韓石泉 p200.-228
六十回憶 (第一版) 跋 林占鰲
85.
今年拄好是咱石泉先生六十大壽 ,先生做人開明, 並無綴一般世俗,來鋪張慶祝, 伊自那決定招茲親友見面 ,做禮拜來感恩上帝, 這其中, 除了由蔡培火先進 ,杜聰明博士 ,沈榮律師, 來做專題講演以外, 同時嘛發表「六十回憶」e書冊, 逶伊即六十冬以來 ,生活踦起, 所經歷e鹹,酸,苦,辣,汫,澀,佮甜蜜e人生奮鬥史實, 以純潔,無留情面, 坦白率直, 來公開社會, 求取社會各界對伊人生e評論, 嘛吓凍利用伊e經驗, 來摧撟各界未來改進e建議, 當做伊做壽e紀念性, 由安呢, 咱知影先生思想有影真偉大哩 !
也呾即本紀念性e歷史記錄 ,有來反映著先生 ,佇人生過程內底, 克服了一切惡質環境e寫照, 毋但真有歷史意義爾,而且 對文化貢獻宛那袂尐, 即款資料真寶貴, 有影值得咱欽佩佮謳咾 .
我佮先生交陪, 剛(daa2)開始呤呤, 拄好是台灣文化協會成立e時瞬, 阮即三十冬e友誼 ,表面清淡 ,毋閣內喟深入, 我所肖捌e石泉仙, 普通時恬恬話尐, 毋閣敢大聲來抗爭, 伊做人誠信 ,袂失志, 熱愛 國家民族, 敬神樂道, 愛人如己真熱忱, 而且伊條直正氣, 袂互威權屈服, 嘛袂去受著錢銀肖抴(誘)e人格者叨著 .
先生毋但是術德兼優e醫生爾, 伊嘛是台灣民族革命運動e革命家, 伊看著推翻滿清帝制 祖國光復,共和奠基, 受孫中山精神感召,家己研究三民主義革命e思想, 自那生根勃穎(嫩芽) ,伊深深來感受,台灣互異族統治, 百姓互外國凌治 ,阿本仔官廳兮,
200
對台灣人e「愚民政策」 ,一工一工來加深 ,致使講先生看甲袂作e ,來抱著濟世救族e志向 ,佮同志共同創立共和醫院 ,做為南部台灣革命活動基地安呢 .
毋閣彼時e祖國, 軍閥分裂 ,爭權奪利, 無心顧著台灣地, 先生 懷著一股熱愛國族e深忱熱情 ,意志堅強, 有影咧品氣魄e, 空手潦落俥拚, 伊糾合一寡同志, 向異族來進軍, 遂來喚回國魂, 激起革命e潮湧, 各種運動自那順勢浮夯, 佇台灣文化協會, 台灣議會期成同盟會, 佮台灣民眾黨, 先生攏踦佇頭前咧肖拚 .
無論日本政府, 按怎對先生來威脅抴利,先生攏吓賭著氣魄,袂夆��動夆壓落底,伊自頭至尾 ,攏踦佇革命陣線, 佮異族潦落拚鬥,伊受著孫中山主張「革命e基礎,噯踦佇高深e學問」,來肖感召,不管時,為學問咧拍拚讀冊,奚是袂講了了(不在話下),到呾歲頭叨六十矣, 佇診所時間以外,透早透暗,宛那博學百冊, 無論醫學,語文,歷史,傳記,時事…等等,攏是手不離冊, 不時嘛趁哴縫e時間來充實家己哩!
咱來給追想, 寢光復開始呤 ,先生有捌佇大公報 ,所主辦e座談會中間, 向民眾提出警告: 「噯防止大陸地區赤禍湠延,逐傢毋倘攽外外,踦懸山看馬肖踢」,又閣幾落擺佇省參議會, 建議政府種種措施, 伊真勇敢, 迭迭講仈人毋敢講e話, 做仈人毋敢做e代誌, 先生e遠見佮氣魄, 實在是平日愛讀冊好學問致蔭著e啊…先生做人親切, 看待同事簡那兄弟咧 ,伊迭迭有咧講, 咱茲同志,逐傢抾和, 集中來撟公事, 噯去除官僚作風, 佮頂下部屬對立e觀念, 才吓凍建立起真正e民主政治叨是啦 !
201
先生愛心顧傢, 尪嫫合和, 感情甜黏, 咱台南人,尊敬尹模範夫妻, 有影謳咾甲有偆去, 尹e日常踦起, 真正勤儉, 樸實, 整潔, 無咧為著升官發財求名聲, 來咧走蹤 ; 嘛無咧為家己e享受來設想 ,伊做人善根厚 ,心肝內干礁存一心救苦救難哩 !家己勤儉,來助人為快樂之本, 安呢來做 ,伊是鼓勵咱茲朋友來 ,做善事e模範哩 !先生篤信基督上主, 做人忠厚愛心, 無計較私人e利益,若拄著災難, 叨誠心祈禱, 負起責任, 伊袂來「高高在上」 ,激一个仔蔘仔喟安呢,干礁有為眾人犧牲e大氣魄爾爾 .
我受著伊e人格影響真大, 我給當做老師來學習, 以好友仁慈來肖款待, 也呾即嗎佇「六十回憶」即欲出版呤呤, 加減寫幾句話, 來表示阮e崇敬佮慶祝安呢 ,佇茲祝先生精神旺廣大葩尾 ,身體愈勇, 年年進步, 歲歲返少年, 萬壽無疆, 阿門 !
1956 (四十五年) 雙十節
202
{附錄一 }
1.追念韓石泉先生
- 杜聰明 -
國手信徒志士三 萬千救療一身擔
立功立德完人後 埋骨青山起晚嵐
( 1966年6月3日)
韓石泉先生, 台南人, 光緒23年(1897) 出世, 伊是韓光斗先生e第二后甡(兒子) ,1918總督府醫學校卒業後 ,進入母校赤十字社醫院, 追隨吉田, 小島二位教授, 來研究內科學, 落尾也轉入台南醫院明石內科, 繼續服務 : 1922以後, 攏踮台南市開業, 1935渡日本留學, 入熊本醫科大學, 明石內科, 小宮內科, 進修內科學安呢 .
尾也, 進入生化教室, ���隨加藤教授 ,研究生化, 得著醫學博士, 衣錦還鄉, 繼續佇台南市開業, 韓內科病院, 伊佇日本時代e中間, 有來參加政治文化活動, 光復了後, 選稠省參議員, 光華女中校長, 董事長, 嘛捌做過台南市醫師公會理事長, 台灣醫學會,第五屆地方醫學會會長, 景福會第五屆聯合同學會會長等, 1963年6月30 不幸過身, 享年67歲 .
203
小弟對韓石泉先生 ,有特別尊敬e心情安呢
第一, 我佮韓先生e交陪深久, 早佇五十外冬前, 我猶咧讀醫學校e學生時代, 叨已經熟似矣, 我比伊早四冬, 佇學寮宿舍遐, 阮共同生活一年, 出入交陪逗搭, 朋友情叨有夠遐哩 ! 彼時瞬, 韓先生是台南優秀學生e代表 ,1918年 ,伊以第一名優秀成績來卒業,照慣例, 優先進入吉田佮小島教授遐, 來研究內科學, 落尾也,也叨故鄉e關係, 伊自那返去台南病院服務 .
韓先生佇台北e時代, 小弟已經到京都留學矣 ,也呾等到1921我返來台灣e時瞬, 伊又閣返去台南矣,有影掠龜走鱉, 彼時 ,我頻若有機會去台南出差呤, 一定吓去拜訪韓先生, 尤其1953長期蹛高雄(創立高雄醫學院)了後, 阮閣卡啑啑來往, 雙爿交陪逗搭深入安呢 .
另外, 彼瞬又閣捌(曾經)拜託韓先生, 來主持台灣醫學會第五屆地方醫學會會長, 佮景福第五屆聯合同學會會長…佇公e立場來講 ,宛那受韓先生真贅e幫贊安呢…佇1956年11月初4, 舉行韓石泉博士還曆紀念演講會e時瞬 ,小弟嘛擔任當演講者之一,講題是「中日現代醫學界e起源」 ,另外, 伊e紀念著作「六十回憶」, 其中嘛有小弟題簽兮, 互我感到真光彩叨著.
落尾也, 韓先生關心小弟e身體, 曾經來勸我, 「也呾年歲有矣,叨毋倘閣潦落西仔灣泅水, 卡安全啦 !」我給應講, 「也呾海中泅水,佮陸上行路仝款啦 ,慢慢也泅,無要緊啦. 」 唉 !天時不利,無疑悟講 ,咱韓先生, 遂自那罹患腦充血仙逝, 呾已經滿三冬矣, 阮感到真婉惜真拍損, 安呢懷念再三, 是袂講了了.
204
第二 我真欽佩韓石泉先生e治學態度 ,韓先生頭殼清明, 是一位優秀e內科專家, 1928佇台南市成立「韓內科醫院」, 彼个年代, 頭一位來標明專科醫生, 叨是韓先生, 真正受患者e信任佮尊敬, 佇開業期間, 雖然醫務興隆, 人群佳繹 ,宛那佇百忙中間, 繼續讀冊 ,研究新款, 醫學, 尤其佇醫業成功, 人客摪摪滾e空縫, 遂顛倒洶洶來停業,落 決心 ,將規口灶徙去日本, 繼續來留學深造, 伊進入熊本醫科大學, 研究內科佮生化e學問 .
落尾 ,伊完成論文「脾臟燐脂研究」,「關於膽汁分泌佮成份」,得著醫學博士, 即款求學問e態度, 有影是普通人做袂到e, 另外伊佇光復了後, 又閣研讀英文, 愛閱讀「紐約時報」等刊物, 真正符合新時代領導先鋒者e特色安呢 .
伊e著作如下: 一, 由新生到死滅 . 二, 十三年來我e醫生生活, 三 ,六十回憶 , 六五續憶, 四,診療隨想, 診療隨想續誌.
第三, 有關韓石泉e政治文化活動, 韓先生是革命志士, 伊宛那是新時代觀念e先覺者, 起代先, 伊有佮黃金火先生, 共同創立「共和病院」, 來做咱南台灣政治文化e活動基地, 嘛參加台灣議會期成同盟會, 文化協會, 佮民眾黨…犧牲了袂尐e時間, 金錢佮喟力, 來抵抗日本殖民政治, 佮促進台灣文化e發展安呢, 佇光復了後, 伊夆選做省參議員, 台南市醫師公會理事長, 台灣醫學會第五 屆地方醫學會會長, 景福第五屆聯合同學會會長…對咱台灣e新建設, 有真大e貢獻叨著 .
87.
205
第四, 韓石泉先生 ,對私立光華女中e貢獻, 學校是1929年, 由王兆麟先生開設, 叫做「台南家政裁縫講習所」, 落尾也給改做「和敬商業實踐女學校」, 光復了後 ,由韓先生擔任私立光華女中e第一任校長, 過返年呤, 當選董事長, 由日本教育, 改成咱國e教育系統, 慘澹經營, 才有今仔日e發展, 聽兮講, 1963年6月28,韓先生主持學校e畢業典禮, 續落閣再開董事會, 一直無閒到半暝, 致使操勞過度, 過返工透早遂腦充血, 不幸來過身去, 吓使講, 韓先生最後為校務來殉職, 真正千古功勞, 互人永遠懷念叨著 .
第五, 韓石泉先生, 佇1926年3月, 佮莊繡鸞小姐成婚, 造成美滿e家庭, 伊熱心來教育茲孖兒, 攏有成就安呢…尹大后甡早年夭壽 ,二后甡良信君, 台大數學系畢業, 美國史丹福數學博士,即嗎蹛美國, 三后甡良誠君, 台大醫學院畢業, 即嗎繼承韓內科醫院父業, 四后甡良俊君, 台大牙醫系畢, 日本大學, 攻讀口腔外科, 五后甡良博君, 東海大學化工系畢 ,六后甡良平君, 台北工專肄業, 七逅后甡良憲君, 台大地質細肄業, 次女淑馨小姐, 嫁何耀輝教授, 三女淑真小姐, 台大心理系畢, 美國堪薩斯大學碩士, 嫁化工博士, 四女淑清小姐, 台大心理系畢, 即嗎留學美國,一門世家, 人才傑出 .
第六 韓石泉先生, 是一个虔誠e基督教徒, 做醫生人,毋但是學問好技術高明爾, 伊做人做代誌, 宛那注重道德佮人格, 真有修養叨著, 一生中間, 救治e患者贅贅贅, 具備立言, 立德, 立功,算咱台灣地 ,真偉大e醫生叨著 .
206
最後, 咱韓先生, 伊粒積四十外冬e醫療生活經驗, 有捌講過,咱深深來相信, 醫療業是人生上介重要e職業之一, 也叨做人, 干礁身命一條爾爾,生命是人生e根本, 咱人欲增進健康, 欲預防佮治療症頭,欲延年益壽, 這攏噯靠醫生e智慧,學識,經驗佮技術, 茲醫學生若吓凍敬業服務, 即聲伊e人生, 叨有崇高e價值, 若講著敬業,奚叨是噯將患者e痛苦,看做家己e艱苦仝款,咱噯不斷探討新e藥物, 技術, 儀器, 來救苦救難安呢 .
另外咱噯拚勢來求取新學問, 一四界去收集病例研究,噯有熱情有耐心, 噯愲力細膩, 噯有患者艱苦, 簡那我咧艱苦仝款, 患者治好快樂我嘛快樂, 即款醫病一致仝心情來感受, 噯看重人命上要緊, 毋倘看錢財甚重, 若安呢來講, 拍算叨吓凍來實踐,醫生神聖e使命哩 !這宛那是快樂無限e代誌啦 !這是對少年醫生, 宛那是真優良e醫訓安呢 ,真正是流傳萬世e 金語良言啊 !
{ 附件 } 韓石泉弔詞
( 民國52年7月4日 光華女中禮堂 時71歲 )
維中華民國52年7月4日 ,高醫院長杜聰明為文告知好友
哀傷啊 !石泉仙,汝是文化鬥士, 名士高賢, 抗日時,搶頭香俥拚喟,救世時, 懸壺認真診療, 汝為著正義, 無咧看重金錢, 做人志氣,高風亮節, 出言議論宏大勇敢, 啟新接後, 千古萬年,阮搪咧等汝來立功名落教化,不幸遂來撒手人天 ,崁城雲烏, 鯤海湧大 .
哀傷啊 !石泉仙啊!汝我本晟同窗兮, 算講我比汝加幾年爾爾,
207
咱e志趣接近 ,性格逗搭 ,攏咧為教育來拍拚 ,人生滄海桑田, 汝經營光華女中,又閣籌備長榮大學按佇日後 ,無想世間真艱苦 ,人食老意志愈堅強 ,明明知影硬斗困境 ,汝宛那勇敢潦落 ,真是佩服啊 !文化是國家e後盾 ,教育是政治e先鞭, 為安呢, 代價可付,身命可捐 ,雖然局面歹紡 ,汝宛那親象透早雞公咧啼叫 ,嚎遍半天邊, 有影真正拚勢哩 !
汝給看 ,落霜雪凍呤, 奚松樹宛那茂盛山頂面 ,天人心意 ,永遠後傳, 先生創業e意���, 永遠佮天地仝在 ,創業e果實 ,宛那後世有金石盛業來表現, 咱期待做人, 有善願仁慈心 ,永遠為人群服務, 奈何天地不事, 真正婉惜, 長眠故土, 哀傷啊 !哀傷 !我目淚四湳垂啊 !
咱給想到, 人生百歲, 身體求勇健, 一旦ga目瞌過往 ,奚叨映名聲來傳後世, 我來寫一條歌互汝聽「松開明月,石上清泉,千秋萬歲,永遠新鮮.」
208
2.義氣又閣慈愛e人: 韓石泉先生
犀川一夫 博士
( 王英忠譯 )
韓先生已經過身三年矣, 最近我有聽兮講, 茲親友計劃欲出版,有關紀念伊e追憶文集, 算起來, 我宛那佮先生 ,有幾落冬e交陪情份,真正敬慕伊e人格, 致使講,佇茲 e瞬呤, 我想欲借即个機會, 寫一篇短文, 來表達我e悼念安呢 .
我佮韓先生e交陪, 是逶1949春天開始, 彼時,我應台灣省衛生處, 佮台灣痲瘋救濟協會e聘請, 踮台南市特別皮膚科診所,為癩膏病 (痲瘋) e患者, 來施行畸形修復手術, 韓先生是診療所e董事長, 也叨工作e機會, 我佮伊熟似, 阮e交陪逗搭,心適歡喜叨著.
韓先生迭迭犧牲家己病院e工作時間, 拍拚為咱茲不幸e癩膏患者服務,互我真正欽佩 ,彼年e春天, 承蒙先生邀請, 我去民權路尹兜遐給拜訪, 受著伊真熱情e款待, 嘛有講到癩膏病安呢, 先生誠懇佮愛心e表現, 互我真深刻e印象, 認定伊是一位義氣閣慈愛e長者, 自安呢了後, 幾落冬e交往中間, 迭迭受著伊e教益,即嗎給追想, 伊是我踮台灣所交往朋友中, 最可尊敬e長著之一, 互我感到真好運 ,真快樂安呢 .
209
1960春天, 我決心辭去日本e職務, 逶厝內大細, 攏搬來台灣, 專心為咱茲癩膏病, 給治療服務, 我前前後後佇台南遐, 蹛五年半, 得著先生e鼓勵佮支持, 真感恩安呢…有一工, e瞬呤, 先生遂洶洶提一張非洲史懷哲e相片, 到診所來送我, 彼張相片, 一直到呾, 我宛那猶掛佇遐, 韓先生e意思是講, 噯鼓勵我模仿史懷哲博士e功勞, 來疼惜蒼生, 伊e一番好意, 互我真感動哩 !
除了公務以外, 阮宛那不時有咧開講, 也叨先生對人真正熱忱親切, 互我感到真大e吸引力 ,伊迭迭咧強調, 內村鑑三e「信仰獨立」, 佮「信仰e嚴肅性」, 作一个基督徒, 伊無愛特別受人影目e所在, 也叨伊上愛「無形式e基督徒」, 照伊e看法, 基督徒是義佮愛e生活實踐者, 所以伊排除信仰e形式化, 吓深入生活中, 去熱忱給實行卡重要哩 .
韓先生, 卡早捌給我講到, 伊壯年時代, 為台灣自由奮鬥e經驗, 另外, 有關對日殖民政策, 批判日本e錯誤政策, 我有捌(曾經)讀過矢內原忠雄先生e著作真有了解, 韓先生e話,���卡互我有仝感, 而且欽佩先生, 對正義來勇敢實行安呢 !
先生佮我開講e中間, 伊袂感覺我是日本人, 感到歹勢,遂毋敢來講 ,伊真無客氣, 來批評彼當年日本e殖民政策, 互我深深了解, 伊是踦佇正義來發言, 毋是私人不平e怨歎, 所以我並無反感,遂顛倒真認真來收聽哩 .
有一擺, 我去拜訪伊, 伊給我講到犀川男e代誌, 明仔載,伊欲
210
去台北, 歡迎一位日本來e律師, 「也叨日本時代e時瞬, 我去互官廳兮掠去關, 佇即个要緊e空縫, 伊甘願潦落 ,為我做正義e辯護來肖媵,我欲親身向伊道謝安呢, 」先生對正義佮不義, 分甲清清清, 明明明, 即點互我真欣賞, 真愜(ga4)意叨著 .
佇另外一方面, 伊是一位有強烈愛國心e人, 佇伊e病院內底, 對遐求診e患者 ,宛那吓得著同情佮溫暖 ,對彼款互人厭儃(sen6)e癩膏患者, 伊嘛真熱心來幫助, 認真給治療,伊安呢長期 擔任診療所e董事長, 一直到過身為止 .
叨頻若診療所有困難e時瞬 ,我叨吓去請教伊, 攏得著伊熱心e幫贊, 伊嘛有到阮兜 ,拜訪幾落擺,真親切來關心, 阮私下e生活安呢, 伊有逶伊出版e著作送互我, 尹二公子結婚e時瞬, 嘛特別邀請我參加婚禮, 茲攏是我無限甜蜜e回憶哩 !
我即嗎, 雖然由台南搬到台北蹛, 毋閣想起卡早, 佮韓先生交陪彼段日子, 逐傢逗陣真心適, 宛那互我永遠記稠稠安呢 .
211
3. 回想早期e韓醫師
-何耀坤- (1966)
89.
拄好佇25冬進前, (約民國30年) ,阮兜規口灶, 搬到文廟頭前e石門巷仔內, 彼時我是州立台南二中二年級學生, 阮小弟耀輝讀一年級, 有一工暗頭仔, e瞬呤, 門腳口, 遂洶洶來一位醫生, 手摜外診e皮包, 阮馬上知影, 伊是真久無看著e韓醫師安呢,(韓醫師去日本留學五年, 剛返來無外久) ,伊問我佮阮小弟, 即嗎佇佗位咧讀冊, 落尾也, 又閣笑笑也點頭行來離開安呢 .
阮細漢e時瞬, 是韓醫生e「主顧」之一, 彼時韓醫生師, 剛(daa2)逶日本熊本醫科大學, 提著博士, 返來台灣無外久, 彼工拄好搪著舊厝邊患者, 宛那加減招呼一下, 場面雖然三分鐘爾, 毋閣呢 !對阮茲自細漢無老父e兄弟仔來講, 宛那真親切, 真有鼓勵作用哩 !伊安呢仁慈,關懷,到呾印象深刻, 有影記甲稠稠稠安呢.
自彼工又閣經過十冬了後, 韓醫生師揙做阮小弟e丈人,是阮親傢叨是, 安呢逐傢熟悉(sai6) ,有卡親密叨著…也呾我自中學開始,叨真愛閱讀, 而且愛收集生物佮哲學方面e書冊, 也叨韓醫師有大量e藏書, 致使講, 我迭迭給拜訪佮借出, 我佇中學擔任生物老師e中間, 有時仔, 利用閒時e空縫,整理寫成科學著作了後, 一定拜託伊來批改考證, 伊普通時仔做人溫順恬恬, 毋閣對科學論文e批判, 宛那是真深銳嚴格叨著 .
212
另外一方面, 伊宛那是真優秀e文學家安呢…嗯才e瞬呤, 伊e自傳「六十回憶 」,胡適先生有給謳咾哩, 即本冊有來感動真贅少年學生, …另外我嘛真愛借伊e書冊, 也呾原因叨是, 伊e書冊, 逐本攏有親身讀過, 而且留有紅線, 指示重點, 即款書冊, 互我閱讀了後, 毋但節省時間爾, 而且有來啟示重點, ���中若有疑問, 嘛吓凍來請教, 若拄著伊診療有哴縫e時瞬, 阮嘛吓佮伊講時事 ,科學, 抑是教育, 伊e言論穩健有力, 批評確實, 有影互我對社會現象,抑是科學思考, 攏有真贅e啟示安呢 .
韓醫師少年e時瞬 ,醫術叨已經出名矣, 佇抗日文化運動中,嘛是一個个中堅人物, 真有民族情懷安呢…伊嘛愛看正音(平劇) ,有幾落擺教我欣賞平劇e方法, 伊對基督教信仰e告白書「由死滅到新生」, 有來感動而且安慰, 茲贅贅失去孖兒來哀哭e同胞 ,韓醫師特別謳咾日本e矢內原忠雄, 伊病院內底有掛矢內所贈送e相片, 讚美伊是「日本e胡適先生」, 頻若佮伊有摯接e人, 攏吓深深e感到, 伊自本叨.維護正義, 講話攏針對事實,而且伊e見解佮主張, 真正周全逗搭安呢甡 .
伊性格溫和, 對人寬容, 佇講話中間, 絕對袂洩露仈人e是非,伊自少年叨參加政治活動, 毋閣無親象一般政客, 一枝嘴糊累累, 真正老奸臣 ,咧夯順風旗, 反起反倒, 做人虛偽假公正安呢, 伊嘛袂互私利來肖抴(誘) ,另外一方面, 伊e身體真勇 ,真磊斗(美好) ,目睭佮記憶力, 攏真正一度讚e ,伊有給我講幾落擺, 我目色真好,免閣掛目鏡哩 ,叨吓凍輕輕鬆鬆, 來查袖珍英語字典安呢, 有影勇伯仔做了有起哩 !
213
韓醫師叨已經過身三年矣, 我依原猶吓記咧, 喪禮彼暗仔, 有雷公sina大雨pipe叫, 簡那咧惜別即位仁慈e醫生仝款, 我頻若有機會去台南基督教墓地e時瞬, 看著韓醫師墓石反面所刻e, 互後代e遺言, 感覺每一字攏有真大e感動力, 佮勉勵e力量安呢 .
214
4. 憶慈父
- 韓淑馨-
90.
家父留落來e遺像, 差不多逐張攏真慈祥, 真有人情味, 毋閣即三冬以來, 我真驚惶, 我驚吓來增加心肝頭e苦衷, 遂一直無勇氣給瞻(siam)一下, 閣卡無法度來書寫追思文, 無外久進前呤, 阿母照鏡時瞬, na看na怨歎, 干礁看著家己孤單e面容, 宛那吓艱苦哩!四十外冬以來, 恁阿爸佮我, 雙人e面容, 囥佇仝相片內, 抑是仝框內攏逗陣安呢, 甚至連簽名嘛排逗陣, 也呾即嗎, 洶洶來失去伊, 生活簡那失去重心矣, 聽著母親e心內話, 互我深深來覺悟著, 母親e哀痛, 有影比阮做孖兒閣卡深刻安呢 !
家父過往前二工彼暗, 我食暗飽呤, 厝內款好勢了後,一時心機浮夯, 想欲緊返去後頭厝探親, 我猶記甲清清清, 彼暗伊一下見到我呤, 阿爸嘴笑目笑, 真歡喜, 伊指著新買e「矢內原忠雄全集」, 佮新家具, 叫我評賞一下, 安呢情義深深, 唉 !卡講嘛是父仔孖, 伊溫順咧講「阿馨, 汝近來有卡肥身哦!」
跁就樓頂了後, 伊指奚(he)涼棚頂頭e葡萄, 真歡喜給我講「汝給看,一綰一綰, 累累串串,無外久呤, 逐家又閣有口福矣」,毋閣呢, 人生e機運, 叨袂按算e哩 ! 干礁二工爾爾, 咱健郎,慈愛e父親,叨安呢洶洶來做古去, 互我對厝內e葡萄, 花卉,飼鳥,攏柴柴慒慒無心情矣 .
215
1963年6月30日前一暗, 阮才食暗頓呤, 為著彼暗欲踮阮兜,來舉行光華女中董事會, 家父親身督導, 來招待十外位貴賓e茶點飲料, 彼工,母親無佇厝內 (去台北) ,家父恐驚也虧待貴賓良友,阿弟仔有咧喢(cap)嘴 ,「去水果店買叨好勢,厝內嘛猶有香瓜哩」毋閣阿爸講, 我自來叨真看重友情哩, 咱應該好好給招待一番, 落尾也, 阿爸指定噯買冰淇淋佮荔枝, 佇茲吓凍看出阿爸普通時仔, 做人e誠懇, 禮數週到, 等暗會煞場後, 阿爸就樓頂歇睏e時瞬,已經即欲十二點矣 .
過返工透早八點半, 慧嫻媳婦感覺, 咱阿爸平常時仔,生活真有規律, 按怎超過時間猶未落樓 ?心肝頭起疑心, 自那趕緊跁就樓頂查看, 萬萬想袂到, 即時瞬阿爸已經彎身倒床, 真痛苦咧滾弓(掙扎) ,我嘛緊拚到樓頂e時瞬, 阿爸已經袂講話矣, 而且漸漸昏迷,失去知覺矣 !
也叨甚過了著驚, 我無法度出聲叫「阿爸」,宛那真毋甘看著伊痛苦e表情, 一時想無步, 尾也干礁pe6性命按摩伊e雙腳爾爾…唉 !親情難報 !肝腸寸斷…阿爸e一生, 經歷了大小各種災難,託上帝e保庇, 攏吓凍化險為夷, 大事化細, 我心肝頭一直祈求即擺吓平安渡過安呢 .
阿爸病重彌留一工外, 也呾消息慢慢湠開, 即聲 ,遂無顧著「謝絕探病」e字排, 咱茲親友, 連番再次一直溢來, 最後, 有影無法度挽救來勢凶猛e腦充血, 第二工早起九點三刻, 阿爸佮阮訣別矣, 蒙主恩召矣, 安呢洶洶e離別, 互阿爸袂赴來佮眾人道別, 嘛無法度知影伊臨終時e願望安呢 !
216
91.
家父是大無閒人, 除了醫務無閒莿莿外, 對咱茲社會公益方面,宛那是含心敆命, 做甲盡磅逗搭安呢, 伊盡心盡力來服務社會,真尐考慮到家己e利益, 逐��拚暝拚日大辛苦, 宛那袂去冷落家己厝內大細, 實在無簡單哩, 「有老大人佮嬰仔仝蹛,厝內吓閣卡溫暖卡甜蜜」, 這是家父嘴邊e口頭禪, 外嬷在世e時瞬, 有捌長年來佮阮蹛做伙, 逐傢來逗陣心適真歡喜安呢, 無論奉待外嬷, 抑是對待外傭, 阿爸攏是忠直意氣, 關懷逗搭, 又閣佇無閒中,尋哴縫時間, 互規傢人歡喜快樂, 享受天倫之樂叨著 !
也呾頻若市內, 有咧舉辦有意義e社教活動時瞬, 伊攏袂給哴過(錯過), 逐擺嘛拚第一, 攏僬綴(de4)甲到, 伊安呢一路領先, 歡歡喜喜, 浩浩蕩蕩前往欣賞, 袂輸簡那囡仔咧心適仝款, 不管時攏映望吓增加見識, 另外遊山玩水, 拍高爾夫, 嘛攏真愜意叨著, 莫怪人講伊精力充沛, 氣色赫好, 有影袂輸少��人哩 .
親象阿爸, 彼款看盡世間長短, 江湖潦赫久e人, 看電影宛那吓感動甲流目淚哩, 伊有去看「梁山伯祝英台」, 後段戲齣, 搬到梁山伯欲過身e時, 尹阿母哭訴「白髮人送黑髮人」 ,互阿爸觸景生情, 目淚四喃垂, 彼時四弟良俊佇鳳山服預備軍官役 ,禮拜日返來, 阿爸嘛給伊紹介影片, 又閣招伊重看一遍安呢.
佇日本時代, 家父(阿爸) ,不時佇厝內, 咧欣賞正音(平劇)e曲盤安呢, 彼時我少年無知識, 認定阿爸興即味兮, 有影無夠高尚,袂大扮叨著, 嘛真見羞互囡仔伴 ,聽著奚「咿…锕…」e聲音,
217
噹時仔(原來)阿爸有所苦衷, 這宛那是 ,伊用來緬懷祖國文化牛角(象徵) e步數安呢 !
光復了後, 伊對祖國e語文, 真正看重, 嘛真正推荐安呢, 來創辦「友好國語進修班」, 當選第一屆省參議員e時瞬, 伊早叨吓曉講北京話矣,也叨阿爸安呢苦心督導, 盡力來影響以上, 落尾也, 佇彼暫伊無閒莿莿 ,奔走議會e歲月中間, 我宛那有法度, 用半生不熟e國文, 寫信互伊, 來安慰感謝伊, 含心勞苦e親情哩 .
阿爸熱愛家庭, 真愛攝相「全家福」 ,厝內若有紀念性e日子,奚叨名正言順, 聘請攝相師, 來厝攝相,…伊逐年e春節過年, 攏吓設法攝全家福安呢, 1962, 佇台大讀冊e弟妹, 返厝團圓過年,另外, 大弟良信宛那即欲去美國留學, 阿爸認為機會難得, 逐傢來團圓, 即聲趕緊來攝全家福合照相片安呢, …也呾彼个時瞬,我因為囡仔細漢e關係, 驚契車艱苦, 無法度逶高雄 ,趕返來過年,嗯才自那無返厝安呢.
啥人知影, 彼工阮阿爸 ,踮厝內暱暱看, 真期待阮返去 叨著, 對出嫁九冬e女兒, 宛那真看重安呢 ,也呾袂使缺席哩 !伊才特別派人, 逶台南趕到高雄來通知, 叫阮絕對噯返去團圓, 互我深深來感動…也呾現主時厝內e「文化走廊」, (由阿爸創設) ,壁頂頭所掛e全家福 ,叨是當年 阿爸e「遠見」,才倘留落來e家寶, 叨是啦 !
218
無盡e思念, 紙筆叨真奧寫, 家父(阿爸)最後一擺來高雄, 門外呼喚e慈音, 到呾宛那不時佇耳空邊 ,咧踅咧遨, 想著阿爸離世e前日, 宛那猶無閒公私代誌 ,咧玲瓏踅, 嘴角不時充滿著笑容, 無論歲月按怎流轉, 阿爸e音容, 吓愈來愈清愈明哩 !
219
5. 往事記甲牢牢牢
-韓李慧嫻 (1966)-
92.
頭一擺看著阮礁倌, 是佇聯合招生, 成大試場e頭前遐 ,伊互我e印象, 是一个慈祥, 親切, 又閣有尊嚴e學者, 踦佇伊e面頭前, 我家己感覺無額無料, 無論講, 身材體形, 抑是學識方面, 攏互我順勢, 想欲映望伊, 吓凍來給阮牽成佮指導安呢 .
佇我結婚彼工呤 ,伊踮禮堂講e彼段話語, 互我印象上介深刻…「阮吓盡心盡力,來維持真好e礁倌媳婦關係,逐傢好逗陣,各位親友嗣大,希望汝看吓到阮e即點約束否? 阮猶有五男二女,猶未嫁娶, 佇茲多多映望, 才拜託恁吓凍給阮介紹」 ,結局e瞬呤,伊真正有來實行諾言 ,逶媳婦當做家己e查某孖仝款對待 ,一切公平, 無咧輕分, 互我佇韓家, 一絲叨袂感覺礙虐(qaiyo 31)拘束佮生份(陌生)安呢甡 .
礁倌真愛cua3規傢大細(含護士,員工) ,去野外郊遊, 呼吸新鮮空氣, 雖然醫務無閒莿莿, 毋閣佇生活中間,伊吓找尋時間, 佮厝內e人同樂, 有影真重要, 這宛那互伊記牢牢咧, 伊真愛攝相做紀念, 茲代誌定著噯開袂尐e金錢哩, 毋閣伊真了解, 有寡代誌真重要, 卡贅金錢嘛買袂著叨著 .
有一工, 我佇樓頂, 陪伴剛(daa2)出世, 猶未滿月e紅嬰仔,礁倌
220
趁哴縫e時間跁起來, 看著尹金孫, 搪咧睏甲真安祥 ,真落眠安呢, 看一暫仔了後, 自那順勢來感心評論「真正奇妙呢,一个細胞,吓凍踮母體內,造成迮尼完整美妙e成體出來, 真正是奧妙再奧妙」啊 !
真罕咧佇暗時仔, 診所無患者, 哴縫e時間, 又閣無其他代誌纏身呤, 伊叨趕緊ng4入去書齋, 閱讀伊e醫學雜誌, 抑是去寫作安呢, 一直到將近十二點呤, 礁傢(婆婆)踮二樓, 吓摧策伊就樓頂來歇睏, 伊才關燈跁起來叨是 .
礁倌(公公)e書信, 有影是我豐沛e精神食糧, 逐擺我頻若想起, 伊佇百忙中間, 宛那吓哴出時間, 無惜阮茲外位就讀e後輩, 認真給阮教誨佮鼓勵, 安呢來講, 遐e書信, 叨重(ding3)倍要緊哩 !有時也, 嘛吓將剪報或者是有意義e文件, 仝齊寄互阮看, 互阮感受著, 嗣大有來關懷e誠意, 互阮有安全感安呢 .
有時也, 伊欲去會場講演進前, 踮厝內穿一套西裝, 抑是結一條新necktie時, 伊毋是一个六七十歲e老伙仔, 洶洶遂揙一个穿新衫來現青春, 歡喜wewe, 陶醉佇家己身影e少年傢仔哩, 所以講, 伊互我感動 ,迭迭有咧講「我即嗎外表有卡臭老,毋閣內心青春袂認老,簡那三十外仝款,我猶真少年哩」,這話頭真正有影啦!
暗頓了後, 我迭迭踮二樓, 來觀看阿公佮幼孖, 佇樓腳美滿幸福e情景, 伊綴佇尹阿公影身e背後, 咱「信一」小朋友, 大搖
221
大擺, 揮動伊短短e手骨節仔, 逶阿公e一步行做二三步, 阿公有時也,嘛斡頭看尹愛孫e古錐款, 嘴角現出笑容安呢 .
我懷第二胎e時瞬, 搪咧台大病院上班, 阮嗣大人真體貼, 叨逶俼飼信一e責任 ,親切給擔起來, 自安呢了後, 嗣大人暗時仔,叨無閒莿莿, 有影是代誌了了, 阿嬷無閒咧泡牛奶粉e時瞬,阿公宛那認真咧換尿舒仔…想著尹二人, 日時赫尼無閒, 半暝猶閣照顧金孫, 有影內心真歉疚安呢哩 .
阿公真愛聽正音(平劇)e曲盤, 阮規陣孖孫圍佇伊身邊e時瞬,伊吓就歌詞, 唸互阮聽, 嘛推荐伊興即味e正音藝術互阮,有時心情好 ,嘛吓大聲唸唱, 歡喜一下, 也叨醫務繁忙, 禮拜日無閒就教堂做式, 毋閣伊對聖經e理解, 是真正深入叨著 .
有一擺我佇外口, 拄著歹空頭刺激, 返厝了後 ,慘泣(ce4)流目淚, 伊門診看煞了後, 提起聖經, 拍開馬太福音第5章10-12節,輕聲細說叫我唸落去, 唸彼三節了後, 我心肝才開矣, 感覺平安矣, 伊內容如下 :「為著義來受壓迫,即聲恁有福報矣,也叨天國是尹e人, 若是我辱罵汝,誣賴各種歹話來毀謗汝,安呢汝叨有福矣,汝應該快樂才着,也叨恁佇天國e賞恩,真盛大膨沛,佇恁進前e先知,仈人嘛是安呢壓迫尹叨是」
阿公真欣賞阿嬷親身落灶腳, 來做好食e手路菜色, 有時瞬嘛吓來拜託, 「盈暗,吓使來一盤Tomato雞絲飯否?」一下到暗時呤, 伊叨量早到樓頂來食膳饈(cecau61)好料e ,阿嬷坐佇身邊, 看伊食甲真起磅, 真落味,「也呾即盤比菜館,菜色加重(ding3)倍
222
好食哩」,阿公安呢謳咾. 阿嬷笑笑也印「 thank you 」!
真罕咧, 有幾落擺, 阿嬷家己一个人落高雄, 抑是去台北孖孫遐,伊逗留e時間, 卡慢幾工返來爾 ,阿公叨佇飯桌仔咧瑣瑣(sap)唸「咦!奇怪啊!已經赫贅工矣,嗯著緊返來啊!」,我笑笑也講「阿爸,汝咁有寂寞矣?」 「無啦 ! 也呾時間到矣 ,嘛應該返來矣」,看 伊安呢寂寞無聊e背影, 即聲我叨緊夯筆摧策,叫阿嬷緊返厝內才好勢哩 .
( 1966年6月5日, 回憶佇美國加州 )
223
6. 追思阮父親
-寫佇先父逝世三週年紀念日-
韓良誠.
94.
拍開窗仔門呤, 雨毛仔一絲一絲飄落來, 想起卡早少年時, 阿爸迭迭利用落雨卡閒e時瞬, 互規傢人安呢歡喜, 佮阮仝齊開講, 抑是聽音樂娛樂,…唉, 也呾即嗎呢 ? 「景色依舊,人事已非」 ,我干礁吓凍, 用心肝頭咧暗唸爾, 幻想著伊, 現主時宛那佮阮咧逗陣 : 伊e嘴角出現歡喜e笑容, 佮慈祥e面腔, 呾即嗎時間咧過真緊, 伊無法度閣來, 牽引著阮生活e趣味, 歡樂, 刺激, 安慰 唉 !想到茲呤,我心肝一瞬e絞滾, 有影制節袂牢, 目淚強強欲拚出來安呢 !
也呾時間過了真緊, 燃眉(liammi61很快)阿爸永別, 嘛已經三冬矣, 即三冬中間, 我暝日思念阿爸慈祥e面腔, 是無哴(lang4隔)工無哴時 ,也叨我佮阿爸���陣即二十外冬e時間, 伊安呢做人慈愛,痛惜嗣細, 互阮領受著做孖兒e 快樂,伊用e智慧, 來啟發阮,按怎佇學習中求進步, 伊心肝頭充滿了同情佮關懷, 安呢崇高無私e愛心, 互我知影 按怎佇生活中間, 「愛人如己」, 發揮人性e光彩叨著.
224
佇阮兜九个兄弟姊妹中, 算講我是上介好運e人, 做囡仔時代,我上介歃(saa4極愛)著動植物e研究, 結局e瞬呤, 自那互阮阿爸「聖聖掠準準」我上代先進入醫界, 即聲互阮父仔孖, 逗甲峇峇峇(va6), 卡捷(ziap常)咧交喢安呢, 叨頻若拄著歇寒歇辣(寒暑假) ,弟妹搪咧無閒尹家己e代誌時, 我叨吓去診療室, 給阿爸幫忙逗叁仝, 伊嘛順續吓給我指導佮鼓勵安呢, 互我佇學習中間, 得到快樂歡喜安呢甡, 致使落尾e瞬呤, 阿爸時常逶伊診斷出來e特殊症頭, 連番再次一一講詳細, 倘來引發我研究e動機叨是, 也呾即嗎給想起來, 伊e一言一行, 佮遐寶貴e經驗, 宛那是我生命中,上介好e禮物安呢 .
父親雖然有年歲矣, 毋閣伊宛那猶保持著, 永遠青春e心情,伊佮少年人仝款, 頭腦精光, 樂觀進取, 一絲叨袂安呢「鐵齒,保守,舊頭腦」哩 ! 吓記咧我佮阮牽兮, 訂婚無外久呤, 伊曾經踮來批內底講著, 即暫仔, 是汝充滿著欣羨, 映望, 美夢e時段, 希望汝吓凍好好給運用叨是…
彼个時瞬, 我迭迭藉機會返厝, 來往佇台南高雄中間, 致使講阿爸佮小弟小妹, 真敖給我創治, 給我刮虧窘耍笑安呢, 阿爸不時以伊真特別e笑聲佮表情, 來問著才二歲e信一(二哥大孖), 「啥人上愛去高雄 ?啥人上疼三嬸?」續落信一 ,疲疲qetqet31給印「啥人毋知是三叔啊?」,講煞, 逐傢笑甲嗨嗨叫安呢…阮厝內即款心適歡喜e氣氛, 全全嘛是阿爸 ,佇業餘哴縫e時間,給創起來e哩 !
-
225
父親(阿爸)教育咱茲嗣細,真熱心, 有影是盡磅逗搭矣,伊不時講著, 伊坎苛e人生旅途中間, 所感受e真理,欲來給阮安慰安呢,互阮佇空課路中間 ,若拄著敗喟(挫折) ,落坑e時瞬, 宛那吓凍後腳踦在在, 給堅強拚落去, 六冬進前, 我大學卒業去做兵, 一下聽著夆分發去馬祖呤, 心肝頭真ut卒失望, 規箍人安呢失志艱苦,真正無俥拚喟叨是 .
咱茲親戚朋友, 有多多給阮鼓勵佮安慰, 尤其是阿爸, 伊安呢前前後後, 連番再次, 寫批來勉勵加油, 叫我勇敢潦落, 拚落, 拂落…遐e批信, 我攏簡那寶貝e ,給珍惜收藏安呢, 也呾即嗎給唸起來,宛那袂輸阮阿爸, 猶身驅邊咧講話仝款哩 !
也呾阿誠啊 !人生e經驗 ,是多方面e ,有臹贅人到食老才知影,另外有e人, 一世人永遠毋知影, 奚叨是 : 咱做人,頻若身體健康勇氣正常呤, 對任何一款經驗 ,毋管伊是外尼艱苦不如意, 外尼歹紡, 毋閣 ,歸尾e結局 ,宛那對人生攏是有助益e哩 !
「為咱茲馬祖前線e軍民, 噯含心敆命, 拍拚來服務, 為同胞來解除心苦病疼, 才袂辜負汝到他鄉外里, 應盡e使命叨著, 卡拚勢e ,後擺食老e時瞬, 汝才吓珍惜, 這是汝即世人, 上介值咧紀念, 嘛上介有意義e時段安呢甡, 咱來讀聖詩, 祈禱, 練身體, 讀冊, 愛心, 互伊變成汝美麗人生e一面叨著 .」
汝咁有讀著拖爾斯泰大師,下腳e一段話語否? 「若準汝吓凍幫一隻離巢e鳥仔孖, 返去伊e巢內底, 抑是吓凍來替仈人做淡薄代誌, 叨算講回報干礁一个熱誠e笑容爾爾, 安呢做嘛互咱做人
226
真有價值安呢」,讀到茲呤, 苦情悲哀,我心肝頭一瞬e絞滾, 我痛失一位慈父, 一位良師, 我失去e ,實在真贅真贅…
雖然我宛那知影, 阿爸總有一工, 吓放落一切來離開阮, 毋閣呢 !代誌來了甚過洶狂, 互阮著驚, 失魂落魄, 毋知欲按怎才好?原本, 我想欲踮學術上, 繼續深造e計劃, 叨自那去互「父親死別」來撕裂去, 也呾到茲來矣, 我亦袂忍心看著, 阿爸親身四十冬,血汗建立e台南內科醫院, 安呢叨停業矣, 閣卡真煩惱,日後厝內大細e生活佮教育費用, 是欲按怎來蹤(張羅)哩 ?
講起來汝毋信, 彼瞬厝內e經濟乏搭…除非給病院賣掉, 猶無, 是無法度維持半冬爾, 另外e瞬呤 ,阮二哥出國e費用,宛那是偎西街仔教會, 標會仔標出來e ,一大部份猶原噯倚靠,後日仔來分期納錢哩…講起來, 阿爸無想著講, 伊e人生,吓赫尼早叨結束矣, 抑無, 普通時仔, 干礁咧想仈人爾, 遂無想著家己 ,佮厝內大細e踦起安呢 .
為著欲擔起做兄哥e責任, 亦為著欲繼續發揚家父崇高e醫德,我佮內人, 懷著無限e哀愁,痛苦, 目淚流滴; 最後姑不而衷,來離開阮所敬愛e醫學院 ,佮外文系e師長先進, 返來故鄉服務安呢,想起彼當年, 阿爸毋敢勉強, 挽留我返厝幫忙醫務, 毋閣伊有講過, 「繼承父業, 尤其是繼承出名e病院, 奚是真硬斗e代誌安呢 ,也呾阿誠啊 ! 我相信汝是吓凍做到啦 ,也叨汝有比我閣卡優e先天後天條件」也呾開業無啥乜撇步, 干礁愛心愛人頭一層 ,
227
叨親象醫聖史懷哲仝款哩, 到呾來矣, 茲e話語, 真正來勉勵我,真正來堅定我e信心安呢 .
我初初幾月日, 返來台南開業e時瞬, 患者希微, 一工迭迭看無十外人爾, 我孤單拍拚, 一步一步摸索前進, 也呾即嗎阮阿爸, 無法度閣給阮指導矣, 惟一吓來安慰e代誌是, 我發現有真贅人,尹跋死忠兮, 來愛護肖媵(tin6) ,即陣人中間, 我相信袂尐人, 尹無的確是(可能是)直接間接, 卡早有領受著父親e愛心著e .
即嗎, 尹以疼惜老父e心情 ,來疼惜尹孖, 互我享受著家父所遺留佇世間e光彩安呢, 伊e一切拍拚, 為我來舖一條光明大路,互我平步青雲業務旺廣,吓凍得著患者來信賴肖媵,叨單單即點, 我已經是真幸福e人囉 !
即嗎給想起來, 家父一世人, 有赫尼贅e成就, 真正是難能可貴, 伊是一位好尪婿, 好老父, 好醫生, 而且是一位熱心教育事業, 社會福利e工作者, 閣卡是一位了不起e學者安呢, 伊迭迭有來警覺, 而且謙虛, 來接受新知識, 伊自來袂浪費時間, 一分一秒攏計較, 也叨伊欲完成e代誌 ,有影甚贅矣 .
伊不時有咧講「一寸光陰,一寸生命」,互我想起,阿爸臨終時,安呢不屈不擾 ,滾弓規工, 簡那咧暗示阮, 「恁煩惱啦!我猶有真贅代誌,欲完呢,我袂來離開啦」, 雖然伊e心願, 無法度繼續來服務人群, 毋閣伊一生e功德, 真正互咱景仰 ,真正互咱懷念安呢 .
228
來源：2023 36 台閩文學韓石泉60回憶 (下 )/韓石泉 p200.-228.docx
韓石泉229-245
7 感憶慈父
-韓良俊-
97.
三冬前, 安呢無張無弛, 佇無疑悟, 無心理準備e情形下, 洶洶���擺e急症, 互我痛失慈父, 逶彼時開始, 我才徹底來驚悟, 規个人生完全崩盤, 來搥心肝哩,唉 !我對阮敬愛慈父e感情 ,是仁仁仁, 深深深 ,有影卡講嘛是阮阿爸哩, 也呾(adaa)即擺e辛酸, 互我痛切來體會, 啥乜是心靈上真正e寂寞安呢 .
(壹 ) 吓記咧九歲彼年, 佇疏開地遐, 有一回, 綴(de4跟隨)阿爸外出, 返來e時瞬, 經過一崛埤仔, 阿爸無細膩去滑一倒,跋落去水內, 彼時我猶細漢無膽頭, 活欲驚死, 自那na哭na喚「阿爸 !阿爸!」, 即款代誌, 是我有記池以來, 頭一擺感受著, 失離阿爸e恐怖, 續落即十外冬呤, 阮父仔孖逗陣平順快樂, 無閣再驚惶安呢, 毋閣, 無疑悟第二拜降臨e危機, 竟然佇26點鐘內, 遂夆無客氣, 真無惜情, 給阿爸永遠cua3離尹茲孖兒哩 !
( 貳 ) 佇彌留病危彼段時間, 我心情慘悽(ce4) ,自來叨真尐
就教堂, 嘛安呢pe6性命祈禱, 心肝內哀聲喚喊「毋倘啦!毋倘啦!毋倘離開阮,千萬毋倘發生彼款代誌」,…毋閣呢, 看著阿爸安呢昏迷不醒, 喘袂離, 有影「目睭金金人傷重」,彼个暗暝, 互我感受著, 人世間悽慘悲情e苦楚, 是袂講了了安呢, 感覺規社會e冷暖長短, 攏無值咧我留戀啊 !
229
( 叁 ) 阿爸在世, 上au4尾彼段日子, 是我一生中間, 上介懷念e記池, 安呢一幕又閣一幕, 親象走馬仔燈咧踅咧敖(qo2轉)仝款, 彼時阿母就北, 參加淑清小妹畢業典禮了後, 稍踮良信阿兄遐, 蹛一暫仔 ,阿爸因為醫務袂凍停甚久, 自那先返來台南, 我拄好佇鳳山做兵, 逐禮拜日, 攏有時間返來歇睏, 逐擺返來,攏看著爸真孤單寂寞, 也叨阿母暫蹛台北哩, 為著欲排遣寂寞無聊, 返來e時瞬, 阿爸攏吓招我去看影戲安呢 .
也呾一工辛苦了後, 咱茲尾場e電影, 嘛即欲開始搬(做)矣, 「阿俊,佇延平遐 ,所搬彼齣戲,簡那真好看哩, 行啦! 咱來去!」家父照例來肖招 …咱逐傢攏有即款經驗, 也叨好朋友來肖招看戲, 實在真歡喜, 何況閣是家己老父來邀請 ?
「好啊, 行啊!」逐擺我攏趕趨趨, 苦毋講先行先贏, 來拚頭一扮e ,叨趕緊答應, 拚到戲台看戲, 毋閣呢 !我心肝頭宛那驚驚, 也叨自細漢攏叨慣習…, 迭迭去戲台呤, 毋是逶中間看起, 抑無, 叨是半中暫時瞬, 去互急診e患者叫返去, 真正礙虐(qaiyo31)無心適哩, 好咧佳哉, 佇尾場即段時間, 宛那真尐, 閣再發生仝款e代誌安呢.
也呾電影開始搬(做)了後, 阮父仔孖, 仝坐椅子位身邊, 佇烏暗中. 我迭迭將目色, 徙開銀幕,偷瞻(siam)阿爸e表情, 阿爸看電影時, 有一个習慣, 總是哴(lang4)一段時間, 伊e下頦叨吓來點頭照劇情e變化 ,來哈哈笑聲, 抑是低聲來怨歎一下, 觀察伊茲小動作, 嘛真心適哩, 互我佇烏暗場中, 宛那吓制節袂牢, 來給笑笑e安呢, 想起來宛那真幸福叨著 .
230
98.
電影看煞, 出來了後, 阿爸吓cua3阮去電影街夜市仔Sakariba食點心, 伊上愛食肉丸我嘛仝款陪伊食肉丸, 上無愛食「棺材枋」點心, (後改雞肝枋) ,對伊印象醜,連講叨無愛講, 我感覺這是阿爸朝氣夯旺,起磅有生甡張 (尊嚴) ,所以袂凍互有關「死」e觀念, 來礙著日常生活安呢 .
落尾也, 噯返去厝囉 !阮仝齊行出夜市仔, 家父吓曳(et)手叫一台三輪車, 才閣挑工給我扭(qiu4)去車頂, 假使車伕若恬恬,心照不宣, 來踏動車身, 阿爸叨吓真歡喜, 嘴笑目笑對我講「哈 ,今仔日,又閣坐到第一類e三輪車矣」,噹時也(原來)阿爸逶戲台前e車伕, 分三類 ;第一類, 叨是免吩咐, 叨吓曉自動載到厝e車伕,以我經驗所知, 車伕以第一類上贅, 第二類是需要說明「韓內科」,才吓知影, 第三類是經過說明, 猶原毋知「韓內科」佇佗位?即類e車伕上尐, 大部份是剛(daa2)來台南無外久安呢, 若一半擺仔去拄著e時瞬 ,阿爸宛那吓摧撟, 吓給虧「嘿!韓內科,汝毋知佇佗位?」續落呤 ,阮父仔孖, 遂相對苦笑起來 .
不而顧呢 !無論是佗一類車伕, 家父攏「一視同仁」哩, 真正慷慨,車駛到厝呤,伊叨自動塞互伊一把銀票, 數目定著超過「時價」安呢,阿爸自來叨毋捌佮車伕咧計較哩, 有時瞬, 阮吓感到甚拍損,咁噯付出赫贅錢 ?阿爸總是印講, 「尹攏是散赤e勞動者, 加互尹幾个錢, 是無到佗位去啦 !」
231
入門了後, 若是無患者咧等候, 阮叨吓跁起二樓, 續落e瞬呤,吓來一番劇情e討論佮感想, 逐傢來發表, 有一擺, 阮仝齊看「逃獄十二小時」,返來了後, 為彼个主角, 悽慘e落場來哀歎,阮父仔孖相對晃頭, 真正毋甘安呢, 頭尾干礁一句, 「伊實在甚過可憐哩」,結局e瞬呤, 二嫂拄好逶三樓行落來, 才咧愛笑講「恁看影戲吓赫入迷哦」,啊 !對我來講, 家父毋但是慈父兼良師爾, 又閣是上知心e朋友, 我真正好運, 有即个好老父, 毋閣即嗎呢 !有影歹運,咱規傢又閣失去伊啦 !
(肆 ) 我對家父e追憶, 有真贅是佮1962出版「診療隨想」有關係, 彼本冊e內容內底, 有經過真斟酌認真校對e文句, 冊名決定,封面, 設計, 種種東西, 攏是我對阿爸, 上介深深e思念安呢.
佇兄弟姐妹中間, 阿爸大概也看出我對文��方面, 卡有興趣,致使講頻若即方面e空課, 阿爸吓叫我給逗腳手安呢. 彼時「診療隨想」e草稿寢完成呤, 伊叫我整理謄清, 我na讀na抄, 字字摧撟(ciau2) ,加減有提一寡建議來修改時, 阿爸攏全權委託我處理, 無意見啦 !迭迭互我歡喜閣著驚哩 !
決定冊名e時, 上代先想著「診療隨筆」, 我講有卡倯(song2土裏土氣) ,阿爸提出「診療片斷」 ,嘛是感覺無妥當, 落尾也, 由古典音樂「綺想曲」,想到「隨想」��詞, 猶未講出嘴呤呤, 阿爸洶洶遂講出,就用「診療隨想」, 按怎款 ? 我馬上拍蹼仔贊成, 冊名叨安呢決定矣 .
232
封面e設計, 真正是互我感到難忘e經驗, 搪當阿爸答應互我試看覓e時瞬, 我心花僬開真歡喜叨著, 彼暗仔,叨提著阿爸e聽診器, 佇桌頂試排每一款形式, 閣夯筆畫出, 糊起色水, 一直舞到到半暝二點外才完成, 過返工呤 ,提互阿爸看, 伊笑笑也講「真好,著用即張啦!」,彼時, 阮e心情 ,是歡喜甲袂講了了安呢
尾後, 阮逗陣校正幾落擺文書, 嘛綴(跟隨)家父, 到高長印書局,去摯街印刷e代誌, 我深深感覺, 佮阿爸做穡(sit 5 ), 為阿爸做空課, 有影真心適歡喜安呢,…有關再版「六十回憶」,後壁「六五續憶」佮 「診療隨想誌」部份, 奚是佇阿爸過身後, 踮伊e日記簿, 佮備忘錄內底所發現e .
吓記咧, 彼時為著欲刊載佇台大醫學院「青杏」雜誌,連續 二三暗, 夜深人靜e時瞬, 踮醫師宿舍301室e厝內, 整理阿爸茲遺稿, 阿爸寫字真潦草, 伊有給阮講過, 也叨佇醫學校時代, 筆記噯抄真緊, 致使講養成速記e習慣安呢 ,我干礁一字一淚na抄na臆(猜), 若有疑問, 嘛無法度親象卡早安呢, 去請教伊囉 !規篇抄煞了後, 嘛無法度, 佮伊來分想寫作e快樂矣 !
有關主題e寫法 ,佇原稿內底, 家父(阿爸),並無寫出來 ;簡那丘念台先生, 佇來批中所寫e ,我相信阿爸按算欲出「七十回憶」「八十回憶」, 「九十回憶」叨著, 真可惜, 我干礁吓凍寫「六五續憶」爾爾, 這咁是熱愛人生咱阿爸 ,所意願e ,阿爸自來叨真信任我佇文字上e建議, 希望伊吓凍原諒我, 最後一擺e不孝,來任性烏白寫 哩 !
233
佇阿爸e著作內底, 有一本「十三年來我e醫生生活」,聽兮講,日本時代, 佇「台灣民眾報」有連載過, 我真想欲詳細閱讀內容,毋閣真拍損, 已經尋無矣 !
( 伍) 有一段時間 ,我為著自修日文, 有捌將文章, 連肖續向「中央日報副刊」投稿, 嘛有得著刊登安呢 ,包含內村鑑三「生命e奉獻」,松山平助「初做父親感想」,「孩子誕生之後」,芥川龍之介「人生」,武者小路實「喜厭」,阿爸對茲文章臹有興趣, 迭迭逶茲剪報, 提互熟似e朋友看, 而且講, 這是阮后甡翻譯e日文, 攏靠伊家己自修安呢 ,也叨即層代誌e起蒂 ,互我為對文學, 語學e興趣, 得著真大e鼓勵安呢 !
( 陸 ) 世間人以「嚴父,慈母」仝齊講, 毋閣呢 !家父所互我e印象, 是仁仁仁, 實實實, 是一位和藹可親e慈父,真正做了有起呢!佇我e記池內底, 伊自來叨毋捌歹聲嗽, 嚴厲來責罵阮呢,竭竭是佇必要時, 苦苦來規勸爾, 伊無但是對阮安呢爾, 連對遐有熟似無熟似e人, 宛那嘛真平和親切哩 !
譬如講, 佮阿爸坐三輪車外出, 經過大街小巷呤, 後面不時有人咧指著講, 「彼个叨是韓石泉.」, 阮有時感到, 若加一聲「先生」,毋是閣卡好聽是毋 ? 講到茲e時瞬, 阿爸無咧計較, 笑笑也印,「免啦!其實叫我韓石泉,真正比叫我韓石泉先生,閣卡有親切感哩!」
234
毋但是安呢爾, 家父嘛迭迭來諒情(寬恕)仈人, 有一擺, 阮兜佇永康鄉e一塊果子園, 去互歹人連肖續侵入, 來偷剉果子樹, 安呢連番再次, 有影防不勝防, 落尾也, 阮用真贅喟力, 才逶賊偷給掠起來, 規傢人氣噗噗, 欲給掠去警局嚴辦, 毋閣阿爸遂落軟給原諒伊, 咱基督徒,盡量來寬恕仈人, 莫甚過給為難, 互伊一擺悔過e機會啦 !結局呤呤, 無給送去坐獄, 干礁給款勸一番, 叨準拄好哩 !
( 柒 ) 家父所寫e文章內底, 伊家己上滿意e ,叨是「由死亡到新生」,彼本冊中e序 ,伊有對我講過「阿俊!汝咁無感覺即篇e序,寫甲真好是毋? 含我家己,互伊感動哩!我讀互汝聽看覓!」伊自那手提書冊, 坐佇勾椅頂頭, 晃頭晃面咧給朗讀 .
我彎腰踦佇伊身後, 面腔倚近伊, 安呢白頭毛哴哴, 目睭看冊頁, 耳空聽讀音, 敬愛佮光彩充滿規腹內, 這叨是阮阿爸, 卡講嘛是阮爸…落尾也,阿爸 過往了後, 茲親友, 逐傢想欲錄一寡遺言時, 我安呢懷著滿身悲苦, 佇無限e懷念中, 為爸給繫話(hewe36 翻譯 ),講出伊上介愜意e文句安呢 .
良哲e生, 互阮啟示了雙親e惜情 ,良哲e死, 互阮啟示了憐人e愛心 .
良哲e生, 對阮啓示了肉體有限e生命, 良哲e死, 互阮啓示了心靈永恆e生命 .
良哲將永遠活佇阮心內, 良哲將永遠活佇阮心內 ,
佇茲, 良哲e死, 既有價值, 閣有意義, 另外, 良哲誕生, 又閣
235
帶來使命感 .
叨良哲e死, 阮才開始確知影人生e 真義 . 也叨良哲e死亡呤, 咱閣再發現無數, 受苦又閣垂危e良哲 .
( 捌 ) 「民族志士」,是民眾對家父, 真贅尊稱其中之一, 毋閣,伊絕對毋是一个偏狹e民族主義者, 也叨伊所抗爭e人, 干礁是拗蠻無情理, 欺壓台灣人e日本仔爾, 伊毋是烏白來反對所有e阿本仔, 仝款哩, 若是台灣人, 鐵齒守舊, 貪污腐化, 伊宛那吓給責備安呢 .
事實上, 伊崇敬e日本人宛那袂尐, 稱彩舉例, 堀內次雄, 明石真隆, 內村鑑三, 矢內原忠雄, 茲人攏是啦, 尤其是矢內原先生, 做過東京大學e校長, 吓使講是阿爸上介謳咾e現代日本人, 稱呼伊「日本e胡適」,逶伊佮胡適e相片, 仝其掛佇樓腳e「文化走廊」, 而且長年來, 給訂閱伊e個人誌「嘉信 」,佇伊過身進前, 又閣選買新出版e「矢內原忠雄全集」,叨親象歡喜讀「胡適文存」仝款哩 .
家父有捌(曾經)讀過全部e「胡適文存」, 冊內四界攏吓凍看著,伊所劃e紅線, 真拍損 ! 胡適佮矢內二位先輩, 連肖續來謝世, 互阿爸失去二位伊上心儀e現代人, 唉 ! 無定著阿爸忍耐袂稠寂寞,才來綴伊來離開世間, 咁毋是 ?
佇「胡適文存」e第四集613頁, 伊有畫紅現線, 安呢寫, 即嗎有人給恁講「犧牲恁個人e自由, 去求國家e自由,我對恁講,
236
爭取個人自由, 叨是為國爭自由, 爭取恁家己e人格, 叨是為國家爭取人格,自由平等e國家 , 毋是一陣奴才吓凍來建立e. 」
仝款佇胡適文存e第四集, 佇上尾一張(623 .624頁), 猶有佇茲咧畫紅線, 「我噯教育人群, 代誌咱噯先懷疑,才信任;先考據,再信任,有充分e證據,才來信任…少年朋友啊!用即个方法來做學問,大概也,袂差外贅,用即个態度, 來做人處事,叨袂夆坎目睭,牽鼻仔,烏白夆騙…我家己絕對無噯夆牽兮鼻仔行安呢…」,最後e瞬呤,佇冊尾上尾行e後壁, 阿爸嘛用紅筆寫「1962年4月4日夜,全集看煞, 韓石泉」
( 玖 ) 我踮鳳山做兵e時瞬, 逐禮拜攏吓坐交通車返厝內, 有一擺佇車頂, 真拄摪e機會, 搪著一位台灣人充員仔, 伊開嘴問我「韓醫官, 汝咁台南人,?恁老父咁是韓石泉先生? 」,我並毋捌伊, 感到奇怪給回答「是」了後, 伊閣講「聖聖互我掠準準」,續落真親切對我講「阮阿母迭迭給我講,千萬毋倘攽袂記e,我即條命是韓先生救活e,叨細漢時,有一回我破病真食力,有捌佇恁兜治療二月日,佳哉互令尊用心治療,才抾返來一條命安呢!」
伊規面安呢熱情, 歡喜e表情, 繼續咧講, 吓記咧恁兜飼真贅粉鳥, 搪當我病情返好呤, 真噯跁起來觀看, 令尊叨給我摸一下, 笑笑也講「好好靜養,等汝病好勢,欲出院e時瞬,我才揀幾隻送互汝,好毋好 ?」,聽到茲呤, 身邊一寡同志, 攏點頭,微微也
237
笑安呢, 我順順也, 看著真純樸面腔, 恬恬也聽伊e一言一語,心肝頭僬舒適溫暖安呢, 有影臹光彩哩 , 咱醫師之家, 真正做了有起呢, 逐傢福氣來肖媵叨著 !
( 拾 ) 家父上愛講起e 格言, 叨是「事上磨練」四字, 這是對我期望深切, 上要緊e代誌, 有時也, 阿爸交代我做空課, 毋閣我無法度勝任時瞬, 伊叨吓提出即四字, 來勉勵我, 叫我噯佇實際做代誌e空縫 , 安呢「哪作哪學經驗」 ,叨毋倘等完全有把握才去下手哩 !
1966年3月, 我參加第39回日本齒科醫師國家考試時, 即四字發揮足大e作用, 互我準備考試e期間, 頻若拄著困難, 抑是失去信心e時瞬, 記取阿爸即个教示, 叨吓感覺勇氣百倍安呢, 起腳落手e中間, 拍拚來實行, 最後結局幸運來通過矣 !
( 拾一 ) 有一層代誌, 我暗暗也歡喜, 叨是阮兄弟之間, 親友攏認定, 我e面貌,上介親象少年時e阿爸, 連阿爸本人嘛嘴笑目笑咧講茲代誌, 伊不時指著我向訪客講「這是阮四后甡,佮我二十外歲時,簡那仝一个模型印出來e」,續落e瞬呤, 又閣翩「六十回憶」中結婚時e 相片 ,真正至揚咧講, 「汝給看,咁無真正親象否?」,面模仔親象阿爸, 這是外尼歡喜e代誌, 真贅回e中間, 家己夯明鏡照面, 心情自然感到真光彩叨著 !
毋閣真歹勢, 我有一項代誌, 佮阿爸無仝, 我嘛感覺心肝頭真艱苦, 奚叨是我無法度照阿爸e願望來讀醫科, 彼年我同時考稠
238
台大牙醫系佮高醫醫科, 這造成我一世人, 上奧決定e代誌, 阿爸以伊e職業考量佮興趣, 定著希望我讀「高醫」, 毋閣我是按算欲「轉系」抑是「轉學」? 心頭掠袂定哩 !
落尾也, 又閣感覺「大丈有所不為」,哪叨噯綴仈人, 烏白去擠熱門兮? 而且, 看著普通人所看輕e齒科 ,顛倒互我愈堅心意切, 決心給潦落讀, 來體驗伊e真正價值, 結局e瞬呤, 我遂來辜負阿爸e期待,選擇台大齒科, 而且一直讀到畢業, 連尾溜也, 有一擺轉學e議題嘛給放棄, …一直到尾也, 阿爸遂顛倒給我剪報鼓勵, 拚勢來摧策我, 堅持到底 ,毋倘三心兩意叨是 .
即層代誌, 到呾我猶原無後悔, 毋格宛那有淡薄也遺憾佮歉疚,尤其逐擺看著阿爸無閒莿莿, 我無法度幫助, 實在真歹勢, 大學時代, 頻若歇辣返厝, 佇三樓房間, 攏噯渡過幾落暗暝, 睏袂去哩, 聽著阿爸沉重e腳勿步聲, 落樓梯又閣跁起樓梯, 我總是家己反省, 我咁有選毋着(對) ?
六十外歲e人矣, 平均差不多每暗, 阿爸睏到半暝,攏吓互急診e患者叫睜神, 落樓腳診療, 阿爸總是自言自語咧喃,「 呾即个時瞬欲來, 唉 !實在有影 !」初頭也, 我聽著即句話, 真正吓替患者來煩惱, 落尾也經驗給我講, 伊就樓了後, 必然真同情真滿足, 給阿母講起患者e病情, 拄著印象卡深e ,又閣吓踮隔返工早起, 重新講起病人e故事, 佇茲吓凍看出, 伊實在佮嘴講出來e話無仝, 阿爸以醫學服務社會, 內心真正快樂歡喜叨是 !
239
( 拾貳 ) 最後, 模仿 Alfred Tennyson 詩文, 伊是阿爸上介愜意 , 「逶死滅到新生」彼本冊e資料, 咱給記錄, 這是我永遠護持e真心, 誠意e寫照 .
Please let it be ! for I loved him ,
and love him forever.
My father is not dead but alive .
是啊 !阿爸永在 ! 佇伊寫互阮, 充滿愛心e批信內, 佇伊逐擺攝影e豐富相片 ,佇伊讀過, 而且劃紅線e萬萬千千e書冊內底, 佇伊一世人, 做過真贅真贅e善事中間, 滿四界伊攏對阮咧曳手講話, 對阮開懷大笑, 而且安慰阮, 鼓舞阮, 叨親象伊在生時瞬 ,所做e仝歀 !
( 1966年6月寫佇日本東京 )
240
附錄二 無盡e追思…
追思慈父
韓淑真
. ( 2008 ,10 美國加州)
真正想袂到, 阿爸已經過往45冬矣, 吓記咧彼个歇辣,我剛(daa2)讀煞研究所第一年呤, 小妹大學畢業, 父母就北參畢業典禮了後, 阿母佮阮攏留佇台北, 無疑悟遂洶洶聽著爸病危e消息, 趕緊坐火車返台南, 看著阿爸艱苦咧倒床滾弓(掙扎), 心肝頭一瞬e絞滾,一直咧祈禱天公伯仔來幫忙, 互阿爸睜神起來 !
彼一工「艱苦硬弓」e場面, 即四十外冬以來, 不時佇阮腦海中,親象走馬燈仝欵, 一幕一幕咧踅咧敖遨, 人咧講白髮人送黑髮人上艱苦, 對阮兄弟姊妹來講 , 黑髮送白髮宛那是足心疼e.
阿爸佇阮心目中, 十全十美, 盡磅逗褡, 伊細漢e時瞬, 家境清苦, 一生內底嘛拄著袂少e災難 ,毋閣伊無親象一般e父母仝欵,真愛逶家己艱苦, 經驗, 佮孖兒來比較, 互孖兒產生罪惡感, 來現出伊真拚勢真樂觀, 誠心誠意來供給孖兒優秀e生活環境 .
記池中, 佇讀小學進前e幾落暗睏眠前 ,我佮小妹坐佇伊腳頭敷身邊, 聽伊講西方e童話故事, 真拍損, 阿爸甚無閒,落尾也
241
叨無閣繼續矣, 即嗎給回想, 有影真感恩阿爸, 彼時佇百忙中間, 所展岀e親情, 我讀中學呤, 有時瞬, 逶我作文提互伊看,伊嘛真歡喜提供我一寡意見, 大部份是鼓勵e話, 互我感到佮阿爸分享讀書心適, 是真光彩e代誌 .
有一擺暗時仔, 阿爸特別拜託一位朋友來厝內, 教阮有關「王雲五四角號碼」檢字法,即時四兄拄著時機, 「大船入港」趕緊承(sin3)著好機會,自那逶奚檢字法, 十个號碼給暗唸起來, 後日仔頻若查字e時瞬,阮叨吓懷念卡早阿爸, 伊有影真愛好學問安呢 .
阿母因為囡仔甡甚贅个, 又閣勤儉省錢, 致使阿爸不時吓提醒,噯加做一寡新衫,互我佮小妹穿, 逐擺阮穿著新衫, 出現佇伊面頭前e時瞬, 看伊安呢嘴笑目笑e表情, 有影互我永遠記牢牢 !
歇辣踮厝內, 伊吓cua3阮去看電影, 看煞了後, 叨去sakariba夜市仔食宵夜, 阿爸上愛食蝦仁肉丸, 我來美國了後, 若拄著機會, 宛那攏吓仝款去食, 毋閣滋味總是無赫好, 這拍算是少年時,食e記池甚好e關係, 咁毋是? 吓記咧有看過��茶花女」戲齣,無定是對女主角e憐惜, 阿爸真愛茶花, 叨安呢,三兄佇尹厝內大埕, 特別設一區茶花園 ,來懷念阿爸e過去安呢 .
我宛那有佮阿爸四界雲遊e記池, 有一擺去某一所廟宇, 拜訪伊出傢e好朋友梁加升先生,嘛給樂捐一寡錢銀, 可見阿爸
242
真正開明, 無咧計較宗教背景 ,伊即个基督徒, 對所有宗教, 所有人類, 攏是「一視同仁」, 無分汝我哩 !
每一年中秋e時瞬, 阿爸真歡喜來倩(雇)幾落台三輪車, 全家大細坐車踅街賞月, 伊叫做(遍踅街) ,若準伊有法度來美國, 我絕對吓不時駛車cua3伊去「遍路轉」,甚至cua3伊週遊世界各國, 想起來 ,咱阿爸愛追求新奇 ,毋知欲外歡喜才着(對) !
阿爸暗時仔, 等患者看煞呤, 伊叨吓踮樓腳書房讀冊, 抑是寫文章, 大約十點左右, 阿母吓逶樓頂騎樓 ,親切來喚Dr. Baby(扶輪社時e別名) , 阿爸叨吓歡歡喜喜, 攽落書冊, 阮嘛真期待伊, 趕緊就樓頂, 到時阮集偎佇父母房間, 聽尹談天說地講東講西…阮兄弟姐妹大漢, 到嫁娶時瞬, 嘛吓不時踮房間內, 講一寡有關「對象」e心適, 評頭論足, 有時也, 阿爸嘛吓做打油詩, 來虧仙創治, 笑笑歡喜安呢 !
奚(he) 是一个充滿溫馨懷念e歲月, 啊 ! 我是外尼也希望有機會, 閣再叫一聲「阿爸」 !
(2008十月, 美國 加州 )
243
二. 佮丈人一面之緣
黃東昇.
( 2008. 美國北加州 )
韓石泉先生, 是咱台南e名醫, 家父黃純儒, 宛那有佇本市開婦產科, 嗯才我細漢e時瞬, 不時有聽著韓醫師e大名, 知影伊真有愛心, 真關心咱台灣社會佮台灣e未來,佇1947年二二八事件發生e時瞬,我拄好十一歲, 聽兮講, 伊無惜己生命危險,佮勇敢e台灣人, , 仝齊潦落搶救眾生, 來安撫民眾, 減少流血事件安呢 .
韓家是咱台南市, 人人欣羨e家庭, 我有捌看過, 排佇今日照相館(民族路長老教會隔壁)遐 ,有「韓家全家福」e放大相片, 我讀台南一中時, 韓良誠早我一屆, 韓良俊慢我一屆, 互相無肖捌, 毋閣我知影, 尹是韓醫師e孖兒, 尹真聰明, 功課足好e .
我佇1958年6月 ,成功大學化工系畢業, 做18個月預備軍官了後, 佇1960年春天,去美國肯薩斯大學, 讀博士學位, 台南一中同學,為著欲歡送幾位, 去美國留學e同學, 決定佇台南市第二信用合作社 ,舉辦舞會, 韓醫師彼時是二信理事長, 同學知影阮老父捌韓醫師, 自那推舉我去向韓醫師摯接, 請求借用二信大廳, 來當舞場, 彼个年代, 舞會即款社教活動, 卡袂互人諒解佮認同, …落尾, 也呾叨無法度到地也, 我自那無惜面皮, 毋驚歹勢
244
叨殘殘潦落也 ,唗去拜託韓內科安呢…
我入去診療室e時瞬 ,韓醫師搪咧給患者,做詳細e門診, 診療煞了後, 我叨自我紹介, 我是黃純儒e后甡, 我給提起欲借二信開舞會e代誌, 伊看我幾秒鐘了後, 自那開嘴答應表示OK,當場互我真正驚喜, 韓醫師e思想迮尼開化, 真正是一聲叨了解,咱茲少年人, 開始流行e潮流風氣安呢 .
我佇1960辣天離開台南, 去美國讀冊, 毋閣韓醫師真無彩, 佇我佮淑真結婚前1963過身, 婚後我迭迭有感受著 ,伊對「阿爸」思慕情分,真拍損, 我無啥乜機會, 佮丈人摯接, 講話, 早年前彼擺, 去韓內科遐 ,參詳代誌, 這是我唯一e機會, 有來佮韓醫師見著面安呢, 彼時瞬,我嘛毋知, 伊吓變成阮丈人爸, 也呾即嗎回想起來, 嘛真感謝上天,有即个機緣, 我才有即世人, 干礁一擺佮丈人e 「一面之緣」爾 .
( 2008 美國北加州)
245
來源：2023 36 台閩文學韓石泉60回憶 (下 )/韓石泉229-245.docx
韓石泉246-258 docx
三.父母傳落來e信仰真磊斗
韓淑清 (2008 美國)
106.
自細漢記池內底, 我猶未讀小學進前, 曾經有幾落擺, 綴阮阿姊,去教會主日學, 逐擺主日學老師, 吓頒獎互吓曉暗唸「今日金句」e學生時, 我自來叨毋捌得獎 , 感到真失望安呢, 落尾也, 毋知啥乜原因, 自那無去教會, 一直到我大學畢業了後, 才閣恢復哩 !
我決心來接受主, 真實在e恩典, 影響我上大e, 叨是阮父母嗣
大,我讀初中高中e流擺, 迭迭看著阿爸, 逐暗九點外以後, 患者卡另呤, 伊叨吓哴空哴縫, 踮書房內底咧唸聖經, 互我印象真深安呢 ,阿爸親身有給我講, 伊已經做到逐工認真讀聖經, 雖然這是五十外冬前e代誌, 回想伊e話 , 宛那不時佇我耳空邊咧鼓勵我 .
伊e醫務沉重, 患者真贅, 家己無閒莿莿以外, 又閣兼有公職, 三更暝半起來看病二三回, 真正su4常, 彼个年代, 病症卡食力e, 阿爸吓另外坐三輪車去往診, 逐工安呢出出入入真無閒, 暗時仔迭迭袂凍一眠到天光, 代誌迮尼無閒來講, 伊宛那盡量尋時間讀聖經, 來堅定信念, 吸收其中e智慧 .來引導伊人生e目標安呢 .
阿爸大多數e場合, 並無以言論, 來款勸阮兄弟姊妹信教, 伊干礁踮厝內執行醫務, 抑是社會服務流擺,才用實際e行為, 來表揚基督e愛心, 致使講我自細漢, 叨看到伊信仰主e好模範, 深深來刻印佇阮e心肝頭矣 .
246
大學卒業時, 阮父母親就北參加典禮, 典禮了後, 阿爸踮台北蹛一暝, 過返工呤, 伊家己一个人 ,坐火車趕返台南診所, 也叨診所e患者佮一寡住院者 , 需要伊來給服務, 毋閣這萬萬想袂到 ,奚是阮上尾一擺, 佮慈父來逗陣安呢甡 .
幾落工了後, 逶台南拍來e電報, 講阿爸洶洶來仲風, 遂昏迷不醒安呢, 也呾進前一工, 伊猶正常照顧患者, 嘛咧無閒有關光華女中, 畢業典禮佮董事會e代誌, 無疑講第二工, 遂無閣再醒過來矣, 伊佇1963年6月30日離開阮, 這宛那是我頭一擺體驗着, 人生瞬息萬變, 事事無法度按算摧撟(ciau2)安呢, 幾工進前, 阮猶醉醉迷迷佇無限甜蜜, 幸福,好命e快樂中間, 有父母兄弟姊妹e疼惜, 自來叨毋捌拄著, 即款艱苦又閣寂寞e滋味, 我是au4尾來完成大學學位e, 對未來, 宛那是充滿幻想佮映望叨是.
毋閣洶洶一時間, 阿爸遂來過身去, 親象地基硿在在, 樑柱忽然間崩倒挃去(折斷) 仝款,對阮規傢人, 身心e打擊, 是大大大, 深深深, 我內心e煩惱佮艱苦, 閣卡無法度倘來制節, 袂輸簡那「袂曉講話」仝款, 阮逐暗攏咧做惡夢, 有影毋敢相信, 呾叨永遠看袂著家父, 彼款慈顏佮微笑安呢 .
我認定阿母e心內, 定著閣卡艱苦, 伊一直咧後悔, 彼時無佮阿爸逗陣返台南, 有影真無彩 ,掠準講伊佇阿爸身邊, 無定著吓量早發現阿爸仲風, 吓赴來送病院急救安呢, 阿爸拍算(可能)袂赫早過往叨著, 阿母一直咧自責家己, 袂凍原諒家己叨著 !
太平境教會e謝再生牧師, 來探望幾落擺, 問阮是毋是願意來
247
受洗禮入教, 我自細漢叨看著基督徒家父, 一世人社會出入e好模範, 嗯才一絲叨無躊躇, 決心受洗倚附主, 阮佇1963年8月18
日, 我, 阿母, 二位大姊, 二嫂, 攏總五个人, 仝齊受洗入教, 自安呢了後, 我心肝內大大改變, 主e安慰, 平安, 永生e映望, 代替我長年哀傷佮痛苦, 我嘛放棄返台北, 讀研究所e機會, 返厝陪伴阿母給安慰, 幫忙伊重新適應, 即暫仔洶洶失去老伴, 悲傷寂寞e日仔, 我陪伴伊一冬外,迭迭有做陣去太平境教會, 做禮拜安呢 .
1964年9月4日, 我來到美國留學, 也叨新環境新所在 ,生活踦起感覺青份,另外功課e壓力, 又閣無車倘駛, 致使講研究所彼二冬中間 ,真尐去教會禮拜, 毋閣我知影, 神有咧暗中牽成我, 尾也,我結婚甡二个囡仔, 一直咧無閒家事, 嘛尐去做禮拜…,1980阮搬去加州一个庄頭, 彼瞬囡仔已經大漢矣 , 庄頭e生活樸實, 我宛那有cua3尹,逐禮拜日攏去做禮拜, 另外嘛有參加英文查經班叨著.
107.
續落e瞬呤, 我拄著婚姻失敗, 離緣了后, 搬幾落擺厝, 來來去去, 這中間佳哉有兄嫂姊弟甥, 來幫忙我, 渡過袂尐困苦e日子, 我逶小庄頭又搬到加州 Irvune 遐 , 無外久又閣搬去夏威夷Honululu, 又閣去德州Lubbock ,佇即七冬內底, 我過著安呢「水流破布, 四界流浪」e艱苦歲月,這中間, 我閣卡倚主倚甲緪緪緪 (an2緊) ,阮逶伊遐得著安慰, 力量, 喜樂, 佇教會中間, 不時吓拄著以基督e愛,來關心我e人,尹安呢熱心,, 溫暖, 靈氣 , 茲誠意忠實e姊妹兄弟來幫忙,互 阮心肝頭受到滋潤, 有影是深深深安呢 !
248
我搬到Lubbock六月日了後,發生奇妙e緣份,我有去一間Chinese Mission 教會聚會呤, 無意中佮 Mr. Frank Ford熟似, 落尾遂 來結婚, 這有影完全出乎意料之外, 連我家己嘛袂相信, 唉! 我竟然吓凍再造婚姻 ,這宛那是,真真正正受著神來安排, 賜互我再一次機會,來恩受幸福快樂e婚姻, 主互我真膨沛e恩典佮歡喜叨是.
佇茲, 我順續提起阮阿母, 伊來影響我信仰是深深深, 搭搭搭, 落尾一直到2001年元旦, 伊才蒙主恩召,享年96, 自我離緣一直到再婚, 即七冬e中間, 頻若我逐年返台南,見面時伊行動不便, 阮迭迭踮尹房間內, 唸讚美e 詩歌, 伊嘛不時用電話, 聽15分鐘講道, 落尾也雖然出門噯坐輪椅, 伊宛那堅持去教會做禮拜呢 .
有一年歇辣(暑假), 阮查某孖清音返台南YMCA教英文, 暗時仔,阮踮阿母房間內, 由清音演奏小提琴, 阮仝齊唸喜愛e聖詩 ,即時窗外魚池仔e流水聲 , 鳥仔聲, 簡那人間天堂, 落尾…呾阮尪婿Frank含我逗陣返台南時, 嘛仝款唸詩歌, 即幅甜蜜e圖樣, 不時嘛留佇阮心肝底, 神e恩賜長流水, 伊賜我e喜樂福杯滇滇滇哩 !
阿母真愛種花, 我自細漢, 叨深深互伊帶(dai3)著, 宛那仝款, 真興即个趣味, 有影互我規世人受益不淺, 踮花園內底, 毋但心情輕鬆,卡袂想著艱苦e代誌爾, 另外閣卡要緊e ,叨是我迭迭逶其中, 來領悟著, 上帝創造萬物e奧妙, 美妙, 奇妙安呢, 上帝互植物, 逶陽光, 水, 空氣, 土壤中吸收養份了後, 才來展出尹色水贅款, 芬芳美麗e種種花蕊, 有e花最後結成甜蜜���吃, 營養豐富e蔬菜水果, 我逐工踮家己花園, 享受著神e愛, 互我深深來想著, 神借著植物e美妙, 來啟示著阮e心靈安呢 !
249
阮有感受著植物界, 尹雖然有時瞬, 表面上臭臭爛爛根土腐敗, 毋閣咱宛那有收成著, 芬芳磊斗e花卉水果叨是, 互咱嘴仔,目睭,鼻仔,得到充分e享受, 互咱身體勇壯, 健康, 咱萬能神e賜愛, 有影是迮尼也飽滇偉大啊, 所以講, 咱眾生, 活佇世間, 宛那噯向植物界來學習, 噯用溫和, 愛心, 誠實來對待人, 毋管仈人態度好醜, 咱宛那噯親象主所講e「疼惜汝e敵人」叨著 .
佮至親至愛e嗣大人來死別, 洶洶心肝頭一瞬e絞滾 , 離別e哀傷, 互阮深深感到迷失希微, 即嗎失去上介珍貴e惜情, 干礁靠回憶佮懷念, 來彌補心中e空虛安呢, 我嘛深深來體會, 阮茲兄弟姊妹, 自細漢成長, 宛那真好命叨是, 想起嗣大人長年來, 一路給阮惜命命, 安呢慈愛, 好模範, 全心全力來晟養孖兒, 有影恩重如山, 佇茲, 我再三來感恩來懷念安呢 !
( 2008年11月 , 美國 加州 )
250
四. 想起阿爸 韓良博
108.
當我行佇病院走廊e時瞬, 長遠閣孤單 ,
佇這暝半恬寂寂e流擺 , 我想起了阮阿爸,
我想起了,伊 e腳步聲真沗頭 !
伊真贅真贅e暝半咧返踅(se4) !
行落樓梯去看顧伊e患者, 尹逶庄腳遠路拚過來 ,
為著欲求阿爸e「聖手」佮「佛心」,
我想起阿爸e仁慈佮智慧, 即嗎生活規工 ,艱苦閣長久 !
我想起阿爸, 真贅閣卡艱苦閣卡長久e日子.
當噹我行著即條卡罕行e路頭, 我想起了阿爸e旅途 !
長,遠,嘛孤單 , 嘛想起真贅人e身驅佮心靈 ,
尹有捌受著阿爸e安撫, 深深深 , 柔柔柔 ,
佇真贅工e日時佮暗暝呤, 我想起了阿爸 !
251
五.想著彼一工
阮琬瓔 (韓良平遺孀)
( 2008.12 日本鹿兒島 )
二十二冬前彼一工, 我接著阿爸所寫e「六十回憶」即本冊, 阿母給當作寶物, 另外一份是「聖經e真實性」,伊是1962年1月8日, 阿爸佇台南市太平境禮拜堂, 所講e証道文, 該文登載佇「韓石泉醫師生命」故事,(遠流出版社2005年),彼个時瞬, 阿母面帶笑容,恬恬無講話,也呾我寢才做韓家媳婦呤, 毋捌看過阿爸一面, 毋閣阿母心意真正清楚, 我詳細拜讀了後, 才知影阿爸為台灣奉獻, 認真拍拚e事蹟, 一一出現佇冊中叨是.
婚後日常生活e中間, 我有聽著良平,迭迭咧講到尹 阿爸 ,按怎按怎, 互我感受著良平, 對尹阿爸長久懷念e追想, 而且伊去種著尹阿爸性格,佇生活抑是行醫內底, 對任何人攏真有疼惜心,有影真罕咧看叨著 ,阿爸真有智慧, 伊誠心基督, 佇短短e生命中間, 來信靠唯一e 真神, 奉獻家己, 助神助人安呢 .
映望即回第三版「六十回憶」, 吓凍互閣卡贅e人受益,嘛映望韓醫師e後代, 攏吓凍秉持尹阿爸e遺志心願,繼續認真, 拍拚走蹤,隨人面頭前路途, 做到提摩後書4章7節詩文「彼个美好e戰役,已經完成矣」,該拍拚e路頭, 我嘛拚甲盡磅矣, 所堅信e道, 咱已
252
經守甲牢牢牢安呢 .
另外, 佇腓立比書3章13.14節, 有咧寫「莫(mai4)看後壁, 干礁一直拍拚向前看, 向前拚, 噯向目標篇直唗, 噯互基督耶穌, 逶頂面給咱來頒獎叨著.」
按怎來追隨阿爸真磊斗(ledau44美好)e腳步, 效法阿爸e精神,咱所映望,叨是奚「噯照公義��審判到彼日, 噯賜互阮公義e頭冠」 安呢 . (提摩太後書4章8節) .
253
六. 阿爸佮我
韓良憲 (2008美國夏威夷)
我是厝內十一个囡仔內底, 上au4尾出世e屘仔孖, 也叨即个緣故, 阿爸佇1963過身e時瞬, 我猶未滿十六歲哩, 也呾代誌已經哴開45冬矣, 這致使講, 我一生上大e遺憾, 叨是阿爸過身了甚早, 互我袂赴(來不及)佇生長過程中間, 抑是落尾人生經驗到熟了後, 來感受著阿爸e一寡教誨安呢, 毋閣呢! 即幾年來, 我漸漸發覺, 叨頻若看到卡遠看卡深, 卡冷靜e時瞬, 我攏有感覺, 佇有形無形中間, 宛那吓看著阿爸對我e影響, 也呾下腳即幾點叨是 .
起代先, 代誌跋白, 奚叨是我佮家父, 雙人攏仝款, 行入醫學e道路,阿爸真愜意「行醫」即个行業, 回想我細漢呤,叨吓使講逐工攏感受有着哩 !阮規傢人食飯e時瞬, 阿爸迭迭逶彼工, 診所所發生e代誌,奇奇巧巧, 心適傷悲, 攏給講出來互逐傢聽安呢 .
吓記咧彼時呤, 我迭迭擠踮三輪車頂頭, 佮阿爸去病家往診, 佇病家e時瞬, 不時吓感受著, 尹對阿爸e感恩佮尊敬, 也呾即嗎給想起來, 落尾我來選擇做醫生, 宛那是真庶常e代誌哩 !甚至講我二个查某孖, 思杏佮思香, 尹即嗎嘛搪咧讀醫學, 無定著是順著我e勢, 間接受尹阿公e影響安甡 !
254
家父臹熱愛醫學, 我想上主要e原因, 叨是伊吓凍透過行醫, 直接逶心肝內e學問, 回饋社會, 彼瞬杜聰明佇高醫, 拄好佮陳啟川, 發生矛盾, 二爿門扇板咧逗袂峇呤, 阿爸叨趕緊寫一張批, 來支持杜先生安呢 ,其他, 每一冬, 阿爸攏吓鼓勵阿母, 去替紅十字會義賣, 另外阿爸自寫e「醫師十箴」,嘛是由阿母, 用毛筆寫好勢, 來展示伊對醫學e愛心, 佮對社會e責任安呢甡 .
閣再來,咱來講到阿爸, 伊對孖兒佮家庭e態度, 我猶吓記咧 ,阿爸迭迭利用歇睏日 (特���是春節) ,規傢人(包含護士, 藥局生)去春遊安呢, 若拄著中秋節e時瞬, 伊宛那吓舉辦「遍街踅」,叨是倩(cy4)幾落台三輪車, 連遍踮市內踅街, 哪賞月, 哪看街景,宛那不止也心適叨著…
阮細漢時, 上介歡喜e代誌, 叨是阮規傢人, 做陣去看電影, (大概也是延平戲院,遐離韓內科, 無十分鐘e路程爾) ,我到呾宛那吓記咧, 阿爸頻若答應阮去看電影, 奚我叨百分百放心, 即聲我知影, 叨算講伊閣卡無閒來講, 宛那吓照約束cua3阮去, 絕對袂顛誕哩, 即款好模範, 代代肖傳 ,落尾對阮二个嗣細查某孖, 自來叨毋捌給肖(相)騙e安呢 .
電影看煞了後, 阮行返來厝內半路呤, 通常吓去渡小月遐, 食擔仔麵, 佇寒冬e暗暝, 奚真正是, 人生一大享受安呢, 到今仔日, 我頻若返台南時瞬, 攏吓拚去渡小月遐, 給食幾碗麵, 奚宛那是必行e「例行私事」哩 !也呾有一回, 我想起看電影煞戲了後, 返到阮兜門腳口時瞬, 看著門前蹲(ku3)一个 大約十五歲e少年仔, 拍算是離家出走e款, 抑是去互父母趕出家門e破少年安呢 , 彼時阮
255
阿爸心存仁慈, 趕緊給叫入來, 叫伊睏佇壁角遐, 來渡過寒冷e冬暝安呢, 第二工呤, 彼个少年, 叨自動家己離開矣 !
即層代誌, 互我心肝頭, 留落深深e印象, 這是家父博愛e身教,我有記池以來, 叨毋捌互阿爸來體罰過, 小學一年級呤, 有一擺我偷唗書(逃學) ,返厝內了後, 匿(vi4)佇樓腳壁角e空縫, 彼擺真正是害逐傢「勞師動眾 」總動員來尋人, 落尾也, 我聽兮講阮級任導師, 宛那挺大腹肚, 佇進學國小, 一四界咧唗尋我哩 !
一直到最後, 我踮樓梯下, 互人尋出來時瞬, 看著阿爸面色青青,我驚甲疲疲慉(cua5) ,心肝頭咧想, 呾即聲慘矣, 有影閃袂過「竹仔枝炒豬肉」e命運矣, 好佳哉即个空縫, 護士來喚聲, 講樓腳有患者咧肖等安呢, 伊自那(趁機會順勢退出) 落樓腳去看患者, 一場是非空縫, 遂來落幕, 互我閃過一个劫數安呢 .
也叨因為家父身教e關係, 致使講後日仔, 我甡查某孖了後, 宛那毋捌對尹體罰過, 初一我讀南一中夜校, 欲升初二e時, 我參加轉日間部e插班考試, 彼擺阿爸甚至預先, 臆有着作文題目「水災」(彼年是八七水災) , 唉 ! 阿爸真正做了有起呢 !
即幾年以來, 我漸漸有歲頭矣, 對代誌瞭解有卡深刻了後, 我選擇了, 有卡理性e無神論, 為著安呢, 迭迭有朋友來肖問 「恁嗣大人攏基督徒, 按怎汝毋是?」 , 表面上, 這確實佮進前所講e,受阿爸真深影響, 有所矛盾, 毋閣咱講實上阿爸是一个真自由,
256
真開明, 我真感謝伊無勉強我, 去上主日學安呢, 互我吓凍佇大漢了後, 做家己理性e選擇, 其實我上介夢想e代誌, 叨是我是外尼迮(非常)希望吓凍佮阿爸來研究, 我對人, 對事, 對物e看法, 包括對宗教e看法, 我想伊嘛吓了解叨著 .
我有一个習慣, 真正愛看書冊, 逐工安呢一卷在手, 奚叨心情平靜, 而且有帶歡喜e喟口, 即嗎給感覺, 宛那是受家父e影響, 我給想起來, 彼時大概也食暗飽了後, 阿爸叨到樓腳書房看冊, 阿母佇樓頂做寡縫衫褲e家事安呢, 卡暗e時瞬, 母親吓對二樓走廊, 叫阿爸就二樓, 通常吓捧一碗刮去幼毛e燕窩, 互阿爸做宵夜,… 阿爸過身了後, 伊e大書櫃內底, 除了醫學冊以外, 猶有胡氏全集, 梁啟超e飲冰室全集書冊安呢 .
家父熱愛台灣即塊土地, 講到即點, 卡早叨已經有真贅記錄矣,譬如講伊早年參加「台灣文化協會」, 中年1961,雙十節發表「目前形勢咱e覺悟」(見韓石泉醫師e生命故事, 遠流出版社), 我干礁講一層代誌, 當年1960艾森豪總統, 訪問台灣呤, 我曾經看著阿爸, 佇走廊遐, 安呢煩惱來回踱(zam4)步, 甚至提出伊e袋錶,自言自語「也呾飛行機,大概也嘛即欲到矣!」
,彼時我猶少年, 袂凍了解家父e心情,呾即嗎想起來, 有考慮當年台灣e時空背景, 艾森豪總統訪台, 對台灣e意義真大, 這叨逐傢看現現哩! 彼時,阿爸真正掛念台灣e 安危啊 ! 伊一定希望, 借著艾森豪訪問台灣, 吓凍互台灣e安全, 閣卡進一步e保障啊 !
2004台灣總統大選時, 我返來台灣投票, 佇投票所遐真拄摪
257
(偶而) 聽著有人, 佮另外一位投票者, 咧報路頭, 「也呾叨逶韓石泉遐, 正爿斡入去叨是…」 彼年離��爸過身已經41冬矣, 即嗎, 韓石泉, 猶原是咱台南e一个路標哩 !可見家父佇台南e影響力有外深矣! 我懷念阮阿爸, 我深深來懷念阮阿爸哩 !
( 2008 年11月 , 美國 夏威夷 )
( 全書結束 )
258
來源：2023 36 台閩文學韓石泉60回憶 (下 )/韓石泉246-258 docx.docx