10.大官佮風水
这是二十外年前ｅ代誌，想起來宛那心適哩，加減亦吓凍來反應著咱北投所在，一寡茲古早空頭是非，講起來叨是咱北投地，景緻磊斗，引起一陣大官虎ｅ痟想，想欲百年歲後風水設茲，無想著顛倒去踼著鐵，舞甲規面豆花安呢甡。
小弟今年歲頭抵好五十，佮健保局ｅ總經理葉金川，是仝屆業ｅ，民國65年初退伍了後，踮其他病院服務一年了後，佇年底ｅ時瞬，家己開業，開一間滴仔當間ｅ齒科店來渡三頓，講起來，彼時才二十八、九歲ｅ少年傢仔，嘛猶娶嫫，叨一工到暗拋拋走，丟丟去，食穿看戲，有時仔加減嘛傾一寡鄉土歷史佮鄉土語言叨著，日子艨艨艟艟，天天二十四點安呢。
民國66年過年無外久，有一工，麗煌仙（杜聰明博士ｅ姪兒）來看嘴齒ｅ時瞬，順續有講起，伊欲親身我去拜訪醫界泰斗杜聰明博士，我心肝內嗶噗彩，真正歡喜咧等，嗯才趕緊答應來約時間，有影是一甲子嘛拄無一擺ｅ好空頭，彼年我28足歲。
來給講到麗煌伯仔，伊是杜聰明ｅ仔，做人樣也真客氣真正有禮貌，袂輸親象古早老阿伯彼型兮。安呢「和靄可親」，實在互我這个後輩者「含含趖」感到真歹勢安呢。講起來麗煌仙是知影，我ｅ家族佮杜聰明博士ｅ一絲仔因緣叨著，嗯才ｅ時瞬呤，伊自那順這个勢來造成一段好事，伊安呢「古道熱腸」為朋友忠原熱誠，互人真感心。
杜聰明仙，出世佇北新庄（現時三芝鄉）ｅ車埕，倚巴拉卡（大屯山水源區）無外遠，彼个所在，山明水清，風景真嫷，伊出生佇1893，現主時ｅ冥壽，應該是108歲矣，我ｅ外媽（外祖母）號做淑女仔，抵好比杜聰明加三歲，聰明仙尹兜是小地主，食穿快活安呢甡，真贅，有田園佮火炭，淑女仔（阮外媽）蹛佇聰明仙ｅ隔壁，厝內散赤歹命，互中年查某人「紅柑」做「新婦仔」（童養媳），逶聰明仙ｅ所講所說來知影，一百年前，阮外媽「淑女仔」佇八、九歲ｅ時瞬，迭迭著聰明仙（約五、六歲），佇大埕兮，或者是田岸邊咧遊樂，做囡仔時代ｅ感情袂醜。
淑女仔原本叨歹命囝哩，伊對隔壁杜家是「敬愛有加」盡忠盡心含心敆命來肖tin6，另外一方面，杜家聰明仙尹兜嗣大，宛那對淑女仔嘛真疼痛，袂輸家己ｅ囝兒仝款，淑女仔佮互「紅柑」做「新婦仔」以上，紅柑歹性地，不時來苦毒伊，淑女仔迭迭腹堵，杜家叨偷偷iap飯糜互伊食，外祖母壹直到食老ｅ時，若想著杜家ｅ恩情，迭迭吓流目屑。
呾時間過了真緊，五十年過去囉，1945年大戰尾年，聰明仙已經55歲矣，彼年ｅ春天，美國B-29 ｅ轟炸機，不時來轟炸台北城，日軍ｅ敗像漸漸現出來，聰明仙為著驚危險，敢返去北新庄舊厝，嘛毋敢蹛城內ｅ病院，自那迭迭去北投十八份遐空襲。（現時泉源國校頂頭）這个時瞬，淑女仔已經嫁來十八份矣，嘛甡六男一女，囡仔真大陣，聰明仙叨是來做囡仔時代ｅ厝邊，淑女仔尹兜暫蹛空襲，十八份，地方偏僻，風景真嫷，離台北又閣近（新北投有火車通台北），聰明仙教授，不時嘛來咧行踏。
咱給看，杜聰明博士，享有台灣第一位醫學博士ｅ名聲，連阿本仔叨比大頭拇，真正「位高權重」超級英雄，毋閣佇1945空襲期間，聰明仙宛那真惜情，做囡仔時代ｅ感情，迭迭嘛來十八份，佮淑女仔ｅ囝兒，攏二十外歲ｅ少年人，做伙幵冓講笑、食飯，有影做人真忠厚義氣，互汝謳咾甲叫毋敢，聰明仙佇民國75年仙逝，享年94，真正是「仁者壽」當了有起，互茲後輩真擻念叨著。
二十一年前，民國66年春天，麗煌仙（杜聰明ｅ姪仔），親身我去杜聰明尹兜拜訪，吓記咧彼工我佇北投街仔，買一盒雞卵糕，佮麗煌伯仔坐計程車，直駛林森北路尹兜。杜公館ｅ厝內真曠闊，吓使講規間厝攏是書庫，書架仔裁甲臹懸，有淡薄也陰暗ｅ感覺，印相臹深叨著，另外有一个書架仔，一箱象ｅ化石，聽兮講是逶台南左鎮遐所收集ｅ，證明卡早台灣地嘛是有真贅大型ｅ動物，有影臹珍奇也哩！
「，這位叨是卡早厝邊淑女仔ｅ，黃元興醫師啦！叔仔，今仔日，專工來拜訪汝ｅ！」「啊！聰明仙，阿伯，我是淑女仔ｅ後代啦，真正歡喜有機會來拜訪教授，道謝道謝」「噢！是淑女仔喔，臹好，臹好，坐啦，坐啦」見面了後，由麗煌伯仔先紹介，互我真榮幸來拜訪著醫界泰斗──杜聰明博士，彼年我28歲，麗煌約六十出頭，聰明仙當時春秋八十七（現時我已50歲，麗煌八十出頭），毋閣精神臹好，實在互人真佩服叨著，伊二蕊目睭青銳有神金熾，伊身材瘦閣細粒，面頸「筋脈畢露」，博士ｅ記池真好，伊聽著講我是淑女仔ｅ孫，面尺真歡喜，承續講一寡古早闌闌珊珊ｅ代誌，博士ｅ泉州腔真重，有一寡字句，佇嘴內，我聽袂清楚。
講實在，咱坦白ｅ，這遍來拜訪博士，號名是欲向前輩請安討教，實際上主要ｅ目的，叨是欲套出一寡228事變時瞬，博士ｅ親身經歷佮感想，也叨當事人家己來講，上介真實哩，我ｅ相法，是咧如意算盤，「我上有可能得著獨家祕聞」叨是。
毋閣呢，真拍損，ｅ時瞬呤，佮博士交談，頻若講到228時瞬，伊叨「顧左右而言其他」，吓挑工逶話題彎去仈（別）位，害我掠袂著，哎！我干礁是人客爾，而且是晚輩，定著是歹勢來勉強伊，我想博士一定有啥乜真不得已ｅ苦衷，，以伊是中華革命黨ｅ黨員身份（比國民黨卡資深），兼民國初年欲刺殺袁世凱專政ｅ忠魂義魄來講，這層代誌絕對無可能含糊叨準過，何況伊當時（在場）已經年近九十，嘛無啥乜倘尹咧！
不而顧呢，話頭ｅ中間，無聽著228，毋閣嘛聽著一寡祕聞心適，知影咱博士，為著維護家鄉ｅ風景佮尊嚴，潦落去，毋惊生死，佮一陣黨國大官虎咧冤傢ｅ代誌。
咱北投、陽明山所在，風景臹嫷，尤其是竹仔湖、巴拉卡，通北新庄附近，閣卡是嫷中之嫷，嫷甲互汝叫毋敢，嗯才於瞬呤，早叨引起老Ｋ遐大官虎ｅ想，攏想講後日仔百年歲後，吓凍葬身於此，來吸取日月天地靈氣精華，安呢真臹是風水地ｅ「極品」叨著，承續吓來致蔭囝孫嘛無。這聲大費氣矣，風景上好ｅ所在，變做大官虎咧搶墓地ｅ大競賽，大捙拚安呢！
代先是胡宗南將軍，搶著頭把香，佇公園附近落葬，無外久中間，于右任亦來逗鬧熱，伊落葬佇巴拉卡（今大屯自然公園附近），遐，茲離杜聰明ｅ故鄉真近，嗯才杜聰明心狂火，氣甲噗噗跳，噹時仔杜博士，逐擺逶家鄉，盤過巴拉卡、竹仔湖、草山到台北城ｅ時瞬，攏噯佇半路「瞻仰阿任ｅ墓牌」，陰森希微，kimo臹袂爽安呢，不而顧呢，三十外年前，老Ｋ壓力真強，聰明仙無法度到地也，自那乖乖也吞忍，氣氛臹慪搭。
這場風波，無安呢叨煞戲，竹仔湖e風景實在過了嫷，嗯才於瞬呤，佇民國60年左右， 國父孫中山ｅ後甡孫科過身ｅ時瞬，早叨有人痟想竹仔湖ｅ風光，想欲自孫科葬踮竹仔湖遐，來享受日月精華，這个消息去互杜聰明仙知影，自那夯狂，心狂火焯，對老Ｋ遐，大力來反對，汝看，規ｅ竹仔湖、巴拉卡ｅ風光，連番再次，這欲變成大官虎ｅ「特區」，矣！實在悲哀叨著。各位咱茲鄉親嗣大，咱今仔日吓凍欣賞到真磊斗幼秀ｅ竹仔湖風光，这叨噯感謝杜聰明博士呢！
咱給想，老Ｋ按怎吓杜博士呢？噹是仔（原來）杜聰明雖然是土生台灣人，毋閣關心祖國是袂輸唐山人，伊是中華革命黨ｅ黨員，輩份比國民黨閣卡元它，于右任、孫科啊！汝算幾分ｅ螺絲啦？而且民國初年，無惜性命ｅ危險，佮翁倩玉尹阿公，二人「連袂去北京」欲刺殺袁世凱專制，功佇黨國，毋是一般人吓凍來比憑咧！
卡早有人咧批評，于××這个老×臣真袂見羞，台灣上好ｅ地界攏互伊占了了，巴拉卡、玉山頂、敦南圓環攏有伊ｅ形影，這嗎玉山頂ｅ于××銅像，早去互人鋸斷，入溪崁，北市ｅ敦南圓環宛那互人拆掉，最後到巴拉卡ｅ老墓，是毋是噯遷移返故鄉陝西省，咱逐傢來做公，卡袂逐回行過遐ｅ時瞬，感到「陰森森」安呢。
-
辛亥站
台北市中和線ｅ捷運，按算佇12月尾通車，伊過新店溪底，完全採用地下道ｅ設計，工事真偉大，嘛真恐怖安呢甡。
目前木柵線佮大部份ｅ淡水線是採用地上高架式，安呢做卡有風景倘看，樣也感覺卡安全，佇我個仁ｅ想法，交通工具亦是高架式ｅ有卡妥當，也叨地下式ｅ，深入三十米以下，若想著風颱來ｅ時瞬，規條新店溪，安呢淹茫茫，这時，汝ｅ捷運車是佇溪底ｅ峒空咧駛，毋知吓淹水入來抑袂？
木柵線ｅ捷運採用低運量ｅ設計，四節車肚爾，叨上班、下班ｅ時瞬，人客真臹，宛那真安呢，我逐擺早起時仔，拍算九點半、十點ｅ款，迭迭逶中山國中坐到動物園站蹉跎，真正好，規路大樓真贅，工商發展，互汝看甲目睭安呢。
有一擺我去台大拜訪楊維哲大教授，返來了後，佇新生南路遐，截一台計程車，我講，我想欲去木柵線ｅ捷運看看ｅ，拜託伊駛到上近ｅ捷運站，這位運將老大兮，載到六張犁站，嗯才ｅ時瞬呤，去樓頂坐車，運將佇我欲落車ｅ時瞬，承續一句話「卡停仔，若有機會，才踮辛亥站落車，四，風景看看ｅ」，我講好啦，道謝。無外久ｅ中間，火車入站矣就車呤，知影木柵線一列四台，無人咧駛，完全自動化叨著，經過火葬場ｅ了後，叨到辛亥站矣，我自那落車，給看一下仔卡呢。
徛佇辛亥站ｅ風霧（月台），對面上叨是一大遍亡仔埔，真贅墓場吊近來，袂輸佇目前仝款，真正恐怖，奚欲若暗時仔，這聲叨人矣，这叨是辛亥站一个真特殊ｅ景觀，論真想起來嘛是無啥乜啦，毋閣看落怪怪叨是啦。
後一車班到矣，我自那閣再就車，繼續坐對動物園站，論里程，若是中山國中到動物園站，攏總10.5公里，利便南北交通，宛那貢獻真大，不而顧呢，中山國中站，無延到松山機場站（才1公里爾），有影臹拍損叨著。抑若無者，干礁機場身邊ｅ外貿展覽場，一年坐捷運ｅ人客吓加真贅，閣再進一步來講，松山機場連接台灣南北各大都市：台中、台南、嘉義、高雄……若是捷運有連到機場，這條捷運叨變收全省2,100萬人ｅ捷運，毋是干礁（分線）10公里100萬人ｅ捷運，有影愈想愈毋，嘛才差一公里。 -
烏魚籽
咱台灣四百冬以來，上介有代表性ｅ物件是？有人講是歌仔戲、有人講是蕃薯仔、有人講茄苳樹……，實在講來，嘛才百外冬爾，著衰退或者是消失，正經有影四百冬前連綿後續，壹直保持到（現時），干礁 “烏魚籽”一項爾爾，吓使講咱現此時咧食烏魚籽，佮四百冬前ｅ祖先咧食烏魚籽，有仝款ｅ心適。仝款ｅ情調享受。
有影讚著是讚，“烏魚籽”文化算講是咱蕃薯仔ｅ大色貨，是咱鄉土文化上第壹僥俳上第壹laisangｅ齣頭安呢甡。做一个台灣人噯有台灣人ｅ張，假使ham3祖先真敖真磊斗ｅ文化攏毋捌半絲，是上見ｅ代誌，嗯才ｅ時瞬呤，佇茲小弟以淺薄ｅ經驗寫一寡烏魚籽文化ｅ代誌，寫按怎享受烏魚籽，樣也寫按怎揀選交關，按怎按怎做配料，加減寫一寡，各位鄉親（尤其下港咱茲嗣大阿伯阿姆），若有顛誕ｅ所在，才稍指教哩，手勢夯卡（高）哩。
無論講按怎，佇下港所在，尤其鹿港彼角勢，年尾冬時食烏魚籽，真正注重，過年時仔，拚生拚死甘願當衫當褲，嘛著噯食著魚籽才吓起磅，人活佇世間，ga赫下消，輸人毋輸陣到地矣，含心gap命著佮伊tin3夠底，落食落心適頭一叨著。續落著是頂港暢仔對烏魚籽文化ｅ看法。
台灣烏魚籽是四百年來，逐年攏有出產，早佇荷蘭人統治時代1657，著有紀錄彼年生產烏魚三十萬尾，這个記錄，現主時存檔佇荷蘭國家博物館，後來經過鄭成功政權、滿族大清政權、東京話政權、北京話政權，壹直到今仔日，每大約生產40～60萬副魚籽，（無夠ｅ部分，逶巴西進口，雖然品質有卡礁碇，總是”聊勝於無”）。
每一年ｅ冬進前十外工到延後十外工，趁南下，南部ｅ台灣人佇落霜雪凍冷風威威，艱苦坐卦駛船去掠烏魚陣，層空，毋是艱苦，又閣真危險，好佳哉收成袂醜，不時有倘趁著大錢，算講咱福佬人有人咧拚生命，有人咧大享受ｅ一款真正特殊ｅ文化現象，烏魚分前陣、中陣、後陣、迴頭烏四款，以中陣後陣ｅ烏魚籽品質上好，油質有夠熟，無臭味。
逐擺魚船若掠好返來，碼頭著圍甲烏黔，隨人指東指西，品論比較，若是規船滿載，著規碼頭人大聲，若是下消不黨，無三無二，著逐傢面仔青青，一个面簡那""哩！，漁船返來袂輸咧開獎仝款，鬧熱滾滾叨逐傢好愛看哩，落碼頭ｅ烏魚堆，以”尾”為單位，公兮母ｅ肖濫，每”尾”給ce二百三十或是二百六十……，魚母剖腹了後，取魚卵，鹽用模板固定差不多二十工左右著吓使烘吃。製作ｅ方式技巧，隨人攏有pet步，品質完成自然無仝款叨著。
這四百冬來，冬至前後掠烏魚，壹直是台灣冒險家佮投資頭傢，上心適上愛跋ｅ，時運若夠，這聲著財源豐富變好額人，萬一若歹運，樣也吓浪傢繖ze，傢伙盡哭苦矣，二十冬前我佇宜蘭做兵ｅ時瞬，聽著南方澳ｅ漁船戶，不時組團，遠行到台南、高雄去掠烏魚，有ｅ這聲變大好額，有ｅ歹運連船員薪水著無材調，哎！實在有影！
佇亞洲東部有一个講福佬話ｅ民族，伊分布佇福建、潮州、台灣、海南島、新加坡、泰、馬地區，攏總五千萬人左右，佮歐洲ｅ波蘭仁口差毋臹物，毋閣伊ｅ運命真正，衰甲有影種匏仔甡菜瓜，講福佬ｅ頭嘴（人口），佇台灣島，本臹占84%（1946），毋閣1949，逶唐山來95萬忠貞愛國之士，現時差不多占73%ｅ款。無論按怎講，伊依原是台灣地生產ｅ主力。
烏魚籽ｅ文化吓使講完完全全是福佬語族ｅ精粹，ｅ語族ｅ人對伊袂了解，伊亦無需要仈族ｅ人來了解，也叨台灣地這四百冬來，福佬語族（台語族）壹直是外來統治者嘴內ｅ一塊赤肉，致講福佬語族佮統治者之間對烏魚籽文化，吓產生一寡無仝ｅ看法。
荷蘭語統治者，佇1660左右有來記錄福佬人ｅ烏魚籽生產量一年四萬副，歷史留有紀錄，後來鄭成功統治台灣，無外久「滿大人」北京話族統治台灣，文化背景，真尐享受著這味特產，1895北京話滿族扑輸東京話族，毋願逶遼東半島抑是山東半島割互日本，自那逶福佬語族ｅ台灣島割互東京話統治者，仈人ｅ囝死袂，東京族統治者對這味福佬族ｅ烏魚籽不止也欣賞，食了真續嘴，壹直到1960年代，有真贅人過年寄烏魚籽，去互阿本仔孝孤。
1949，北京話統治者大量流亡人士入台灣，對這味烏魚籽無啥乜意思，真贅熱誠ｅ蕃薯仔送烏魚籽互尹，毋閣尹無印相，有ｅ人叨逶魚籽參菜頭煮湯，有影真正拍損，看落吓搥心肝叨著，仈款語族ｅ人，袂了解烏魚籽文化無要緊，毋閣平平咱台灣人，樣也噯了解咱有即尼幼秀ｅ飲食文化，心肝頭叨噯歡喜咧等，才袂漏！
ｅ時瞬，先來給講到”按怎選買烏魚籽”，按怎選購这叨噯有經驗，現主時台灣地一年迵昊攏總買吓著烏魚籽，過年以外ｅ時間，譬論講5月、7月、10月……（平常日子），各位吓使去艋舺三水街菜市仔，倚西園路這頭，賣魚擔仔抑是礁貨店問看ｅ，不而顧呢，時候顛誕到地也，貨色有卡輸勢叨著，單單食kimo爾爾。
踮茲所紹介ｅ，是安呢啦，是說明12月10日至2月10日，農曆過年前後這暫仔買著ｅ”正在港台灣海峽所出產ｅ高級烏魚籽”。理想ｅ選買日期，差不多是新曆1月5日～15日中間，地點台北民生西路迪化街ｅ三角窗遐ｅ店頭。鹿港菜市場內底，或者是玉珍齋，大廟前。直接逶台南，茄萣海邊彼方面ｅ民家直接購買，雖然有卡麻煩，毋閣俗閣大碗，絕對保證在欉，讚著是讚哩。
現主時台北出售ｅ高級貨，用真空袋包裝，衛生閣好看，毋閣一手趁過一手，價貴，“毋驚死ｅ人”吓使罔給交關安呢甡。外型上介理想，曝後一副差不多200～250gram，大概三副一台斤加一絲上抵好，價錢1台斤約1500～2000元左右，絕對袂使貪俗，这一分錢一分貨，互汝袂拗蠻ｅ叨著。
外表噯半半軟，（不可太硬），色水愈深愈好，雙葉中間ｅ膜仔噯搭互伊，袂使開，買返來了後掛de吹風礁，十工了後七工了後一定噯食掉，毋倘囥到礁閣碇，碇簡那洗衫板，安呢風味著醜矣，噯吓記de haa！
這嗎民間所做ｅ烏魚籽，隨人有隨人e pet步絕門，口味自有分別，若是有親朋好友家己咧做，吓使罔買來比較看覓ｅ，假台灣貨買無，或者是時機毋著，吓使買進口巴西貨來後，“差無外贅”啦，（台灣產者，大部份佇蒂頭處有連一塊魚肚表示臹港貨）。我印象上介深，有一回去鹿港菜市場買烏魚籽，干礁市場內仁山仁海，著互我這个台北暢仔看甲大嘴開，目睭大蕊哩。
近來我有聽著一寡中南部ｅ朋友咧講，現時台灣經濟發達，“下港人家己攏食好ｅ貨色，台北人已經卡尐大色貨矣！“這二、三冬我落鹿港，尹所賣ｅ烏魚籽，平均確實比台北迪化街卡讚安呢！
續落，講到按怎烘烏魚籽，這點真要緊，尤其是非福佬語族ｅ同胞，噯真正細膩來了解安呢甡。烘鳥魚籽ｅ要領”干礁表皮稍烘赤著吓使，裏面98%內容物絕對烘熟酥脆”，（表皮稍烤這可，內部絕不可烤熟），無經驗ｅ人，聽著欲”烘魚籽”，掠作是烘蕃薯烘柔魚，內外烘甲熟透透，烘甲親象酥餅，安呢著顛誕去矣，烏魚籽烘燒ｅ目的有二，一是表面消毒，二是寒冬互油脂攽出三是鼻氣味，無論安怎，佮有熟無熟完全無治代，真正烘酥著顛倒歹吃，汝若有法度保證表皮清氣ｅ時，直接食嘛是吓使哩。
親象鹿港方面ｅ鄉親，有人用燒酒表面拭拭ｅ著剝起來青食，以取原味，是爽甲叫毋敢，所以烘烏魚籽絕對袂使烘熟，烘熟著失敗矣，烘魚籽ｅ技術是安呢：先逶瓦斯爐開中度火焰，火苗大約3公分左右，藍色火焰。將250gram左右ｅ烏魚籽表面刮洗清氣（真空包裝者可免），用酒抑是紗布完全。用竹箸（筷）夾規副魚籽，陷入火海中間燒，燒15秒後取出。（燒時火焰下三分之一攽空，中三分之一是魚籽，上三分之一是火苗）。大約半分鐘了後，（反面），閣再入去燒15秒。取出休息半分鐘，正面囥入燒15秒。取出休息半分鐘，反面入燒15秒，提出來著吓使來切片享受。（總共正面15秒×2回，反面15秒×2回，攏總燒ｅ時間大約60秒著吓使）總講一句，袂使用”大烤箱”去烘，亦無需要另開烘雞腿ｅ火炭爐（甚過啦！），稍寡表面烘一个意思意思好勢安呢甡。
有ｅ鄉親咧問”大，既然無欲烘熟，殘殘給食，有免費氣，咁吓使？“我才講”定著是吓使，頭前講過矣，鹿港人真贅青食以取原味，毋閣我宛那是主張稍烘一下卡好勢，理由是：卡衛生，表皮烘過，有一延甡菇壞皮，攏總燒去卡安心；表皮烘過，有一層金黃色，色水卡美觀；寒天食烏魚籽，稍烘一下，吓凍逶已經堅凍ｅ油脂，化解出油，咖添氣味；鼻魚籽燒時特有ｅ味，這款「味」，外行人感覺真臭，毋閣內行人感到芳貢貢，食魚籽若無鼻著烤味，有影叨真遺憾矣he！（閣再重複一遍，烘烏魚籽，干礁吓使表皮稍烘一下著好勢，裏面絕對噯保持油油金金原狀，袂使烘熟，若準烏魚籽囥甚久，碇簡那木板ｅ時，叨甘願勿食來放棄，卡省麻煩，一定噯半軟半硬ｅ烏魚子才好食！）”
最後ｅ步數是「切片」ｅ空，烘好勢了後，佇2～4分鐘以內趕緊切片，若無者，冷去了後著風味卡醜安呢，切片用刀切，切1.5×4cm左右片狀，250gram ｅ烏魚籽一副，吓使切80～100片ｅ款，另外閣再斜切蒜枝，闊度佮長度，參烏魚籽仝款寸尺來配食安呢。另外頂端ｅ蒂頭食，切落來去燒，取伊ｅ芳味安呢叨著。
食烏魚籽噯注重四大享受：
“擤芳味”，來擤這味烏魚籽ｅ烘味，外行人擤著真臭，毋閣茲先覺擤著真正芳，紲落嘴渃答答滴，親象臭豆腐、榴連仝款ｅ道理，所以講吃烏魚籽無臭彼个”臭臊鼻芳”叨真遺憾哩！伊是下冬天仔第壹美味袂顛誕，辦法是安呢，切取靠蒂頭ｅ一小塊囥入去火焰燒著好勢，（真正ｅ大塊烏魚子袂使燒久）。“擤味”是享受佳餚ｅ一步真正要緊空課，台灣人食台中芎蕉時，噯先擤擤ｅ，續落才吃，臹心適安呢甡。
这是飲食幼秀文化ｅ特點，通世界攏仝款，親象歐洲人飲好酒噯先夯杯擤味，續落酒佇舌內三秒，最後才吞落去動作幽雅，閣真享受，無親象台灣田僑仔，大嘴大嘴象張飛咧灌塗猴仝款，安呢著顛誕，吓互人看衰做黨戇，所以講食烏魚籽，噯擤芳，这定著ｅ，新代ｅ少年傢仔揚pupu，全全鐵齒ｅ規班，無倘互咱講ｅ，有影臹拍損安呢甡。
噯冷寒ｅ天氣來配合，拍算10～15℃上介抵好，最好是烏陰昊，安呢食了上起磅，若是辣昊抑是大日頭，彼个氣氛著差贅矣，這點來講北部人占優勢，也叨過年時仔，北部人十工有九工是陰雨，冬尾雨sisizun4，人講”燒酒昊”上介這味”烏魚籽”，以小弟ｅ經驗，寒昊上適合食烏魚籽ｅ所在，是佇陽明山前山公園彼角勢，昊寒閣烏陰，真有情調，近年來台北盆地過年時仔袂寒，真正食力，姑不而衷到地也，自那行對山頂尾溜去，講起來宛那時代臹不吉矣 he，冬尾ｅ陽明山，是寒閣落雨把仔，嘛有霧景，上洽著飲燒酒來配魚籽安呢叨著。
蒜枝ｅ選，食烏魚籽噯配合蒜枝袂單調，蒜枝噯取白色ｅ前節，後面青色ｅ效果卡差，後了袂起磅安呢，蒜枝以竹子湖（大屯山下）高冷區ｅ產品上介讚，氣味芳甲互氣擻念三工三暝安呢，近來竹仔湖ｅ蒜枝買，用和尚洲出產ｅ，另外宜蘭貨宛那吓使哩。
烏魚籽佮蒜枝混合吓產生某種特殊氣味，為仁生第壹美味（單獨烏魚籽或是蒜攏無好吃，一定噯混合才讚），原理依原無法度了解，寫到這位，若想起竹仔湖ｅ蒜枝，有影強欲流嘴渃安呢，另外日本人噯用菜頭來押味，效果無倘好，我个人無贊成。
酒ｅ選擇，食烏魚籽配蒜枝時，一定噯配合燒酒，这是基本ｅ常識，燒酒路，隨人有隨人ｅ心適，叨無地講起，亦無地比憑，我個仁看法，以當歸浸烈酒上介好，其他象竹葉青嘛袂醜，絕對袂使用啤酒、雞尾酒、烏梅酒。其中道理，家己試看覓著知影哩！
總講一句，烏魚籽文化是台灣人真正ｅ傳統文化，有錢人去享受，散赤人樣也吓享受，「窮人ｅ勞斯萊斯」，閣卡無嘛著噯拚一斗仔，挺氣魄組ｅ輸人毋輸陣，上驚著是驚有錢袂曉用，無人教伊按怎用，安呢著食力矣he，聽講近年來，北部ｅ外省掛ｅ，宛那有人臹欣賞這味，这是真好ｅ現象，算講這味大色貨，吓使互逐傢看有稠目，靈氣吓活有影叨讚哩。
咱台灣近年來所得提高，食甲魚魚肉肉，雖然這味烏魚籽真好食，毋閣伊含”膽固醇”甚贅，吓礙著身體健康，毋倘甚過貪食，過年每人超過食一台斤ｅ魚籽，（每次150gm×4擺＝1台斤），中年老年有錢人好額仙，噯稍ｅ。
過年這欲來臨，咱下港方面尤其台南、高雄沿海彼角勢，有二款人想法倒反，飼麻蚤目魚ｅ頭傢，苦毋講溫度懸（高）愈好，才袂凍死，毋閣另外是掠烏魚ｅ船頭傢，苦毋講昊時愈寒愈好，安呢烏魚陣才吓就港來趁大錢，一个欲溫度燒，一个欲溫度寒，真正矛盾，為著生活亦真艱苦哩，前幾年冬至前後溫度夯昇，飼麻蚤目魚ｅ頭傢卯著矣！毋閣今年（1992～1993），二股大寒流來臨，變做掠烏魚大豐收，總共大約掠130萬尾，船傢賣出三億外箍。
另外全省養殖漁業吳郭魚麻蚤目魚草蝦，亦凍死損失三億箍，哎！想著心肝吓酸哩，無論趁三億亦好，了三億亦好，攏總是咱台灣人ｅ鄉親，承擔起生產ｅ重責大任，这毋是彼陣蹛台北，勼佇棉被內ｅ大官虎，所有法度了解ｅ，進前幾年ｅ烏魚掠量差不多佇六、七十萬尾腳兜仔，民國68年彼年上介冷，掠250萬尾，破紀錄安呢，彼年掠烏魚ｅ頭傢大卯，毋閣飼麻蚤目魚ｅ頭傢了甲浪家散ze。
所以每回想起烏魚豐收時，心肝頭著有一瞬ｅ，袂輸簡那烏魚ｅ財富，是建立佇養殖魚業，夆凍死ｅ骨頭頂仜款，这受害者平平是父母攏是血肉同胞，毋知尹ｅ生活費用佮囝兒ｅ讀冊錢，是欲逶佗來？
另外一个大問題著是生態保育ｅ考慮，親象台員人安呢無限制大量捕烏魚，是毋是會漸漸造成烏魚族群壹直減尐，來造成日後資源滅絕，宛那是一个真正硬斗ｅ問題，因為這幾年以來，台員各所在海冬臹，漁民掠無啥乜魚，大部份靠交易大陸漁船貨來依持生活，有時瞬又閣著閃官廳ｅ取締，致使著生活普遍梟悻艱苦。
嗯才於瞬呤，看著烏魚，無論大細尾回頭烏，壹律”趕盡殺絕”，食匏仔無留種，這款ｅ作法，應該逐傢討論來改善，毋倘著麻煩歐美仁士來限禁，安呢著，面子欲去位！歐美仁士為著限掠鮭魚，引起國際大制裁違規者，是通人攏知影，現主時歐美仁士無欲食烏魚籽，暫時無注意這个問題，毋閣咱家己噯稍張弛一下。對採掠ｅ數量噯做一个卡客觀ｅ研究。
烏魚生態ｅ問題，今年已經有稍出現矣，今年ｅ烏魚大部份佇台中海域出現，致使梧棲港掠百萬尾，占百分之七十，这是以往是茄萣港占大部份是完全無，毋閣今年掠著台中烏魚ｅ漁船，宛那大部份是茄定漁港所屬，漁場偏北三个縣市，台南做嗣大變台中做嗣大，這款代誌確實互汝料想袂夠，嗯才我佇前頁講著買烏魚籽時特別紹介鹿港是有道理ｅ，今年台南、高雄方面ｅ產量有卡衰尾也，烏魚場會北移百外公里，其中ｅ奧妙，互汝袂鐵齒咧。
～1993.2.6寫佇北投～
13.坐船遊覽淡水
社會進步經濟發展到地也，幾年來，有先知先覺ｅ頭傢人，開發一條水路航線，大稻埕沿淡水江（河），經過大龍峒社子關渡，壹直到滬尾（淡水），號作「淡江渡輪」，使坐八、九十人ｅ款，全程20公里，船駛拍算40分鐘，算起來宛那真緊叨著（就是），這條航線，吓使當做交通路線，亦吓當做遊覽路線，對我這个北投暢ｅ來講，有食閣有掠，真正吓和哩，這隻船已經通行二年外矣，我早著想坐一擺仔看覓ｅ，1992年12月呤，叨親身行一回，踮茲來寫一絲感想。
這條航線坐船ｅ代誌，樣也真正奇卡真正有意義，第壹點，伊是台灣地唯一唯二的河川，吓凍駛大型客船ｅ河段，全台灣ｅ河川，大部分”山高水急”，欲坐船遊覽，宛那臹拚ｅ噢，有影汝卡醜ｅ，伊水頭ｅ雨量佮水量真正豐沛大，嗯才有法度來駛大隻船哩，另外宜蘭新修好ｅ冬山河亦有財材調行船，其他ｅ河川，無法度著是無法度，有影袂孝孤ｅ。第二點，逶滬尾到大稻埕這二十公里ｅ航程，是清朝時代上介佳上介鬧熱ｅ經濟命脈，伊佮大台北ｅ開發真正有關係，坐這暫船程，汝著有法度佮二百年前，開發艋舺ｅ福建暢仔看仝款ｅ風景佮感受，上尐嘛吓凍佮一百年前ｅ大稻埕茶商洋行，欣賞著仝款ｅ江面風光，伊真正有歷史意義叨著啦！
一百冬前，大稻埕是全台北，上介好額ｅ所在，彼時瞬艋舺地積沙港減，互大稻埕卯著矣，各種洋行茶商真臹鬧熱，現主時碼頭身邊ｅ貴德街，是當時上高級ｅ外僑區，袂輸這嗎天母或是敦化北路仝款高尚，附近ｅ迪化街，人講中北街，古早ｅ傳統風味，變做南北貨ｅ大割店，真正有伊ｅ歷史意義。
閣再來給講到滬尾（淡水）這頭，已經發達二百年囉，滬尾ｅ仁文佮歷史典故真，有福佬ｅ廟寺古物，亦有西洋阿啄仔ｅ紅毛城佮馬偕遺跡叨真心適哩，所以講坐船遊江，大稻埕到滬尾，是看江水，閣卡著噯看雙頭ｅ歷史古跡，安呢才袂枉費做蕃薯仔（台灣人）ｅ身份，袂記咱祖先ｅ艱苦佮光榮，目屑血汗噯稍寡記ｅ，所以講這嗎ｅ人壹直對外國去遊覽是大顛誕，應該著噯行行咱祖先ｅ事跡，卡關心咱ｅ血跡地，嗯才是福安呢哩。
1992年12月初，禮拜三，先坐巴士大同公司，順續叫一台車，pe6到大稻埕碼頭，船班是十點正，猶有四十分鐘ｅ時間，嗯才，去附近仔ｅ，碼頭坐位佇環河南街民生西路ｅ三角窗，附近ｅ街路：著是百外冬前上介鬧熱ｅ大稻埕商區，去行踏行踏，罔看罔踅，雖然路頭地草無熟，毋方向掠若吓，著啥乜攏毋驚，附近ｅ店口，逐傢攏無閒莿莿，棉爛咧討趁，車輛臹贅，貴德街、迪化，佮舊時ｅ”媽祖間口”攏去看看ｅ，尤其這个媽祖間口，無痕無跡自那消身去，實在臹拍損，庶當時百年前，大稻埕ｅ媽祖間口佮艋舺ｅ龍山寺口，仝款鬧熱，人群佳，溢來溢去四漂亂流，毋閣百冬後ｅ今仔日，龍山寺莿iaia，咱”媽祖間口”溜尾無人信斗哩，尤其咱茲二、三十歲，樣也真尐人知影。（媽祖間口位於現時ｅ，原廟早已拆除另遷）。
九點五十分，我行返來大稻埕碼頭，四箍遴返，看互伊，碼頭範圍真闊，閣有一个停車場，停五十台烏頭仔，因為河川地關係，真正曠闊，候船室真正舒適，互我印相臹好，頭前闊罔罔ｅ淡水港面，霧霧，也叨對面是三重埔大橋安呢，撕票時（買票）才知影，這隻船普通時一張票45元，禮拜日75元，這款收費世界奇罕，可見咱这生理人生理真歹做，儘趁嘛禮拜日，有影想落心肝頭著酸。
十點正ｅ時瞬，船準時出發，一聲船螺長長長，真正好聽，哎！毋臹猴，台船爾，閣有即尼好聽ｅ船螺聲，有影互我印相臹好，心肝頭才咧按算，這台船仔拍算無簡單ｅ款，踏入船肚了後才知影，這隻船不止也新叨著，真正現代化，一四界真清氣，佮淡水八里間彼隻tai膏爛癆ｅ臭油船比起來，有影加臹進步，真正壹度讚ｅ哩。
這隻船，頭前艙平台無邊，視角真闊，完全是觀光考量來設計，差不多徛四十人左右，中肚有窗有椅仔差不多亦四十位ｅ款，尾肚差不多有十外人ｅ位，今仔日這班船干礁有人客五人爾爾，位真贅臹舒適，因為海風透ｅ關係，起風寒，無人敢徛佇船頭，limbe戇硾，婁孤帆，單超壹個仁，徛佇船頭搧海風，也叨下冬天仔，有影臹冷銳，吹著面皮威威鑽，規身軀強欲起尻冷損，仝船一个老BK，早著入去船艙內底燒，有影ham4甲有偆去。
船隻按台北駛對淡水彼，徛佇船頭，規隻船仔踮佇去落，船頭佮船邊ｅ江水捲起大蕊ｅ花湧，真正起磅真正心適，雖然海風青冷，毋閣五分鐘了後 著慣習，無啥感覺哩，普通時仔逶陸地無注意，這聲下坐船，知影噹是仔咱淡水江，即尼闊閣大條，水肖連煙霧茫茫，真正有海洋ｅ滋味，这亦莫怪啦，毋倘看貓無點，淡水河流經關渡峽，一年大概也十億噸ｅ水流量，淡水河總長160km，逶發源地品田山一路流落來，沿路雨量真大，致使著台北到淡水這段水路，伊ｅ水旺，全台灣壹粒壹ｅ，也叨天霸王哩，佇台灣這粒高山大島，吓凍有即尼寬闊ｅ江面來駛船，有影真正奇卡互汝袂鐵齒ｅ！
汽船行了真正平順，規ｅ船頭，干礁徛我一人，我對安全真正注意，除了雙手掠真船杆以外，另外又閣一袋背包，內底囥一粒籃球，另外用一條繩子，一頭綁背包，一頭綁家己ｅ褲袋，以保平安，船ｅ速度真緊，推測時速25公里左右，噯真正，卡老君節哩！現場所看ｅ，並無咱所想赫lasap15（髒），我想若準官廳甘幵錢，咱ｅ淡水江（河），定著吓親象韓國漢江赫清氣叨是，沿途二岸攏有懸懸報岸擋哩，離岸遠遠霧霧卡袂感受著人贅厝贅車聲雜cap ｅ都市壓迫感，無外久ｅ中間欲過大橋頭囉，橋看起來無外大，毋閣船一下到橋腳，看著橋頂ｅ仁員，一隻細也噹隻簡那尪仔仙哩，知影橋確實真大哩。
無外久欲過此行第二座橋，著是高速公路ｅ大橋，大橋ｅ身邊，閣再搭另外一座副橋，幵始感到怪怪，忽然間頭殼才翻返來，噹是仔伊著是鬧甲鏘鏘滾ｅ”十八標工程”ｅ架橋工事，這个十八標ｅ工事，太平洋標十八億，差一點著互榮工處以三十五億去，佳哉葉菊蘭給一下青尺也青尺，哎！實在有影。
閣再來著是第三堵橋－重陽橋，連接葫蘆島佮三重埔，橋身紅紅，牽臹贅鐵索仔，真正特殊好看，過重陽橋了後船速加強，看著岸頂全全倉庫厝ｅ時瞬，知影已經到社仔，無外久，看著面頭前茫茫霧霧中間，簡那有兩三cok大樓ｅ影跡，心肝內才咧按算，咁吓關渡這欲到矣是毋？
船閣再駛進前，無毋著，頭前ｅ樓仔厝，正正著是獅仔頭崁，連身邊ｅ寶結禪寺宛那看甲清清楚楚哩，這个所在正正是古早所「關渡三潮」ｅ風景地，有三條河川佇這位匯合，一條本江新店溪，一條基隆河，一條是關渡塭仔江，流過關渡廟前，三江會合了後，經過竹圍仔出淡水海去。
關渡是小弟ｅ血跡地，真正熟叨著5，閣這嗎逶水面來看陸地，另外有一番ｅ氣氛哩，實在心肝頭真正歡喜。
無外久，欲過紅朱朱ｅ關渡大橋，離橋身差不多三百公尺ｅ所在，水面、橋身、觀音山，三者配合了真喟，可惜我本人無紮camera，這款美妙ｅ角度，有影人間仙境，互汝謳咾甲吓逐舌，互汝甲三暝三日猶咧暝夢，噯後回猶有機會哩，驚啥乜？
按關渡大橋到盡磅滬尾魚市場，大約4公里ｅ款，這段江路，水卡清氣，江面真闊，水湧卡大，變青綠色，有一絲仔大海ｅ扮頭，心肝頭樣也樸樸彩，這聲舵仔若捍袂好勢，恐驚吓駛入大海，明仔載叨到福建矣，這聲著害溜溜，經過七、八分鐘，規个江面愈坐愈闊，驚疑ｅ中間。船歪向碼頭，到位矣，這段水路，逶民生西路、環河北街ｅ大稻埕碼頭，到滬尾渡船頭（魚市場），總共20公里，駛38分鐘爾，可能人實在有緊哩，回程早有三十外人咧等船，算講”澎”一絲仔返來，親象來時才坐四个人，真正吓了甲叫毋敢哩。
我著想袂曉，大台北仁口有八佰萬人（包含台北市280萬，台北縣350萬，桃園160萬），按怎才有四个人來坐這台船仔坐落實在臹袂過心？毋管是觀光ｅ目的交通ｅ目的，攏無應該赫下消才，實在這嗎ｅ人，有影都市化了甚過頭，普通時仔無三無二，禮拜時仔人群猴陣鏘鏘滾臹佳。
落船了後，身邊著是出名全省ｅ淡水魚市場，來給行踏行踏罔罔踅，才袂枉費這擺ｅ路程安呢甡，淡水魚市場ｅ魚色臹贅款，青青紅紅真正好看，風聲講內底有三分之一，是對大陸魚船買來ｅ魚貨，毋才咧愛笑講，大色貨袂尐哩，絕對互汝包滿意ｅ袂啦，這个市場內，倚大門口有一專門咧賣現流魚，真青真嫷，雖然價有卡貴淡薄也，毋閣實在是讚，我買一尾現流ｅ烏魚二百箍，返來了後煎赤滾鹹，孝甲起sampu有影。
附近有咧賣「淡水魚丸」這項名產，噯卡張ｅ，加看幾間仔，上好是拄拄才煮起來ｅ卡衛生，另外一點若準色水白白ｅ，可能有漂白劑，卡交關卡隱，正常ｅ魚丸應該是淡黃色才著，市場行完畢行煞了後，吓使順續去附近ｅ紅毛城牛津學院，看一寡馬偕ｅ故鄉舊厝等等東西。
佇這个所在，小弟來做一个結論哩，互咱茲青年朋友囡仔兄阿伯阿姆，稍參考一下，若有顛誕亦是無好勢ｅ所在，才手勢夯卡懸ｅ，逐傢品無掠包。
上介適當ｅ時機，農曆二、三、四、五、八、九、十月ｅ農曆初六、初七、初八、二十一、二十二、二十三中間任何一工攏真好，早晡坐1:00這班船，逶大稻埕碼頭出發。（注意，以上一定噯農曆，也叨潮汐佇淡水江有口訣「初八、二十三，早暗礁中晝」anesii，牽涉潮汐，一定噯用農曆）。
袂使星期例假日去，甘願普通時請假嘛著忍耐，因為禮拜日去，人甚贅無意思啦，票價嘛省67%，船重危險，接公車困難，這點情形佮去拉拉山仝款，絕對噯普通時仔專工去才好勢哩！
袂記”救生工具”，這點家己噯準備，噯有”危機意識”，徛佇船頭船尾時，噯掠邊杆匼捍著，隨時注意安全。天氣若寒，風吹來會凍手凍面，所以講口罩佮手囊罔帶哩卡有長。上好吓凍佇船頭，欣賞美景，短短四十分鐘爾，絕對互汝有夠本叨著。甚過細漢ｅ囡仔痞毋倘去，注意安全，因為這台船觀光意義卡大交通意義，一四界攏開放空間安呢。船頂無便所，事先噯先解決好勢。
到淡水了後，吓曉去對面媽祖廟、魚市場，附近紅毛城牛津學院稍行踏行踏ｅ，回程吓使坐新店客運抑是指南客運甚至原船返回台北。
14 .汐平公路有影讚
1992年8月中旬，報紙刊出來ｅ消息，汐止鎮，黨外ｅ頭兄阿廣司（廖學廣），欲舉辦「萬人大登山」，个坎站來山，一方面吓凍互眾人了解，新起好ｅ汐止平溪公路美妙ｅ光景，一方面來壯大聲勢，佇起腳落手ｅ當中，知影咱學廣仔汐止地ｅ一枝莿，名聲氣魄讚，做為競選立委ｅ試金石，先試一下仔鹹汫哩，這棚「汐平公路」登山熱著是安呢來熱場，也叨一嘴傳一舌，無外久中間，引起袂人ｅ注意，逐傢探頭探耳，看阿廣司猴弄，揙吓起磅？咁真是汐平公路ｅ靈氣有赫讚是？
本臹按算9月初4，欲舉辦萬人越野汐平公路，閣三工進前來大風颱，一四界地梟悻，嗯才藝姑不而衷延期到十月初四，這聲逐傢真正煩惱，臹驚講日子延，逐傢吓袂記ｅ，鎗籽拍到遐著冷去矣，亦莫怪啦，咱做代誌莿腳lak手，噯嚬嗙叫，搶頭一砲，食飯趁燒，嗯才吓盡磅逗搭，這聲欲延遷一箇月，拖拖沙沙袂就叫，卡加人嘛無欲信斗哩，所以講日子延一月日，眾人攏無把握，日子，一工一工過去，十月初四到矣，本臹按算一萬人吓滇否無把握，實際上彼工仁山仁海，一睏仔三萬外人，有影想著想袂到哩，規ｅ樸實古老ｅ汐止街仔，擠甲吓出油叨著這擺ｅ登山活動，算講逐傢臹學廣司捧場真正嫷喟，臹有面子，嗯才，宛那引起小弟本人ｅ心適趣味，按算欲親身來行一汐平公路，看咱汐止這角勢生漢草按怎，地頭靈氣有夠磅否？小弟佇十外冬前有駛機車一四界唗蹤，毋閣叨單單汐止倚平溪這方面，卡無理解，我心肝內掠掠ｅ，汐止好比台北仝款鬧熱，平溪靠十分寮食穿，有瑞芳氣味稍寡散鄉叨著，嗯才於瞬呤，汐止平溪山區變做是「喜馬拉雅山」一座天然ｅ界山，汐止入平溪，袂輸印度入西藏，這中間壹定有真贅奇卡奧妙ｅ所在，以小弟愛好鄉土ｅ心情，這聲無潦袂煞，又閣看著這擺學廣仙大捙盤，拚了有起，嗯才佇10月11這工規家口到汐平公路，去遊覽踏草青，一下氣空氣哩。
對這个汐平山區，另外有一點好士相著是，有關「鹿堀事件」發生佇這个山區，也叨這个事件真正出名，發生佇1950左右，連侯後賢電影「悲情城市」嘛有咧做。這个事件ｅ種種，看了袂尐，看了真驚，所以講對這个神祕ｅ山區，閣卡有想欲當場給一下，是地理ｅ關係，宛那有歷史ｅ關係，佮政治嘛稍有致代哩。
汐止火車頭離咱台北站，雙頭吊遠15公里ｅ款，搭火車卡緊，好有一班慢車到，坐二十分鐘著到汐止，落車了後，一台計程，約束欲去平溪，續落到深坑，盤過南港，到汐止，閣再去大尖山仙公廟。算講踅（se）一遴叨著，這位司機老大兮，五堵人，對這箍圍仔真正熟似，股務宛那袂，互我不止也放心哩。
逶汐止火車頭，行公路到平溪火車頭，盤山過嶺，攏總有二十公里，算起來不止也遠，差不多舊時台北到淡水鐵枝路平長ｅ款，若是有欲健行鍛練身體來講，拄拄一工著好勢，伊離大台北近ｅ關係，後日吓大pa尾大旺廣，必定吓吸引大台北七百萬人來交關，這擺我北投暢仔有親身行過，知影伊真磊斗，毋是稱採講講ｅ著準吓過去，咱「學廣大兮」，這回押著寶矣，確實人奚風景甡張叨有夠遐哩，又閣連著十分寮風景區ｅ關係，這張「股票」袂輸「永大」，後市真正看好！續落是我對這二十公里ｅ風景做感想，來給分六點來說明，咱逐傢鄉親大，若有時間緊去行行ｅ，袂了去。
按汐止到平溪ｅ公路，沿途風光嫷，氣魄讚，清氣咚咚，佇台北附近，罕咧有第二條矣。
第壹點，本公路所蹔過ｅ山崙，年雨量懸到5500mm，全省第二款第三款，干礁輸火燒寮7000mm爾，因為雨水厚著ｅ，致使公路真正清喟等於逐工咧洗，萬物生長旺盛，吓使講”一塵不染”，一四界青更更，嫷甲叫毋敢有影。
第二點，公路橫過海拔730米ｅ羌寮山，公路最高點ｅ海拔550m左右，比草山（陽明山公園）閣卡夯懸100米，變作伊有真正好ｅ”避暑”效果，我掠，中間山區拍算有火金姑ｅ款！
第三點，本公路ｅ景緻，稍寡有烏來ｅ風味，樣也有南部橫貫ｅ趣味，認真給看，閣淡薄也有坪林ｅ青翠，實在有影互汝想袂到，是台北市附近ｅ光景爾，這款情景，可比銀河洞ｅ深山趣味，無想講隔壁新店是”十里紅塵”哩，所以真正咱茲親鄉嗣大，逐傢來給行踏行踏，實在坎站叨有夠哩。
第四點，伊這條公路，感覺臹""，台員地ｅ山區公路，真贅臹醜材，象北投到陽明山線，像北橫巴陵線，攏真歹駛，單單咱這條平汐公路，造甲真闊，無論駛車，抑是健行，攏臹舒適快活，有影無簡單！
第五點，本公路ｅ展望真正好，其中五、六个展望站，看落去，逶基隆港到台北市區，連做一線，真正心適，這款ｅ制高點，後日仔絕對吓變做出名ｅ風景區，雖然逶內湖到五指山ｅ公路宛那有這款景色，毋閣佇感覺上，這爿汐平公路有卡高尚款安呢。
第六點，汐止這頭佮平溪這頭ｅ山景，仁文建設，差別真大，若斟酌看，宛那袂醜，平溪方面ｅ土碳業已經衰尾矣，毋閣市區猶真有靈氣，佮金瓜石ｅ結局完全無仝，公路施行稍注意ｅ，旅行平溪感覺卡安全哩。
第七點，這條平汐公路，除了本身風景讚以外，又閣是欲去十分寮瀑布ｅ上介近路，真正”如虎添翼”，行情臹揚甲掠袂稠，現主時欲去十分寮，無論行瑞芳，抑是南深深坑線，抑是木柵石碇線，攏真費氣，單單這條汐平公路，上介利便，坐高速ｅ，逶汐止交流道落來，三二下手盤過山著到平溪囉，好駛好行，風景閣讚，我北投暢仔這回考察返來，甲袂講了，这亦莫怪，時代致蔭著ｅ。
返來汐止了後，順續閣去大尖山仙公廟看看ｅ，時間有限，無去秀峰瀑布行行ｅ，真拍損。di閣再講一句，這條汐平公路，會堪咧逐傢來行行ｅ，吸收一下仔山頂ｅ靈氣！
- 拉拉山旅記
拍算十七、八冬前ｅ款，彼時我病院實習，有一工佇報紙看著一梟悻，風聲講北部橫貫公路ｅ巴陵地，有一欉復興2號神木，無拄好去互烘肉ｅ少年人惹著火災，燒甲殘枝敗，真正拍損，深山有神木，心肝內雖然興興，毋閣路頭有影遠，恐驚也來去返捯中間，嗯才姑不而衷鎖佇心內，毋敢潦落。
壹直到娶傢後，彼暫，大約也十年前，下冬天仔，迭迭有聽著放送，司機俱樂部ｅ丁山不時咧宣傳做廣告，講拉拉山ｅ冬天外讚外讚，巴農（陵）地世外桃源幵天，彼時，丁山著有來投資拉拉山ｅ事業，咱搏白ｅ，蕃薯仔創事業，竄筋入骨ｅ精神真正偉大，連深山林內亦知去拍拚，有影活動力真強，咱連知影叨毋知，人尹叨舞一睏大舞睏矣，咱心肝內給按，若無尹這批開路先鋒來捙拚，今仔日ｅ拉拉山風景區。袂赫進步赫鬧熱。
嗯才於瞬呤，這擺小弟來拉拉山憩陶，除了看神木佮吃水蜜桃以外，順續嘛研究早期先鋒丁山ｅ事業，這嗎按怎款，對新風景區ｅ幵發，淡薄也給張弛（注意到）咧。
1980年7月，我佮勇伯仔，尖白臉三个人，坐二隻autobai，就北橫，行巴陵到池端宜蘭，彼時瞬雖然講有經過巴陵，毋閣路頭關係，無法度親訪拉拉山，算講「過路」，尾溜也娶甡囝，連續嬰仔出世，無閒cici，人咧講「落囡仔坑」，逐工甲烏天暗地，為趁錢食飯，拚甲頭汗規身命，叨安呢ｅ十外冬ｅ時間真緊著過去矣，人安呢沈斗沈斗漸漸步入中年，時才知驚，若閣再（延誤）落去，若年老顛誕稱硾拖尾奚著醜材矣，嗯才今年1992，無論如何絕對噯行一畷拉拉山，來了結這幾年來ｅ心願叨著。
也叨拉拉山離咱北投，吊遠（矩離）拍算100～110公里ｅ款，因為山路路頭危險，噯提早來出門才有法度哩，普通人攏是二工一暝，著才吓siapa，毋閣我無好命，無可能過暝，嗯才姑不衷採取透早出門，下晡返來ｅ漏喟步，時間噯互伊真準，絕對袂使顛誕ｅ哩，我按算透早四點準時出門，到拉拉山公園口差不多八點半，憩陶二點半鐘，十一點回程，返來北投差不多三點外，毋知有法度照咱ｅ按算抑無？
1992年7月14日，透早準時四點發車，彰ｅ（老哥）這台千八西西裕隆車，載著阮牽兮，小朋友「紅面兮」，一車三人按算佇六點半到角板山加油站才歇睏。也叨透早駛車，一路無人車尐，嗄嗄叫，毋閣沿路速度真慢，才六十外爾爾，这欲若少年傢仔來駛，上無嘛pe6到一百袂拗蠻哩。
哎！準拄好啦，載大載好行頭一層，文夏ｅ歌攽落聽，才知影透早駛車，宛那仁生大福氣哩，……由北投劍潭、高架橋、金山南路、和平西路、莒光萬大路，駛到連城路時，天色已經光矣，叨囡仔大細，攏臹歡喜，睏神早著走了了矣，真正士相咧看著窗外飛逝ｅ景緻。
逶連城路到三峽這段路途，若準佇普通時仔，著交通複雜混亂，啥乜轎車卡車機車，……人群佳真歹扭搦，毋閣現主時透早五點外，一路通透，直liusiu無顛誕哩，駛落真正爽勢，kimo臹qiang，毋閣接近三峽彼暫仔，發現著大型ｅ砂石車真臹贅，來來去去嚬嗙叫，活欲驚死，才知影砂石仔車，一偗赫大偗車箍lon曠，普通時仔paidelu（形象不佳），嗯才選擇透早四、五點仔，車尐人尐ｅ時瞬發車，哎，人為著欲生活姑不而衷宛那de同情。
三峽到大溪這十外Kilo（公里），也叨路闊人尐，真正好駛，有影袂輸高速公路哩，互汝pe6甲叫毋敢，大溪到三民這條公路，已經十二冬無駛，風景臹嫷，感覺真新鮮奇卡，（返來ｅ路途，直接取近路，行五寮線著吓使），毋閣路彎又閣真，駛車噯，……一路拚到角板山ｅ加油站時，好透早6點10分，想著四點著趕cucu，連續拚到，想落叨爽勢，這个時瞬，大多數人猶睏甲眠眠叨著。角板山ｅ清晨透早時分，各式ｅ鳥仔聲臹，空氣清涼，印相臹深。
無外久，趕緊拚路頭，看八點半進前吓凍駛到拉拉山公園口，才袂，這條北部橫貫，佇十二年前，我有坐機車駛過，印相深刻無咧驚，彼回佮勇伯仔尖白臉駛甲青頭黃面，土粉pupu，有影臹了然，佳哉無落雨，抑無淒慘落魄舞甲袂收山攬尾著害，彼个時瞬靠勢少年哩，耐tun耐踢好肉本，無咧給唏亥著，有影無嫫無猴毋驚死。
毋閣這回閣再來著無仝款矣！歲頭四十外，囝兒規陣，坐佇裕隆仔四輪仔內底，佮卡早坐機車完全無一時間感到肩胛頭臹沈重，佇深山林內小腳條路，彎彎斡，下腳是天公崎崁規百丈深，目睭看著叨烏暗，安全問題捍佇手頭，handle咧紡感到真重，感到規條路真驚，真歹返捯真歹肖閃（錯車）。
佇霞雲坪附近ｅ河床有人挖沙石，有幾落隻砂石車閃來閃去，路阨看落臹危險哩，落尾仔經過榮華、蘇樂，按算佇七點四十到巴陵，這段北橫公路，雖然四十外Kilo，毋閣駛落臹艱苦，比駛普通路四百Kilo卡硬斗，無論按怎講，佇深山坑崁路閃彎，事後想落吓起雞母皮，我看後回仔規氣搭巴士卡贏，北橫沿路真贅烏鴉，咧咯咯哮，kimo臹醜。
這嗎逶下巴陵到公園門口，差不多14 Kilo，昇高700米ｅ懸度，前段下巴陵到上巴陵共7 Kilo，後段上巴陵到公園門宛那7 Kilo，前段这7 Kilo，路面真正闊，所以我才咧愛笑，顛倒支線比主線卡大條，行無2 Kilo，到車輛入山關卡，噯辦入山證，落車了後，風景真嫷，空氣嘛真清涼，kimo臹qiang，這位警察先生，真正壯材，滿面ｅ斯文，辦代誌「兜兜也來」，真正感慨，「發配邊疆徒呼奈何」，咱古早人所說「汝若甚假痟，欲給汝配去海口食蕃薯，看汝驚否？」唉，實在有影哩！
無外久到上巴陵，市草真正鬧熱，嗯才於瞬呤落去看看ｅ，買二大籃水蜜桃，現踮佇車內，一人一粒攏總孝四粒，仙桃蜜汁，入喉青甜，互汝爽甲叫毋敢。續落後7 Kilo駛到公園口，路樣也彎彎蹺蹺臹細條，二隻小轎車閃是乙擺乙擺，不止也艱苦，好佳哉天時透早，車尐人尐，这欲若禮拜假日，嗯著閃甲心頭一腹火，艱苦坐卦苦袂了。
大概也八點十分左右,結局完滿駛到盡磅，拉拉山公園門口，愈想愈，才八點捅爾，叨有法度到海拔1500米ｅ深山，有影臹哩，家己褒袂臭臊，家己謳咾揀袂倒，叨有影。呾這嗎規陣一口灶三个人，行對神木區入去，全部一遴（轉一圈）。推算4000公尺ｅ款，na行na欣賞，按算二點鐘行煞。
這个神木區行入去750米，了後踅圓箍仔，攏總22欉神木，全台灣來講算講叨太祖牌兮呢，確實有影特殊，講尹阿媽十八歲，口灶叨無地比哩，我全省頭尾行透透，叨單單這窟看了上起磅，潦了上嫷，才知影咱台員地，確實讚ｅ壹莊無地比止！
規ｅ神木區，實際上是佇一个山坑溪崁內面，一四界樹木草抱發甲青玲玲，空氣清新，芬多精卡贅，我这大箍人行著血壓嘛上無減三十磅，又閣海拔到千六米，溫度減8度，行落袂流汗。中間二杠溪流ｅ水，冷簡那冰哩，才咧愛笑講，最近仔有”礦泉水真假糾紛”，我看这dada才是上好ｅ礦水，無論按怎，佮深山風味以上，好著是好，讚著是讚，咱筆尾無，袂曉形容描寫，起腳落手ｅ當中，柴柴袂逗搭，夯筆比夯鋤頭卡重，學堂所說「只可意會不可言傳」！
單單有一項顛誕，著是臹歹翕相（照像），光線暗又閣樹欉大，真歹取鏡頭，致使講拉拉山神木ｅ風景照片佮實看著ｅ，有真大ｅ出入，嗯才行遠來，臹有價值哩，這22欉ｅ神木當中，以第9欉上噯給注意，伊是唯壹ｅ扁柏樹種，其他21欉攏是紅檜，這欉扁柏神木，發了臹旺，無論樹樹葉，攏真大pa尾旺廣，頂頭有pon鼠咧爬，吓使講是拉拉山之寶，絕對袂拗蠻哩，这佮中橫貫公路ｅ碧綠神木，屬香杉，攏是真正奇卡ｅ物件。
佇台員看神木，若是寒溫帶類，噯注意「非紅檜」ｅ樹種，才有學問哩，咱茲眾鄉親仔，小弟稍提出哩，我看遊客當中，十分之九無人这。總講這22欉神木，卦另外ｅ大樹差不多百外欉大樹，隨欉攏有隨欉ｅ特色，有ｅ真直，有ｅ枝葉茂盛，有ｅ形態真奇……，簡那十八羅漢隨人pet步總展，看甲目睭強欲肖pua4去叨有影啦！
差不多十點半ｅ時瞬，才駛車返來巴陵、三峽、北投，到厝ｅ時瞬，差不多下晡三點，算起來免一工（天）著吓凍遊拉拉山，結局真正順序，佳哉無發生顛誕，全家大細安然返來，雖然六月火燒埔，頭殼戴烘爐，規身軀重汗，毋閣心情真正爽勢，一絲叨無頭，返厝了後坐di冷氣腳，猶咧著驚，愈想愈驚。
驚啥貨？若想著二小時前ｅ北橫蘇縣段榮華段ｅ天公崎崁，著腳手內pipi，真正拳頭母捏甲欲出汗去，後回仔絕對無噯閣家己駛車去矣，甚過危險哩。尹俍(nia2)呢咧，崁頂若失神，目睭若茫茫匏仔看做菜瓜，一腳步爾，汝著粉身碎骨，規家人忖配稠ｅ哩，咱食卡醜ｅ無要緊，毋倘閣坐戇哩假大肥（逞英雄），來僥擺這齣ｅ！
這擺ｅ旅行，有得著下腳寶貴ｅ經驗，互無去過ｅ人做參考：
想欲去拉拉山，一定噯”非假日”，抑無叨吓後悔再後悔。
交通甚，北橫路甚阨，真歹閃車，北橫兩座橋攏是單行道，北橫ｅ交通比咱土想ｅ閣卡食力！
拉拉山公園口ｅ停車場根本無夠，二位所在，攏總差不多吓停六十外台小轎車ｅ款，真歹，建議汝ｅ轎車上好停佇上巴陵，才閣請專門駛這條線ｅ計程車卡妥當，抑若無者，無地停車宛那噯閣駛回，真正食力哩！
拉拉山公園門口門內，壹律攏無小商店或者攤販，（拍算是驚污染ｅ款），所以講上慢佇上巴陵時，噯僎（準備）飲水食物抑無二點鐘ｅ山路行落來，閣枵閣嘴礁著醜材he。
風景區內底路草吊遠，有到4000米，中間無店無補給站、無醫療設備、無地雨，嗯才簡易雨衫、衣物、醫藥噯量早好勢（早佇台北著噯僎好勢），尤其雨具壹定噯張弛安呢。
詳細ｅ地點噯僎互伊好勢，若有顛誕欲撤出風景區，才有法度決定是欲逶5號神木這頭卡近，抑是逶22號神木這頭卡近，壹切噯家己，無服務員指導。
也叨原始樹林” 烏樹林 :“，光線陰暗，真歹翕相，噯加紮寡film，仝一个所在，加翕三張相（給曝光增減分級），返來了後可能有一張卡好勢，成功率卡大，也叨彼个流擺曝光錶袂準哩，迭吓出差錯，呾這擺翕相，當場曝光正確，毋閣返來洗出來大部分曝光過度，一片慘白，想落心肝激規丸。
入園時間，卡理想是6月20～7月10日左右，上午大約仔7點到8點半之間，下冬天仔贅雨水，規工攏吓好勢，毋閣囡仔費氣，落雨費氣，甚寒嘛費氣。
拉拉山是咱台員地ｅ寶地，參觀仁員，上好是3～ ５人著好，「慢慢也欣賞」才有心適，上驚一行人三、四十人，浩浩蕩蕩，下下，氣氛失，安呢著醜材也he。
除了欣賞神木佮水蜜桃以外，對當地泰雅族ｅ生活建築語言風俗，加減給張弛哩，也叨後日仔欲佮泰雅族人相處逗陣ｅ機會真尐，吓使趁這个機會稍了解哩。
以上十點，希望去ｅ阿同兮嗣大，吓凍做一个仔參考哩，咱講有燒香有保疪，事先僎互伊好勢，卡袂事後咧漏鉤叫毋敢。
長年以來，咱茲福佬暢仔有影叨不吉，迭看茲泰雅族ｅ無現，人是「青番巢ｅ人番tinton」，給人看甲真正衰韶，这有影是昊大地大顛誕，事實上，泰雅族ｅ品質比咱福佬卡讚卡優秀，總是也先天不利後天失調仁口甚尐互人誤會爾爾，这是確確實實ｅ代誌，毋是咱福佬暢仔家己咧漏喟哩。
在「武」ｅ方面，抗日戰爭抗清戰爭，干礁泰雅族勇敢拍甲盡磅壯烈爾，真正哩，霧社事件、太魯閣事件、卓蘭事件，有影驚倒天地鬼神，佇「文」ｅ方面，今仔日有即贅紅檜神木倘互人看。才知影泰雅人夠重自然，愛護環保資源。若準換做福佬暢仔，恐驚也二百年前，茲神木著攏剉來做棺木抑是廟門，這項寶貝，咱今仔日看吓著，絕對噯感激泰雅族ｅ先進大德。
台灣地ｅ神木群，除了拉拉山以外，台中縣宛那袂醜，一睏仔有東勢五福臨門神，后里澤民樹，中港路一段茄苳王，大里鄉ｅ樹王公，大坑圓環樟王，136號公路ｅ山土地巨木，攏臹吓謳咾ｅ。（民國81年10月）
16.文
台員條蕃薯仔，浮佇茫茫大海，四箍遴返歹厝邊抾規綰，仙慪搭，真歹徛起，也叨東京文化北京文化英語文化，重重tata來壓迫，死茲台員囡仔無張，台員文化梟悻，互人夠夠，強強著欲走投無路烏去。
好佳哉佇這个空縫，出四个國寶級ｅ文化天才，互咱吓凍來領受著本土文化ｅ美妙，這四个著是文、楊麗花，苦袂了、吳樂天，佇茲給激一个伍仁，封尹是”四大天王”，尤其是文夏，佇早期戒嚴文化ｅ時代，地位樣也真臹要緊，咱台員地頂港透下港，是通人出名通四謳咾有著哩。毋閣因為過本土化，又閣dai淡薄也阿本仔口，互茲有權ｅ唐山人真正莿，看臹袂作ｅ，定著不止也排斥哩。
佇蕃薯仔ｅ歌壇中，自來著風聲「北有洪一峰，南有文夏」，抑毋閣小弟北投暢仔ｅ感覺，無論頂港下港，攏是文夏一人ｅ天下，仈人袂著車班，这無法度著是無法度，人奚材情天份有夠遐哩，這聲阿文哥聲頭浮志氣揚，真正甲掠袂叨看現現啦，咱做囡仔ｅ時代有影無人tin3伊吓起，有影讚著是讚，絕對壹粒壹互汝比大頭拇哩。
小弟北投暢仔佇山腳開齒料店，翻lin返年，拍算是民國66年是67年ｅ款，民生報成立無外久，有一工有一篇文章，紹介講文夏佇西門町漢中街頭角，開一間海鮮餐廳，號作魚國餐廳，我卡想袂曉，憑咱文夏ｅ扮勢，欲""三、二个錢仔機會是卡贅卡贅，何必著親象壹般庄腳暢仔，趁奚毋臹錢！
嗯才e瞬nia，有一暗專工婁孤帆，到魚國餐廳，店面樣也真正有，外口海鮮魚類規大拖，有影看落吓流嘴哩，內底裝璜雖然無真高級，毋閣真正清氣，椅桌真正曠闊袂擠，小弟北投暢仔，腹堵內五堵六堵，搪咧鏘鏘滾，食白鰻、炒排骨、Beer，後甲飽dudu，今暗文夏無來，算講有來宛那拄搪袂著。
毋閣現場有矮仔王置ｅ，伊是出名ｅ甘草型喜劇仁物，矮矮也吉不吉，我著坐倚去佮伊講，矮仔王真講話雖然是青份人，免五分鐘爾叨簡那老朋友仝款，莫怪伊人緣吓好。
伊有順續提起伊ｅ心苦病痛，講伊有先天性糖尿病，先生毋敢給挽嘴齒有影，……講欲規點鐘才散場，彼个時瞬，小弟已經行入社會，對作生理這途，稍寡吓曉按算，這間店假使閣開落去，利純無倘外好ｅ款，干礁應付厝稅汝著腊腊hiu，嗯才我逶魚國ｅ名片真細膩保存起來，做為另日仔ｅ紀念哩，毋閣尾溜仔年代一下久，遂盼見，有影臹拍損叨著。
我頭一擺自放送聽著文夏ｅ歌，差不多民國45年左右ｅ款，彼時我小學一年、二年兮爾，簡那是奚「再會港都」ｅ款，無外久中間，甲掠袂稠，落尾仔廣播界名人吳非宋，迭佇中廣播放，彼時紅就半粒，規條街仔hehe，剃頭店，噉仔店，一工到暗攏咧播出，鬧甲厝卦強欲夯去，尾仔換德利仙主持節目，差不多民國50年腳兜仔，拄好是文夏歌唱生涯上高潮上出名ｅ時瞬。
彼个時瞬德利仙ｅ節目，一禮拜有一擺「聽歌猜謎」，連七、八條歌，了後來有獎徵答，佇七、八條當中一條重播，互聽友來寫出伊ｅ歌名，寄到中廣公司，猜正確者有獎品，彼年我欲考初中聯考，宛那無惜壹切，屈佇放送邊仔，來猜謎哩，有一擺猜著「星星知我心」，寄去中廣，賞一枝鉛筆，甲袂講了了，汝看三十冬前ｅ台灣，外搭著好，以上猜謎攽七、八條新歌，完全是文夏ｅ歌，汝看文夏外""。
德利仙猜迷彼時是1961，我12歲，經過26年了後，1987，我已經欲四十歲哩，有一工厝邊好朋友德根伯提起，知影噹是仔（原來），德利仙著是大兄，已經六十外歲矣，真正心適，伊對三十冬前猜迷ｅ代誌，無啥印相哩，咱這位德利仙，對台員文化ｅ保持真正熱心，小弟透底給謳咾，有影人心胸氣魄叨有夠遐哩，現主時搪咧主持河洛歌仔戲，名聲通透海內外，行幼秀文化這途。
我就細漢做囡仔時代，小學、初中、高中，壹直到大學，攏真痟文夏這味ｅ，有影讚著是讚，文夏上介出名大約是民國50年左右，彼時有拍一枝電影片，人群佳洘卒卒，逐傢仨爭欲看阿文哥ｅ蘆山真面目。
彼枝電影風聲講文夏提著四萬箍ｅ片酬，彼時錢大圓，佇台北市內吓凍買半棟樓仔厝，毋閣民國51年了後，電視開播，文夏漸漸落坑，續落吊脰搶後腳，本土文化受著悽慘ｅ打擊，是文夏爾，連洪一峰、陳芬蘭……等等王牌，攏倒閣哩。
文夏歌聲讚佇佗位？伊讚佇”半鴛鴦仔聲”，這款ｅ技術，人絕對學袂落來，小弟佇茲，吓使真大膽來落結論，親象文夏這款唸歌ｅ技巧佮聲調，絕對”前無古人後無來者”，天以來嘛毋捌好聽，後日仔久久長長，亦無可能有這齣ｅ。
这按怎講？也叨”半鴦鴛聲”上介歹唸，輕輕也若袂好勢，著不男不女漏漏dak袂後孤拄ｅ，偏偏咱文夏歌喉世間壹等qirdr，唸甲峇峇峇，ut ut ut，講一句卡無輸贏ｅ，連所有的日本歌星，宛那tin6伊袂起（雖然文夏歌大部分源頭日本歌），毋是家己謳咾袂倒，叨者者有影看現現哩。
抑毋閣真臹拍損哩，親象款國寶級ｅ仁材，咱ｅ社會遂無牽成給逗（捧場），佇文夏上介要緊35～55歲，仁生上食肉ｅ歲月中間，竟然恬恬無消息，這二十年中間壹片空白，壹直到近來，也叨本土化興起，現主時毋黨外有咧注重，連老Ｋ電視台嘛不時咧訪問牽成，毋閣老猴無粉頭矣，五、六十歲面皮攝攝佮卡早少年白肉呰面差足贅，仁生苦短，真臹感慨，連我這个庶當時八歲聽伊歌ｅ歌迷，現主時嘛四十四歲囉。（1993）
咱蕃薯仔，有好毋捌寶，豬肉來做鹹菜賣，有影叨了然哩，聽講這二十冬ｅ中間，本土文化受著壓迫，文夏這款人自然著無張，汝欲叫伊唸北京話ｅ歌伊宛那無qen，嗯才有時瞬勼佇島內，有時去日本走唱，生活落魄有志氣，甘願做乞者著無欲求人，彼時算講家己開餐廳，這款ｅ生理，伊嘛無第二句。
以伊ｅ知名度伊ｅ材情，根本著毋免做這款闌珊生理，咱人散，散了有本等叨有影哩，寫到茲來，小弟心肝頭一瞬ｅ滾，鼻酸目燒實在叨真怨歎，按怎蕃薯仔赫尼看輕家己ｅ文化？咁講奴隸做慣習矣，無管夆摋叨袂爽是ｍ？看輕本土文化，著是看蕃薯仔無夠重，另外講東京話、北京話兮、英語兮，攏總欲食咱食夠夠，阿文哥去夆冰二十冬，表示本土文化夆遭躂二十冬，真正悲哀叨著。
舊年過年彼暫仔，佇城內買著三捆文夏伴唱帶專集，吓使講逐工聽暝日看，袂sen6袂極興這路，真正痟甲這形兮叨心適，佮十外冬前聽錄音帶仝款，算來小弟著認定講，伊是生活中ｅ一部分，是袂凍客欠ｅ精神食糧安呢。
1992辣昊，有一本市面ｅ雜誌，來講著文夏ｅ代誌，講著文夏現主時咧飼台灣土狗，正港ｅ台灣土狗，這嗎日本方面搪咧紹介，致使純種本地土狗身價浮頭，普通一隻純ｅ種狗，拍算吓凍賣著一佰萬新台幣ｅ款，古早人咧講「賣豬賣狗，主人開口」，時代ｅ關係，這嗎茲狗主，尤其是稀有品種ｅ狗主，逐家，莿搦，真正大尾也發角也，文夏茲純種ｅ台灣土狗，價值規仟萬，源頭ｅ因緣是按怎，有法度倘赫贅狗仔？仈人同好者，按怎掠無？“平平錢，按怎掠豬仔卡輸人？“這點真正心適，樣也互逐家攏想噯知影。
噹是仔文夏旅行梨山ｅ時瞬，拄著一个老士官欲返去唐山，文夏叨內行人，自那逶遐狗隻買落來，續落家己來經營，嗯才現主時飼甲一陣臹大陣，純台灣狗肉面有一絲仔親象虎面，腳短身結，食醜毋閣真勇敢，是一款真正優秀品種，莫怪阿本仔是覦（qen 4）甲叫毋敢，娛樂界ｅ天王巨星，吓來潦落做飼狗，別一番ｅ風味，總是有興趣有材情，咱踮茲給恭喜叨著。
文化ｅ事業佮經濟發展，真正有關係，咱人噯腹堵食吓飽，呾有心情來吟詩唱曲，觀賞戲劇，台灣地這嗎雖然講發展到某一个坎站，毋閣文化氣氛實在無倘外按怎，朋友兒兄請人客，伊甘願一仟箍食一頓，嘛無噯幵二百箍買一本家己意ｅ書冊，有影想著怨歎，今仔日想起文夏壹代本土歌王，落場坎苛，这毋是文夏一人ｅ代誌爾，實在是全蕃薯仔仟外萬人外，上第一見羞無面子哩，映望後日仔歷史ｅ錯誤，毋倘閣來發生好。
有人講，文夏唸ｅ歌攏是日本歌，無愛國啦，文夏唸ｅ歌是日本調無毋著，这是因為台員佮唐山無來往，姑不而衷唸日本歌，也叨用台灣話唸，著算是台灣文化，抑無德國ｅ貝多芬如何佇英國、法國上演？實際上來講台灣話，北京話、東京話是完全無仝款ｅ話語，台灣話夾佇二大外話中間，真防止尹ｅ影響，这是無法度ｅ代誌，毋免過給人，何況台語文化這幾十年來，受著統治者ｅ看袂夠重，硬拗落底叨吞銅食鐵溜溜衰韶，佇街頭巷尾厝內田寮，haai二句仔台灣歌仔，是到位去？（民國82年3月）
- 未先知
逐擺若想著這代誌，心肝頭著起愛笑哩，哎！蕃薯仔實在甲有偆，按怎李遠哲佇民國75得Nobel獎，毋閣台灣ｅ雜誌，確實佇民國75年進前著寫「台灣人將吓得著Nobel獎，因為……（後面揭曉謎底）」，按怎代誌發生進前ｅ一冬，著吓「未卜先知」，知影尾後ｅ代誌。
个中間，陰差陽錯，竹篙逗菜刀，臭厝崁仔去著，代誌返ｅ中間，吓互汝笑甲下頦去，這層千真萬確ｅ代誌，這嗎寫出來，吓互後出世人感到真奇卡，「鼓佇內，聲佇外」，罔聽罔看，當作「飯餘茶閒」，一款時間外ｅ娛樂，逐傢品無掠包，於瞬，代誌是安呢甡：
台灣ｅ生理人叨真夭壽骨哩，去菜市仔買物件，輕也無張弛，著吓去互伊騙去，比論講饅頭松茸給汝薰硫磺，食了吓顛誕，蝦仁給汝參硼砂，久來身體吓粒積，有一回阮牽兮買一塊紅色ｅ鮭魚，返來了後冷水一沖，才知影噹是仔著是漆紅色ｅ色素，水沖了後紅色退盡，又閣偆白肉。哎！萬項歹失德，想落有影吓心肝，有影吓互茲顧客，給到透底，嗯才講菜市仔是非贅「厚頭路」叨著，這項破散步了然步，大菜市細菜市，閣欲倚欲倚，有影鼓袂拍袂陳，互眾人來給啼笑，毋知佗位咧袂拄好，nae脫線哩。實在毋倘做这夭壽ｅ頭路才好，咱人散罔散，噯散了有本等，生活徛da吓嫷喟，有甡張哩。
ga佇這款惡質ｅ大環境以上，真正歹紡關於「」ｅ欺騙案，有影贅甲倒街路，稱彩喚一聲著規”拖拉庫”有影，逐傢心肝mi鼓噗”彈”，驚兮咧等，佇民國75年年底到76年年初，市場界忽然傳出「餿水油事件」，用pun去提煉油，來互人實在臹夭壽，這个提煉ｅ大本營，聽講佇金山山內，伊認定講無人知，毋閣雞卵密密亦有縫，鼓佇內聲佇外，漸漸風聲喚喊傳入新聞界，嗯才於瞬呤代誌規尾，台灣人ｅ面子臹衰臹魯，毋知欲夯去佗位才好！
我ｅ診所隔壁拄好是書局，每期雜誌我攏看吓著，佇75年年中，有一回我去看雜誌ｅ時，有一本雜誌，簡那是時報週刊（或什麼），頂頭寫著「台灣人ｅ頭（腦），世界最棒大天才，能將餿水油，煉成食用油，台灣人快得世界Nobel化學獎了！」
果然神明有聖，一年了後，李遠哲得著Noberl化學獎，這个時瞬，我才想起隔壁書局雜誌ｅ代誌，有影「未卜先知」，「聊齋誌異」又閣一章矣！