬斗安呢甡，呾聰明仙這个悲情e蕃薯仔知識份子，一氏人攏咧做人e腳架仔無甡張，表面上真風光，實際上苦水滴滴滿腹心酸，無人親象伊赫尼複雜，安呢頭傢一个換過一个，聰明仙e背景既然即尼複雜以上，隨人看昊月無仝，欲批評伊抑是謳咾伊，「往往是一紙之隔」爾爾，咱跋白e，台灣人講台灣話，佮北京話、東京話，相差真贅，又閣間隔大海，原本叨「田無交，水無流」，無肖工礙，是按怎台灣地互北京話統治者占領，又閣送東京話統治者，又閣送互原北京話統治者？互人揀來換去，真正可憐，吓使講聰明仙e艱苦佮乏搭，叨是咱台灣人e苦楚哩，台灣人做牛做馬咧捙拚，咁有卡擢？
台灣島，天公伯仔欲疼咱，地理好，風景嫷，魚蝦滿地物產豐沛，真正是徛居生財e好所在，人講「福地福仁居」，佇日本仔佮中國仔咧肖摋鬥爭割來割去e時瞬，身邊阿啄仔嘛欲來參一腳，欲來卯一塊仔，飲一碗甜湯le，1854咸豐年間，美國駐日本公使哈里士上書國務院建議總統，用金錢收買台灣島，伊長年佇亞洲，知影亞洲各國e長短，知影台灣島地磊斗，控制亞洲南北貳路，為著美國帝國e前途，有需要量早收買，抑無日後若是去互日本仔食落，彼瞬叨甚慢矣！
彼个時瞬，清朝搪咧為著太平天國「作亂」，舞甲滿面全豆花，強欲袂收山攬尾咧，「中原不保、何況台灣島」，所以講, 人逼著矣，港無潦袂煞，嘛是有可能出賣台灣來救中原，收寡現金嘛爽快，毋閣美國人確實卡忠厚，毋敢烏白來，哈里士將建議書交互國務卿e時瞬，國務卿提著地圖，用譀鏡瞋閣再瞋，看甲目睭強欲肖犮〔pua4〕「唉，欲叫咱美國人買台灣，台灣甚細粒啦!尹俍卡好，鼻屎大e所在，無值咧開大條錢銀給買啦！」嗯才按下不表，第二年1855才交互總統皮爾斯，真不幸彼瞬總統,,搪咧為南北戰爭黑奴問題傷腦筋，對台灣这腳騷所在，（並無侵占e野心），「心有餘而力不足」，1860左右中國方面大戰太平天國，美國方面南北戰爭是扑甲起sampu45，扑甲是「天昏地暗，日月無光」，這二个太平洋大國仝款是「陳皮蘇黨」，臹有拚頭叨是。無外久，南北戰爭扑煞，國庫漸漸飽滇，美國佇1870年逶俄羅斯買進阿拉斯加，幵720萬美金爾爾，真俗啦，可見阿啄仔嘛是看人看人爾，無噯叨是無噯，彼時瞬美國若開淡薄也金錢來收買台灣，毋知這嗎吓按怎款？
毋閣嫷人無嫷命，真正互汝袂鐵齒e，台灣地優越條件，宛那引起幾落个列強e痟想安呢，美國人紳士態度，買台灣買無成，二十外年了後，換法國進攻台灣，尹用武e，無欲用文兮，这叨是赫赫有名1884清法戰爭，這个時瞬巡無劉銘傳，為著保護台北城e安全，調遣大兵埋伏滬尾油車口（今陸海浴場、漁人碼頭一帶），法國軍艦登陸時，水土不服猶咧烏暗眩呤，一下「敵明我暗」馬上互匿佇紅樹林e鄉勇衝出大殺一瞬，法軍腹背受敵大驚慘敗退回，清國e台灣兵，摃倒洋人大兵，清朝大大賞功安呢！
雖然安呢，台灣地宛那袂定著，仈人嘛是欲閣來占，橫直清朝腐敗不堪，欲死動亥，早慢吓吐出這塊赤肉安呢甡，十冬了後，1895左右日本人根據馬關條約占全台灣島，這个時瞬美國人大著驚，尹俍卡好咧，恁父甚忠厚用買e，茲毋臹囡子硬用武力，甚hau韶啦，幹！猴囡仔閃開，老漢欲展威矣！彼个時瞬，阿啄仔美國人開始後悔矣！尹毋聽1855哈里士買台灣e建議，變做講這嗎去互日本仔占去，是吓搥心肝安呢，1896日本控制台灣，二年了後1898美國仔為著嘛欲展氣魄，仝款強占隔壁島菲律賓做殖民地，趕唗西班牙人，阿啄仔毋是噯占菲律賓，實在是烏仔魚去互濁水激著矣，趕緊占菲律賓來佮「日本占台灣」對抗，这姑不而衷e代誌，所以講四十年後e珍珠港事變無希罕啦，也叨1896～98年間「日本台灣，美國菲律賓」早著腳來手去，索腳撚手，拚一睏外大睏矣！
(8) 日本軍隊，近衛師團，根據馬關條約，佇1895年5月29日，踮（貢寮鄉）鹽寮彼个所在就陸, 無拄著啥乜反抗，日本時代開始矣！日本人統治台灣這五十冬（1895～1945），拄好是中國上介爛敗落後e十年，台灣人避開北京話e統治，過戶互東京話統治者，日本人彼時是世界壹流e強國，台灣人吓凍得著衛生、教育、交通、經濟e發達，逶某一方面來講，这是伊e福氣，彼瞬若繼續互阿山仔統治以上，竭竭是海南島e水準爾，这硬拄硬真現實，草蓆包針至，實在無法度安呢。
三工了後，日本兵登陸鹽寮e代誌，叨一嘴傳一舌給湠開，無外久中間，咱茲台北大稻埕e好業人，逐傢攏知影日本欲來統治矣！這个時瞬，日本兵搪咧向基隆佮台北方面推拺，一工一工來逼近，按算十工、二十工，全台北地區叨吓凍定著，人講「三年動刀兵，十年袂太平」，戰爭e危險真正互汝袂分外人家己人e。
大稻埕市街彼陣有錢人，尹無驚日本軍人來嚕囌，也叨日本仔兵，裝備優秀，客氣有禮數，尹是公務爾爾，噯受著頂司e界管，毋敢對咱歹聲嗽，呾這嗎上驚惶兮有三項代誌。(一)社會茲羅漢腳仔，佮一寡鱸鰻人獻e憩陶人，尹絕對吓趁亂世來殺人放火，搶劫財產，「摃菸叉頭」綁票掠囡仔，社會治安規个崩盤安呢。(二)清朝e官兵，趁敗亂時機，搶金錢武器彈藥，流竄社會搶劫殺仁，袂輸掛牌e土匪，一四界梟行，咱茲善良百姓，欲按怎叨好？(三)少數義軍抗日份仔，埋伏各地截殺日軍，難免引起日本人e報復，翻頭來錯殺無辜百姓，到時話語袂通真正費氣安呢甡。
呾日子一工一工逼近，姑不而衷到地矣，台北大稻埕遐e商紳，逐傢集中開會參詳，來給想出應付e辦法，來避開這場血海屠殺e恐怖，逐傢決議，噯派人去佮日本兵和平談判，拜託尹入台北城e時瞬，毋倘錯殺無辜，引起血海衝突安呢甡，毋閣道理雖然簡單，遂無人敢去談判，也叨这是真正危險e代誌，「頭毛試火，吓殺身之禍」，衝磅潦落，恐驚這條命叨休去，台灣人雖然驚死死，毋閣佇日軍方面嘛是仝款驚惶，緩兵之計，孤軍深入恐驚吓中著埋伏奸計嘛無的確li，茲大稻埕商紳，隨人錢銀飽飽，無人敢冒這个風險，去保證這个代誌。
所以講欲派人去佮日本人講和，叫尹和平入台北城，这親象「與虎謀皮」，袂輸欲叫齧鼠仔去tau4貓頷頸e鈴仔仝款，真正無簡單。致使講開會開幾落擺叨無結果li；最後一回，搪噹汝看我，我看汝，無人敢捅鬚e時瞬，一个台灣英雄出現囉，伊叨是火炭商辜顯榮，為著全台北人性命e安全，伊決定無惜甡死，欲去佮日本人講和，奚是1895六月初e代誌，所以講日後辜顯榮吓大尾吓趁大錢，咱毋倘怨妒，伊佇台灣人上介艱苦上介困難e空縫，潦落捙拚拂生死，伊e仁格甡張叨有到遐li。
聖聖互咱掠準準，搪噹日本兵佇五月尾鹽寮就陸，一路攻對台北城e時瞬，台北真亂真離，唐景崧宣佈台灣民主國，又閣廢除，唐奔逃大陸，下腳e兵丁搶著武器彈藥庫銀、竄入社會庄頭，一四界殺人放火搶劫，吓使講「官兵變強盜」，規个大台北血染大地人人自危安呢，照清朝律令，官員佮兵丁袂使用本地人（以防叛變），台北城茲官兵大部份廣東兵，語話袂通，沿途毀累燒殺往南爿辿去，尹有摋人，嘛沿路互百姓摋，致使講中壢，新竹地界有真贅這款人e萬善同歸呢。
呾辜顯榮欲按怎去佮阿本仔只談和，拜託尹入台北城e時瞬卡溫和e，毋倘給台灣人拍著驚，咱台灣人真好逗陣，好禮閣客氣安呢，伊佇六月初七左右透早，干礁夯一枝雨傘爾，無提任何物件，單超一个人，逶大稻埕，行路到水返腳（汐止）日軍軍部，守衛仔看伊一个人爾，身軀無紮武器，命令停止，辜日本話袂通，提出求和e文件，要求日本兵入台北城e時瞬，噯真細膩，毋倘血染台北城，造成百姓真大e傷亡安呢甡，我是大稻埕e代表……。
內底e日本軍官聽著安呢呤，真正緊張，也叨日本方面嘛真煩惱尹入台北城時, 吓拄著義軍e陷阱佮反抗，來誤殺百姓引起民怨，这是一个絕好e機會，日本軍官行出來，為著欲試驗伊e真心，洶洶提出武士刀假影莿逶辜顯榮e腹堵，這个時瞬，顯榮恬恬，一絲叨無反抗，據在軍官摋過來，橫直這條命早叨忖死e，这是我e誠意佮氣魄爾……。日本軍官抽返武士刀，才感佩辜顯榮e誠意，趕緊派人繫話（翻語）「汝是大稻埕e代表，汝真有誠意，道謝，阮日本兵隊是根據馬關條約進管台北，是奉公務爾爾，絕對無為難百姓e意思，顛倒阮是孤軍深入，真驚台灣人義軍e反抗暗殺，嘛需要恁e幫助安呢……」
日本軍官初步答應辜顯榮e要求，寫入城e條件，吩咐辜顯榮返大稻埕，明仔載等消息安呢。「第一必須效忠日本政府，袂使佮義軍合作謀反，第二若是有義軍e秘密馬上給軍部反應，第三恁這陣台灣人噯掣路，互阮日本人真方便進入……阮大日本帝國絕對配合叨是……。」辜顯榮返去大稻埕了後，為著欲互代誌矯閣卡圓滿，馬上連絡中北街e美國人、英國人、德國人、咱跋白e，茲阿啄仔生理人，嘛真驚日本仔亂來，嗯才聽著辜顯榮談判初步成功呤，真正歡喜來全力配合li。
為著表現誠意，過返工呤，辜顯榮掣著幾个阿啄仔生理人，登門拜訪日本軍部，定著進前嘛有佮鄉親頭兄有摯接過，講一寡代誌矯長短，日本軍部透過辜顯榮這个管道，6月7日真順序來占領台北城，這个時瞬，衙門e官兵，彼批廣東兵仔，嘛提著庫銀佮武器，四汕（散）辿去，唗甲無半人，算講日本人逶五月二十九到入城6月2日嘛才十外工爾爾，中間並無發生血海大戰，宛那是雙方有福氣叨著，这佮1947三月初阿山兵仔填壓「二二八事變」時，基隆一路摋到台北e血腥鎮壓無肖仝，叨知影辜顯榮「引日軍入城」佇某一方面有伊e特殊安呢甡。
佇日本人占台灣e前後，1880～1900年間，是大稻埕做外國生理商業上介繁榮e時代，台灣人賣茶米、樟腦，互阿啄仔，趁袂尐錢，彼个流擺（場合），嘛是有真贅好業人，茲大稻埕e好業人噹中，有一个號做黃玉階e中醫師，做人慷慨，對朋友真熱誠客氣，結交天才仁人志士，佇大稻埕地區名聲揚聲頭浮，真正擎甲夯袂稠安呢，街頭巷尾好事歹事，至到怨傢讓債種種糾紛顛誕，叨頻若提著黃玉階呤，定著「喚水吓堅凍」，通人嘛比大頭拇，阿本仔入台北彼年，黃玉階才四十桶爾，頭額精光天庭飽滿，毋閣好業人驚死，日本仔欲入城，黃玉階忍甲一身軀肉，落尾溜也辜顯榮捅鬚（挺身而出），引導日本兵入城，黃玉階這聲安心矣，對辜顯榮真正大大感謝，續落欲按怎佮阿本仔跋擱？呾這嗎是日本人e昊年，互汝袂假仙e，人客啊！阿本仔是毋是欲牽成黃玉階啊？
所以講人e運命八字，互汝袂講咧，黃玉階頭殼好一枝嘴holuilui，無外久中間叨得著日本人e信任，毋但發互伊台灣頭一个中醫師證書，順續嘛叫伊做大稻埕e區長，伊猶原客客氣氣，熱心公益，一四界人緣真好安呢，連三十公里以外e杜日鳳，嘛交陪真好，感情比兄弟卡食佳，彼瞬杜聰明才三歲爾，黃玉階嘛毋知杜日鳳e囝兒聰明仙吓日後出名，这完全叨是黃玉階忠厚客氣「宅心仁厚」有關li，黃玉階是按怎交陪著杜日鳳，除了生理場e摯接以外，上要緊叨是二人攏是虔誠e佛教徒，暝日參拜伏祀觀音媽，有共同e信仰以上，人慈悲嘛卡客氣有禮數，1900年左右，杜日鳳迭迭掣著杜聰明滬尾坐船去拜訪黃玉階，送伊一寡山頂土產逐傢感覺臹好，1918黃玉階破病過身，杜聰明猶未得著博士學位，真拍隕安呢，頭前有講過，杜日鳳佇大稻埕交陪著黃玉階，除了佛教佮茶米生理e利純以外，上要緊叨是伊逶黃玉階區長遐，源源不斷吸收全世界上進步e知識，这對庄腳人來講，欲按怎栽培杜聰明，有決定性e作用安呢，咱給看，彼个時瞬，辜顯榮佮黃玉階攏受著阿本仔e看重，辜做保良局長，黃做區長，半斤八兩爾，是按怎杜日鳳吓交著黃玉階，袂去交著辜顯榮？另外，杜聰明1922得著博士全省出名，到1936辜顯榮過身，這十五年噹中，二个台員上出名e人，真尐來往，逗底是啥原因？
1945年二次戰後，北京話統治集團，中國人又閣來統治台灣地，尹迭迭講辜顯榮引日軍入台北城，是漢奸，咱給看安呢講並無正確，辜顯榮彼時有姑不而衷e苦楚，伊毋是漢奸，伊是台灣人e英雄，伊為著台北城百姓血海之災，無惜性命捅心潦落捙拚，實在有氣魄。理由是安呢(一)日本占領台灣是根據馬關條約，这是姑不而衷e代誌，咁講辜氏無出面，日本人叨袂來是毋？(二)清朝官兵e潰散敗亡搶劫，可能造成百姓大流血，啥乜人吓凍負責？(三)民間義軍游擊隊e攻擊，可能引起日本兵大規模報復，傷著無辜，啥人負責？(四)佇無政府狀態以上，歹徒羅漢腳趁機搶劫、綁票、殺人、啥人負責？(五)辜顯榮是小生理人爾，亂世哪有啥乜資格見日本軍方？（伊毋是市長、巡撫、兵仔頭）。(六)伊若衝磅潦落、恐驚吓奉掠做間諜赴死，何必冒此危險。(七)伊毋捌日本話，是欲哪潦落？真正是「林投葉拭尻倉」爾。(八)伊是「大稻埕緊急紳商會議時」，無人出面，自動捅身潦落赴死，仁格真偉大叨著。由以上八點看來，辜顯榮確實是台灣人e英雄，毋閣日後，借日本人e勢力大趁大卯，定著互人看落莿棘，前後二時段完全無仝安呢。
1895年6月15日，大稻埕佇無流血e情形下，互日本兵占領，社會e秩序暫時安定，中北街方面有一陣頭傢人仔，做生理老實，才三十外歲爾爾，本臹落下港避免戰禍，這嗎聽兮講局勢安定，又閣返來矣，大稻埕佇辜顯榮，黃玉階e捍頭以上，仝款鬧熱滾滾，街路市面人群佳繹無閒莿莿，逐傢生理做甲起sampu45，市草真繁榮叨著，少年林獻堂，原本霧峰林家花園望族e後代，家境富裕，頭殼精光，為人客氣有禮，觀察社會代誌，是幼秀深入盡磅逗搭，伊返來大稻埕了後，無幾年呤，馬上感受著日本人有世界壹流強國e氣魄，阿本仔e面尺精神，毋是咱茲清國人吓凍比，獻堂仙趕緊學日本話來保護台灣人e權利，獻堂仙活過規个日本時代，伊看著日本人佔台灣，嘛看著日本人敗退，伊是日本時代e「抗日大師」，毋閣1947二二八事變了後，受著莿激，對祖國失望搭底矣，甘願唗去日本嘛無噯蹛台灣，遂變做「親日大師」，1956死佇東京，这是後話叨是。
(9) 日本這个世界壹流e強國，佇統治台灣初期，宛那發生二件真正失敗漏喟代誌，清國台灣e爛敗互汝料想袂到，尹俍卡好，拳頭母去掙著爛膏糜仔，無法度伸腳出手，安呢無法度叨是無法度，真正「秀才遇著兵」，日本仔猴「啞訄仔砥死囝」安呢甡。
頭一項叨是，伊毋知台灣e熱帶病赫尼嚴重，阿本仔研究無透，是按怎台南已經開發二佰年矣，台北地區猶真歹幵發全是北台員雨水厚，malaria（瘧疾）一四界流行著e，死亡率懸，迭迭「甡無夠死」安呢，日本政府派三萬五仟軍隊攻占台灣島，真正戰死才160个爾，毋閣死佇蚊仔病malaria有五千人赫尼贅，阿本仔真正衰甲叫毋敢，若卡無擋頭兮，強強想欲放棄台灣安呢，上諏古e代誌，叨是日軍總司令北川宮親王嘛去仲著malaria死佇台南，害阿本仔「秘不發喪」漏氣wewe，以講世間e陰陽界互汝袂鐵齒咧，咱媽祖婆庇佑台灣人，咱扑袂贏人叨暗中用蚊蟲，「蚊蟲嘛過一氏人」，台灣人舞這齣e，阿本仔凝甲牙欲酥去，啐甲無力去，真正尹俍客兄公卡好咧，另外1895三月，日本只攻澎湖e時瞬清兵潰敗如山倒，這時媽祖婆又閣來矣！日本兵仲著霍亂，一工死佰外人，短短十捅工，日本是六仟人噹中死一仟三佰人，（戰死二十外人爾），互明治天皇頭殼摩咧燒，哀父叫母喚毋敢。
第二次代誌，叨是日本毋知影清國人e兵仔，分做二款，一款是官軍，一律外省人，也叨清朝律令，本地人袂使做官員佮兵丁，來防止叛變。第二款叨是地方e游擊隊義軍，尹佮百姓敆做一體「生死與共」，為著保護鄉土、財產、風俗、祖墳，入侵者一律拚生拚死，這條命忖配伊e，戰鬥力足強是狠e，真正恐怖安呢，日本人明治天皇，用壹般先進國家e標準，認定講清朝官軍潰敗，台灣叨無問題矣，毋知講，另外一股義軍反抗軍，深入地下，佮百姓敆做一體，隨時反攻，做游擊式e作戰，（這款代誌，佇二次大戰海南島上介出名），1895六月十七日本人佇台北開始統治台灣地，七月佇士林芝山岩設立學校，專門教學日語，半年了後壹切順序無代誌，失去戒心，佇1896元旦發生「芝山岩事件」全部六个日本老師去互義軍殺滅，這款代誌發生佇超級強國日本人手內，發生佇首都台北，（已經統治半年矣），真正是漏喟漏觸，互大日本帝國滿面豆花，伊滕博文氣胃出血，明治天皇三工睏袂去。
代誌是安呢，1895年六月十七，日本人開始統治台灣，樺山總督任命「老搭擋」伊澤修二做學務部長，佇台灣地全力推行日語教學，做為殖民統治e基礎，互茲無水準e台灣暢e，知影咱日本人天公地大，第貳工，伊澤佇大稻埕城隍廟斜對面租一間店面，做學務總部，做日語教學e講堂，開始傳習日本語，毋閣一禮拜過去矣！招無一个學生，也叨彼時日本人異族剛入大稻埕呤，有錢人驚死，早叨逃難去廈門、福建，抑是下港所在，無人敢去就學。另外彼時e人無注重教育「讀書浪費時間，不事生產」，又閣街路深巷所在，風聲喚喊，讀日本書噯剃去「髮辮」，失去清人尊嚴，又閣有人講讀日本書了後，噯派去日本，海外做奸臣紕仔（碎片），上要緊e叨是舊時「漢文私塾」老師e反對，讀日本冊真正是「背經逆道、荒謬至極」，普通人叨尊敬漢文仙，嗯才e瞬呤，無人去讀日本書，伊澤招無學生，一个面簡那肫le，茲大稻埕e士紳，有人給伊建議，士林芝山岩所在，自來叨是文人雅士集中地，文風教育真旺盛，地理環境嘛真好，樹林廟宇氣氛壹度讚e，真正是學校e好所在，離總督府才六公里爾真近安呢，事事方便好勢，吓使試看覓e。
伊澤真歡喜，佇六月底掣著翻譯官，逶大稻埕碼頭坐船到關渡，斡對基隆河這爿，佇三腳渡遐落船（今劍潭通河街底）無外遠e所在，有一粒山崙仔，差不多一佰公尺懸，四箍圍仔樹木真贅，中間有一間廟仔，下腳攏是水田，風景臹嫷，這粒山崙入口e所在，有一个簡單e城門，奚是漳泉械鬥時代e產物，伊澤一行人到芝山岩山頂e時瞬，知影這間廟號做「開漳聖王廟」，伏祀觀音媽佮媽祖婆、開漳聖王，廟內空間真闊，設備稍寡烏金烏舊舊也，內底有一个和尚仔，透露翻譯，伊講茲e治安無好，土匪，漳泉羅漢腳仔，抗日份子不時咧出入，真正費氣叨著，伊澤講「無要緊啦，我夤暗睏一眠才看覓咧！」
暗時睏到半暝e時瞬，忽然間聽著山腳hihe叫，人群佳繹鏘鏘滾，伊澤起身給看，有一陣人夯著火棍仔咧大聲喚喊，伊澤大驚，毋閣無外久，彼陣人又閣唗遠去矣，第貳工一透早呤，伊澤就起身，四界樹林艷茂，烏仔聲啾啾叫，空氣真正新鮮安呢，芝山岩山頂e所在「進可攻，退可守」地勢安全，這聲伊澤叨決定欲將芝山岩學堂，做為推廣日本話e教學中心，過幾落工呤，日本人召集士林地e士紳，好業人，鼓勵尹e子弟來讀日本書，後擺倘求功名安呢甡，初期有五个學生爾，奚是1895年七月初e代誌，落尾也又閣逶日本內地，徵調七位教師尹是楫取、桂金、井原、中島、關口、平井、小林，尹家已僎教材教日語，另外嘛向學生仔學台灣話，目的是欲聽有台語e壞話保持警戒，毋是欲尊重台灣文化安呢，到八月底e時瞬，學生已經增加到二十外人，算講對總督府嘛有交待叨著，台灣人叫伊「蕃仔學校」。
(10)這个時瞬，日本國勢搪強，明治天皇金光鏘鏘滾，是擎甲夯袂稠，1895，十二月尾，日本人進入台北城已經六月日矣，社會e各種安全佮治安，好勢溜溜，基礎拍甲真在，清朝e官方兵丁早叨唗甲摛褲腳，已經十八昊外e代誌矣！佇這个空縫，日本人千想萬想叨想袂到，有一枝地下e台灣人義軍游擊隊，搪欲尋機會對台北城進攻，摃倒日本外來政權e統治權，日本人因為毋捌台灣話，所以對這枝叛軍武力，完全無情報，台灣人civucica6133揙規晡，阿本仔腹堵邊去夆挖一空猶毋知，这對大日本帝國e尊嚴來講，是真大e諷刺。
這枝反叛日本e地下武力，由林日朝領導，有三、四佰人e款，另外連絡士林、北投方面e同志數十人，秘密約束按算佇1896日本人過新年e時瞬，全力進攻台北城佮芝山岩學堂，盡摋死赫日本人，摃倒外來政權e殖民統治，安呢鋩角才矯吓返來！這个時瞬日本人猶戇戇無得著情報，毋知一場驚天動地e戰爭這欲發生矣！1895十二月三十一日，士林保良局長潘光松，宴請芝山岩學堂這七位日語老師，客客氣氣、氣氛真好，潘光松雖然毋知影義軍何時吓進攻日本人，毋閣稍寡有風聲，知影外口治安無好，可能有代誌，叨叫這七位老師緊趕返去總督府，卡袂危險，這七位老師想講外口治安好勢好勢，無啥乜代誌「予以婉拒」佇潘家睏一眠了後，第二工欲去總督府過「日本仔過年」（元旦）。
1896元旦早起，義軍向台北城進攻，想欲尋一个「漏空」，入城了後盡殺日本仔洩恨，日本人嚴守一个城門，義軍久久攻袂落來，安呢無法度叨是無法度，这亦真正好笑，清朝造e台北城門，竟然來保護日本人，哎，實在有影！話分二頭，士林芝山岩e七位老師，七月半鴨毋知死欲來總督府拜年e時瞬，到基隆河碼頭，發現空空無半人，洶洶遂著驚，對岸硝煙霧天，殺聲連連，知影大事不妙，趕緊翻頭欲趕返來芝山岩避難，才想起昨暗潘光松e警告，毋閣已經甚慢矣，這七个老師趕返來芝山岩時，半路拄著義軍圍殺，混亂當中全部壯烈成仁，為大日本教育來殉難，这是1896一月一日下晡二點外e代誌，真正是驚動武林，嚇倒萬教安呢甡。
呾代誌大條矣，代表大日本帝國學務部門，芝山岩學堂老師，集體互台灣人義軍殺滅，這款悽慘e代誌，傳回東京了後，互明治天皇氣甲嘴鬚拍袺，伊滕博文首相嘛哭幾落工，好佳哉學務部長伊澤修二，拄好去日本內地「倖免於難」，這款代誌對日本人e尊嚴，真正傷害搭底，哀父哭母是害溜溜，樺山總督馬上展開慘烈e報復，馬上逶士林保良局長潘光松掠起來，逼伊交出義軍事故者，潘光松無法度，「日本人大怒，將潘斬首洩恨」，110年了後，2006春天有一工自由時報「自由廣場」有一篇文章，是潘光松e曾孫寫e，伊講潘光松互日本殺死了後，「身首異處，無法入殮」，忠僕用麻線漏夜縫合頸項才草草埋葬」，唉！台灣人巴結日本仔，落場即尼悽慘，看了實在鼻頭吓酸，日本人「一錯再錯」，台奸一路吞忍，忍甲無路，拜託咧，後日仔啥乜人敢閣替阿本仔效勞？
芝山岩事件，七位老師遇害，这是日本治台初期上大e「烏龍事件」，是怎講是「日本人一錯再錯」？既然人是台灣義軍摋死e，按怎賴罪日本仔？台奸一方面享受榮華富貴e時瞬，一方面嘛吓潦落敗亡悽慘e境界，这毋是矛盾，这是外來殖民統計必然e現象，仈人咧做頭傢，一尾魚落鼎，欲煎欲煮由在人，僅干礁無法度叨是無法度，真正互汝吓凝死，汝給看日本佇1894～1905這十年來國勢真強，伊扑贏甲午戰爭，併吞朝鮮，扑贏日俄戰爭有影擎甲夯袂稠，毋閣國勢強並無法度彌補「對台灣文化無和」e悲哀，日本佇併吞台灣進前，對台灣話並無深入研究，致使情報失靈，付出慘重e代價安呢，阿本仔按怎袂「一錯再錯」呢？台灣e兵丁有二種，按怎日本仔無警覺，Su當時獨尊日語看輕台語吓失情報按怎阿本仔無警覺？芝山岩開漳聖王廟e和尚，告知遐是抗日義軍巢，按怎伊澤修二無警覺？潘光松好意告知義軍e風聲，按怎七个老師攏無警覺心？代誌發生了後，按怎閣屠殺「台奸」潘光松來洩恨，請問後擺啥人敢替日本人效忠？茲代誌，日本仔攏袂使攽外外，袂使干礁「自命不凡」糊里糊塗準過日子爾。
當初決定芝山岩學堂e伊澤修二學務長，佇1896元旦e事變噹中，好運逃過劫數，無去互義軍給摋死，彼瞬伊拄好佇日本國內，咧研究教學政策。一下聽著七位老師佇元旦不幸殉難呤，艱苦坐卦是哭甲毋臹聲調。哎，壹切攏甚慢矣，我對不起樺山總督，嘛對不起伊滕博文佮明治天皇，尾溜也日本e統治地位穩定，治安有卡好勢。台灣地e日語教學，分做二款，一款是「國語學校」，後來變做日語e師範學校，培養師資，另外一款是「國語傳習所」，後來變做公學校（小學系統），1898～1903，杜聰明e二哥唸師範學校，後來任教大龍峒，杜聰明佇1903入「滬尾公學校」讀日本書叨是。
叨安呢，明治三十六年，1903年十月，杜聰明進入「滬尾公學校」讀日本書，彼年伊十一歲，前途茫茫，毋知欲按怎才好，这是真正新奇e代誌，台灣人有咧讀「私塾漢文」，毋閣叨無讀正式官方學校e經驗，咁吓凍求功名大葩尾旺廣，这無的確li，彼時老父杜日鳳才過身一年爾，厝內大細項代誌 ,攏互老母佮大兄杜生財來按算，彼个時代e人並無熱心讀日本書，認定講「讀冊是了時間爾，不事生產無卡擢啦！」1903杜家下定決心，將杜聰明送入公學校讀日本冊，这是考慮真久一再研究e重大決策，十月初，咱杜聰明小弟弟，「身不由己，糊里糊塗」送入去公學校，嘛吓凍來完成，杜日鳳e遺願安呢甡。
頭前有講過，老父杜日鳳受著滬尾國際港口e影響，受著馬偕博士e西洋影響，受著大稻埕商行e影響，尤其是黃玉階區長e智慧交換，由大日本帝國了解全世界e行情，知影日後台灣人e前途長短，決定欲將杜聰明送去讀日本書，这佇庄腳來講真正是「破天荒」e代誌，開錢閣無布目（吃力不討好），普通人叨無哩！1896杜聰明四歲e時瞬，日本兵到杜家借暗暝，也叨雙方語言袂通，險險兮為著”枕頭甚碇”e代誌衝突，互杜知影日本話e重要性，呾這嗎是人e昊年，阿本仔捍盤，台灣人袂假仙咧，彼个時代真贅代誌互汝想袂到，毋但是噯受日本教育爾，連日本兵嘛噯真遵循，真巴結，也叨壹般日本兵軍記卡好，對百姓真客氣，顛倒是抗日義軍，紀律無好，為著生活迭迭偷提物件搶劫百姓，甚至有掠囡仔來摃菸叉頭（來綁票），杜聰明佇1896，四歲e時瞬，迭迭暗時仔匿去竹林內草寮仔過暝，暗時覆佇老母尻脊py，真驚惶毋敢出聲e回憶，透早才返來厝內，囡仔痞驚人綁票，有錢人驚死，杜家認同阿本仔猴有伊e心苦病疼，叨姑不而衷安呢！
第三章 淡江美景千古醉，小竹恩師跋生死
(11)來給講到杜聰明6歲到10歲，這段做囡仔時代，是按怎渡過e，也叨做幼囝e環境，吓來影響著規氏人e仁格佮思想，这真要緊，聰明仙講叨好命囝li，食便穿燒，無咧煩惱東西安呢，下腳叨是1897～1902伊做囡仔時代e各種見識經驗，逐項磊斗(美好)，有影滬尾人叨做了有起li。
杜聰明是泉州同安人，家教嚴格，自細漢搰力勤儉，有庄腳人撲實、認真、客氣，種種優良e性格，庄頭有各種風俗，上介懷念冬至做「雞母狗仔」e風俗，上歡喜過年時仔穿新衫拜祖先，另外祖師廟大迓神大拜拜，食膳饈（唸叉操）看陣頭獅陣表演，做囡仔時歡喜wewe，有影暢甲夯袂稠，有關「冬至做雞母狗仔」，这是泉州人同安、安溪所在特別e風俗，佇冬至暝e時瞬，落霜雪凍呤，規傢人圍佇桌仔邊，無論大人，囡仔，攏用糯米、粿身粿粹，來搦出（朔造）各種動物（鴨、雞、魚、豬……）e形狀，好勢了後才閣提去炊(蒸)，倘用來拜拜，有時瞬囡仔搦了無成，逐傢笑甲婁下頦去，規間厝充滿歡喜e氣氛，搦雞母狗仔e時瞬，吓佮搓冬至圓仔（湯圓）仝齊製作，也叨材料仝款，真正心適叨著，這款風俗，佇關渡地區，猶有咧流行，近十年來外來仁口大量入來，有漸漸落坑e危機，目前過年時仔佇關渡宮有人咧賣這款雞母狗仔，做工真幼秀，關渡小學鄉土課嘛有咧做，算講「苟延殘喘」，叨著，少年時代嘛有食過，拜過了後e雞母狗仔，真碇真歹哺，噯用火烘過才好食，伊e氣味真芳安呢。（註：一般人冬至用糯米粉做湯圓，泉州人則用同樣材料同時做湯圓和雞母狗仔）
印象上深兮，叨是每年e五月十九（農曆），滬尾街崎仔頂清水祖師廟e大拜拜，佛殿桌頂祭品是排甲滇滇滇，香客人群佳繹(雍擠)是窒甲無路去，香火煙霧青更更，和尚唸經嘓嘓叫，犒軍e禮數，鐘鼓鐃鈸僬陳，氣氛嚴肅振動心靈，無外久呤，街路e陣頭遊行開始矣！各種陣頭、藝閣、公共婆、樂團、弄獅、互茲人客街頭鬧熱是徛甲寔（zat）寔寔，連茲賣物食e路邊笪仔嘛僬到，茲囡仔人是歡喜甲袂顧e，下晡佇廟埕頭前有咧搬布袋戲，咚咚彩彩，瑞氣千條，真正金光鏘鏘滾安呢，暗時e時瞬，叨辦桌請人客，魚魚肉肉是推甲叫毋敢去。燒酒甜湯是飲甲起sampu，喚拳唸歌真至揚，台灣人普通時仔儉腸筴肚，這个流擺叨好料兮盡拚出來，時候卡暗矣，街內深巷e所在，不時有飲酒醉e人大聲唸歌咧顛來顛去，來渡過上鬧熱上歡喜e一工安呢。
老父杜日鳳信佛真虔誠，對神佛拜拜真正熱心安呢，正正是標準e蕃薯仔傳統者，伊透早佮暗頭仔，燒香就廳頭天公爐，有閒e時瞬叨搰力來抄寫佛經，對佛門東西，不時嘛踴躍捐獻玉助，順續感應著佛教e慈悲，不時嘛救助茲厝邊頭尾艱苦人，茲鄰里之間真給感謝，杜夫人陳愛，三六九食菜，仝款禮佛熱忱，杜日鳳過身後，叨食長齋安呢矣！
1898，明治三十一年，北部抗日義軍不時咧出入，以大屯山脈做基地，趖來趖去真危險，嗯才杜日鳳掣著厝內大細，暫時稅厝搬來滬尾街周仔旺e大厝間遐蹛（今日清水街偎媽祖宮附近），彼年杜聰明六歲爾爾，伊頻到滬尾街呤，眼界大開，噹時仔滬尾港是即尼鬧熱，即尼繁榮，人群佳繹鏘鏘滾，三色人五色話是窒例車路，魚蝦豬肉青菜匏仔是排到規街市……，彼時基隆猶未開港，滬尾港出入占全省4分之三，仁口有六仟外人，一下看對港口去，哎喲，袂直矣！來往福州廈門e帆船規十隻，另有大阪商社e鐵船，頂頭寫大仁丸、大義丸，定期駛往香港，咧噴煙噴水，停佇淡水河e中間遐，正手爿e港尾停規排拋魚e鴨母船仔，這个時瞬海天壹色，強欲落雨e款勢，聰明仙看甲目瞎肖犮（pua4），欲醉欲茫，毋知欲怎樣才好，外口e花花世界，真正庄腳囡仔，互汝袂比憑e！
另外，徛傢無外遠e所在，叨是馬偕博士開e「偕醫館」，1900馬偕博士，真正客氣，聘請大兄杜生財，佇醫館隔壁咧教漢文，四書五經，聰明仙去尋大兄e時瞬，迭迭看著隔壁馬偕仙兮，咧給人治病malaria抑是挽嘴齒，患者真贅，規間人滇滇，聰明仔看著鬍鬚仙馬偕，踮遐咧起落，行來行去，叨囡仔人好士相（好奇）感到真奇怪，想講後日仔，我嘛做先生來醫病救苦救難，「先生啊！感恩哦！」患者扶著嘴頰一再感謝，馬偕仙佇1872來台，1901喉癌過身，伊傳教兼醫療，對北台灣影響真大。
1901，社會e秩序有卡平靜矣！舊厝北新莊e車埕遐，治安有卡定著，嘛無羅漢腳仔佮抗日義軍來卡油矣！為著節省幵銷，杜日鳳規傢人又閣搬返來，北新庄車埕，庄腳所在空氣好，繼續閣再蹛叨著，杜聰明彼時九歲，一工到暗閒仙仙，自那去尹大兄杜生財遐，參落讀「漢文私塾」，練習一寡四書五經漢文系統安呢！伊佇大兄遐讀二年漢文，1903年才去讀日本書「滬尾公學校」，有堅實e漢字基礎，學業進步神速卸卸叫安呢甡。讀私塾漢文e時瞬，有一擺老父杜日鳳掣伊去見二兄，嘛是印象深刻，杜日鳳掣杜聰明坐船到關渡媽祖廟e時瞬，改坐細台鴨母船仔，駛入基隆河，佇圓山仔遐落船，行路到保安宮，彼瞬大龍峒學校設佇廟內教育二十外个學生仔，見面了後出來，聰明仙印象真深，叨是大龍峒街路e糕餅店，物件真芳真嫷，聰明仙看甲流嘴瀾，腹堵凹凹〔音耐〕，真欣羨叨著。
(12)明治三十三年，1900年，杜聰明八歲，老母陳氏掣伊坐船去拜訪大稻埕黃玉階e旅行，是伊壹生噹中上介難忘e代誌，伊看著淡水河（淡水江）景緻磊斗，醉甲吓茫去，伊看著船棺哀樂滿江面，寸腸哭斷入觀音山，伊看著關渡峽口，獅仔頭江水青更更，伊看著大稻埕樓仔厝規排整齊，壯觀閣鬧熱，伊佇好業人黃玉階區長e菜堂，閉su歹勢袂慣習，當場吵欲返來……，唉！囡仔人叨是囡仔人！
「呾聰明仔啊！明仔載早起，阿母欲掣汝來大稻埕拜訪黃玉階區長，囡仔人噯乖卡咧，對人噯有禮數咧，知影否？卡早去睏咧，明仔早起欲坐火船到市內，真好耍呢！」叨安呢，過返工早起，老母陳氏，掣著杜聰明「小朋友」，紮一寡咱茲滬尾山頂e土產，欲送互區長黃玉階，逐傢好朋友跋感情，順續去給伊自家菜堂e看看咧，去給燒一束香，宛那袂醜啦！各位看倌啊，這位黃玉階，雖然是區長，毋閣毋是民選e，伊是日本仔猴指定e，利用伊人面闊萬項客氣，來遙控台灣人，監視台灣人安呢，這款「卸用」佇日本時代外來政權e統治以上，真正有需要安呢，毋閣杜日鳳熟似黃玉階，是早期買賣茶咪生理摯接來兮，二人攏真正信仰佛教，也叨宗教e關係，二人要做「生死莫逆之交」，有錢人袂激一个屈勢，宛那互日鳳仔感恩在心。
滬尾欲駛去大稻埕e碼頭，佇現時媽祖宮菜市仔身邊，三月初陳氏掣聰明仙坐船，沿淡水河到大稻埕，攏總二十公里，行船拍算一點鐘e腳兜仔，聰明仙到碼頭e時瞬，看著海天壹色，心情真正歡樂，對面觀音山，壯觀磊斗，海口遐有一陣水鴨飛過去，詩情畫意，碼頭邊菜市仔，嘛有人咧大聲喚喊，感到真奇巧，這台火船仔，透滬尾到大稻埕，票價一角銀，一工三迣，这是1900年三月初e代誌，聰明仙才八歲囡仔痞爾爾，壹切真稀奇。
船仔坐二十外个人客，慢慢來駛離滬尾港，哎！滬尾e港面真闊，江墘仔停真贅帆船，江中心停几落台鐵殼船，大部份大阪商社，彼時港水卡深，真贅船吓使入關渡佮大稻埕。呾這嗎船駛入關渡，台北這个內陸港路，這个時瞬，觀音山，大大仙裁佇面頭前，真正壯觀，漢草磊斗，來來去去e船隻袂尐，規條港路鬧熱滾滾，不止也心通，这佮長年佇山頂徛起完全無仝，囡仔人真有感受叨著。
無外久，船駛到高厝坑附近（今捷運紅樹林站），看著一大遍e紅樹林，有真贅白令絲佇湳塗咧討食，飛來飛去真好耍，聰明仙看著水湧拍著船邊仔，啪啪水聲濺起水珠仔，船身晃來晃去，聰明仙看前瞻後，別有一番e滋味，無外久，仝船旅客，有一位號做「福伯仔」e生理人，大聲喚喊，咧給仝船e旅客，解說咱淡水河（江）e沿路風景，這位福伯仔，歲頭五十桶，紅膏赤Ci，滿面笑神，人肥肥福相款，真正「福」伯仔做了有起，真有親切感，伊咧喚喊解釋，逐傢聽甲耳空搕搕〔kap5〕，各位看倌，逗底咱淡水河沿路有啥奇景？
「呾眾位咱茲鄉親嗣大，食飽未，逐傢閤家平安萬事如意，小弟號作福伯仔，厝e有做寡毋臹生理，不時佇滬尾佮大稻埕中間咧行踏，對咱淡水河沿路e民俗景色，有淡薄也了解，今仔日逐傢有緣坐仝船，小弟大膽來給各位嗣大，紹介咱淡水河沿路景色，逐傢叨毋倘棄嫌呢？淡水河（江）有七个景色，燃眉恁攏看吓著，攏吓親身體驗著」。
「大多數來滬尾，是欲來看「淡水落日，彩霞滿天」，这是一般人客，这免坐船仔，踮滬尾街仔暗頭仔叨看吓著，另外一款叨是噯坐船仔才看吓好勢，我普普也給按算，有七个景緻e款，呾這嗎船行到烏山仔頭(目前八里渡船頭)矣，恁給瞻le，第壹景到矣，無外遠e所在，有真贅鴨母船仔（舢板）咧拋魚，一pa一pa魚網仔咧拋咧攽，「此起彼落，美不勝收」，袂輸咧攽煙火仝款，真正是「觀音山前拋魚硬斗，點點滴滴盡磅逗搭」，彼个時代，淡水河卡清氣，出產真贅黃魚（油魚），景py，成仔丁，花身仔（嘓嘓叫），豆仔魚，一陣一陣發了真厚，有時一網落去，互汝qiu甲叫毋敢！」
「呾這嗎船仔駛到竹圍仔土地公鼻遐（今基督學院山腳下），有第二景矣，汝給看頭前e奇景，號做「橫船倒退嚕，世間干礁茲有爾」，这是世界獨壹方式e捕撈技術，干礁台灣人吓曉利用爾爾，伊是利用淡水河e「漲潮」佮「退潮」原理（滇水佮礁水），將鴨母船仔，坦橫囥江面，船e頭尾各別縛鐵耙仔，流水漲退時（船仔嘛吓進退），安呢吓帶動船下腳e鐵耙仔，逶江塗下腳e花蛤仔（小型蛤蜊，約黃豆大）給kat起來，續落e瞬呤，集中了後賣互關渡飼鴨戶，鴨母一嘴一粒，飼甲肥律律，所甡e鴨卵全省出名li，這項技術全世界獨壹方式，連日本仔猴初來滬尾e時瞬，嘛大嘴開hahaa，感覺真正奇卡安呢！」
這項”橫船倒退嚕掠花蛤仔”e技術，噯有三項條件配合才有意思，抑無 ,猴叨免弄矣！第壹，關渡水域是新店溪e汫水佮滬尾海水e混合體，算講半鹹半汫才有大量花蛤仔大量發生e生態，來節省成本。第二，必須有關渡狹厄e關口，才有明顯e漲潮退潮力量。第三，必須是農業社會才有效，（工業社會鐵拚不過大量生產的雞蛋），這項特殊技能佇1965以後完全滅絕，也叨關渡峽口拓寬失效，海水倒灌致使潮汐力量減弱，閣再叨是淡水河工業廢水污染嚴重，鴨寮總滅，真正無法度叨是無法度，毋閣這項特殊e台灣人漁撈技術，佇民國90年左右，士林劍潭三腳渡碼頭祭典時，有重新展示船形裝備，小弟有留落來大量相片佮資料，算講袂絕種叨著。
「呾各位親愛e鄉親嗣大，咱這嗎船行到蛇仔形( 目前關渡大橋附近)附近矣！恁耳空挖（ya4）互伊銳，是毋是有聽著江面傳來一瞬悲涼e哀樂？無外久呤，這陣樂愈來愈大聲，「饒鈸齊鳴，暗鑼（衷事用）吭吭」，小吹e哀樂之奏甲真叉操，中間夾著孝男孝女e哭聲，一下給看，哎喲，有三隻船仔駛來，一隻載棺木，一隻載司公樂隊，一隻載孝男家屬，尹是逶大稻埕、艋甲彼角勢e喪家，載著先仁，逶蛇仔形就陸（今龍形站），扛去觀音山長眠千古，这叨是咱今仔日欲看e第三景「垂屑扶孝船棺緊，哀樂鏗鏘滿江面」。
各位好朋友，咱過年時仔去關渡廟拜拜e時瞬，過磅空（古佛洞）到廟後江邊仔e時瞬，吓看著規粒觀音山去夅挖修真徹底，簡那臭頭山咧，汝吓使想到這一百年以來，大台北e亡靈死者，利用淡水河e水路葬身觀音山，真正「盛況空前，無予倫比」有影li。致使講晚清民初這段時間，關渡漁民抑是大稻埕e船隻，不時嘛佇江面就著「鐃鈸小吹」，一瞬哀樂，孝男者聲送棺船e場面，互平靜e江面加添真贅氣氛安呢，有時拄著大日子，一工幾落工嘛無希罕，關渡人有咧喊〔han4〕，規模上大，印象上深e江面哀樂，是民國初年e「華…茶莊」有好業人有幼囝夭壽去，船隊逶大稻埕落觀音山時，哀樂奏天，人群佳繹，規e江面鬧熱滾滾，極盡哀榮叨著，大概講起來，淡水河有潮汐e力量，利用潮汐來行船，棺船雖重，依自然力叨吓到位，免外贅力叨著。
「各位，船閣再向前，頭前叨是關渡峽口，出名一「關渡三色分潮」e所在，逶新店溪、大科崁溪(板橋大漢溪)一路落來e汫水，佮逶滬尾e海水鹹水，佇這个真阨e關渡峽口肖激肖磅，造成茲e水文生態半鹹汫，生態真正活潑，伊e蛤仔，逶0.2 gram e花蛤仔到200g e浮卵，相差一仟倍，有影互人吓著驚安呢甡，各位若是逶獅子頭，抑是浮線仔看過關渡廟，叨吓看著「關江三潮分色」自古叨是北台勝景，这叨無顛誕li……」，以上算是咱淡水河e第四景，毋閣1964年拓寬關渡峽口了後，這个景色叨無去矣！伊為著葛樂禮風颱，拓寬失敗叨著。
「呾淡水河e第五景叨是關渡媽祖宮佮後壁e菜堂慈航寺，關渡宮伏祀媽祖婆，伊坐位佇新店溪、基隆河、淡水河三條江流e三角窗，佇古早以水路運輸占多數來講，地位真正要緊，袂輸這嗎e台北車頭，關渡宮e歷史真悠久，背山倚水，風景嘛真磊斗，伊e身邊是「三將軍廟」，紀念鄭成功e三位部將，香火嘛旺叨是。關渡宮e後壁山叨是「菜堂兮」，叫慈航寺，規山全全烏樹林，「古木參天」攏十外丈安呢，散步行踏，感到陰森暗暗，驚驚耽耽〔dam4〕也，中間夾一間菜堂，烏金烏金，有百外年e歷史，內底攏是菜姑，菜堂透早四點外叨做早課也，唸經聲濫落木魚鐘鼓，嘓嘓鏘鏘，尤其下冬昊仔，烏陰烏陰，雨白仔頓點頓點真正青冷，菜姑綰一壺燒茶，厝內茶煙香煙，外口下腳叨是淡水河江面，拋魚船仔來來去去，對面叨是觀音山，遠遠e所在叨是滬尾港口，船影噴噴也，霧霧也搪咧沈吟欣賞中間，洶洶一聲鴨母咻喚聲，「ga2 ga2-ga2」拍破早起e肅靜……。」
有關關渡宮後山e菜堂「慈航寺」，小弟（筆者）細漢讀小學e時瞬，（1955～1960）迭迭去遐憩陶，內底有真贅蓮霧樹佮柚仔樹，有去「偷挽」過印象臹深，菜堂舊maumau，古樸有氣氛，1964了後拓寬關渡峽口，慈航寺搬去北投區中和街，歷史古跡自那消身去矣！
「淡水河e第六景叨是「關渡鴨寮」佮「冬尾昊e水鴨陣討食」，二項攏是鴨，毋閣來源無仝，这是咱關渡地界e福氣，咱關渡所在，也叨出產「花蛤仔」e關係，即百姓大量飼鴨母來甡鴨母卵，利純真好，致使講關渡塭田，淡水河沿岸，各圳溝身邊，攏砌真贅e鴨寮仔，砌甲密周周，所以佇關渡旅行，行踏e時瞬，不時嘛聽著「ga2-ga2……」e鴨母聲，飼鴨母e風俗連綿後續百外年，落尾也佇1965年左右，由社會變遷佮江水污染遂來滅絕，真正拍隕安呢，現主時關渡廟風景區e笪仔位，有真贅咧賣鹹鴨卵，雖然毋是本地出產e，毋閣吓使回憶這百外冬e鴨寮風俗，宛那袂醜啦！另外一項叨是，「冬尾流擺，有大批水鴨（雁）佮鳥隻，逶北方來過冬討食e情景，宛那值得逐傢來欣賞叨著，叨頻若北風sngsng叫，落冬尾雨白仔，昊時反經，倚過年時仔彼暫仔，叨有真贅水鴨佮鳥隻，逶日本、西伯利亞、飛落來咱台灣匿寒叨著，真正好看心適安呢甡（這嗎叫「關渡水鳥保護區」）。
e瞬呤，這台船繼續駛，經浮線仔（今中國海專附近），社仔，無外久叨這欲到盡磅（終點）矣，福伯仔有咧講。「呾淡水河，這段應該叫新店溪卡妥當，大稻埕鬧熱滾滾，遐有一排一排e樓仔厝，有阿啄仔e外商，真贅好業人，大官虎攏蹛佇遐，嘛有真贅官廳e機關，逐傢搌開目睭給影一下，碼頭佮街厝攏真嫷安呢！
陳愛氏掣著杜聰明落船了後，行入去中北街（今迪化街、民生西路口）黃玉階區長e公館，黃玉階佮杜日鳳是十外年e好朋友，厝內真曠闊，廟間內內外外攏真好勢，玉階仙禮佛虔誠，又閣佇後尾e所在，專門設一間佛堂，日夜伏祀觀音媽安呢甡，杜聰明一下入黃玉階公館呤，早有專人按內招待，尹送互黃家一寡滬尾土產，玉階仙真親切來摯接，玉階仙壹直謳咾聰明仙真壯才，大漢了後前途無限，真正福祿壽三全，光宗耀祖大葩尾旺廣安呢，聰明仙彼瞬才八歲爾爾，去仈人兜袂慣習，壹直吵欲返來，互陳愛氏真歹勢安呢！奚是1900、明治三十三年e代誌。( 以上內容見 杜聰明回憶錄)
(13)1901，明治三十四年，杜聰明返去北新庄仔讀漢文私墊，尹大兄杜生財負責教學，有二十个學生安呢，逐工「之乎者也」讀遐四書五經「歹銅舊錫」，翻返年1902，老父杜日鳳破病過身，毋閣進前杜日鳳知影滬尾佮大稻埕世界性e文明，亦交陪馬階黃玉階這款重要e仁物，早著按算欲送杜聰明去讀日本書，來求功名安呢甡，事後證明杜日鳳這項決定是真正正確e，杜聰明踏著機會，茫茫渺渺，無張無弛去夆人拺入去世界e出名人，杜家名聲至揚百外年，日鳳仙若地下有知，是著吓感到真光彩真至揚安呢！
叨安呢，杜聰明佇1903年十月尾，進入「滬尾公學校」讀日本書，彼年伊十一歲，有二年漢文基礎，已經捌仟外字叨是，宛那袂漏喟啦！这是伊e運命，閃嘛閃袂離，規氏人注定欲佮日本人跋撋，財源名聲，攏噯偎日本人日本話來牽成，港ga潦落去以上，叨拚逗底矣！吓成袂成真正有進無退，忖死忖活，拂落去！鏘落去！拚落去！咧驚啥魍？含心敆命佮伊ket，昊內無崁嘛噯陌去！彼个時代，台灣人讀私塾漢文爾，叨無讀公家學校e經驗，是欲哪收山攬尾叨好！囡仔人戇戇倯倯，嗣大人叫汝去讀汝叨去，嘛無法度哩！彼个散赤e年代，讀書是「了時間爾，無法度生產趁食」，普通人嘛冷冷矣，所以講杜聰明去讀日本書，宛那有風險呢！
1903年十月，日本人已經來台灣地八年外矣！統治權在在在malaria瘧疾嘛控制好勢，社會治安有卡定著矣！佇文化方面日本人儘量來荼神經，台灣人嘛去夆騙甲耳空搕搕搕〔kap〕，佇「暝日宣傳，竄筋入骨」以上，台灣風俗自尊，漸漸落坑，認定日本文化，卡優秀，日本神嘛卡高尚，社會壹切壹切「崇日」叨著，致使講咱聰明欲去讀日本書e進前一工，尹老母佮兄哥規傢人，掣伊去圓山仔神社拜拜，祈求阿本仔天照大神，吓使來保佑聰明仙教讀書安呢，這款代誌袂輸這嗎e人，囡仔欲讀冊，叨先掣伊去拜孔子公抑是文昌帝君安呢甡。
彼時淡水線e火車已經通車矣，杜聰明佮老母、二兄，先到滬尾街仔，才坐車到圓山站，落車了後，行路到神社拜拜（今圓山大飯店），神社依山傍水風景真嫷，互人看落吓醉吓茫，聰明仙才十歲囡仔爾，感覺氣氛偉大屈勢真猛，真正大日本帝國真宏真神真聖，台灣人簡那勾蟻痞，有機會來扶阿本仔做嗣大，真正「三生有幸」，暢甲叫毋敢去，有影！
返來了後，第貳工叨進入「滬尾公學校」讀日本書，伊佇學校附近，有來稅厝（租房子）蹛，進前一暗，老母佮大兄有來給交待，叫伊噯認真讀書，來安慰老父在天之靈。
「聰明啊！這嗎欲給汝送入去公學校，讀日本冊，映望後日仔大漢，做一个社會e仁材，佇學校所在，對先生，同窗兮，攏噯真有禮數，噯互相逗三仜安呢，毋倘互厝內煩惱呢！」
「知影啦！我亦袂細漢矣，吓曉家己來料理家己，呾嗣大人佐汝勿想赫贅，我定著吓盡心拍拚叨是！」
「老父在世e時瞬，壹直乙著汝讀書，做有學問e人，汝噯有志氣毋倘失志安呢！」「知啦！我吓事事認真拍拚啦！」
叨明治三十六年，1903十月尾，杜聰明行入去「滬尾公學校」，第壹工上課，日本先生穿烏衫，真有威嚴，講日本話，聰明仙感到真稀奇，毋閣杜聰明頭殼真巧，免一月日呤，叨吓曉講佮聽有日本話，厝內大細攏真正歡喜叨著，尹這年級攏總有58名學生，毋閣卒業時才19个學生，查甫16，查某3个，逶1903～1909，攏總讀六年赫尼久，校長迫田茂，高鏘大漢，留有二撇嘴鬚，真有威嚴安呢甡, 做四年了後，調去台北太平公學校，換小竹德吉做校長，杜聰明這六年中間，除了第壹學期第貳名以外，攏總是第壹名，引起學校方面e注意，閣卡講，一个庄腳囡仔吓使出頭昊，摃倒街裡人，宛那無簡單，算起來杜家欲求功名，這聲有望矣，杜日鳳地下有知嘛真歡喜叨著。
杜聰明讀小學，有七款課程「國語、算術、修身、漢文、音樂、體育、手工」，佇一百年前咧讀小學，佮現主時有一寡無仝款(一)課程有「日語 」佮「漢文」，算講外來政權殖民統治對中國文化，宛那有尊重。(二)學生上課，壹律「留著髮辮」，對清國風俗有所尊重，聽兮講这是乃本希典總督留落來e”恩典”，杜聰明壹直到醫學校貳年級才剃去頭鬃尾。(三)上課時瞬用毛筆寫，所以噯磨墨。(四)入學年齡偏大，約10～15歲。(五)全面日語化，學生管理足嚴e。(六)滬尾公學校為模範學校、樣本學校，教學e壓力真大。(七)卒業（畢業）率足低e，干礁三分之一，杜聰明入學58人，到卒業才19人爾爾，这表示中間有大部份e人無法讀落去，無「義務教育」e架勢。
讀公學校（小學）彼个時代，以1905年為標準，規个國際情勢，有三點真正要緊安呢。(一)日俄戰爭，日本戰贏，雖然犧牲重大，贏了無嫷喟，毋閣互日本連肖續甲午戰爭，併吞朝鮮、日俄戰爭，日本人自命不凡，失去控制，漸漸行入軍國主義，壹直到貳次大戰，佮美軍肖扑才踢著鐵枋，已經袂赴矣！(二)這年，瑞士e「一石先生」Einstein發表相對論，影響後世真正重大，有人講1905發表物理相對論，致使1945廣島長崎原子彈爆炸，事實上毋是安呢甡，相對論干礁說明「真尐e質量，吓使轉換成真贅e能量」，並無說明「原子核分裂抑是融合，吓使做原子彈」，原子彈吓爆炸，主要e關鍵是「中子」e發現，1939發現中子了後，真緊1945原子彈叨成功矣，佇愛因斯坦時代，干礁零星e放射線現象爾爾，這方面e智識真尐，日本人佇這方面e科技，輸人甚贅，結局失敗。(三)毋閣，佇另外一方面日本人這个時瞬，全力發展飛機工業佮大馬力e船艦，真正成功叨著，互日本人有法度捸著美國、德國e科學水準，有資格來扑第一佮第二次世界大戰，拂甲金光鏘鏘滾，吓使講人類歷史上大e奇跡安呢！
另外佇島內方面，日本人佇後藤新平民政長官，真拍拚來經營以上，進步真緊，伊控制malaria瘧疾，互台灣e死亡率下降，1908南北鐵路完成，互本來十工e路程，縮短到八點鐘爾爾，另外台員島財政收支已經平衡矣，毋免閣用著日本母國支出，佇教育方面、戶政方面、銀行方面、法院、病院，攏有真大e進步，叨逐傢看現現li，為著控制台灣人，採取嚴厲e警察制度，治安卡好，百姓卡欲拍拚，規粒台灣島，除了無民主政治（政黨、議會、傳播媒體），其他宛那袂嫌e啦！
杜聰明讀小學（公學校）e時瞬，有回憶著三項代誌，佇三年級e時瞬：為著慶祝「日露戰爭」e勝利，暗時仔有「提燈晚會」，略略也有感受著政治e影響，嘛順續給台灣人展寶，汝看，阿本仔即強，扑清國、扑蘇聯，併吞朝鮮，恁毋倘假仙呢？五年級e時瞬，坐火車去新竹旅行，返來e時瞬，行二工路，叨囡仔時代真新鮮真奇巧安呢，六年級e時瞬去彰化憩陶，嘛順續去台中公園行行e，台中市是日本人一手造成e新都市（古早是彰化市上鬧熱），市容清氣、道路真闊，樓仔厝氣勢贊，厝殼門面光彩影目，真正金光鏘鏘滾咧框金絢呢！袂輸台北e城內安呢，佇1909年這个年代，離日本人占台灣叨已經十五年矣，台灣e經濟力吓使「自給自足」，建設卡有錢額，免閣再倚日本母國e幫贊叨著。
(14)1907年，滬尾公學校e校長迫田茂，外調到台北太平公學校去，換來新e校長叫小竹德吉，是一位品德高尚e仁格者，伊治學認真，愛護學生，領導老師，「處處以身作則」，操勞拍拚，互咱滬尾公學校，變做全台灣e模範者，真出名叨著。這位小竹校長，嘛才三十二歲爾爾，馬上了解「滬尾公學校」e種種資料，彼時瞬本校已經有五屆e畢業生，佇社會上攏得著真好e地位，尹知影吓曉講日本話，看日本文，毋但是佮官廳兮交關真利便逗搭事事順序，嘛吓使了解全世界e資訊，佮做生理e技術，吓使講這陣讀書人是社會e「中堅份仔」，尹控制著社會e經濟、文化、政治、權利，規个國家e前途安呢甡，日本外來政權e統治，有伊強勢e一面，汝台灣人做腳架仔，著是無甡張，噯看人e面尺來食穿徛起，袂輸新媳仔丹（simbua）咧，也遂毋知也講(難道不知道嗎)，这是人e昊年安呢，欲求功名，叨乖乖也捸( due/de)阿本仔叨著啦！
小竹德吉調來「滬尾公學校」做校長e時瞬，杜聰明拄好欲升五年級，聰明仙最後二年e小學生涯，影響伊規氏人e仁格甡張，做人做事，真正是特殊無簡單，聰明仙前四年e成績，壹直是全班第壹名，小竹校長稍寡有風聲著，等到小竹校長見著聰明仙了後，印象真好，認定伊是一位真好e學生，後日仔絕對大葩尾旺廣，嗯才決意全欲給培養安呢，彼瞬滬尾公學校，是全台灣e模範學校，杜聰明日後若大尾，我小竹校長嘛真有面子安呢，叨「先生緣，主人福」，互相尊循真歡喜li，事後證明，小竹校長真正有「先見之明」，聰明仙全班五十人第壹名無希罕，伊佇二年後全省聯合考試，四百七十人考第壹名，才是「轟動武林、驚動萬教」，伊醫學校卒業（畢業）e時瞬又閣第壹名，（就台致詞謝師恩），才是互人謳咾搭底，毋閣這个時瞬小竹已經無置e矣！哎？短短幾年世事變遷，人e運命真正互汝袂講e，这是後話。
呾e瞬呤，1907秋天小竹校長，頭一擺接見聰明仙呤，叨大大驚一趒，聰明仙雖然「細粒籽」，（个頭小）面皮烏仙烏仙，毋閣雙眼「烱烱有神」，嘴角意志堅定，穿插清氣撇紮，做代誌負責認真模樣壯才，尤其是日本話真敖講，講到溜溜鑽，卸卸叫，比日本囡仔卡敖講，嗯才e瞬，小竹決心欲全力培養聰明仔，伊給聰明仙講，欲全力給幫忙，若無肖棄嫌以上，叫杜聰明搬來校長公館，佮伊蹛做伙，一方面料理一寡雜叉仔（家中雜事），一方面小竹校長欲「御駕親征」，暝日給教育，給牽教，有看倘二年後考稠醫學校否？這塊寶石仔，無雕刻叨真拍隕安呢甡。
杜聰明彼年十五歲，一下聽著小竹校長欲給全力栽培e好意呤，真正歡喜，真正欲拄著貴仁，一氏人叨無幾擺呢！返厝了後，老母佮大兄嘛真歡喜，全力支持叨著，人客啊！世間e學校，校長欲佮學生蹛做伙牽教，真正無簡單，這款戲劇性e變化，真正互人看無li，壹般來講，做校長e人「日理萬機」無閒莿莿，欲哪有奚米國時間去管仈人代誌，另外佇學生這爿，嘛是真驚校長e威嚴，疲疲搐是欲哪蹛逗陣啦？
無外久呤，杜聰明搬入來小竹校長e宿舍蹛，小竹是獨身仔，伊真正信任聰明仔，伊提錢互聰明仙，囡仔人叨吓買菜、煮菜、料理厝內大大細項e家務叨著。聰明仙真礁肘〔dadiu64精明〕，真搰力真玲利，逶家內事整理甲光光整整，互小竹校長真給謳咾，佇茲日常生活，小竹校長教伊做人e道理，認真、客氣、忍耐……，嘛教伊日本料理佮幼秀e日本藝術，杜聰明暝日接觸。吓使講半粒日本，攏擠兮伊e頭腦中間，不時咧踅來踅去e，簡那唗馬仔燈仝款，茲點點滴滴e經驗，佮日後伊佮其他日本人交陪e時瞬，真正盡磅逗搭，互汝官運亨通，有真大真贅e幫贊叨著。
小竹校長真疼惜聰明仙，暗時仔嘛仝睏一領蚊罩，二人講話生活，袂輸父囝仝款，佇另外一方面杜聰明嘛講一寡咱台灣人e風俗習慣，尤其是五月十九迓祖師公，鬧熱拜拜e代誌，小竹嘛能甲真心適叨著，佇教學方面，小竹真正嚴格認真。伊提真贅算術題目，親身教聰明仙，又閣揀一寡文章書讀，互聰明仙暗唸背誦，聰明仙頭殼真巧，攏讀甲真好勢，經過一年半e”推”e”矯”，杜聰明進步神速，欲考醫學校應該問題，仈人無這个機會叨是，佇杜聰明前進，滬尾公學校猶無人考稠醫學校，致使講小竹寄望真深。
一年半了後，徛1909年初，小竹校長返去日本娶嫫，返來了後，聰明仙搪咧準備”醫學校e聯合考試”，佇真正無閒e時瞬，嘛迭迭去拜訪小竹校長，算講感情真好叨著，毋閣真不幸，佇這个時瞬，小竹身患haivio「肺結核病」，迭迭咳嗽有時呸血，有時好，有時醜，這款病彼時算絕症，無啥乜好藥，另外，為著驚汙(e4/ue4)著，差不多好朋友攏無來往，佮癩膏病（麻瘋）仝款，嗯才e瞬呤，杜聰明「就戰場」考醫學校e時瞬，小竹恩師並無送行，干礁心中祝福爾爾。
叨安呢，小竹e病情，時好時醜，1909四月，杜聰明考稠總督府醫學校，彼時小竹校長「臥病在床」，一下聽著杜聰明好消息呤，真正歡喜，哎！真正看有着人，這二年e拍拚真正有著縫著時，而且閣考第壹名，狀元呢！連我这做老師兮，嘛真有光彩，汝給看公學校一班四、五十人考第壹名無稀罕，毋閣醫學校入學考，全省上優秀者四、五佰人欲考狀元，有影是臹硬斗叨著，莫怪小竹尪仔嫫，是歡喜甲袂顧了了，翻返年，明治四十三年，小竹校長互總督府派去福建廈門旭瀛書院做院長，所在卡遠 ,叨干礁靠書信來往爾。
大正二年，1913年初，小竹病情夯重，送回台灣治療，彼个時瞬聰明仙 ,已經醫學校四年級矣，不時嘛去病院，探視慰問小竹恩師，恩師唅著目屑「哎！人e運命歹講，我不幸dai4著這款病，拖累親友真正歹勢，尤其我e傢後清水小姐，一氏人捸我艱苦，有影目屑be袂離，若有緣份，來世當做牛做馬來報答，聰明啊！汝是一个仁材，考稠醫學校狀元，我真歡喜，又閣做人正直清標，我這在人無遺憾矣……。」哎！天公伯仔欲創治咱，命運e安排真正互汝袂鐵齒e，小竹日日咳血，漸漸摯節袂稠，不幸佇1913十月二十六上午逝世，佇他鄉外里台灣所在吐出最後一喟，享年三十八。先生娘清水子佮聰明陪伴身軀邊，聰明仙一時擋袂稠，斡去病院後尾仔，放聲大嚎，彼瞬伊21歲，吊遠頂回老父杜日鳳做喪事，拄好十年桶，哎！仁生啊仁生！
也叨傳染病e關係，馬上屍體噯火化，杜聰明毋驚危險，毋驚繁重e課業壓力，佇過身彼工十月二十六e暗暝，規暗守靈，睏佇小竹恩師靈堂e隔壁，這暝聰明仙實在是睏袂去，一幕又閣一幕e往事，象唗馬仔燈館款，佇目前閃過，哎！嘛才五、六冬爾爾，叨來過身去，真正想袂到啊！「世事無常，法輪常轉」又闊想起老父杜日鳳在世時瞬，種種佛教思想，因果報應，種種代誌，過返工呤，用柴油焚化，聰明仙跪佇薄棺面前，目屑遴遴擱，人e運命歹講，病魔e摧殘，真正無伊法度，心肝內有按算，絕對欲含心敆命來支援恩師e傢後，佮三个幼囝以報答伊在天之靈安呢！
半年了後，1914四月，杜聰明自總督府醫學校卒業（畢業），伊是仝年級總成績第壹名（註：考入去時，四佰外人嘛是第壹名），伊代表畢業生就台「致師恩答辭」，真正光榮叨著，嘛得著台北州e佐藤州長獎祝賀，吓使講，人生志揚出頭昊，是擎甲夯袂稠安呢甡，毋閣伊閣卡志揚來講，宛那掩坎袂稠，小竹恩師謝世e打擊，禮拜時仔，挑工返去滬尾公學校，行到舊時小竹校長e宿舍面頭前，一幕閣一幕e往事，又閣佇眼前閃過，聰明仙真正甜蜜，亦真正感傷，目眶紅紅喉脘僬滇。「恩師啊！汝毋是講咱滬尾公學校，無人考稠醫學校是毋？哎！免驚！聰明仔考稠第壹名，畢業嘛第壹，先生啊！汝笑一下，汝噯歡喜呢！……」人客啊！仁生小學時代e感情，是上純真上無「心機」，逐傢友情上原竄筋入骨威威鑽！聰明仙食到94歲，最後e仁生對小學時代嘛是真感慨哩！
雖然小竹校長佇38歲過身台灣地，毋閣先生娘清水子e歲壽真長佮聰明仙真正有拚，尾溜也先生娘掣三个囝兒返去日本東京辛苦趁錢來教育下一代，發揮日本婦女優良傳統美德，小竹恩師過身佇1913年，四十二年了後1955，聰明仙又閣佇日本前橋市佮伊見面，真正感慨，1963又閣佇奈良見面彼時伊78歲矣，到1975猶蹛佇熊谷市，彼年九十歲矣，歲頭佮咱聰明仙有拚li，杜聰明吓去接著六十年前囡仔時代恩情仁e批信，真正奇巧叨著。
第四章 醫學校有幸考稠狀元
北投石岡本大公無私
(15)明治42年，西元1909四月，杜聰明考稠總督府醫學校，呾這棚戲叨幵始搬矣，伊一氏人e道德文章，榮華富貴，規百年以來e名聲，攏逶茲起步，人講「紅柿好食，逶佗起蒂」，醫學校造就聰明仙e名聲，所以咱噯略略也了解，佇彼个時代，伊e醫學教育背景，佮咱e看法有啥乜無仝款否？
(一)彼个時代，1922伊得著京都帝大醫學博士e頭銜，雖然是真偉大，毋閣毋是絕對e，聰明仙運氣真好，踏著時機搶著頭香，有影時機若到，閃叨閃袂離，人講，先占先贏，卡袂叫阿俍(nia2)，汝給看，尹全班感情上好e郭東周，嘛是得著慶應大學e醫學博士學位，毋閣干礁慢一時仔呤，叨增差去矣！哎，有影拍隕li，另外聰明仙e學長王受祿（台南人），嘛佇三年了後，提著德國法蘭克福e醫學博士，學問袂醜，咱聰明仙搶先一步，而且伊e壽命真長，食到九十外，佮阿本仔逗甲峇峇峇，互阿本仔致蔭著e。
(二)日本人佔台灣初期，衛生真醜，絕對噯推廣衛生教育，來保護百姓e健康，台北所在比台南慢開發二佰外年，主要是因為溼氣重，熱病贅，尤其是malaria瘧疾，死亡率真驚人，日本佔領台灣，有三萬五千个兵員入來，佮義軍戰爭，死亡才一百外人，毋閣著malaria死五千外人，連總司令北川叨死去，「秘不發喪」互日本仔臹無面子，另外1895三月進攻澎湖時瞬，派兵六千人，死佇霍亂一仟三佰人，有影梟悻，其他齧鼠仔病、天花……攏真要緊，所以總督府方面，絕對噯趕緊培養在地e台灣醫生，吓曉講台灣話e醫師（先生），抑無日本統治台灣叨無意思矣！這个代誌真緊急，簡那咧燒倒頭香咧！
(三)阿本仔統治台灣第三年，1897設立總督府醫學校，理論上應該有真贅人來讀，來求功名才著，毋閣事實上初期前一、二屆，招無學生來讀，互阿本仔真傷腦筋，想講，台灣人哪吓安呢，真正頭殼摩兮燒，毋知欲按怎才好，阿本仔姑不而衷以上，設立真贅獎勵e辦法，鼓勵咱茲蕃薯仔，多多來給捧場，贈送生活費、雜費、衣物鞋，算講「公費生」叨著，頭一屆招無學生，去「掠」大稻埕區長黃玉階e小弟黃瑤琨來「讀」，黃玉階進茲有講過，是大稻埕e好業人，嘛是中醫師，信仰佛教真虔誠，佮杜日鳳私交真好，杜聰明做囡仔e時瞬，嘛逶滬尾坐船去黃公館拜訪，日本人來台後，「一時風一時草」，黃玉階趕緊倚日本人，伊身為「區長」受著阿本仔e信任安呢，呾醫學校初設立，尋無學生，黃玉階受「皇恩浩蕩」，自那推銷尹小弟去讀，順續一月日有十五圓e生活費倘領，1902黃瑤琨卒業矣，攏總三个人，第二屆才一个人呤，到第三屆e時瞬，1904年叨有十个人卒業矣，這十个醫生到社會了後，有e趁大錢，有e做大官，前途真好，社會地位真好，致做講尾溜仔情勢倒翮，考醫學校真困難矣，到杜聰明時瞬（13屆），每年有五、六佰人考試，錄取四十名爾爾，真正硬斗，莫怪滬尾公學校校長小竹德吉，怨嘆講學校壹直考無醫學校，才全力來培養聰明仙哩！
(四)彼時瞬流行「中醫」佮「拜神符仔路」，社會低層仁士，並無法度來享受現代化醫學e方便，甚至講中醫卡純卡溫和，無西醫e副作用，也叨「民智未開」，欲推展「西醫，是有一寡困難置e，这佮民族性，佮全民教育有關係，事實上西醫用優秀e物理、化學、解剖……種種技術，已經毋是中醫，干礁「把脈」有法解決，杜聰明彼時已經有X光透視，干礁這項中醫叨輸入忝忝。
(五)彼時1909e醫學制度佮目前2006無仝款，杜聰明e「醫學校」，五年制，小學生去考，差不多現主時e「五專」仝款，致使講課程卡簡單，目前是「醫學院」醫科，七年制，高中畢業出去考，課程複雜硬斗，相差十萬八千里安呢，这是因為這嗎科學甚發達，做一个醫生人定著噯讀足贅先進e智識安呢！所以講杜聰明有博士，並無學士、碩士，彼个時代，無論郭東周、王受祿攏是仝款，杜聰明1921叨提著博士，毋閣台北帝大到1936才成立，真正「袂赴」提學士矣！另外杜博士是「醫學博士」彼時e醫學包含藥學、內科、公共衛生，範圍卡闊叨是。
(16)對杜聰明家族來講，1909杜聰明壹定噯去考醫學校，这是在熚熚〔biak5〕無法度e代誌，杜家e衰韶興旺，盡看嘛看聰明仙爾爾，这是杜家二代介映望e代誌，這嗎杜日鳳已經仙逝矣！聰明仙e責任閣卡大，吓使講一个人揹十外條人命叨著，這款考醫學校e代誌，「只准成功，袂使失敗」e，聰明仙啊！汝苦啊！昊內無坎，嘛噯beh去！千斤萬重e壓力，砥佇汝身上，這聲港潦落矣！有進無退，無拚袂煞安呢！
是按怎講，杜聰明壹定噯考稠醫學校？噹時也杜日鳳原本道光同治時代e人，伊甡三个後生，「天下父母心」，家道富裕之後，攏寄託真大e映望，老大杜生財1879出氏，讀一寡「四書五經」古早支那人遐碗膏古董，無合時代e要求，干礁吓使做漢文仙「老學究」爾爾，這聲老大「掛掉了」，老貳雖然有捸著讀日本書，毋閣奚是師範生爾爾，後日仔竭竭是配去學校做老師，為大日本帝國，推行奴化教育哩，嘛是無卡擢啦！單單這粒老三杜聰明，自細漢真巧真玲琍，恁父五十歲才拚這粒屘仔囝，伊著疼命令，所以講全力培養，噯來考醫學校，來光宗耀祖互祖公仔，直拄好，杜聰明七年歲，佮日本教育系統仝步前進，聰明仙踏著機會，一路橫長直破鏘鏘滾，海內外僬出名，这是天公伯仔註定咧，尤其杜日鳳過身了後，全傢人「化悲憤為力量」，壹直寄望聰明仙來大葩尾旺廣，「冥冥中」咱聰明仙欲出名e代誌，宛那閃袂離安呢！
明治四十二年，1909三月佇台北城內，舉辦「醫學校試驗考試」，這擺參加e考生有四七五人，來自全省各地，按算欲錄取四十名，錄取率干礁8％爾，不止也硬斗，彼年考生吓真贅，人群佳繹，有一个原因叨是「南北縱貫鐵路」通車矣，这真要緊，原來台北到台南，有三百二十公里，坐牛車噯十工，這嗎坐火車，免八點鐘叨到矣，通車雖然猶未滿一冬，毋閣互茲社會精英佮讀冊人真正利便叨著，致使講聰明仙欲考醫學校e時瞬，全省鏘鏘滾，真鬧熱安呢，也叨錄取率無懸，聰明仙想欲拍破「滬尾公學校無人考稠過醫學校」e紀錄，宛那硬斗呢！
1907年小竹校長佮聰明仙蹛逗陣e時，叨暝日給推，給補習，映望伊吓凍稠醫學校，毋閣1909年初，小竹校長身體無爽快，入台北病院治療T.B肺結核，致使講學校攽空營，聰明仙家已一个人拂，一个人拚，安呢最後半年e考前準備，聰明仙盡心盡力，含心敆命硬讀安呢，對家己嘛無把握叨著，聰明仙行入去考場e時瞬，洛倯洛倯（土裡土氣），心肝內驚驚耽耽，一个庄腳囡仔是欲哪有甡張啦！尤其是看著市內大稻埕公學校e王青山，葉瑤琳「漢草高鏘，屈勢十足」嘛來應考，唉；我这庄腳草地囝，烏閣細粒，閣卡無自信矣！
呾考試單分落來矣，聰明仙留著清朝頭鬃尾（辮仔），用毛筆咧寫考題，这袂輸清朝咧考秀才，八股文仝款，這時瞬日本人已經占台灣十五年矣，對台灣人留「辮仔」，佮學校有讀「漢文」來講，宛那無排斥哩！台灣人做「清國奴」卡好，抑是「日本奴」卡好，呾叨霧霧也，分袂啥清楚呢，杜聰明考試e時瞬，頭腦清楚，意志堅強，雖然烏閣細粒籽庄腳草地也倯，毋酪伊有全台弟壹流e頭腦，又閣身受小竹校長強力e補習以上，搪咧「不屈不撓，發揮伊強大e二枚腰勁」！尹俍咧，恁父潦落去矣！鏘落去矣！給拚一斗仔輸贏le，看欲死豬哥抑豬母，這六年e苦讀，無展一下仔工夫袂煞li，我尻脊py揹著杜家二代人e映望，小竹校長搪咧破病，這擺e考試，絕對吓使成功，袂使失敗咧！昊內無坎，嘛噯beh去，叨親象四年前，「日露戰爭」時e國家標語「日本e存亡，此の一戰にます」！拚落啊！考袂稠這聲叨返去北新庄仔做田，去海口賣蕃薯矣！各位看倌，人客啊！500人才欲錄取四十人，有92％落選；杜聰明咁考吓稠？
考試分幾落科，算術方面，咱聰明仙真正聰明，卸卸叫，鏘鏘滾，安呢橫長直破手路順，簡那風颱咧掃落葉咧，免三二輦手叨去互伊筴去配矣，一佰分摩咧等，这零星兮爾,抑無，我「聰明仙」是咧做假e呢？日語方面，小竹校長暝日補習肖媵，目斗懸界（火候極佳），連日本囡仔叨無夠看，漢文方面，家己大兄教e，基礎壹粒壹e，嘛有考作文，題目「水」，咱聰明仙閣卡是「如魚得水」，逶少年時瞬，故鄉巴拉卡各方面，水氣霧霎霎，山景水沖（瀑布）風景磊斗，講到山田仔（梯田）水面如鏡，詩情畫意，落尾也講到水e三態變化佮水對身體、萬物生長e重要……，橫直作文叨是考驗膨風e技術，文字e藝術，敖「蓋」，敖「撰」上要緊哩！聰明仙考煞了後，頭殼一瞬e空白，自那唗去台北病院，探親恩師小竹e病情，順續「秉報，考試成果」，咱聰明仙已經盡心盡力矣！希望吓凍考稠上尾一个叨好！
所以講「人咧做，天咧看」，天公神杯咧矯摵，有時叨互汝袂講e，毋倘看「貓兮無點」，咱庄腳人有庄腳人e甡張，時運咧行這聲竄筋入骨，大尾矣，發角矣！半月日了後，台北病院e小竹恩師得著好消息，咱杜聰明得著「醫學校入學考試狀元矣！」，欲得著全省優秀仁材e第壹名，真正無簡單，小竹恩師「淚如雨下」目屑四湳垂，真正感慨萬千，哎！我「千里迢迢」逶日本來到台灣辦教育，今仔日吓凍教出「醫學校狀元」，真正是無比e光彩安呢！杜聰明考稠醫學校e狀元，这是伊一氏人大尾旺廣e起磅要點。因為伊e成就佮天份，馬上引起東京方面統治者e注意，阿本仔有咧按算「聰明仙這个少年人真正仁材，互汝袂鐵齒e，這叫e，若準好好也給栽培，互伊榮華富貴，日後吓凍做「樣板」，互伊完全效忠大日本帝國，咱大日本帝國叨興旺萬世，毋閣噯張弛，這款人頭殼若好，思想吓複雜，若是起身反抗日本外來政權，爭取台灣民族自決e時，宛那真費氣哩！」
人客啊！杜聰明是註定欲大尾，欲發角啊！伊日後逗底是吓迎合日本統治階級，來做一个順民，求取榮華富貴，抑是吓利用伊知識份子e先覺者，掣頭潦落反抗日帝外來政權，來求台灣民族自決。「人吓變心一時間」，这叨是日後杜聰明佮好朋友，蔣渭水、蔡培火，思想開始分裂e源頭，無論按怎，1910左右，中國方面，孫中山革命e思想壹直楦大，台灣地e知識份子，定著是知甲有偆去，中國人須反對清國人e統治，佇台灣，講台灣話e百姓去互講東京話e民族統治十五冬矣，原本讀冊人智識份子叨是天生e反對黨，呾這棚戲是欲按怎搬落去，二爿「陳皮蘇黨」半斤半兩真正費時費氣安呢，尤其1901日本併吞朝鮮，也叨朝鮮人無親象台灣人赫軟落，尹e性格青狠，無咧驚死，日本人尻倉逗柄，這聲害溜溜矣！杜聰明考稠醫學校了後，無外久，日本首相伊滕博文，佇滿州哈爾濱，互朝鮮志士安重根暗殺，這个消息傳入台灣了後，代誌真歹紡，阿本仔欲哪矯摵，这是後頭話。
(17)不而顧呢，人e運途有好有醜，仁生坎苛，世事難料，俗語講「孔子公嘛毋敢收過暝帖」，咱聰明仙搪咧福氣，搪咧考稠狀元歡喜e時瞬，歹運來矣，這聲互汝衰甲叫毋敢，奚叨是醫學校e教官會議，感覺杜聰明甚幼秀，甚細粒籽，伊e體格是「丙の下」，無欲互伊入學就讀叨著，聰明仙驚一下腳手僬麻痺，煩惱甲袂食袂睏咧，呾含心敆命辛辛苦苦讀六年公學校，若考無稠奚叨無話講，這嗎考著狀元才去夆退學，有影真正吓凝死安呢！閣卡對不起死去e老父，佮杜家歷代e祖先，我杜聰明仔，雖然漢草有卡細粒，毋閣身體健康，自來無啥乜毛病哩！這嗎洶洶給我舞這齣e，莫怪伊吓驚甲聶聶聶〔liap〕，聰明仙真驚惶，毋知欲按怎才好！
搪佇這个危險e時瞬，救星出現矣，會議主席長野純藏，「力排眾議」，強力來保護聰明仙e受教育權，伊認定講，杜聰明雖然體格無好」，毋閣頭腦真好，以這款名義給人退學，理由無夠，而且無奚慈悲心，日後因果循環，互汝袂鐵齒咧！無外久呤，大多數教官所主張杜聰明退學e意見，叨慢慢冷落來矣，最後決議，先互杜聰明讀一學期試看覓咧，若是摯載袂稠，才給停學猶袂慢li，唉！閣卡講大日本帝國嘛是世界文明國家，台灣人閣卡無路用嘛是父母甡兮，毋倘給人蹧躂甲這形兮！
e瞬呤，這款代誌並無希罕，毋倘看「貓兮無矣」，真正「草仔枝吓絆倒人」，做人噯卡忠厚e，卡慈悲e，天公賬簿吓給汝記e呢！佇1896瑞士蘇利世聯邦理工學院，宛那發生仝款e代誌，大物理家愛因斯坦Einstein，剛考入學院e時瞬，數學一百分，物理嘛一百分，毋閣英文考真醜，照理講禁止入學，算講考無稠叨著。阿坦仔哀父哭母叨無卡擢li，落尾也阿坦仔寫一張批互校長，校長伯仔一下給看大驚，尹俍咧，數理攏考一百分，這款天才型e仁物，欲哪給漏鉤去，叨趕緊通知伊來入學，先讀一年看覓，才閣決定後事，1900阿坦仔學校畢業後，真思念這位校長伯仔，伊e慈悲定著吓「代代出好囝孫」互人永遠懷念，無外久，1905咱阿坦伯仔以26歲英年，發表千古名言「相對論」，證明E＝mc2，能量、質量吓使互換。
好矣！咱聰明仙一時歹運，去沓(lap)著牛屎，落尾也「雨過天晴」解運矣，無代誌矣，聰明仙佇1909到1914年，這五年噹中，每年攏是成績第壹名，尹俍卡好咧！人奚狀元材叨是狀元材，阿本仔猴啊！真正互汝袂鐵齒e呢！看人細粒叨欲給人凌治，安呢無妥當啦！嗯才e瞬呤，無外久e中間，日本仔先生，又閣漸漸來扶聰明仙矣，來巴結聰明仙矣，咱聰明仙這聲鋩角矯了有夠，心情宛那袂醜，1914四月，伊佇第13屆醫學校卒業典禮中，以第壹名代表卒業生致謝答辭，互人真給謳咾，呾這棚戲搬到茲煞鼓矣！暫時按下不表。
(18)呾各位先覺，各位好朋友，小弟（作者）興仔是北投人，定著對北投e故事卡有心通叨著，人咧講「懷念血跡地，心肝摵一下」，啥人袂懷念家已e故鄉呢？阮北投地界，佇世界上第壹出名兮，毋是「陽明山」，嘛毋是「關渡廟」，嘛毋是「大屯國家公園」，抑無，逗底是啥乜碗膏？我給汝詳細講，佇茲汝噯斟酌聽！奚搭搭叨是「北投石」Hokutolite，伊是1906年正式列入「國際礦物名詞」，由日本學者岡本要八郎，佇北投所在所發現e放射線礦石，也叨全世界頭一擺發現兮，所以伊e名稱叫「北投石」，這个國際認定e名詞，真正是「轟動武林，驚動萬教」互阮茲北投e百姓感到真至揚，佇茲阮真感謝岡本要八郎教授，伊真正「大公無私」，無用家己名子「岡本石」，遂用「北投石」，真正對北投地真有感情叨著，杜聰明佇1907～1909年間，佮岡本教授交陪臹深，感情臹好，这是天意，真正北投人互伊致蔭有著，感謝再感謝！
1905年，居禮夫人發現鐳放射線，才得著Nobel獎無外久呤，1906年岡本教授叨佇北投地，馬上叨發現放射線石頭，日本人實在真厲害，反應即尼快速，岡本發現北投石，吓使講是「大日本帝國」強國強民e牛角（象徵），这袂使烏白亂來e，國際名詞是何等e嚴肅佮權威？無貳步七仔，是欲按怎佮人徛起？这硬拄硬草蓆捲針把，互汝袂hau 6韶e，真拄好！鎗籽扑著肚臍空，千千千，準準準，「北投石」吓出產佇北投，連阮北投人嘛憑尹e福氣安呢甡。
代誌是安呢，1905年左右，岡本要八郎佇（老松國小）艋甲附屬學校教冊，伊真愛研究礦石，有閒e時瞬，不時叨去郊外行踏行踏安呢，收集各種石頭標本，宛那仁生一大快樂叨著，有一回伊去北投溫泉窟（今新北投公園、龍門飯店身邊e地嶽谷風景區），抾一寡礦石返來，無張弛e中間，發現翕相機明明叨無翕相，按怎吓感光，袂輸簡那摩壁鬼纏身仝款，伊馬上覺悟，無定著茲北投e礦石，有效射線e款，也叨無外久法國e居里禮夫人，發現鐳e放射線，剛得著Nobel獎，嗯才e瞬呤，岡本反覆試驗，最後結論，北投石有放射線，雖然伊毋知影其中詳細成分，毋閣佇溫泉區e石頭發現放射線，这佇全世界是頭一擺，所以1906年岡本向世界礦物學會申請登錄，正式互伊學術名，叫做「北投石」Hokutolite，這聲全世界e學者攏知影”北投”這个所在，咱岡本教授，真正客氣，無用家己e姓名，遂用北投這个地名，互咱北投人永遠給擻念叨著。
1907年左右，滬尾公學校e校長小竹德吉，佮艋甲附屬學校岡本要八郎都諭，二人簡那「司公仔神杯」咧，感情峇峇峇，比親兄弟卡好，這二位老師攏「正仁君子」，教學認真e仁格者，尹二个禮拜時仔e時瞬，迭迭互相拜訪，交換教學心得安呢，小竹校長不時掣著杜聰明，坐火車去艋甲拜訪岡本，岡本嘛迭迭來滬尾學校，尋小竹幵冓，看一下仔「滬尾暮色」日頭西沈彩雲天，金光鏘鏘滾e美景，二人攏獨身仔，無嫫無緱，逗陣逐傢心適趣味安呢甡。
彼瞬杜聰明蹛佇小竹校長e宿舍，給小竹買菜煮飯摒掃東西，小竹叨盡心牽教咱聰明讀書，二人袂輸父子，感情真好，禮拜時仔小竹掣著杜聰明，去艋甲尋岡本開講，岡本e甲三號宿舍，內內外外，連亭仔腳，嘛攏排一盒一盒e礦石標本，伊全神貫注，拍拚認真研究礦物書籍佮文書、雜誌，又閣將北石感光e軟片film，詳細解釋互聰明仙聽，咱聰明仙對伊治學態度e認真，真心感心，这對日後杜聰明讀博士研究學問，有真正影響搭底叨著！
杜聰明雖然毋是岡本e直接學生，毋閣透過小竹校長e暝日逗陣，講話讀書互相感應以上，岡本佮杜聰明真嘛是簡那親學生仝款，佇小竹校長外調去廈門旭瀛書院做院長彼段時間（1909～1913），杜聰明拄好咧讀醫學校，伊不時去尋岡本老師，討教學問，尹e關係密切，奚哪叨閣講！壹直到杜聰明畢業前夕，小竹已經肺癆仙逝，岡本外調去廈門，才無閣來往。
六年了後，杜聰明搪咧京都大學讀博士。彼年1920八月坐船到廈門，參加恩師小竹銅像e揭幕典禮，才閣見著岡本，這个時瞬「物換星移」，時代已經變化臹贅，聰明仙想著小竹生前e種種恩澤，目屑滿面，真正感慨安呢甡，昭和三年1928，杜聰明36歲矣，「兒女成群」，又閣見一擺面，這時瞬小竹恩師已經過身十五年囉，唉！時間過了真緊！
也叨懷念做囡仔時代小竹恩師，嗯才連帶對岡本要八郎，宛那真正親叨著，民國34年，1945二次大戰結束e時瞬，杜聰明已經53歲矣！佇彼个時代，算是「老大人」矣無拗蠻li，呾杜聰明這把歲頭，迭迭嘛想起十外歲仔佮小竹，岡本逗陣e情景，「如詩如畫」糖甘蜜甜li，小竹既然甲過身以上，聰明仙定著吓去尋岡本教授，來回憶古早台灣e故事，岡本ga是世界級e學者，遺留對北投石e貢獻，嘛是真歡喜聰明仙e拜訪，杜聰明幾落擺拜訪岡本教授，彼瞬伊任教佇九洲大學，真正出名，聽兮講逐擺杜聰明來訪，攏受著真熱忱e招待，彼時岡本已經七十外歲矣，宛那真親切安呢甡。
杜聰明上尾一擺見著岡本是民國44年（1955年），彼年岡本已經八十歲矣，聰明仙佮臭頭仔袂洽〔ha4〕，潦落民間，高雄醫學院剛〔daa2〕成立呤呤，聰明仙佮岡本e學生聯合起來，邀請岡本來台灣做學術冓演，聰明仙笑容內底唅著目屑，表面上是表彰咱北投石e功勞，實際上是咧懷念小竹恩師佮囡仔時e感情，人食老有時嘛真惜情哩！
1941，日本礦物學會，為著欲表揚岡本先生北投石功勞，按算欲佇北投公園，磺水溪邊來建立紀念碑，彼時台北州知事來題字，才閣彫刻來完成，毋閣戰時危險，匿空襲炸彈，徙來徙去，最後囥佇紀洲廟旅館時，戰爭結束台灣光復，日本人回國，無人來管理，遂流浪他鄉不知去處，無外久得著消息，佇徐坤泉別莊遐，徐先生好意捐出來，尾溜也囥佇北投山善光寺e前庭遐，也叨石頭赫尼重，除非蓄意破壞，抑無，欲盼見宛那無簡單啦！
小弟佇十年前，做義方國小家長會長e時瞬，北投里仁學會有真認真來收集「北投石」e資料，而且有實物佮相片，佇校慶e時隆重展覽，互我這个後輩小生，「大飽眼福」，这一佰年來有關咱北投石，佇世界舞台上，安呢「轟動武林，驚動萬教」，連咱茲北投暢仔宛那真光彩叨著。
这是咱e福氣，真正閃嘛閃袂離安呢，不而顧呢，佇茲給各位愛浸北投磺水e人客敬告一下，北投磺水有硫化氫毒氣，真正危險，若是有管路e所在，抑是無通風所在，迭迭吓H2S中毒發生命案（是危險叨著），所以毋倘「落單」，噯互相照顧，半月日前，輔仁大學招待一位大陸學者，去竹仔湖測候所浸磺水，遂不幸身亡，互大陸家屬真袂諒解，这「生死交關」逐傢千萬噯注意叨是。
民國50年左右，1961，彼个時瞬，李遠哲猶未出名，干礁是清華大學e研究生爾，頂司交待伊一个任務，研究「北投石」e詳細放射性資料，這款空課，佇四十外年前，宛那不止也硬斗叨著，北投石e成份大部份是硫酸鋇、硫酸鉛，性質頑固，真奧溶解佇強酸、強鹼，真正舞規晡叨舞無路來，佇白金坩堝e時瞬，發生顛誕，無夠精密，放射性e定量分析受著困難，日本仔指導教授大粒汗細粒汗，咱李遠哲是一位真優秀e研究者，伊「心思細密，潛學深厚」，馬上提出異議，伊講高溫時瞬，硫酸鉛e鉛質，吓佮坩鍋白金形成合金，吓影響精密度，互阿本仔真歹勢……。彼年杜聰明68歲，杜做囡仔時代有看著北投石早年e研究，歷歷在目安呢。
杜聰明民國75年四月過身，李遠哲十月得Nobel獎，差半年爾爾，杜聰明看袂著，真拍隕安呢，北投石，大部份是硫酸鉛，硫酸鋇，北投礦水以硫化氫，硫酸質濃度，致使講阮北投e電器類，親象冷氣機、電視，攏真容易ka 3銹故障安呢，北投石e放射性部分是鐳226，釷232，鉀40，咱北投所在有這款物件，宛那無簡單，岡本發現北投石是1905，本文行筆前叨是2005拄好一百年，宛那有緣啦！產北投石e所在是目前龍門飯店身邊溝子墘，目前已經破壞甲袂溝了了，伊身邊e「地嶽谷風景區」水煙濛霧，熱氣逼人，小弟這二十年來，迭迭去耍，卡早吓使煮蛋煮蕃薯，這嗎為著安全已經禁止矣！