第九章 港路肖犮，鴨寮咻喚
48
客人仔松ｅ田庄穡頭，佇茲做一暫ｅ結束，續落來給
(ga5)講到忠厚人軂腳火土仔，宛那臹有甡張，臹拍拚咧討趁
，這嗎互和成伯仔講顧鴨寮，佮茶園ｅ山崙仔地咧種作，也
叨少年傢仔，力頭飽有zamzat35，咱講氣魄組兮，做人是忠
厚甲無啥無示，一鍼錢一嘴飯叨毋敢給人kap著，互和成伯
仔給謳咾有著，有影幵天嘛 毋捌看著即尼忠直義氣，搰力捙
拚，為頭傢，不時嘛吞訒食虧，夆掠水鬼去tap涵空(暗渠)，
甘願潦落無第貳句，真正感心，這款忠厚囡仔叨無地看li，哎
，實在有影。
庶當時佇關渡地，普通平地ｅ穡頭有三款，一項做田一
項做園(做山)，一項飼鴨母，咱火土仔著是顧鴨寮兼做山，空
課路咧返捯，絕對無軟斗，也叨硬注(du5)輕注僬來，咱火土仔
總憑伊甲到，算算ｅ呾逐傢阿同兮，平平是食關渡ｅ水米大漢
ｅ，宛那艱苦有著，順續有緣gap做一下，對關渡地ｅ嗣大嗣
細眾神地基主，有一份厚厚ｅ感情，逐傢真倚(ua4)，咱佬腳火
土仔ｅ仁生觀著是安呢，甘願夆食夆惼(pii)無怨歎，人來求我
三月春，我去求人十月霜無打緊，艱苦梟悻我總攬，哎！正正
蕃薯仔叨蕃薯仔li，袂輸觀音再世，咱火土仔徛吓稠地，叨有
影行情有夠遐li。
咱軂腳火土仔，逗顧關渡尾橋邊ｅ鴨寮，佮山頂ｅ茶園，
關渡塭田壹直到媽祖廟為主這角勢，港路肖纏肖犮，一四界ｅ
活水，魚蝦出產真正”魚米之鄉”li，嗯才茲鄉親阿同兮，真贅
砌寮仔來飼鴨母，映望吓甡卡贅ｅ鴨母卵，互厝內食穿卡有甡
張，佇彼个時代討趁安呢是算上盡磅矣。 另外山頂做園，利純
方面是無外girdr(好)，空課宛那硬斗無快活，毋閣蕃薯仔(台灣
人)自來出甡，著搰力捙拚ｅ民族，閒嘛是囥咧閒，若有絲仔利
純，叨拚甲花去，煩惱伊凊頭汗流幾斤重 ,咱講天良ｅ，總講一句
，生活乏搭無額，無拚是袂煞戲ｅ，關渡暢著安呢哩，做雞噯筅
做人噯炳爾爾。
火土仔佇茶園做空課，打算佇 這嗎關渡廟後山公園佮馬偕
護校中間ｅ因為這塊地屬於凸出地面ｅ台地，無水源無算講散地
叨著，身邊閣亡仔埔贅，聽兮講亦生產蛇巢算起來臹醜材矣he，
火土仔佇園兮，普普也做寡空課，種茶，naabut 125(蕃石柳)，
掘蕃薯，種掃帚草爾爾，全部是低生產額ｅ作物，叨無法度啦，
無錢料，虫蚊閣贅有影無三無二，咱做穡人攏無棄嫌，茶鈷揹
le(背著)，逐傢嘛拂甲歡喜liuliu14。
以上這幾項ｅ農作物當中，大部份攏無問題，毋閣單單有
一項”種掃帚草”，這嗎愈來愈落坑，強強有欲絕跡ｅ款勢，
咱祖先留落來 ｅ寶貴文化，這欲失傳斷層落，咱古早ｅ掃帚是
用掃帚草去編做ｅ，現主時40歲落來這延ｅ少年人，無人看著
咱台灣式ｅ掃帚，連聽嘛 毋捌聽過卡大面，時代咧”進步”有
影臹害，致使講欲傳這條文化，目前水淹到頜頸仔，，咧燒倒
頭香叨真正趕緊來挽救li。
佇茲小弟給說明，軂腳火土按怎種作掃帚草，佮縳掃帚
ｅ种种文化。(茲氏細咧問我，汝亦毋是百外冬前ｅ人，按怎知
影已經失傳ｅ技術种种？問了真好，这著是按怎鄉土講古，定
著噯血跡地(出生地)ｅ人來寫，才吓詳細吓逗搭ｅ原因，因為佇
35～25冬前，所有ｅ台式掃帚ｅ製作過程，包含diam 3栽(發
芽)，種栽、收成、晒礁，拆qiam(拆枝)，ham合，剪尾，攏看
著阮阿公咧做，真正詳細啦，現主時這款台式掃帚聽兮講彰化
縣福興鄉西勢村彼角勢，猶有人咧做，毋閣甚厚工，一枝才賣50元
，有影蝕本落坑看現現)。
起代先，和成伯仔佇厝後ｅ空地diam3種來生栽，這个種籽
是舊年收成ｅ時瞬，順續給挽落來囥到呾(現在)，免幵錢去買叨
著，拍算月外日ｅ款，這時幼栽叨已經發甲三寸四寸長ｅ坎站，
才給連土挖起來，用草索仔規兮包包ｅ，畚箕擔去山頂茶園栽，
種栽這个空課真正輕可，免啥喟力，na念歌na掘空，點仔久著二
三分地掘透透，續落一空一栽，用腳be土用腳踏土互伊 zat(密實)
，叨免aa3(蹲身)，清風吹來人元氣清爽，也叨散地散散栽ｅ關係，
免啥管顧，亦無肥亦無水，“攽牛食草”gi在(任伊)伊去見洸
大欉，佳哉亦無啥乜，虫害，叨順順也平平也無咧給顧，亦顧無
落來，準拄好著是啦。
自安呢了後，“日來受雨夜來凍露”，吸收天靈地氣，佇土
地公伯仔ｅ保庇以上，茲掃帚草，一工一工大抱，大到差不多三
尺高ｅ坎站，拍算是種栽了後三日ｅ款勢，揀一个仔落雨了後，
土鬆軟底ｅ時瞬，給連遍摳(kau)起來，續落ｅ瞬呤，用簽擔(用
大竹雙頭削尖的一種肩擔)給簽好擔返來，囥佇厝面頭前互伊
曝礁，曝幾工？曝五到六工，皮葉若乾若輕著好勢，這个時，噯
夯(qia)大枝柴刀, 逶掃帚草ｅ頭根部剁去。
這个頭根ｅ鬚來dim3(悶煮)豬腸真正好食，囡仔時代物質客
欠，這嗎回想起來湯頭實在真正讚，雖然是無當規藥頭赫芳，亦
無薑母鴨赫棘鼻，毋閣伊溫溫純純，湯頭佇嘴內甘甘略也苦，入
喉了後反苦為甘，後du5臹有，袂輸簡那咧飲鐵觀音li，逐傢真
正謳咾。
呾這嗎草曝好著提去倉庫內囥(kng3)，不管時吓使抽出來縳掃
帚叨著啦，啥乜時縛掃帚？佇有閒抑是落雨昊ｅ時瞬 ,來縛安呢吓
凍利用時間li，嗯才講縛掃帚種掃帚雖然厚工薄利純，宛那算吓和
，抑無閒工佐汝閒工，嘛是跋繳烚燒茶幵冓拆字數爾，仝款遷了
了無卡擢，總是佇卡早農業社會，凍想出閒工時段來逗趁錢，實
在有敖叨天公疼戇人li，致蔭咱逐傢吓出脫，嗯才延綿後續一代
一代傳到呾。
算起來一欉三尺長ｅ曝礁掃帚草，是按怎變做一枝好掃帚？
認真給想，有影著真正奇卡？閣一點，掃帚柄才一粒雞卵大細爾
，毋閣掃帚(掃面)有尺外長，比例差十倍，是欲按怎展開？彼个時
瞬，閣卡簡單兮菅芒草做ｅ掃帚，成本臹低(芒草佇山頂一四界攏
有，免種栽培養)，是欲按怎佮伊競爭？閣一點，這款台灣式ｅ掃帚
，佮目前(1991)ｅ棕做ｅ低品位掃帚來講，是毋是有競爭ｅ本頂？
吓比人卡讚否？以上种种ｅ問題答案真簡單「絕對比菅芒掃抑是
棕掃加好真贅！」
二款掃帚我攏有用過，用菅芒做ｅ掃帚成本低是低，毋閣用
無十外工，尾溜著蹺 (kiau )彎，歹看兼歹用，有影臹害，棕掃宛
那仝款，咱台式用掃帚草做ｅ正港掃帚，吓使掃半年到人年猶未
坏去，因為掃尾ｅ彈性足好ｅ，好甲吓互汝不時咧擻念，這款祖
先ｅ智慧產品真正厚工，佇現主時工業社吓，人工貴ｅ情形之下
真正不利，小弟普普也估計，一枝若有通賣到150元，應該是吓
和才著，這定著噯比壹般棕掃加貴臹贅，毋閣絕對有價值。
49
咱火土仔除了一撥工仔，去茶園以外，普通時仔，嘛是去
顧鴨寮卡大面，这著無法度li，因為鴨母卵一工收成一擺，
農業種作一百工才收一回，有影贏甲看現現，錢銀ｅ關係宛
那姑不而衷，人講尪親嫫親 , 毋值公包仔圓遴遴，叩叩ｅ，
(kakae443)嘴齒規米籃欲飼囝飼細，宛那著婁入去錢水吓活彼
堀，嗯才有甡張，簡那現主時ｅ社會嘛是仝款，農業輸工業，
工業輸商業，商業輸銀行，完全是賺錢ｅ速度緊慢來擔dak。
所以認真給講起來，鴨寮ｅ生活討趁真正要緊，是主人財
源咧捙拚，彼時開鴨寮佮現時開銀行意思仝款，一字”緊”爾
爾，關渡水路活，致蔭著鴨寮鴨母卵發達，鴨寮ｅ生活”多彩
多姿”花len奇卡，故事真贅，有ｅ人看關渡暢兮(tion3)無點，
这著是「小犬毋捌嫌路窄」“，咚時仔(那知道)關渡人油sese
，簡那鹹鴨卵赫油li。
相信有ｅ人吓疑問？咁講鴨卵有赫價值是毋？这茲茲無毋
著，百年前木耳佮魚翅平價li，社會供需爾，現主時ｅ公子少
爺，雞卵鴨卵分袂清，想講雞卵無啥價值，遊行抗議ken6大門
，大箱大箱，拍算鴨卵佮雞卵亦差不多ｅ款，實在講起來，鴨
卵無論氣味Ｑ度种种方面，攏嬴雞卵十倍絕對無拗蠻，鴨卵是
真正好食ｅ好食，無一款卵佮伊吓比，講句卡粗魯ｅ，仈款卵
叨值無伊一枝腳毛li。
隨个台灣人對鴨蛋ｅ料理，攏有一番ｅ撇步(各有心得)，
無張弛若去想著，叨嘴笑目笑，這嗎有ｅ小姐假衛生，假仙假
dak，佇菜市仔看著鴨卵表面稠土稠草，掠做無水準，攏改買
清氣咚咚ｅ雞卵，有影拍隕啊拍隕叨無內行喟li。(鴨母定著噯
生活佇水堀佮鴨寮，卵外殼卡lasap45，生卵雞是干礁厝內竹
仔食飼料爾)。
这關渡鴨卵佮鴨寮ｅ故事，話頭咧撰咧揚，宛那著逶關渡
媽祖宮講倒返來，佇現主時(1991)去關渡鳥仔區(水鳥保護區)
抑是去關渡媽祖遊覽ｅ茲善信鄉親，對關渡廟內內外外，三腳
步一坎”店”，全全著是鹹鴨卵笪仔(攤販)，定著吓感到真奇卡。
阿伯仔歲頭食甲七十外，著想袂曉li，按怎干礁關渡廟安
呢，仈間叨無咧賣一箍死人骨頭碗膏？阿伯仔江湖潦mna33
五六十冬，南北二路行透透，想甲規身重汗，叨不知一箍芋仔
蕃薯li，咚時也(原來)關渡廟附近仔這百外年來，攏是鴨寮ｅ
”昊年”，一四界烏坎坎咧全全鴨母陣，想想ｅ叨也愛笑，
卡加嘛有影li。
抑毋閣這嗎 1991關渡賣ｅ鴨卵，奚著毋是咱關渡出產ｅ
，關渡鴨母已經絕去二十冬矣，現主時連一間鴨寮做見本，做
博物館著無，哎，實在有影臹毋值，吓安呢淒慘洛魄到地也，
歹鬼掣頭臹臹著是淡水江(河)ｅ污染，魚蝦全絕滅，“零溶氧”
茲魚囝蝦孫，擻个仔是死甲無人燒香點火，這款扮勢，鴨母陣
卡加汝嘛逐隻軟腳著癠(中瘟)，十條命嘛袂赴死。
不而顧話頭矯返來，有賣鹹鴨卵，總是比攏無有卡勇淡薄
也，人咧講無魚蝦嘛好，有搵水著吓霑衫，總是腳跡卡肥，不
時咧行踏不時咧交關摯接，加減吓夆給懷念過往ｅ光榮佮盛況
，这絕對定著ｅ，關渡鴨寮ｅ 僥擺歷史，絕對毋倘攽袂記
ｅ咱關渡暢兮ｅ祖公著有影臹恅 (lau4很有才能 )，袂顛誕。
若講到關渡這角勢ｅ特產，有兩項是僥擺 ueue，“擎”
甲掠袂稠ｅ大色貨，一項著是鴨卵一項是關渡蝦，這味關渡蝦
是軟殼ｅ沙蝦，規个關渡塭田1500甲，壹直連到八芝蘭(士林)
，湳仔(天母)，是贅甲窒倒車路，贅甲包山包海袂講了了。關渡
蝦噯製作”蝦圭”(鹽漬蝦)來買賣給存放厝內，這味蝦鮭宛那佇
二十冬前絕去矣，現主時客欠材料，成本甚貴，無人敢做，若
有人做，嘛是分送親戚五雜，仈人無这口福。
這味蝦鮭吓使講是小弟這氏人，食過上好食ｅ物件，關渡
宮現主時雖然有咧賣鹹鴨卵，毋閣無賣蝦鮭，有影真正遺憾臹
拍隕，這嗎一斤活沙蝦240到300左右，比草蝦卡貴，成本ｅ
關係宛那姑不而衷li，「生食著無夠矣，欲按怎曝乾」，有理li，
若欲qen4蝦圭口味，吓使去八里廖添丁廟，抑是十八王公買
”佳冬仔圭”(小扁魚鹽漬)加減tau一步癮le，(蝦圭ｅ詳細
，後面吓寫到)。
呾咱話頭給講返來，1898 軂腳火土來捍尾橋倚 “烏
斗門仔”(斗門仔，水門之意)ｅ鴨寮，江路臹闊，拍算三十外
尺ｅ款，鴨寮長身20尺，攏總飼三百外隻鴨母，火土仔逐工
(工)無閒起無閒落，為著生活 ,大粒汗細粒汗咧討趁，歹命囝
噯有甡張，才袂夆秤斤兩，庶當時鴨寮中間ｅ競爭，宛那臹
厲害，生理場出入，壹旦拚勢咧落坑，對方踏硬，講袂遴返
，這聲著醜材漏屎馬矣，佇關渡所在欲na吓稠地？致su著
火土仔，透早透晚無暝無日咧捙拚，逐工看著燒溫溫ｅ鴨母
卵，到手中心ｅ時，忝頭se3神總了了，遂袂疲勞厭懶叨著。
總是咱關渡暢兮，今仔日鴨卵佮蝦圭這二項特產，佇全
台灣吓凍徛有著等，宛那是咱茲鄉親，認真搰力去拍拚研究
改良……种种，成就無咧冤枉，“人咧做昊咧看”，絕對袂
秤秤彩彩著，拍一枝紅君互汝到。咱普普也給按算，飼鴨雖
然是好趁來講，宛那是臹厚工重工啦sap工，另外心情壓力
操心扒腹，不時驚兮咧等，吓使講勞動佮勞心雙重拚勢，彼
時開鴨寮，袂比現主時開工廠快活，做頭路拇事業，輕可佮
硬斗肖絆肖纏, 有影無簡單！
這嗎軂土仔，佇烏斗門仔ｅ身邊，顧鴨寮飼鴨母叨也有半
冬外ｅ時日，因為人客朋友摯接來去ｅ中間，知影真贅鄉土ｅ
學問東西，有一工(天)萬裕仔佮痟矮生二位好朋友，死忠兼換
貼仔來幵冓，火土仔講寡按怎享受鴨卵ｅ道理，二人聽甲耳空
kapkap15，真正內行喟li。
“第壹步，上介好食著是鴨母頭一擺生出來ｅ卵，在室ｅ
頭一回，这真尐人知影，人客壹但甲食稠了後，著吓不時來探
聽，咱飼主吓漲懸價，泛勢噯有交情才欲交關，因為一年才一
回二回爾，昊落紅雨叨希罕li，這款卵外表卡細粒，毋閣卵清牽
絲臹黏落鼎煎時臹薄，Ｑ(糅)甲袂講了了，有影大色貨li。
第貳步，關渡鴨卵有真贅雙仁兮，卵身卡長，雙頭尖尖真
奇卡趣味，外位人看落臹吓起磅臹給謳咾，宛那賣有好價，若
欲食kimo著噯食這款才讚。
第三步著是紅仁ｅ鴨卵，這款表示鴨母食有油臊營養卡好
，吓凍賣卡好價擻，这一批一批啦，飼主攏吓另外抾起來，賣
互專門ｅ人客。
第四步著是關渡鹹鴨卵ｅ製作，一定噯用茄苳腳紅土，曝
礁才漬(sii6)才吓讚。
總講一句，欲買”讚ｅ壹庄”ｅ鴨卵，定著噯去飼主ｅ厝
內綰，絕對袂使去噉仔店買，除了”卡青”(新鮮)ｅ理由外，因
為好蛋卡奇卡ｅ，價賑卡好，飼主一定先起來，干礁應付登門
排列來拜託ｅ人客，順續給漲懸價叨咧無夠賣矣，絕對袂赫戇
，提去店仔夆看無現咁毋是？这叨無法度ｅ代誌li”。
50
萬裕仔佮痟矮仔生，二人聽甲真斟酌，目睭搌大蕊，大嘴
開haahaa32，才怨歎家己歹命，像這款好食ｅ料理，毋知佗一
工才有機會li，今仔日互火土仔開破，有影加捌臹贅，想落叨羨
仙膏咧塔塔滴li。續落火土仔講寡鴨寮ｅ地龍坐位，佮寮仔內部
ｅ設備。“「是按怎講關渡這角勢，鴨寮仔vat周周，真正興li
，仈位地頭咁排無著頂，捸(de4)伊袂著是毋？平平鴨寮，關渡有
，宜蘭嘛有，毋閣仝款叨無仝司傅”，精差佗位？飼鴨母肖像
(同一樣)出力，按怎有人是趁甲油sese14，錢銀洘洘起大厝，有
人是悽慘liuliu14，做甲倒閣，風箏斷線傢伙了一半，關渡媽吓
聖，聖甲吓食糕仔，有影毋？
咱關渡鴨卵吓興吓旺廣，致蔭著頭傢人ｅ拍拚，亦致蔭著
地基主ｅ暗中牽成，佮土地公保庇，上要緊著關渡媽祖ｅ大力
幫忙逗腳手，嗯才知影這角勢咧飼鴨母，神明味臹重，逐傢臹
誠心拜拜，生產佮信仰二項有緣逗搭，逐傢有甡張，拚落到地
有信心li, 關渡鴨寮吓大尾，佇地理上占大優勢，伊是三條港路
ｅ總君頭，大港小港圳溝肖絆纏，水路臹活，真ha3設立鴨寮。
另外一步著是，淡水江ｅ花蛤仔幼魚幼蝦臹贅，因為半鹹
半汫水著ｅ，生態豐富，鴨卡好tr6食(吞食)，尤其是這味花蛤
仔肉贅好掠，一船閣一船滇滇，袂輸咧kat土赫輕鬆，致使成
本低閣臊味重，臹合”製作”鴨卵叨有影li，佇農業社會內底，
人工俗物資貴，干礁這項花蛤仔(簡那咧抔砂)，仈位飼鴨ｅ，
著摯載袂稠，有影昊欲飼人肥律律，叨袂比ｅ。
算講關渡暢ｅ，卡好狗利運著是啦，續落猶有一步占地頭
ｅ利便，著是茲鴨寮陣，接連著1500甲ｅ關渡塭田(現主時叫
關渡平原)塭田出產砂蝦，贅甲袂講了了，致su講未播田時，
趕鴨母食扁蟹佮虫魚，稻仔生長平時趕鴨食砂蝦，割稻了後趕
鴨食稻穗，一望無際關渡塭田臹有額li，所以鴨母趕出去免一
晡久呤 ,燃眉逐隻飽奎奎(褱褱) , 頭傢是歡喜甲嘴笑目笑。
另外閣一點著是關渡地ｅ水路活，交通利便(彼時猶未造
鐵路，公路)，利用流水，關渡透早抾鴨卵，免到中晝，著運
到大稻埕艋舺，遐有錢人ｅ手頭，鴨母卵青(鮮)上食好，其他
親象宜蘭新竹用牛車載來ｅ外位貨，上緊嘛著噯三工左右，絕
對拚袂贏咱關渡暢兮li。
嗯才落尾也，鴨寮愈起愈贅，台北人愈食愈續嘴，反倒返
來鴨寮愈發達愈競爭，逐傢用心計較想空想縫，來研究閣卡奇
卡ｅ鴨母卵，來趁閣卡贅ｅ錢銀愈楦愈大，變關渡鴨母卵，一
名透京城，做了有起，逐傢揚papa，擎甲掠袂稠，關渡媽佮關
渡卵叨太祖牌li，規百冬來眾人謳咾有著”」火土講到茲稍歇ｅ
，飲一嘴茶咪茶。
萬裕仔續落才咧講「著有影li，咱關渡地鴨寮仔真正興，
一四界滿滿是，坎倒規庄頭，為咱ｅ血跡地趁金趁銀，逐傢心
情爽元氣讚，請教汝，这鴨寮按怎起ｅ？鴨母栽按怎掠來？這
點我上介趣味li，另日仔，若有時機，看有倘”有樣學樣”家
己宛那拚一間仔鴨寮卯一塊仔？」這時軂腳火土又閣續落講「
無毋著，現主時，茲茲(的確)呢甡，這嗎有一間仔鴨寮著真正
志揚(yang6)，袂輸講比大頭傢ｅ紅瓦厝卡有辦頭，錢銀貢貢流
簡那搖錢樹咧，詳細著真趣味li，亦鄉土亦田園味，亦趁錢亦
操心扒腹。
“呾少年仔卡閃開，老漢欲展威”飲一嘴茶了後，講一下
卡有ｅ，互逐傢鼻芳咧，咱關渡暢兮叨實在無簡單，鴨寮即大間
，佇塭田ｅ中央(遠離住宅區)毋閣單單是這味竹枝佮稻草來搭成
爾爾，裡底飼有四五百隻鴨母有影，咱庄腳人臹敖(qau2)，干礁
用拋魚船仔(舢板)載竹箍佮竹枝仔，利用圳溝te6船到鴨寮地，
續落ｅ瞬呤，逶竹箍削尖做柱做骨，鋪好勢了後，才閣囥枝竹仔
，上尾溜才叢叢ｅ稻草給塞入去，袂輸大厝咧囥磚仔抑是土角仝
款li，咱庄腳人利用卡閒工ｅ時，罔tiap罔做，拍算著完成矣。
這款ｅ做法，有影真正巧聰明li，因為砌厝來講一般de，
噯消磨真贅錢銀，幵山幵海傢伙毀了了，这時瞬”無米兼潤月”
又閣需要大間，才應付赫贅隻鴨母，變做講無論如何，砌鴨厝
ｅ成本，定著噯比後日仔鴨卵ｅ利純卡尐，才算吓和li，庄腳
人這聲用稻草佮竹仔來起寮仔，吓使講成本降到上介低叨著，
有影讚，順續利用竹仔有節中空ｅ特性，材料輕閣有力，咱關
渡地家已著有生產，逐項攏省錢著是，毋閣單單有一步醜著是
有卡驚火，煮食炾茶種種，噯離卡遠才吓堪咧。」
軂腳火土仔講到茲，不止也揚，一下宏(得意) 到地也，自
那掣萬裕仔尹，到鴨寮仔各部份去參觀，這間鴨寮仔長30尺
寬20尺ｅ款，飼三百外雙，寮仔進前，拄好二條溪圳ｅ交界
二角窗，水面真闊，寮仔佮對面有竹橋肖通，身邊有二大朴
仔樹，人吓凍爬去頂頭消涼，亦吓使飼粉鳥li，寮仔後面完全
是一望無際ｅ田仔。
下冬昊仔，水氣霧重，遠遠看著，亦是鴨寮爾爾，一間一
間茫茫渺渺，有時有鴨母聲逶耳空邊掃過，鴨寮ｅ厝內”晟激”
(裝潢)按怎？萬裕仔咧請教火仔，才知影鴨內底大部分互鴨微
仔歇睏佮囥飼料，厝後尾有一部分激做房暗時倘睏眠。鴨寮仔
有二葩臭油燈，一葩照鴨母，一葩顧寮暗時家己用，房間內有
食ｅ物件佮樂器，有柏鼓(biakgo14)，獅鼓，鑼、鼓吹、殼仔弦
(椰胡)，閒ｅ時倘耍，做義niu 6排解無聊，咱關渡暢兮臹興戲
班，有子弟戲ｅ北管戲齣，茲顧鴨母ｅ少年傢仔，若有閒叨鼓
吹，挨弦仔，抑是拍柏鼓仔，四箍遴返空闊攏曠，練樂器袂去
礙著仈人ｅ歇睏，迭迭嘛二陣鴨母飼過身了後, 戲曲宛那練熟矣
，到時毋但衲袋仔洘洘爾，順續閣吓奏真好聽ｅ樂器，互庄
人驚一趒臹給歡喜謳咾：飼鴨母吓培養樂師，这宛那咱關渡暢
兮ｅ趣味，咱火土仔na介紹樂器，na講na演奏，奏一條薛平貴
佮百家春，萬裕仔聽甲耳空kapkap，真正欣羨。
佇一百冬前，亦著是清朝尾年，日本初來彼當時，若準汝
關渡蹛三五工仔，汝著吓發現著，關渡彼角勢，逐工(每工)印
象上深ｅ著是，飼鴨ｅ頭傢咧大聲咻喚「哦va5……」，經過
三秒鐘了後，鴨母陣著吓印聲「ga2…ga2…ga2…」聲音真正
大聲又閣整齊，實在臹趣味li，佇塭田這爿嘛是安呢，到八仙
基隆河，抑是浮線ｅ(社子)，和尚洲(蘆洲)攏是仝款。
這款咻喚聲佮鴨母ｅ印聲，攏真特殊閣大聲，頻若聽過一
遍，著一氏人記稠稠，小弟阿興仔，佇 1956～1962這幾年ｅ
噹中聽過幾落擺，到這嗎已經三十冬矣，印相猶臹深，毋閣現
主時環境污染完全廢掉矣，定著是聽無li，qenqen36袂消建(空
留遺憾)，哎，想落著怨歎，想落著捶心肝，關渡啊關渡，實在
叨有影li。
51
幵冓起來，實在真贅茲ｅ鴨蛋奇卡風俗，佇小弟細漢時宛
那有經過li，這嗎想落臹趣味臹吓起磅，差不多1956～1960彼
暫ｅ代誌，小弟八九歲`呤，頻(bin3)若逶塭田倒返，行就尾橋
ｅ時瞬，著上愛看人”趕鴨母”，囡仔人好士相(好奇)，叨紅
目有仔逗鬧熱，趕鴨母陣來食粟粒佮魚蝦蛤仔。
鴨母趕過了後，有一半隻仔，吓擋袂稠(忍不住)佇草叢甡
鴨卵，福氣若到，隨人抾著隨人ｅ，茲庄腳囡仔著目睭niauniau
看金金相，佇遠遠ｅ所在，看佗一隻腹肚凸凸，簡那欲甡卵ｅ
款勢，目箭捽互伊銳，也叨瞋閣再瞋，瞋甲二蕊目欲肖pua4去
，等ｅ鴨母趕唗了後，規陣囡仔著ci3偎去，開始佇草仔抱ｅ
中間去尋，若尋著一粒鴨卵，摸起來猶燒燒叨daa2甡兮(剛下
蛋)呤，著袂輸簡那去挖著金礦仝款，返來三工內暢甲袂食袂
睏ｅ，不時嘛給厝邊展寶，人講魚溜巡便空，加趁加食ｅ，算
講卡旱ｅ囡仔叨有影艱苦li。
另外一方面，趕鴨母ｅ頭傢人，嘛是吓去注意偷甡ｅ鴨卵
，顛倒閣有機會吓早一步抾著，致su著規个趕鴨母中間，頭傢
人佮猴囡仔，規陣咧激頭腦拚目色，看誰人先抾著卵叨臹揚li
，有的囡仔卡巧，一早起抾著二三粒，歡喜ueue61，家己謳咾
sak袂倒，仈人帶遐羨仙膏，有ｅ囡仔用心計較想甲頭殼欲擎煙
，毋閣下消款dai3著，頭殼尖尖仙抾著抾無，假曲唱袂落調(不
行就是不行)工夫無到，乏甲叫毋敢。
鴨母陣捸十外陣嘛抾無半粒，有時仔洶洶抾著臹歡喜，
才知影咚時仔是臭去ｅ鴨卵，卡行著慢人一步有影吓凊心，有
時去親戚朋友兜，看人鴨卵抾到米斗滇，心肝臹凝，嘴瀾答答
津。佇關渡塭田這角勢，這齣”肖搢抾鴨卵”ｅ戲搬百外冬，
平靜ｅ關渡，想袂到內含著鬧熱滾滾。
昊色漸漸暗落，佇暗頭仔(傍晚)ｅ時，火土仔簡單講伊食
暗頓，算講有伴ｅ關係，嗯才按算留佇鴨寮內過暝，傢傢講一
下仔卡有ｅ，卡鬧熱卡有義niu6, 幵冓na sip，萬裕仔開嘴「普
通人買鴨卵有啥乜撇步否？鴨母卵佇買賣交關ｅ噹中，噯按怎
才有內行喟，种种工夫東西，麼汝嘛稍攽二三項仔？」「呾平
平兄弟咧做，客氣啥？著驚汝金嘴毋敢講爾。
有影單單這味關渡鴨母卵，交關中間有學問li，噯捌一半
步仔，才袂顛誕夆笑，有影臹不吉矣he，咱關渡阿同兮，有寶
毋捌寶，袂曉買卵，顛倒奚外位仔人，大稻埕艋甲ｅ阿舍，抾
著紅米，人奚卡內行喟li，嗯才串買著買著好物，算來交關欲
按怎才吓好勢？
第壹步買鴨母卵絕對噯去飼主厝主ｅ厝內綰，毋倘去噉仔
店交關，因為這味鴨母卵，算講地方性特產ｅ大色貨，飼主隨
間有隨間ｅ絕門祕密，機關藏佇倉庫(家中)內，逐傢咧箍金sun2
暗中比憑，臹有拚頭，另外一方面，茲內行ｅ阿舍好額人，攏
嘛專工到厝主兜揀好料兮，有時仔卡奇特ｅ，著噯量早注文才
有li，來厝內交關，上無嘛一步卡青(新鮮)，著有夠行路工ali。
第貳步儘量給揀選紅仁卵，雙仁卵，在室卵這三款大色貨
，若是無貨，甘願注文亦著等，這三色定著比壹般鴨卵加貴卡
贅，毋閣真正qirdr(嬈婥)，人比人，佛蘭斯水食一點氣爾，也叨
一氏人罕咧幾時，食一下卡好ｅ，才袂夆笑，講平平幵錢，哪
吓掠豬仔卡輸人？
所以一定讚噯好，致su著阿舍歡喜，頭傢閣卡趁錢，雙
頭歡喜雙頭逗搭，這三味卵，紅仁卵是閒養好有油有臊ｅ代表，
佮壹般ｅ黃仁卵比憑，加臹高貴，雙仁卵是一粒鴨卵有二粒蛋仁
，定著卵身吓卡長，變做袂輸橄欖仝款，長du長du臹好使講觀
賞ｅ價值卡好，抑若食ｅ口味，我看是無顛誕啦，這款卵雙頭尖
尖，頻若看過，著隨人抾隨人歡喜，臹有人緣，叨有影福星。
上尾項著是在室卵，是鴨母頭一回甡ｅ卵，這个卵清特別
Ｑ卡細粒，煎起來像紙仝款薄，口味真正”讚兮壹庄”，無人
比憑吓倒，頻若食過是通人謳咾，這款卵臹尐，噯先注文，有
時仔泛勢有錢猶買袂著，噯看交情li，實在有影！總講一萬句
做一句，這三款，一項是卵仁紅閣油，一項外表嫷，一項卵清
臹Ｑ又閣薄，咱關渡暢兮叨干礁食這味爾，人奚水準讚甲叨有
夠遐li。
軂腳火土仔講甲嘴角全波，真正僬勻，siapa15，互萬裕仔
尹大開眼界，這聲好勢矣，後回仔交關絕對袂去互伊bia5去
，人總是噯四界賴賴唗蹤，加吸收寡學問才好，尾也火土仔
順續閣交待「鴨卵抾起來，囥佇斗桶內底，絕對袂使去沐著
水，卵殼外口彼延草皮土沙，毋通用水去洗，保持原來影跡
著好，省手工閣耐久長，咱這个鴨母卵用煎兮上好食，用大
柴炾灶，豬油慢煎，煎甲彼鴨卵清ＱＱＱ，un豆油有影”壹
筆仲”ｅ(最好的) li。」
火土仔一下講煞，萬裕仔才咧問講「咱普普也給掠一下，
若做山著無算，抑若做塭田佮飼鴨母佮港仔拋魚，這三項佗一
項利純卡讚？」火土仔這時飲一碗燒茶印講「奚na著閣講！
鏘採(自然)嘛飼鴨母上好，吓凍逐工見財才趁吓過手，噯暝日
捙拚操心扒腹才有效，若無漢草大欉，耐踢耐tun4好肉本來
講，叨免三二輦半手，著夆戽去邊仔喘。
咱老歲仔人歲頭亦矣有，喟力卡虛秤硾拖尾，加減做寡田
，猶罔渡罔渡，若欲潦落飼鴨母，奚才袂gun笑ｅ，關渡地頭，
佇天時地利人和各方面ｅ致蔭，定著真贅人飼到額，這點汝著
免怨歎，逐傢食茲ｅ水米大漢ｅ，攏總艱苦有著，關渡吓興無
簡單，江南地區是「魚米之鄉」，咱關渡暢兮是「魚米卵之鄉」
，叨茲茲有影li，風景嫷，物產豐，通人嘛羨ga taptap津」。
這暝佇鴨寮內，火土仔佮裕仔，二个司公仔神杯講規暝
，三更暝深ｅ時瞬，火土仔起來夯(qia2)臭油燈巡鴨母，看睏
有好勢否？單單這點來講，飼鴨母確實硬斗li，責任宛那真深
，卡講嘛著親象火土仔這款忠厚硬直ｅ人，才捍吓落來，火土
仔看有倘儉一寡否？來脫離做羅漢腳仔ｅ悲哀，做一个社會有
尊嚴，互人吓交重ｅ將相之材。
呾這嗎話講返來，關渡媽祖廟附近出產米，出產魚，出
產卵，這个名氣揚papa ｅ魚米之鄉，風光百外冬了後，差
不多1970左右結束落，上尾班吊火車尾ｅ飼鴨業者，咱茲
嗣大老仙覺，這聲昊時地理攏大醜，規港烏油污染，垃圾離
羅，鴨母陣趕出去食，返來逐隻嘛軟腳著，規个飼鴨業，三
二年內敗甲塗塗，一二擺風颱了後，鴨寮連遍倒，亦無人去
整理，現主時咱食ｅ鴨卵，大部分大陸來兮，尐數宜蘭屏東
來兮。
欲食古旱現甡現賣臹青赫紅仁ｅ鴨卵，奚著做夢才有法li
，各位阿同兮，若到關渡媽祖廟去燒香時，看著規路攏咧賣鹹
鴨卵，稍撥一下時間，給回想百年前，至到三四十冬前，猶有
ｅ規庄頭鴨母聲hehe33趒ｅ鬧熱款！
52
有關咱这關渡鴨寮ｅ代誌，著真心適li，除了頭前講過e
顧鴨寮，兼學鼓吹鑼鼓，返厝內吓鴨卵兼搬戲曲，有食閣有掠
，實在響影li，另外一層著是中秋暝，鴨母寮ｅ船仔儘出，來
獅仔頭遊江飲燒酒ｅ趣味，汝毋倘看飼鴨仔粗魯人呢，船隻便
便，喚一聲駛出，三教五路，十八項工夫盡拚盡現，逐傢唸歌
納曲叨互汝想袂曉li。
明仔載和成伯吓來巡鴨寮，才請教伊遊江這方面ｅ奇巧，
順續亦給請教”出名全台灣頭ｅ關渡蝦圭”(鹹蝦漬)，是按怎
製作？裡面有啥乜pet步，呾嘛稍摟幾步仔來聽ｅ。嗯才吓互
咱茲嗣細，吓凍了解祖公留落來ｅ的飲食文化，給寶惜噯給疼
痛，安呢做人才有根底li。
微微仔奚輕風，吹過恬恬咱这關渡塭田，昊頂半輪月娘掛
稠ｅ，身邊幾粒仔昊星噴噴也，真正孤單款，遠遠ｅ所在，不
時一二聲狗螺siang4破大地，冷風冷酸酸，暝尾露水臹重，天
未光雞未吼，火土仔著先起來，厝前厝後巡巡一遍，看鴨隻有
各樣否？有受傷軟腳否？齧鼠佮蛇有偷食飼料否？賊影毋晟囡
仔有來虧仙否？
种种方面管顧好勢，叨有影負責任ｅ忠直義氣li，卡講嘛
咱阿佬ｅ，實在有影。經過了二个時辰了後，老頭傢和成伯仔
來巡寮仔，順續擔笪物件，一頭一桶清氣水，一頭一包米佮柴
，按算講巡好勢了後，才逶今日抾ｅ鴨母卵給擔返去厝內賣。
咱鴨寮地，寮仔後尾仔有種菜，沙蝦是規區田一四界滿滿是，
dng6(捕)一暗著食甲叫毋敢，干礁這味清水佮米糧卡缺欠li，火
土仔看著和成伯仔行踏到，真正好禮來迎接頭傢，萬裕仔佇身
邊，嘛順續給伯仔請安，逐傢歡歡喜喜行入鴨寮內，咱这和成
伯仔，今年卡歛六十，人生著紅膏赤ci，少年有拍過拳頭，講
話旺廣聲陳，做人肆海慷慨真正惜情，庄頭ｅ人，逐傢攏扶伊
做嗣大，尊呼伊伯公仔。
伯仔學問真飽一四界交陪，人面臹闊，佇關渡”新安社”
亦搬過戲亦教過戲，敖(qau3)挨殼仔弦，伊伊歪歪充滿鄉土味
li。咱和成伯仔ga敖幵冓興彈以上，這聲萬裕仔抾著寶矣，著
真熱誠來搬請成伯仔，加減給咱講寡茲仁情世事”說飯lue6
講hakkat35”(閒話桑麻)互後世茲少年仔，逗歡喜做義niu6。
和成伯仔這嗎佇鴨寮內底，講一寡關渡蝦圭佮中秋鴨寮船仔，
佇關渡港面遊江ｅ故事叨真心適li。
和成伯仔才咧講「咱關渡這角勢，江路僬，水流活，又閣
平洋闊塭田贅，經過祖公百外冬ｅ拍拚發落，除了做田佮拋魚
以外，致蔭咱後世囝孫有二項好物，一項是紅仁鴨母卵，另外
項是關渡蝦圭(hegue32，鹹蝦漬)尤其是這項蝦圭，是透台北逐
傢著謳咾甲欲觝舌，是世間頭一味讚ｅ大色貨，若食吓到嘴，
奚著一氏人袂枉費矣。
續落我來講寡蝦圭ｅ製作技術，罔聽罔聽，泛勢後日仔用
吓著嘛無的確，另日若有閒工，才請諸位來阮兜配糜食，滋味
芳甲互汝臹歡喜，汝才知影咱關渡地確實大尾也，發角也，逐
傢臹有面子。
咱關渡出產ｅ沙蝦，來源根底佇淡水江(淡水河)，經潮汐
流水流入關渡塭田了後，一望無際1500甲，甡湠(繁殖)足緊ｅ
，緊一四界竄筋入骨，撝撝鑽，，吓使講頻有水ｅ所在，著有
沙蝦，數量贅甲吓驚人，掠沙蝦上簡單ｅ辦法著是佇田岸流水
空，囥竹製蝦籠,互水流落下坵，透早去收籠，裡面普通有四
兩五兩ｅ款，若囥二十坵田，一暗著收有四斤五斤，返來了後
稍清洗，著吓使加工做蝦圭，春蝦卡大尾卡飽滇，秋卡細尾，
毋閣滋味卡讚。
製作蝦圭，先僎(準備)清氣ｅ乾布，酒矸，炒燒過ｅ鹽，
第一步定著噯用活蝦，全內底袂使有一尾半尾ｅ死蝦，抑無
(否則)著總敗敗去唗味矣，所以噯一隻一隻細膩去抾，千萬袂
凍顛誕去，這項空課真正硬斗，有時七、八斤蝦仔噯佇五分
鐘內抾煞，時間緊迫，袂輸咧燒倒頭香咧，抑無抾到尾溜時，
進前ｅ活蝦已經死矣，安呢著塗塗塗，“金斗等到生ciu才
綰唗，到時完全唗味，著無彩汝舞規早起。
第二步檢查當中，其他幼魚仔，樹葉，其他種ｅ蝦類，像
大頭蝦草蝦，攏噯揀掉，平平沙蝦若甚大隻，甚細隻嘛是袂合
格，差不多攏尾指仔長欲拄好。
第三點袂使沐著水，蝦體佇水桶捊起來了後，緊用乾布擦
乾才入鹽，鹽事先噯炒過儘量勿含水分，这佮漬好時ｅ風味關
係真大，因為鹽入蝦肉內，“蝦肉水”吓渚(滲)出來，这有一
定ｅ比例，風味才吓讚li，若準一開始，蝦頭身佔有水滴，雖
然是一二滴爾，毋閣比率上吓比逶蝦體渚出來ｅ水加贅臹贅，
這聲著攏塗去矣。
第四點，裝罐ｅ時瞬，袂使有空縫空氣出現(氣隙)，若無
者吓變臭變味，安呢著醜材ali，所以講蝦體一尾一尾塞入去
酒矸時，目睭噯看互伊斟酌，箸噯ci3互伊va6(密)，毋倘空縫
才是工夫，總講一句，sii3(漬)蝦圭ｅ過程中間，絕對袂使有雜
質、水分、死體腐物、空氣菌茹污染，吓使講考慮甲臹夠，臹
合乎科學精神著是啦。
製作ｅ手續是安呢，一斤活蝦配合四兩ｅ礁鹽(噯曝礁asi
炒礁)，先逶蝦仔囥入去大桶中，續落ｅ瞬呤，一尾一尾ho2(撈)
起，一斤到額時，緊用乾布擦乾，趕緊倒入去鹽坩(kaa大瓷鍋)，
才用手去攪互伊撒互尹平均，尾也才一尾一尾帶鹽du3入酒矸，
用箸(筷仔)稍搭互伊密，袂使有空氣縫，一矸囥滇封口，才閣製
做另外一矸，普通攏做十外矸ｅ蝦圭ｅ款，囥一箇月，著吓使用
竹勾仔勾出來配糜(ve2)食。
和成伯仔講到真正入腹，逐傢聽甲心花臹開，人講心涼脾透
開，苦毋講現場，緊提一矸來試鹹汫，逐傢享受le。各位咱茲鄉
親嗣大，這味關渡蝦圭，小弟逶1955捌代誌幵始壹直享受ga 1970
為止，印相真好，是我這半氏人噹中上好食ｅ物件，絕對無顛誕
，後日仔若有機會我家己來做。
因為佇關渡地已經買袂著，欲絕種矣，至到有ｅ少年傢仔，
連聽著無聽過li。我講關渡沙蝦圭是特殊ｅ食品絕對有影，假使
豬肉美味袂為１，佮醃肉後美味著有２，現主時沙蝦一斤三百箍
，比草蝦龍卡好食，差不多有３，做蝦圭變２倍有６，有影讚叨著。
沙蝦讚，讚佇軟殼這步好，壹般咧食沙蝦，用水煮了後
un4豆油，規尾食，含頭含殼壹在內咬碎，別有一番ｅ氣味，
真正青甜li，最近美國有進口入來軟殼蟹，含殼食上界好食li
。關渡地佇民國53年(1964)拓闊，結果失敗，引起海水倒灌
，佇以後五年來，被淹水ｅ五股湳地，遂全全出產這味沙蝦，
一工掠有規百斤，關渡ｅ沙蝦這時「迴光反照」，無外久著全
軍塗塗滅了了，蝦囝蝦孫死甲”無人燒香點火”，暫時絕種矣
，主要是污染，臭水重金屬，規ｅ關渡塭田僬好勢，環境影
響赫大，想落有影吓捶心肝，真正激心，這嗎欲食沙蝦著宜
蘭彼角勢矣。
第十章 艋舺唗傱, 婁孤帆兮
53
1901，阿本仔來管蕃薯仔叨也六冬矣，这是伊ｅ昊年，阿
本仔來，大稻埕e英國啄鼻仔定著噯唗，台灣地一步一步全面
日本化，推廣國語，編列日本官制，集結優秀仁材，haai4重本
錢建設國家，台灣人換新頭傢，雖然依原是異族外來政權來管
，毋閣社會ｅ治安轉好，好人甘拍拚li，卡吓捅頭，毋管離去
ｅ北京官話，抑是新來ｅ東京官話，蕃薯仔攏聽無，卡講亦是
福佬卡親，茲箍絡做穡人駛車討海ｅ，宛那是拚甲欲烏暗眩去
，為度三頓拂甲欲烏面，人講行船唗馬三分命，依原是隨人討
掠隨人落鼎，卡認本份咧。
咱關渡暢兮嘛是仝款，拍拚勤儉來赴厝內嘴齒規米籃，規
个社會漸漸有咧改變ｅ款勢，空課路咧推卡吓起磅，連社會上
ｅ尾du5乞丐佮羅漢腳仔，宛那想法改變，噯認真搰力佮這塊
土地有親，佮土地公伯仔地基主吓好勢， 映望逐傢逗三仝，
致su著茲少年ｅ散赤人宛那有儉一塊仔，做日後食穿ｅ母本，
親象咱關渡ｅ萬裕仔，亦有儉七八十塊ｅ錢，有影看袂出來。
萬裕仔無親無戚，一四界行踏拋拋唗，水流破布無啶性
，萬裕仔這聲亦二十五六矣，歲頭食到這時，宛那吓想起細漢
時ｅ老母，這嗎到底猶有活佇世間否？若準無佇世間來講，嘛
著噯知影殆佇佗位，倘去燒一束仔香咧，想落心肝臹糟。
萬裕仔不時著想起，離開老母彼時ｅ代誌，知影家己身命
悲慘，亦體諒老母厝內散赤姑不而衷，一幕閣一幕親象唗馬仔
燈咧踅，想閣想，看有倘想卡清楚未，人講鳥飛毛落魚行水濁
，田螺趖有痕，看有倘掠一絲仔線索，來研判老母佇佗位？
这定著困難忝忝tata34，絕對無赫秋稱好勢li，嗯才萬裕
仔佇三日祭了後ｅ某一工，專工拚到媽祖婆遐燒一束仔香咧，
祈求媽祖吓凍顯聖暗中zak助，呾三條香燒落萬裕仔是嚎甲毋
臹聲調，經過一暫仔心情卡定ｅ時，想閣再想，坐佇遐倯倯倯
，依原喉脘滇，滇激啞口仔聲，哎！實在無啥示，一个少年囡
仔吓互嗣大給攽捨，有影叨想袂曉li。
燒香了後，萬裕仔自那一路用步輦ｅ，行踏到司父渡船枝
仔ｅ瓦厝，等規ｅ時辰，欲拜訪枝師仔，給逗調查甡母生死之
謎。渡船枝仔聽著來意了後，真正感慨，人講母囝仝心，平平
一塊肉分出來ｅ，互人悽慘坐卦哭破厝蓋，這層絕對噯逗三仝
潦到底，萬俗仔目眶紅紅壹再跪拜謝勞力，這款心情佮大麵發
仔抾風水仝款，叨平平歹命囝li。萬裕仔有稍給喃(nau5)一下，
說明彼暗老母掣寄阿匏仔ｅ种种情形，裕仔操心扒腹，想閣再
想，想甲著欲洋去，一點一du5，儘量回想彼時，最後理出三
項，請枝仔司保守祕密。
第一做囡仔時家庭來往複雜，來來去去，全一寡甡銑(繡)
面兮，恐驚也佮煙花界有治代li，拍算老母佇真散赤到底也，
仁生衝了無起，去夆qee6去。第二阮母仔簡那有著重病ｅ款，
為了后代ｅ健康驚也染著，嗯才姑不而衷寄送互朋友，抑無做
嗣大是無可能來攽捨囝兒才著li，囡仔時代老母不時咧嗽，哀
甲臹艱苦。第三我送互阿匏仔飼一暫仔，這嗎阿匏仔已經過身
矣，毋閣伊身邊ｅ厝邊頭尾，拍算知影我ｅ身世嘛無的確，
吓使暗中探聽咧。
哎！我實在是臹歹命。有影苦袂了，規个心肝離gaga，
是去犯著天吊神是毋，按怎五路凶煞僬到，老母尋無，養母
又閣過身，仁生盡磅到呾，是真正感慨ｅ感慨，這時，渡船
枝仔仙覺才咧給安慰。「佐汝免驚，若這層，老身兮絕對潦
甲到，錢路人面僬舞落，捙拚填到底，這二工我卡無閒, 也叨
船班生理肖犮 ,霧霎霎(時間衝堂，撥不出時間)，四方善
信客門鄉親發落好勢了後，絕對給汝tin6甲到。
拍算七八工了後，我吓攽線逶阿匏仔ｅ親友厝邊，來給探
聽，相信講”鼓佇內，聲佇外，空縫加減吓biak5出來”，總
是結局水清魚著現，我枝仔歲頭食甲六十矣，港絕對潦到底。
」枝仔真正有義氣，對咱茲赤腳仔叨無論兮li，萬裕仔鼻酸目
燒，一時心肝頭滾鏘熱撲撲，毋知欲按怎仜勞力才好，哎，仁
生啊仁生，啥乜命才有倘食到竹塹餅？(帶頭諺語，何時才能突
破困局？)，天公伯仔有靈聖。
真正七八工(天)了後，渡船枝仔空課卡歛，，攽線去調查
阿匏仔ｅ种种影跡，阿匏仔做人真跳踢(很具活力)，一四界熱
心助散赤，不時去廟內咧奉勞(義工)，叨過身五六冬矣，厝邊
猶臹擻念，阿匏ｅ厝邊有一个阿婆，號做烏貓惜仔，少年ｅ時
金絲娘仔金咚咚名聲臹揚，交陪贅人面闊，佮阿匏仔頂下歲，
臹幸幵冓，頻講年仔節仔東西，吓來關渡廟給賣金紙，雖然老
猴無粉頭來講，宛那是人緣臹好，消息透通，渡船枝仔亦探聽
一半擺仔，結局才知影，烏貓惜仔佮阿匏仔上介好，二个袂輸
”司公仔神杯”；峇峇峇逗逗逗。
咱渡船枝仔，親身到烏貓惜仔厝內拜訪，真正梟悻，惜
仔歹勢講，踮兮咧… dididudu無三無二， 落尾也枝仔才給
講破道理，說明这利害關係了後，才落軟為著救人叨姑不衷
li，抑無實在對過身好友給牴臭(ducau63)講醜，是真正袂過
心叨著。
萬裕仔老母號做金蓮，這嗎若活稠ｅ，拍算四十五六ｅ款
，連阿匏仔著死十外冬矣，時代咧變遷臹緊，金蓮自早艱苦底
，老爸早死老母續落破病，少年是水流破布艱苦坐卦，嗯才姑
不衷潦落煙花暗巷，來換一嘴飯來食，二十捅歲，逗陣七八冬
了後，暝日肖看，看久嘛臭pu4(發霉)，嗯才門扇板咧逗袂峇，
不時佇外口賴賴趖拋拋唗， 有一擺燒酒醉跋落斗門仔(水門)
，無人救助遂身亡去，有影臹害。
金蓮嗆著目屑，有影啞訄硩死囝，有話無地講，萬裕仔偷
甡兮，亦無正式嫁尪，又閣徛壁暗間仔身份，真正袂見証ｅ，
萬裕飼甲八歲，金蓮身染重病逐工嗽甲臹忝，有時吓呸血，拍
算肺病(癆)li，金蓮驚也連寶貝金囝著”e4/ue4著”(傳染)，仝款拍
隕遂叨絕種，為著囝兒ｅ性命，嗯才姑不三衷拜託阿匏仔收留
，提五十塊錢寄伊飼，拄好阿匏仔無後甡，順續收做客囝，金
蓮返去大稻埕中北街，這嗎生死不明叨著。
渡船枝仔聽到茲，才咧暗想，奚若大稻埕，这毋卡簡單，
庶當時以水路船載為主， 坐船到大稻埕，大約路到北投，
平平一時辰著到矣，雖然大稻埕10 kilo，北投5 kilo爾爾，
在1901年代，台北實際上有三位卡鬧熱，其他中間攏是水田
塭仔，這三位是艋舺大稻埕城內，枝仔有真贅朋友咧給逗唗尋
，事過十外冬，金蓮咁猶有活佇世間毋？調查結果生死如何，
呾稍歇喘ｅ，小弟飲一嘴茶才閣來幵冓。
54
渡船枝仔有一回船到大稻埕時，拜託當地一位結拜，名號
作大呆永仔，聯絡地方上喚吓din動ｅ角頭giosiau43，佇中北街
(今迪化街與民生西路交叉)這箍圍仔，連遍查訪，綿爛去唗尋，
看有倘真緊著得消息否？毋閣尋十外工攏無繫消息，有影叨臹
醜材ahe。
中北街才一條仔爾爾，哪吓尋無？無定著是其他街路是毋
？規ｅ大稻埕赫大遍，呾無名無姓，欲問鋤頭柄呢？枝仔司想
規暝叨想袂曉，咁講吓過去艋舺彼角勢嘛無的確li，若安呢代
誌著歹紡落，庶當時艋舺二萬伍仟外人，大稻埕總共也灌灌
ｅ 嘛才一萬卡歛爾，這聲茫茫仁海，欲佗位海底摸針咁毋是？
無想無驚，想落著頭大面肆方，是bin4邊siaksiak55叫li
，潦落這堀，是欲按怎收山攬尾？咱枝仔咧做代誌有扮好勢，
毋倘舞甲建丟，失喟安呢著無甡張，佇 1901 ｅ年代，有新式
ｅ機器船咧唗滬尾(淡水)到艋甲尾這角勢，燒碳ｅ，渡船枝仔
ｅ細台拋魚渡船，利用流水ｅ起落(潮汐上下)，人客差不多上
遠到大橋頭爾，這嗎費氣叨費氣，到底金蓮離開中北街了後，
到佗位？生死之謎按怎？是啥乜理由，無欲返來尋家己ｅ囝兒
，这違反著親情嗣大ｅ母愛咁毋是？有影褙內臆旦，愈想愈
離經花閣閣。
佇茲咱噯話題稍撥開le，先講艋舺佮大稻埕ｅ背景出入
，才有法度倘(tang)推測金蓮ｅ去處。佇清朝中站時，福建ｅ
移民佮廣東ｅ客人，陸陸續續利用河港船隻擴散運搬，先來
兮先占食肉ｅ，中間來ｅ占偏僻山田仔散地，上au4尾來ｅ卡
歹運，去做山爾爾，開發三代了後，拍算1850～1860期間，
仁口飽合，逐傢人kue4人，食穿漸漸無夠，社會漸漸有羅漢
腳這階層ｅ游民出現，這个時瞬逐傢為了生存，親族中間發
生肖拍肖摋「械鬥」，鋤頭岸刀亂拍亂put5，1850左右，先
有客人佮福佬拚一擺，客人敗唗中壢彼角勢，落尾泉州佮漳州
拚，拚甲淒慘落魄，漳州敗去板橋佮土城大溪，落尾泉洲人家
己拚家己，晉江惠安南安ｅ三邑人聯合，佇艋舺打倒同安佮安
溪人，同安人敗退，姑不而衷抱著城隍爺，到大稻埕拍基礎。
清朝官廳是下消甲毋敢管，干礁吓曉貪污食錢 tun3布袋爾。
同安人敗退大稻埕後，有影城隍爺聖甲吓食糕仔，致蔭著茲囝
孫，大稻埕遂顛倒比艋舺卡鬧熱卡有錢，有影山崩見太平li，
原因４，第１，艋瘟疫著”死甲無燒香點火”，同安敗退是明
ｅ，毋閣暗中避開瘟疫顛倒好空。第２，港路窒沙，大船歹入
，外位來ｅ船隻，佇大稻起落卡利便。第３，英商洋行，干礁
欲設佇大稻埕爾，艋舺失去機吓倘拚，致su著台灣茶梓腦等
大色貨，攏逶大稻出入。第４，官廳劉銘傳ｅ鐵枝路1887決
定，行大橋頭，大稻埕這爿占著水頭(壟斷地利方便)。
毋閣講是安呢講，艋舺是亦興百外冬矣，人口贅自然著文
化幼秀工夫卡讚，佮大稻埕，二爿陳皮蘇黨宛那臹有bii，所以
講問題咧返捯(籌劃)，費氣著費氣佇茲艋舺宛那有真優越ｅ條
件，來吸引外口的人士，人群佳繹e所在，叨好彭好討趁li，
人講”油湯賺油湯食無趁做乞者”，假使金蓮若佇這款勢面
之下，給”抴”(誘)來討趁，這聲艋舺有二萬外人，我看猴免
弄矣，欲尋八擺e呢！
日本人管台灣地了後，局面矯返來，人講好歹利運，三年
照輪，日本改鐵枝路，將大橋頭這爿，改返來艋舺頭，行板橋
樹林著矣。這聲艋甲閣搶返來地頭利，水路不黨抑無陸路彭返
來落，另一方面日本人，佇現主時華西街貴陽街這箍圍，建立
大型ｅ聲色蹉跎間酒樓，頻若暗頭仔，青紅燈下迷倒咱茲漂碧
ｅ阿狗兄，鬧熱滾滾。
講來說去，大稻埕佮艋甲攏有尹ｅ特殊，二位伍路人贅，
頂到大官虎大生理人，下到甡銑(繡)面仔，羅漢腳仔，叨三色
人講五色話，環境複雜叨袂比eli，有ｅ人大仙到滾龍，無人敢
搧伊ｅ腹肚邊，有人溫順客氣斯斯文文，有ｅ來逶他鄉外里，
下港一四界，有ｅ軟腳婦人咧仜分錢，真正可憐，有ｅ臭腳鼻
粘苔膏爛羅，看著汝叨倒退嚕，有ｅ揚papa，有ｅ破格，有ｅ
大尾矣，有ｅ悽慘餾餾，龍山寺面出出入入，認真給看，人
，逐位攏人，一四界無客欠，若準欲唗尋外位來ｅ金蓮，無名
無姓，是欲問鋤頭柄le？叨無人捌li。
渡船枝仔叨棉爛尋棉爛傱，ga發心欲造功德以上，的確
亦有貳步七仔才袂漏喟漏dak5，日子一工一工過去，註死毋
死臹拄好，枝仔ｅ結拜尹大兄，佇中北街做總舖(廚師)，知影
金蓮ｅ落場，这下腳親腹ｅ(下面親近者)，一嘴傳一舌，落尾
也渡船枝仔知影金蓮，猶活佇世間咧做苦工，毋閣dai4身命
置ｅ(在)，全身軀百百病，卡歛五十ｅ人，袂輸六七十仝款，
心苦病疼做狗爬，身體lam4甲袂吹燈hip火，有影臹了然。
大稻埕這爿無欲倩(雇)伊，姑不而衷自那搬去艋甲，佇仁
生最後ｅ口氣生命當中，勉強依持落難，這嗎總舖司師干礁知
影去艋舺，其他詳細攏毋知，这亦莫怪，日頭赤炎炎，隨人顧
生命，隨人攏有家己ｅ客門，無法度管顧到赫僬，金蓮這時ｅ
性命，著欲死動haai3，偆一絲仔喟絲爾，vok le vok le，隨時de
吓親象風中腊燭仝款熄去li。
無外久ｅ中間，萬裕仔亦知影，老母猶活佇世間卡大面
，心肝內真正歡喜，毋閣想著母仔悽慘落魄，喉脘著閣滇起
來落，算起來人ｅ親情，是分袂開叨著，這聲虎逼著矣，江
潦落矣，殘殘脆脆互伊好勢矣，萬裕仔給渡船枝仔拜謝了後，
著決定單超一个人，婁孤帆兮，來到艋舺五色人ｅ社會，一
間一間去唗尋生母，心肝內掠好好，早一分見著早一分歡喜，
早一分倘嚎一下卡有ｅ，才知世間親情上偉大，袂輸咱這嗎
老芋返唐山探親，四十年無見面仝款！
萬裕仔佇五月尾坐機器船仔，“滬尾到艋舺”ｅ船班，伊
佇關渡起船，拍算點外鐘ｅ路途著吓到艋舺ｅ款，萬裕仔一方
面看著江路水景，一方面暗中臹煩惱，想甲頭殼叨欲biak5去，
這聲到艋舺後，欲按怎去尋人？仁海茫茫頭嘴贅贅，海底摸針，
咁尋有路來是毋？萬不二踮艋舺地，若壹直尋無，簡那金龜遨
(旋)無卡擢時，所費若幵完，夆掠去吊猴，欲怎樣著好？
毋拄好老母尋無，泛勢家己遂先夆qetlau14捙畚斗，奚著
無聲無示，害liuliu啊，裕仔愈想愈驚，拳頭母捏甲欲出汗，
這聲絕對噯填到底潦到底，人肉鹹鹹無啥乜倘驚兮，拚落拚落，
已經無退路倘避矣，天公伯仔三界公佮茲萬善堂地基主，汝著
好心來助阮这歹命囝呢，無論如何，這聲婁孤帆出來，後面關
渡這角勢，有臹贅兄弟咧關心，渡船枝仔ｅ恩情宛那參佇內底，
種種……，萬裕仔真正激動，無意中”凊頭汗”拚甲規身軀，
想落亦真可憐li。
55
船到艋舺，萬裕仔綰著行李逶甲板行落來，一个捸一个，
剃頭照輪扮，臹有特序，萬裕仔佇碼頭邊，飲一碗魚丸湯
這聲噯卡有元氣ｅ，這嗎先來龍山寺收集資料，三工後幵
始唗尋，暗時睏佇廟內，叨食清睏經(宮)人精英li，續落
著是裕仔按怎逶五路人ｅ講話當中，研究出尋老母ｅ步數
，這个廟邊ｅ敖(賢)人臹贅，相信有寡活神仙，吓給逗腳
手才著。
隔返工萬裕仔佇廟邊，提出三十鍼錢ｅ厚禮，去請教
相命仙兮，請伊來解破艋舺這个地頭ｅ社會複雜環境，順
續看有倘指點，唗尋老母ｅ辦法否，算起來人奚相命仙，
宛那江湖潦臹久矣，“吓曉洗面，免外贅水”稍寡代誌爾，
叨簡單拍闌珊ｅ，仙兮給裕仔解說一睏仔久，萬裕仔耳空
ya4銳銳斟酌給聽，心肝內臹給尊循佩服li。
仙兮才咧講「咱福佬人ｅ社會，五路人抾肖倚ｅ時瞬，拍
算攏是以大廟為根柢，大廟，煙花界，憩陶人這三股合做一
cok5，艱苦人鱸鰻人佮廟公善信永遠gap一下，無論艋舺仝款
，大稻埕仝款，滬尾宛那肖像，大廟ｅ後壁，定著細條巷仔彎
曲iap僻，噴噴仔暗間栽佇內底，大廟ｅ後厝邊，蹛著潦落江
湖ｅ憩陶人，收保護費做保鏢，叨瘦牛肖磅身，平平散人來壓
迫閣卡散ｅ人，人咧講砂母粒挾攏吓出油。
廟邊吓使講是一陣本性善良，毋閣散赤姑不而衷互相拚命
，叨虎逼著矣，卡無喟力ｅ，衰韶兮，著夆壓落死死敗敗去，
為著生活無法度li，我無摋汝，仈人吓摋我叨著，茲散人，散
甲鬼欲掠去，散甲割喉著無血，散甲痟狗吓掠沙，乏甲無聲無
示到底也，鏘採著夯狂，下凶殘殘脆脆給kat 5。
世間散赤ｅ悲哀，我是看甲臹過頭矣，少年人汝所問ｅ，
尋老母ｅ代誌，拍算佇各大廟附近，做雜工抑是掃土腳稍探聽
le，可能有法度查著。這个流擺毋倘閣拍納涼矣，一分一秒噯
趕緊，艋舺這角勢ｅ幫派暗間仔，拍算有三位ｅ款，一位是龍
山寺這爿，行逶江邊ｅ踢肚仔這幫派，一位是祖師廟後壁ｅ竹
篙厝宛那有一派，上尾溜著是港墘這角勢ｅ料館媽祖，廟後仝
款有暗間仔佮憩陶仔，這三位廟寺ｅ附近仔，去給行踏行踏訪
問訪問，總是人ga親身行腳到，看問吓出一絲鼻目嘴仔否？
咱人艱苦頭快活尾，枝草點露li，隨人頭頂一遍昊，毋
倘衰尾蕩志無元氣，幸幸返冷冷，欲去是紅膏赤zi，返來是鼻
粘瀾滴，噯嘴齒根咬拫，結局一定吓大葩尾，親人相吓天倫之
樂。」相命先生講到茲，萬裕仔心肝中真正謳咾，到到人奚江
湖路，叨行有到遐li，學問東西各方面攏僬，稍寡點一下，著
卡好汝行十外工，實在有影li。
萬裕仔順續閣問「呾歹勢，小弟請教le，市草地頭花花世
界三色人贅，萬不利若毋是佇廟邊，抑欲按怎著好，毋倘到時
一路潦落，愈潦愈深，宛那吓忝呢，人講路頭擔燈心，路尾擔
鐵硾li，若結局無望，才來田螺痛尾，安呢著醜材矣 he，若萬
不利安呢甡，請仙兮指示明燈福路？」
「哎！身世坎苛，實在互人真正怨歎，佐汝免驚，我吓用
心計較去想測，提出寡意見逐傢來參詳，總是我算命仙兮，歲
頭亦有矣，跳踏种种方面三不便，吓替汝打達，袂替汝出力，
才希望汝卡搰力行咧，路頭路尾，加減吓拄著貴仁來zak助，人
有一个緣佮運字，噯卡保借家己咧。
這嗎若準講若佇各大廟邊，攏探聽無消息，彼時汝才去頂
新街，彼箍圍ｅ酒樓藝妲間行行問問ｅ，看有咧仜逗做空課抑
無？彼角勢有三四間大酒樓，真正高尚，專門做有錢人王公貴
仁ｅ生理，尤其是平樂遊大酒樓，真正出名而且出入佳繹，頭
嘴臹贅，稍探聽ｅ袂顛誕，若閣尋無才來見我，我才想其他ｅ
路線，總是艋舺地人口二萬外，人贅是贅，毋閣地頭若問有對
路，宛那袂歹尋啦！
另外一个空縫，噯卡張弛ｅ，現主時艋舺卡高級ｅ娛樂場
，有分日本藝妲佮台灣藝妲二款，叨毋倘行顛誕去haa，佇阿
本ｅ地盤時，毋倘賴賴脞，到時林投葉拭腳倉，龜龜綏綏探頭
擦耳，夆掠去坐罪，奚著衰簡那梨ae，日本仔藝妲穿和服，
跳舞佮撞大鼓卡大面，台灣藝妲穿禮服，坐佇彈琴挨弦仔，
唸南管北管，格調無仝，總是來本地唗傱尋老母，真正有深情
仁性，是無論按怎著噯潦落，昊內無坎亦噯跁去，真偉大li，
萬項卡細膩卡敏醒ｅ，呾出外人噯卡精光ｅ，若有顛誕，才
佐汝吩咐免客氣！」萬裕仔受著相命仙ｅ一番金言，心肝內
閣感激亦閣驚惶，這嗎續落壹切叨靠家己矣。
彼暗睏佇寺內總舖，規暝睏袂落眠，咧拋車蹸著是啦，艋
舺茲複雜ｅ所在，欲按怎矯摵(處理)料理，哎，想著手骨叨軟，
孤鳥插人群，無一个心腹之交，前途是茫茫渺渺，日來受雨夜
來凍露，咱流浪ｅ阿狗兄，真正惜情真正忠直義氣，lak袋仔亢
亢ｅ，偆無外贅錢矣，想到茲，心肝一瞬ｅ絞滾，哎，天公伯
仔給咱疼惜， 人講乞者嘛有三年ｅ好運， 看有倘傍咱關渡
媽祖ｅ靈聖，zat助逗手之力？裕仔永遠有超生，映望八字噯順
，毋倘”人敖運命做對頭”著好。(敖唸qau2)。
萬俗仔過返工，遵照相命仙ｅ建議，有影逶艋舺ｅ幾間大
廟連遍給行，真正好嘴仜搬請，仜好禮探聽，先逶蕃薯仔市行
到祖師廟，佇後尾仔竹竿厝彼角勢，一四界探聽，叨無卡擢li，
逶ke3腳破相ｅ乞者頭仔，問到金絲娘仔金咚咚ｅ貴婦，有嘴
講到無瀾，逶早起到透中兮晝，壹直到暗頭仔，叨罔罔踅，袂
輸咧金龜遨(旋)le，行甲歹失搦德，千重萬斤是心頭亂紛紛，
疲勞厭lan4是雙腳na鐵腿咧，姑不而衷嘴齒根咬咧，暗時守
佇廟內，一个心肝激規蕾，著想袂曉li，仁海茫茫摸無路，咁
講著叫警察大仁，抑是角頭阿哥去蹤是毋？哎：無可能啦，咱
是啥乜腳擻, 家己四兩筅仔稍除ｅ(自己不才，應有自知之明)。
續落ｅ瞬呤，裕仔到青山王廟訪問，青山王算新廟li，模
範著城隍廟，卡尐人行踏，毋閣鬧熱流擺是仁山仁海，偰(kue)
甲吓出油li，這个時瞬亦註該去拄著貴仁，有影運氣咧夯(gia2)
叨互汝袂講ｅ叨著，萬裕仔佮賣金紙ｅ天賜仔幵冓，身世歹命
總跋白ｅ，天賜仔聽落真感心， 嗯才發心欲給逗三仝，天
賜仔是金紙ｅ割賣商(大盤)，一四界廟寺攏有咧行踏有咧交關
，對各所在廟邊ｅ羅漢腳仔，歹命人攏真了解，伊聽了萬裕仔
ｅ哭苦了後，才咧回想講，港墘彼角勢ｅ料館媽祖身邊，食菜
幼仔尹兜，簡那有一个老婆佮萬裕仔講ｅ老母真親象，伊款勸
萬裕仔去查看覓。
萬裕仔聽落到地，三腳趒兩腳跳，歡喜甲袂講了了，著隨時
的拚到料館媽祖，一下探聽才知影完全是真實ｅ，這聲萬裕仔尋
著母啊，萬裕仔夯狂啊，規个人茫去矣，萬裕仔頂喟沖起腦門眩
倒路邊，叨甚過了歡喜li，哎！實在有影！
56
萬裕仔眩倒佇料館媽祖ｅ大殿面前，眾人搪咧無閒莿莿，
綰冷水給潑互伊睜神，老母金蓮一身軀癩膏爛癆，哪吓恬恬無
注文著，逐傢感到奇卡叨想袂曉li，咚時也金蓮雙目已經青瞑
落，稍寡有法度看一絲仔洸爾，這生ｅ悲慘到茲來矣，有影盡
磅夠底矣，萬裕仔醒來了後大喚一聲「老母咁猶活佇世間是毋？
」隨後又閣倒落，拍算是甚忝(疲勞)甚歡喜去激著心房ｅ款。
身邊茲善士大德看落臹袂過心，鼻酸目燒做一下給伊傷悲
起來，其中有一个號作秀蘭ｅ婦仁人, 才咧怨歎「人有父母嗣大
，永永毀類袂乖，實在是有好毋捌寶，等到父母無置ｅ(在)，
幡仔夯就肩頭才知嚎，奚著甚慢矣，總是ga做人以上，叨百
行孝為先，今仔日母仔囝吓完滿逗陣，呾咱著給歡喜，有影臹
好腳手，卡停仔(等一吓)我才綰寡物件來給逗鬧熱ｅ」。
無外久ｅ中間，萬裕仔睜神落，目屑遴遴擱嚎袂出聲，
干礁激奚啞訄仔聲nia，也叨眾人面頭前歹勢li，不而顧著大
人大種矣，噯卡有甡張ｅ，嗯才有志氣，眾人逶萬裕仔金蓮，
扶入去料館媽祖ｅ大殿身邊，去te6勾椅稍休喘咧。經過無
半个時辰，拍算連燒二bak香ｅ款，秀蘭趕iaia43，捧一碗
豬腳麵線佮一个紅包，欲來給萬裕仔祝賀尹母囝重逢ｅ好時
，「呾這碗豬腳麵線，著趁燒給(ga5)食落去，吓補運去邪，後
日仔財源旺廣，母囝食甲百貳，另外一層，若無肖棄嫌，呾
這个紅lok仔稍袋咧，嗣大照顧總是食穿方面，噯僎互伊便，
若是饑荒錢銀三不便著醜材，呾免細膩啦，这稍袋咧。」
這時萬裕仔，叨也真正耳清目明矣，看著秀蘭即尼熱誠
，心肝內臹袂過心，嗯才雙腳跪落土腳dau，連聲喚喊謝勞
力，「在下萬裕仔，擔噹不起，這氏人恩情義理，諒情我無
法度報答，我萬裕仔叨歹命囝，映望逐傢來牽成，佳哉天公
痛戇人，互我這幾冬來，一四界過來亦尋，過去亦尋，吓凍
完滿團圓，叨真正歡喜甲袂講了了著是啦，我裕仔，自來著
做人戇直，清水煮白米，絕對無提人一鍼五遴，呾意到矣著
好，咱这毋臹人羅漢腳仔，牽馬穿好衫，無妥當啦，亦是食
菜脯，喫蕃薯卡心安，仁生欲時、運、命三字全， 是袂強
求ｅ，有影無簡單，這位大嫂互汝安呢車盤，我大人大種好
腳好手，臹感歹勢，絕對毋敢收受」。
萬裕仔講煞，連叩三頭，身邊茲閒人看落軟心，心肝頭
做一下he2落去，哎！人ｅ運命即薄，依原錢銀噯端正，搪
咧望昊等時機，社會返捯永遠抱著好情義，少年仔氣魄，袂
為著小小ｅ風霜來失意，叨無地看li。
呾ｅ瞬，昊色漸漸暗落，暗頭仔夜色罩落來，街頭深巷
中間人群壹直散去，偆咱萬裕仔佮老母，佇料館媽祖ｅ正手
房，暫時來歇暝， 廟公真正好禮來給按內， 老母坐佇竹
椅仔，心肝內感慨無量，亦歡喜亦悲哀，真正是珠屑點點
滴，苦苦gam3目墘，這世人艱苦坐卦，苦海生活袂見著光
，咱著軟腳蝦仔li，無材調叨著，害囝兒艱苦四散，心茫茫
意茫茫壹切全運命。
這个時萬裕仔才咧安慰「裕仔來身邊矣，免驚，呾叨心頭
攽互伊清，毋倘心糟糟腳手冷，老母今仔日吓潦落這堀，來衰
尾蕩志做乞者婆，定著有姑不而衷緣故，囝兒知影老母驚也重
病去過著我，為著保種保囝，無法度到地也，送互仈人來飼，
佳哉活到今仔日，亦是天公保庇，咱有倘閣再見面，呾著愛歡
喜才對，卡早ｅ代誌叨攽入江洋大海，免閣(別再)講起。
過一半工仔我才掣汝返去關渡地，關渡廟彼爿我有熟悉，
有卡妥當，毋倘蹛這所在，給人討cin4飯食，互人目睭凝虎
虎，做乞丐婆無意思啦！」咱萬裕仔做人真正客氣ｅ情理人，
叨食甲大箍大be，互人講一句奚叨臹歹勢，致su著壹直款
勸老母離開艋舺，卡袂加添廟方，食糧蹛暝來費氣，這暝二
人壹直睏袂去，想著亦艱苦味是，哎！時間過了臹緊，燃眉
老落，人講食老袂哺塗豆矣，稱硾拖尾是一工一工咧落坑也
落尾也老母金蓮著講一寡，關於咱萬裕仔ｅ身世東西，
萬裕仔是聽甲目屑流目屑滴，規个心肝強欲洋去。「阿母細
漢著艱苦人出身兮，血跡地佇牛磨仔車彼角勢(現大龍峒)，
食遐ｅ水米大漢叨真正擻唸li，出他無一箇月，夆抱來八芝
蘭(士林)做simbua(童養媳)。
十七歲時佮賜仔，大漢拺做堆，翻返年賜仔肺病死去
，彼時才咧嗽袂離，日時嗽無夠，天光嗽來逗，亦不時吐
紅血li，拍算前世相欠債ｅ款，這層尪嫫代無甡甲一隻蟑
螂蚊仔，顛倒連我嘛染著一身重病，有影想落著運命，查
某囡仔，油麻菜籽命叨無法度，這个時瞬我ｅ嗣大人亦先
後過身去矣，為著生活，為著食穿，姑不而衷閣接腳互大
稻埕ｅ阿松仔做細姨，暫時有一碗糜仔倘食。
這个阿松仔鱸鰻人膻，夯硾夯磅性地土公歹，我臹歹命，
不時嘛互伊拍甲大空細摛無外久ｅ中間才甡汝，號名做萬裕仔
，我心肝真正歡喜，這世人看有倘平安否！毋閣這時時機臹醜
，舊厝咧做simbua ｅ，厝邊頭尾攏為著肺病(結核)總死了了，
我心內亦有覺悟，這條命按算活袂久ｅ款，算講活吓久來講，
老來嘛是無錢倘生活，我逐工咧嗽，臹艱苦，有時半暝睏袂去
，噯半坐ｅ靠佇椅拐，才喘吓離，實在叨無藥li，若照這个扮
劫落去，恐驚也連幼囝(萬裕仔)這條命亦吓賣去矣，過三年松
仔亦過身去。
壹直到汝十歲ｅ時瞬，才姑不而衷送互(士林)阿匏仔去飼
，來傳種保種，呾叨已經弄家散ze，無法度生活，才利用關係
去大稻埕菜館做雜叉仔，加減給人做空課，換一碗蕃薯粥食著
臹歡喜矣，這條命算講抾返來ｅ，加活一工著加趁一工，毋知
置時欲死嘛 毋知。
過三年了後去尋阿匏仔，阿匏仔顛倒遂早死去，害我囝兒
遂散去，過無幾年目睭漸漸無看ｅ，有見洸無看影，這時我無
度倘閣去唗尋汝矣，家己咧揹黃金甕欲na給人看風水，算起
來我ｅ性命宛那真韌咧，毋閣阿母這嗎目睭無看矣，有聲無
影宛那怨歎啦！
萬裕仔聽甲真感心，呾壹切攏過去矣，免閣想落，愈想
是愈激心叨有影li，咱人插花噯插頭前，命底欠水噯補充，
想看欲按怎逶老母掣返關渡卡要緊，閣卡無嘛吓佇萬善同li
，家己人卡吓信ｅ，萬裕仔規粒頭殼茫茫旋，千頭萬條離
gaga，卡想嘛做囡仔ｅ代誌，腦海中ｅ唗馬燈是踅袂煞，
心肝內是歡喜閣傷悲li
第貳工，昊洸矣，艋舺街仔宛那真鬧熬，人群佳繹，市
草旺盛，喚玲瓏賣雜細，賣魚丸賣麵兮，笪仔來來去去矣，
萬裕仔偝(aai3)著老母，食著一碗肉羹，精神爽元氣讚，續
落ｅ瞬呤，逶艋舺碼頭行去，按算坐下晡ｅ火船落關渡廟li。
第十一章 獅仔頭 , 港深水烏人亦烏
57
新店溪佮基隆河佇關渡廟前，交合成關渡港(水域)，才閣
變淡水河，流出海，這噹中有一个號做「關渡門」上介阨(窄)
叨著，俗語講「好柴袂流過關渡kia5」(有好的貨色早就被捷
足先登了)，這个峽口，一爿是關渡媽祖ｅ渡船頭，一爿是獅
仔頭崁，佇獅仔頭崁這爿，因為天公崎(懸壁)ｅ關係，崁石直
破水內，變做深潭，江水變做深烏青冷，水波一箍一箍咧運轉，
看落臹恐怖。
潭墘做一个簡單ｅ碼頭，也叨致蔭著水深ｅ關係，嗯才吓
凍停足大隻ｅ海船仔，攏停佇这臨時碼頭，逶對面關渡廟這粒
山崙給(ga5)看過來，宛那不止也有扮叨著。佇這个所在，有發
生過奇奇卡卡ｅ代誌。
1912年咱人二月，海風逶滬尾港(淡水)gng3入來，悺舺
著毋臹身命，腳手仔肉pipi33搐，老歲仔人無火窗叨袂煞li，
致su著港路卡尐人咧來去，渡船枝仔規陣人，勼(縮)佇房內
咧烚燒茶幵冓，生理叨無三無二，吓凍著歇，橫直歲亦袂輸人
矣，世間紛亂煩惱，管伊嘴鬚去留佗一爿啊，萬項燒茶先sip
上起磅，哎！這个昊著燒酒昊li，卡停仔(等一吓)茶飲了換紅
酒，仁生罕咧幾時，免赫儉la，這个時厝內除渡枝仔以外，
猶有貓古添仔，大麵發仔等等，逐傢na講na sip5，話題咧
返捯真逗搭。
拄好幵冓舺搪siakpa15(過隱)ｅ時瞬，烏肉生仔洶洶狂狂
拚入來。「枝仔伯啊，代誌歹紡矣……，港ｅ咧梟悻(不幸)矣
，頭拄者有人看著鯊魚(水流屍，關渡鄉話)，佇浮線兮彼角勢
浮le沈le，看起來簡那咱關渡人ｅ款，拍算夆害死枉屈ｅ扮勢，
目睭金金人傷重，daa2(剛)斷喟ｅ 呤，佮逶艋舺流落來無仝
(同)，這聲昊大地大，無料理鏘採(自然是)袂煞ｅ，嗯才趕
緊搬請嗣大來打揲……」「有安呢甡是毋，ga有冤屈以上，
平平在地兮，我枝仔絕對潦落去，我稍僎(準備)咧，燃眉我
著婁腳擻，到渡船頭行一迣…」。
咱話頭分二爿(bing2)，拋魚船佇獅仔頭掠黃魚ｅ時瞬，
遠遠看著簡那柴箍ｅ物件，浮le沈le 給攽外外無注意，
尾也船隻駛偎浮線ｅ時，忽然間一片金光，這聲去煞著靈聖，
一下斟酌看，咚時也著是daa2死無外久ｅ”鯊魚”(水流屍)
呤，目睭金金毋願kue5，人給 看起來斯斯文文，少年傢爾，
有一點仔面熟，簡那有佇關渡媽祖出入拜拜ｅ款勢，無定
著廟公問問ｅ，著知冤屈le！
这時茲掠魚伯仔愈想愈驚， 嗯才決定先給送返廟兮，
互逐傢來確認身份，才閣打算，若是關渡人來講，絕對水清
魚現問吓落來，若有隱情”鼓佇內聲佇外”，加減有寡風聲
le，無論怎樣講，这佮艋舺尾錫口新莊，普通時流落ｅ”鯊
魚”，爛爛臭臭面肉全非ｅ屍體完全無仝款。
佇五六个阿伯仔逗三仝，魯氣著力，扛來到廟埕，用草
蓆坎稠le，茲卡好目色ｅ，廟公，相命仙攏圍來看身份，廟
公看看ｅ，才咧喃(nau 5)一下，無頭無尾話頭閣勼入去「簡
那是下田寮菜瓜明仔ｅ款……驚也毋是呢！…耶麼叫尹遐換
貼仔來影一下…」也叨毋敢確定咧，講起來宛那姑不而衷，
人浸水面肉吓膨風，加減吓變形，有ｅ老尪婆睏破二領蓆，
叨心肝掠袂著，不時ham3家己人嘛認袂出來。
搪等逐傢咧阿伯阿姆ci拇ci插ｅ時瞬，忽然間後面有
人大聲咧咻茲茲 (zia) 無毋著，是菜瓜明仔，初二、十六
迭迭嘛來廟兮咧行踏，想落嘛奇啊，七少年八少年著互人
害死，哎！實在有影！…」逐傢夯頭(舉頭)給看，咚時也渡
船枝仔來le，枝伯仔看人無數頻若目尾sut著，擻个仔捌(識
)舺有偆去，袂輸管區兮有影，這个時渡船枝仔，才咧回想菜
瓜明仔ｅ為人种种，咱明仔，下田寮人，種菜瓜金瓜，厝內
有做三四分塭田，做人捙拚忠厚，毋閣錢路兮有看卡重，这
宛那伊ｅ欠點，朋友給弓詈”竭仔哥”，伊亦恬恬無工礙。
叨想袂曉li，這个人na吓佮人冤家讓債？咁吓為著挽人
客，生理佮人肖犮(pua4)，抑是錢財現白，去互強徒劫去，明
仔反抗，致su土匪見羞起ausiau13面，這聲殘殘脆脆互汝好
勢，來殺人滅口？哎！叨臹拍隕li，伊真壯才清標ｅ少年家仔
，這嗎佇現場ｅ茲閒人，看著渡船枝仔到地呤，算動攏讓開，
互伊來發落，枝伯仔喚水吓堅凍，佇關渡廟徛起，逐傢攏扶伊
做嗣大，足給尊循ｅ，咱枝伯仔亦真慷，對茲氏細臹給照顧，
迭迭嘛li講”朋友噯互相”叨著。
枝伯仔ga有做咱廟ｅ嗣大來講，這聲菜瓜明仔ｅ代誌，
絕對查互伊清楚，掠出凶手，替伊申冤，庶當時仔，日本人
才daa2來呤，刑警真尐，壹切干礁倚咱茲阿同兮鄉親，逐傢
來查起，這聲大麵發仔，貓古添仔規陣人，憑大兮一句話，
無論刀山火窟，無潦是袂煞咧，逐傢憑氣魄組兮！
佇茲順續給(ga5)提起”關渡鯊魚”ｅ代誌，關渡門因為
地理ｅ關係，新店溪、基隆汀、關渡塭港三條港路交合後，
流過關渡門，合稱淡水河入大海，這三條港路ｅ自殺ｅ人抑
是淹死ｅ人，水流屍流到廟前三港合流所在時，因為溪水向
下腳ｅ衝力，佮海水潮汐倒返(逆上)ｅ力量肖抵抗，變做捲
交螺仔，佇原地踅玲瓏，噯等二三工(天)了後才吓出海。
這二三工中間，叨死人箍浮le沈le，簡那鯊魚le，所以
關渡暢仔攏號作”鯊魚”，拍算大部分攏面爛肉臭，真歹料
理，這擺菜瓜明仔面肉卡好，一聲著知影是附近現過身兮，
佮源頭吊遠日深月久，流落來ｅ完全無仝(gang)，咱茲關渡人
有咧所說，對面蛇仔形佮成仔寮亡仔埔吓赫贅，除了風水好
以外，關渡ｅ”鯊魚”甚踥，一工到暗咧浮袂唗，簡那欲託
付佇這位ｅ意思，地方幫助茲無主孤魂，宛那積功積德，嗯
才愈來愈贅，經過幾百冬來，莫怪亡地吓赫興，陰氣吓赫重li。
呾這嗎欲按怎去解破這層命案？人講無名無姓，欲問鋤
頭柄，名姓ga查出來以上，這聲有頭有尾好剃頭li，到底菜
瓜明仔，是家己無張弛跋水du6死，抑是去夆害死？照下田
寮厝內厝外佮交陪ｅ朋友，換貼仔來看，真歹講li，这時貓
古添仔，坐佇廟前大榕下，想舺規頭殼ponpon33英，毋知
按怎才好。
半月日了後，出山彼工，貓古添仔陪儀隊，坐船到蛇仔
形墓區，這个中間順續給研究，这關渡門港路肖pua4肖纏ｅ
學問，一下看了後，才知影真正無簡單，欲分析看是逶和尚
州這頭，抑是獅仔頭這頭，抑是關渡媽這頭，抑是浮線ｅ這
頭，抑是烏擋門仔這頭來，跋落水du6死，宛那真噯研究閣
研究，水路ｅ代誌，有影真正吓考倒司傅li，因為這五位ｅ
水，深淺攏無仝款，無貳步七仔，宛那是分袂清楚，到底菜
瓜明仔是按怎夆害，詳細咱才看下回ｅ，貓古添仔明查暗追
ｅ結果，故事真正食佳li。
58
為著菜瓜明仔ｅ代誌，渡船枝仔決意潦到底，發心欲逶鋩
角給矯返來，互茲社會正義吓凍起示，嗯才咱路頭路尾萬善同
吓定著，社會平安頭一zan2，渡船枝仔普通時仔朋友贅，結拜
換貼兼死忠兮，塞倒車路，佇關渡地有影真正喚吓din動，茲
兄弟一下聽兮講，枝大仔欲調查枉冤，規陣ci3倚來，攏欲潦
落捙拚無怨歎，這中間貓古添仔上介拍拚， 毋但是有勇敢爾
，而且兼有一把仔奸臣頭殼，計域真正幼秀盡磅，枝伯仔臹歡
喜，「呾這二箍銀稍袋le，萬項卡敏醒ｅ，卡柳掠ｅ，張弛袂
蝕本叨著」枝伯仔好意到地也，貓古添仔謝勞力，自那擔起這
个重責大任，臨時做起調查局ｅ局員仝款，伊是管區兮，亦是
軍師，亦是財主，亦是打手，亦是救星……，人講摋狗ｅ兼拜
佛，做文腊武ｅ千面人。
貓古添仔心情沈重，這聲決啶噯成功，袂使顛誕咧，才袂
失頭傢ｅ禮li。貓古添仔看起來粗人ｅ腳擻，毋閣心肝真正幼
綿，為著欲解破這个凶案，伊一个坐佇關渡港邊仔ｅ蓮霧樹腳
，咧激頭腦想，想舺心肝著欲溶去。
欲按怎查才好？逶佗位查才對？大杯(舵)毋倘(不要)siang4
歪去，抑無起頭霧霧也，日後差甲七里昊外，著材歪矣，空課
路若顛誕去，叨吓路頭擔燈心路尾壓鐵硾，我貓古添仔，羅漢
腳仔罔羅漢腳仔，先天卡散是姑不而衷，毋閣做人宛那有甡張
，有材調來展寶互逐傢看一下，吓曉洗面免外贅水，凡事噯求
要令，起腳落手腳步噯踏互伊在，噯一步一腳印，老老實實，
毋倘想奚空殼ｅ，到時水清魚著現，代誌永遠毋出破。
貓古添仔佇港邊，看著對面ｅ觀音山，實在景色臹嫷，目
前水湧一波一波咧行，有影詩情畫景，醉舺吓茫去，無外久一
陣水鳥，逶港邊翍過，拍算是欲浮線仔湳仔地討食ｅ款(飛到社
仔島末端，關渡公園沼澤地)貓古添仔想落規工，想舺規粒頭殼
ponpon33英，心肝內有稍寡掠著摠(心中有譜了！)。
這條案ga是佇咱關渡地發生來講，宛那著逶地頭先來研
究卡緊，菜瓜明仔ga不時有佇初一十五，有到咱廟內行踏來
講，鏘採(自然)有淡薄仔影跡倘掠，人講鳥飛毛落魚行水濁，
朋友中門na牽na問，應該掠有路螺痕才著，嗯才這聲心堅
意切，心肝頭掠在了後，續落按怎欲逶關渡廟ｅ仁員佮來去
ｅ香客，明查暗訪，才閣做一个仔按算咧。
貓古添仔想到茲，有影真正爽勢，人講嘴笑目笑心涼脾透
開，这時瞬日頭漸漸落西矣lo，黃昏ｅ景色照著昊邊ｅ雲彩，
萬丈金光跳浮港面，對面觀音山影倒照水底，种种景緻互人
看落到地，吓醉吓茫，吓唱歌納曲，叨真正起磅li，謳咾甲
叫毋去…汝咁知！
搪咧神神看甲欲戇去ｅ時，忽然間附近大人大咻聲，
續落真贅鴨母印聲「ga2—ga2—ga2」，咚時也著是鴨母陣欲
食飯矣，頭傢咻喚舺鴨陣ｅ回聲，有影真正趣味，無外久
，一隻一隻ｅ 拋魚船仔倒返來矣，頭尾肖棣肖接，宛那
真扮勢li。尾也咱貓古添仔返來廟內，暗時睏佇廟邊，三
將軍祠堂前ｅ販仔間，僎(準備)倘明仔載開始逶廟內調查
起，查咱菜瓜明仔枉屈冤情代誌，壹定噯矯互伊完滿，
才袂夆看無目地。
過返工 ，貓古添仔到關渡廟內，唗尋廟公漢堂伯仔，
拜託伊全力逗三仝，來玉助這層不幸，依持社會正義，添仔
普普也來分解破，風頭稍寡掠有摠，也叨人輕財薄全咧婁孤帆
兮，嗯才映望漢堂伯仔逗腳手，這个漢堂伯仔今年卡歛六十，
做人心適對社會熱心雜項喢 (cap 5 )，一下聽著貓古添仔，詳
細解破了後，这少年傢仔真正夆感心li，自那決定捅身潦落幫忙。
嗯才 ｅ瞬呤, 隨時de，交待總管鬍鬚順仔，佇後尾仔
空房拚一間互添仔蹛(住)，按算初壹鏘到十五舞一个卡有ｅ，
添仔主要大頭兮，是調查這二三月日內，茲下田寮地結拜兄
弟，對伊按怎？朋友交陪定著有規米籃ｅ長短，加減吓喃一
碎仔，鼓佇內，聲佇外，照道理講是有效才著！咱給看佇百
年前ｅ台灣社會結拜ｅ風氣真正浮頭li，伊ｅ目的毋是趁錢，
主要是互相照顧性命ｅ安全，庶當時佇低路ｅ滿洲族統治
，社會無治安，隨時吓夆搶夆摋，有寡結拜換貼ｅ，逐傢
中間照顧，卡袂夆偏(欺)安呢甡。
這嗎日本仔初來矣，社會宛那依持這个風俗，關渡地
因為水路活ｅ關係，船隻來去噯照流水潮汐起落，致su農
曆ｅ算法真正有路用，順續配合著初壹十五拜拜關係，嗯
才關渡暢仔，攏吓曉唸淡水河ｅ流水歌訣，是安呢甡「初
壹十五早滇晚滇中晝乾，初八廿三早乾晚乾中晝滇」，流水
欲滇，著是船隻逶滬尾向艋舺，倒baai4著是艋舺落來滬尾。
咱貓古添仔逐工無閒起無閒落，佇渡船頭出入ｅ人群，
ga關渡廟燒金ｅ香客噹中，一四界探聽，往來人客三色人
五色話，複雜歹紡，咱貓古添仔舞舺大粒汗細粒汗，真正
頂真，也叨歹命囝li，為著環境吞銅食鐵噯卡隱忍ｅ，人ga
有志氣以上，財命肖連，來捙拚，佇庄頭才徛吓稠地，絕
對毋倘親象有ｅ人，無三無二，乏搭下消無甡張，安呢著
醜材ahe。
呾這嗎添仔佇廟內，逐工拍拚來訪查，安呢日去暝來，
香客一陣來閣一陣去，關渡地叨無大li，看吓凍逶菜瓜明ｅ
朋友親戚噹中，喃淡薄仔音訊否？佇第五工ｅ時瞬，真正拄
趟，所以講人ｅ利運宛那真要緊，有時福氣若咧行，仙閃著
閃袂利，錢銀財寶綰舺汝叫毋敢著吓，互汝卯舺家己著料想
袂到。
過晝無外久，貓古添仔搪咧點香，欲拜二媽，忽然間
一个香客行過來，講欲見添仔，有話欲拜訪添仔「我小姓
林，逐傢攏叫我烏肉練仔，和尚州人(蘆洲人)，有人咧報
講菜瓜明仔夆害死，小弟聽落真著驚，想欲探寡長短，頭
拄乍坐渡船時，聽兮渡船枝伯仔，有提起茲兄弟，有潦落
調查ｅ代誌，嗯才來拜託汝，央汝掣我到伊ｅ墓前燒香咧，
待念卡早，宛那是朋友一場叨安呢哩，明仔這暫仔定定出入
獅仔頭，毋知咁吓互五股賊仔埔憩陶仔給害死否？……」。
貓古添仔一下聽著講「出入獅仔頭」呤，規身軀毛孔僬
cang3，一時間目睭展大蕊心肝pipo彈，这是一條真要緊ｅ
線索，挽瓜就滕沿路查落去，定著水清魚著現，想到茲真正
歡喜亦真緊張，血壓擎”到二百貳，這聲昊欲賜我好運，尹
娘le才咧查無空呤，註死毋死，閣有人自動來提供線頭，有
影牛鼻拄著賊手，一時間爽勢有扮，kimo臹qiang，這个時
瞬貓古添仔掣烏肉練仔，到後殿ｅ大廳，泡茶食冬瓜糖，逶
這回菜瓜明仔ｅ過往詳細，一點一du5，攏講互伊了解，順
續給說明欲調查枉曲，掠出凶手ｅ心，烏肉練仔聽落目箍僬
紅，真正感慨，為著朋友絕對潦到底……。
59
嗯才 ｅ瞬呤，過返工(天)貓古添仔佮烏肉仔，坐渡船過
來獅仔頭這爿，一方面陪墓，順續來勘獅仔頭港勢佮出入仁
員ｅ情形，添仔一下潦入獅仔頭港了後，才知影代誌歹紡，
獅仔頭港雖然是三十外丈ｅ柴枝搭起來，停二十隻船爾，毋
閣天公崎直切入水，港深水烏，吓凍停國際帆船，出入真正
複雜，三色人臹贅，有憩陶仔有好額ｅ、大看風水、有塗公
仔咧挽人客、有食店、有福州仔帆船、有日本人細台火船，
本地拋魚船日本警察乞者……，即尼複雜ｅ背景，仁員ｅ流
動性閣大，是欲按怎去了解？
看來真食力咧，毋閣食力罔食力，總是啊範圍有掠卡阨矣
，自然de挲卡有僬，嗯才自安呢了後，貓古添仔返關渡廟，
對獅仔頭佮成仔寮來ｅ香客，著特別給(ga5)張弛，拍算講這
內底，有法度倘探出消息內情，見事一層膜矣，噯扒互伊離
嗯才看吓清。
呾這嗎貓古添仔繼續佇關渡媽咧發落，關渡廟ｅ一點一
du5，空空縫縫，攏真了解，一禮拜ｅ噹中，感受著種種宗教
文化ｅ浸潤，順續去染著莊嚴古樸ｅ氣芬，真正感心li，貓古
添仔稍寡探著線路了後，毋敢歛勢(怠慢)，翻返頭叨給頭傢渡
船枝仔報告，按算二工了後，欲來對面獅仔頭，行踏行踏繼
續閣調查。
枝伯仔印「臹好，代誌ga有一个鼻目嘴仔以上，對苦主
ｅ英靈宛那吓交待ela，續落初壹到十五，看半月日內有法度
總現未？壹切互汝安呢車盤唗傱枵饑流汗，真正勞苦，若是
錢項抑是腳手卡欠時，佐汝講無顛誕，毋倘忠厚金嘴毋敢討
，安呢著害，到彼爿(彼爿)後，有代誌吓使尋阿洲，咱渡船
枝仔逐傢換貼仔，攏吓照顧叨著，嗒，這二箍銀稍袋le，壹
切交待汝去發落好勢。」添仔謝勞力，按算後日下晡，坐渡
船到獅仔頭，若有時間才順續給成仔寮、和尚洲，宛那仝齊
行行看看ｅ，加寡線頭，代誌看吓卡早爆 (biak5) 未？
貓古添仔按初二下晡，離開關渡渡船頭到獅仔頭，這嗎
偆初壹這工留踮廟內爾，添仔na想代誌na看鬧熱，順續亦
na看寡古跡文物東西，今仔日不而顧著初一li，香客來來去
去洘卒卒，求神問佛ｅ有影臹佳繹，外口ｅ陣頭大鑼柏鼓仔，
鼓吹是歕甲臹叉操，連賣李仔糖佮算命仙跋繳擔嘛加幾落位。
關渡卡早蹛(住)平埔仔，留落來一个大型ｅ石掙具(杵具)
，囥佇(放在)廟爿ｅ峒空內(山洞內)，真正趣味li，聽兮講手
給摸摸搔搔ｅ，吓起傢大好運，茲善男信女，逐傢剃頭照輪
扮，排長列咧摸，這噹中有一个福州仔，厝蹛佇大稻埕，頻
若初一十五攏坐船來燒香，摸這个掙具，摸甲有續li，近來
生理大發大pa尾，算講得財誠心，是謳咾舺欲觝舌，害邊
仔少年仔羨舺大嘴開haahaa32，為著添丁發財真正誠心，人
行我嘛行li。
另外一方面，佇廟邊山崙仔ｅ半崎山腰，有一个石頭做
ｅ噴水頭，拍算是開廟時康熙尾年ｅ古跡，宛那二百年ｅ款
勢，逐傢嘛是看閣看摸閣摸，二蕊目睭瞋舺欲肖犮去，講天
良兮，叨看無一个形咧，龍頭邊有一空石縫，逐傢香插甲一
字捌，強強欲擠袂落去，身邊香腳一大堆有影，汝看外興著好。
頂頭講ｅ二項古跡，現主時(1992)猶存在，佇廟後爿古
佛洞(通後山淡水河)ｅ入口，佮廣渡寺入口著知，眾(各)位
鄉親嗣大阿同兮，若有時間到阮關渡宮，來行行ｅ時，除了
燒香以外，上要緊著是去廟正手爿ｅ古佛洞，去摸平埔族
遺留ｅ大掙具(石器，絕對吓互汝值回票價三倍猶不止)。
台灣庄腳ｅ博物館尐，欲看平埔仔ｅ文物，叨親象貓
gen6水蛙毛臹罕de le。關渡廟內，媽祖有分大媽、二媽、
三媽，一个無夠來分三个，人奚阿篤仔食教ｅ，看著卡加
嘛倒彈，文化背景顛誕，著差佇茲爾，三仙媽祖ｅ當中，
以二媽上聖上靈感，聖舺吓食糕仔，逐傢肖爭請欲迓去伏祀。
關渡廟ｅ隔壁叫「三將軍」，伏祀鄭成功ｅ三个都將
，香火宛那興li，身邊ｅ石階仔，吓使跁起山頂，拍算二
百外階ｅ款，山頂著慈航寺，拜觀音佛祖，山頂古樹巨木
真贅，氣氛優雅，遐桂花樹佮含笑樹真大，比大人卡懸叨
著。大古樹拍算百外冬ｅ款，大榕、楠仔、連霧、麻竹…。
逶這个所在看對港彼爿(邊)，三條港路肖接，真正好看，
有時吓看著魚船返來，佮飼鴨母咧咻喚，貓古添仔對關渡廟
地頭真正熟悉，臹有感情li，呾今暗是上尾暝蹛廟內，明仔
載著欲獅仔頭港蹛(住)十五工，暗頭仔(傍晚)ｅ時瞬，貓古添
仔到山頂慈航寺，致蔭著漢堂仔ｅ紹介，今暝欲睏佇禪房兮，
來體驗一下佛門ｅ生活种种，呾修行人呤呤，定著噯儉苦勞動，
一身獻互佛祖叨著，咱有機會來參考佛法，宛那臹有緣li。
貓古添仔佮逐傢，師姑師姐仝食菜桌，無外久ｅ中間，
眾師姑咧做暗課，唸大悲懺，鼓鐘木魚，硞硞kiang，氣氛
真正嚴肅佛祖面前，香爐內一香煙，茫茫煙霧，真正芳li，
無外久經書唸煞，貓古添仔到外口敨一口喟le心肝內順續
想著，明仔載欲獅仔頭ｅ代誌，外口暗面山貓無一絲仔洸，
貓古添仔喘一个下仔大喟咧，微微仔桂花芳，真正舒爽幽雅，
自然的心涼脾透開。
添仔徛石頭堆頂，看逶關渡港面去，三二隻拋魚船仔，
點幾葩臭油kia2燈，耳空邊伊伊歪歪，一絲仔音色咧踅，
咚時也渡船頭有人咧挨”殼仔弦”(台式胡琴)，曲調本土味，
想起正事，菜瓜明仔這層枉屈，壹啶噯食飯趁燒，趕緊給捃
起來，抑若無者，時間一下遷久，加減吓懶絲手骨軟，槍籽
拍到遐著冷去矣，哪吓有效la……。
貓古添仔睏甲三更暝半，聽著寺內人聲吵雜，咚時也人
奚師姑師姐欲做早課，這个時瞬凡間猶睏甲真落眠，添仔叨
好士相li，趕緊起床來紅目有仔逗鬧熱咧，師姐手綰燈火行
來行去，隔壁廳頭小菩薩(小尼姑)搪咧給倒燒茶，添仔看落
拍一下尻冷損，透早暝深風冷霜凍，sip一嘴燒茶宛那仁生
大享受li，無外久中間，佛聲起，鐘鼓木魚，師姐師妹老漢
大大細細攏咧唸經，算講添仔這半氏人，猶毋捌見本這齣ｅ
，對佛法ｅ莊嚴ga哲學仁生東西(種種)，別有一番ｅ感想
安呢，若毋是今仔日有要事在身，伊著苦毋講宛那潦落法界，
來拜師父渡眾生li。
這嗎昊色漸漸洸矣，雞啼狗吠鴨母gaga嚎，行出寺外看
落港底，船隻亦有咧出入，外口空氣臹涼，千年大樹kimo
臹好，添仔吐一下仔大喟咧，袂輸青暝掠龍過，規身軀攏
僬爽勢，謳咾甲叫毋敢(慈航寺已在1964拆除遷至北投)。
……中晝ｅ時瞬，貓古添仔照約束，坐船來到獅仔頭，沿
路沿途壹直咧探頭探耳，察看三條港路ｅ流水款勢，到獅
仔頭了後，看有法度緊查出凶犯否！人講水清魚著現，著
噯映時運命三字全，媽祖婆噯逗保佑eo！
60
貓古仔到獅仔頭坎了後，著拚到阿洲開ｅ販仔間(旅社)
稍歇le，阿洲是咱渡船枝仔二十外年ｅ換貼好朋友，逐傢
仝穿一領褲大漢ｅ，一下聽著細兮貓古欲來，叨真正好禮
來給款待，貓古無惜家己，為著正義公理潦落捙拚，毋驚
得失人，少年傢仔叨臹吓取ｅ li。這間販仔間伍路人贅，
生理真佳繹，安呢出出入入真正鬧熱，阿洲佇踮兮咧招呼
人客，無閒起無閒落，一軀拆做五位叨無夠用安呢甡，貓
古添仔看落臹歡喜，親象這款所在，人贅定著消息亦贅，
尋線頭訪案情絕對壹筆漲ｅ li。
而且講咱添仔，自本著生做頭大面肆方，人漢草大，
聲頭na雷咧陳le，耐拍耐tun4好肉本，細漢出pia4，滿面
貓點吓凍嚇茲歹人，有影現主時來講，刑事局長叨做甲有
偆去，佇暗頭仔ｅ時瞬，阿洲厝內交待序細了後，招添仔
佇港墘飲燒酒，順續研判寡菜瓜明仔ｅ線路。
咱阿洲頭傢人，自細漢著佇外口餾，社會輕重真正了
解，一下聽著添仔ｅ解說，腦門稍閃咧，人講溜溜秋秋食
二蕊目睭，想閣想，點仔久仔心肝內著有按算「咱這角勢
有關係來講，拍算是佮阿片煙有治代ｅ款，耶麼汝才逶這
方面給查看覓，無的確有倘尋寡線路，咱人挽瓜就滕一路
挖落，加減亦倘nng4 寡空縫東西咧。
咱獅仔頭成子寮地，這几年來ｅ命案，攏佮阿片土有
治代占大頭，有影無咧做假ｅ，代誌到手頭，橫長直破免
三二輦半手著好勢溜溜，日本仔來管， 這嗎總督後滕新
平ｅ命令，阿片土噯收做專賣，噯領牌li，有特權者才吓
使販賣，致若講若有法度唗私來講，叨吓凍趁大錢咧，這
聲ga有倘卯一塊到，嗯才茲少年仔憩陶仔，逐傢三搢潦落
做这無錢生理。
拍算菜瓜明仔ｅ代誌，佮阿片煙有牽連ｅ款，…這嗎
咱噯幵寡銀錢，婁腳擻逶角勢箍圍仔，連遍唗尋，應該加
減田螺有痕，挲一絲仔摠否？這層代誌定著是歹紡硬斗，
人講缺嘴仔咬家蚤，燒爐添炭著力閣歹看，毋閣咱為著正
義道理，閣卡流汗流血嘛噯擔輸贏la……」。
過返工(隔天)呤，阿洲給一个氏細叫來進仔，陪貓古
添仔佇獅仔頭碼頭所在，連遍去調查，瞋看覓ｅ，這聲添
仔佮來進二人，暝日守著港墘，逐工朦朦霧霧，港昊連水，
……三工了後，好消息來矣，宛那菜瓜明仔ｅ命案自那解
破囉，凶手鐵國仔害ｅ，聲水清魚現，逐傢攏看有著，莫
怪貓古添仔是暢舺袂講ｅ，紅酒連肖續tui二矸，爽甲叫
毋敢li。
……咚時也代誌原本安呢，咱人二月初，菜瓜明仔逶
南洋，唗私一批鴨片煙土到獅仔頭，毋閣近來日本仔大仁
掠了臹拫(an2)，好趁是好趁，頻若摠著時ｅ罪真重，這个
代誌無拄好，去互成仔寮這角勢ｅ憩陶仔知影，想欲烏劫
烏，這聲若卯有過手，這氏人呾叨油sese14爽爽爽，這个
歹人名姓號作鐵國仔，人武滾聲喉大空臹有扮li，嗯才自
那想空想縫激頭腦壹直欲給設計，按算欲逶菜瓜明仔，彼
點鴨片給賺(zuan)食起來。
鐵國仔逐工(每天)佇碼頭行踏，暗中查勘菜瓜明仔ｅ跳
踢影跡，算講掠伊ｅ出入叨著，也叨人臹奸臣li，無外久ｅ
中間，菜瓜明仔ｅ空縫詳細，一點一du5，攏互鐵國仔掠甲
清楚逗搭，伊知影二十二彼暗，明仔有寡鴨片塗欲佇獅仔頭
港交關，賣互烏市了後，隨時的緊載逶劍潭下塔悠到錫口
(松山)，來出賣倘卯一塊仔，彼一暗，鐵國仔安排一个氏細
叫金壽仔穿日本衫，匿佇一爿(邊)等候暗號。
月亮照著港面有一絲仔洸，壹切僎(備)好勢了後，佇碼
頭邊仔咧等，等啥乜？欲等「大船入港」la，等菜瓜明仔來
「自投羅網」，(毋是正經有船欲來叨著。)搪月亮到港中心ｅ
時，這時菜瓜明仔出現lo，鐵國仔臹緊張li，心肝me3鼓樸
樸彩，有影正經大船入港矣，心肝內臹lin暢，二粒拳頭母
捏甲欲出油去，腹內咧想，絕對佇交關進前給ii wy ko lo so
sa 311115，煙塗才拚吓過手。
時間一秒一秒一宜過去，國仔想舺欲起痟，這个空縫絕對
袂使顛誕去，咱媽祖婆噯逗保庇ea！……，忽然間鐵國仔拚
出去，正手大力逶明ｅ堙塗給搶過來，而且大聲喚「日本警
察來掠，有人踮這搭賣鴨片！…」這時下腳手仔，假穿日本
警服ｅ金壽仔出現lo，本zy2鐵國ｅ意思，是給明仔嚇驚爾，
並無按算欲給害死，毋閣菜瓜明仔洶狂跳落水按算泅過一站
仔才逃唗，橫直暗面山貓應該袂顛誕才著。
菜瓜明仔一下跳落水了後，水深湧大全身反冷，真不幸
遂du6死(淹死)，過返工遺體浮起來，關渡暢兮逐傢議論紛
紛，嗯才貓古添仔吓來調查li……。原本是簡單ｅ搶劫爾，
遂變做命案，人講”人命關天”，鐵國仔舞這齣大條兮，規
ｅ面仔青恂恂，這聲幵始唗路(逃亡)，水流破布一四界匿位
流浪，驚人認出來猶闌珊兮，上食力ｅ著是驚也菜瓜明仔ｅ
英魂來給討命，迭迭嘛暗時睏到一半忽然驚醒，喚鬼喚魂，
心肝頭良心叨袂安li，無外久ｅ中間遂破病，各位看官，咁
吓冤枉纏身是毋？
逐工目睭頻若kue5(閉)，叨有人欲嚕囌，國仔摯載袂稠，
身體壹直落坑，尾溜人姑不而衷，佇厝前安八卦來避邪，嗯
才厝邊頭尾給起疑心，過几工，金壽來尋伊，看著八卦呤，
規身軀僬眩去，十二條神魂總翍(飛)到七里昊外，這聲庄兮人，
大概也掠著意思矣，這嗎二个人攏變痟仔矣(瘋仔)，庄腳所
在，一嘴傳一舌，無外久風聲喚喊，這爿獅仔頭成仔寮亦得
著消息li，總是也”鼓佇內，聲佇外”，代誌久自然吓biak5
，雞卵密密亦有縫，奉勸咱茲年傢人，做人”實在”頭一層，
毋倘害人上介ze4，因果報應燃眉來，一報還一報著噯擔輸贏
，破少年仔叨互汝袂鐵齒ｅ li。
貓古添仔ga探著消息了後，趕緊回報關渡廟這方面，
總是也任務空課，有照步來亦有照按算，對嗣大對兄弟換貼
兮，攏袂失禮a he！這嗎規社會叨有咧改變，阿本仔統治台
灣叨六、七冬矣，頭傢換後滕新平，先生人出身兮(醫生出身)
，頭殼袂醜，管茲百姓宛那有條有段，加減亦有斯文，返捯
加外嫷喟ｅ，这佮樺山，乃木等等兵仔頭來比，加臹qirdr。
咱天良講，後滕初步來治台灣，佇治安方面，衛生方面
真正壯才li，嗯才互茲清朝留落來ｅ羅漢腳仔，漸漸著有ｅ
顛倒謳咾嘛無的確，ga社會清明以上，隨人認真拍拚，棉爛
粒積，社會壹直進步，連遐米虫羅漢腳仔乞者，叨吓志氣拚勢！
泛勢袂輸氣魄組兮叨有影li。 (以上為真實故事, 發生在1930
左右,當事人住北投大籬笆地段 , 由木匠陳仁和 ( 1919-2003 )在1987
來診時告知 .) 第十二章 港流討掠，水路麗斗
61
關渡地ｅ六个羅漢腳噹中，算講痟矮仔生ｅ運命上坎苛
，上介衰，衰甲種匏仔生菜瓜，咱認真給掠，痟矮仔生，一
个安呢不黨納亥，愛胡朝激伍仁 ( 喜捉狹開玩笑 )，原本亦
是忠厚囡仔，叨生做細粒籽，父母生晟a li，腊武ｅ無法度爾，
嗯才姑不衷做文兮，嘻嘻哈哈逐傢耍笑，品無掠包，朋友中
間交陪，抑是街路深巷咧出入，頻若笑詼齣，著知影痟矮仔
到lo，外博ｅ，伊吓想空想縫來假仙，茲阿伯阿嬸囡仔兄大
頭仔，逐傢互伊創治甲叫毋敢，若無張弛卡加汝嘛笑甲婁下
huai2(顎)去，佇庄腳所在，吓凍化解暴力橫霸ｅ氣氛，有影
人人謳咾有著ｅ甘草型”開心果”叨著。
抑毋閣這款ｅ仁物，宛那有伊ｅ苦衷，佇彼時代治安醜，
萬善堂滿四界，逐傢狠介介搶來殺去ｅ坎站，咱痟矮仔生，人
細粒籽閣無錢，閣無嗣大閣無靠山，不黨不勢不吉不溜，社會
返捯無半撇li，逐傢臹愛給偏(pii6欺)伊戇倯無甡張，大社惼小
社li，有影臹害叨著。
咱生仔天性樂暢樂暢，心肝內宛那有覺悟li，萬項拄著，
叨噯憺輸贏，佇社會出入噯卡細膩ｅ，朋友摯接噯卡好禮ｅ好
嘴ｅ，人講”狠面兮袂 扑笑面人”，無論按怎，歹人嘛是人，
平平父母生晟ｅ，汝講著否？算起來痟矮仔生，宛那是一个臹
巧ｅ囡仔，伊知影按怎佇艱苦ｅ環境中，拍拚出頭昊，田螺含
水過冬，艱苦坐卦ｅ道理，所以講這十外冬來，日子
花花也，
普普也，無鹹無汫(淡)，小仁物自有生存之道，雞屎落土嘛有
三寸煙li。
1905年，日本仔來管台灣地叨也十冬矣，對付抗日份仔
ｅ戰事漸漸平和，台灣反抗外來ｅ政權，犧牲重大，尤其是雲
林古坑ｅ大屠殺，閣卡引起著國際輿論ｅ指責，蕃薯仔武力薄
食穿欠，姑不而衷敗，受日本帝國ｅ統治。戰事平靜了後，阿
本仔佇各地頭角勢，加強控制台灣人，派出所ｅ”大仁”權力
真大，親象天羅地網仝款，歹面歹俏來監視著咱茲，忠厚勤儉
ｅ庄腳人，對地方上ｅ反抗份子，羅漢腳仔閣卡注意，逐傢皮
bii卡拫(an2)若無拄好去犯著伊ｅ kia，好毋好著欲關欲拍味是
，有影一尾魚落鼎欲煎欲煮，在人料理li，目睭金金人傷重，
真正無伊法。
佇這个無情艱苦乏搭ｅ年代內，真正梟悻(不幸)，咱自來
樂暢ｅ痟矮仔生，遂不幸去互風颱尾掃著。有影衰甲袂講了了
，這聲潦落，看欲按怎著好？咱庄頭這聲欠一个笑面兮，氣氛
顛誕，這嗎痟矮仔生幵始唗路(流亡)lo，來閃避日本仔大仁ｅ
追掠，互咱吓了解，亡國亡民ｅ悽慘落魄叨有夠遐li。
庶當時仔，佇獅仔頭崁佮成仔寮ｅ中間，倚凌雲禪寺ｅ
半中站，有一位號作”賊仔埔”ｅ所在，原本是廖添丁一行人
躲巢ｅ所在，算講憩陶仔ｅ賊窟無毋著，廖添丁占這埔窟，不
時出入佇五股坑佮荖阡坑中間(半路噯盤過觀音山)，這个所在
好守奧攻，真好徛起，阿本仔大仁氣甲牙欲歪去，干礁無伊法
li，尾溜也1909廖添丁唗路到荖芊坑時，互親腹出賣害死，阿
本去了心腹大患，才喘一口喟(目前廖添丁墓佇八里荖芊坑，八
仙樂園身邊) 。
進前四、五冬，亦著是1905年時，有一回阿本仔接著密
報，婁警察大隊仁馬去圍去dng，註死毋死，痟矮仔生拄好佇
賊仔埔ｅ外口竹籬，阿款尹兜咧賣樹梅，賣甲搪siapa15，看
兮褲衲袋仔洘洘，賣甲叨心涼脾透開li，搪咧歡喜ｅ中間，忽
然間嗶仔聲大嚎，警察大仁付付叫，一時間昊翻地肉翩，逐
傢是驚甲pipi33慉，阿款驚甲軟腳袂徙步li，咚時也日本代仁
欲掠奚添丁尹一巢ｅ憩陶仔，痟矮仔生猶戇戇硾硾，一个不吉
不吉，裁佇遐na公媽牌le，一時遂qang6去。
壹直警察大仁ci3倚來，欲用手銬給kon起來，才大聲喚
講「我毋是歹人啦，我不而顧生理人爾爾，埔仔兄弟ｅ代誌佮
我無工礙啦，冤枉啊冤枉！」日本大仁，話語袂通，簡那鴨仔
聽雷le，無咧給信斗，這時身邊ｅ三腳仔(走狗)才給喃(nau5)一
下「呾这不吉囡仔爾，免cap5伊，繼續仈位dng6賊仔……」
嗯才日本仔警察給諒情，攽牛吃草由在伊去。
這聲痟矮仔生驚一下總勼(縮)落去，隨時地自那跁起腳
long6，二枝腳簡那biak鼓箸le，唗甲摛褲腳去，緊趕返獅仔
頭崁，這个時瞬，早前ｅ日本警察又閣翻頭追過來，大聲喚
「矮仔猴，毋倘唗，趕緊乖乖給我來派出所查問le，汝是真正
ｅ歹人，我互汝騙過去矣，佮賊仔是仝黨ｅ，假仙賣樹梅咧
做探仔(衛哨)毋免唗，我欲掠汝返局ｅ，弓出汝ｅ仝黨……」。
哎！枉屈啊枉屈，一个忠厚ｅ破少年仔，去夆誤吓仗賊仔
ｅ仝黨，這聲去沓著牛屎，跳落三江水叨洗袂清理，痟矮仔生
一下給想，絕對袂使去互伊摠著，抑無用刑硬弓，幹！偷夯
(qia2)古井嘛著認，艱苦我毋驚，毋閣名聲拍歹，這聲歹囝浪蕩
鱸鰻人膻，是欲哪見證ｅ，欲哪對祖公交待，萬不利若性命
休去，嗯著互祖仔死甲無人燒香點火？痟矮仔生愈想愈驚，人
下消夆看無目地，有影做羅漢腳真艱苦，吞銅吃鐵目屑準飯吞
，…想閣再想，嗯才決心先匿起來，算講”唗路”叨著，阿本
仔掩gokge31匿肖尋li，過著地下生活暗無天日li…。
各位鄉親嗣大，台灣出名ｅ義賊廖添丁，佇 1906左右確
實是蹛(住)佇成仔寮賊仔埔，这無顛誕，有影佮咱ｅ故事肖合
，是有事實根據ｅ，廖添丁選佇這位賊仔埔理由有三層，第一
條是交通利便，佇賊仔埔出獅仔頭了後，有四條港路，通滬尾
，通北投，通八芝蘭、錫口、通艋舺、新莊，佇以往完全靠水
路，客欠公路鐵路ｅ年代，毋坐船著干礁坐牛車佮步輦ｅ 爾
，因為交通利便到地a，頻若風聲梟悻，著吓凍跁起腳弄，四
路散去。
第二條是地形複雜，好守奧(難)攻，容易唗匿安呢，這角勢
地頭草路iap僻，山崙仔溪崁纏纏離離，中間閣夾臹贅ｅ風水，
慪警察仔猶未入去，著先驚兮咧等，驚也入去了後，去夆設計
去(中伏)，夆掠水鬼去tap涵空著害啊。
咱講正經ｅ，以這嗎 1992 ｅ年代即發達，欲叫汝去成仔
寮山區掠人，我看汝佐汝食卡醜ｅ，而且五股坑這角勢若有顛
誕，盤過觀音山到對面八里荖芊坑，一聲吓使入海到福州，真
利便，嗯才廖添丁尾溜仔，是互家己人害死，阿本仔確實真歹
掠li。第三點是接近港路，罔掠罔臭臊，食物充足，靠山靠水
食穿好勢。
呾這嗎痟矮仔生dai4著衰運，人咧掠賊仔，去互風颱尾
掃著，毋敢出來，自那 佇關渡港這角勢匿，算講咧唗路li，
算起來古意人真正歹命，想著叨怨歎li。
62
呾這嗎痟矮仔生驚日本仔警察來掠，搪咧唗(逃亡)路，姑
不而衷佇好朋友，拋魚禮仔ｅ草寮仔內，日時藏身，暝時出來
，加減佇寮仔種寡蕃薯佮青菜，若有閒工不時咧dng6沙蝦佮
掠毛蟹，叨近港邊li，奚若有喟力勞動，宛那袂去餓著，人講
”吓離門戶，袂離腸肚”實在有影li，拋魚禮仔自本著關渡人
，三代攏佇關渡港路討海，對掠魚掠蝦工夫贊ｅ壹庄，手路在
欉兮叨著。
ga肖待念著平平換貼ｅ以上，嗯才不時咧教寡咱關渡港
路討掠ｅ工夫，痟矮仔生起初頭咧唗路，互禮仔掩護做擋撇
，真正歹勢，驚也吓去拖累著禮仔，這个不比普通時仔，腳
踏人ｅ地，頭戴人ｅ昊，不時嘛 pipi55搐，驚兮咧等，尾也
受著禮仔熱誠ｅ招待，當做兄弟嗣大看待，矮仔生感心無量，
目油taptap55滴，才知影路遙知馬力，朋友咧交陪叨有夠遐li
，這世人若有機會來肖報答來講，大兮，憑汝一句絕對潦到底。
咱艱苦人仔，絕對有血有目屑li…，也叨种种ｅ關係，外
口風聲猶搪咧拫，呾痟矮仔生匿一暫臹大暫，等到勢面卡坐
ｅ時瞬，才統頭給禮仔講「大兮，zat助汝，有影臹歹勢啦，
佳哉這嗎時局有卡平靜，官廳ｅ腳步亦攽卡開矣，拍算無要
緊ｅ款，聽兮講警察大仁，撞逶八里坌彼角勢ｅ款，關渡地
頭遂顛倒定著li，小弟咧看，瞑日ut噯佇寮仔，安呢嘛毋是
頭路，有時仔睏甲骨頭強欲酥去，有影無甡張矣he，做雞
噯筅做人噯bing4，加減噯鏘一斗仔才袂歹勢，耶麼安呢啦，
我捸(de/due)汝身軀邊，佮汝逗做空課，順續學寡掠魚ｅ工夫，
宛那真趣味li，才咧愛笑講，人徛佇港中央，著毋驚警察大
仁來膏膏纏，我心肝頭掠臹在，免煩惱，咱干豆媽祖自然的
吓保庇叨著！」
「好啊，汝ga有趣味到地也，安呢上介拄好，這嗎搪咧
乏搭欠腳手li，拍虎著親兄弟，橫直家己ｅ人卡在穩，也叨腳
淡手落，加減吓臭臊[cr]，呾明仔載才來我船兮，咱關渡港這
角勢，牽牽ｅ攏家己ｅ，佐汝安la！」
過返工(天)爾，痟矮仔生嘴笑目笑，著搓腳撚手，暢樸
樸，三腳趒二腳跳，拚到渡船頭去等禮仔，目暱久呤，禮仔
te6一隻魚船仔到地，頂頭囥幾lo枝大枝ｅ鐵櫛[tizat，鐵耙
]佮幾隻大竹籠仔，這聲船gr4(划)逶港中心仔。
船na行咱禮仔na咧講「 今仔日欲掠大細粒仔，大粒
是浮卵(關渡產特大蛤)，有拳頭母大粒，另外細粒叫花蛤仔
[huegap a 615]，干礁黃豆赫細粒爾，一粒浮卵有一千粒花蛤
仔赫重，咱關渡港真正趣味，半鹹半汫(淡)，出產大細粒差
甲即贅倍，有影頂港有名聲，下港有出名li，呾稍等才給
見本看覓ｅ！
講煞自那 ｅ瞬呤，駛逶竹圍仔彼个方向，無外久，禮仔
囥落鐵耙仔佮竹籠仔，順流水na行na扒na清，這款利用海
水起落ｅ流水力頭(潮汐力)，來掠花蛤仔抑是文蛤ｅ方式，
佇世界來講真正奇卡特殊，叨無地看li，咱痟矮仔生佇船頂，
加減看加減逗做，咱關渡港ｅ花蛤仔臹厚，甡湠臹緊臹好掠，
一車箕一車箕，攏拍算十外斤ｅ款，袂輸簡那土腳兜咧抔仝
款，一擺十外斤ｅ腳兜仔。
這个花蛤仔臹細粒，毋閣臹有肉，肉仁結結結，鴨母上
食，干礁咱干豆地(關渡)有生產爾，一粒簡那黃豆仝款，比
米粒加無外贅，拄好互鴨母一嘴一粒，叨真正營養li，若準
人欲食，宛那無磺，毋閣事先噯先用滾水去燙去煠，互肉唗
出來，續落ｅ瞬呤，載去庄頭隨戶隨口灶賣。
賣ｅ時，噯含湯遂佮，也叨盡食嘛吃湯爾爾，這个湯真正
好食，真正營養大補品，賣花蛤肉，拍算攏透早ｅ款，賣ｅ
時用一腳幼竹絲做的ng仔來稱，台灣話講「家己四兩ng仔
噯稍除ｅ，(自已要先自我檢點)，著是講这，这賣花蛤仔肉，
輕稱輕稱，是彼个時代重要ｅ蛋白質來源。
1950～60三十年前四十年前，毋閣這嗎經濟發展，社會
重頭輕遂來污染，1970以後，這味花蛤仔遂絕種去矣，除了
污染以外，上大頭著是1964關渡門拓寬工程失敗，引起海水
倒灌，五股水田全變湳仔地(坐高速公路看吓著)，海水倒灌，
鹽分變厚，一寡花蛤幼栽自那死了了，有影想落臹無采，花蛤
仔無矣，自然的飼鴨母ｅ，嘛定著no術去矣，現主時關渡廟
ｅ鴨卵，噯倚靠外口來供應，實在臹害！
…咱話頭講返來，拋魚禮仔一車箕一車箕kat5起來，
痟矮仔生給逗搬好勢，才半流水呤，著掠欲二百外斤花蛤仔，
又閣利用翻返ｅ流水，駛入關渡渡船頭，早有飼鴨戶咧搪等，
矮仔生佮禮仔二人，逶二百外斤ｅ貨搬起出賣，攏總賣二箍銀
，這二百外斤花蛤仔，食入鴨奎(褱)了後，吓變一百斤ｅ鴨母
卵，吓凍賣差不多五箍銀ｅ款，總是咱關渡地水路活，昊欲
飼人肥律律，水米之鄉毋是咧講假ｅ，關渡暢兮不止也至揚，
人奚氣運勢面叨有遐li。
呾細粒ｅ花蛤仔掠了後，續落欲”踢浮卵”，欲掠大粒仔
才吓起磅li，这浮卵是對岸港墘，偎和尚洲ｅ洲仔尾，出產上
贅，二尺深水爾，江邊用腳踢著有，伊每一粒ｅ重量，拍算
有400～500Gram ｅ款，叨一粒大舞公粒，簡那拳頭母le，
佮花蛤仔0.4Gram真差甲壹仟倍叨有影li，咱關渡港半鹹汫
(淡)ｅ生產，真正吓謳咾ｅ。
浮卵這款物件，進前痟矮仔生是有風聲過，毋閣無親身
掠過，这噯有老仙覺來指導來掣路才有材調，水產ｅ奧妙著
是安呢爾。呾過返工(隔天)咱禮仔掣痟矮仔，二人坐渡船到
和尚洲洲仔尾(今二重洩洪道蘆州鄉洲尾村)，落船了後，隨
人揹(paai3)一个大腳竹籠仔，行逶江墘過來。
這時禮仔掠港面地頭金金相，二蕊目睭瞋擱再瞋，看甲
烏仁白仁牽紅絲，強欲肖犮(pua4)去，相看港墘ｅ烏爛土有各
樣(徵兆)否？來決定欲逶佗位潦落去，也叨這項進前ｅ空課真
正要緊，亦真正硬斗，稍寡顛誕，效果著差甲七里昊外,这完
全食經驗手路兮叨著。無外久中間，行到一遍竹抱ｅ所在，
禮仔佮痟矮仔二人自那潦落水內，潦到水尺半深ｅ坎站，著
噯張弛看有踢著像石頭ｅ物件，奚茲茲著是浮卵la，續落掠
二點外鐘ｅ款，隨人掠二十外粒浮卵，另外五、六斤ｅ
ham2仔(文蛤)，痟矮仔生真正歡喜，給禮仔勞力，給謳咾，
咱關渡水路活好討趁，叨有影li。
返來了後痟矮仔煮一鼎湯，浮卵肉臹韌臹Ｑ6，強欲哺袂
幼去。…痟矮仔才咧所說「大兮，寧ko(乾脆吧！)我拜汝做師
父好毋？請汝攽幾步仔咱關渡港討掠ｅ手路(技巧)，我知影汝
工夫壹頂壹ｅ，稍婁一寡來展寶le…」「哈哈…阿同兮，免赫
客氣la，平平家己兮毋免行甡份禮，若無肖棄嫌以上，耶麼過
二工仔，我才教汝掠赤鰭、土龍、黃魚佮青ham ｅ工夫…」。
63
這个時瞬，痟矮仔生真正歡喜，叨嘴笑目笑,規身軀毛脘
空僬爽，嗯才彼暫仔真正拍拚，咧給拋魚禮仔逗做空課，亦
簡那長工亦簡那朋友ｅ款，叨逐傢無肖論兮，拋禮仔免錢加
一个人工，錢銀收定著卡贅，自然的心涼脾透開，这亦著閣
講，比論講普通時仔，一船載掠一百斤ｅ黃魚，這聲加一个
腳手，上尐嘛一百五十斤猶袂拗蠻！古早人，忠直義氣，人
情親象鋸樹，有來有去li。
…關渡港面ｅ水產真贅，生湠嘛僬勻，掠袂斷食袂無，世
世代代傳落來，嘛是壹直到這三十年來才落ze衰尾，象拄乍
講ｅ”浮卵”已經佇 1965～70中間完全絕種矣，主要是關渡
門拓寬失敗海水倒灌變鹹ｅ關係，近來是污染廢水頻若掠著
ｅ魚，臭油hen3味重，有影袂孝孤ｅ！
續落這暫仔，拋魚禮仔教痟矮仔生，拋掠黃魚ｅ工夫，
這味黃魚，毋是外省人尺外長辦桌用彼款黃魚，仝名叨無仝
公司出品eli，伊一尾拍算四寸ｅ腳兜仔黃絲黃絲，扁扁規身
軀油質多，了後gun3鹹上介好食，味香肉閣幼，有影關渡港
上出名ｅ魚咯，因為生產量大敖生湠，價賬亦真俗，有影是
窮人ｅ”勞斯來斯”，咱庄腳人普遍散赤, 食袂起鱸魚來講，
攏嘛吃這味黃魚來準拄好，有影臹讚。
小弟二十外冬前佇關渡，印相kimo上讚ｅ魚種，這款魚
掠到士林賣時，叫做油魚，(油質厚，煎的時陣吓”chi－chi”
ｅ聲，肉臹生甜)，也叨吓佮屏東東港ｅ油魚肖濫肖誤會，我贊
成用油魚，卡袂夆誤做勞塞減肥用ｅ，現主時黃魚佇關渡1970
已絕種，佳哉下港嘉義彼角勢海邊猶有，有另外一款名稱，
(講黃魚油魚人lon聽無li)。
呾e瞬呤，拋魚禮仔掣著痟矮仔坐船到蛇仔形(這嗎關渡
大橋西側橋頭)彼角勢掠黃魚，順流水ｅ關係，點仔久著到地
矣，禮仔才咧說明「咱關渡港壹直到滬尾，出產這味黃魚上
介贅，魚一陣一陣來，若掠有對勢，有時一網囥落掠有三四
十斤，互汝拖甲叫毋敢，二冬前有人佇八里岔掠著大du5 ｅ，
拍算百外斤ｅ款，驚網仔漲破，毋敢收網就船，尾溜仔逶規袋
魚仔佇水中拖，拖到港墘才hii4(擲)向沙埔，有影卯死li。
咱干豆暢仔拋魚，上大頭兮(最主要)亦是掠这黃魚爾爾，
原在是價賑卡好，亦原在是一擺卡大du5，卡有額叨是啦，
有時若卡下消淡薄仔，稱彩掠三二斤仔，返來家己吃嘛袂失
喟li…，禮仔na講na尋魚陣，這款有影運氣li，臭cu崁爾，
踮佇蛇仔形壹直踅到烏山仔頭，舞毋但規流水，今仔日無甡張
，才掠五、六斤黃魚爾，叨尋無魚陣li，實在有影，另外十外
斤雜魚仔，細尾閣莿贅，無卡擢li。
過工(隔天)禮仔閣展寶一項，掠赤鰭仔ｅ大pet步(絕招)互
痟矮仔生鼻芳le，各鄉親嗣大，這味赤鰭仔是啥碗膏？这茲茲
是台灣水產，第一美味ｅ特級高尚魚，雖然人咧講「一免二咖
納二赤棕」，毋閣實際口味來比憑，卡講亦是赤鰭仔上讚，龍蝦
咖納攏無夠看la。
這款赤鰭仔佇一百冬前台灣上有名，到這嗎 1992，宛那
是第壹名無顛誕，叨希罕買無li，致使顛倒閣卡貴重，鹹汫水
攏吓生活，這嗎 1992若有釣客釣著抑是海中掠著，攏先孝敬
親友行家，市面兮根本無看著影，近來超級市場有咧賣，聽兮
講是仁工飼兮，雖然滋味差臹贅，毋閣宛那逐傢搶貨嗄嗄叫。
舊年年尾我佇北投稻香超市，給買一尾赤鰭仔，安呢「烏
烏細仔尾仔」外表怯四下消，落尾到櫃抬算帳時，姑娘仔有好
毋捌寶，才咧喃一聲「是不標籤寫錯了，怎麼一條”吳郭魚賣
到九十元？」我講「恁ｅ吳郭魚特別啦，一尾九十猶算俗，有
卡好吃li，有機會試看覓著知！」哎！實在有影！
三十冬前讀初中時，幵天大ｅ風颱”葛樂禮”為害大台北
，新店溪山洪爆發做大水，螢橋有一位魚仙趁機會，dng6掠
千外斤ｅ魚仔，單單保留五十斤赤鰭仔爾，偆兮全部賣掉，
人奚專門兮，叨捌(識)有夠遐li，才咧講赤鰭仔外寶du外寶，
毋是「家己謳咾sak袂倒」li。
呾話頭返來矮仔生茲，咱拋魚禮仔今仔日，欲教撇步
千年絕招，教伊按怎掠赤鰭仔ｅ工夫，这普通人叨無地聽li。
「这赤鰭仔魚臹奸巧臹敏醒，絕對釣袂著無打緊，魚顛倒吓
假吃來創治汝，袂輸象有人給通知仝款，釣規晡，閣卡枵，
毋吃著是吃，釣仙干礁無伊法，所以噯設計好步來給掠…」。
步數是安呢？禮仔痟矮仔到高厝坑彼箍圍仔，噯沙埔坪
才吓使(可以)，二人用鋤頭，退流ｅ時，離港墘三四丈ｅ所
在，pe性命挖沙窟，差不多佮眠床平長闊，深度拍算尺半ｅ
款，內底放寡臭魚蝦頭等等東西，才閣用樹枝稍寡崁le，佇
窟邊插一枝竹仔做記號，所有ｅ工程，攏噯佇潮水淹來進前
完成，等流水(潮汐)閣來ｅ時，上好是滿潮長水ｅ時，才划
船仔用網仔，逶竹仔枝ｅ所在給pa6魚，安呢才掠吓著赤鰭
仔，汝看這款魚外奸巧著好，莫怪叨貴hiam hiam61，咱茲
羅漢腳仔一氏人羨仙膏li。
…這嗎搪禮仔佮痟矮仔ｅ船，沿土地公鼻，山後，退回
關渡渡船頭時，佇山後港沙看著臹贅”花俏”咧跳(彈塗魚)，
邊仔有人用大枝叉仔咧叉啥乜？禮仔才說明「奚毋是咧掠花俏，
奚是咧叉土龍叨著，土龍是真正補真正滋養ｅ大色貨，咱淡水
江倚山地頂節出產鱸鰻，中節螢橋圓山出產白鰻，抑若關渡以
下叨出產土龍li，土龍臹歹掠，噯尋空尋跡，噯有特殊ｅ工夫
技巧，普通人袂曉，汝若行去(靠近)掠土龍師時，伊著假影歇
睏，無欲教汝，因為这是伊ｅ飯碗公，盡食嘛盡食这爾。
落尾返來關渡宮時，看著有人佇田岸咧掠青ham(一種青
螫蟹，味美)，禮仔教咱矮仔生按怎掠，先抽一枝毛草，正手
癢入去田岸空內，等青ham出來ｅ時，捯手緊給掠稠ｅ，無
外久ｅ噹中，掠十外隻，暗時吃頓真cecau61，掠青ham拍算
中秋了後彼個月，稻穗大肚時上讚。
痟矮仔生，壹直佇關渡廟彼箍圍出入，幫助拋魚禮仔逗
掠魚蝦，日子一工一工過去，總是咱干豆所在，魚蝦水產厚
，加減掠雖然袂好額來講，抑毋閣有做有份，大概仔工錢佮
收成拍無輸贏，吓”平衡”叨著。
一年了後1906，警察方面閣加強，查茲社會ｅ遊民乞
者羅漢腳仔，風聲又閣拫(an2)，咱痟矮仔生驚去互大仁摠
去，歹記錄夆點油做記號，ga做人以上，bitsun12(裂縫)ｅ
空嘴，恐驚互人看無目地，嗯才決定欲閣唗路，求仁生ｅ
突破再發展，順續亦毋倘來連累禮仔，這暫仔互伊掩護，捙
盤規半冬，想落叨袂過心，這个羅漢腳仔，懷著心酸目箍紅，
恬恬(靜悄)行逶八仙里彼爿ｅ報岸(堤防)，按算欲去唭哩岸
匿一暫仔。
64
呾眾(各)位咱茲鄉親嗣大，阿同兮，這本冊寫到茲，宛
那漸漸欲煞矣，戲齣閣卡好，定著亦著散場，佇現主時ｅ背
景，坎站，來寫这本故事，有影奇卡，嘴齒筋咬咧，實在毋
是這方面ｅ腳擻，中間ｅ返捯矯摵，拖拖沙沙，一睏仔延遷
欲到半年赫久，半路險險ｅ失志。
叨疲勞厭懶衝袂起喟實在害，袂輸咧晟囝le，半路折扁
擔，叨責任袂完成心肝頭qek，安呢無閒起無閒落，文句修
改閣修改，稿紙一張閣一張撣掉，壹直是理想坎過材調，有
影扶袂起磅，這嗎有法度依持到這睏仔，連小弟家己叨想袂
到li，每一頁稿紙，拍算六百字ｅ款，採用密密zatzat51 ｅ
方式，卡袂拍隕紙張，寫一張差不多四十分鐘ｅ時間，包含
構想、寫筆、修改壹在內，才知影文藝確實無快活，夯(舉)
筆比夯鋤頭卡重，操心扒腹用心計較，無三二个手爾，有影
叨賺食袂茖li。
台語ｅ文藝搪咧起頭勃穎(芽)呤，絕對袂使漏喟ｅ，咱
祖公所留落來 ｅ文化，毋倘過咱這代，叨斷根消身去，現
主時台灣ｅ國民所得將近一萬美金，新加坡ｅ福佬宛那有一
萬二千外，佇亞洲一千个語系當中，福佬排名第二坎，干礁
輸阿本仔爾，毋閣文化ga經濟重頭輕，失去尊嚴，蕃薯仔叨
無咧”腔腸動物”咱ｅ文化卡輸所得三百外塊ｅ苗族、越族，
實在了然le，映望茲少年仔卡拚勢ｅ，毋倘下消漏屎馬，噯
替咱祖仔出頭昊，安呢鋩角才矯吓返來。
語言欲寫做文章，袂講外費氣叨著，毋閣欲寫做有價值
ｅ文學作品，奚叨有影臹無簡單，對一个族群民性來講，
“鄉土文學”是上幼秀上歹寫li，伊結合血跡佮文學，竄筋
入骨有血有目屑，吓凍表現出規个語族ｅ文化佮精神，伊袂
繫語(翻譯)做別款語言ｅ，繫作別款話時，伊ｅ精神韻氣叨
僬失，这佮科學叨無仝li。
現主時算講逐傢攏吓曉台語，毋閣欲按怎去寫按怎去看，
攏猶是咧初頭試驗突破ｅ坎站，致su講寫落特別硬斗，人講
路頭擔燈心，路尾擔鐵錘，從事文化事業ｅ頭路，本臹著艱苦
，親象”燒爐添炭，著力閣歹看”，親身舞著文化業，著知影
臹食力li，這本冊ｅ意思，大概也提供一个方式，互恁吓了解
台灣話ｅ文化，到底生了按怎款？
看欲怎樣去改善，逐傢來參詳看覓，普普也給掠一个形，
互台語「落塗時，八字命」吓壯材吓好運命li，總也講也，鄉
土文學是語族文化ｅ精英，伊幼秀閣鄉土閣趣味，噯給寶惜噯
給牽成，愛顧，互伊吓大pa尾，吓見光大欉，吓發吓paa6，
才有甡張。
欲寫講古，噯逶家己ｅ庄頭寫起卡妥當，若準連家己ｅ
家鄉佮親戚，叨牽袂好勢，安呢著歹紡矣，小弟四十捅，出
世佇關渡地，血跡佇 這嗎關渡咖油站臹對面ｅ路邊崁腳，
現主時國小ｅ籃球場li，1978年官廳兮徵收去矣。
關渡地佇小弟少年ｅ時瞬，是一个充滿著詩情畫樣，光景
真讚ｅ好所在，一四界青更更ｅ塭田，佮港路肖接肖茇(pua4)，
真正咱咧講ｅ”魚米之鄉”，尤其關渡媽祖地頭好，神明聖，
擎甲掠袂稠，逐傢咧he6”南有北港媽，北有關渡媽”，關渡
廟壹直興到這嗎，一年寄付收ｅ七八千萬，互附近ｅ小廟佮
教堂逐傢羨甲taptap55津。毋閣真拍隕，三十冬前ｅ關渡峽口
拓寬失敗，佮近來關渡工區ｅ設立，加臹無額臹au4古叨著。
這本講古冊是經過真長ｅ時間，來計域來書寫，內底ｅ內
容攏是正經兮，無烏白亂撰，假苞兮，親象蕃薯仔ｅ拜鬼文化
，伊ｅ背景按怎變化？这中有詳細ｅ說明，也叨點一du5，苦毋
講盡有盡ia5來，这咱學校ｅ教科書無咧教，毋閣真正要緊li，
这著是官方說法佮百姓做戇牛ｅ差別，有影無講汝毋捌，嗯才
講这鄉土文學絕對有伊ｅ價值所在，盡驚是驚寫袂好勢爾爾。
這本冊見面著說明，咱關渡地頭百外冬前ｅ結拜會，猶
咧繼續進行，有影無簡單，續這本冊亦真無細膩，批評清朝
外來統治者ｅ腐敗，某mi袋大大衲，姓乏甲叫毋敢，顛倒
阿本仔卡有咧論情理，像顯榮仙這款ｅ人，普通人弓詈甲臹
袂聽ｅ，毋閣咱分析代誌噯冷靜，榮仔絕對毋是台奸，伊佇
享受特權進前，絕對是台灣ｅ大英雄li(享特權後則另當別論)
，主要ｅ原因是清朝ｅ兵勇，軍紀甚醜，百姓驚甲吓滲尿…，
种种東西，本文有一番ｅ見解著是啦。
清朝尾年，台灣庄腳時行羅漢腳仔，叨袂討袂趁，一四界
流浪他鄉外里，日本仔管了後，社會有卡定著，治安返清，
茲羅漢腳仔有卡變好，卡欲拍拚做穡，原本平平嘛是父母甡
兮，人ｅ本性攏差不多，叨身世坎苛姑不而衷爾。
本冊主寫茲羅漢腳仔善仔良ｅ一面，叨”賊面菜公心”li
，咱噯給人同情，毋倘搕袂著欲看衰味是，安呢著醜材矣he，
清朝尾年ｅ羅漢腳，漸漸尐數溜尾，毋閣彼時代ｅ結拜制度，
開神明會ｅ風俗依原傳落到今日，彼時治安甚醜，結拜ｅ目
的，毋是為趁錢，干礁為著家族ｅ身份性命爾，來互相照顧
叨著，所以講治安無好叨真正梟悻li。
這本冊ｅ噹中，有提起大麵發仔抾風水ｅ代誌，寫甲真
正盡磅逗搭，这毋是烏白寫ｅ，小弟三十冬前讀初中ｅ時，
佇後尾仔山頂，親目看過二門風水咧抾骨，對土公仔ｅ种种
印象臹深，這嗎閣參考資炓，筆尾咧婁，竄筋入骨真正本土性。
關渡塭田佮水路ｅ代誌，鴨母卵佮種種魚蝦貝類ｅ生物
，關渡地叨自古興le，这哪著閣講算講逐傢吓了解li，尾篇
講到菜瓜門仔賣阿片煙，驚日本大仁來，跳水不幸du6死ｅ
代誌，这確實有影ｅ代誌，大概也發生佇 1930左右，我這
嗎給提早三十冬寫寫ｅ，看著別有風味，這个故事是和師，
迭迭來看嘴齒開講時所透露ｅ，當事人ｅ囝孫這嗎猶蹛(住)
佇北投大籬巴彼箍圍仔。
呾鄉親嗣大，互恁逐傢臹勞力給咱疼痛，騙恁目睭看到
這位，这是咱鄉土文學ｅ試驗，全本以純粹ｅ母語來記錄寫
出，試辦階段，其中欠點規拖，才映望各位手勢夯(舉)卡懸ｅ
給小弟指教給小弟牽成咧， 小弟佇茲祝福逐傢嗣大阿
同兮，身體健康，事業大葩尾旺廣，財源豐富囝孫友孝，有
閒工才來關渡給行踏一迣！來烚(haa4)一杯仔燒茶咧！
( 全文完 ) 小弟 黃元興 佇 新北投中和街
( 原稿1991.12月完成，1995年 ,2007年 ,2020年 共三次修正文字 )