第九章 遊學歐美增學識
蔣渭水含悲謝世
（1922～1930）
33
民國4年，1915，日本人來管台灣，叨也二十年囉，外來政權殖民統治e架勢，已經在在在、穩穩穩，台灣地上珍貴e資源，搪咧點點滴滴，受著阿本仔e剝削，搬運返去母國孝孤，台灣人叨無伊法咧，這年e春天，一船又閣一船，載運著台灣e國寶紅檜扁柏，進入日本神戶港e時瞬，碼頭e群眾，大聲咻喚歡喜wewe，有e人甚至流落感動e目屑水，逐傢挨挨陣陣，意氣高揚，仨爭摸奚紅檜神木，真正世間無幾回啦！真正歡喜甲叫毋敢！哎！這欉紅檜噯活一仟年才有即大欉，咱日本嘛才統治遐三十年爾爾，讚！讚！嫷！萬歲！萬歲！咱大日本帝國，有影讚叨是讚，強叨是強，這款紅檜國寶，是做神社鳥居e好柱腳呢，祝大日本帝國萬世興盛萬萬歲，真正日本人做了有起呢！
台灣人講台語，夾佇東京話佮北京話勢力e中間，真歹徛起，叨親象波蘭夾佇德國佮蘇聯中間，互人lio 6互人摋亡國五擺，这中間，心苦病疼，隨人嘴齒筋咬咧，噯吞忍噯巴結，日本人e剝削佮kue6仙，这並無代表中國仔叨有卡愛心卡忠厚，1947左右二二八事變，佮了後百萬難民擠入來，互茲蕃薯仔衰甲叫毋敢，日本仔顛倒匿佇壁角咧偷笑。簡那做生理e，阿本仔繫一塊本錢，來建設台灣e時瞬，定著嘛噯卯一塊仔利純，抑無，我日本天皇，咧做假e是毋？致使講日本外來殖民政權，必然吓佮台灣人智識份子，發生真食力e衝突安呢甡。
大正九年，日本人大量修改地號名，來滅絕台灣意識，殖民統治台灣已經25年矣，咱台灣人袂輸奴隸，茲無台灣人e報紙，無台灣人e結社，無台灣人e議會，無台灣人e中學大學，台灣人有話無地講，袂消透e，嗯才e瞬呤，留學日本東京e台灣人，組成「新民會」喚醒台灣人e民族意識，這个時瞬，台灣島內有「叔公」獻堂仙，蔣渭水醫師、蔡培火阿伯……規陣人搪咧為反對日帝殖民統治，求取台灣人基本權利，咧唗傱咧奮鬥，尹有三个特點。(一)茲e人，攏是杜聰明博士e好朋友，聰明仙噯「做肝做肫」，定著毋敢假仙。(二)尹採取和平e方式，用奚麻糬步兮，佮阿本仔逗逗也講，慢慢也矯，也叨日本是法治國家，叨卡袂按怎，絕對袂使用暴力e革命烏白亂拂，抑無鴨卵硞石車，毋是拚路。(三)抗爭e重點，囥佇「設立台灣議會」，馬上互台灣人e聲音，吓使互全世界知影，另外爭取公民投票權，互政黨政治有甡張安呢。
杜聰明無法度參加「叔公獻堂仙、好友蔣渭水、蔡培火長老」e抗爭活動，不而顧这無要緊啦，伊有伊e心苦病疼，咱給想，日本政府內底有一二个台灣官，到時暗中zat助，嘛是無到佗位去啦！免驚，杜聰明赫尼巧e人，伊絕對吓倚咱蕃薯仔e心安呢，杜聰明佇蔣渭水做抗日活動e時瞬，嘛迭迭去伊e「大安病院」（現時延平北路義美食品隔壁）行踏行踏，暗中佮茲「抗日份子」嘛有連絡接觸li，彼時，日本殖民政府有這款「以台制台」全力扶助杜聰明來對抗「反日份子」，嘛「睜一眼閉一眼」假佯無看e，暫時吞忍，致使講聰明仙真正矛盾，吓使講「雙頭總卯」嘛吓使講「雙頭無一敖」！
「抗日大師」叔公獻堂仙，1920左右，伊不時來往台灣、日本二地，簡那行灶腳le，是頭號仁物，伊是阿罩霧林家e好業人，家世真好，伊真戇、伊袂曉去勃菸塗（鴨片膏），袂曉去食鮑魚燕窩，袂曉去娶細姨，袂曉去跋一个仔瘦繳咧，袂曉去吟詩作對遊山玩水……，顛倒來做「反抗日帝」這款摋頭生理，伊組合同志「不屈不擾」咧奮鬥，哎！真正頭殼歹去，神經線肖犮〔pua4〕去是毋？另外，咱對日本政府e開明作風，穩定忍耐e工夫，嘛真給謳咾，算講咱獻堂仙甡了著所在，抑無，民國十年左右e中國大陸，軍閥割據，親象獻堂仙這款反派頭路仁物，絕對掠去考槍，「馬这个屁，丁副官，給我拉出去斃啦！」十條命汝嘛袂赴死，汝食卡醜咧，也倘互汝聳鬚？
叨安呢，叔公獻堂仙佮蔣渭水醫師合作，蔡培火「跑腿聯絡」佮日本仔外來政權做三四會合e翩盤，二爿死伍ket，拂甲是「天烏地暗，日月無光」，咱聰明毋敢介入，嘛看甲目屑暗流，不在話下。頭一擺是大正，民國十年正月尾（1921年）。伊提出台灣一百八十外人e聯名請願書，透過議員：向日本國會請願，伊是「台灣議會設立請願書」，佇東京街頭，引起真大e迴響，毋閣日本天皇，無咧給汝信斗，嚴詞回絕矣，「恁茲台灣暢e，卡乖咧，毋倘食甚飽，閒閒咧哭枵呢！阮大日本帝國，國強民富，全世界第壹，台灣人有幸互阮管，真正「福氣到甲毋知」呢！返去！返去！我大日本國，「勤政愛民，皇恩浩蕩」，勿閣來舞這齣e，知毋知？
獻堂仙東京請願失敗了後，返台灣直接拚到蔣渭水e大安病院，佮伊研究，成立政治結社e問題，蔣渭水規頭殼台灣思想，定著全力支持，另外有一陣台灣人嘛出錢出力給逗腳手，叨平平台灣人哩！拚暝拚日，流血流汗宛那無計較，嗯才e瞬呤，1921大正十年七月十日，蔣渭水、林獻堂、蔡培火、尹規陣人，佇台北圓環靜修女中，成立「台灣文化協會」，以和平溫循e方式，拺動民主政治來救台灣，毋閣真拍隕，三、四年了後，歐洲e社會主義入來，協會分裂做左派、右派，迭迭門扇板咧逗袂峇，自那漸漸落坑矣！尾也民國16年，閣再成立「台灣民眾黨」局面才矯返來。
呾台灣人e抗日運動，漸漸來浮夯，日本仔猴這聲「欠錢咧起慪韶面」矣！台灣人一定噯壓落底，安呢才袂礙著我大日本帝國e甡張，這嗎台灣人，暝日閒閒咧枵飽吵，若照这扮勢拂落去，泛勢我阿本仔強欲翩笪嘛無的確，到時去互獻堂仙、蔣渭水這批人筴去配，舞甲袂收山攬尾e時瞬，呾我阿本仔e武士道精神，是欲夯去佗位藏？尤其議會請願告到東京去，日本人閣卡想氣，嗯才e瞬呤，日本殖民政府，決定欲掠人，欲掠去關，用暴力e手段，來阻止「抗日運動」e湠開安呢甡，來保持大日本e尊嚴叨著。
33
大正十二年，1923年12月16日，總督府派警察，洶洶佇全台灣各所在，拘掠抗日份子，以「治安警察法」罪名，全台有41人夆扣押，互地方法院控訴，法官真公道，判尹無罪，又閣高等法院告訴，最後判十三人有罪，五人無罪，蔣渭水判四月日，蔡培火嘛四月日，尾溜也，日本警察知影，有大批e民眾，欲對蔣渭水舉辦盛大e「送行入獄」，警方大驚，趕緊直接送入牢房，蔣渭水才關四月日爾，無兜無sau，簡那「蚊仔釘牛角」咧，顛倒引起台灣人e尊敬，看伊做民族英雄，阿本仔猴叨袂凍外聳鬚e哩？以上這項代誌，叨是日本時代有名e「治警事件」。
落尾也日本政府有咧斟酌檢討，干礁掠人去關，安呢毋是頭路啦！安呢無法度解決問題啦！呾愈掠吓愈贅人潦落，吓愈莿激台灣人e反抗心，互代誌愈湠愈大空，安呢是著吓礙著官廳e統治威嚴，互社會二極化，仇恨化，安呢無通啦，無附合著長期e殖民利益，所以嘛有想著以「軟注」e步數，以「以台制台」e撇步，來治理台灣，na軟索咧牽豬le，溫溫也來，免著急，咱吓使揀敖人優秀份子，互伊做大官趁大錢結黨派，來給台灣人灌甜湯、荼神經，安呢年久月深了後，台灣人自然吓中毒，無形中來偎日本人，代誌定著矯吓好勢。
毋閣欲尋一个吓信任e台灣人，來對抗這陣「枵飽吵」e抗日份子，这宛那硬斗哩！「治警事件」時代，杜聰明博士，算講是上好e仁選，毋閣代誌無赫簡單。事實上，佇1914大正三年，杜聰明以第壹名成績卒業佇醫學校呤，叨互日本當局對伊真給注意，有意思培養伊做大官，毋閣日本仔心肝頭臹驚惶，伊真驚杜聰明做大官了後，利用官方資源，心肝倚台灣，殘殘脆脆，洶洶叛變，逶日本政府給翩撇給倒笪，安呢叨害了了啊！好佳哉，杜聰明佇大正四年到十一年中間，並無明顯反日e動作，而且伊佮獻堂仙、蔣渭水彼班人感情臹好，阿本仔吓使「居中操弄兩面討好」！吓使「一空掠二尾」，左右逢源，吓使利用杜聰明嘛吓凍就近監視杜e朋友。
呾日本仔猴，經過長時間e佈置佮考核，認定杜聰明是个「親日派」e台灣名學者，自那決心欲提拔伊做大官，安呢日本政府，才吓放心，所以講民國11年，杜聰明得著「高等官」e頭銜，對伊來講是真正光彩，毋閣對官方兮來講，嘛是真正歡喜慶幸尋著人矣，續落去叨是，杜聰明做「做石磨仔心」，一爿是日本政府，一爿是好朋友抗日份子蔣渭水、獻堂仙……。
杜聰明做「高等官」，決心效忠日本政府，日本方面嘛全力來給栽培，做「台灣人e樣板」，互台灣人知影，日本帝國真正偉大，汝若佮我合作，叨吓凍「榮華富貴，萬世興旺」安呢，呾日本政府按怎來全力巴結聰明仙？民國11年，杜逶日本返來了後，叨做台北醫專e教授，拜「高等官」，二年了後，阿本仔考核嚴格，知影伊「忠黨愛國」，比邱創喚「閣卡愛國」，絕對安全無代誌啦！
「治警事件」一年後，1925，民國14年秋天，總督府決心派杜聰明到歐美去留學，來儲備未來「台北帝大」成立時e師資，費用由理學部支出，全力培養聰明仙，安呢含心敆命來肖媵伊，巴結伊以上，聰明仙定著感恩再三，扶官廳兮做嗣大，毋敢假仙啦！聰明仙已經提著博士，閣再去留學三年，返來了後大尾溜溜，做教授做院長……，攏真簡單，簡那桌頂捏柑le，這條路呾叨潦落去矣，聰明仔心肝欲歡喜咧等，頂司意思是「1925冬天留學到1928四月，攏總二年半，留學四个國家、美國、德國、英國、法國，有影場面捙營面子足，真正擎甲夯袂稠，有淡薄也「半讀冊、半遊覽歐美」e款勢。
民國14年彼个時代，欲去歐美遊學，是真正困難真正希罕e代誌，彼瞬無商業飛機，壹切攏噯坐大船，行了一迣美國，坐船噯二十工，致使講聰明仙欲留學美國、歐洲，真正是「轟動武林、驚倒萬教」，規个杜氏家族氣氛浮夯，安呢鏘鏘滾，膨膨英，出國進前，全家族翕相留念，又閣互伊澤總督召見，叫伊「忠黨愛國」勉以大義、聰明才講「皇恩浩蕩，小人必需生死以報」，心肝內暗暗驚喜，阿本仔e恩情，在在在真正「冰水吞落喉，點滴在心頭」。
嗯才e瞬呤，杜聰明博士，佇民國14年12月19，逶基隆港坐大船去美國、歐洲留學，頭一站先到日本，佇大阪所在，拜訪十六年前e恩仁長野純藏校長，長野知影聰明仙欲去歐美留學，真正歡喜，彼暗設宴款待，聰明仙再三魯力，哎！時間過了真緊，1909聰明考稠醫學校，體格丙下，教官團無欲互伊入學，這个關鍵空縫，長野主席極力支持聰明仙入學，真正是好佳哉，險險兮錯殺忠良，不在話下，過返工，閣去拜訪豬股先生，聰明仙佇京都帝大讀博士e時瞬，受著伊真大e幫贊，嘛真正勞力安呢。
大正十五年，1926，元月八日，聰明仙逶橫濱港坐2.2萬噸e大洋丸，經過二十工e船頂生活，到美國舊金山就岸，这真正是仁生真正奇巧e經驗，搪噹大船駛離海岸線，富士山遠遠嫷咚咚白雪凱凱，漸漸來離開眼界，海天壹色，這个時瞬，聰明仙已經34歲矣，厝內有傢後林雙隨佮長女淑純四歲佮男祖智二歲，船頂無聊到地也，宛那不時擻念嫫囝嘿！大船佇夏威夷有歇半工，互旅客就陸看看e，遐e景色卡成熱帶性，有台灣e心適置e，元月27日，大船駛入去舊金山，聰明仔心肝頭摵三下，這氏人頭擺進入白人e世界，真正大开眼界，歡喜咧等安呢！25年了後，杜聰明第二擺進入美國，彼瞬坐飛機入來，美國已經是世界強權，天霸王兮，韓戰是扑甲嚬嗙叫，阿啄仔無人敢搧伊e腹堵邊，時代已經無仝矣！
呾聰明仙進入美國舊金山呤，彼暝蹛佇日本人開e”小川Hotel”，落尾也又閣坐火車去費城研究，聰明仙有感覺美國佮事先想兮無仝，美國都市e大樓真贅真肖倚，这佮日本、台灣大部份「低厝仔」無肖仝，阿啄仔厝，二三十層，三十四層，叨無註文著，按怎民族性差即大？第貳，美國e警察伯仔，對百姓真客氣真好禮，这表示「官民一傢人」有可能叨著，無親象日本、台灣、中國e警察，大部份面尺慪嘟嘟，態度歹擎擎，这表示民主國家，警察是幫助百姓e，獨裁國家、警察是統治者e爪耙仔。
第三，美國e私仁e自動車真贅真普遍，台灣、日本真尐人有。第四，美國人「玩樂」佮「工作」分甲真清楚，欲耍叨耍甲真搭底，該做空課叨含心敆命拚落拂落，所以效率真懸，第五，美國e物質真豐富，物件真俗，百姓無需要為食e問題咧煩惱，這項無論台灣、日本、中國攏做袂到。
聰明仙到美國費城大學，藥理研究所，研究最新e「微量血糖定量分析」技術，嘛學一寡麻黃素對心臟作用e技術、理論，落尾也，伊又閣坐車去加拿大多倫多市，拜訪「胰島素」e發現者Banting教授，伊是糖尿病e權威，得著1924諾貝爾醫學獎，Banting為仁真正熱情慷慨，聰明仙以簡單e英文，「交談甚歡」，大學者e風度，真正無仝，做代誌幼秀詳細盡磅逗搭，對待人客是好禮咚咚，互人真懷念。
半年了後，民國15年7月，杜聰明繼續往德國留學，伊逶紐約坐彼時世界上大隻e商船Magestic號，伊有5萬6千噸，有影驚死人！這台大船經過十二工了後，駛去英國南安通港，隨後坐車入倫敦市，倫敦人真有紳士風度，領行李e時瞬，隨人提隨人兮，免用提貨單，算講逐傢互相信任叨著，服務員笑微微，無計較金錢，無親象美國人小費提緊緊，一禮拜了後，伊坐船到法國，才閣坐火車到德國漢堡市，佇漢堡學熱帶醫學研究所進修，聰明仙蹛遐有一年呤呤，德國雖然是溫帶寒帶國家，緯度真懸，毋閣對熱帶醫學研究真正認真，為著學術，宛那無惜錢銀亥重本去拂去鏘去拚安呢，聰明仙吓感受著德國人，親切、清氣、認真做代誌「一絲不苟」e優秀氣質，莫怪吓揙歐陸第壹強國，即尼優秀e民族，後來，吓潦入二次大戰，天地變色死亡三四千萬，實在想袂到！
民國16年初夏，聰明仙又閣到英國倫敦大學藥理研究所進修，伊遐e生理學真正發達，有特別e研究方式；互聰明化真感心，英國e研究經費上乏搭（欠缺），毋閣尹吓曉利用每一鍼錢，攏互伊發揮最大e作用。另外一方面這个時瞬聰明仙思念嫫囝e心情，真正強烈，佇英國e日子，大查某囝”杜淑純”已經五歲矣，祖智嘛三歲矣！想起來，尹e日子應該平安才著，哎！我聰明仙叨無路用哩，為著求功名，去日本七年，這嗎閣來歐美三年，舞十外年攏佇海外，有影對杜家e嗣大氏細佮家己e嫫囝，攏真歹勢哩！
留學e第四个國家是法國，聰明仙佇巴黎蹛半年，法國人，生活浪漫，嘻嘻嘩嘩，一四界公園綠樹，藝術人像，充滿溫順祥和，連醫學院e大門，叨掛一幅裸女畫，有影不吉啊，这佮德國人嚴肅、冷靜、認真、清氣，有淡薄也無仝款，聰明仙佇法國e時瞬，拄好搪著「叔公獻堂仙」掣尹后甡（兒子），來法國遊覽，佇他鄉外里e所在，佇半粒地球以外，吓凍看著親人，这定著真親切，歡喜甲袂講了了了，獻堂仙干礁加聰明十四歲爾，毋閣伊e輩份真懸，林雙隨噯叫伊叔公，聰明仙嘛仝款，互獻堂仙感到真歹勢安呢。
聰明仙佇法國e時瞬，有一擺順續去瑞士耍，佇高山旅館歇睏e時瞬，看著一陣阿啄婆仔，穿布鞋欲去Jungfrau山峯，輸人毋輸陣聰明哪吓使下消e，嗯才e瞬呤，自那捸尹去山，無疑悟山路艱苦，積雪淹腳目，經過一位天公崎絕路（斷崖絕處），頂頭無看著山頂，下腳萬丈坑崁，路面積雪，毋知踏落吓滑落抑袂？聰明仙驚甲一个面簡那肫le，後壁遊客壹直捸來，好啊！港潦落矣，恁父忖死ea，殘殘叨給行過去，好佳哉腳踏位硬硬，無踏著雪堀來滑去，呾這嗎e問題是返來e時瞬欲按怎？無毋著，返來時嘛是仝款驚甲褲底僬霑去，才閃過這个難關，聰明仙e回憶錄內底有咧講，这是伊一氏人上介恐怖e經驗。
1928（昭和三年，民國17年）三月初，聰明仙逶法國馬賽港坐大船返來台灣，結束伊二年四月日e留學生涯，伊這段留學e台北醫專e藥理課，由內科高橋老師代理上課，伊真正感謝安呢，聰明仙坐大船由地中海，蘇伊士運河，阿拉伯、印度洋、麻六甲，一月日了後駛到香港，彼个時瞬，夫人林雙隨早著搭船來香港肖等，呾尪仔嫫二年半無見面矣，再次相逢，不止也歡喜安呢，尹佇香港附近停一禮拜，了後佇4月11日安抵基隆港。
36
所以講聰明仙，叨「天公仔囝」真好命哩，佇大日本帝國扶擔看重以上，坐大船環遊世界壹周，遊覽先進諸國，这佇民國15年左右彼个時代，是無法度想像e代誌，聰明仙踏著機會，佇消遙歡喜e西洋日子，拄好是同窗兮蔣渭水醫生，蔡培火……尹規陣人佮阿本仔咧捙拚，死伍Ket流擺，伊佇美國e時瞬，文化協會開始分裂左派右派，伊佇德國e時瞬，渭水佇台中成立「台灣民眾黨」，對抗日本殖民統治，全省轟動，阿本仔氣甲嘴鬚拍袺，好佳哉聰明仙身在海外，閃開這場乏搭款（尷尬），抑無，平平同窗兮平平台灣人，若給肖招，欲按怎參加這場「盛會」安呢甡？
1928（民17）五月，聰明仙返來台灣，繼續佇台北醫專做教授，教藥理學，伊真感謝內科高橋教授，佇伊留學歐美這段時間來代課，無外久e中間，總督府方面落命令，叫聰明仙解決一个真硬斗e社會問題，聰明仙看著內容呤，面色反青，腳手僬麻痺去矣，哎！「食人e飯，患人e問」，汝是專家，汝幵大條公款去留學，定著噯替政府解決難關，抑無教授咧做假e呢！這款代誌「昊內無坎、嘛噯去」，嗯才「硬著頭皮」港潦落，滿口答應去解決，人客啊？逗底是啥乜代誌啊？總督府下令「目前政治清明，社會經濟進步，毋閣政府上大e困境，叨是台灣有16萬7千人e鴨片煙癮者（政府真正為難），茲e人 ，咱袂使總給摋死。嘛法度總互伊繼續，揙做政府施政e大毒瘤，才拜託藥理家杜大教授，研究一套矯正治療方法，逶藥「食嗎啡鴨片e人」給戒除大煙癮，互社會安定！」
聰明仙按著任務了後，咧含心敆命，拚暝拚日咧激頭腦，想著一套優秀e治療術，咱跋白e，巴鴨片煙毋但台灣爾爾，佇中國內地，滿州、朝鮮宛那真食力呢，趕緊做調查佮了解，第壹步，伊先採樣，去「艋舺愛愛寮」實際查訪，愛愛寮是善士施乾所主持，收留社會上無依無倚e艱苦人，精神真偉大安呢，呾聰明仙叨好命人哩，一下拜訪才知影「巴〔baa〕鴨片煙」確實是社會悲劇e根源，聽落吓互汝聳雞母皮，有一个大稻埕e好業人，得著風流病，逐工注射嗎啡可達因，財產幵了了，昏倒佇路邊，夆送來愛愛寮，悽慘落魄，逐工傷悲「以屑洗面」，聰明仙調查一段時間，又閣利用二月日e時間，去朝鮮、滿州、中國內地，研究尹遐巴鴨片e情形，聰明了解這个問題e嚴重性，資料收集完畢了後，佇1929年底向總督府，提出全面戒除「巴嗎啡上癮者」e治療方針。
民國19年夏初，中國大陸，搪咧發出驚天動地e內戰，奚叨是有名e「中原會戰」，蔣介石e百萬大軍佮馮玉祥北方聯軍e「南北大戰」，生死決鬥雙方死傷慘重，佇台灣方面，宛那有一場「寧靜e革命」，杜聰明博士，領導一批醫生，學者，創立「更生院」（這嗎延平北路源州街口，舊時林清月醫院），強制治療菸癮卡重e患者，向規百年以來e鴨片煙仁士宣戰。另外一方面嚴禁新e患者，互尹袂使「食稠e」，雙管齊下，這場偉大e戰役。壹直延長到光復了後。攏總舞十六年安呢，實在講起來尾也嘛舞無路來，也叨阿本仔敗戰投降，頭傢退出台灣，民36年，二二八發生，摋甲烏昊暗地，聰明仙性命不保，對「巴鴨片」這款腳搔代誌，自那「兵荒馬亂之際，草草了結。」
話頭分二爿，搪當聰明仙靠勢官方上介志揚，上介發展e時瞬，亦拄好是伊好朋友蔣渭水醫師，上介反對日本殖民統治e場合，政治立場無仝，叨真歹矯哩！聰明仙若想起十年前，佮蔣渭水佇和尚洲（蘆州市）密謀暗殺袁世凱e往事，叨感覺真艱苦真歹勢叨著，呾蔣渭水這十外年以來，佮日本仔死伍ket，門扇板咧逗袂峇，官廳看待伊是「眼中釘」，日本皇帝逶大正氣到昭和，對這位台籍「叛逆」，有影頭殼摩咧燒，干干礁無伊法叨是無伊法，聰明仙私下佮蔣渭水真好，不時嘛咧行踏渭水e「大安病院」，呾平平蕃薯仔感情食佳，伊咧做石磨仔心，這棚戲是欲按怎矯落去！各位人客啊！杜聰明佮蔣渭水後果如何？請看下腳發展！
呾蔣謂水是一个真正特殊e「革命家」，伊自二十歲成年，壹直到病死43歲為止，吓使講一氏人攏咧為台灣拍拚，有人尊稱伊是台灣e國父，真正做了有起呢！伊e政治事業，有四个特色。(一)伊一氏人主張和平e方式來改革，為台灣人謀福利，这佮仝時代蘇聯e共產主義武力革命差真贅。(二)伊對理想性e原則，絕對堅持搭底，無欲妥協，这佮獻堂仙尾溜也做評議委員，蔡培火落軟宛那無仝。(三)有功勞時，伊「不居功」，翕相e時瞬坐佇上邊也，無欲占中位大位。(四)伊做代誌真搰力拍拚，港潦落，拚落，鏘落，拂落，毋驚死，有犧牲e精神。
蔣渭水23歲時，有佮杜聰明、翁俊明……，佇和尚洲佮艋舺，計域欲暗殺袁世凱，來報答國家，民國10年，伊31歲，有佮叔公獻堂仙，組織「台灣文化協會」，開始宣揚台灣人e政治理念，民國13年1924春天，「台灣治警事件」互日本人掠去攏仔內關四月日，頭擺來試鐵窗e滋味，民16年佇台中組織「台灣民眾黨」專門為台灣人講話，民眾黨曾經趁電報員下班時，毋捌英語e特性，上書「國際聯盟」講日本人夭壽骨，公賣鴨片膏趁錢，毒害台灣人，嘛指責日本當局阻擾國民革命軍北伐「山東慘案」，嘛向日本國會”投”講日本人欺侮泰雅山胞，引起霧社事變。
也叨蔣渭水一工到暗，佮阿本仔咧「一枝長，一枝短」，致使阿本仔猴見羞返想氣，給點油做記號，欲掠伊來出水，聰明仙對蔣渭水e處境，真正驚惶緊張，伊真正矛盾安呢，一方面驚伊受著傷害，一方面嘛暗中支持伊e理念，毋閣伊是總督府e高等官，噯「忠黨愛國」效忠天皇，毋敢甚介入，干礁暗中真給關心爾爾。昭和六年1931二月十八日，台灣民眾黨第四次大會，嘛是最後一擺e大會，佇台北召開，出席172位黨員，開會開甲一半呤，台北警察署長一行人，洶洶衝入會場掠人，勒令會議停止，宣佈伊是非法組織，而且當場逮捕蔣渭水佮幹部十六人，掠去派出所拘留。
叨安呢，台灣人頭一个政黨「台灣民眾黨」，自民國16年夏天到民20年春天，叨恬恬來結束矣，留落來百姓真贅感慨佮怨嘆，蔣渭水自安呢了後，「身心受創頗深，橫直阿本仔叨是看伊袂作e，六月尾身體返醜，壹直高燒婁屎叨著，落尾也檢查，才知影患著法定傳染病「傷寒」，這款毛病死亡率一成二成爾，無親象霍亂、瘧疾赫尼危險。
昭和六年，1931七月初蔣渭水蹛入去台北病院治療，咱阿水仙真驚日本人給陷害，嗯才每一擺食藥，攏噯經過杜聰明親身領取檢驗，伊才敢食，聰明仙真正感慨，十外年e好朋友，得著大症頭，伊又閣回想起十七年前，恩師小竹校長著TB肺結核e悽慘，伊行到醫館e尾間，遙望大屯山、士林，目燒鼻頭酸，心肝一瞬e艱苦，傷寒是法定傳染病，無法度接觸甚久，雖然死亡率無懸，毋閣彼時代，氯黴素Chloro猶未發明，宛那有伊e危險性，聰明仙佇台大病院照顧蔣渭水病情，有一月日赫久，每一擺看著伊e面，叨想起十八年前和尚洲開會，欲教示袁世凱e往事，心肝頭有影感慨閣再感慨！
蔣渭水，入台北病院治療傷寒病，毋閣真不幸，伊e病情壹直無起色，遂顛倒食力，佇生死關頭，聰明仙真著驚，咁吓小竹校長e過往，欲閣重演？到八月初e時瞬，渭水仙已經摯載袂稠矣，伊面色蒼白喘氣袂順，伊拜託杜聰明到病床前，交待遺囑，杜聰明目屑遴遴擱，喉脘滇，生死離別e艱苦，哎！人e運氣，人e艱苦，彼个時瞬病床圍一大陣人，這張相片有留落來，佮「國父」孫中山臨終前相片差不多，結局e瞬呤，一代偉仁蔣渭水醫師佇1931八月五日病逝台大病院享年43，消息傳出去，「舉國同悲」，關心者紛紛落屑，也叨「法定傳染病」e關係，下晡遺體馬上火化，紀念儀式另工舉行。
8月23日，渭水仙e葬禮告別式，佇大稻埕永樂座（這嗎迪化街霞海城隍廟前方的一百公尺外），遵照先生e理念，現場布置樸實，叫「大眾葬葬儀」，有遺像佮簡單輓聯「大義受大名，生據大安做營陣，死埋大直，大夢誰先覺」「眾民規眾資，功恐眾志以成城，力排眾難，眾醉君獨醒」，來參加告別式e民眾有五千外人，逶永樂座偰甲欲出油去，人群佳繹鏘鏘滾，四路民眾含屑悲，真正哀榮叨著，彼時瞬天落大雨，哀愁e民眾宛那恬恬徛遐，無人離開，台灣人上偉大e英雄！汝安息吧！汝吓庇佑台灣人兮！
蔣渭水e葬禮，是民國20年8月，離現主時75年矣，彼時瞬台灣人真巧，有人逶規e過程，給翕做紀錄片電影，這枝電影佇74年了後，由台北市政府以三佰外萬買落版權（待查！），了後佇民國94年秋天，佇公共電視台播出，註死毋死，拄好小弟有看著，人講「槍籽扑著肚臍空」，天理昭昭，互汝袂鐵齒e，影片當中，送葬者穿白衫，排列整齊，有落雨，有簡單雨幔穿著，一路逶大稻埕，行到大直墓場，這枝紀錄片，算講真珍貴安呢。
蔣渭水喪禮，一月日了後，中國滿州發生驚天動地e「九一八事變」，咱e想法是「日本侵略中國，中國人真憤慨」，實際上拄好倒翩，中國e大官軍閥顛倒歡喜，因為日本人無意中替中國解決大問題，「龔德柏回憶錄」寫甲真清楚，北伐統一了後。「南軍」內部分裂，蔣介石佮李宗仁「勢同水火」，必須用戰爭來解決輸贏，嗯才e瞬呤，雙方攏買上好e武器，上贅e兵隊，欲決鬥決勝負，這擺關鍵性e戰爭袂使輸，抑無後日叨悽慘落魄，李宗仁甚至用偷食步兮，有飛機參戰，雙方佰萬大軍撕殺，按算9月20大戰，「幸好」日本人佇9月18日發動瀋陽事變，雙方才同意罷兵「一致對外」，停止內戰，減少真贅兵士e死亡，真正阿隬陀佛，好佳哉日本人來挽救，抑無若慢幾落工才扑918，中國這聲叨爛糊糊矣！中國e內戰，噯倚靠日本人來「幫忙」解決，有影臹譀啊！
第十章 名師高徒李鎮源
戰時疏幵真硬斗
（1936～1945）
37
日本人咧講「帝國大學」，佮咱講e「帝國主義」，平平是帝國，意思無肖仝，目睭花花，毋倘匏仔看做菜瓜，帝國大學叨是設備真好勢，仁員真優秀膨沛e壹流大學，伊有學術上e尊嚴佮地位，真正是「喚水吓堅凍」，讚叨是讚，互汝袂hau6韶e，佇聰明仙讀滬尾公學校e時瞬，日本嘛才一間「帝國大學」爾，人講「東京帝大」，通人嘛比大頭拇，尾也日本利用「義和團庚子賠款」，又閣設一間「京都帝大」宛那無簡單，日本到戰敗結束，全國嘛才九間「帝大」爾爾，所以講帝國大學是真珍貴e國家機構，吓凍踮帝國大學做教授教冊，宛那是真正受人尊敬，真正有面子e代誌叨著。
1928，民國17年，日本人已經統治台灣三十外年矣，才有欲成立「台北帝國大學」，汝看外硬斗叨好，事先e準備，幼秀妥當盡磅逗搭，这哪著閣講，所以講干礁欲培養杜聰明，做台大藥學領導者爾，叨用真贅費用佮時間去投資，互伊得著足好e學識，才吓凍赴教學佮研究e重任，聰明仙佇歐美留學了後，台北醫專佇1936改做台北帝大醫學部，所以，佇帝大做教授，教育英材安呢！伊做人老實，做學問頂真，眾人是謳咾甲欲触舌，佇國際上享有名聲安呢！
杜聰明逶民國十一年，做台北醫專e教授，做到民國25年，攏總有十四年e時間，算講一氏人上介食肉e年代，攏賣互醫專叨著，毋閣醫專細細間也，無三無二，無啥乜研究e前途安呢，呾這嗎帝大醫學部，奚叨無仝款矣，伊代表大日本帝國上大e學術機關，預算錢額真贅，研究仁員一大堆，欲啥有啥，做研究做學問，攏真好勢叨著，親象聰明仙這款巧人，一聲嘛橫長直破sng sng叫，拚落拂落，金光鏘鏘滾，學問研究讚叨是讚，真正互汝謳老甲有偆去。另外有二項重大e權利，叨是(一)吓使授以學位(二)單獨審查論文。
也叨杜聰明佇台北帝大，地位懸權利大，人講「樹大招風」，開始有人對聰明仙不滿，對聰明仙甕肚（妒忌），朝鮮京城帝大某教授，來函抗議講，聰明仙無大學學位，而且腹內學問無夠，欲哪吓使踮台北帝大坐大位，領懸薪，這个時瞬，逶日本內地派來e三田教授出來主持正義。伊解釋講醫學校制度是三十冬前，殖民統治e過度產物，並無另外醫校，尹所招生攏是台灣地第壹流e仁材，學位問題有姑不而衷e困難，後來叨無啥乜人來抗議伊安呢。哎呀「家已擔肥毋知臭」，台灣人叫啥乜人做教授，佮朝鮮仔有啥治代，自安呢了後，聰明仙毋但無夆刁難，遂顛倒升官，昭和十二年1937升高等官二等，五年後升高等官一等，台灣人日本時代上懸位，互伊真正有面子安呢！
杜聰明佇台北帝大e藥理學教室，發揮真大e功勞，伊培養出世界級e仁材，奚叨是李鎮源博士，李博士佇蛇毒方面e成就，聰明仙點點滴滴佇心頭，頻想著叨歡喜丹丹，嘴笑目笑，險險也給收起來做尹囝婿，「文教界傳為佳話」！李鎮源e博士論文是「鏈鎖蛇蛇毒」，伊中年了後做過台大醫學院院長，中央研究院院士，國際毒學會最高榮譽「雷迪獎」，而且關心民生，廢除刑法一百條，推動台灣入WHO，加入聯合國，實在講起來，李鎮源博士e成就，已經超過老師杜聰明，真正是「青出於藍」，伊是聰明仙上介得意e門生安呢甡。
呾e瞬呤，聰明仙咧捍台北帝大e藥理研究，隨人認真拍拚，士氣高昂，佇聰明仙搪咧歡喜e時瞬，大日本帝國e歹運，「烏牛大影」漸漸罩倚來矣，日本天皇已經無法來控制少壯軍仁e僥擺，少壯軍仁得著台灣、朝鮮、滿州，猶閣袂滿足，繼續楦大e結果，e瞬呤，最後潦落佮美國決壹死戰e悲慘運命，日本軍閥逼迫家已子弟去送死，真正人類大悲劇，菲律賓之戰，五十萬日軍戰死，造成這五十萬家庭哀父叫母，永遠e痛苦，攻陷沖繩之役，「軍民几乎全部戰死」，死26萬人，老幼婦孺，斷頭斷腳，「不忍卒睹」，差不多滅種仝款，咱台灣算講猶袂醜，食幾粒仔炸彈，稍寡代誌爾爾。
日本軍人心肝甚狠，家己膨風，害著百姓國族滅亡，艱苦坐卦，上主要e原因，叨是日本e科學輸人忝忝，（第壹點）民國24年，英國查得威發現中子, 得Nobel 獎, 此項關鍵成就, 使得已沉寂三十年（1904～1934）e居禮夫人鐳235放射線，奚叨吓凍進入原子彈e可能，這个代誌美國、德國攏有咧研究，干礁日本仔猶攽外外，無咧給信斗，逶1905愛因斯坦能質互換E＝mc2，袂記了了，連一台加速器叨做袂出來，干礁夯武士刀，呀！呀！呀咧展氣魄，安呢是無卡擢啦！莫怪廣島長崎食原子彈e時瞬，猶戇戇毋知啥碗膏。（第貳點）美國有雷達，日本無，逐擺空戰，日本簡那青瞑牛le，是欲哪戰吓起磅？
1941十二月，日本突襲珍珠港，日本佮美國e決戰爆發矣！这是東方佮西方衝突必然e結果，實在講，日本佮美國e決鬥，早叨看吓出來，也叨1896日本利用甲午戰爭，占有台灣e時瞬呤，「拄好」1898，美國嘛占領菲律賓，來給「對抗」，「陳皮蘇黨」、雙爿有繃安呢，美國來占菲律賓，實在是防禦性e進占，有不得已e苦衷安呢！这叨親象，德國攻扑波蘭時，俄軍真驚惶，嘛趕緊派兵占波蘭邊界差不多，所以講二次大戰，美國日本必然決鬥戰爭，这是無法度避免e，「一山不容二虎」，事後有些研究，日本船團偷襲珍珠港，美國早叨知影，毋閣伊無講，等日本偷襲完成後，才逶「後果」呈現給美國國會佮人民看，美國才上下一心潦落宣戰，抑無，阿啄仔壹般驚死，無愛挑起戰爭安呢，汝給看，日本偷襲珍珠港時，按怎航空母艦攏無損失，「拄好」遠遊外地？
38
杜聰明佇台北帝大藥理研究室，咧教冊e時瞬，拄好二次大戰扑甲真起磅，百姓是艱苦甲叫毋敢，日本佮中國、美國戰爭、伊真驚台灣人反叛日本軍閥，所以實施「皇民化運動」，規定台灣人噯改姓名，如「黃元興→廣田元興」，厝內厝外壹律噯講東京話「講國語」，噯拜日本神社保平安，無幾年中間，戰事緊張，物質客欠，官廳兮方面有咧管制，烏市e物件漸漸來出現囉，規社會無論好業人，散赤人，生活返捯漸漸食力。
聰明仙每年攏吓趁歇辣（暑假）e暇期，掣著厝內氏細，落下港，沿路拜訪親戚朋友佮「舊時同窗兮」，吓使四界行行e，嘛順續連絡感情，講一寡卡早心適代誌，佇彼个平均壽命卡短e時代，这宛那真要緊，民國25年到30年這段期間，伊迭迭掣大查某囝杜淑純落下港行踏，彼時淑純才十三、四歲爾，對仁生e應對進退，各所在風光，攏互伊大開眼界，另外食飽穿燒，四界受人歡迎，有影比仝年歲e囡仔，加臹好命，講起來这人e運命著咧。
民國28年，1939聰明仙到高雄時，上愛去尋老同窗彭清靠幵冓，尹二人是三十年前讀醫學校時「舊時e同窗兮」，感情臹好，呾這嗎逐傢欲五十歲矣，想起卡早二十歲時瞬e學校生活，叨糖甘蜜甜，嘻嘻哈哈講袂煞，有時仔嘛吓吐大喟，若講著蔣渭水，小竹恩師鼻酸目燒不止也感慨……，彭清靠彼時佇高雄開婦產科病院，真正出名，落尾也有做到議長，二二八e時瞬，阿山兵仔彭孟緝3月6日佇市政府，火車頭，「大肆屠殺」，好佳哉彭清靠閃有離，驚一下袂講了了。
聰明仙佇高雄e時瞬，暗時蹛彭清靠e公館，受彭醫師熱情e招待，不在話下，聰明仙可能是這層關係，對高雄有興趣，嗯才十六年後，佇茲成立「高雄醫學院」造福社會，彼年佇彭家公館，聰明仙e大查某囝淑純，熟似彭清靠e屘囝彭明敏，尹二人仝歲頭，攏是民國十二年出氏e，平平攏讀高中，毋閣彭明敏冷冷清清恬寂寂也，無噯講話，做人是忠厚簡那佛祖e，二人無啥乜講話，致使講暗時仔，淑純佮美惠（彭女兒）睏做伙e時，偷偷也給問「這个人，nae即尼恬，無噯講話？」
人講「恬恬食三碗公」，袂吠e狗才是厲害，這位彭明敏少年傢仔，日後佇1950到2000年這五十年當中，逶台灣e政治界是舞號金光鏘鏘滾，昊轟地肉翩，連臭頭仔叨去互伊氣甲胃出血，血壓擎到二佰貳，彭明敏高雄中學卒業了後，以優秀e成績考入東京帝大政治系，返台灣了後，讀台大又閣做助教，尾溜也留學加拿大、法國，提著巴黎大學e法學博士，是「國際法」e世界權威，落尾返台灣做台大政治系主任，榮獲「十大傑出青年」，互臭頭仔真正看重伊，想欲培養伊做「台灣人」e樣版，咱講白e，若毋是伊「反叛老k」，彭氏一路浮夯，可能吓做到總統，尾溜也叨無李登輝一路起磅（做到總統）e齣頭。
1964，民國53年，彭明敏佮學生魏廷朝、謝聰敏發表「台灣人民自救運動宣言」，公然鼓吹台獨思想，這聲「門扇板咧逗袂峇」，臭頭仔氣甲嘴鬚拍袺，自那給掠起來，判八年安呢，落尾也受著國際壓力，給攽出來，改用24小時監視，民國59年彭閃開特務，化裝逃出台灣，到美國、到瑞典，轟動國際，變做世界性e大新聞，23年了後返台灣，變台灣人英雄，而且參選總統，彭明敏回憶錄內底，上介互人感心，叨是伊欲逃離台灣e進前一暗，半暝提尺，來量囝兒長度，依依不捨，互我这自來鐵齒e人，嘛鼻酸目燒真感動。
聰明仙佇高雄拜訪彭清靠了後，又閣掣淑純去台南拜訪林茂生家族，聰明仙佮林茂生熟似真久感情真好，逶台灣捌到日本去，來來去去不時嘛咧肖拄，雙方e下一輩嘛互相真熟，杜淑珍佮林茂生e后甡林宗義，佇台北嘛迭迭見面，有影捌甲有偆去，林宗義無簡單，後來提著東京帝大醫學博士，轟動台灣醫界，落尾返台灣佇台大醫學院做教授，林茂生佇日本時代是大出名人，宛那博士出身，佮蔣渭水真好，迭迭參加「文化協會」e教育者，對台灣貢獻真大，毋閣真拍隕，二二八時，去互「中國仔」阿山兵摋死，杜聰明逐擺想著茲，鼻頭叨吓酸軟！
1936，民國25年元月，台北帝大醫學部招收第一屆學生，攏總有四十名，台灣人占十幾个，彼个時瞬表面上山田教授掛名，毋閣實際上有關教學內內外外，攏是聰明仙來捍頭，聰明仙彼時四十捅歲，身強體壯，精神飽滿，真正嗣大做了有起，袂輸「地下院長」仝款。
彼十外个台籍學生，迭迭來杜聰明厝內幵冓飲茶，講東講西，有李鎮源、許強、彭明聰、蕭道應、謝有福、邱仕榮，尹大概也比淑純加八歲左右，彼時淑純十四歲囡仔爾爾，經過四、五年了後，逐傢擱甲真熟，袂輸仝一傢人仝款，民國29年，淑純嘛十八歲矣，聰明仙e愛將李鎮源，對淑純真正甲意，去歃著頂腹蓋叨著，想欲娶淑純為妻，聰明仙真歡喜，一聲叨答應，毋閣當事仁淑純遂恬恬無講話，聰明仙佮李鎮源逗陣四年外，對李鎮源e學問、道德、做人真優秀，是謳咾甲有偆去，這層因緣無成功，實在真拍隕，尾溜也李鎮源得著博士，嘛做過台大醫學院院長，中央研究院院士，國際毒物專家，是國際上出名e大學者。
民國26年左右，李鎮源迭迭來聰明仙厝內，研究學問參詳代誌，彼時淑純拄好高女二年級，不時請教李鎮源一寡問題，李鎮源e學問真好，吓使講萬事通，閣卡困難叨考伊袂倒，呾春來秋去年久月深，李鎮源逐漸漸來意愛著淑純，彼時李鎮源蹛佇這嗎國賓飯店後壁，尹老母佮小妹來台北e時瞬，迭迭逗陣食飯幵冓，所以淑純佮李鎮源一傢人，宛那真熟真好禮，簡那一傢人仝款，無啥乜分別。
也叨鎮源仙，對淑純有意思，聰明仙定著知甲有偆去，鎮源仙真敖翕相，伊想欲送純一台相機，毋閣心肝內歹勢，自那託「岳父」聰明仙轉達，聰明仙想想e，安呢無妥當，雖然伊贊成淑純嫁李鎮源，毋閣淑純若反對，到時瞬這台相機吓揙做「燙手山芋」，退亦毋是，無退亦毋是，是欲按怎收山攬尾才好？到時「見景傷情」，相機變做心靈創傷e物件，實在無妥當，嗯才當面給李鎮源「婉拒」，鎮源仙一下聽著老師e分析，感到真有理，嘛真佩服，真正杜教授仁情世事萬項通透，無咧做假e呢！
有一回李鎮源尹小妹來淑純茲憩陶，暗時仔欲睏e時瞬，叨問講淑純對鎮源e意思按怎，咁有欲嫁伊？彼个時瞬，淑純才知影李鎮源真正是咧「玩真的」，按算淑純高女卒業e時瞬，叨欲訂婚安呢，淑純坦白講，我卒業了後，欲去日本留學，猶未欲嫁尪安呢，民國29年1940，淑純去日本讀「駿河女學院」，有一擺杜聰明拄好掣李鎮源，去日本參加藥學會議，某一日早起時瞬，李鎮源出現佇學校門口等伊，淑純出現時真正驚喜，這个時瞬鎮源仙袂顧兮身份，自那手給牽稠e，淑純馬上捃開（掙脫），唗入去學校「好矣！時間袂赴矣，我噯趕緊去上課矣！」留鎮源仙一箍人怢怢〔qang6〕，自安呢了後，鎮源仙叨無閣再攪擾伊矣！（註：李鎮源兄筆者民國60年讀台大醫學院時e藥理主任，有教過筆者，所以小弟特別有興趣）。
聰明仙宛那有最後一擺問淑純，給伊分析鎮源e好醜長短，毋閣淑純嘛是拒絕，伊看著老父安呢失望e表情，嘛是真艱苦，毋閣感情e代誌，叨真歹勉強安呢，另外一點，李鎮源e家庭是一个真虔誠e佛教家庭，佮淑純基督教背景袂洽，这「門扇板咧逗袂峇」，宛那無法度哩，這點來講李鎮源無罪，杜聰明有顛誕，也叨原本老父杜日鳳、黃玉階攏是真虔誠e佛教徒，老父杜日鳳日夜伏祀觀音媽，佮迭迭抄佛經e代誌，聰明知甲有偆去，是聰明仙為著娶林家姑娘，背叛家庭信仰，家已「林投葉拭尻倉」，掠一尾蟲撓尾椎，害著囝孫艱苦，家已摋家己爾爾。
落尾也，有人紹介板橋林家花園e公子林衡道互淑純，林衡道是東北帝大經濟系卒業，漢草大欉，言語幽默心適，又閣體貼周到，淑純看了有甲意，民國33年大東亞戰火瀰漫e時瞬，決定結婚，林衡道e老父，林熊祥，板橋林家e好業人，毋閣伊e錢銀家己搦稠e，林衡道空有名份，橐袋仔迭迭咧袋磅籽，真正遺憾安呢。
林衡道佮淑純這場婚姻，宛那真奇怪，彼瞬林佇上海咧食頭路，驚返來台灣危險，所以請淑純去上海結婚，民國33年七月，真贅日本船互美軍擊沈，海路危險，尾也自那坐海軍e專機去上海結婚，汝給看結婚伊赫艱苦，實在譀古，這場婚禮，干礁杜聰明（父女）出現，其他男父、男母、女母攏無在場，哎！呾是咧揙啥魍呢，林父林熊祥是日本皇民奉公會長，有捐錢買過飛機，所以有機會坐軍機專程去上海結婚，真正財源豐富，身份地位讚叨著。
39
1939，昭和十四年，彼時瞬太平洋戰爭猶未爆發，日本國勢強大，咱聰明仙舉辦一場全日本國e藥理學會，邀請全日本一百外个專家來台灣開會佮觀光，辦甲真風光，安呢「轟轟烈烈」盡磅逗搭舞甲金光鏘鏘滾，互台灣人真有面子，做了一擺真成功e國民外交，叨著，原來舊年1838第十二回日本藥理學會，有決議隔返年1939e第十二回藥理學會，噯踮台灣台北市舉辦，由聰明仙博士全程負責，咱聰明仙得著這項任務了後，亦歡喜亦驚惶，哎！憑我聰明仔一箍人溜溜，欲按怎舉辦即尼大型e全國會議？聰明仙暗時倒佇房間，用心計較咧激頭腦，含心敆命咧矯鋩角，想閣再想，寫閣再寫，真正是舞甲頭大面肆方，毋知欲按怎才好勢，日本內地是一个進步強大衛生文明e國家，咱台灣是落後、洛倯、庄腳e所在，欲按怎來按內茲日本全國e學者，这真正硬斗，千斤萬重絕對噯矯互直，才袂失去咱台灣人e面子，人客啊！這棚戲曲，台北帝大藥理教室主辦，是欲按怎搬落去？
「第十三回藥理學會」e年會，決定佇台灣，台北帝大主辦，日期是1939年十月21、22二工，由杜聰明全程料理，這擺e貴賓內底，尤其包含十八年前，聰明仙讀京都帝大時e恩師森島教授，閣卡互聰明仔腳手肉疲疲搐，心肝頭驚兮咧等安呢甡，……總講一句，這擺e感會絕對噯成功，袂使有顛誕去，这是全台灣人e面子，毋是我聰明仔一个人e代誌爾爾，無論幵外贅錢，外贅時間，我攏噯潦，展一个仔蕃薯仔e氣魄咧！
有關時間方面，訂10月21、22，這个時瞬，台灣燒辣e氣候，漸漸轉涼，舉辦活動有卡舒適，而且風颱期嘛過去矣，來去返倒有卡方便，食e方面，一半日本料理，一半台灣料理，互尹知影異鄉e滋味，甡了按怎款？這項空課，由大稻埕江山樓來承擔，遐e台灣料理，絕對正港閣好食，袂互人失禮叨著，另外上要緊，叨是開會煞戲了後e台灣南北遊覽問題，这佇七十冬前e安排，宛那真硬斗，初步e估計，分做三組，每組五十人左右，这事先e食、蹛、車輛，攏噯約束好勢，另外利用半工e時間，紹介咱台灣地文化e牛角（象徵），互尹了解咱台灣文化佮日本大和族文化，有啥無仝，呾這嗎上介煩惱e代誌，叨是蹛e問題，彼時台灣干礁有普通旅館爾爾，無國際性e旅館，台灣蚊蟲、戶蠅厚，才拜託貴賓大仁多多包涵！
呾開會e前進二、三工，漸漸有貴賓代先來報到，聰明仙趕緊派人給按內，大概也掣尹去龍山寺、保安宮行行看看e，也叨汕（散）客爾，儘量互了解台灣特殊e文化，壹直到10月20日下晡，全員攏總到齊矣，有195个教授專家，彼暗仔，聰明招待尹，踮大稻埕江山樓，設宴款待，即日本學者，頭一擺食著台灣式料理，感覺真奇巧、真心適，台灣屬於熱帶氣候，佮日本內地有真贅無仝款，趁這个機會，別有一番e感受。
10月21日早起會議正式開始，由杜聰明親身主持致答謝詞，感謝全日本e藥理學者，來參加盛會安呢，續落是論文e宣讀，分「口頭報告」佮「書面報告」二款，專家仁材僬僬鬧熱滾滾，下晡e時瞬，開會決定明年e年會，欲踮新潟市Niigate舉辦，由原木教授負責，逐傢拍蹼仔通過。
暗時仔時瞬，踮草山e別館，宴請各位學者教授，彼時草山（今陽明山風景區）已經整理甲真好勢，風景真嫷，又閣有倘浸磺水（泡溫泉），臹合日本人e喟口，眾人謳咾甲吓触舌，尤其初秋之際，清風瞬瞬雨水頓點，楓紅樹綠，宛那真有氣氛，有對聯講「溫泉、瀑泉、山泉，秋徑雨冷風寒。」彼暗e聚會，老教授森島宛那在場，森島是聰明仙二十年前（1919）留學日本時e指導教授，聰明仙na致詞na流目屑，真正感激，森島嘛仝款真感心，有即尼優秀e學生，宛那真有面子安呢！
第二工，10月22e會議，由主辦者台灣方面e學者，提出有關蛇毒方面e論文，逐傢聽甲耳空搕搕，真正有興趣叨著，哎呀，咱台灣地屬熱帶副熱帶，仈項叨無，蛇e方面真豐沛，彼个時代毋捌寶，佇七十年後e今仔日，有真贅藥劑是逶蛇提練出來，真正有「遠見之明」叨著，下晡e時瞬，規陣學者受邀去總督府賓館，「飲茶敘舊閒話桑麻」備受禮遇，算講官方宛那不止也看重叨著。
暗時e宴會，訂佇蓬萊閣大餐廳( 今雙連 南京西路163號)，伊開幕無外久，裝潢設備真新，場地曠闊氣氛臹好，伊e菜色閣卡幼路，另外有做一寡日本料理冷盤，互學者選用，蓬萊閣佇這嗎圓環法主公廟e斜對面，伊e隔壁無幾間，叨是天馬茶房，是二二八事變導火線e起源地。
夤暗是會議e最後一工，明仔載逐傢叨分批去南北各所在遊覽，聰明仙以主人e身份，紹介咱台灣文化e特點。（第壹點）咱台灣菜e芡芳（香料）是以薑母為主，麻油雞、薑母鴨、紅燒魚頭、爆炒……，这佮中國大陸以蕃椒、大蔥，日本味無仝。（第貳點）台灣話是以半鼻音為特色如「聽聲看影，心肝想按怎？」非常特別，这佮東京話、北京話、朝鮮話、廣東話、英語……攏無肖仝。（第三點）台灣人e宗教藝術，以拜媽祖佮歌仔戲為主，另外布袋戲佮有北管為輔助。（第四點）台灣人庄腳有二款細間廟仔，一款是土地公廟，叨頻若開墾者有收成，叨吓馬上砌廟，來感謝天公伯仔e恩賜，另外一款是「萬善同歸」廟，專祀無主屍骨，互尹e香煙吓凍繼續，算講真有仁情味叨著。（第五點）茄苳樹是台灣所在e「國樹」，伊e枝骨漢草真嫷，台灣全省南北西東，攏有茄苳腳e地號名。（第六點）台灣人真注重「死後e風水地」，所以講風景好e所在，大部份是墓地，活人無咧蹛。（第七點）台灣人寒冬有食烏魚籽e風俗，已經有三佰外年e歷史。（第八點）台灣人e碗、盤、湯匙喜用白色，日本人噯用烏色e。
40
聰明仙主持「「第十二回日本藥理學會」，吓使講是戰前e「黃金時期」，尾溜也大日本帝國潦落戰爭e爛膏摩仔，是扑甲歪篙莿斜，心苦病疼，強欲袂收山攬尾e，互人料想袂到，親象日本人即尾幼秀好禮e民族，吓舞出即大條代誌，咁講日本天皇真正互茲少壯軍人，壓袂稠是毋？聰明仙e藥理學會10月尾佇台灣舉辦，毋閣歐洲方面勢面惡化，前進一月日，德國強行出兵波蘭，吞併奧地利，死亡袂尐e人，英俄對德宣戰，美國驚死，宣佈中立，徛懸山看馬隻肖踢。
1941十二月初七，日本聯合艦隊55隻，「偷襲」珍珠港逼美國潦落火山深坑，呾烏仔魚去互濁水激著矣。嗯才無鏘袂煞，事實上我咧看，美國應該事先知影才著，抑無，所有e航空母鑑，哪吓「拄好」出外無置e？人e運命歹講，叨無三二輦半手。日本仔叨夅筴去配矣！美國無論科技、物質攏超過阿本仔，美國搪咧核子反應炉做原子彈時，日本人猶咧練武士刀，呀！呀！哈！哈！咧展氣魄組兮，真正袂孝孤咧啦！
民國30年12月日本偷扑珍珠港，毋閣真緊，過返年七月呤，叨發生中途島大決鬥，日本失敗漸漸落坑，民國32年美國專心扑歐戰，雙爿暫時歇睏，毋閣到民國33時瞬，美國翻返頭來扑日本，十月攻破硫磺島，雙方死亡慘重，伊吓使直接轟炸東京，民國34年元月，美軍進入菲律賓備，欲佮日本做陸軍e總決戰，美軍以火海戰術強力攻擊，干礁菲律賓爾 ,日本喪失五十萬條人命，這五十萬張日軍死亡書，傳返去日本庄腳e時瞬，連阿公阿媽老父老母，兄弟姊妹，攏總有三四佰萬人哀父叫母，是哭甲毋臹聲調，即尼贅e人，「靖國神社」宛那排袂落去！
美軍占領菲律賓了後，有二派計劃，尼米茲元帥主張直接攻擊台灣，麥克阿瑟主張跳島攻琉球，台灣「藍敏」進前二冬有到重慶，請求美國毋倘扑台灣「以免生靈塗炭」，好佳哉美國決定攻擊琉球，琉球人毋知輕重，誤會家己是日本人，肉身擋火海，美軍攻擊心肝青狠，小小e琉球有26萬軍民陣亡，吓使講全部戰死，規个琉球全部是屍體，这是人類有史以來，上介殘忍e代誌，這个時瞬，琉球人開始後悔矣，毋閣想欲獨立嘛袂赴矣，因為所有琉球人攏戰死矣，日本天皇佇戰後，毋敢踏入琉球一步，也叨驚「戰後倖存」e琉球人給撼給摃。
人客啊！二次大戰上介悽慘e代誌，毋是廣島長崎食原子彈，（伊一瞬強光二位所在死十五萬），實際上是琉球死了上介慘，伊一个鼻屎大e所在，叨死二十六萬人，而且是一槍一砲扑死e，真正仁間e地獄，毋閣這个代誌，日本無愛講，美國嘛無愛講，也叨琉球人茲毋是日本人（語言無仝），尹替汝死赫贅人了後，日本人驚死，遂來「無條件投降」，琉球人受騙規族赴死，阿本仔定著真歹勢講，另外佇美國方面，嘛仝款歹勢講，也叨用赫贅武器，扑死百姓佮軍人規十萬人，宛那無啥乜光榮安呢！
算起來咱台灣人，叨好狗利運哩！咱並無受著大規模e火海洗禮，干礁佇市內佮軍事要點，蘭珊e轟炸爾爾，杜聰明彼時是無掛牌e「院長」，對台大醫學院（部），e設備安全，負有真大e責任，嗯才伊下令將醫學院內底，珍貴e儀器，裝箱疏幵（疏散）到庄腳，避免炸彈e輔炸安呢！彼時疏幵，大概分二个所在，一个是桃園大溪，一个是北投庄腳，伊茲珍貴e醫療器材，攏保養甲真好勢，咱聰明仙宛那功勞袂尐！
美軍e飛機，佇民國34年春天對台北等大都市做無情e轟炸，尤其是五月炸總督府彼擺，連聰明嫂仔叨驚甲面仔青恂恂，大喟喘袂離，實在真恐怖。6月e時瞬淡水、關渡彼箍圍仔有咧謠言，講美國軍隊欲就陸，戰火吓延伸到庄腳，關渡人驚甲湍屎，安呢「扶老攜幼」，帶棉被、鍋鼎，連關渡淡水河邊嘛挖一寡磅空，佇遐藏一寡敢死隊佮「自殺小艇」，壹旦美軍就陸時欲自殺攻擊，忖配伊e，尾溜也證實「無這款代誌安啦」，吓使這證彼嚐時百姓e恐怖，驚惶，真正袂鐵齒咧！
1945年8月初，美國干礁有二粒原子彈爾，一粒是鈽239做e，一粒是鈾335做e，原本是欲試驗看佗一粒吓成功，結果二粒攏成功，死傷袂尐人，這年聰明仙53歲矣，距1905愛因斯坦相對論，已經亦四十年矣，彼時聰明讀小學三年級，時間過了真緊，愛因斯坦「物質吓凍轉成能量E＝mc2，獲得證實」！8月15日杜聰明去南投溪頭實驗林區e時瞬，佇鹿谷車頭，無張無弛聽著日本天皇無條件投降矣！呾台灣脫離日本仔，是欲獨立，抑是欲併入中國？台灣是屬於太平洋戰區，抑是中國戰區？結果以上攏毋著，台灣並無獨立，嘛無併入中國，伊去互蔣家外來政權統治四十冬，聰明仙這聲腳手肉疲疲搐，噯閣尋新頭傢矣！抑無，規个台大醫學院e交接，是欲哪矯吓落來？
第十一章 病院接收矯慽硬斗
貳貳捌險兮見祖公
（民35～38）
41
1945年九月，扑輸美國e東京話統治者，撤退三十萬日僑返去日本，三冬半了後，扑輸共產黨e北京話統治集團，掣佰萬政治難民，踏硬進入「人地生疏」e台灣島，這三年半e空擋，真正是無政府e亂世，咱聰明仙是彼瞬e頭兄，伊無閃避責任，壹身潦落台大病院e接收空課，这是一層千斤萬重艱苦坐卦，佇彼个官員貪污腐敗，百姓失業大艱苦e日子，聰明仙無惜艱辛擔起硬斗，任勞任怨，險兮連老命叨休去，咱這嗎給想起來，有影吓忍甲一身軀肉，真正拳頭母捏甲吓出汗，人客啊！聰明仙按怎佇「兵荒馬亂」乏搭款以上，來矯這層代誌？
剛〔daa2〕光復，彼瞬杜聰明，實際上是台大病院e負責人，佇政權真空e過渡年代，按怎順序逶「日本帝大」e物件，轉移互「祖國阿山兵」，这表面上看簡單，實際有三項真歹矯，稍寡無張弛，汝叨吓做歷史e罪仁，这互汝袂鐵齒e。（第壹）日本佮中國e國情差真贅，新來e中國國民黨，專制腐敗，水準乏搭聰明仙身受日本教育，道德仁格，恐驚也「門扇板咧逗袂峇」，有影心肝內耽耽。（第貳）病院有真贅貴重e儀器佮鴨片塗，这攏隨時吓凍變賣錢銀，到時監督不週，互歹人掱仔〔kiang-ah〕偷提，難免吓連累著聰明仙。（第三）聰明仙伊有絕對e「仁事任用」權利，若做了無好勢，恐驚也吓被「鬥臭、鬥垮」，有辱壹世英名，佇「仁治」社會，这絕對無軟落，譬如講，台大病院仁材無夠，佗一个日本人噯拜託伊留落來，佗一們噯給遣送，平平逶日本返來台灣e本地醫生，佗一个吓使讀醫學院，佗一个袂凍，二代政權過渡中間，用啥乜標準來矯來處理，真正互汝頭殼摩咧燒，一工到暗咧激頭腦叨著。
日本人一下戰敗呤，台大病院交互聰明仙來捍頭，聰明仙頭一項代誌，叨是逶大溪佮北投庄腳，疏幵出去e醫療儀器給搬返來，來維持病院業務e正常運作，這項空課，噯真趕緊，簡那咧燒倒頭香le，患者e性命，一時一分攏袂凍顛誕e，好佳哉聰明仙所派去e人，素質真懸，全部物件完璧規趙，無蒛角去，聰明仙真歡喜，真正台灣人做了有起呢！「呾阿本仔唗矣！咱家己做頭傢矣！萬項噯認真拍拚，才袂夆稱斤兩！」
聰明仙第貳項馬上噯做e，叨是趕緊拜託一寡日本醫學仁材繼續留兮台灣，互台大病院e醫療佮教學，毋倘馬上斷層，也叨日本雖然敗戰，毋閣佇台大病院，留落真贅醫學專家，若準茲專家攏遣返日本，恐驚吓造醫療仁材e「真空狀態」，醫事專家地位真懸，伊無必要留佇台灣咧做亡國奴，尹絕對吓返日本叨著，這聲害聰明仙顛倒噯好禮給姑晟，拜訪閣再拜託，这對台灣人e貢獻袂尐。
佇民國34年到38年，這四年e政權真空渡時期，聰明仙確實盡了真贅大時代e任務，吓使講伊安呢「智識份子」做了有起叨著，真正是台灣人e大枝龍柱，伊做日本人佮阿山e潤滑來矯摵（處理事務）代誌，嘛做尹e石磨仔心來受苦受難，叨算佇228彼暫仔聰明仙性命受著威脅，宛那恬恬無話無句，杜聰明日本時代，享受袂尐e榮華富貴，毋閣阿山兮時代，宛那心苦病疼苦袂了安呢！聰明仙佇彼个時代，上介無利便叨是語言問題，阿山兮講北京話，台灣人講台語佮日本話，雙方溝通出了大問題，迭迭咧「伍會六會」，門扇板逗袂峇，台灣e語言問題，壹直到西元2000年，宛那是省籍對立e根源！
總是，杜聰明對光復了後e台灣醫界，醫獻真大，民國36年年初，國民黨政權e外省校長猶未到位，伊甚至嘛代理短期e校長一職，杜聰明掌握台大醫學院e初期，有做出六項代誌，影響後世真深真遠，咱噯給感謝。「千金難買早知道」，茲六件代誌，以現主時e眼光無啥乜要緊，毋閣佇六十年前彼个時代，確實是劃時代e創見。無顛誕哩，伊對台灣醫界e貢獻，叨簡那三十年後李國鼎、孫運璿引進「台積電」，互台灣揙電腦王國仝款，有關鍵性e功勞叨著。
（第壹）台大醫學教育訂為七年，彼時全世界e醫師教育真正混亂，有五年、有六年、有七年，杜聰明「周遊列國」知影台灣以後長時間欲佇國際上徛起，不管按怎困難，噯有七年e養成教育，才有法度佇國際上互人稱斤兩，亦叨是伊堅持醫預基礎教育，噯二年才有夠力，真感謝伊e「高瞻遠見」，互咱e醫學教育發展好勢，毋閣國防醫學院猶咧「老碩固」，六年爾爾，互人看輕。（第貳）杜聰明佇台大醫學校園內底，種真贅楓樹，增加學校e氣氛，互學生佇繁重e課程以外，有一个「詩情畫意」e環境，伊e樹仔栽，是派人去坪林深山挖取，幾十冬了後，樹欉隨枝朸〔le分枝〕am6，造福囝孫。
（第三）醫學院趕快集資來成立牙醫學系佮藥學系，这是真要緊e代誌，日本時代無齒科學系，這方面仁材真客欠，噯趕緊拚頭前去，才袂漏喟。（第四）杜聰明，仿效日本學制，成立「教授會議」制度，伊e權限真大，有教材、教員、學位、考核、贊助、設立、廢除種種功能，这佮古早干礁是「懇親」特質無仝款。（第五）佇政府財政乏搭e情況，宛那噯定期派教授去外國留學，求取最新科技，互咱國內e技術毋倘落伍安呢。（第六）醫學院北側，古早日本時代赤十字病院舊址，去互國軍占去做營區，杜聰明「據理力爭」給討返來，尾溜也做學生宿舍，这是真要緊e代誌。
初光復，日本人剛唗e時瞬，杜聰明領導醫學院真正硬斗，上主要是無錢，也叨政府無編預算，過渡時期真正艱苦，有時也連買茶咪e錢叨無夠，聰明仙領導第一屆第二屆e台籍醫師仁材，用上克難e方式勉強維持病院e幵銷，彼時李鎮源博士、許強博士，含心敆命為社會擔起來，另外士林人郭琇琮醫師，為著霍亂、瘧疾e防疫工作，自願落庄腳潦落艱苦，宛那精神真偉大，落尾也許強博士（內科主任），郭琇綜互政府認定伊思想左傾，白色恐怖時代給槍殺，聰明仙心肝頭不止也毋甘安呢。
42
光復初期，講北京話e外省人，進入台灣做肝做肫，佮講台灣話、日本話e蕃薯仔袂逗搭，語言e隔閡，不時嘛咧誤會，門扇板逗袂峇，彼時日本雖然戰敗，毋閣台灣e水準，比壹般中國大陸加好臹贅，一寡阿山兵仔官員，優越感重，致使衝突不時發生，聰明仙佇台大病院咧捍盤，宛那迭迭去拄著茲，「秀才遇著兵，有理說不清」，亦好氣亦好笑，茲阿山兮真正纏袂離。
有一回，一个阿山軍官受傷，來門診看病，彼个醫師台灣人，北京話講袂好勢，腔口臹重安呢，伊講「你病很輕」，毋閣發音袂消，講做「你變漢奸」，這位阿山軍官真想氣，馬上出拳扑醫師，連身軀邊e下兵，宛那幫忙軍官扑人，落尾也鬧警察局去，雖然解決問題，毋閣這位下兵出手扑人，互阿山e形象大受影響。
另外有一工，一个阿山兵頭來外科門診，由澤田教授診看診，無意中講「中國兵仔情形臹醜呢」，這位阿山兵頭聽有日本語，認定伊侮辱中國兵，真正憤慨，告到院長室去，叫院長給免職，杜聰明認定这是稍寡代誌，言語誤會爾，無給處理，代誌經過不止也久，澤田才給聰明謝道謝，對彼工”無心之過”感到真歹勢。
眼科e”王民寧事件”是上介麻煩e一條，王民寧本身是台北樹林鎮人，少年時去日本讀軍官學校，落尾也伊又去中國大陸偎國民黨，返來台灣e時瞬，算講e「半山」安呢，勢面真貓，做到「警備司令部」少將，官位真大，吓使直透臭頭仔，台灣人內底擎yaya，無人敢搧伊e腹堵邊，彼工，伊患結膜炎，來眼科門診看病，毋知行情，要求欲插隊，值班林醫師原本掠做尹是阿山兵仔，毋捌日本話，叨佇日本人茂木教授面頭前罵伊，王民寧留學日本定著聽有，叨去尋杜聰明算賬。
聰明仙知影代誌歹紡矣，自那陪王民寧到門診，大力指責林醫師無禮，這个時瞬林醫師又閣誤解王民寧是阿山兵，毋捌台灣話，叨罵幹恁娘卡好，王民寧是正港台灣，當場大聲咻喚，氣甲袂講了了，害杜聰明驚甲一个面佮著肫le，馬上陪眼科主任，林醫師到警備司令部陪罪，尾也杜聰明無代誌返來，林醫師去互人拘留三四工才攽回，這个代誌發生了後，臹久矣，逐傢攏袂記e矣！毋閣六年了後，民國42年，王民寧佮高玉樹咧競選台北市長e時瞬，有人閣「舊事重提」，大大給宣傳放送頭，結果落選安呢甡。
民國35年，杜聰明做了台大醫院院長，做甲疲疲搐，壓力真大叨著，阿山兵仔真歹奉待、性地真大，噯真細膩應付，吓使講做了臹無尊嚴叨著，好佳哉聰明仙少年e時瞬，北京話學了袂醜，社會長短場面矯摵，加減吓使應付，彼瞬伊54歲矣，算講老人矣，對病院e代誌，漸漸感到忝囉，感覺無心適矣，雖然表面上相安無事，毋閣心肝頭真正驚惶。
有一擺互聰明仙驚甲破膽，叨是聰明仙，千拜託、萬拜託，才派人逶疏幵去大溪佮北投e醫療儀器，搬返來台大病院，技術仁員大粒汗細粒汗，摩甲欲歪腰去，好佳哉精密儀器無震動無蒛角，物件排來排去，歪歪扭扭規塗腳（簡那搬厝仝款），這个時瞬陳儀長官拄好來巡視，看著「滿地狼藉」垃圾離羅，真正想氣，發了一頓「大官腔」，互杜聰明臹無面子，哎！伊根本叨毋知影「空襲疏幵e艱苦」安呢，彼个代誌，互聰明仙領受著「中華文化、博大精深」偉大e一面！
杜聰明佇光復了後，處理日本人留落來e嗎啡，宛那真正費氣，也叨數量真贅，真歹處理，主任李鎮源驚歹人變賣，毋敢移交互仈人，最後決定銷毀，本來欲投入下水道，恐驚仈人提去，尾仔規陣人用車載到高雄旗後，發現漁夫迭迭出現，安呢無妥當，結局e瞬呤，最後載到恆春無人e所在，將真贅啡溶入鐵桶，揮入海中，彼時「屏鵝公路」猶未舖點仔膠，塗粉真贅真辛苦安呢，哎！算算e这宛那無法度e代誌哩！
雖然聰明仙身處亂世，對阿山兵真正好禮，毋閣若是拄著原則性問題e時瞬，伊宛那吓堅持崗位，毋敢濫糝，民國36年三月初，阿山兵逶基隆登陸，來台北「平亂」，欲借台大醫院基礎醫學教室做兵營，杜聰明真正堅持原則，毋敢借伊，抑無，珍貴e儀器若是遭破壞，啥人欲賠償？尾溜也逶學生宿舍開放互阿兵哥，教室堅持袂使，這批兵仔尾溜也佇台北，殘殺真贅台灣人，奚叨是二二八e「清鄉」，聰明仙真正捶心肝呢！
民國39年，國民黨政府進入台灣所在，國防醫學院嘛順續搬入來，有一工，國防醫學院林可勝院長佮七八个幹部，到台大病院來拜訪杜聰明，提議依照抗戰中大學合併辦法，逶國防醫學院佮台大病院合併來經營，杜聰明給拒絕，杜講，咱二人合併是無問題，毋閣二醫學院各有真贅教職員，合併了後可能吓冤傢讓債，爭權奪利，「糾紛百起」，寧可各自發展，安呢叨好勢矣！聰明仙這款e作法，是有先見之明，也叨台大是日本系統，國防是中國系統，二爿柴柴，門扇板咧逗袂峇，到時瞬，仙拚仙，拚機關，無心適啦！
總講一句，杜聰明佇民國34年～38年，這段無政府e過渡時期，擔任著真正要緊e角色，伊e忠直、認真、客氣、熱心e態度「不亢不卑」來處理著複雜萬分e「中國－日本」關係，國民黨佇大陸兵敗如山倒，來台灣心情定著無好，夆看做外來政權，聰明仙舞著這齣e，基本上佮日本時代差臹贅，所以伊嘛真細膩真張弛來處理代誌，好佳哉處理了袂醜，其中艱苦互咱後世e人，宛那替伊緊張，人講「拳頭母捏甲出汗」有影險險e安呢！
43
波蘭，夾佇德國佮蘇聯中間，註定伊永遠艱苦坐卦袂超生，有時仔德國扑過來，有時仔，蘇聯扑過來，迭迭國土分割，有五擺亡國，波蘭人一工到暗咧承拳頭紕仔〔pe-ah碎片〕，一身軀安呢烏青激血，嘛嘴齒筋咬le，恬恬毋敢講半句，这叨是身為弱國小國e悲哀，為著欲生存，為著欲繁衍後代，姑不而衷吞訒搭底唅著目屑，拚落，拂落，鏘落！抑無是欲按怎矯？互人欺侮到地也，嘛著噯潦落，殘殘脆脆互伊好勢，叨無法度哩！人講「田螺唅水過冬」，生物界本晟叨「大社惼小社，鴨母吞塗蚓」真普遍，台灣人一場又閣一場e苦難，簡那歌仔戲咧唸le「我歹命噢！」運命肖舛〔cua4〕，有影衰甲叫毋敢。
仝款道理，台灣夾佇中國佮日本這二个大國中間，宛那真歹返捯，北京話統治著佮東京話統治者，攏咧用心計較，想欲來消滅台灣話語佮文化，另外台灣人e个性軟弱，卡無志氣，無親象朝鮮人安呢捙拚喟，致使講一棚又閣一棚e悲劇，連番再次佇台灣咧搬，台灣人目屑搿袂離，前途茫茫，簡那「新媳仔丹（童養媳）」咧，運命苦楚靠昊催排，有時好運歹運嘛分袂清，真正目睭去糊著蛤肉，甲午戰爭，日本人來占台灣，到二次戰後離開後，逶某一方面看，这是台灣人e好運，真正「天公伯仔矯摵，福氣到甲毋知」。
吓使講日本人管台灣這五十冬，拄好是中國上介戰亂e五十冬，台灣人吓使避開這个災難，有影媽祖婆有咧保庇，台灣人去互阿本仔殖民統治，猶原噯感謝阿本仔給汝「奴化」，这毋是矛盾，實在是台灣人e命，这「硬拄硬」，實在無法e，二次戰後日本敗走台灣，台灣人真歡喜，彼个時瞬中國人送汝四項見面禮。啊！祖國啊祖國，有影叫汝e名，心情太沉重，太沉重……。無外久，台灣人吞銅食鐵，悽慘落癠，拄著艱苦已經甚慢矣！彼个時瞬，互人趕返去e日本人，顛倒匿佇壁角咧偷笑，哈哈哈！
二次戰後，中國內戰楦大，國民黨佮共產黨，扑甲「天轟地閃翩，金光鏘鏘滾」百姓死亡千千萬萬，一股不吉不祥e氣氛，漸漸來逼近台灣島，這場災難有影閃袂離，去互風颱尾掃著，日本人離開台灣，等於褪去免疫e外套，中國內戰戰敗者，拄好趁虛占入來，有食閣有掠，日本人基礎僎便便，有影爽甲叫毋敢。1948～1950年中間，阿山兮送台灣四項禮物，互蕃薯仔見識著祖國文化「博大精深」e一面。第壹項禮物叨是，送汝一佰萬e忠貞愛國人士，台灣彼時才六佰萬人爾，欲哪飼吓起佰萬難民？真正是「褲帶僬緊，財產僬礁」，第二項禮物叨是政治屠殺，「幹掉那些不愛國的人」來保障台灣e安定，第三項禮物叨是「經濟e壓迫」，民國38年初 , 四萬換一箍，殷實仁士，一夜間傾家蕩產，互汝聽著血壓燴到二佰貳，滿昊金條掠袂著，第四項叨是佮日本人仝司傅，噯強力推行「國語」，日本人國語是日語，阿山是北京話，伊e版本遵造日本人早期管台灣e方式安呢！伊先推行北京話，強迫汝去學，續落才講汝無標準，互汝感到「土裏土氣無水準」無信心，襯托阿山仔氣質懸優越感，台灣人戇倯古意，壹直限定「國語」講袂好叨是低人一級，「割肉互人食，人猶嫌臭臊」。
民國35年，1946，彼年杜聰明54歲，有四項重要e頭銜，叨是「南京參政會e參政員」、「省府委員」、「台大醫學院院長」、「第一屆台灣醫學會理事長」茲e頭銜，對日後聰明仙e前途長短影響真大，民國34年，「日本」投降，戰勝國「中華民國」，佇首都南京設立國會（議會），叫「參政會」，由各省選出參政員來開，彼瞬台灣省分配著八位e參政員（國會議員）。
台灣這八位，由台灣省參議會間接選出，杜聰明有參加競選，嘛選有稠叨著，尹準備欲去南京開會，二二八了後，民36年五月取消長官公署，改為省政府，這个時瞬魏道明主席，認定杜聰明佮林獻堂是國寶級e仁物，尹二人貫通日本時代，社會聲望真懸，干礁做國會議員甚拍算，嗯才禮聘尹二人做省府委員，算講做官叨著，壹直到民國43年六月才卸任，彼个時代，台灣人叫大陸來e軍仁叫「阿山兵」，唐山兵e意思。
1947，民國36年2月27日，杜聰明以「台灣醫學會理事長」e身份落下港，主持「台南分會」e開幕典禮，台南分會e頭兄韓石泉醫師，做人客氣好禮，做代誌認真拍拚，而且真有氣魄，二二八e時瞬，心存全台南人e安危，無惜家己性命「挺身而出」，親身潦落去佮阿山兵談判，互台南e傷亡降到上低，真正是名聞千古e台灣英雄，尹后甡韓良俊博士，前台大牙醫系主任，「是筆者師，為人敦厚謙虛做事認真」，是筆者一氏人上介尊敬e師長。
2月28日早起，聰明仙逶台南坐火車返台北e時瞬，毋知影台北方面，已經發生大代誌矣，台灣人佮阿山兮是扑甲「昊轟地肉翩」，佇車內拄著河石教授，伊剛逶新竹看診回來，幵冓點外鐘呤，火車到板橋車頭e時瞬，有一陣人歹擎擎「蜂拥而上」，問河石是「日本人抑是阿山兮？」回答「日本仔」，安呢才無代誌，無外久呤，火車駛到艋舺，全體旅客落車，無法度駛到台北驛。呾台北車頭搪咧大捙拚，一陣人夯硾夯嗙咻喚大聲，真亂真危險，連警察叨毋敢偎去，規个台北城暴亂摯載袂稠，真正恐佈安呢。
聰明仙一落車呤，叨知影代誌嚴重矣，伊是台大院長、國會議員、萬壹佇街頭巷尾，去互「散兵游勇」擊殺，安呢叨甚無價值矣，伊趕緊拚到艋舺呂阿昌醫院，衝衝磅磅入去避難，呂阿昌看著聰明仙，趕緊按內，給聰明仙講昨暝「大稻埕取締yami私菸」阿山警察扑死人，引起全台北暴動，聰明仙知影了後，大大著驚，想袂到非常時機，偏偏互伊拄著，真正「槍籽扑著肚臍空」，真正無伊法哩，尾溜也連絡台大病院，派專車護送「頭傢」返去福州街官舍。
過返工呤，聰明仙佮其他參政員、佮省議會議長，規陣人去拜訪行政長官署陳儀頭傢，才成立「二二八處理委員會」，由省議員議長、市議員議長……來組成，聰明仙嘛是委員，了後宣佈戒嚴，毋閣處理委員有卦名牌（狗牌仔），吓凍例外踮街路自由行動安呢，被个時瞬，台灣人（包含聰明仙）對阿山仔有二擺誤解，食真大暗虧。（第壹）台灣人誤解「戒嚴」是咧掠歹人來保護百姓治安，毋閣阿山e做法是，戒嚴時兵隊吓使稱彩開槍扑人，無受限制。（第貳），台灣人沿受日本教育、認定軍隊是咧對外國戰爭，袂扑家己同胞，阿山e做法是，軍隊去戰爭真硬斗，毋閣用來消除國內百姓逆叛，真好用叨著，致使講228時瞬，阿山兵用機關槍掃射百姓時，有人猶戇戇咧看「鬧熱」！
二二八處理委員會，逐工佇中山堂開會（現主時捷運西門站旁），这是緩兵之計，陳儀長官馬上向臭頭仔討救兵，伊講「台灣反矣，趕緊派兵來平亂，臭頭仔彼瞬搪咧”剿匪”，毋閣愈扑愈悲哀，一四界扑輸阿共仔，心肝頭真ut卒喔哫，一下聽著台灣反叛我偉大e中華民國，心狂火焯，伊俍卡好，鼻屎大e所在亦敢叛逆，恁父扑共產無法度，毋閣收拾汝台灣是涼勢也涼勢，嗯才派福第21師劉雨卿赴台北，彭孟輯佇高雄要塞兵力，這二技兵力赴台灣了後，真正「戰勝」矣，3月6日至13日，對台灣人無情e大屠殺，安呢種落日後省籍仇恨佮台獨勢力e快速湠開，尹咧所說，台灣人原本叨無咧講北京話、台灣人毋是中國人！
44
3月8日，阿山兵21師登陸基隆，開到台北城，陳儀長官馬上展開屠殺佮報復，尹「清鄉」e任務，依照名冊去掠人屠殺，兵仔車佇台北街路，架起機關槍沿路掃射，杜聰明e第三囝，伊時讀建國中學，佮同學規陣人無聊咧看「鬧熱」，阿山兵仔沿路攽機關槍，簡那咧攽連炮le，忽然間杜e同學仲著槍受傷，規陣同學大驚，好佳哉無怎樣，規陣人自那汕汕去（散去）。有影王爺尻倉，無人敢摸，互汝袂假痟e！
呾杜聰明做「二二八處理委員」，無外久才發現氣氛有顛誕，聽兮講，連處理委員，本身叨有危險安呢，聰明仙真著驚，是欲按怎才好，呾「一尾魚落鼎，欲煎欲炸由在人」心內暗暗怨運命艱苦，這个時瞬，聰明仙叨毋敢閣再掛委員名牌，四界去踅去唗，顛倒是匿佇外位仔（毋敢返厝內），卡袂惹麻煩叨著，無外久，消息傳來，聰明仙e親傢林旭屏去互阿山兵掠去摋死，這个時瞬，聰明仙才知影危機真正到矣！台灣人所有e精英，有全部被消滅死亡e可能，外省人阿山兵為著欲壓落低，為著欲摋雞教猴，真正吓夯狠造成血海災難，这毋是一氏人受日本教育e聰明仙想吓到e！
過無幾工，忽然傳來，台大文學院院長林茂生博士，仝款去互阿山兵掠去摋死，這个消息對聰明仙來講「非同小可」，也叨伊是醫學院長，平平「同病相憐」，毋知吓危險未？林茂生是杜聰明日本時代真好e朋友，伊東京帝大畢業，提著總督府公費留學美國哥倫比亞大學，是出名e文學博士，佮杜聰明仝齊接收空課，聰明聽著惡耗，屑流滿面，想著這幾年暑假，落下港時女兒杜淑純佮尹后甡林宗義，規陣囡仔耍甲真歡喜e往事，真正怨歎叨著，另外一方面，對中國國民黨亦幵始反感矣！哎！祖國啊祖國，汝哪吓互阮叫甲赫沈重！落尾也林宗義博士佇台北病院服務，聰明仙看著伊叨感覺真虧欠，宗義一氏人為228平反拚老命，宛那互阿山兮付出袂尐代價。
陳儀真厲害，差不多仝一个時瞬，真出名e經濟學者，第一銀行董事長陳炘，宛那互阿山兵摋死，另外施江南醫師互阿山兵掠去，斬死無賠，蹛佇大稻埕港町十五番地，台北市出名議員王添燈，宛那失蹤。最後，證實死亡，有一工透早，地方法院e吳鴻麟法官，好意趕來台大病院見聰明仙，知影聰明仙無代誌，真正歡喜，講「好佳哉，汝家己噯保重」，吳鴻麟彼下晡，遂顛倒去互阿山兵摋死佇南港橋腳，吳鴻麟是前桃園縣長吳伯雄e阿叔，為人忠厚老實，聰明知影了後，「泣不成聲」頭殼一片e空白，吳家是桃園中壢望族，吳鴻麟互國民黨摋死，毋閣吳伯雄遂一氏人佣护國民黨，做國民黨大官，哎！世間代歹講！
3月13左右，聰明仙以「參政員」e國會議員身份，受託調查施江南命案e原委，馬上有人給講「聰明仙啊！汝緊唗去匿，阿兵兮宛那欲掠汝」，這个時瞬聰明仙真著驚，佇五分鐘以來，馬上做出欲逃亡e決定(1)決心唗路（逃亡）(2)放棄醫學院院長佮參政員e名銜(3)毋敢返厝過暝，匿佇懷寧街林正霖住所(4)厝內有一枝日本人贈送佐佐木e軍刀，給殆兮塗腳（埋在土中），防止誤會安呢(5)交待親戚好朋友，全力收集伊e資料，保持連絡，有啥風聲草動，噯提早料理！呾代誌來矣，彼時杜聰明猶咧做醫學院院長，一下「潛逃職守」無來上班，規个醫學院群龍無首，校長陸志鴻起性地,自那逶3月16日給免職，遺缺由嚴智鐘接替，我看这是無法度e代誌，吓辿叨辿，尹俍卡好e，真正互汝舞這齣咧！
四十工了後，陳儀e「行政長官公署」獨裁機關取消矣，換民主e「台灣省政府」成立矣，第一任省主席魏道明，溫文儒雅，客氣好禮，伊知影杜聰明佮獻堂仙二个人，是國寶級e仁物，自日本時代叨是出名e人，尹二人連貫二代，仁脈豐富，日語、北京話攏真敖，干礁做「參政員」甚過了拍隕，自那按算欲運用尹e材能，來替省政府做代誌，嗯才e瞬呤，任命杜佮獻堂做省府委員，這个時瞬社聰明e安全得著保障，一場風暴自那慢慢來消失去矣！尾也民國37年又閣恢復台大醫院院長。
國民黨阿山兵，佇二二八事變噹中，真正毀累，有四个所在，死傷上介食力，基隆、台北、嘉義、高雄，互台灣人對阿山e仇恨壹直湠落來，佇基隆港e時瞬，莫明奇妙，一陣工人空課做甲好勢好勢，阿山兵仔看著，馬上叨用機關槍掃射，規條田寮河是悽慘落魄，台北市閣卡離經，伊俍卡好，專門掠「大粒lu兮」，像咱聰明仙叨驚甲褲底加斤外重，互台灣人想無，逗底陳儀佮臭頭仔是咧想啥乜？台灣人佮中國人咁有即大e仇恨是毋？
阿山兵佇嘉義所在，摋死上贅台灣人，也叨水上機場e爭奪戰，阿山握有武器優勢，台灣人死真贅，一堆一堆疊佇火車頭大埕面頭前，叫百姓排隊去看「以昭警戒」，國民黨大官蕭萬長，細漢e時瞬有去看著，一世人對國民黨袂諒解，佇高雄方面宛那死傷真驚人，3月6日高雄要塞司令，派出三百e兵丁，去市政府佮火車頭，掃射屠殺，血膏一公分厚死真贅人，市議員許秋粽仲鎗了後，趕緊壓落身邊e囝兒許國雄醫師，許醫師用老父e鮮血，糊甲規面規身軀，假佯死去，變成這擺屠殺倖存者。
台南佮台中，受難有卡輕可，台南因為有韓石泉醫師e大智大勇，毋驚生死親身潦落佮阿山兮談判，好佳哉損失輕微，另外台中方面，霧峰林家獻堂仙出袂尐力，阿山兮方面嘛卡信任伊，彼个時瞬，聽兮講叔公獻堂仙，有暗中掩護嚴家淦e故事，尹二人e面相，甡了真仝款，嚴家淦性情溫和e古意人，伊是接收台灣e頭一批大官，伊若是坐陳儀e位，台灣叨袂發生即尼大e災難，也叨閣卡講，台灣受世界強國日本教育五十冬，絕對毋是野蠻e民族安呢甡。
45
好矣！二二八這幕悲劇，漸漸來煞鼓矣！咱聰明仙博士博，食到五十五，世界行透透，總算互汝見識著「中華文化偉大優秀」e一面！國民黨e阿山兵仔，這回「大獲全勝」擎甲夯袂稠，哎！茲阿山兵仔，扑共匪是無半撇，毋閣扑百姓是考第壹，機關槍夯起來掃落，百姓一个一个倒落去，有影臹敖，臹揚，臹好勢！另外一方面，叔公獻堂，心肝嘛涼涼涼，這聲「灶卡冷鼎」矣，「抗日大師」遂揙做「親日大師」矣！漸漸來對中國人「凊心」（灰心至極）矣，尾也1949八月赴日養老，叨無願閣再返來，一氏人悲涼至此，真正互人鼻頭吓酸，伊咁願去日本做「清國奴」（ciang-go-lu），宛那無憖佇台灣做「大老」！
陳儀佮臭頭仔e心態按怎？實在互人掠袂著，尹二人攏留學過日本，台灣人受日本界管五十冬，智識水準真懸，對家己人咁正實赫無信心是毋？對台灣人，咁叨做甲赫到？台灣人受著這擺e災難，定著吓思考做中國人e心晟，按怎「祖國」，這二字叫了赫沈重，台灣人行到「十字路口」，欲何去何從？
二二八了後，蕃薯仔e想法漸漸來分裂，台灣人？中國人？日本人？欲按怎選擇？(1)堅持做台灣人，安呢吓行對台灣獨立e方向，(2)若堅持欲做中國人，安呢叨佮中國合併，(3)若認定做日本人卡好勢，安呢叨重新併入日本國！結局最後台灣人e運命是按怎？
1950六月底韓戰扑落去矣，標準答案出現矣，以上三項攏總毋著，台灣人並無獨立，台灣人亦無併入中國，台灣閣卡無互日本重新統治，台灣人真真實實互浙江蔣家班來統治，佇「中美共同防禦條約」坎傘下腳，由100萬外地人統治著620萬本地人，這款代誌互阿啄仔看甲目睭青更更，大嘴開haahaa32，真正奇卡哩！
致使講，台灣e統治權，佇1948～1988這四十年內，由浙江人蔣家班統治，这佮1895～1945這五十年內，台灣由日本帝國統治仝款，台灣又原是肉砧爾，浙江人佇民國36年二二八，屠殺真贅台灣人精英，互彼時e台灣青年智識份子，思想上真正苦悶，有影「叫祖國」真正沈重，另外少數精英，思想幵始左傾，尹認定既然白色中國無法度，這聲叨漸漸來偎紅色中國矣！而且社會主義，主張替散赤人出一口喟，佇言論市場，宛那有伊e市場。
日本人統治台灣，推行「東京話」，阿山兮管台灣，噯講「北京話」，台灣話無受尊重，變做被奴役被同化e對象，尹阿山兮甘願去香港講廣東話，嘛無噯踮台灣學台灣話，伊優越感重真歹矯摵，親象台灣佛教三教頭聖嚴、星雲、唯覺，台灣蹛欲六十冬矣，連半句台灣話叨無愛講，这是省籍對立e源頭，同胞中間，若矯了無好勢，鋩角駛了無夠，宛那真費氣呢！
第十二章 院長室特務掠人
保密防諜氣氛嚴
46
1950，民國39年5月13日下晡，保密局一陣特務，婁吉普車到台大病院，強行進入院長室掠人，逶胃腸科主任許強博士，鼻喉科蘇友鵬醫師、眼科主任胡鑫麟醫師、皮膚科胡寶珍醫師押走，講尹思想左傾，參加敵偽組織，欲施行軍法審判，另外翁廷俊醫師掠無著，成為「漏網之魚」，彼時辿唗，郭琇琮醫師進前嘛佇嘉義互人掠著，仝齊送軍法。
魏火曜院長，真正緊張，七八个特務端坐院長室，尹e目的是欲掠思想犯，院長大粒汗細粒汗，今日代誌歹紡矣，趕緊叩電話互醫學院院長杜聰明，講保密局欲掠「第一內科主任翁、第三內科主任許、眼科主任胡、鼻喉科蘇、皮膚科胡，是欲哪矯才好勢？杜聰明唅著目屑，頭殼茫茫踅，講知影啦！前進「頂司」有來佮傅斯年校長佮伊講過，欲入病院掠「匪諜」安呢，魏火曜自那叩分機互這幾位醫師，叫尹來院長室、有重要代誌欲交待，特務面仔青恂恂，氣氛真正沈重，幾个醫師入來了後，才知代誌大條矣，落尾也無法度，自那衫換換e，佮尹落樓梯，二人一組掛手銬，壹前壹後，佮著掠犯人仝款，真無尊嚴坐入吉普送軍法，彼工，規个台大病院恬寂寂，無人敢講茲代誌東西。
四月日了後，軍法審判，尹彼陣人思想左傾，附合敵偽，參加共產組織，雖然無武力叛亂，毋閣罪無可赦，判許強、郭琇琮二人死刑，蘇友鵬十年、胡寶珍十年不得上訴，這層代誌，佇「白色恐怖，極力肅清匪諜」e年代，真正要緊，壹般人叫伊「台大醫院醫師事件」，彼个時瞬，臭頭仔已經佇台灣捍盤矣，佇戒嚴體制，阿山兮壓迫台灣人，浙江政權殖民統治e悲慘，食汝忝忝，茲代誌這嗎e少年人，食飽穿燒，真正互汝袂鐵齒咧！
這批夆判死刑，十年e政治犯，攏是被个時代，上介優秀e少年醫生，有二个博士，三个主任，是按怎尹將生死分甲外外，以性命做賭注，為著勞苦大眾佮社會正義，漸漸來踏入社會主義e左傾路線，結局e瞬呤，尹付出慘重e代價，以自由佮肉身，真謙卑來粒積出幼綿綿e呼聲，來對抗強權鐵血e戒嚴勢力，這个時代e悲劇，台灣智識份子e鮮血佮目屑，代表著醫界最後e良心，二二八彼个時代，台灣人，分界佇美國資本主義佮蘇聯共產中間，分界佇白色國民黨佮紅色共產黨中間，分界佇多數台灣群眾佮少數北京話統治者中間，分界佇東京話佮北京話中間，伊有伊e心苦病疼，伊甚過了軟呰，伊e目屑流袂離，伊e勇氣佮絕望，喚醒台灣人e尊嚴佮甡張。
（第壹點）這陣優秀e台灣精英，對國民黨二二八e恐怖，感到絕望，算對「白色中國」凊心搭底，對「祖國」e熱忱漸漸淡化，叫「祖國」甚過沈重，這个時瞬，若是統派，伊吓漸漸來趨去社會主義e紅色中國，若是獨派定著白色中國、紅色中國攏無愛。（第貳點）日本時代，對社會主義e思想，並無禁止，算講學術自由叨著，毋閣佇阿山兮昊年，这是真嚴重e毒化思想，算講犯著伊e kia叨著，台灣人噯卡乖咧，袂使假仙咧。
（第三點）茲智識份子，富正義感，同情勞苦大眾艱苦人，歹命人，致使心理上介支持社會主義彼套思想，雖然彼套思想無一定行吓通，这是全世界e「通病」，散赤吓互人夯狂，这真現實，硬嗙嗙，互汝袂鐵齒e。（第四點）二二八造成省籍e冤仇佮對立，真緊叨互「祖國」e熱潮降到冰點，台灣人知影家己講台灣話，佮外來政權講北京話無肖仝，所有反對國民黨e抗爭，無一定是共黨思想理由，嘛吓做解釋做，反抗外來殖民統治，亦叨是反日本界管佮反阿山兮界管攏仝款。
國民黨無想著講，有一工吓江山盡失，退到台灣島徛起，汝欲靠台灣人飼汝，又欲摋台灣人來鐵血統治，真正「占人e戶碇，扑人e囡仔」安呢是恩將仇報是無禮貌e，安呢吓引起台灣人e仇恨，互台灣人撟甲無力去，阿山兮掠台大醫師去槍殺e時瞬，已經逶大陸強制移入百萬難民，台灣人六百萬欲飼一百萬，这是真正硬斗e代誌。安呢做咱台灣又真贅無頭路，生計發生問題，變做家己扑家己，这叨毋是共產無共產矣！
這擺5月13日e「台大病院醫師事件」，特務衝入台大院長室，強行押走幾名醫師e事變，有二个人心肝上介艱苦，一个是台大醫學院院長杜聰明，另外叨是台灣大學校長傅斯年，尤其是杜聰明遐受難者，是家己e學生佮暝日逗陣e同事，閣卡互伊心情艱苦無地消透，幾落工講袂出一句話，原本烏礁e身材「消瘦落肉」，面皮攝攝加臹臭老。哎！做院長袂輸咧坐針氈le，做官做甲即尼艱苦，叨實在有影哩！這嗎咧做礳仔心，夾佇阿山兮佮同事中間，真歹矯摵，佗一工臭頭仔若火焯，恁父十條命嘛袂赴配伊，嗯才咱茲鄉親氏細，逐傢噯張弛，目睭擘互伊金，千萬毋倘潦落這淈haa！
代誌是按怎揙到安呢？這陣上優秀e子弟兵，上有正義感上有活力e少年傢仔，咁真正「食飽閒閒掠蝨母」是毋？尹看著二二八e悲慘，對白色祖國徹底e絕望，心肝漸漸行偎社會主義e紅色祖國，尹心肝單純，同情勞苦大眾，心中充滿了理想性，遂毋知安呢犯著阿山兮e kia，我聰明仙目屑暗流，毋是毋知茲e道理，不而顧呢，二二八e教訓，宛那無資格講啥乜！臭頭仔情報密佈，在熚熚，擎耶耶，無人敢搧伊e腹堵邊，呾隨人恬恬無半句，茲受難者e中間，尤其是許強博士，是台大醫學院第一屆學生，佮李鎮源仝班兮，杜明聰十幾个台籍學生，印象臹深，聰明仙「自細漢看到大漢」，不止也感慨安呢。
阿山兮欲掠這陣醫生，定著噯經過台大校長傅斯年這關，傅斯年「望重士林」是有行情e人，阿山兮特務毋敢甚假痟，自那真客氣真誠意佮傅斯年參詳，尹入去台大病院掠人，有姑不而衷e理由，共產黨若無肅清，台灣叨袂安定，臭頭仔佮有號令以上，這聲港無潦袂煞，「昊內無坎，嘛噯陌去。」傅斯年講「汝若掠人，咁有啥證據，對茲知識份子袂使無禮e，抑無，我校長是欲哪徛起？」特務講「簡單e證據是有啦，根據台共首領蔡孝乾e供詞，尹茲人雖然無叛亂，毋閣有加入組織，政治無掠袂煞，望汝諒解。」「袂使掠人e，噯用傳訊，儘量簡單化，若無代誌叨趕緊攽人，抑無，我做校長e人宛那有責任，另外一點，萬壹有押扣，壹定噯互家屬吓使見面吓使送物件。」特務為著欲達成任務，傅斯年所有e條件，攏總答應。
也叨傅斯年校長初步答應掠人e代誌，無外久杜聰明院長嘛了解這項代誌，傅是杜e直屬長官，嗯才聰明仙恬恬無半句，毋閣杜聰明真正為難，伊是毋是噯給病院院長魏火曜偷講？伊是毋是噯給這幾位烏名單e醫師暗示？伊若講出去，烏名單e醫師定著逃亡唗路，這聲杜聰明擔袂起，臭頭仔若揙面，叨規組害了了矣！伊若無講出（抑是暗示），叨目睭金金人傷重，活活看著十外年好朋友落難，是欲按怎對尹本人佮家屬來交待？聰明仙咧做石磨仔心，雙爿絞落，逐工煩惱安呢甡，嗯才e瞬呤，5月13日下晡「大逮捕」，接著病院電話彼時瞬，目眶僬紅，嚨喉僬滇，頭殼一片e空白，險兮講袂出話來，電話kua落，聰明「痛苦失聲」嚎甲毋臹聲調，哎！一世人受日本教育聰明仙，真正是摯載袂稠矣！目睭茫霧頭殼想爆，五年前日本投降e情景又閣出現，台灣是繼續互日本管？台灣併入祖國？台灣獨立？台灣互聯合國美軍托管？結局e瞬呤，以上四次攏總毋是，台灣呀台灣！
47
1945年8月15日，日本人戰敗投降，阿山兮擎耶耶，派兵接收台灣，佇七十軍e支援之下，陳儀長官太上皇，率領文武百官，坐四十九隻美軍船隻，「浩浩蕩蕩」佇十月十七日進入基隆港，台灣人各界團體，佇港都臹歡喜祖國軍隊e進入，真正是歡喜wewe，鑼鼓喧天，這聲中國仔來管，台灣人定著過著和平快樂e日子，唉 !伊俍卡好，茲日本仔猴，食台灣人忝忝，叨給戽去邊仔喘，這聲台灣人出頭昊矣！「中國強，中國一定強」哈哈哈哈！
無外久，茲祖國e兵丁，欲坐火車到台北車頭，順續接受各界e歡迎佮慶祝，台北e中學大學生，組織一个學生聯盟團體，佇台北車頭e大埕邊，歡頭喜面來歡喜這陣中國國軍英雄，伊無惜生死佮日本人咧捙拚，通人嘛比大頭拇給謳咾安呢!一下看著七十軍e兵士出來呤，規陣人遂怢〔qang〕去矣！原來歡喜熱嘻嘻e心情自那腳尾焦冷，啥乜！奚叨是祖國e兵隊，尹外表烏攝營養不良揹鍋仔雨傘，津津噹噹，一身軀癩膏爛癆，簡那「daai鑼仔兵」le，佮以前看e日本兵雄壯威武精神飽滿，差甲有看e，心肝內感到真奇怪，毋閣體諒祖國抗戰困難，經濟落後，宛那無給計較安呢！
太上皇陳儀e長官公署，設佇目前「行政院」（忠孝東路頭）e所在，伊大權在握，擎甲夯袂稠，伊袂曉講台灣話，對台灣地真是驚甲欲死，伊性地醜噯激派頭，官僚腐敗，真正古早e中國官場，做了有起，这佮尾溜e大官魏道明、白崇熹忠厚人完全無仝，莫怪講二 二八陳儀吓摋死赫贅台灣人，冤仇吓結赫深，尾溜也臭頭仔，雖然以「投匪」槍殺陳儀，毋閣已經甚慢矣袂赴矣！
陳儀長官，首先命令羅宗洛為台大校長，民34年12月1日令杜聰明為台大醫學院院長，組成「六人小組」執行接收任務，這个六人小組，包含胃腸科主任許強博士佮李鎮源在內，彼時許強博士非常熱愛祖國，對阿山兮是百依百順無話講，毋閣這个時瞬，社會主義e思想，共產勢力嘛漸漸來伸入台灣醫界，咱許強仙真古意，橫直有祖國叨好，管待伊白色e、紅色e，二二八了後，台灣敖人死真贅，許強是高級智識份子，定著袂攽外外，伊對國民黨「白色中國」絕望矣，開始接觸著社會主義另外一方面e勢力，拄好中共方面派彰化人「蔡孝乾」回台灣招兵買馬，全力發展中共組織，這聲許強，自那左傾，博士港潦落矣！
杜聰明掌管台大病院了後，佇民國35年2月至4月中間，發生「台大病院罷診」事件，互伊真頭疼，才知影做主管e，噹時仔（原來）真硬斗，卡早日本人置e時瞬，無人講，這嗎改朝換代矣，十嘴九尻倉，意見真歹矯，猶閣一點叨是彼時經濟真醜，規e社會，無頭路兮塞倒車路，又閣日本人撤退malaria瘧疾又閣流行，市面藥仔真尐，佇彼款無政府e時代，社會無好過日。
民國34年十二月初，杜聰明接收台大病院e時瞬，有70名e員工有在業，伊發有聘書，逐月日領薪水，另有一百外人e低層醫師佮職員，尹無聘書，致使講無領薪水，生活發生問題，這批無薪仁員，宛那逐工佇病院，辛苦拍拼，做甲安呢大粒汗細粒汗，所以心肝頭凝，集體向台大方面請願，為飯碗拍拚宛那姑不而衷安呢，毋閣時局混亂，台大方面無這批預算 , 嗯才e瞬呤，3月十九日拒絕無薪職員e要求，無薪職員心肝頭艱苦，自那欲發動罷診，互病院e業務停頓。
杜聰明知影代誌食力，3月21日召集全體醫職員工，佇病院講堂開會，希望抗議者逶罷工e日子順延，互台大方面有矯摵e時間空間，毋閣二工了後，代誌亦是無解決，安呢「無錢叨是無錢」，抑無是欲按怎，續落e瞬呤，茲無薪員工，自那霸占病院，發出停診公告，講尹生活無法度，姑不衷罷診，代誌爆空了後，馬上得著社會各階層e高度重視，哎！大病院無門診，百姓欲按怎？
病院罷診了後，學生無地實習，無外久中間，風潮迅速擴大，連學生嘛欲「罷課」來支援，這聲政府方面才知影代誌大條矣，若矯袂好勢，恐驚也無法度控制，政府吓翩笪嘛無的確li，無外久，羅校長逶大陸返來，佮政府溝通，政府講這款代誌合情合理，趕緊撥款支付，杜聰明e一場危機，罷診罷課才煞矣！
48
民國39年11月29日，台大醫院出身e郭琇琮醫師，互國防部槍殺，罪名是匪諜「參加匪偽組織，意圖顛覆政府」，郭醫師是士林e望族，尹老父是彰化銀行e起創者，佮叔公獻堂仙「平起平坐」算講咱士林地e好額人叨著，毋閣琇琮雖然有錢，宛那是同情茲散赤人，伊做人正義感重，知識份子肯犧牲奉獻，投入社會第壹線，伊e故事真正互人感心，這款優秀e仁材，最後吓同情勞苦大眾，加入社會主義e理想，成為中共地下組織e一員，實在互人感慨。
1944年，日本e戰局逆轉，太平洋戰爭愈扑愈落坑，菲律賓有漸漸欲失守e危險，台灣門戶大開，戰爭e火氣漸漸燒入咱台灣地矣，日本政府真驚惶，一方面趕緊推行皇民化，一方面加強壓制百姓，尤其反日運動，絕對斬殺無赥，來維持大日本帝國e光榮，毋閣這年秋天，台北帝大e二位醫學生，無咧給信斗，尹叨是郭琇琮佮蔡忠恕，二人有堅強e民族意識，反抗日本統治逗底，發展「台灣學生聯盟」無外久二人攏互日本憲兵掠去，關佇攏仔內，尹e反抗精神，互規个醫學院真正尊敬。
尾也，蔡忠恕佇獄中不幸患結核病TB，壹直袂好勢，五月三十一大空襲e時瞬，郭琇琮趁機會，扑破牢門給救出來e時瞬，已經無法度醫矣，七月初七抗戰紀念日，由杜聰明院長來主持紀念會，極盡哀榮，光復了後，台北流行瘧疾malaria，台南流行霍亂，日本人撤退，規个流行病湠開，死真贅人安呢！
這个時瞬，佇台北e郭琇琮醫師，一下聽著台南所在，由灣裡湠入去e霍亂，已經死三百外人，庄腳所在，死人一个个扛出去，悽慘落魄，郭琇琮「急公好義」無惜家己e危險，自那潦落上危險e第壹線，去台南縣沿海漁村、彌陀、茄萣，……去濺藥水，去注預防射，無外久，又閣去基隆、宜蘭，控制災情，郭醫師迭迭講，「醫生人毋是欲看病，醫生人噯預防病源卡要緊」，郭醫師e犧牲精神，感動真贅人，尾溜也，連尹太太嘛是安呢娶著e，而且願意拚死拚活，捸伊艱苦一氏人。
也叨有一回郭琇琮佮女朋友林雪嬌出外門診，尹去江山樓查某間，醫一个十六歲e查某囡仔，入去厝內呤，叨鼻著臭摸摸，林雪嬌強欲擋袂稠，琇琮講免驚，慢慢用藥水洗清氣，才閣注射606，服務真正親切搰力，林雪嬌感到奇怪「親象汝這款好額人，按怎叨做这艱苦e代誌袂嫌倦？」「哎！汝是好命囝，毋知世間e艱苦人占多數，伊才十六歲爾，平平父母甡兮呢，這嗎仲著重病，定著噯幫忙，耶麼，做人哪有意義e呢！」嗯才e瞬呤，雪嬌對伊是佩服甲無聲無示。
民國35年，彰化蔡孝乾共黨份仔，潛回台灣發展組織，台北方面有吸收郭琇琮醫師，所以228事變發生e時瞬，「民怨積聚已深」簡那火山爆發，全台北陷入暴動局面，台灣人佮外省人感情扯到搭底，這个時瞬，有二條路線進行，一條是官方e「二二八事變處理委員會」由省市議員組成委員，逐工佇中山堂開會，陳儀「虛與委蛇」應付應付，暗中向臭頭仔討救兵，講台灣反叛矣，緊派大兵來壓制，另外一條路線是武裝鬥爭，由郭王琇琮領導集中台大、師大、延平學院學生，攏總分三个大隊，又閣配合烏來e高山族，準備攻占景尾佮馬場町e軍火庫，尹提著武器了後，決定進攻陳儀官署。
三月初四暗時仔，學生大隊佇師大操場集合，郭琇琮醫師面掛痟鬼仔殼（面具），做陣前喚話，按算半暝二點，欲去攻景尾軍火庫，搶著武器，才閣去馬場町軍火庫，毋閣彼暗仔落大雨，無法度行動，隊伍才汕去，尾仔3月8日國民黨e援軍21師，基隆港登陸，一路到摋台北市，「平定叛亂」，台北死傷真贅平民，造成省籍族群e大仇恨，共產黨e活動轉入地下。
事變了後，郭琇琮醫師去三重埔，匿一月外日，落尾也老父過身，伊返去了後依照民俗，佇百日之內佮林雪嬌成婚，無外久郭琇琮去交陪著老台共廖瑞發，廖蹛佇新莊樂生療養院，民國36年10月共黨「台北市工委會」成立，郭做委員，無外久郭琇琮領導二个外圍青年團「新民主同志會」，李登輝總統叨是伊e會員。
郭琇琮宛那有沐著鄉土e藝術，伊有咧做「改良e歌仔戲」佇在38年7月22日踮中山堂搬，真贅大官細官，有錢人，文化界e仁士攏來捧場，監察委員陳慶華、市長游彌堅、教育廳長謝東閔、市議會議長周延壽嘛來看，規e戲台搢甲洘卒卒，真正鬧熱叨著，最後市長游彌堅嘛致致詞答謝，真正成功哩！
民國38年8月，郭琇琮醫師發展組織，吸收台大病院e胃腸科主任許強博士、皮膚科胡寶珍醫師，加入「匪黨」，尹這批智識份子吓咖入組織，講卡白e，叨是對二二八國民黨e作為，凊心矣，絕望矣，漸漸來倚靠社會主義e新中國，尾也老台共蔡孝乾佇民國39年元旦，互保密局佇泉州街26號掠著，事實上蔡孝乾佇民38年返台灣e時瞬，省政府叨知影也。
杜聰明做省府委員時叨有聽著風聲，講有一个姓蔡e共產欲返來，國民黨逐項無半撇，毋閣特務掠人考第壹，敢幵錢敢用人以上，蔡孝乾自然落網矣，無外久伊弓出郭琇琮同志，4月特務去台大掠人掠無，問魏火曜，伊講毋知影，尾也5月2日佇嘉義落網，9月7日偵訊，國民黨想欲叫伊規順，以高官厚祿引誘，「為郭所回拒，他堅守理念，寧死不屈」，9月21照蔣家意思判死刑，11月29槍決，一代奇人，叨安呢失去蹤影。
49
民國39年5月13日，特務強行進入台大醫院院長室，掠走胃腸科主任許強博士，逗底許強e背景是按怎款？1913杜聰明刺殺袁世凱彼年，許強出氏佇台南佳里e農家，細漢e時瞬成績真好，日本老師看伊散赤，有欲給出學費安呢，伊有來讀台南二中了後，頭殼真巧，記池真好，閣卡考試困難，伊叨有法度應付，伊醫學院e同學李鎮源博士有咧講，許強真敖讀冊，日本老師真嚴，毋閣伊嘛毋捌補考，有影真正有lau4。
民國25年，台北帝大醫學部招收第一屆醫學生，錄取40名，台灣人占十四人，李鎮源、許強、邱士榮、彭明聰……攏是仝班e同窗兮，民國29年伊卒業也，繼續研究消化胃腸e病症，民國34年8月，許強以33歲提著九州帝大醫學博士，e瞬呤, 進入台大病院，三年後做台大胃腸科主任（第三內科）。
許強佇日本時代，叨參加一个秘密e反日組織「不定期會」，伊屬於社會主義理念，尾也佮中共方面行真偎，佮謝雪紅關係真峇，吓使講早佇民國33年，伊叨思想左傾，滿腦仔勞苦大眾，窮人翻身，許強教授知識豐富，做人忠厚客氣，人緣臹好，陳儀民國34年來界管台灣e時瞬，秘密投票選六个人做委員，李鎮源佮許強攏選有稠，吓使講彼瞬伊叨是風雲仁物無顛誕安呢！
二二八了後，台灣e知識份子對「白色祖國」，完全絕望矣，尹e出路按怎？台灣欲行逶佗位，嗯才e瞬呤，原本叨有社會主義理念e許強博士，閣卡熱衷學習左派理論，參加讀書會，研究一寡馬克斯列寧e理論，民國37年二月，郭琇琮醫師親身吸收許強博士進入「地下黨」，蔡孝乾是共黨台灣方面e負責人，是著有定期咧接觸，蔡被掠了後，引出許強，許強嘛佇民39年5月13，佇台大醫院互特務掣走。伊關佇保密局時，真奇怪，定期有一位中年太太送物件來互伊食，尾溜也才知影伊是卡早許強e病人，對許強真正佩服伊e醫術安呢！
保安局偵訊了後，送去軍法看守，遐e所在「龍蛇雜處」，啥乜人叨攏有，除了尹這陣人以外，另外叨是孫立人將軍e部下，嘛真贅人夆掠來茲咧秋稱，民39年10月，許強佮皮膚科醫師胡寶珍關仝房，三十人擠二十人e位，暗時睏眠真艱苦，一个倒e，一个噯坐e，胡寶珍干礁思想犯爾，根本無介入組織，互掠來關實在冤枉，9月21日佇蔣家政權夯狠以上，判許強死刑，11月29日佇馬場町刑場槍殺，一个真優秀e台灣社會主義信仰者，叨安呢離開世間，享年37歲。
許強犧牲時，上細漢e囝干礁二歲爾爾，叫許達夫，民國62年七月，伊讀台北醫學院尾年欲實習，註死毋死去分發著三軍總院，無外久三總通知北醫，拒絕該生去實習，因為許父是「匪諜」許強，叫伊改去私人診所實習安呢，許達夫受著侮辱，返去問老母才知影規个代誌e長短，伊「泣不成聲」，佇戒嚴時代，做嗣大e人，有姑不而衷e委屈。（註：戒嚴佇民76年取消），禍連下代，有影感慨，許強死後火化，骨灰囥佇仁愛路東和寺，民國67年才另尋福地殆佇八里半山腰，民80年12月10日，這个時瞬蔣經國已經死三年矣，許強已經犧牲41年矣，好友李鎮源等一批醫師，佇台大校友館開一場「許強醫師紀念會」安呢。
另外5月13日，台大醫院互人掠去e三位醫師，一位是眼科主任胡鑫麟，一位是ENT蘇友鵬，一位是皮膚科胡寶珍，尹因為思想左傾，受匪鼓吹，各判十年，去唸「綠島小夜曲」，這款e判決甚過了嚴厲，無合民主政治e精神，平平是人，平平是父母甡兮，毋倘看伊簡那牛馬掙牲咧，有一工報應吓到叨是。
小弟從事台語已經二十年矣，有收集一本胡鑫麟寫e「台語小辭典」編了真好勢，伊佇綠島關十年了後，可能發現語言e重要性，吓使講咱台語界e先知先覺，伊佇1998謝世，互我感到真哀悲，佇茲我給汝行禮，對汝壹生e艱苦，給汝致最高敬意，時代e悲劇真歹講，恁這輩e犧牲，吓凍換著後一代人e幸福，恁e精神真偉大叨著。
台灣發生228事變e時瞬，由陳儀一个人咧捍盤，逶台灣舞甲悽慘落魄，互台灣人佮外省人關係緊張，這款人真正是國家e敗類，尾溜也，臭頭仔以「投匪」e罪名給槍殺，安呢做無妥當，應該以「228事件」卡好勢，卡吓凍消除台灣人e不滿心理，一个國家內底，族群問題上介要緊，伊吓發生長久性e緊張關係，噯真注意。國民黨為著欲「肅清匪諜」佇民39年3月成立「總政戰部」由蔣經國捍頭，pe性命捕掠反對者，這段歷史，互伊食老做總統時，有無仝e評價。
許強醫師為著伊e政治理念，互國民黨掠去，到呾嘛欲六十年矣，實在講起來，民國39年，國民黨宛那真危險，本臹共產黨按算7月初攻擊台灣，「解放」台灣，毋閣韓戰6月25日幵扑，干礁差一禮拜爾，这是國民黨e好運，韓戰一下扑，美國第七艦隊防守台灣，國民黨方面「轉危為安」，所以嘛有人咧講，許強e政治思想，是佇日本時代叨有矣，若準韓戰無爆發，而且中共攻扑台灣，是毋是許強吓來代替杜聰明e地位，这宛那真有可能發生e代誌啦！若是安呢來講，杜聰明嘛是真費氣，伊逶日本人交互國民黨，嘛有可能逶國民黨交互仈人，安呢伊e仁生是毋是複雜萬分，伊咁摯載吓稠？人客啊！这是六十年前e代誌，罔講罔講啦！
杜聰明經過一年e辛苦，佇民國39年12月，提著WHO獎學金，去美國遊學半年，佇民國40年七月返來台北，暫時互伊心情輕鬆，卡勿想起台大病院e心苦病疼，彼年伊59歲，哎！宛那「老話一句」，聰明仙啊！汝e仁生真特別啦！真希罕啦！