第 一章 干豆地頭水路興
{ 本書另有單行本佮錄音帶 , 洽 茄苳出版社 (02) 28911432 }
( Holo Taiwanese literature . Gandau area , part 1 ) 1
眾(各)位咱茲鄉親嗣大，阿伯阿姆囡仔兄，逐傢暗安，
食飽未？小弟阿興仔佇茲用這个機會，講寡咱關渡(唸干豆)
地ｅ古早代誌，叨袂醜li，人講千年田地八百主，實在叨有
影,呾罔聽做義讓，心適心適安呢。
{ 註 : 漢字從國語轉入台語系統時, 可能會有落差和陷阱, 台語漢字第二規則, 凡是 [聲音, 意義, 辭型 ]三者皆不同時, 不可用同一漢字 ,以免系統大亂, ( 原本應有3字), 故 官版 [zit這款, ze這是, zia這尼], 是有不妥, 建議用{ 這款, 这是, 即尼 } 才合理,約三十年前早期台語著作, 「這款」有多種寫法 { 即, 職, jit….}
若無肖棄嫌以上，才稍給咱淡薄也r-en64(捧場)一下，
當作是一款時間外ｅ娛樂，參考看覓咧，逐傢品無掠包，安
呢嗯才有倘了解古早祖公仔艱苦坐卦，水流破布赫尼僥艱苦，
吓知影咱ｅ祖公為食穿拍拚，不時枴饑失頓，踮兮咧”破厝
漏鼎，苦死嫫囝”真食力ｅ乏搭款，咱茲氏細噯永遠記咧心
肝頭，對祖先永遠ｅ懷念佮敬意。
呾勞力噢，小弟佇茲講古，互咱阿同兮鄉親兮，安呢無
閒無工，真正歹勢真正歡迎佮謝射，順續祝福咱茲嗣大，逐
傢合家平安，身體勇健，財源豐富，事業大pa尾旺廣,萬項
順序逗搭(貼切)。
#字解
註呾 唸擔，語首助詞 ,義讓 打發無聊
佇茲 在此 (dizia 31) , 赫尼 那麼 , r- en唸ㄜ ㄧㄢ
捧場 , 旺廣，唸旺公，事業發展狀。
2
不而顧呢，欲(ve，要)寫鄉土講古，有影無快活(kuiiwa44)
，真正硬斗叨著(就是)，人咧所說(sose15)，夯(qia3)
筆卡重夯鋤頭，欲按怎矯摵(規畫)，佇起腳落手ｅ噹中欲嫷喟，
欲浮出鄉土ｅ精神，事事項項臹甡份，想落有影手骨吓軟li。
噯夆講某人ｅ筆尾袂醜，話頭咧牽，真有拚路叨是，有卡
心適，互人看著吓起磅吓逗搭，逐傢謳咾甲吓觸舌，安呢嗯才
吓成功，吓出脫，嗯才e瞬吓壯才，吓投緣li。
這嗎这流擺(現今這年頭)，欲寫鄉土講古，算起來司傅
卡奧(難)唗尋li，真歹搬請叨著。到咱這延(這一代)ｅ手頭，
真正食力，無讀冊ｅ袂曉寫，有學問ｅ閣卡袂曉寫，茲少年
仔若講著寫母語文章，叨疲勞厭懶，欲死動haai3，唗簡那
翍(飛)咧，袂輸簡那咱庄腳人掠粗擔重仝款。
也叨話語婁袂遴返，無三無二，撇無一半叨牽袂落去矣
，人講路頭擔燈心，路尾擔鐵硾，欲潦落寫冊，有影無貳步
七仔, 叨毋敢過虎尾溪li。小弟興仔，佮逐傢仝款，叨仝公司
出品ｅ，少年受北京話教育，台灣話真正魯，魯到袂孝孤du4
e，這幾冬來，嗯才姑不而衷拍拚學母語，這嗎才略略也有
坎站。
想著母語ｅ尊嚴，嗯才無惜面皮，真正衝磅無張無弛，
著給(ga5)潦落去，來給寫這冊講古，效果鏘採無倘外讚，這
定著e啦，毋閣這起頭爾，映望鹹菜渚肉油，來叫醒茲鄉親
仔，對本土文化ｅ看重，才是要緊。
呾時候無早矣，續落咱這冊"關渡媽祖"叨給僎(準備)落
去，小弟佇資料佮筆尾真正乏搭勢面之下，無講橫亦無講直，
佇茲大主大意，殘殘ga潦到底，搰力捙拚望媽祖婆逗保庇咧！
3
佇茲小弟做一下仔自我紹介咧，小弟興仔，今年(1992)
43，宛那有歲矣，就澀袂攝矣，血跡地佇關渡，毋臹所在茄
苳腳彼角勢ｅ人，自細漢叨食關渡ｅ水米大漢，亦艱苦有著
li，庄腳种种，一點一du，真正擻 念li，嗯才 ｅ瞬(助詞)
寫一冊咱庄ｅ代誌，卦民俗方面風土東西，做一下仔回想，互
咱茲後尾出氏ｅ囝孫氏細，吓凍了解古早ｅ艱苦，安呢甡逐傢
空課路咧做，卡吓有甡張有志氣有捙拚喟li。
小弟1974 , 卒業佇台大病院齒科部門，現主時佇郊區開一
間仔齒科店，罔做罔做，渡一下仔三頓爾，咱茲眾位敬愛ｅ朋
友，若有機會來北投踏青，抑是拜訪朋友，來這角勢行踏ｅ時
瞬，請免客氣才無惜腳步，來阮兜坐坐咧，烚一杯仔燒茶，逐
傢結一下仔緣咧，真正歡迎li。
想起來ｅ瞬，拍算二十外冬前ｅ款，大概也民國47到57
年這段期間，小弟佇讀冊ｅ時間，有捸( de/due 4)著厝內嗣大去做田佮
做園ｅ經驗，親象踏稻仔頭，搔草，割稻仔…，了解做穡人
(勞動者)ｅ苦衷，對寡田庄生活亦吓凍掠淡薄仔，嗯才今仔
日有材調潦落寫冊。
咱这"關渡"二字應該讀做干豆，毋倘唸管肚，古早號
作干豆門，佇茲我毋敢用干豆，驚仈人看無，也驚干豆誤會
做豆干，安呢著顛誕去矣，“關渡”本身是平埔仔話，意思是山猴 , 毋是福佬音，咱福佬自來著卡尊重原住民文化，不忍心給滅去li。
註就澀著袂攝，人過中年日益衰退 , 卦…東西 連帶…種
種 , 卒業，有寫出業，畢業也 關渡應唸Gandau66，而不是
guando66 如關渡北投(女巫)士林(八芝蘭溫泉)夏拉別唭里岸都是
平埔族名。
4
俗語咧講「北有關渡媽，南有北港媽」，佇台灣地頭伏
祀ｅ眾神噹中，算講媽祖婆ｅ香火上介興，通人叨han4，烏
面媽祖上聖，叨聖甲吓食糕仔li，講迓媽祖是台灣上普遍上
鬧熱ｅ節季，定著是無顛誕(差錯)，福佬安呢，客家人嘛是
安呢，今仔日咱關渡媽有法度倘佮北港稠天宮比憑，宛那身
軀邊有貳步七仔。
關渡媽佇北部有影是名聲臹透，人講一名透京城，廟吓
興袂興，看伊ｅ寄付著知影，普通細間廟仔，一年若收有五
六十萬仔，叨好偷笑矣，抑若奚卡不成蒜ｅ，有ｅ泛勢連十
外萬著袂滇(滿)，搪咧梟悻時，含香紙燭叨乏搭，汝看咱这
關渡媽，每一冬普普也，瓊五六千萬仔無註文著，抑若好年
冬到地a，收八九千萬亦袂拗蠻li，仈間廟仔，看落叨倒吊，
心肝吓凝有影怨歎無伊法。
佇臺灣地北部這箍圍仔，汝欲(ve)看過年節仔，啥乜所在
上鬧熱？看來看去，看甲目睭欲肖絆，宛那是咱關渡第壹勇，
仈位廟仔叨無一个形li，舞無二無三矣li，猶咱關渡自初壹
到十五，連肖續逐工(天)鏘鏘滾，hehe33趒，人群肖捸，逶廟
崎看落是滿山滿坪，一陣閣一陣li，有影茲善男信女臹尼熱忱
，互人臹感心。
續落來給講到，關渡廟按怎吓赫興，關渡廟無論地理方面
，抑是歷史方面，抑是仁文方面，按怎吓赫食肉，按怎五路人
三色話哄伊袂倒？伊ｅ捅頭佇佗？伊ｅ心苦病疼佇佗，做一下
仔說明咧。
5
呾算起來關渡這个地號名，是咱这二十外冬，才興起來ｅ
，媽祖講來是出名，毋閣若是城內ｅ讀冊人抑是外省人，奚著
無印象，記兮三十冬前小弟初初到台北讀初中ｅ時，一寡同窗
聽著講小弟逶關渡來兮，攏講聽無，袂輸簡那比花蓮卡遠仝款
，給(ga3)我取一个外號，號作「關渡」，呾這嗎奚無仝矣，好
歹利運，三年照輪，這嗎這關渡地是揚pupu，擎甲掠袂稠。
啥乜關渡大橋，關渡大度路pe車，關渡平洋，这亦無打
緊，連奚阮阿祖ｅ亡仔埔自強新村土地公仔，全全皇金葬骨
ｅ所在，一坪亦喝甲三十外，卡早做囡仔時代上驚地基主，
穿白衫兮，這嗎變做新天母舊天母，這關渡地有影叨靈氣li，
出田僑仔，閣出”園僑仔”至到”墓僑仔”有影叨心適li，咱
關渡人這嗎好額溜溜 ，田僑仔，億伯仔，贅甲塞倒車路，
關渡暢仔這聲tu4破草笠仔出頭昊ali。
這幾年以來，無張無弛又閣浮一齣佇"關渡水鳥保區"
这算苦齣ｅ，驚動官廳兮甚至hy4倒萬教，鳥仔區這欲塗去
矣，這聲連戽斗輝仔叨著驚，這个鳥仔區，仈位毋設，叨註
死毋死， 拄好佇關渡媽ｅ面頭前， 欲看鳥仔，壹定噯行
過媽祖宮，嗯才 ｅ瞬呤看鳥仔兼拜拜，摸蛤仔兼洗褲，一
迣工，遊二位名勝算吓和li。
眾(各)位咱茲好朋友鄉親兮，若是咱人(農曆)十月初a，
人講「紅柿若出碩，羅漢腳著目屑流」，這个時季，呾著親
朋好友，逐傢肖招，來咱關渡行踏行踏咧，千里鏡紮咧，到
廟後山坪仔，看落關渡港，看水鳥落仔地ｅ趣味，人講「水
鴨一聲，散人一驚」愈歹昊，起西北愈冬尾雨，愈好看順續
給影一下仔「關江三色」ｅ景色，伊是淡水江，新店溪佮
基隆河敆界ｅ”三角窗”。
各位若paa3過七仔，叨娶袂著，人咧講「好柴袂流過
關渡kia5」(條件好的婆娘，人家早就捷足先登了，不會留
在現在的)這个關渡kia5，叨是佇面頭前ｅ「附近所在」，算
起來宛那真悲哀真怨歎真正了然，目前已經看無原來ｅ峽口
，因為自1963為著葛樂禮風颱做大水ｅ關係，來「拓寬關
渡峽口」，結果遂顛誕去。
渡船頭這爿佮對面ｅ獅仔頭崁，雙爿削切楦 (hun4 )闊，
這遍ｅ工事結果大失敗，水力肖磅，顛倒引起關渡港生態大
破壞，順續海水倒灌，互五股鄉七八百甲ｅ塭田變做湳仔，
(高速公路五股大沼澤)，这天大地大ｅ梟悻，仈位毋去，干
礁廟前顛誕，實在想落吓捶心肝吓目燒鼻酸，有影臹拍損li。
6
咱这關渡媽，聲頭吓浮，名聲吓揚，利運一睏仔行三四
百年，講頭講尾，亦是地理上讚，算講全省來比，壹粒壹ｅ
叨著，伊港路ga山崙仔肖pua肖界，塭田千外甲，水路半鹹
汫，一四界魚蝦水鳥，船帆肖倚，人咧講水米之鄉，又閣是
四條江路ｅ總君頭，人客來來去去真正佳繹(gaya64)。
佇關渡這角勢，塭田占卡大頭，現主時官廳兮北京話號
作「關渡平原」，毋閣在地人攏叫「關渡塭田」，塭田連肖續綿
延到北投，唭哩岸(石牌)洲尾，八仙，這个關渡塭田，頭尾箍
箍ｅ，vega千二三甲ｅ腳兜仔。
這二十外冬來，因為砌厝，社會時機市草興ｅ關係，抵抵
ｅ(扣除後)猶偆千二甲ｅ款，小弟佇三十年前，有佇關渡塭田
做過穡頭，印相臹深。尤其是圳溝邊ｅ鴨寮仔佮大朴仔樹ｅ光
景，上介擻念li，這幾年來，真正感慨，叨仁口超過贅，閣拄
著工業污染。
呾這塊關渡塭田遂免落肥，叨吓稻仔大穗閣豐收，講起來
了然，叨甚(siuu6)“肥”li，肥甲叨毋敢aa4落(彎身)搔草li，
大肥流過坵，過過坵，流甲叨袂孝孤ｅ，有影臹醜材，塭仔蝦
佮三斑魚仔，勾(死)甲無半隻，鴨母陣早攏著瘵(中瘟疫)軟腳ali
，这真正互人思念三十冬前ｅ庄腳，鴨母陣Ga-Ga叫ｅ景緻。
關渡ｅ鄉土若袂赴給記錄起來，免過到三十年著總塗塗去矣，
到時叨污染喔哫，袂輸第二个中和仝款li。
關渡宮,古早號做干豆門靈山廟，正式記錄是1721年康熙
五十一年賴科先生所興建，起頭是利用竿蓁佮竹仔枝起ｅ草寮
仔，真正lonkon33洛魄，進前可能叨有砌矣，因為關渡地頭
拄好徛佇滬尾佮艋舺ｅ噹中，龍脈風水足讚，嗯才廟吓砌佇
這位，致su講關渡廟吓凍做古跡來給看待，su當時是平埔族
ｅ天下，福佬按怎入境設廟，咁有顛誕否？這亦是研究民族文
化佮政府政治ｅ一个重要ｅ疑問點。(徛唸kia6)
呾一萬句做一句講，關渡媽ｅ學問，有宗教，有地理，
有歷史，有人種，有生活，祖公仔流汗流目屑，咱近水惜水
，對咱ｅ血跡地噯卡疼痛咧。
註肖絆pua肖界，相纏相繞 總君頭，總樞紐 搔草，
除草也 進前之前，曾有 血跡，出生地
7
來給(ga5)講到這个關渡媽祖宮，伊是四條水路ｅ總君頭
，一條是新店溪，通三峽、坪林、烏來、一條是基隆河，通
八芝蘭(士林)、錫口(松山)、水返腳(汐止)，一條是通滬尾港
口(淡水港)，通福建日本香港，一條是關渡塭港，通北投。
百外冬前ｅ交通算講是以水路來徛起，水路ｅ總君頭，这
亦著是交通佮經濟ｅ總掌關，彼當時ｅ關渡廟對北部台灣來講，
著等於講武漢對中國，Chicago對美國安呢赫要緊li，嘛是環境
造成ｅ，一方面水路活，利用流水起落(潮汐)行船，免喟力，一
方面陸地中間平埔仔贅，宛那噯顧著安全利便li。
逶三重埔，和尚洲(蘆洲)來ｅ新店溪，水量上贅魚蝦花蛤
仔出產甲滿滿是，一路透坪林尾，小格頭彼角勢ｅ內山地區，
叨出產桀魚(香魚)、茶米，柑仔，現主時號作北勢溪，有翡翠水庫
，供應大台北600萬頭嘴ｅ食水li，另外一路通深山ｅ屈尺，
烏來彼角勢，古早講青蕃巢兮，這嗎時代平頂，號作泰雅魯，
出產木耳、山產、果籽，因為水氣重，萬物甡張，食物仔便便
，叨昊欲飼人li。
另外一路著是已經落坑ｅ大科崁溪，通三角湧、新莊、
大溪，接石門水庫系統，也叨一百年來，袂曉水土保持，一
寡江路窒了了，叨臹梟悻li，落尾也阿本仔統治台灣了後，
鐵枝路徙東，佮大科崁仝向，這聲溪路船水，遂盡磅矣無效
矣，毋閣石門水庫ｅ大水，宛那叨注入關渡峽來入海，若照
以上安呢講起來，所有桃園縣ｅ溪水佮大部份台北縣ｅ溪水，
攏噯最後流過關渡峽，嗯才致su著關渡峽ｅ流水一年超過十
億噸以上，全台灣來講天霸王兮，太祖牌兮。
這層講起來，吓影響著台北ｅ地位li，台北落尾也吓大
pa尾大發展，理由佮水有真正ｅ關係，因為下港地，下冬昊
仔乾燥欠雨水，毋閣台北一年迵昊，辣昊有風颱雨，寒天有
冬尾雨(東北季節雨)，雨水臹厚，嗯才有倘飼現主時600萬
頭嘴li，總講一句，這个時瞬啊，關渡峽有法度倘行即贅水
源，吓凍食穿利便，來去閣卡利便，致使關渡媽吓揚，吓
ciang2，吓kiang，讚ｅ壹莊兮。
另外關渡宮ｅ江路，宛那透海口地，滬尾港(淡水港)，這
个滬尾港目前(1991)是總塗塗去矣，港路塞土結規球，又閣港
水污染，這嗎連拋魚叨無法度，呵sai講(更不用講)到外海港線，
抑毋閣佇百外冬前，阿本仔猶未來ｅ時瞬，伊猶原是北部上大ｅ
海港，直透日本、福建、香港，宛那是國際性ｅ海港li，一寡
國際ｅ物資佮嗎啡東西，嘛是自這條港路入來，大船佇百外年前
，吓到大稻埕，咱關渡宮算中站li。
su當時關渡地分幾落个小庄頭，逶西向東算，有渡船頭，
山後部落，店仔尾，下田寮，大埕兮，茄苳腳，蚵仔坪，江仔
尾，嗄拉別，另外靠淡水彼邊有土地公鼻，樹梅坑，高厝坑，
關渡宮隔江對面是獅仔頭崁，和尚洲，浮線仔，噯注意著是百
外冬前，鐵枝路亦無，公路亦無，壹切噯靠江路上要緊。
8
咱關渡宮ｅ瞬呤，歷史有認定有記錄是1712年，由福建
人賴科這位善信來砌廟ｅ，su當時號作干豆靈山廟，呾草寮
仔竹枝竿秦壁，小腳間爾，这定著elo，叨尾也神明聖香火興
，嗯才漸漸de，來楦甲臹大間，抑若講到賴科進前是毋是有人
砌過廟，这叨沒法度閣再查起矣。
咱給(ga5)想應該是有起，卡占大面，因為進前1699郁永河
入北投採磺礦時，佮平埔仔才逗陣吓ha4(相處融洽)，北部ｅ幵
墾雖然是卡慢無毋著，奚是講陸地，若水路方面早就真正流通
矣，規條淡水江，來來去去，人群結市，交交關關真佳繹，做
為四條水路ｅ總君頭關渡地來講，我普普也給掠(推測)，
1712賴科可能是再整修爾，進前絕對有人起廟過，無定著規模
卡細淡薄也嘛無的確。
咱这福佬有這款風俗，人未到神吓先到，移民到一个所在，
頭一層就是緊安神入廟上要緊li，關渡宮吓使看做是北部淡水
河流區上古老ｅ廟，這點應該無毋著，若關渡廟ｅ幵基歷史，
佇茲卡大膽給掠掠咧，應該佇 1675～1680之間，其間道理以
後才講。
佇 1680彼个時瞬關渡這角勢，定著是瘴厲所在，全部平
埔仔，水湖連天，野獸唗傱 ｅ原始社會，佮現主時ｅ巴西亞
瑪森河的原始洪荒差不多咧，叨總講一句，關渡宮是北部上古
早ｅ廟寺，這袂顛誕li。
台灣地ｅ神明內底，以媽祖佮王爺，上第一擎(最出名)，
伏祀ｅ人上贅，毋閣咱有給斟酌想看覓否？平平是福佬過台灣
，按怎下港興王爺，頂港ｅ幵發是尾溜也，台灣入滿清版土了
後，才有來幵發代誌li，下港拜鄭成功ｅ意思在內，花花霧霧
也, 加減有牽連li，致使著清朝全力扶taa媽祖來對抗，閣互滿
州仔掠準準li，頂港台北地區，媽祖有影擎寡寡，迓神拜祖，
逐年鬧熱滾滾。
人咧所講，滿州仔宛那低路ｅ民族，政治爛敗是飯桶卦車
輦ｅ腳擻，對蕃薯仔(台灣人)是攽雞屎有爾，食雞肉是no術，
單單這味迓媽祖，無定著是人咧講，政治因素，臭厝崁也(偶
發)無意中，歪嘴雞啄大粒米，去互伊sin2著爾。
呾關渡媽叨經過二百冬ｅ滿州民族統治，滿州仔有趣味
，欲就媽祖當作巴結百姓ｅ模範，順續做一寡免錢ｅ政治宣傳
。幾落年前、關渡廟猶未整修廟殿ｅ時，小弟看著廟ｅ壁牆頂
頭畫圖，大部分是清朝兵攻台灣ｅ海湧佮船圖，一部分是清兵
咧送媽祖昇昊，這嗎想想ｅ，有影臹怨歎，媽祖叨宋朝ｅ人，
欲(ve)叫清兵按怎送？茲做廟ｅ，起殿ｅ司傅，有影毋知一箍
竽仔蕃薯，做仈人ｅ奴隸，毋知見羞無打緊，猶顛倒歡頭喜面
才食力li，講清兵臹敖衫臹嫷，哎，實在有影。
ni尾手也，阿本仔來管矣，這是伊ｅ昊年，日本人歹歹叫
，擎寡寡，無人敢搧伊ｅ腹堵邊，這聲換新頭家矣，逐傢袂假
仙e a hoo，奉待阿本仔，噯客客氣氣叫阿伯，抑無一聲若變面
，叨袂輸簡那店仔頭，阿哥仔欠錢咧起慪怊面仝款，日本仔叨信
天皇食日本仔教，拜天照大神，看咱這蕃薯仔神明無夠重，有
影食人到到li，伊看咱pupuah 115，咱嘛看伊霧霧也，犀牛照角
逐傢看了袂作ｅ，強欲去摯載袂稠。
好的佳哉，佇种种方面ｅ矯摵佮參詳以上，風颱做了返回南
，阿本仔對咱ｅ文化信仰，暫時有尊重，一方面亦便利統治來收
民心li，這个關渡媽ｅ信仰禮儀，才倘閣留傳延續落來，呾日本
人一睏仔管五十冬，這噹中逐傢相安無事，媽祖ｅ香火，宛那真
正興，是干礁尾也皇民化運動，有稍寡顛誕爾。
戰後ｅ時間，時機亂，食穿無，一四界梟悻，佇這个艱
苦ｅ年代，媽祖婆吓凍來變作各方善信，心目中ｅ救星，定著
吓拍一枝紅君互汝到，逐傢真正熱誠，互香火燭台旺閣卡旺
，毋閣佇 1964年，關渡宮起了幵天艱苦ｅ大梟悻，超級風颱
大症頭，致su廟產噯分裂，有影人ｅ運命，有時仔吓互汝袂
鐵齒ｅ，實在有影li。
這二三百冬以來，因為咱關廟拄好徛佇四條江路ｅ君頭
，起廟閣早，所以這間廟看著真贅ｅ變遷。看起大溪三角湧
吓興，亦看甲敗，看起艋甲ｅ大興。亦看著尾溜大敗，亦看著
百年前大稻埕來興，亦看著結局遂落坑，看到滬尾港大興，國
際港口臹鬧熱，無外久亦敗lo…。
壹直到1963，因為葛樂禮風颱大水災ｅ關係，官廳兮遂決
定欲拓闊關渡峽，咱關渡宮廟地噯削一半，對面獅仔頭崁宛
那削一半，工事佇 1964年進行，自安呢了後，千百年以來風
景壹粒壹ｅ關渡峽，自那無去矣，有影臹了然臹失敗。了後生
態破壞，造成海水倒灌，嗯才變成五股大湳仔地，這擺ｅ大失
敗，互人感到心酸臹拍損gangan na661無伊法。
註小腳間→很小間 楦甲 hunga 41→擴充到(唸粉加)
真佳繹 人群來往頻繁 普普給掠→大約推測 起慪怊
面，唸起ㄠㄒㄧㄠˇ 落坑→衰敗 了然→真糟。
9
這个關渡宮ｅ研究，猶有一條臹要緊ｅ，有關平埔仔民
族ｅ資料，吓凍盡咱最大ｅ力量，北港媽恐驚也叨卡無法度
li，因為咱頂港ｅ開發卡au尾，平埔仔吓消失，嘛才七八
十冬爾爾li，袂講外費氣li，su當時滬尾開設女子學校ｅ馬
偕，嘛是招無學生，才姑不衷去宜蘭招一寡平埔仔來讀li，
所以代誌咧返捯矯摵，是界在咱咧打算爾，是捍佇咱ｅ手頭
啦，有心做牛，毋驚無犁倘拖，認真拍拚袂顛誕。
的確有人欲來關渡炒土地ｅ款，按怎塭田這嗎做一睏
仔起大價，十二月風吹痟甲無尾li，來關渡憩陶，人講綰
籃仔假燒金，嘴咧講欲拜媽祖，看鳥仔區看關渡大橋，實
在有ｅ卡毋臹囡仔，遂唗來pe6車，吓關係著生命ｅ危
險，做嗣大兮噯卡細膩咧，總是關渡這嗎已經是出名ｅ所
在，禮拜時仔，抑是年節放暇，叨來給行踏行踏做議讓
li，無論講欣賞古跡抑是鳥仔區東西，做一款時間外ｅ娛
樂，吓身體勇健，心平氣順li。
欲(要)來關渡參觀，若咱茲遠路頭ｅ朋友，家友，除
了坐遊覽車以外，家己前往宛那真自由利便，幵無外贅錢
li，若逶台北車頭坐計程兮，打算250左右ｅ款，抑是坐
公車302號，直接到地。
續落來稍紹介一下仔咱關渡地ｅ遊覽地區，外埠頭ｅ
人客吓凍做一下仔參考咧(參考附圖)。
(1)關渡大橋，1984年完成，紅朱朱真正嫷li，配合著後
面ｅ觀音山，真正有好光景li，袂醜啦。
(2)關渡大渡路，四、五年前搪咧鬧熱，暗時仔十一、二點
了後，不時有he 毋驚死ｅ少年家仔，載查某咧pe6車
安呢乒乓叫，速度拚甲百外，有影臹梟悻，亦臹了然，落尾仔
警察有咧掠，呾這暫仔叨卡定著矣，這條大度路橫過關渡塭田
，直liusiu43，臹好看，袂輸簡那西瓜咧剖爿，臹嫷叨著。
(3)關渡鳥仔區，官廳兮號作「關渡水鳥保護區」，有 啦，
卡早水鳥臹贅，頻若反昊變昊，起西北，抑是冬尾雨，有大
陣ｅ水鴨海鳥飛來廟前湳仔地，啄食水產海虫，真正好看，
呾這幾年仔落坑矣，免驚噢，江水污染無打緊，遐地主嘛儘
量破壞來嚇驚鳥仔，抑無土地吓變無價，這亦莫怪啦，下冬
昊仔去看鳥仔，有是有啦，看好歹利運來才daa dak ，強欲
袂孝孤du4，有影臹歹失德。
(4)參觀關渡藝術學院佮楓丹白露大樓，這間藝術學院是
有影臹御示眾，征收ｅ時價賑甚離經，茲嗣大夯(舉)
硾夯磅欲佮伊輸贏一下，欲砌ｅ時，估計失誤，無法度水土
保持，風颱若一落來叨流甲滿四界，茲鄉親是魯氣趒力，錢
叨咧提無夠矣，閣一工到暗流爛膏粥仔，有影臹害，另外一公
里外ｅ「楓丹白露」大樓，風景臹qirdr11，一爿看著淡水河
觀音山，一爿看著關渡塭田看落感慨，這塊田宛那有咱ｅ血
汗參佇內底，毋閣守衛仔臹歹，袂輸咧掠賊仝款。
(5)本齣ｅ關渡宮，有需要看ｅ所在有五位，一是廟前ｅ海
魚販子，一是前後殿，一是仙洞，內有平埔族ｅ遺跡ｅ
石磨仔，一是後山公園，一是廟前拋魚船仔，雖然近來叨落坑
去矣，宛那吓凍回想舊時ｅ光彩li。
第二章 食聖公會
10
美國仔，人號作”山姆叔仔”,講”桃太郎”叨知咧指
明日本人，俄羅ｅ人叫伊凡，咱台灣地ｅ人，家己叫做蕃薯
仔，頻若講著蕃薯仔三字，叨聽落加臹親，kimo 吓qiang
吓起磅，逐傢仝款食茲ｅ水米，仝款艱若有著，對這塊地無
論人、神、地基主，逐傢血脈肖透，竄筋入骨，撝威撝鑽，凊
頭汗一粒流甲斤外重，目屑汗水，肖pua4滴沃,無毋著無顛誕
，台灣人著是蕃薯仔，蕃薯仔正正著是台灣人，三四百冬ｅ
文化，香火噯給傳落去！
這本冊是寫咱蕃薯仔 佇台北附近，差不多北投關渡淡水
這箍圍仔ｅ代誌，一寡茲庄頭百姓神明萬善同，官廳兮阿啄仔
茲羅漢腳, 愛愛寮東西，茲古早齣ｅ，罔聽來做議讓 ，時間
按 佇 1885～1920中間，經過光緒明治大正ｅ朝代。
頭前是滿州民族管ｅ，看北京ｅ面俏(vincir 31模樣)，政
治腐爛有影叨袂孝孤du4，肖摋塗去(戰敗)，逶話語風俗佮北
京無仝款ｅ蕃薯仔送互另外一个語話宛那無仝款ｅ東京政府，
這尾節宛那砰砰叫，虐甲臹工夫li，嗯才蕃蕃仔臹怨歎，做sim
bua621丹(童養媳)爾，卡食嘛是凊糜li，這人ｅ昊年，互汝袂
鬯(cang4)鬚咧。
這本冊寫ｅ是混合ｅ文體，簡那雜菜麵咧，攏濫濫做一个，
亦有歷史，亦有小說，亦有親族正經ｅ代誌，亦有正ｅ, 亦有
假ｅ，總是儘量去說明咱ｅ祖先，彼个時代ｅ生活佮想法，互
百年冬後囝孫做一下仔參考咧，小弟台語ｅ學識真淺，殘殘潦
落，搦搦搐，映望逐傢看落 吓慣習， 吓合hasu 31，若有顛誕，
才稍指點咧，萬事拜託。
11
咱茲鄉親阿同兮，這嗎欲用台灣話ｅ腔口來寫講古，有
影臹硬斗li，因為咱這本土文學，現主時猶直咧起步ｅ階段，
雖然有滿腹堵ｅ內容、機關，毋閣欲(要)按怎寫出來，宛那是
大粒汗細粒汗真歹扭搦，目前採用漢字來書寫，普普仔是看
卡有啦，抑毋閣 吓碰著真贅書寫上ｅ困難，重重tata，無赫
續手，致su講寫落手骨 吓軟，續落是咱國漢字書寫時ｅ四
項坎苛，逐傢量早做一下參考，江ga潦落矣叨潦矣，呾(daa)
頭叨剃落矣毋，叨講一下仔透枝ｅ卡有影。
第一、書寫ｅ漢字，噯用繁體字抑是簡體字？這牽涉到
後回仔ｅ電腦輸入佮阿同兮時間拍隕問題，噯有共識才好。
第二、對一音二字ｅ困擾，噯用國語正字卡好，抑是經
考証出來ｅ台語正字卡好，舉例，噯用你他乞丐腳嘴…
抑是用汝伊乞食，跤啄…，這點閣卡ai著有共識 才袂顛
誕。
第三、對有音無字之台語音，到底是採用以音為主
抑是以意思為主，抑無到尾也逐傢花閣閣，一人一款勢，逐
傢起歹面，安呢叨害，如這嗎，有這馬，這嗎，職麻…。
第四、對二音一字ｅ困擾，如山水佮山頂ｅ山唸無肖
仝，定著噯放棄(消除)一个系統(讀書音抑是口頭音)，來給
矯規爿(邊)， 才袂肖pua 4肖衝突，抑無學生欲按怎尊循？
例如這馬到底讀這媽，抑是讀這妹？(因馬可唸媽，妹兩音)。
所以講這本冊雖然是用漢字來寫，抑毋閣這是過度性一
時ｅ寫法爾，到時若有統一方案時。冊若出版，著應該照
正常寫，所以講本冊有時仔尋無字，烏白sam 逗，竹篙 逗
菜刀，請毋倘見怪，宛那過度時期姑不而衷爾。
註 1,腔口 這口氣腔調 2,機關 當策略方法招式…講
3,頭已剃下，沒洗不行，這箭已在弦不得不發
4肖pua4 , 這相纏 一起。
12
佇三冬前，小弟cim 才(剛剛)甡一个阿賢, 無外久，有一
工是1988年ｅ舊曆八月廿二， 嗣大人有咧吩咐興仔”今仔日
咧食聖王公會，厝內有僎一寡鳳片糕佮紅龜東西，噯去阿款ｅ
樓尾頂燒香拜拜，給祖公仔講一聲，互咱這紅嬰仔添一下
仔福咧，小弟su當時叨壹直掠做稍寡代誌，這闌珊兮爾，叨罔
行罔行，掠著公工li，心肝頭實在無咧給信斗。
嗯才老sen3老sen6，婁(lau4)一攤仔銅公仔車去阿款尹兜
(家)，行踏行踏，阿款尹兜， 佇廟前新社區，知行路ｅ巷仔內，
這个新社區，厝起了臹ham3 ,彎頭越角，細條閣穢世，彎彎曲
曲 , 臹歹行叨著。尋規晡久尋甲強欲(要)洋去， 佇咱人廿二ｅ
早起十點才到位，這聲忝甲袂講了了，心頭臹喔哫，搪等爬樓
梯爬到頂樓ｅ時，才知影代誌無簡單，心肝內大大著一驚，昊
大地大ｅ奇跡發生矣。
咚時也(原來)这毋是一般ｅ犒軍拜拜，伊正是已經延續百
外年ｅ鄉土結拜會ｅ禮場，現場遺留有臹贅百外年之久ｅ古跡
文物，逶光緒年間經過明治、大正、昭和壹直到呾，現場有結
拜會ｅ簽字布幕，各種紀錄，帳簿等等東西，互小弟看甲目睭
青更更，大嘴開haahaa32，現場正正就是1887年轟動全關渡ｅ
十八兄弟結拜會，這物件攏百外年，伏祀聖王公(泉州府保護
神廣澤尊王)，連佛祖嘛百外冬矣。
目前台北市ｅ文武賊惡賊雅賊，聽兮講三萬外人，若準
這个消息漏溝去，若去夆捃去，這聲叨歹失搦德矣，算來小
弟宛那臹有福運，來親目看著這場「百年來台灣民間神明 會
祕密結拜民俗」ｅ好戲就場，古早咧結拜無希罕，毋閣有法度
延規百年壹直續落，這絕對無簡單，囝孫無三二步七仔，真
正hy4伊袂稠(招架不住)， 佇民俗鄉土來講這是活化石，這
嗎工業社會欲看這齣ｅ，猶臹拚eo, 有影噯食凊糜咧等。
這遍好佳哉叨甡一个嬰仔來告知祖先，有这機會來參
觀li，毋閣阮老父佮阿公，攏無給我講過這代誌，實在有
影遺憾li，彼日 佇阿款ｅ樓尾頂做式，到十一點外ｅ時
瞬，人客來了袂尐，逐傢就來欣賞這百外冬前ｅ遺留文物，
親象聖王公爺(廣澤尊王)，結拜布幕，古早帳薄，一寡
簡單香爐祭器，另外有三四个長老坐 佇椅蓧，搪咧回想
寡古早代誌，叨牽山伴林，阿伯啊長尻倉，罔幵冓li，
有味有素，茲少年汝聽甲耳空kap kap15，小弟掠伊ｅ意
思，普普也知影寡。
原來本事是安呢甡，1887年有18个關渡ｅ少年人，差
不多攏二十外ｅ款， 佇關渡茄苳腳所在(這嗎ｅ新火車頭，
舊火車頭，小學所圍成ｅ地帶)，逐傢開結拜會，這个結拜會
根據蕃薯仔ｅ風俗，噯伏祀一尊神明，決定用聖王公(泉州保
護神，廣澤尊王)，逐傢燒香結拜， 佇神明面頭前咒重詛
〔zua6〕，十八兄弟共生共死，互相依持 吓 逗搭，一年食會
一擺，食會時噯拜拜，奏樂、放炮、辦桌宴請等等東西，結
拜會食四、五十年，這十八兄弟 佇1930～1950中間，連肖
續過身老老去，毋閣這个神明會肖像（同樣）由這十八
兄弟ｅ囝孫，繼續閣辨落去，到這瞬叨已經第四代矣，目
前第五代紅嬰仔亦出氏矣，嗯 才今仔日有機會，來見祖先
ｅ文物佮做式鬧熱。
佇會場做式ｅ中間，百冬前留落來十八兄弟簽名，其
中有一位號做黃石枝，互我看落心肝樸樸彩，袂前未歡喜
咧等，伊毋是仈人，正正就是阮俺祖仔(曾祖父)，這位
阿祖我細漢時有親目看過，印相臹深叨著，亦至頭至尾，
發落(唸煩落)伊ｅ百年歲後(喪事)。
石枝公是18兄弟當中歲頭活上長兮， 佇1956年，伊
93歲，彼年我已經讀小學壹年仔，我逶1955年ｅ秋天壹
直看到1956年ｅ六月，每一工看伊穿烏衫，綁纏頭巾，夯
〔qia3〕拐子；迭迭 佇學校邊行來行去，性地孤 dak，歹
面俏 吓罵囡仔，嗯才這聲囡仔愈愛佮伊死伍ket，挑工給
老伙仔滴一下，老伙仔翻頭拐仔頭叨von3過來，囡仔規陣
唗開，這款代誌不時咧發生，所以印相臹深。
回想著講70年前ｅ結拜會，俺祖仔宛那是二十外歲
ｅ少年家仔爾，哎，時代咧變遷li，算起來我吓使講真
正福氣，若毋是俺祖活甲九十外歲，抑是我稍卡慢出氏
ｅ，根本叨看袂著，這昊註定e啦。
毋閣石枝公 佇1956過身了後，到呾嘛已經35冬矣，
到現時阮俺公仔嘛食到九十一矣，身體勇健，按怎無人提
起古早結拜ｅ代誌，想落叨捶心肝，即尼要緊代誌，按怎
逐傢攽外外，咁講尹袂了解著這代誌ｅ重要是毋？想起來
無定著眾人為食穿拍拚，無法度去給關心，毋知這个重要
性，無的確是安呢li！
註1, 無貳步七仔，真正hy4伊袂稠－沒二兩下子，
怎堪克此大任 2 椅蓧－長板登 3 長尻倉
－久坐閒聊，不知回 家 4 肖像－同樣是
如此 5 捶心肝－痛心疾首 6 歹失搦
德－( paisilakdek1135)糟透了，麻煩可大了。
13
佇茲我卡ziam6權ｅ，給〔ga3〕逐傢鄉親稍耽誤一睏仔，
著是關於咱台灣地茲蕃薯仔，無論是福佬抑是客家，咁
有家己ｅ一套宗教想法佮制度否？外口ｅ冊給咱蕃薯仔ｅ
宗教，鄙相(批斥)甲無啥示，袂輸簡那蕃薯仔是真正低路
ｅ族群，下消無扮，宗教臹醜，水準真低俗乏搭，御示御
症袂見證ｅ，充滿迷信欺騙惡質ｅ信仰求神拜佛。
眾(各)位鄉親嗣大，這攏是冤枉冤 dak，台灣民間ｅ
信仰，雖然無阿啄仔教會赫尼就卻有制度，毋閣宛那有家
己ｅ一套法度，這中間有條有段，秩序順辦，有真正迷人
ｅ一面，這毋是外族人士，用心計較欲給咱中傷侮辱，欺
侮咱蕃薯仔， 吓凍消滅咧， 嗣大鄉親啊，仈族人士按怎
吓給咱糟躂來侮辱咱？這著是咱無家己ｅ鄉土小說來解釋
佮宣揚理念，逐項攏照仈个人寫法，人講東就東講
西就西著是啦。
另外就是四百年外來統治者，上驚民間宗教”起事”
怨傢，影響”安定”，致su著壹定噯全力醜化分化，互恁袂合
和，叨變做怎樣向頭傢請功，去拍倒本土宗教，拍互伊死才甘
願，抑無欲按怎向頭傢請功li？汝講毋是呢？
搪咧梟行e 時， 佇各方面ｅ糟躂打擊以上，做蕃薯仔有
影是真正悲慘，想落互人鼻頭 吓酸， 佇茲，小弟真大膽，
無惜面皮，殘殘給婁幾條仔咱台灣ｅ人神明系統，互咱茲氏細
，尤其是目前在學ｅ學生囡仔兄，稍鼻芳一下，小弟筆尾無啦
i，若有顛誕ｅ所在，才稍給咱疼惜咧，指教咧。
下腳著是咱蕃薯仔ｅ神明系統，內容條理分明，情理排
有夠遐，臹讚，這毋是仈族人士所講赫低落叨著啦，咱了解
了後，嗯才有族群ｅ自尊心，後回仔佗一个若假仙，註汝給
掃落去，講互伊聽無要緊。
頭一點，台灣人民間神明團體，有四款li，湯頭(內容)由
親近到疏遠，有條有段，理路分明，有嫷喟，讚ｅ壹莊咧。
Ａ．“結拜神明會”，台灣話號作”食土地公會”食聖王
公會""食觀音媽會”…等等，由一陣無仝姓無血緣關係ｅ
少年傢仔，看是仝校來兮，抑是愛挨絃仔唱歌腊曲ｅ…肖招
肖偎，大概也十外个人到三四十人ｅ腳兜仔，(也有到百外li)。
這陣”同志”(阿同仔) 吓決定來伏祀一尊佛公，看欲土
地公，抑是聖王公，抑是觀音媽…，續落ｅ瞬呤，每年ｅ這
个神明祭拜日，逐傢集合， 佇神明頭前拜拜，奏樂，唸誓文
，攽炮，落尾也逐傢辦桌食膳饈(cecau61 音叉操)，逐傢結
拜連絡感情，集合ｅ地頭是由結拜兄弟，輪辦做爐主，做爐
主ｅ臹有面子，出錢出力和氣溫純li。
茲結拜兄弟定著每年集會時，宛那噯交寡銀兩，做為公
款，日後加減倘做寡鋪路造橋，救濟羅漢腳仔，辦理地方壯
丁(武團)…等等ｅ公益事業，宛那夆謳咾有著，毋閣結拜會
上介要緊ｅ目的，宛那是咧保障家內嗣大 嗣細ｅ安全，逐
傢平安過日。
這款代誌 佇 su當時無政府狀態，鴨母吞塗蚓ｅ時代，种
种押霸酷行臹梟悻li，逐傢絕對噯 吓合和，逐傢尻倉抾肖倚來
抵抗歹人，ho互茲鱸鰻人膻ｅ腳擻才袂來肖惼(pii)，清朝關
渡地， 佇滿族低落到底，飯桶卦車輦ｅ爛糊糊統治以上，咱
茲百姓吞銅食鐵是袂講兮艱苦，致su著姑不而衷無潦落這堀
宛那袂煞li。
Ｂ．“宗親會”ｅ組織，台灣人號作”陳祖厝""吳氏家廟"
"黃祖厝”…，這个祖厝，毋是徛瞑過日ｅ房厝，伊是仝
一姓ｅ祭祀組織，幵始ｅ當時，差不多攏家己人，落尾也年
代一下久呤，象北投嗄啦別ｅ陳祖厝，二百外冬矣，後代囝孫
逐傢無肖捌(bat)，嗯才認這个”陳”為記號，逐傢合齊來祭拜
祖先佮伏祀ｅ神明li，年代一下久，逐傢仝姓ｅ變做精神上結
合，卡無古早彼延赫親叨著， 佇新此投半山頂復興三路中暫
仔，粗坑ｅ吳氏宗親會，雖然是吳三連系統仁馬所捍頭，毋閣
宛那歡迎其他吳姓人士去參拜。所以講這款組織亦另亦an2，
介在人ｅ看法爾。
宗親會差不多攏有寡財產基金卡占大面，這个流擺，錢
咧做人li，有淡薄仔鍼頭，事業咧返捯才 吓快活，嗯才有法
度倘做一寡慈善事業，抑是公益等等東西。
Ｃ．“祭祀公業”这是私人性宗族性，仝姓仝血緣中間ｅ
組織，佮外口人完全無工礙，伊免夆給寄付，亦無欲提
出來做善事做功德，伊這个祭祀公業就是，祖公仔分ｅ財產
了後，留一部分拍落公，做公錢返捯(運用)，這部分ｅ利純當
做祭拜神位佮伏祀神明ｅ母本，咱斟酌給掠掠咧，這款ｅ制度
佇古早田庄社會，真正有人情味，免出錢閣有法度友孝祖先
，摸蛤兼洗褲一舉雙得，有影臹有面子。
毋閣這嗎工商社會這聲叨顛誕囉，逐傢看著財產叨目睭
起濁矣，大嘴開haa haa32，兄弟中間不時嘛咧為著公業財產，
怨家讓債死五ket，行法院簡那咧行灶腳咧，報紙迭迭嘛咧寫
叨著，逐傢面捋落撕破面皮叨無顧矣，閣咧煩惱祖公艱苦？
咁 吓想著祖公仔是毋？早欲知祖仔嘛勿留寡田園落來，互茲
囝孫嘛卡省喟力，免咧拚甲，乏搭甲，氣甲田無交水無流li。
Ｄ．“地頭性ｅ迓(qy3)神會”又稱”摋豬公鬧熱”，以庄
頭為單位，照輪辦來舉行，看欲五年輪一擺，抑是八、九年
一擺攏吓使，所有庄頭ｅ百姓全部噯參加祭拜，逐傢總是會
員 li，增差無登記叨有影，這款ｅ佛公會，台灣人號作”
ｘｘ庄咧摋豬公鬧熱”，这是民俗祭拜ｅ專有名詞，毋是普通
話語爾。
目前三芝鄉ｅ迎大道公”咧摋豬公鬧熱”，著是好例，由
十八ｅ庄頭村落，照輪辦每一冬迓一擺，迓佛公順續摋豬公請
人客，十外年 才一擺爾，逐傢輸人毋輸陣，搦腳長手莿yaya
，不止也好看頭li，這三五年來ｅ”雞籠中元祭”由無仝姓氏
輪流舉辦，宛那真鬧熱，省錢閣好看，逐傢肖請，連絡感情
吓 逗搭。
註1 鄙相－音披想piisiuu43，批罵之意。 2 阿啄仔，唸
阿毒啊，這凸鼻子，洋人。 3 秩序，台語唸特士
deksu32。 4 變無猴弄，搞不出名堂。 5 梟悻＝
hiauhing 66，很糟啊。 6 食cecau61，食叉操，大魚
大肉飽食之。 7 欲知… 早知，乾脆就不留。8 莿
ciyaya436，表示很洋洋自得
14
第二點，著是台灣ｅ拜鬼文化，關於這个空縫，仈族仁士
吓使講是完全無法理解，“鬼”這字蓋，普通人感到不吉不祥
，袂前未 嗣大人叨嗟兮咧等，呾朋友兒兄亦攏歹勢提起，毋
閣小弟給汝誠懇ｅ講， 拜鬼是咱蕃薯仔文化上要緊ｅ頭一
層，毋管汝歡喜否，伊是咱文化ｅ重心，袂了解鬼，絕對袂了
解台灣人民俗文化ｅ精髓，台灣人拜神，鬧熱罔鬧熱，毋閣是
表面兮爾，叨年節日姑不衷兮li，干礁這拜鬼奚才是發自內心，
上介深入ｅ虔誠。
毋信汝給看，人若咧拜神，是香na燒爾，頭殼haai4無二
个，叨無三無二準拄好，草草了結，毋閣若咧拜十八王公，抑
是中元普…ｅ拜鬼場合，這信士是真正認真拍拚，拜閣再拜，
叨一枝香燒半節矣，話猶袂講到煞，有影真正奇li，一四界嘛
是咧喊，佗位萬善堂外聖拄外聖，十八王公外讚拄外讚，廖添
丁廟外興拄外興，真正聖甲 吓食糕仔li。
佇小弟ｅ看法，台灣人拜鬼文化ga事實以上，呾這叨
逐傢鏡對鏡，面對面講一下仔透枝ｅ，毋倘安呢掩掩挹挹，
夆看袂就磅，互外族人士弓詈甲無一塊ｅ時瞬， 才來咧見羞
起慪韶面，安呢叨無趣味矣，噯知影台灣現主時國民所得超
過一萬美金矣，全國生產毛額佇世介171國家當中排第21名
，有影揚，莿yaya，咱自有咱ｅ甡張，有咱家己自尊心，免
咧看仈人ｅ面俏起落返捯。
文化ｅ代誌, 無啥乜高尚無高尚， 高尚啥乜啦，宗教
文化閣卡無一个標準，講來講去是咧拚lak袋仔，啥人卡飽滇
爾，毋免糟躂咱台灣人ｅ信仰，講啥乜無水準，講啥乜迷信
，無卡擢啦，呾這嗎三年好壞風水照輪，蕃薯仔叨大尾矣，
免夆看衰矣，茲批評者啊，汝對台灣文化是捌外深啦，毋倘
閣嚷啊，文化無高低之分，汝捌否？阿伯咧嗟，捌一箍芋仔
蕃薯啦，捌八擺ｅ呢。
尤其是咱茲蕃薯仔ｅ少年傢仔，嘛是毋知影咱台灣人拜
鬼文化是變啥魍？叨毋知拜鬼甡了一款怎樣？實在講起來，
這亦莫怪啦，叨離開社會甚遠，學校ｅ教冊又閣無寫這方面，
嗯才吓文化脫節袂 逗搭，袂肖食穿li。
“鬼”這个物件，每一國家ｅ意思，甚至每一个所在講
ｅ，攏無肖仝(同)，電影咧做鬼，大部分是西洋甡虫甡湯ｅ
西洋鬼，抑無著穿清朝官服跳le跳le廣東鬼，這二款鬼攏毋
是咱台灣鬼，咱台灣鬼自然是讚ｅ壹庄兮，互人吓拜ｅ。
無親象西洋鬼 , 安呢癩膏爛癆， 死人湯，cap cap滴，抑
若香港出品ｅ電影，廣東鬼用滿清官服，這廣東人ｅ文化咱看
無li，台灣人雖然互阿本仔管五十冬，毋閣無聽兮台灣鬼有咧
穿日本和服li，按怎廣東仔 吓去想這步ｅ，咁講陽間猶管無
夠是毋？以上寫赫贅ｅ意思叨是講，一款文化有一款文化ｅ特
質，尤其是鬼這款物件，無影無跡，鬼ｅ產生絕對佮一个民族ｅ
生活背景有牽連，人連鬼，鬼連人，一條神魂二款形，嗯才吓
ha4， 吓肖食穿li，所以講知鬼叨知這个民族！
註1 袂前未：猶未之意 2 無三無二，就是草草了結
2 he3 話，取同音字，就是下願暗唸詞句 4 甡張：
氣魄，尊嚴 5 袂肖食穿：vuesir36 ziacing36，
不密接不來電。
15
台灣人按怎 吓幸這味陰ｅ祭拜？這檢討起來，叨真正有
意義li。茲有三條頭目來做一个參考，第一、蕃薯仔祭鬼ｅ先
天背景按怎？第二、這嗎有咧祭拜ｅ陰神有幾款？第三點蕃薯
仔按怎卡幸祭鬼，比拜神卡起磅？
台灣人祭鬼ｅ背景，表面真單純li，毋閣背後道理無簡單
，攏總一句話給點，就是「為著生活，拚食拚穿拚命爾」，忠厚
人流凊頭汗捙拚，唗路仔羅漢腳仔著 吓來痟想膏膏纏， 佇
1850～1950這一百年ｅ噹中，台灣人冤枉死ｅ人甚贅(太多)甚
贅矣，有影叨無地倘去算起，最主要原因，著是無政府狀況之下
ｅ社會秩序。無法度倘依持，致su著社會無公理，鴨母吞塗蚓，
強兮提去食。
滿州民族號名咧管台灣，毋閣素質低路，來台灣ｅ官吏佮
若充軍到新彊，驚嘛驚死，無仁材噯來，有來ｅ官員因為台語
袂通，宛那袂 逗搭，萬項交買辦，食錢官一大拖，滿州民族
佇 1683逶台灣併入中國，毋閣壹直到1880左右才 佇台北設
城府，有影漏喟甲無聲無示，咁講這二百年ｅ噹中，攏咧食
屎咧睏是毋？
漳泉血拚，閩粵打殺，百姓死傷無人申冤…，毋知死了
外贅冤魂，干礁漳泉拚來講，一庄頭配一庄頭，一寡少年青
壯死了了，規庄家己滅家己，嗯才一四界有應公萬善堂，白
骨拍拍一大堆，啥人無噯生命，蕃薯仔咁看了袂驚是毋？
其次ｅ原因著是破大病ｅ問題，台灣地，尤其北部，叨
濕氣重li，又閣燒辣，致su著熱病大興，人講瘴厲歹氣，以
這嗎 ｅ科學來講，著是瘧疾、霍亂、腸菌种种東西，卦虫蛇
萬物爛身，污染水質，卡加汝嘛擻个仔死甲斷半隻li，一四界
破病過身ｅ人甚贅，有ｅ人無錢娶嫫無後嗣，抑是無甡囝孫ｅ
人，自然的就白骨枯現 佇路邊，無人來祭拜超渡，這寡冤死
ｅ鬼，四處漂動，加減 吓來害著茲在世ｅ。
最後著是因為營養不良來冤死ｅ，宛那袂尐，中國人系
統，自古以來枵死就是上大條矣，有ｅ因為苦旱抑是做大水，
抑是田地頭傢惡性壓迫，抑是著土匪來搶，抑是著身命袂堪ｅ
，抑是父老囝幼，卡卡ｅ嘴齒規米籃，叨返袂過li，尾期閣有
官廳兮壓迫佮食鴉片煙ｅ關係，致su通人散赤，營養無夠早
死東西。
安呢給(ga5)看來， 佇清朝中尾期ｅ台灣，是真正淒慘
，有影人間地獄 dada著是啦，平均扯起來，十分之三，四
大部攏變做冤鬼，這个比例有影驚死萬代人，叨稍給張弛咧
，庄腳所在，田頭田尾贅土地公以外，宛那真贅有應公，有
影看落汝 吓起雞母皮，照台灣人ｅ想法，人 佇凡間佮陰間攏
仝款生活，噯食飯，用錢，坐車東西，這款冤死，尤其是無
後代囝孫來祀拜ｅ孤魂野鬼， 吓四界流動，危害凡間ｅ人，
所以鬼絕對噯拜要祭，安呢心肝頭才吓安叨著。
咱續落叨給寫咱台灣人ｅ祭拜鬼ｅ種類。
(A)“地基主”著是祭拜咱所蹛厝ｅ厝地，原本古早蹛(住)
過ｅ人ｅ無主枯骨鬼魂，互伊有一个寄託有一个映望，
知影有人咧給關心，台北市真贅大樓美屋，原本亦是
鬼魂出沒ｅ墓地，像西門町，大龍峒孔廟彼箍圍仔，呾這嗎
關渡埔頂ｅ別莊(自強新村一帶)，差不多完全起 佇舊墓地頂
頭，逐傢地基主臹有倘拜矣，拜地基主普通是咱人初二、十
六，毋倘攽外外，噯卡誠心ｅ。
(B)“萬善同歸”(有的寫作”萬善堂”、“萬善堂祠”、
“萬善大墓公…)ｅ路邊小廟，這是上厲害ｅ惡鬼，專門祭祀
械鬥抑是戰時冤枉橫死ｅ冤魂野鬼，真正嚴厲，伊所散發出
來ｅ鬼氣磁場，袂輸十萬伏特ｅ高壓電li，叨少年仔互汝袂
鐵齒ｅ，若看著路邊細間廟仔寫著”萬善同歸”時，這聲皮
就繃卡an2 le，乖乖也誠心誠意燒一枝仔香，佮人稍交陪一
下，毋倘攽外外去互陰氣煞著，返來卡加汝叨梟悻了然甲叫
不敢，實在袂假仙eli，有ｅ外省同胞抑是市內ｅ蕃薯仔，毋
捌接觸世事ｅ囡仔，逶”萬善同歸”看做是”守望相助”抑
是”誠實善信”一類ｅ標語，奚叨大顛誕矣，卡加汝著衰甲
種匏仔生菜瓜li， 佇台灣ｅ鬼廟內底，萬善同歸上第一靈聖，
有求必應，亦上第壹厲害，毋倘看伊細仔噹間仔爾，後回仔看
著噯卡張弛ｅ，噯有誠心 才好。
(C)“有應公”細間廟仔，伊收骨ｅ範圍卡闊，雜路收著是
啦，頻若老乞者，羅漢腳仔，破病死ｅ，抑是水淹死ｅ
，戰爭死ｅ，…攏總壹視同仁，祭祀茲無主ｅ枯骨，俗語咧講
「少年若無一擺憨，路邊那有有應公」，這款有應公ｅ小廟，
佇庄腳宛那真贅，袂輸土地公廟仔，宛那算中等ｅ厲鬼，電
壓五萬伏特ｅ，仝款互汝袂鐵齒ｅ呢。叨噯誠心誠意li。
(D)“大眾爺、王爺”大眾爺算是真嚴厲ｅ鬼將，隨人看隨人
驚，關於這大眾爺ｅ代誌，真歹勢小弟知兮臹少，而且一
人一款，臹無統一性， 佇茲我無法度表示意見，知影伊是一款
香火旺盛ｅ厲鬼就好矣，親象講王爺，下港ｅ王爺臹興，扶做
神叨咧袂赴矣，茲信徒無可能給降級叨著，是神是鬼，小弟無
法度判定。
(E)“水流公”專門祭祀無主ｅ水流屍，期望伊ｅ魂魄 吓凍安
定落來，毋閣本臹是淹死橫死，亦袂使象神明咧伏祀赫尼隆
重，不而顧， 吓凍替橫死ｅ人設想周到。想著來這宛那是臹有
人情味ｅ代誌。
(F)“十八王公”佮”廖添丁廟”，“姑娘仔廟”這是咱台北
附近仔上第壹興ｅ鬼廟，尤其是十八王公，有影臹聖，聖甲
吓食糕仔，瞑日香客贅甲袂講了了，十八王公，出名甲開分店，
連高雄著有，亦拍做電影，賣座真正好li，這二間廟仔，這十外
冬來有影踏著機會，擎甲掠袂稠li。
(G)“金斗公” 佇庄腳抑是山頂尾溜ｅ所在，因為年代久, 囝
孫袂記ｅ，抑是顛誕物件徙位毋知影，壹直無人來祭拜處理
，抑是 佇防空壕囥久無人管(尤其是戰時)，一寡放枯骨ｅ骨
罐給集中起來，起細間廟仔祭拜，算起來是有仁情味就是啦。
(H)“佮中元普渡有關係ｅ鬼神廟府，像老大公廟抑是專門七月
普渡用ｅ小祠小廟攏算 佇內底。
以上普普仔對台灣人所講ｅ”拜鬼文化”做一下紹介,
這是一个文化ｅ連續體，佮好歹是非無關係，這少年仔逐傢
噯知影，咱祖公ｅ生活，絕對無想兮赫快活li，一工到暗 佇
生佮死咧來回返捯，嗯才 吓發展這款ｅ文化來。
其他方面，有鬼叨有神，若神ｅ部分，我免閣紹介，
目睭看 吓著ｅ，攏是啦，像媽祖宮、關帝廟、佛寺…逐傢攏
吓了解，總講一句，拜鬼文化，毋倘給看做是宗教，給看做
是求生存ｅ一款寄望佮手段爾，毋倘看伊笑，噯看伊流目屑ｅ
時，台灣鬼廟所以吓興，拜鬼文化所以吓流行，主要亦是有求
於神鬼，看欲求財、求子、求六合彩、求股票li，看來無高尚
，宛那是臹姑不而衷li。
( 註 )
袂鐵齒ｅ 可不能不信邪 張弛→小心 聖甲
吓食糕仔，昔時拜 佛，佛像前都 吓照例放一小塊
紅紙包小米糕，神明靈驗常，連糕都食了，汝看有
外利厲害。
16
第三點來講到台灣人ｅ一年噹中，各種祭拜ｅ時機順序
，宛那臹有規則，人講有條有段，有家己ｅ文化系統li，仈
族欲以迷信ｅ罪名來打擊，這咱袂咧接收ｅ，咱祖公ｅ風俗，
噯一代傳一代，仈ｅ人無資格來打達，咱有家己ｅ甡張li。
逐工(天)拜一回，蕃薯仔 佇每暗，大概也六點七點
cim暗頭仔ｅ時，噯燒香拜拜，續落插兮大廳吊著ｅ天公
爐，來給求一下仔平安ｅ，這干礁單純燒香爾，亦無供品
亦無辦桌亦無燒金東西， 佇漳州系統，號做拜「三介公」
，天官、地官、水官著是。毋閣現主時公寓式ｅ，新時代
少年仔，欲做 吓到，恐驚猶臹拚eo。
(二)15工(天)拜一回，每月農曆ｅ初一、十五，抑是
初二十六，來拜神明公媽抑是地基主安呢，有供品燒金，這
算簡單ｅ拜拜爾，毋閣對生活宛那有影響。
(三)二三箇月拜一回，大概也是祖先做忌，抑是年節ｅ關
係，拜拜有卡隆重有卡講究這款拜拜，算起來真正膨沛，有
牲禮有四果兼粿類菜碗…東西，真正膳饈，卡早做囡仔ｅ時代
，頻若聽著俺祖仔欲做忌，叨真正歡喜， 佇彼个物質客欠ｅ
年代，上要緊嘛是it著欲食好爾，叨無管厝內手頭按怎li！
(四)年例大拜拜，每一个庄頭，攏有約束一个大鬧熱ｅ日
籽，像9月初3，抑是8月15…，定著是以農曆咱人為主，也
叨一年才一擺爾-爾，辦桌食齣是魚魚肉肉，cecau滾滾，無人
吓想起普通時仔，食豆鼓仔( dau sii ah325)ｅ代誌，大迓神大陣
頭，燒酒透海ｅ，飲甲醉歪歪，做囡仔e上介歡喜，有點仔做
過年ｅ款勢。
(五)五、六或是八、九年一擺ｅ”摋豬公鬧熱”，本文頭
前有講過矣，庄頭共同伏祀一神，續落每庄頭輪流拜拜請人客
，因為七八冬 才一擺ｅ關係，有影一氏人拄無幾遍，除了大
魚大肉以外，猶有送人客豬公肉ｅ風俗，頂頭搭一張紅紙，真
有仁情味，這款ｅ鬧熱辦桌(人客)，壹定噯登門飲食，主人才
吓歡喜，因為七、八冬才一回爾，卡遠路頭兮卡奧(難)見面兮，
恐驚也後回鬧熱時著過身去矣，簡那有”這世人偆這遍見面機
會爾”ｅ意思，嗯才普通若邀請食豬公肉，壹定噯赴約，因為
這毋是單單食ｅ問題爾-爾。舉一个例來講，北投小坪頂張尪公
，每九年摋豬公鬧熱，與會ｅ老者，，咱攏差不多有法度給按
算，後回 吓凍閣再參加ve？
以上三點，到茲做一下仔結束，對咱蕃薯仔ｅ种种宗教
風俗，有淡薄仔了解，互咱 吓了解祖先ｅ困難艱苦，亦互茲
少年朋友了解鄉土講古ｅ背景，飯絕對袂逶昊頂茖落下來，
呾實在講起來，講古是一項幼秀ｅ口頭文學，有影硬斗，不止
也歹寫叨著。毋是一般人講王祿仔仙赫尼簡單，腹肚內若無
貨叨現漏喟li，者者是倒吊無墨水，燃眉汝著倒閣食家己矣，
這三四冬以來，鄉土文化真正鬧熱擎甲鏘鏘滾，毋閣大多數攏
集中 佇歌仔戲，新詩，童謠、答嘴古、新劇ｅ…東西，對純文
學ｅ物件，卡尐人去沐著，卡尐人深入去研究。
佇電台方面講古有吳樂天俊明等少數人咧拍拚，宛那無
寫成冊，比論講用北京話來描寫廖添丁，伊ｅ氣氛趣味著失去
矣，族群鄉土文學ｅ物件，是無法度he3話(翻譯)，抑無意境
著去了了矣，亦著是講鄉土講古，的確著噯用母語去寫，看落才
吓起磅才吓落腹，這款ｅ工夫，定著噯在欉兮，噯親身潦落著
知輸贏li。
佇茲小弟真正誠心誠意，來邀請咱茲鄉親 嗣大，共同
來研究咱ｅ文化，噯贅人才有夠力，單純一个人絕對擔無法ｅ
，小弟 佇茲是稍提出意見爾，後回仔台語本土文化， 吓發展
吓壯才， 吓生葉湠根， 吓見光木欉，這攏著映望各位，咱
逐傢仝齊來拍拚認真， 才有希望li。
註菜碗供桌上的素菜餅糖，放在碗內併排供神 王祿仔
仙能言善道的騙仙 答嘴古像講相聲
17
這嗎話頭閣給徙返來聖王公會ｅ現場，這个聖王公，著
是泉州移民ｅ保護神，有ｅ號做廣澤尊王，關渡這角勢ｅ人，
大部分是安溪、同安ｅ移民後代，嗯 才對聖王公有優先選擇
， 佇現場我咧給斟酌看，這仙佛公裝甲金siaksiak，面烏金烏
金真正古味叨著。
另外閣二本古早帳簿，紙質真軟，簡那欲爛去ｅ款，我
看叨請影印行緊給拍腊(護貝)卡實，抑無免閣二十冬叨全然麩
去矣，這二本古冊內底記錄，茲十八兄弟ｅ錢銀帳目，寫甲
軂軂長，用台灣馬薯(舊式符號)，看無空叨著。
上有價值ｅ，著是彼嶺絲質ｅ簽名布，吊 佇神壇ｅ正手
邊li，奚有1887年十八ｅ兄弟ｅ親身簽名，真奇怪li，臹贅
人攏寫「士」 佇尾後，咁 吓彼个時代ｅ「先生」ｅ意思是毋
？這塊布我咧給看是絲質ｅ，到茲猶閣真讚，無一个舊款，僅
若稍卡黃一點仔爾。
神壇面頭前ｅ供桌，祭品囥甲滿滿是，咱厝內做真贅鳳
片糕佮紅龜，亦有一寡餅、糖仔，若是今年有出氏後甡ｅ人，
攏著僎物件來祭拜鬧熱叨著。
拜煞了後叨燒金紙，後尾仔有人咧無 閒cici43，卡停仔
逐傢辦桌食膳饈 li，簡那是一人五百ｅ款，尾也我著返來厝內。
佇現場ｅ時瞬，佮遐阿伯仔幵冓， 才咧愛笑講時代變
囉，呾這嗎 ｅ少年仔，叨卡貧憚猶卡無咧注重這，這个聖王
公ｅ結拜會，自幵始到呾，宛那百捅年矣，一年逗陣一擺，
經過清朝時代，日本人來占，大東亞戰爭，日本人了然，中國
仔來台，二二八、三七五，到今仔日經濟大發展，經過了即尼
贅艱苦，叨有法度連綿後續，薪傳香煙，有影叨無咧快活li，
總講一句，這款ｅ”神明 會” 吓凍連相續傳到這嗎第四代，
宛那臹無簡單li。
這嗎時代變遷到茲來矣，做式ｅ禮數加變真贅矣，卡早
咧結拜會卡有甡張卡有氣氛，做式真臹嚴肅閣隆重來行禮li，
袂輸天大地大，逐項卡有照步來，像講就香，行禮了後，猶有
北管奏樂佮放砲ｅ禮數，這个北管樂團，鼓吹佮鑼鼓是拍甲
鏘鏘滾，厝蓋叨強欲夯〔qia〕去啊，鼓吹一擺四支合奏，是
奏甲真叉操，厝邊頭尾總來看鬧熱，有影僥擺ueue61，了後
閣攽龍鳳雙砲，有影真正慎重真正起磅叨著。
這嗎 ｅ時代無肖仝，人叨咧招袂倚來，卡來嘛是彼幾
个仔老伙仔面，少年家也叨毋知li，猶嘛 毋敢奏樂鼓吹，驚
互人誤 吓做功德(喪事)，連攽砲仔叨歹勢，驚去礙著第三者
ｅ睏眠。
算來這十八兄弟ｅ噹中，其中這个黃石枝，宛那真正
好命，囝孫旺廣，生湠足贅ｅ，算算ｅ 才百年爾就湠衍甲
五、六百人，有影看了著驚li，親象我俺公 佇 1901出生
叔公1911生..我老爸、阿叔、表伯、表叔規百人，每一位後
輩出氏，來到這个世間ｅ時瞬，攏噯 佇咱人(農曆)8月22日
僎麵龜去拜拜，石枝公若有聖有靈，一个仔一个來點名，宛
那真有趣味lo。
頭前講過，頭一擺結拜會成立ｅ時瞬，1887年我ｅ阿
祖石枝仔師25歲ｅ款，搪青春搪漂碧， 佇起腳落手ｅ中間，
人講少年傢仔嗄嗄叫，有影叨著，啥人知影70年真緊叨過去
矣， 佇伊欲過身ｅ進前一冬，天公安排來互小弟佮伊有肖捌ｅ
機會，1955秋1956夏，石枝公安呢老硞硞，遼遼遼，烏衫烏
褲，頭綁頭巾ｅ清朝打扮，性地古怪，种种東西，互我印相臹
深li，彼時小弟拄好小學壹年級爾-爾，以7歲來看93歲ｅ老
前輩，感想萬千，現主時小弟43歲，閣來看卡早奚93歲老大
人 佇 25歲時ｅ遺物，宛那閣卡感慨li，石枝公 佇 1956年6
月過身了後，喪事真正風光，前前後後辦了二月外日，逐工開
司公壇唸經東西。
kin kin kiang kiang臹「鬧熱」，彼个時囡仔欠娛樂，感
到臹好耍，尤其是尾也做功德弄樓，唗卸馬，閣卡好看，彼年
ｅ歇辣，逐工守 佇(窩在)祖厝”大埕兮”看「鬧熱」，壹直到
出山大禮，仁山仁海ｅ排場，彼二月日ｅ中間，吓使講是小弟
規氏人，做囡仔時代，上第壹懷念上第壹”快樂”ｅ日子，囡
仔人毋捌世事，講起來實在有影li。
嗯 才我三年前 佇阿款尹厝ｅ會場，看著石枝公ｅ結拜簽字
時，赫尼衝動，因為這位老祖我有看過矣，伊正正是「今之古人
」亦是「古之今人」ziazia 45 有影li，下面著是寫寡做囡仔時，
關渡庄腳做喪禮ｅ回想。
註 1 台灣馬薯，舊式台灣數字字法 2 鳳片糕，台式
祭品 3 逗陣、借音、相會見面 4 弄樓，喪禮
中的特枝表演以娛眾人 5 赫尼，那麼。
第三章 1956，關渡
18
這回小弟寫ｅ庄腳齣頭，是1956年辣踉(夏天)ｅ代誌
，離現主時1991年9月，拄好三十五年dada45，小弟寫这
，是欲(要)互寡對鄉土有趣味ｅ人，做一下仔參考，普普也
倘了解彼當時ｅ台灣庄腳起落，因為親身經過ｅ，寫落才吓
逗搭吓親切，一方面互老兮這延ｅ人，吓凍回想少年ｅ時代，
亦互現時茲少年傢仔，一款鄉土教育，也叨這方面ｅ輸贏，學
校卡無咧教啦，因為咱鄉土講古寫法，猶咧起步ｅ階段，小
弟這嗎宛那責任真重li，夯(qia3)筆卡重夯鋤頭，才稍牽教ｅ，
若有顛誕，才給咱指教le，這是良心話，無咧講客套。
小弟ｅ血跡地佇 這嗎關渡國校ｅ籃球場彼个所在，42年
前宛那真荒涼yap僻，1955年9月，嗣大人掣我去關渡國民
學校讀冊，讀小學一年級，彼時仙兮(老師)ｅ素質，以這嗎ｅ
水準來看，不止也”古魯”叨著，南北口音腔口臹重，除了幾
个少年仔，剛逶師專卒業以外，其他五路來ｅ，真正叨聽無讀
無學無，有影了然，茲學生囡仔，規工激絞群嘻嘩(hihua 61)，
規間厝蓋強欲夯去，叨對讀冊這路著無趣味li，厝內嗣大宛那
攽外外，無咧給信斗li，彼个時代，讀冊，叨有讀簡那無讀仝
款，逐傢罔渡罔渡li，蚊虫亦過一氏人，總講一句，逐傢愛耍
(sng4)叨是啦。
讀壹年級ｅ時瞬，吓記le差不多逐)工早起十點外，抑是十
一點ｅ腳兜仔，佇學校西側偎車頭彼爿ｅ樹仔腳，不時叨有一个
老大人，穿烏衫綁頭巾夯(qia3)拐仔佇遐行來行去，照彼當時ｅ
感覺，這个老人性地真正古魯，kap5袂著，好毋好叨欲夯拐仔
拍人，這不吉囡仔愛創治伊，給滴一下著唗，老大人翻身叨拐
仔頭von3過來矣，囡仔規陣大笑。
咱講一句公道話，呾老伙仔人食甲九十外矣，無夆尊重叨咧
慘了矣，哪吓堪咧互囡子痞來給創治li，有影無大無細，莫怪老
伙仔人氣搐搐，古早人所說「囡仔人閃開，老伙仔欲展威」，真
正有影li，創治老大人罪惡真重，這叨袂致互汝鐵齒eli，猴囡
仔變這步兮有影甚不吉啦！
小學壹年級下學期這欲結束ｅ時機，亦就是1956年大概
6月底ｅ款，彼工ｅ代誌我記甲臹清楚，esai講35年了後ｅ今
仔日猶閣記甲臹稠li，彼工仙兮(老師)無來，規班hehe33趒，
我佮仝桌ｅ同窗兮鴻賓仔，用粉筆佇桌面咧劃”國界”，咱這
國ｅ袂使去占著仈國，“仈國”ｅ手若伸過界，這國叨給be4
開，小朋友安呢冤來冤去，冤甲尾溜也，簡那欲起歹面ｅ款，
我臹lin3想氣叨著，拄好佇這个崁站，阮阿母忽然間行入來教
室，面色青青無一點笑款，佮隔壁老師辦公室r6en4一下(打下
招呼)叨趕cucu45，一路行出校門。
我壹直講學校ｅ代誌，毋閣阿母攏無印話，大步大hua(跬)
壹直趕，奇怪，今日行ｅ路，按怎佮普通時無仝(同)？ga返厝
ｅ路顛倒翩，這時小弟ｅ心肝頭知影，無定著有代誌li，無外
久ｅ中間，行到祖厝”大埕兮”ｅ所在，入去土角厝，才知影
阿祖已經過身去矣，去土州賣鴨蛋矣，尹祖公招伊去食粿矣，
這氏人歲頭食到九十三，宛那臹有福氣a li。
這層喪禮佇 1956年ｅ辣昊真「鬧熱」咧進行，一睏仔舞
二月外日，因為歲頭食甲九十三，致su著喪事袂講外悲哀，
給回想起來，袂輸簡那咧辦喜事仝款，一四界笑容比哀面兮卡
贅li，講起來宛那可憐，彼時ｅ庄腳所在，無啥乜娛樂，亦無
電視亦無曲盤倘攽，亦無戲台，欲看戲噯去淡水才有，單單才有
一半台仔放送爾，叨袂合氣口li，嗯才彼時做囡仔真艱苦，物質
生活真乏搭，精神ｅ生活亦是攏仝款袂起磅。
呾這嗎無仝款矣，大埕仔咧”鬧熱”，逐工攏有司公咧做
壇li，臹好看，遐傢si頭(裝備)，種種樂器東西，奏甲真好聽，
有時小吹若陳，奚著閣卡cecau61，規庄頭hehe33叫，小弟彼
時雖然干礁7足歲爾，毋閣印象臹深ｅ有一層代誌，著是風琴
介入司公壇ｅ，這新口味新戲齣，互我感覺臹gokgiak35(奇特
感覺)。
吓記兮司公欲起壇，差不多早起十點外，猶閣下晡三點外
ｅ款，到時，規陣囡仔兄囡仔姊拑倚(kiiwa 34)來，圍甲烏坎坎，
人洘卒卒安呢，袂輸咧賣藥仔ｅ，這齣頭連大人叨愛看li，司公
喚甲hihihoho，大聲細聲，下腳手拍鑼拍柏挨大筒弦兮，真正
捙拚臹好聽，不時奚幼吹若陳，氣氛閣卡有夠遐。
佇這个空縫ｅ時瞬，我遂感到有款奇卡ｅ音樂聲，濫佇
司公仔ｅ鑼鼓弦仔鼓吹內底，這个新音樂聲臹好聽，毋閣現
聽著知影毋是司公仔ｅ物件，聽閣再聽，尾也才知咚時也著是
風琴ｅ聲，風琴ｅ聲濫落司公ｅ傳統台灣樂器，有影臹好聽，
袂輸佇米酒透保力達p，別有一番ｅ風味，人講囡仔目睭卡金
，尾也我才知影彼台風琴是逶關渡國校借出來ｅ，我吓認ｅ，
囡仔不吉，規陣不時去辦公室亂彈風琴，ziazia45著是目前
司公壇這台li，這代誌佇 這嗎是無啥乜，毋閣彼个時代是昊
大地大代誌li，辛辛苦苦用利仔卡搬來ｅ風琴，這著毋是”紅
目有仔逗鬧熱”li，這表示彼時ｅ人，真正認真來辦喪事，嗯才
用心計較激頭腦，想壹切法度，來互喪禮吓凍真風光真大扮li。
吓使講35冬前ｅ庄腳人，真正古意，真正有孝，來達到
慎終追遠ｅ目標ｅ瞬呤叨著，反返來這嗎 ｅ少年仔，我看臹
拚eo，對禮數仁情世事，叨毋捌一箍芋仔蕃薯li，做一下仔功
德，無三無二，欲倒欲haai3，干礁吓曉分財產，占水頭卡大
面li，脫線脫線嗯才茲阿伯仔看了臹袂作ｅ。
總講一句，彼个時代，講茄苳腳規迣稜(整條巷道)，攏投入去石枝
公ｅ喪禮，鬧熱滾滾，真正風光，逐傢無閒cici，甘願潦落
無喚苦，這款精神，佇我做囡仔ｅ時普普也掠吓出來。
( 註) 1 這延ｅ人→這一輩份的人 2 顛誕，唸訂
擔，有差錯 3 掣我去…帶我去…唸蔡我去 4 創治
con佇46，半欺侮半開玩笑 5 曲盤Kekbw12唸克盤，唱片
也 6 大筒弦，幼吹duagonhen312，yuce41，台式樟木
大胡琴
19
若給講到各地ｅ風俗，也叨心適li，ｅ瞬呤，日本仔天
皇舊年過身ｅ時瞬，小弟拄好佇電視觀看伊ｅ葬禮，叨規排
ｅ車隊，按怎看攏無靈車，看到尾溜也 ,齣頭強欲煞，才知影
其中一隻烏色ｅ旅行車，原來叨是靈車，彼台旅行車外口亦
無打扮，亦無花箍亦無寫字，叨簡那普普通通，袂輸普通小
貨車載物件仝款，哎，實在有影！
世間大理解，汝嫌伊鳥魯木齊烏白sam做，人阿本仔講
安呢臹隆重li，隨人看昊月無仝，這在人ｅ看法爾，若講著這
做功德ｅ代誌，咱蕃薯仔實在是臹袂謳咾(稱贊)ｅ，臹討債(
浪費)叨有影li，認真給想起來，普通時仔是儉腸qee4肚，
kiudede343十二月凍霜，蔭瓜仔漬甲規厝廳，連一角銀叨無
拍咖腊沙去。毋閣若拄著老歲仔人老去做功德，叨無惜本錢
，變做甚過拍隕討祭甚過隆重。
規个民間ｅ財力，盡儉盡散，有影臹梟悻li，親人俺祖
仔咧做旬，逐工法會，連續二月外日，逐項照步來，卡加金
山銀山嘛挖了了，庄腳經濟真正散赤，袂堪咧長久安呢毀敗。
小弟佇大漢了後，有略略也給探聽，su當時俺祖欲老去時
ｅ頭尾按怎，彼早起阿祖叨感覺人毋好，想想兮亦知影大限欲
到矣，这氏細問伊看有欲食啥否？伊講想欲食魚丸，十分外鐘
了後，連相續吐三个大喟，自那佮世間永別,形體甡張真正氣魄
，像咱冊咧寫「壽終正寢」有影li，續落著扛到大廳兮，設香
燭祭拜，壹切真順序，條條分明，茲氏細嗯才逐傢臹謳咾，講
伊做人臹好命臹福氣。
小弟真正咧給注意，著是伊行到仁生盡磅ｅ時瞬，猶
原是以魚丸，當做一氏人上好食ｅ物件，哎，想落叨燕氣
(不勝感慨)，古早人有影甚過散啦，物質种种有影乏甲看
現現li，小弟佇少年ｅ歲月內底，頻若看著魚丸，印相就
臹深li，咱跋白ｅ，彼時，亦就是35冬前彼時ｅ魚丸加臹
好食li，原因著是魚俗麵粉貴，嗯才魚漿咧參落實實在在
，在欉兮，這嗎 ｅ魚丸實在袂孝孤du4e5，專專嘛麵粉參
甲起san pu45。
吓記兮厝邊有一个退伍仔，號作連霸，一暫仔叨咧賣
魚丸湯li，一碗2角，湯頭讚甲是袂講了了，眾人謳咾甲
吓dak舌，這嗎社會號名是富裕來講，毋閣魚丸歹食，亦
無人去注重li，算起來現代人叨無奚福氣li，現代人連正港
ｅ土雞仔叨食袂著，欲na食有qirdrｅ魚丸啦，這正港ｅ丸
仔，這嗎叨尐人做亦尐人賣li。
佇茲小弟徛佇鄉土文化ｅ立場， 給咱茲後尾出氏ｅ
少年仔稍nau5一下，台灣人ｅ”魚丸文化”有輝煌ｅ歷
史傳統，近年來佮其他ｅ鄉土民俗仝款壹直落坑，真正拍
隕li，魚丸卡早是數百萬蕃薯仔，日夜苦思擻念ｅ最高料
理，吓凍互一个就百歲ｅ老大人，佇仁生尾站時，猶原吓
做最後ｅ懷念，汝看咱蕃薯仔文化外kiang著好！
呾順續講逶仈位兮去，台灣ｅ魚丸，以宜蘭ｅ圓山
鄉魚丸店上出名，伊ｅ店拄好佇橫貫公路支線中途，圓山
鄉ｅ三角窗附近，伊ｅ魚丸湯，一碗十粒，看起來黃岩黃
岩(qim2)，人講生仙面，毋閣食佇嘴內奚著無仝，人奚真
本真料，製作返捯(處理之間)真正鼎真，魚仔青(鮮)，做工
幼秀，汝食落一世人qen3，呾這嗎叨無咧開業矣li，叨停
十五六冬以上矣，主要ｅ原因是，無人甘提供赫好ｅ原料
，佮無人欲做規暝，厚工真幼秀去製作，想起來時代叨悲
哀li，工業社會有時有影臹袂謳咾ｅ 啦。
差不多二十外年前三十年前，佇台北ｅ市區(相當現
時ｅ舊市區，彼時猶無東區)，暗時仔不時有賣麵茶兮，
佮賣魚丸湯ｅ拺車，佇街頭深巷咧來回巡賣，咱這延兮做
囡仔ｅ，加減攏交關有著安呢li，賣麵茶用蒸氣來bi一，
賣丸仔湯兮用湯匙仔碗公，吭，吭…，沿路咧賣，沿路有
人交關，佮這嗎囡仔買babu31冰淇淋仝款，良心講來一
碗魚丸湯噯五角，貴是貴，毋閣臹有額，孝落臹起磅叨著。
近年來，魚起大價，魚丸漸漸吓互新竹槓丸給槓倒，
臹拍隕li，茲做魚丸ｅ司傅，一方面原料短，一方面厚工
閣競爭俗賣，逐傢做了袂siakdiak11，看看兮叨無卡擢li
，這行漸漸溜尾矣，這嗎欲食稍寡卡讚ｅ魚丸，噯去淡水
食，淡水魚丸是出名，毋閣湯頭做料种种，宛那漸漸摯載
袂稠，少年仔做落手骨軟，無噯捙拚搭底矣，算起來無魚
蝦嘛好，有淡水魚丸，總比無卡讚。
有一个阿伯仔，叨咧吐長氣，怨歎講時機醜，伊講”
尹nia6 le，淡水港愈來遂愈乏搭，卡早ｅ粉堯魚丸、赤鰭仔，
強強欲塗起來矣，有影愈食愈建丟(丟臉)，時代愈進步，水
源愈垃圾，一寡生湠海味，叨欲絕種去矣，人講食匏仔無留
種，有影叨正正無法度li，茲官廳兮，茲討海老大兮，逐傢
噯卡好心行le，勿(mai4)互後代氏細咧梟悻(感到悲哀)佮怨歎。
咱講實ｅ，淡水魚丸，加減猶有坎站，袂講外醜啦，茲
嗣大咱稍給捧場ｅ，逐傢逗r6en4，互伊事業大旺廣咧。
( 註 )1 心適→很有趣 2 世間大理解→世間做人不
用太計較 3 盡磅→到最後 4 嚥氣，yenki43，不勝
感慨 5 正港→真實的正宗 6 kiang，原是金屬撞擊聲
，這很嘎嘎叫 7 謳咾 唸澳勞，稱贊之意 8 建丟 唸
gendiu31，丟臉之意。
20
呾歹勢噢，講阿祖遂婁逶魚丸去，有影叨不成蒜，毋閣
这講古講古爾，，有講才有古，逐傢gap一个緣li，呾好歹勿
計較，這嗎寫古書，筆尾咧拖，簡那天公泉流落溪崁，沿路透
透，一四界流通，有時流落茲，有時拚去遐，叨無定著li，希
望咱茲仙覺，卡注重鄉土性佮語言ｅ運寫比較，毋免注重故事
情節ｅ發展，所以有時仔寫一寡鄉土ｅ站節，宛那有趣味li，
嘛是有必要li，haa5。
35冬前呤，關渡純然是一个以種作田佮園，來討趁生活
晟養囝兒ｅ小庄頭，彼時關渡有影叨臹嫷li，風景讚地頭讚，
無一絲仔污染，真正讚ｅ壹莊兮，毋閣話頭矯返來，百姓ｅ生
活有影乏甲看現現，汝亦散(san3)，我閣卡散逐傢平平散，散
甲汝吓捶心肝叫毋敢，囡仔若敢討錢，大人叨掃甲工夫也工
夫「呾汝這著死囡仔瘵(ze1)，知影汝欲孝孤啦，厝內買米叨
咧無錢矣閣，卡吓堪咧討祭買饈饈仔(零食)，有材調汝叨出氏
去互好額人做囝好啦…」。
彼个時代，庄腳叨無娛樂li，嗯才規陣囡仔痞規工守佇(窩
在)“大埕兮”看法事做功德鬧熱，阿祖ｅ喪事佇大埕延連二月
外日，叨攏有照旬咧做，有照步來，所以茲囡仔兄叨”死狗
爛羊”壹直ut佇”大埕兮”，規陣舞甲毋知倘煞，各位，這庄腳
宛那是有仁情味ｅ所在，囡仔兄不時吓替大人唗蹤唗傱做寡
代誌，大人亦吓加減賞一絲仔闌珊兮，時代罔散，毋閣看起
來逐傢感情袂醜。
給想想ｅ，近來ｅ喪禮有影臹袂謳咾ｅ，這嗎工業社會
，稱彩路邊巷仔口，烏白搭台做功德，逐傢行路，返頭越角，
尤其暗時仔，臹無利便，逐傢歹勢講起，毋閣心肝頭臹砧，
忍甲出山ｅ時日，這聲麥克逗大聲兮，安呢吵傢腊ge2，有
影互人心狂火焯，看落臹袂作ｅ，各位啊，這款喪禮，妨害
著仈人ｅ權利，看落臹醜材，有影叨御示眾li，咱時代無仝
款矣，噯稍改良ｅ，才袂夆笑，互人消毒，咱台灣人有台灣
人ｅ甡張，毋倘甚漏喟li。
所以講算起來古早田庄咧做功德，真正鬧熱真正仁情味
，規莊頭總鏘落甲夠，臹合和li，這嗎時代，逐傢看著”這cut 5”
ｅ心肝頭喔哫，卡加汝嘛唗甲摛褲腳，這算起來，時代ｅ關
係，文化ｅ關係，看法種種東西顛誕ｅ關係爾。算起來泉州
人ｅ喪禮，吓使講全世界上講究上複雜。
1956彼年做功德時真ducen，糊靈厝ｅ工事，佇阮兜咧
做，這个糊靈厝ｅ司傅，彼時叨七十外矣，人瘦瘦真正有精
神，愛講笑談，茲囡仔大人攏臹愛佮伊幵冓，順續看伊ｅ工
夫，糊靈厝著是利用材枝，竹仔枝佮紙糊做陰間ｅ厝屋，現
主時ｅ社會宛那有咧做，講起來看吓著，無希罕，靈厝內底
有一寡過身長輩ｅ家內裝飾查某婢 ,車，娛樂器材…吓使講
應有盡有，奚盡看叨看司傅ｅ工夫佮製作ｅ錢仔頭，工夫愈
幼秀，物件愈僬著尪仔標(錢)叨愈貴li，茲閒人有時仔看靈厝
，袂輸簡那咧看迎嫁妝li，吓凍評論喪家ｅ財產面子東西。
遐阿婆仔，咚時也，逐傢指指拄拄，比手劃刀，有咧
謳咾 ,亦有咧消毒，講這項長彼項短li, 咱講實ｅ，彼時咧欣
賞這紙糊ｅ靈厝，袂輸咧看龍山寺鼓仔燈，抑是關西小仁
國ｅ光景，有影吓凍給當做藝術品來參觀li，一厝一碗一
桌一灶…，攏吓凍看出司傅ｅ幼秀工夫，真正幵天鬼才天才
li，毋閣這項幼秀ｅ藝術品，佇出山彼一工，噯燒掉互陰間
人去享受，想起來拍隕li。
糊厝司傅佇咱厝內咧做穡(事)ｅ時，小弟不時嘛徛(站)佇
身邊咧欣賞，印相上深兮，著是用軔紙條仔咧綁材枝仔ｅ頭
尾ｅ司傅手勢做作，到這時猶記甲清清清，想起來亦臹緊，
叨也過去35冬矣，彼个傅算起來嘛百外歲lo。
另外一層真正”趣味”ｅ代誌，小弟猶閣記甲臹稠li，叨
是利仔卡(手推車)，載墓牌去”土地公仔”(地名)ｅ代誌，奚
欲若現代ｅ囡仔 ,我看無人吓去逗拺(推)，毋閣彼時瞬ｅ囡仔有
影甚過無聊，聽著欲載石牌去山頂爾，逐傢三爭來拺車驚無位
li，一隻利仔卡十外个囡仔咧拺，汝看彼个囡仔兄無娛樂乏搭
甲這款ｅ，想落一方面亦好笑，一方面鼻頭亦吓酸。
( 註 ) 天公泉→瀑布 死狗爛羊→
一天到晚窩在…，混定了 心肝砧→
心息很不舒服 夆消毒→被批評
21
出山彼工(天)，有影臹鬧熱li，以現主時ｅ標準來看，
袂輸王公貴族，嘛無赫laisang45，規庄頭僬出來，cecau61
甲叨袂講了了，含三重埔和尚洲，彼角勢ｅ乞者嘛坐渡船
來逗鬧熱，上無嘛四五十个ｅ款；汝看外kiang叨好，有
影出世甲做人安呢，實在叨臹有夠遐li。1956初秋這場喪禮
，佇關渡茄苳腳這个庄頭，風聲喚喊，是鬧熱滾滾，雖然是咧
辦出山，不而顧呢，這少年仔逐傢熱樸樸，親象佇茄苳腳六年
一擺，摋豬公仝款li。
彼工出山，吓使講規庄頭僬出來，大鑼鼓吹是奏甲真正
cecau61，乞者沿路，坐佇路邊來玢錢，彼時ｅ價擻，嗯才一
角兩角爾。
祖仔永蹛(住)ｅ福地，是佇現主時ｅ關渡埔頂自強新村地
頭，身邊叨是1947年貳貳捌ｅ刑場，想落有影臹qek，毋閣
彼時做囡仔ｅ時，戇戇毋知影，簡那大人有咧nau5，囡仔人
叨毋捌代誌，彼个所在卡勿去，有”白毛兮”呢，阿祖福地
ｅ崙仔腳，著是「萬善同歸」小廟，頭前有講過，這萬善同
歸，毋是守望相助彼款ｅ標語，這少年仔，媽祖宮毋倘看做
當店，便所毋倘看做Hodelu才好，總講一句，規ｅ關渡山頂
，宛那臹梟悻li，規遍渺茫沙霧，白毛ｅ鬼仔影臹贅，規ｅ
墓仔埔叨著，落尾也兵仔佇遐起眷區，卡有人咧行踏。
這幾年來，風水輪流轉，人講好歹利運三年照輪，實在
有影li，呾新時代咧行到遐，時代人講有食卡要緊矣，尪親
嫫親, 毋值錢包仔圓遴遴，有錢上要緊，煩腦伊鬼仔城亡仔埔
，叨註死毋死，七年外前這亡仔埔 ,遂編做住宅區，這聲醜鳥
變鳳凰矣，一坪二百塊起價到呾一坪三十萬，猶有人三爭咧買。
買著ｅ人，通人叨謳咾這地頭風景佮展望臹好，看落吓
到淡水江(河)，觀音山，黃昏西照日真正嫷，“空氣”臹讚
臹qirdr11，呾這嗎ｅ人鐵齒仔窒倒車路，地頭讚無咧看有鬼
無鬼。代先是”新天母”別莊咧砌，尾溜也逐傢捸落起，這
嗎亦有半棟賣甲千四萬li，想想ｅ，卡早咱祖公仔殆佇遐，
宛那享受有著ｅ款。
這个關渡埔頂別莊區，風景有影臹嫷，這按怎講咧，因
為咱福佬ｅ民族性，尋風水攏愛尋風景好ｅ所在，倘互祖公
來永遠享受，(所以有墓仔埔ｅ所在，咱斟酌給掠，目尾稍
sut5一下，大多數風景攏臹壯觀好看)，家已顛倒蹛(住)破寮仔
，这是民性ｅ問題，毋是好歹是非咧計較，小弟落筆到茲宛那
臹怨歎，心肝頭臹砧，有時也想落鼻酸目燒，實在袂講兮感慨
ｅ感慨，是按怎咱所有上好ｅ地頭，展望上好ｅ風景地，噯
給糟躂去做亡仔埔，續落ｅ瞬 , 家己才咧了然無地蹛。
道理上來講，應該咱活人欲蹛好地，亡者叨無需要好地
ali，親象歐洲人安呢才著，所以講逶墓地改變做百姓ｅ建地
，我絕對贊成li。各位咱茲台北附近ｅ鄉親嗣大，逐傢稍斟酌
ｅ，現主時台北附近，風景上讚ｅ所在，絕對毋是陽明山彼
箍圍仔，茲茲著是觀音山ｅ地頭，大慨也，海拔300～350米
左右，差不多逶蛇仔形，壹直延到獅仔頭為，佇彼个山腰，給
看過來北投關渡這方面，風景是嫷甲互汝三瞑三日叨痟想li，
因為對面是千外米ｅ大屯山七星山，簡那屏風徛面前，下腳
是水景真闊ｅ淡水港(江)，浩浩蕩蕩，真正山水肖絆，無地
看ｅ好光景。
抑毋閣因為風景甚好，這嗎全部是亡仔地，真罕兮有人
吓想去參觀，欲”參觀”嘛參觀無路來，活欲驚死有影li，
(上好ｅ要點佇獅仔頭往八里方向拍算一公里ｅ所在，海拔
300M之地頭，這个祕密是小弟積”數年”ｅ”經驗”，所
堪出來ｅ地點，各位鄉仔若有朋友欲來參觀，噯揀清明時分
卡妥當，亦卡安全叨看，絕對給汝卦雙卦號，鏘採(自然)贏
草山風景區，贏伊沗沗叨著)。
呾痟話lau4規笪，專咧五四三規米籃，話頭噯矯互伊卡
臹經ｅ，規ｅ關渡埔頂佇三十冬ｅ中間，逶滿滿是墓堆刑場
ｅ所在，搖身變做(真鬧熱ｅ)活人住宅區，逶絕對陰氣ｅ世界
，改做絕對真正ｅ陽氣ｅ仁間，有時頭殼叨返袂過來li，前幾
工我去給拜訪埔頂，閣有一間啥乜”精品店”，有影ham4古
，想著叨愛笑。
佇茲我亦祝福各位外地頭，來茲買厝ｅ富貴仁傢，宛那
給汝恭喜有這好機會，來享受好ｅ空氣好ｅ風景，不而顧呢，
若拄著咱人初二十六，請吓咧記ｅ，地基主噯稍給咱拜le，
給(ga5)註文一下，對這塊土地ｅ先靈先主，噯有一絲尊重ｅ
心意，抑若崙仔腳彼間萬善同歸(在憲兵隊三叉路口，已改建
成麗斗ｅ萬善堂祠)吓凍發出十萬伏特ｅ陰氣場，一年行一擺
，宛那袂失禮li。
嗯才講起來時代咧變遷，地頭咧興咧衰，宛那噯食淡薄
仔運途li，運途若袂通透袂逗搭，卡加汝叨了甲叫毋敢，關
渡埔頂鬼仔城起大價大旺廣，一坪三十萬li，毋閣隔壁ｅ蚵
仔坪彼角勢，原本樹宓週看現現，鳥聲花紅袂輸公園味是，
運氣臹醜，去夆劃入藝術學院，一坪徵收三千塊爾爾，茲地
主是嚎甲哀父叫母，汝看，叨免三二ｅ手著互官廳兮筴去配
(挾去食掉)，一聲號令規粒山挖簡那金光頭咧，頻若大雨，叨
爛膏糜仔流甲一四界，水土保持花擱擱臹醜材。
(註)出山→出殯 cecau61表示儀式豐成眾多 代先→
起先帶頭 尋風水→找墓園 臹砧zydiam31 像針札住
一般像異物沙子入眼一般 山水肖pua→山川相纏風光好
22
規ｅ做式ｅ噹中，互人感覺印相上深，著是唗御馬佮弄
樓，這个唗御馬佮弄樓，是福佬人內面咧做功德，上第壹好看
ｅ齣頭，現主時咧辦喪孝，無論講咧外有錢拄外有錢，花箍
車陣閣卡大陣，名流仁士外高尚，毋閣上要緊ｅ上精彩ｅ，
這齣唗御馬佮弄樓遂取消變無去，實在互人臹怨歎，有影不
止也遺憾li。
時代吓變到這个坎站，pa算是無場所ｅ款，亦定著這嗎
ｅ人娛樂甚贅ｅ款，亦可能这少年仔，根本叨對這喪孝無趣
味心頭喔哫(沈悶)，看伊破格矣無卡擢li，互這層真正有趣味
有意義ｅ齣頭，壹真落坑壹直溜尾去矣，有影算起來，佇咱
ｅ文化發展當中，真正拍隕li，所以小弟佇茲噯稍給寫一點仔
，因為現主時，毋 na3是少年仔，連中年人嘛臹贅毋知影，
啥乜號作弄樓叨有影li。
叨也三十五冬前ｅ代誌矣，花花也霧霧也有時叨記袂稠
li，這款仔”唗御馬”唸做zausiave144，印相ｅ當中，普普
也，簡那有一个司公咧唸文，唸啥乜聽無，下腳有一陣人提
一隻柴做ｅ假馬，佇大埕踅圓箍仔，身邊鑼鼓鼓吹僬陳，算
起來，亦親象做法事，亦親象半咧娛樂仝款，落尾也簡那有
掖(ya3挹)錢互逐傢囡仔來搶ｅ款。
現主時ｅ喪孝，唗御馬猶有咧做，毋閣壹般人無咧給注
意，除了家己是帶孝，抑無欲招人看嘛無人噯看，吓記兮三十
幾年前咧唗御馬時，規ｅ大埕仔人洘卒卒，是圍甲烏坎坎，囡
仔兄卡細漢ｅ，攏互人偰去邊仔臹了然，這款ｅ場面，簡那暗時
仔咧打拳賣膏藥，人群佳繹，自動挽人客差不多li。
現主時，咱台灣話內面有一句：“一工到暗玲瓏踅，無閒
cici43，袂輸簡那咧唗御馬ｅ”這个”唗御馬”這句話有咧用叨
著，亦著是北京話”馬不停蹄，辛苦奔波”啦，閣來給講到”
弄樓”。唸做langlau32，著親象馬戲團，咧頂椅仔頂桌仔特技
表演叨著啦，這个弄樓是喪孝典禮做式中上第壹好看ｅ娛樂，
佇彼个時瞬，無娛樂亦無電視，亦無馬戲團，欲看特技表演，除
了弄樓以外無地倘看，汝看行情外擎著好。
山頂人咧喊，有ｅ人歲頭食甲四十外，一氏人嘛才看兩
擺弄樓爾-爾，吓使講彼時咧看弄樓，比這嗎去國家劇院看好
戲閣卡奇卡，希罕li，佇庄腳有一款號作羅漢腳仔ｅ流浪好
漢，吓探聽佗位咧做喪孝，不時嘛逶外位庄頭掣人來看鬧熱，
致使講若弄樓ｅ時間到，一睏仔吓圍了真贅真贅，幾落倍的
觀賞仁口。
叨希罕li，有ｅ騎佇椅古頭仔，有ｅ騎ｅ利仔卡(手推車)
頂頭，逐傢看到真熱誠真入腹，不時婁出謳咾ｅ拍博聲叫聲，
一个阿伯仔，卡歛八十，叨一腳一手li(中風樣)，人伊嘛倚佇
勾椅，面歪嘴cua4看甲笑haihai61，講實ｅ大細漢攏臹痟這齣ｅ。
這款弄樓ｅ價擻，請司傳來表演，定著噯幵臹贅錢li，毋
閣輸人毋輸陣到地也，ga欲做以上，ga欲風光以上，港潦叨
潦一下卡有ｅ，潦一下眾人吓謳咾，安呢嗯才有面子，祖公嗯
才吓歡喜才要緊，錢項ｅ代誌是無注文著li，這擺ｅ弄樓，仁山
仁海，真正佳繹，囡仔人行袂凍過，至到蛇仔形，亦有人來
”紅目有仔逗鬧熱”li。
咁講弄樓赫好看是毋？這宛那在人咧看ｅ啦，咱佇茲講佇茲
煞，實在講來，這弄樓ｅ技術宛那是庄頭唗江湖罔渡罔渡爾，
叨艱苦人趁一下仔行路工著是啦，欲佮馬戲團抑是現代特技團
來比，奚猶無注文著li，有影碗公對水缸li父母無聲示、送囝
去學戲，这完全是時代ｅ關係爾，汝給想，好好人，有誰欲去
學奚危險ｅ空課，卡加汝嘛跋甲無鼻落脘(gong 4 )，到尾也亦
是掠艱苦人ｅ囡仔，抑是無父無母ｅ囡仔，姑不而衷潦落捙拚爾。
平平是人，歡喜笑容ｅ後壁，茲茲就是悲傷目屑，茲嗣
大吓給(ga3)囡仔講，做人噯拚，認真讀冊，抑無大漢汝叨了然
，人講「戇面袂曉看三色，社會返捯無半搬」卡講燃眉汝叨無
氣魄。一寡少年袂曉想，食老到地也，稱硾拖尾，汝著毋臹樣
，所以講弄樓這項技術，好看罔好看，尻腳倉後宛那真贅目屑
佮心酸。
喪事咧做式，猶有一項真正印相深ｅ齣頭，著是燒靈厝佮
金山銀山，福佬ｅ風俗，佇陰間ｅ生活佮陽間仝款，陽間噯大
厝噯金山銀山，陰間宛那噯大厝金山銀山，這个金山銀山是用
大塊ｅ鍍金色，ga鍍銀色ｅ大塊紙枋，用幼ｅ材枝仔來做骨架
，給粘起來，伊ｅ大細，佇小ｅ印相噹中，佮現主時四人坐ｅ
沙發差不多大，無論寸尺佮懸低有影一模一樣，成甲無一塊去
，這嗎 ｅ少年仔汝若無給講清楚，伊泛勢吓給當做金色ｅ沙
發來給坐嘛無的確li，一金一銀，仝款用利仔卡載去大埕兮,佇
日頭光ｅ反射之下，有影金siaksiak15，siaksiak金，真正好看
，茲阿伯仔阿姆仔，叨真知假ｅ，毋閣嘛看閣再看，袂輸簡那
真實ｅ仝款。
佇大埕兮，連靈厝，金山、銀山攏做式做了後燒燒去矣，
現主時猶閣有大戶，有咧燒靈厝金銀山東西，但大多數少年仔
叨無咧給注重，一方面毋捌(bat)一方面亦dii 4毋知，加減亦省
寡時間，金錢，這款代誌，叨簡那娶嫫ｅli，袂使有經驗eli，嗯
才逐項若無注意，風俗吓漸漸熄去，閣卡講茲糊靈厝ｅ，嘛歹
勢講登門去求生理啊？
這嗎時代咧變遷，聽講葬儀店有咧賣做好ｅ靈厝東西，
卡細件，做便兮現來現有，價賬亦無貴，完全採用工業化ｅ
製作，大量生產，哎，工業社會，實在有影li，報紙有咧寫
，菲律賓有一个有錢人華僑過身去，尹氏細知影伊愛坐朋
馳Benz，ｅ瞬呤佇靈厝ｅ噹中用硬紙閣剪閣糊，舞幾落工
才完成車型，有影幼秀閣厚工li，這代誌風俗在人e啦。
呾石枝公ｅ代誌，慢慢著煞戲矣，這庄腳人ｅ生活，
亦攏恢復著正常ali，這幕35年前ｅ代誌，浮起眼前，又
閣慢慢消去，…。
這嗎返來到現場，就是聖王公ｅ禮堂，三年前1988農
曆八月二十二ｅ代誌，現場ｅ黃石枝簽名，百外年了後看
落真正趣味li，亦真有幸看著先祖，給參考伊真風光ｅ過
身孝禮，互我有這个動機，來探討先祖少年時ｅ生活，給
咱關度ｅ風土仁物，尤其是關渡媽ｅ靈聖通人知，小弟有幸
試用台語鄉土話語，給寫成卡純樸ｅ講古字詞，牽成台
語文學li。
23
欲按怎來寫鄉土冓古，確實有影問題贅，人講夯筆比
夯鋤頭卡重，這佮卡早所受ｅ教育無仝，叨無三無二，的
確寫亦寫無路來，大部份食肉ｅ(精華)少年時代，攏獻互官
式文化，到這嗎真正梟悻(hiauhing 66 不幸)，叨單靠勢一絲
絲仔家庭ｅ母語，來給回想來佮擴大，映望看有倘利用這个
機會給挽救，看欲一點一du5亦好，人講田有螺脞有痕，魚
行水濁鳥飛毛茖。加減傾加減粒積，傾外贅著(多少)算外贅，
安呢看吓凍對本土文化，做一下仔推廣否，互咱這真正可憐
到一絲仔氣ｅ草地情，來給保落去未。
咱徛佇這塊土地，有一个起碼ｅ甡張，吓凍互咱對祖兟
艱苦ｅ日子，有一下仔交待叨著，算講這个講古文字，猶咧
起步ｅ階段，困難猶重重tata34，不而顧呢，宛那噯有人潦
落拍拚，犧牲時間、精神金錢至到壹切壹切，做一下仔開路
先鋒，安呢來者，一方面吓凍延續咱祖先ｅ文化，一方面嘛
吓凍互咱囝孫了解卡早艱苦拍拚ｅ生活，安呢逐傢才吓有志
氣有魄力，後代ｅ日籽才有意思，逐傢才吓閣卡認真li，文
化ｅ代誌真正要緊，汝看連滿州人赫尼強，落尾也嘛是文化
去夆消滅去，呾這嗎欲佗聽滿州戲，實在叨有影li。
小弟利用閒時ｅ時間，收集寡資料，來做一下仔研
究，看有法度倘互咱ｅ文化吓凍稍興le否？咱做伙來做，
空課攏仝款，起頭萬事難，開始ｅ時瞬彼塊粿粹上要
緊，目前若卡拍拚ｅ，三五年仔了後自然叨有收成，看有
法依持祖先上起碼ｅ面皮否？
第四章 清朝尾年ｅ北台灣庄腳
24
佇中國ｅ東南方這角勢，山崙溪崁，肖pua4肖纏，
人講福建贅山，拍算十分九分ｅ款，ｅ瞬呤，地理上ｅ坎
苛，致su著民族複雜，話語長短袂逗搭，普普也給(ga5)
分，有福州話、廈門話、客話、海陸話、廣州話…，細分十
外款猶不止，佇這个噹中，有一款號作「福佬人」ｅ族群，
上第壹悲慘，壹直受外人ｅ壓迫，吓使講這千外年來，壹直
是咧吞目屑過日子，袂輸 Europe ｅ Poland，一尾魚落鼎，
欲煎欲割，在人料理。
上古早ｅ荷蘭人，西班牙人，落尾也鄭氏政權，閣尾也
滿州族ｅ佔吞，吞了遂毋管，變作無政府ｅ款勢，百姓肖摋
肖怨，冤枉做鬼仔袂尐。尾也滿州族拍輸日本大和民族，遂逶
無仝民族ｅ台灣(福佬人)，割互阿本仔做肉砧，袂輸簡那逼
simbu-a 625(養媳)去腳騷間仔卯(撈錢)，仈人ｅ囝死袂了，這
款錢亦食吓過喉，有影，iam4好佳哉去搪著阿本仔先生(醫生
，新頭家後滕新平，加減有給咱痛惜，宛那註死毋死去抾著ｅ
，歹船好港路臭厝崁ae，啊，運命咧唗弄，全全攏噯倚仈人，
茲福佬ｅ囝孫想落吓硾心肝，實在一腹火li。
上無天良兮就是清朝尾年，阿本猶未來ｅ時瞬，台灣百
姓佇無政府無治安，無建設無教育無衛生ｅ种种艱苦梟悻，
蕃薯仔袂輸活佇地獄仝款，閻王十八殿，好人袂出頭昊，真
贅優秀ｅ子弟白白送死，這暫艱苦ｅ過去，咱做囝孫ｅ人絕
對噯了解，看著路邊ｅ應公仔廟抑是萬善堂，毋倘攽外外，
噯吓記de這段悲慘了然ｅ歷史，呾講到台灣地ｅ北部，大概
也順溪水河流ｅ港路，也叨滬尾(淡水)干豆(關渡)，牛磨仔車
(大龍峒)，大稻埕、艋舺，彼時滿州統治者無來造路。
蕃薯仔mi3無權利自治，嗯才萬項噯靠勢水路行船來連
絡，佇光緒ｅ年間，淡水江規ｅ範圍內攏僬幵發塭田叨著，
咱給講佇農業社會，項項映望生產米糧，來依持厝內，致su
著有田有園ｅ人，揚(泱)papa43，無田地ｅ人，一箍人餾餾
，散甲欲食塗去。佇關渡塭田(這嗎官廳兮叫關渡平原)，隨
人捙拚，人講蕃薯仔台灣牛，佇透早透暗綿爛討趁，拂甲欲
烏暗眩去，虐甲欲拖屎連去li，才有一碗湆糜仔(粥)倘飲爾，
叨咧歡喜咚咚也，實在有影li。
大概也因為雨水充足水路活，壹般de收成袂醜，這个
噹中，有形無形中，社會有三款階級出現，噯給了解，頭一
款叫頭傢人(地主)，祖公先來台灣潦落發展，粒積田地變好額
人叨著，蹛(住)紅瓦厝，厝內食穿qirdr(好)，有ｅ讀冊抑是
教戲，有查某婢佮長工，淡薄有gesi61，腳擻應付”歹人”
(就是第三款人部分羅漢腳仔)，愛娶細姨，愛bok薰土。
第二款人叫做田人抑是做穡(事)人，卡au4尾來台灣，
好空兮，食肉ｅ好地，攏互人占了了，致su著噯給頭傢人
縛(bak)土地來做穡，塭田抑是園攏好li，有時縛一甲地抑是二甲
地，五分地，無魚蝦嘛好li，規傢人食穿攏噯靠倚這塊地來
生活，嗯才著噯，pe6性命來做，做甲大粒汗細粒汗，瞑日
捙拚，棉爛柄扒，噯應付頭傢交租，噯應付厝內氏細食穿，
虎頭鉗仔雙頭qee5，變做社會生產ｅ主力，現主時ｅ台灣人
ｅ祖先，大部份攏是這个階級，蹛(住)土角厝，竿蓁壁，厝
面頭前有埤仔，四箍遴返有麻竹籬。這款做穡人是毋是吓出
脫，界在伊ｅ身體佮壽命爾爾，歲頭卡有ｅ人，財產卡有倘
粒積，抑若卡短命種ｅ，奚著梟悻，代代散代代苦，代代烏
暗眩抾唃苦袂了。
第三款人號作羅漢腳佮乞者這个階層，現主時ｅ話叫做
”流浪漢”這款人連美國赫(hia)好額ｅ國家，嘛是一四界有，
呾清朝尾期奚閣卡免講矣。
羅漢腳仔，這嗎壹般人誤會做是無娶嫫ｅ破少年，拍算是
安呢講li，羅漢腳仔，正是有路無厝，一箍人餾餾，衲袋仔不
時咧袋磅籽ｅ散猴，有時也枵到地也，加減吓去仜偷掠雞鴨，抑
是偷挽果籽匏仔，普通時也lonlenliulen3611，有人迓神拜佛遊行
，叨去給人逗腳手，討一絲仔行路錢，有時仔夆看無重，宛那吓
潦落佮人冤傢，佇百姓ｅ心目中，對這款壹直是驚兮咧等，當做
土匪看待。
實在講起來，這款散人大部份心肝宛那袂醜，宛那臹想欲拍
拚出頭昊，總是環境關係，時機行情ｅ顛誕，閣再外表癩膏爛癆
，生銑(銹)面生銑面，無嫫無猴，人看落吓倒彈，人ｅ運命出示
了毋著位爾，給想起來亦是臹可憐叨著，人咧所說”紅柿若出頭，
羅漢腳就目屑流”，羅漢腳佮乞者這个階層，有伊ｅ心苦病疼，
噯仜諒情，這个階層佇su當時ｅ社會，差不多占一割左右，全台
北附近仔，三萬外人唗袂去，佇阿本仔來進前，真正大問題，伊
亦艱苦，社會亦顛誕，扛轎兮嫌艱苦，坐轎兮嘛嫌艱苦li。
这羅漢腳若食老，自然de著變乞者li，到時無親無倚，百病
僬到，枵雞無惜ce2枵人無惜面皮，嗯才大筒絃挨落，四界去給人
討飯食。算來羅漢腳這个階級，影響社會真大，阿本仔入來了後，
全省ｅ抗日活動，有ｅ真正咧抗日，毋閣有ｅ加減有羅漢腳仔參
落，對百姓搶東搶西，有食閣有掠，宛那夆印相無好，这「反抗
日本歸順滿清」我叨想袂曉li，日本仔異族，咁講滿州人叨是仝
(同)“福佬”是毋？滿州仔低路，造成「無政府狀況」ｅ梟悻
咁猶潦無夠深是毋？鄉親啊鄉親，永遠咁哭調仔唸袂煞是毋？
清朝尾站，光緒年代，台灣人受者外族ｅ統治，毋管北京
抑是東京，攏是欲來食咱，台灣地自古著水米大出，財源豐富
，變做人人欲來痟(數)想，夆當禮物送來送去，一絲叨無甡張li。
台灣北部，淡水江ｅ箍圍仔，百姓依原真拍拚臹棉爛咧捙
拚，佇活命佮枵死ｅ中間，佇天災佮刀兵ｅ空縫，逐傢日亦做
暝亦做，為這塊土地流汗流目屑，搭草寮開草埔，灌溉磊斗ｅ
塭田佮熟園，絕對無怨歎li，著是安呢，嗯才一代一代傳到咱
這延，有影正無快活叨著。
25
光緒十八年，1892年，關渡茄苳腳(現主時ｅ關渡國民小學
到舊火車站一帶)搪咧(正在)做六年一擺ｅ摋豬公大鬧熱，庄頭
隨人隨戶請人客，辦甲cecau 61滾滾，咱这鶴佬仔庄腳人，普通
時仔是儉腸qee4肚，蔭瓜仔蕃薯箍，毋閣閣請人客時瞬，魚魚肉
肉推甲叫毋敢，安呢才有誠意li。
這一睏仔六年單單才一擺爾，豬公肉大拇四界，魚肉cecau 61
，另外閣有樹林仔，土龍司激ｅ紅露酒，這透海ｅ，飲互伊起磅
，逐傢食互伊到喟，安呢爐主才有面子li，今仔日罕的幾時咧摋
豬公，叨爐主石枝公辦桌(宴客)ｅ中間，坐佇上尾也護龍ｅ角仔
，坐一桌少年仔，搪咧飲酒配肉食魚丸，大塊桶盤煙霧擎，頂頭
有牽鹼魷魚敏豆仔，食甲真siakpa15。
這桌少年仔，攏總有六位，掣(cua3)頭兮高鏘大漢腳手敏
掠，人叫伊軂(高)腳火土仔，今年二十捅款，宛那艱苦人出身
兮，做人死忠心肝閣軟，續落老二號作”貓古添 仔”，生做
頭大面肆方，講話na雷公le，叨中喟足，聲頭飽li，做囡仔
ｅ時瞬著天花，規面僬貓li，嗯才號作安呢，閣再身邊是老三，
號做”大麵發仔”一暫咧發鹼麵(淡黃色的台灣麵)，a叨蕃薯
仔愛用這字”發”字，啥乜金順發，興發，成發…，嗯才人
叫伊大麵發仔，伊聽了臹歡喜，普通時仔行路抌斗抌斗，簡那
歹帶一个身命ｅ款，毋閣手尾力臹飽li，頻若夯(舉)重牽摩，
叨術頂eli，無人憑伊吓倒。
後手猶三位少年仔，坐佇倚戶碇兮這位號做”客人仔松”
，原本蹛佇桃園崁仔腳彼角頭，叨爸母攏著 malaria(熱病)過
身甚早，阿叔仔姑不而衷自那寄佇和尚洲(盧洲)ｅ遠親逗飼，
細漢時佮養父種菜dng6蝦仔來生活，做人忠直義氣，人講死
忠兼換帖ｅ，做人有就叫，坐佇身邊ｅ少年仔，號作”萬裕仔”
，今年十九爾，面肉白白也做人臹古意，講話摯接噹中，客客
氣氣，真正斯文有禮，自來著毋捌佮人有顛誕li，人面闊互通
人來謳咾(贊美)有著。
上尾溜這少年家仔，人叫做”痟矮仔生”，做人愛講笑
談，愛激伍仁(滑稽狀)，不時嘛五四三撰甲規米籃，茲庄腳大
細，上愛佮伊交陪，若有伊置ｅ，迭迭嘛鬧熱滾滾，一个面佮
若這嗎 ｅ許不了，阿伯仔愛給kue”不吉囡仔,不吉囡仔”。
這六位少年傢仔，仝款出氏了毋著位，自來艱苦底，今
年拄著摋豬公，早起迓鬧熱，無閒無工逗腳手，拂甲大粒汗細
粒汗，做爐主ｅ看了袂過心，嗯才暗頓時搬請尹來坐桌，逐傢
歡喜逗心適li，也叨艱苦人仔久久無沐油臊，罕兮幾時推一下
卡有ｅ，宛那正有仁情味li。
「大麵發仔，下暗燒酒飲了有到喟否？這透海ｅ，佐汝灌
落去無要緊，呾話頭na牽，飲落才吓起磅，續落閣再來唱歌納
曲，久久鬧熱一擺仔叨無磺li，haa2」大麵發仔笑haihai，一个
面飲甲紅記記，聽著貓古ｅ這番話，印講「讚，有影臹讚臹起
磅，久久摋一擺豬公，伯仔沒肖棄嫌以上，互伊請甲臹cecau61
，呾艱苦人仔久無孝(孤)即好空兮，像這細蕊木耳，宛那乏五、
六年無食著矣，真正奇卡，真正世間頭一味li，呾逐傢免細膩
叨家已來呢！
大麵發看來是na食na歡喜，毋閣心肝內是真正酸閣酸li
，叨身命顛誕，潦落做羅漢腳仔，一四界憩陶，有做年做祭時
瞬，頭傢人工夫，請一頓仔逐傢做伙歡喜，看著逐傢安呢無閒
起無閒落，叨正歹勢a 哩。
佇清朝尾期，抑是阿本仔統治ｅ年冬，“木耳”這味菜真
正高貴，彼時佮魚翅仝款價賬，艱苦人食袂起li，壹直到民國
47年左右，仁工菌種成功才大量生產，呾這嗎 佇菜市仔叨俗
簡那”狗屎”ｅ，佮豆菜、豬血排身邊，叨落坑矣，莫怪大麵
發仔有這款ｅ怨歎，這叨時代ｅ關係，袂講佇啦。
搪咧逐傢飲甲正茫ｅ時，這時痟矮仔生徛起來，又閣咧
(又在)激伍仁矣：「叨心適互我掠掠著，逐傢品無掠包兮，小
弟佇茲教幾步仔學問，互咱茲嗣大參考咧，我來講三字經，「
人之初，性本善」意思叨是講”人大箍，善到到”(人胖很疲
勞)，「習相近性相遠」，意思是講”人死了甚近無好勢，風水
噯卡遠咧才好”咱茲學問界ｅ先進，無底深坑，我生仔普普
也叨有研究哩，互逐傢鼻芳咧…」話袂煞〔sua5〕，逐傢是笑甲
摟下顎，酒氣旺，笑神飽，規間鬧熱滾滾，厝蓋強欲翩(翻)過
，生仔續落閣再撰「創一个謎猜互恁臆(irh，音藥)，有聲無有
味素無鹹汫這啥乜？」當等眾人納悶ｅ時，肖矮仔生奸臣仔
笑，大喝一聲「尻倉”膨風”li！」自那唗出去外口，茲囡
仔是笑甲袂講了了，一个阿伯仔才咧suaai6「尹娘咧，不吉
囡仔著是不吉囡仔，好時好日咧婁三八，有影譀甲有偆去！」
呾規陣笑罔笑，歡喜罔歡喜，時候叨也無早矣he，戲閣
卡好看，宛那吓散場li，尾齣ｅ咖納魚捧出來lo，下腳萬裕
仔給軂(高)腳火土駛一个目色，頭傢欲攽炮仔，這時瞬軂腳
火土仔自那爬起身，去外口大埕兮給縛炮仔綰，縛佇苦橙仔
樹枝，咱這軂腳火土仔腦殼好卡冷靜，做代誌有坎有站簡那
劉備ｅ，算講六个結拜兄弟ｅ老大哥，正掣頭e哩。
無外久炮仔聲乒乒磅磅，陳了有肖續li，這場摋豬公ｅ
鬧熱，到茲完滿矣，續落去，茲親戚好朋友逐傢來玢(bun6,
被動式)豬公肉，順續來聽拱樂社ｅ鼓亭大吹ｅ八音演奏，
規間鬧熱滾滾，這囡仔兄上介歡喜，有吹閣有掠，無煩無惱
，大人這爿面(唸bingmin36)，定著噯幵錢心肝丟丟彈，這
遍咱頭傢一睏仔幵二十塊箍銀，清朝尾年ｅ一箍銀元，大
概也現主時NT五百外箍ｅ腳兜仔，差不多噯儉一冬才有
法度li，蕃薯仔愛面子，害死普通時仔叨艱苦有影。
呾一人玢一塊三層肉〔sanzanva635〕，規陣集兮大埕兮
聽鼓亭咧演奏，這班拱樂社，逶滬尾彼角勢搬請過來，有
ｅ撞大鑼，有ｅ拍biak鼓有的鼓吹，有ｅ挨弦仔…，真正
鬧熱，算子弟班叨著。普通時仔隨人做頭路，有年仔祭仔，
逐傢和齊來耍鼓亭抑是搬戲，請ｅ人省錢，搬ｅ人亦有面子
有感情，叨好風俗甘蔗雙頭甜li。
( 註 )cecau66 唸叉操，盛大熱鬧狀 tui 猛食狀
透海ｅ供應無缺 掣頭，唸蔡頭，帶頭者
malaria瘧疾 dng6蝦仔→用陷井蝦龍捕蝦
苦橙仔樹→台灣鄉常見大喬木 挨弦wehen62，
拉胡琴。玢 bun , 是被動式 , 乞丐 玢錢 .
26
這六位兄弟，kia3(也就是)軂腳火土仔，萬裕，大麵發，
貓古添佮客人仔松，痟矮仔生，環境ｅ關係，四界流浪憩陶，
暫時做著羅漢腳仔，不時叨佇咱關渡塭田彼箍圍仔，南南北
北咧給人做長工，抑是鬧熱做空課，抑是廟兮無閒逗腳手li，
卡講嘛一步少年li，加減din動趁一嘴糜仔(粥)食，映望講後
日仔看吓拄著貴仁來給牽成未？
這六个兄弟叨二冬外前，佇關渡"萬善同歸"這間細間
廟仔結拜li，約束逐月日初一、十五，搪當月亮跁起對面山
(這嗎西帽山到士林圓山ｅ範圍)ｅ時瞬，逐傢叨噯踮”萬善
同歸”肖等，飲茶幵冓，互相安慰肖疼痛，若有好空亦逗肖
報，抑若時間以外，叨長短仔到關渡媽祖廟，罔ziu罔ziu
，廟內廟外逗三仝，來廣種福田，來造善緣。
彼年ｅ秋昊，拄好紅柚就市ｅ流擺，拍算咱人九月十
五ｅ款，這陣兄弟又閣到萬善同歸來烚燒茶，做兄弟ｅ人，
雖然無厝無瓦，無田無園，毋閣衲袋仔宛那所費叨無客
li，加減飲一下仔茶，配寡土豆仁是無到佗位叨著。呾月
娘浮出山頭矣，六个兄弟僬到，燒香祭拜後逐傢幵始咧彈矣。
這聲貓古添仔代先婁落。「尹婆仔ｅ客兄公卡好 ,人講救
虫毋倘救人實在有影li，十二彼工佇關渡廟前烏擋門仔(水
閘水門 ) 頭前， 水蛙姆仔尹孫，te6渡船te6一下無好勢，
遂跋落港水，佇遐浮咧沈咧，若無恁父卡好腳手ｅ，旦這聲
隱當du6死做水鬼，尹nia2 ｅ，害恁父捙拚規晡,閣給掣到尹
兜(他家)了後，banpe 36(預料吓)看吓diu4淡薄仔來食茶ｅ未
？閣卡無，艱苦人嘛一下仔行路工ｅli，結局對方遂激恬恬
(靜)準拄好，無咧給咱注文著，有影看咱臹無目地ahe，拍
算看咱安呢甡銑(銹)面甡銑面一身軀乏搭，嗯才無咧給咱信
斗，哎做兄弟人咁正實赫了然是毋？有影衰，衰甲種匏仔生
菜瓜，後回恁父若發若大尾，汝才給皮繃卡拫(緊)，尹nia2 le」
「大兮，咁有影赫酷行是毋？茲兄弟互汝做擋pet，來佮水
蛙姆仔輸贏一斗仔，鋩角矯互伊返來，安呢心肝頭才袂砧！」
客人仔松真正義氣，聽落臹袂作ｅ，欲來給貓古添仔做
公道，這時軂腳火土才開嘴印講「 煞煞去啦，卡吞訒ｅ，
阿婆仔人無水準無地計較li，無定著阿婆仔目睭cucu45耳空
閣重，顛倒頭來罵汝，是汝害尹孫跋甲大空細樆，嘛無的確
li，這層無要緊啦，我加二工仔才去行踏甲腳到，看伊按怎印
？咱散罔散，做一下仔仁格者夆看，才有底di 3，安呢佇社會
才排有著頂…」這聲風颱做了返回南矣，卡講嘛是咱老大兮卡
細膩，有影茲兄弟謳咾有著li。
外口ｅ月色真正青冷，叨咱人九月半矣，風吹過來閣吓
尻冷損，內底兄弟搪咧幵冓ｅ噹中，干礁萬裕行出外面，透
一下仔空氣咧，月色昏暗汫汫， 落照著關渡塭田ｅ平洋，
冷風透來，萬裕看著樹影咧din動，dng4點dng4點影洸交
pua 4，一時心頭酸酸，喉脘(唸後ㄍㄣ)遂滇起來，ｅ瞬呤，
目眶僬紅，人咧所說珠屑dapdap55滴叨有影li，咱茲各位鄉
親，萬裕按怎吓傷心？一个十八九ｅ少年傢仔，按怎吓摯載
袂稠？是餓？是冷？是散？是夆惼(音pii)？按怎佇明月當頭
，秋風起致，深巷小路ｅ影洸，特別吓想起傷心ｅ過往呢？
十冬矣，已經叨十冬，有影日籽臹緊，萬裕愈想是愈悲
傷，叨十冬前呤，吓記佇彼暗宛那是月娘當昊，風真冷銳ｅ
秋尾昊仔，彼時我才八歲外爾，毋捌世事，暗頭仔阿俍給我
穿臹嫷ｅhiua25(棉襖)，續落ｅ瞬呤，行一暫仔到阿匏尹兜(他
家)，阿俍入去佮阿匏講話，我佇廳兮點腊燭guea(段)，na食
芎蕉na看著佛桌頂暗暗奚神圖，門外口是暗面山貓，心肝頭
搦搦搐。
無外久阿俍出來矣，是嚎(音hau)甲毋臹聲調，彼暗仔阿
俍佮我睏佇阿匏ｅ厝內，我猶吓記佇三更暝半ｅ時瞬，阿俍
依原流目屑cng啞口聲，尾也我著睏甲真落眠，睜醒了後，阿
俍早就無看著人影，自彼時我著失去至親，變作世間上悲慘閣
無法度理解ｅ代誌：咁有嗣大人來攽捨囝兒是毋？抑是啥乜不
得已ｅ苦衷？我有影卡毋值一个simbu-a625(童養媳)，亦毋值
夆賣去暗間仔ｅ查某囡仔。
阿匏仔給飼四冬了後，我十二歲矣，略略也捌
代誌，彼年伊著肺病嗽閣吐血，無外久著過身矣，破病時給
我講「汝老母著重病，驚給汝過(汙ue3，傳染)著，嗯才交待
互我，恁老母號作金蓮，今年若活稠ｅ，差不多三十二三ｅ
款，伊壹直蹛佇大稻埕中北街ｅ所在，離我這士林地，行路
二點外鐘ｅ腳兜仔」。
萬裕ｅ身世真正可憐，這幾年以來，上大ｅ願望，著是
去尋老母，尋老母，尋老母叨仁生頭一層，毋閣代誌真坎苛，
干礁憑一句金蓮，中北街，人海茫渺象海底摸針，是欲(要)叫萬
裕按怎拖磨唗傱？莫怪今晚月明風冷，見景傷情，ｅ瞬呤，一時
鼻酸目燒到地a，嗯才流落艱苦人ｅ滴滴珠屑li。
萬裕行返來廟內，規陣猶咧食茶幵冓，叨話頭若夯(qia2興
起)，兄弟牽山伴林，長尻倉坐落，三二點鐘毋知倘起來，哎
平平運命肖連，無田無園，無嫫無猴，羅漢腳三字夆看無著格。
「大兮，茄苳腳ｅ石枝公，想欲央我給飼牛， 順續暗
頭仔剖材掠草茵，一月日五箍銀，汝看按怎？無去mi 3拍隕li
，坐嘛是咧坐，加了ｅ，若欲去驚也仈項好空兮，卯(撈)袂過
手叨害」客人仔松笑笑也講，叨三心倆意li，攽驚飛捏驚死
一心欲死一心欲食米，佬腳火土仔才給鼓勵講「呾免驚啦，若
仈人我著毋知，頻若講到石枝公，奚是忠厚古意甲有偆去，去
蹛(住)一年半冬矣，絕對袂顛誕li，石枝公咧教北管鼓亭，汝若
去遐，加減學寡拍biak鼓抑是鼓吹，大筒弦東西，返來逐傢嘛
有猴弄倘看，叨一工一晡”穡”爾，逐傢做人有趣味叨好，免
甚計較錢銀方面，人咧講油湯趁，罔做才袂散(音san3)，ga潦
落做羅漢腳以上，噯衝互伊起喟，做人噯漂碧有義氣，人講氣
魄組兮，所以講央汝做空課ｅ代誌，叨殘殘相千千，給決落去！」
客人仔松聽落亦有道理，自那去互石枝公請做長工，一工
做一下晡呤，日子平安好勢，逐傢有照約束。這个時瞬，大麵
發仔坐佇椅蓧邊，戇神戇神，簡那心肝頭結規蕾ｅ款，毋知咧
想啥？請看連番後續叨知影！
27
大麵發仔無咧怨歎啥乜，干礁怨歎阿爸死了甚早，才害伊
水流破布，艱苦坐卦li，才咧煩惱講無錢倘給(ga3)阿爸抾骨ｅ
代誌，哎，叨也八冬矣，想落心肝頭臹ut卒，毋知欲按怎才好
li，短命人往往吓造成囝孫ｅ散赤乏搭，因為短命到地也，無法
度長年去粒積傢伙(財產)，致su著前廳咧抱紅嬰仔，後廳咧做
司公，父老囝幼ｅ悽慘，一棚閣一棚ｅ活戲齣，种种曉悻了然
僬到。
佇奚低路ｅ滿州民族昊年之下，無親象這嗎有社會福利，
嗯才茲福佬族ｅ囡仔，姑不而衷干礁有法度潦落二條路，一條
是去做苦工做箍絡，一條是去學戲，人講「父母無啥四，嗯才
送囝去學戲」(押韻)，這二條路攏總夆看衰韶，做人叨無甡張
li，結局到尾溜也宛那失志抾唃，勇壯時做羅漢腳老來乞者命，
心苦病痛死ｅ時，宛那毋是應公廟仔，就是萬善同歸，有影愈
想叨愈心酸li。
大麵發仔老父過身ｅ時瞬，叨已經十四歲矣，真bat(捌)代誌
，阿爸有交待，十冬了後噯抾骨，厝內無倘食穿，嗯才港潦落去
景尾，做油麵(台灣麵)ｅ工寮做苦工，日時做麵忝ueue61，三
更瞑半噯起來挨豆子做豆干，大麵發仔嘴咧講力頭飽漢草好，
毋閣，做牛做馬宛那牽袂去，摯載袂稠，強強欲dai4一个仔
身命哩，有影臹害。
做無三年，老母he6龜喘夯(qia2)欲閣顧老母欲閣做苦工
，一身拆做五塊嘛無夠用li，結局嘛是散赤ｅ關係，老母閣
再病重，目睭金金人傷重，佇五日節進前二工，遂來不幸過
身去，這聲大麵發仔十七歲矣，甘願潦落江湖行踏，心肝頭萬
分ｅ悲慘梟悻，su6當時阿爸欲過身ｅ時，交待互關渡媽祖廟
ｅ渡船頭，一个號作渡船枝仔ｅ結拜仔，渡船枝仔逶伊，殆佇
對面ｅ獅仔頭崁頂彼角勢，風水臹好，看吓著(到)關渡佮大屯
山這箍圍仔，順續有交待十冬後抾骨，呾這嗎叨已經過八冬外
矣，大麵發仔叨為著這層代誌大操煩，嗯才咧頭大面肆方吐大喟。
這嗎昊漸漸暗，露水強欲滴落來，眾位兄弟漸漸忝lo，貓
古添一下無聊到地也，提一粒biak鼓仔咧拍，diak-diak，真正
趣味，佮外口ｅ虫聲田蛙仔聲肖gap，佇秋昊ｅ暗瞑，真正吓
夆傷情見景，想著未來ｅ艱苦，自然的心酸吓起尻冷損li。這
个時瞬添仔biak鼓拍煞，咧發表議論矣，「呾換我添仔來講一
个心適(趣味)le，阿伯仔所說，戇面袂曉看三色，社會返捯無半
撇，今仔日兄弟佇社會咧餾，真正艱苦，樣也噯激頭腦li，乏
搭(窮)罔乏搭無要緊，來，我才教恁幾步仔撇步，夆咱逐傢有
倘卯(大撈)一塊大大塊。
來啊，大麵發仔，佐汝免驚，工夫若學互伊在，燃眉汝叨
大葩尾，好額溜溜，來啊，貓古添仔，捸我去大稻埕一迣，保証
汝返來油sese 14，家己發展無打緊，閣有偆步來致應，來牽成茲
兄弟，萬裕仔，我報汝來水返腳(汐止)tai金沙，點仔久汝叨好額
坐大位，眾位兄弟，毋是佮恁講耍笑，有影”彰ｅ”(老夫)叨有
夠力li，免幾步仔，卡加恁攏嘛千金萬金，金siaksiak 15，田園
嫫囝福祿壽，財源豐富真正旺廣好命，兄弟啊！卡捙拚ｅ，咱
這欲好額做頭傢矣！」
規陣人耳仔聽甲kap kap15，畫山畫水也叨好聽，有影聽落
吓爽吓起磅li，嗯才一時間悲傷沈重ｅ氣氛，雨了昊開，氣氛漸
漸燒熱起來，逐傢卡有精神ｅ卡有甡張ｅ，抑無逐傢安呢欲死
動haai 3，喘大喟嘛 毋是頭路li，佳哉痟矮仔生，敖參味素撰一
寡好聽兮，明明知影無法度，毋閣乏搭(窮)到地也，加減聽寡
好空兮卡爽勢，吊肉跋死貓，加減痟想加減按算，無魚蝦嘛
好，罔抾〔kiv5〕罔da5(姑且碰个好運)，看有法度拄著貴仁
，踏著機會撚一塊仔，有影愈想遂愈有影，逐傢嘴齒瀾dap
dap33津哩。
軂腳火土仔看著逐傢又閣熱樸樸，心肝頭有卡輕鬆，本
正這羅漢腳仔咧做伙集會，逐傢艱苦代規米籃，氣氛歹講，
略略也kap袂著代誌叨真歹紡哩，這掣頭兮真歹捍盤(控制場
面)，噯逐傢吓歡喜才有面子，嗯才有時也嘛著噯牽東西畫
山水，製作氣氛哩。
這聲軂腳火土笑笑也講「咱茲兄弟若有錢銀三不便，佐
汝開嘴無要緊，我火土絕對憑汝甲到，小弟不黨罔不黨，
宛那氣魄組兮，佛蘭斯水食一點喟li，若有好空兮，逐傢噯
逗肖報，叨兄弟仔情無相論兮，人佇社會咧行踏，噯有志氣
噯忠厚誠懇，若有歹人欲肖惼(欺)，儘量吞銅食鐵噯讓步，
歹人若甚過分，噯照直矯摵，毋倘互伊hy5去。
呾老大兮火土一番話，逐傢又閣信心十足，元氣僬到，
過二三工仔。火土有欲掣人去大稻埕一迣，仝款噯逶關渡
宮坐渡船li，這擺渡船枝仔， 早著按算甲好勢溜溜，眾
位咱茲看官，毋 na 3是去大稻埕，噯去關渡宮渡船頭坐船
爾，其他欲去北投劍潭、錫口、八仙抑是去竹圍仔，滬尾，
和尚洲宛那噯來關渡宮搭船仔，彼時公路猶未開通，水路
上利便，關渡宮是四條港路ｅ總君頭，袂輸這嗎 ｅ台北車
頭大陸ｅ武漢仝款，這款勢面下，關渡媽想欲袂出名，宛
那奧(難)li。
這嗎萬善同歸ｅ小間廟內，坐欲二个外時辰，月娘叨
吊懸懸佇樹仔尾溜，逐傢物件收收ｅ，僎(準備)欲離開遐，
軂腳火土佮萬裕燒一束香，逐傢順序給拜拜，求一下仔心安
，閣卡講，有應公仔，萬善同，可能亦是咱後日仔，百年歲
後ｅ好厝地咧，咱今仔日來拜仈人，無定著後日仔，仈人嘛
吓給咱燒香，ga出氏艱苦人以上，萬善堂，白骨一堆，人
ｅ運命，往往安呢，廟柱生銑(銹)腊介，舊罔舊，宛那看落
吓親切吓逗搭，哎，羅漢腳佮乞者，好味好素，落場叨仝款哩。
台員，尤其是北部台員，佇外來政權滿州族ｅ統治以上
，過著二百外冬無政府狀況ｅ悲慘歲月，百姓ｅ中間，互相
肖殺捙拚，亦無治安機關，亦無社會福制，亦無法院佮建設，
尐數運途卡魯ｅ阿同仔，潦落羅漢腳佮乞者，這个階層ｅ仁
士，差不多占一割左右，全台北附近佇清朝尾年時，有三萬
外人ｅ腳兜，這三萬外人ｅ食穿蹛生活，攏親象三萬外張地
獄圖仝款，頂頭這六个兄弟，是猶闌珊兮爾，比尹卡淒慘ｅ
是塞倒車路li，福佬族群按怎亦赫溜尾衰運，這壹切壹切完
全是統治者，無材調無愛心，飯桶掛車輦ｅ原因著咧，一
个做外人ｅ奴隸，無氣魄無甡張無尊嚴ｅ族群，毋知倘檢討
思考抑無？
(註)水流破布→四處流浪之意 ut卒，就是悶悶不樂
做箍絡→做苦力 油麵淡黃色的台灣摵仔麵，也稱鹼麵
tiam4，疲勞 “彰ｅ”稱自己 佛蘭斯水→汽水
28
佇清朝光緒年間，到日本仔大和民族來統治ｅ這个中間
，差不多是1875～1895這二十冬內，有一个阿啄仔(唸阿毒
啊，西洋人)傳教士，對台灣地ｅ貢獻真正勇克偉大，伊著是
馬偕博士，現主時雙連ｅ馬偕病院著是咧記念伊兮，馬偕台
灣話讀做馬該，原名號作 G.L.Mackay，血跡地佇 Canada這
个光景優美ｅ國度，嗣大人是北部英國人，伊毋驚生死，志
願來台灣傳教，逶伊一氏人當中上食肉ｅ歲月，奉獻互台灣
無怨歎，順續做台灣人ｅ囝婿，教咱台灣人科學醫學佮最新
西洋文明，讚ｅ壹莊兮，佇腐敗臭爛ｅ清朝統治者，落後，
瘟疫，無治安，無法律…捸著台灣人，袂輸注入去仙湯活
水，这好醜互汝袂咧鐵齒ehe！
佇台灣占人口85%ｅ福佬人(1910)有影叨悲哀li，滿州民
族叨”四肢發達頭殼簡單”，無法度著無法度，袂假痟，另
外採用漢字ｅ關係，低路閣歹學，致使著百姓普遍攏青瞑牛
(文盲)li，影響民群ｅ甡張昊大地大，袂講了了，這个馬偕博
士帶入來拼音台語ｅ新技術，佮新ｅ科學醫學，茲蕃薯仔看
甲大嘴開haahaa，這是阿本仔來進前ｅ代誌，大概也1890
ｅ款。彼个時庄頭草埔抑是街頭深巷，甚至講山頭kok尾，
一陣一陣ｅ羅漢腳抑是乞者咧賴賴趖，另外一方面馬偕嘛仝
款，尤其是滬尾關渡大稻埕八里坌這角勢li，著是伊上su4
常行踏出入ｅ所在。
咱今仔日，宛那著噯感謝馬偕ｅ功德，佇蕃薯仔上困頓
ｅ時瞬，伸出援手一點一du5，鴨卵tiap5到米斗滇，雖然講
伊是傳教ｅ，佮咱大多數ｅ人ｅ宗教看法無仝，毋閣伊ｅ精
神真正叨互我感動，有影zatzat55腹腹互人感心閣再感心，
這擺來台灣，有影冒著九死一生，咱普普也來給掠，尹祖地
英國愛丁堡到咱台灣踅(繞)過國，坐火船上少嘛著70工ｅ光
景，這拄趟拄趟li，註死毋死，啥叫汝台灣吊遠(最遠)上介食
力，拄好是台灣li，無論行非洲印度洋，抑是經過大西洋南美
洲到太平洋，攏差不多也掠二萬伍千kiloｅ款，這若無真堅強
ｅ意志佮捙拚氣，絕對硬斗做袂到。
所以人ｅ精神氣魄，叨真歹講li，掠準這嗎欲叫我去英
國，美國，叨干礁坐飛行機著好，台北到舊金山，十二點鐘
卡加嘛頭眩目暗矣，美西到美東， 上無嘛5點鐘ｅ款勢a，
腳尾這聲僬冷去矣，續落ｅ瞬呤，美東部，越過大西洋到英
國，恐驚也著用坦架扛下來，所以講百外冬前，馬偕干礁交
通ｅ問題，甘願潦落離故鄉上遠ｅ死五ket一台灣地頭，叨
互我這个台灣福佬漢真正感心li，抑若講到台灣青番所在生
命ｅ危險，這猶無算在額內ｅ，叨無咧給注文著，有這款捙
拚氣魄，叨衝吓起喟有甡張哩，有影幵天勇咧。
馬偕來台灣，主要傳教ｅ所在，佇 這嗎 ｅ淡水，關渡
、台北這箍圍仔，宛那是沿水路咧發展，馬偕帶來了文明佮
科學化，來晟(帶動)咱蕃薯仔，互咱茲鶴佬仔吓凍知影清朝
以外，其他民族ｅ文明，a叨文明科學，硬拄硬，咱有影輸
人忝忝，咱叨愛學人才有甡張，馬偕真敖(qau2)真偉大無講
，連幕後支持伊發展ｅ英國教會，我宛那謳咾有著。
外國人以伊ｅ財產佮血汗錢，直間接來助咱，對百外年
前ｅ阿啄仔做牛做馬ｅ艱苦錢，蕃薯仔噯仜感謝謝勞力，這
叨毋是「傳教」文化侵路，一二句話，吓凍仜抹殺佇li，像
這嗎台灣地老賊卯四十五冬，順續”退休”閣領五百外萬，
宛那無聽著感謝ｅ聲，這著是做人著ｅ，民族性無仝，叨看
現現li，呵sai著閣講。
呾咱這个故事講倒返來，這嗎 佇關渡地茲羅漢腳仔，聽
著講西洋來一个啄鼻仔和尚，逐傢佇關渡廟ｅ廟埕，搪咧幵
冓拆字數li，感覺叨真奇卡啦，有影是新聞逐傢好事相(好奇)。
「大兮，風聲講滬尾油車口，茲茲有一个啄仔和尚，咧
傳耶蘇教，尹娘le，耶蘇教死無人哭(押韻)，limbe 16 才無咧
給信斗le，聽兮講無香無燒金紙le，叨麼人俗語話咧講「死甲
無人燒香點火le」，這个啄鼻仔，風聲講嘴鬢糊laplap15，矮
仔毒kiu3毛惡，打算無倘外好腳擻ｅ款，有閒才坐船去給影
一下，看是甡了圓抑是扁…」
呾貓古添亦毋知橫亦毋知直，叨大主大意仜消毒li，所以
講庄腳人叨保守li，主要無智識，也叨心肝是無歹意啦，干礁
用燒香叨給人鄙相(批判)甲無一塊， 有影叨顛誕li，講起來
亦是腳火土仔頭殼卡飽，伊才咧喃(低語)「拍算了無赫離經ｅ
款，呵(a 3 )知咧，聽兮講這个西洋仔和尚，宛那有二步七仔，
腹內有一把仔學問li，人伊吓曉挽嘴齒，為人治療起燒起寒熱
病(瘧疾)，滬尾人通人謳咾有著，到底怎款，才來給見本一下，
咱茲兄弟ｅ噹中，看佗一个嘴齒慪古爛去，才來映挽掉看覓兮
，人伊有工夫，若欲，ｅ瞬呤，麼著趁初一透早ｅ退流，坐渡
船枝仔ｅ船到滬尾街，給試一下鹹汫(淡)咧。
初一透早呤，貓古添佮軂腳火土佮萬裕，三个兄弟叨坐
渡船枝仔ｅ船，逶滬尾彼个方向駛去，流水退流ｅ關係，閣
再渡船枝力頭飽，嗯才真緊叨到滬尾渡船頭，其中經過竹圍仔
，烏山頭，蛇仔形，石壁腳，米粉埔，高厝坑，雙邊港墘景緻
臹嫷，觀音山真壯觀清幽，逐傢攏正歡喜li。
呾規陣人來落船了後，叨探聽馬偕行踏ｅ所在，才知影今仔
日,馬偕搪咧汀州吓館，給人挽嘴齒li。
逐傢到汀州吓館ｅ大埕時，早著圍甲烏坎坎，規陣茲庄
民僬ci3倚來，接受馬偕ｅ醫療叨著，馬偕先抹麻藥膏佇嘴
齒邊，等目暱久仔就用鉗仔給壞齒挽出來，逐傢看甲大嘴開
haa haa43，目睭展大蕊li。daa 2 挽起來ｅ嘴齒，囥佇椅条
頂ｅ碗公內，這聲萬裕好事相，緊擠倚去看，二蕊目zin6
擱再zin6，zin3甲欲肖pua4，叨看無一个形li，看著歹齒猶
牽血絲仔，叨真驚li，有影腳底僬冷去矣，本正想欲挽齒，
這聲遂倒彈準拄好，抑是看鬧熱卡簡單，叨驚死驚dak5，
欲na有甡張啦，有影漏屎馬啊。
到中晝ｅ時瞬規陣人拍散，隨人返去矣。貓古榮仔笑笑
，才咧給kau「呾少年仔，下消溜溜，稍寡代誌爾叨毋敢潦
，看這个勢，是無要緊啦，ga 赫無路用啦？呾－迣路赫遠，
了規工閣流汗，變甲無甡張去，有影了錢又閣無布目，卡加
汝嘛一氏人衰li，咁講汝欲尋廟前奚王祿仔仙是毋？哎，實
在有影！」講煞，逐傢才起愛笑li。
軂腳火土緊出來搔互伊圓，真正阿哥仔做了有夠遐li，
莫怪逐傢吓尊循伊，伊才哈哈大聲笑。「無顛誕啦，看欲後
回仔，才挽齒嘛猶未慢，驚啥？這遍叨見本ｅ 爾，心肝頭
叨無僎(準備)好勢li，後回仔殘殘才交陪無差啦，憑咱兄弟
ｅ認真拍拚，叨真嫷喟li，絕對袂夆看衰韶去，卡棉爛趁ｅ
，後回仔風光大辦佐汝給啦u3落去，阿啄仔和尚叨吓對咱
好禮好禮，叨免驚兮咧等啦，阿西！」
軂腳火土佮萬裕佮貓古榮”見本”了後，返來渡船頭，
船班猶未到，肖招去飲一碗魚丸湯，魚丸湯參一絲仔芹菜幼
仔，芳閣好食，眾人謳咾有著。
馬偕博士佇日本仔，進占ｅ進前十年佮了後十年，對北
部台灣ｅ貢獻真正偉大，蕃薯仔頭一擺看著世界性ｅ文明，
佇 su6當時上介需要ｅ醫療方面，伊佇阿本仔猶未來進前，
叨已經進口”金雞納霜”這味特效藥，救活了真贅ｅ台灣人，
另外一方面，伊佇台灣這三十冬ｅ時間內，總共挽了貳萬一
千外齒ｅ嘴齒，實在真無簡單li，以小弟仝款宛那齒科先生
來講，小弟佇北投這角頭做十五年矣，逗逗ｅ嘛才挽一萬二
千幾齒爾，可見馬偕ｅ能力工作量，佮一个齒科仙差不多。
另外欲閣做教育佮傳教空課，一身軀欲做三四位用，孤
鳥插人群異鄉，伊著噯擔輸贏，人袂輸鐵做ｅ，我叨想無li，
有影幵天嘛 毋捌看過即文武雙全，即勇ｅ敖人(音qaulang32)
。所以這宛那昊註定兮，卡贅錢汝嘛請無li，佇茲小弟寫
”關渡媽祖”，毋閣對這位西洋教ｅ教士，宛那真有尊重叨著
，無論啥乜人，伊若認同台灣地，認台灣語言，咱攏真敬重伊
，全世界吓曉講台灣話ｅ白種人無幾个，馬偕博士茲茲著是其
中之一li。
也叨總講一句，清朝尾溜ｅ台灣地頭，實在臹離臹亂，內
面治安醜，外口帝國統治，頭前火燒厝後尾咧夯火車輦，歡喜
叨無二下，燃眉咧做司公，一波閣一波ｅ外來災難，溢對台灣
人ｅ身軀頂，蕃薯仔正閃倒匿，流汗流血驁惶恐佈，逐工袂輸
佇火鼎地獄過日仝款，咱ｅ祖公著是行過這款苦坐卦ｅ日籽來
兮，按怎台灣人，尤其是占絕對多數ｅ福佬，運途，運命即尼
慘淡，按怎台灣人即不幸？袂曉去反抗外來ｅ殖民者？戇戇做
奴隸？咱祖公拄著ｅ梟悻，絕對噯吓記佇心肝頭！
1895，講北京話ｅ政府逶講福佬話ｅ族群，出賣互講東京
話ｅ政府，仈人ｅ囝死袂了，尹婆仔ｅ客兄公咧，親象二傢咧
肖拍，拍輸彼口灶逶simbu-a(童養媳)賣互暗間仔卯錢，去貼拍
贏ｅ人，唉！台灣人茲茲著是去夆掠去暗間仔ｅsimbu-a丹，台
灣人做牛做馬夆騎，人猶嫌咱無水準，割手肚夆食，人猶嫌臭
臊，ia 毋好佳哉新頭家日本仔，宛那有貳步七仔，是世界上優
秀ｅ壹等強國，做空課有坎有站，奚若卡歹運兮，割互菲律賓
番仔，這聲著紅龜皮liuliu43，看欲按怎孝姑du4著好？
台灣地親象長蓧仔(狹長)ｅ番薯，地窄人佳繹，四箍遴返
大海圍稠ｅ，毋閣遂夾佇北京勢力佮東京勢力中間，這二國
人贅勢強，真歹返捯，雙爿攏得失袂起，簡那春秋戰國時宋
國，夾佇楚國佮晉國二大強權之間，有影毋敢假仙哩，俗話
講王爺尻倉無人敢摸，啥人敢搧伊ｅ腹堵邊？一面溝一面圳
，蕃薯仔欲佇二強ｅ狹縫中求生存有影硬斗，這个亞細亞ｅ
孤兒，若夆想起 Poland(波蘭)夾佇德國俄羅中間，有影歹紡哩。