-
高原旅愁
小坪頂，一个坐位北投佮淡水中間ｅ坪頂地，每9年一擺神祕ｅ大拜拜，號作”公”，山頂尾溜安呢鬧熱滾滾，下腳都市人真尐知影，每擺迓尪公，攏互我目燒鼻酸，真正傷感，心肝頭一瞬ｅ絞滾安呢，想著仁生短暫世事無常，有影感慨哩。最近幾擺ｅ祭典分別是民國46年、55年、64年、73年、82年、91年，9年一回，臹無額安呢，民國46年彼時瞬8歲參加一回，27年後，民國73年又閣一回，目前後禮拜82年2月26日呤，又閣時間到，欲閣迓鬧熱矣！
佇1750～1800年間，有大批ｅ安溪貧民，親象海湧壹般來侵入台北盆地，也叨進前”食物肉”好空ｅ所在攏互晉江，南安人占滇矣，嗯才孤不而衷徙入去附近ｅ山崙仔，致使著台北盆地ｅ外圍山脈，大多數攏互安溪人占了了，安溪人ｅ保護神著是尪公佮祖師廟二款，台北縣市ｅ淡水、北投、景美、木柵、深坑、石碇、汐止、三峽、樹林，差不多攏是安溪移民ｅ代安呢甡，其中北投、淡水佮景尾木柵二掛ｅ安溪人，上介團結，約束每9年呤，叨迓一擺「張尪公」，來摋豬公大拜拜。
其他ｅ”高尪公4年一擺”安呢。毋閣張尪公九年才一擺爾爾，時間甚過久，致使每回攏有一批老歲仔過身去，一批少年人變中年，感覺著真正傷感安呢，阮ｅ祖公差不多90%以上攏是安溪人，阮阿媽（祖母），細漢佇小坪頂大漢，食遐ｅ水米真正有感情，每九年著經歷一擺迓尪公大拜拜，所以真正注重，連茲囝孫宛那攏臹尊重這个節目。
民國46年春天，我讀小學2年，佮嗣大盤山過嶺到神祕ｅ山地──小坪頂，伊是坐位佇現時國華golfｅ身邊，彼時交通無利便，欲去小坪頂這个”深山”ｅ小庄頭，袂輸現主時去拜訪南澳金洋村仝款，感夠真硬斗真遠安呢，小坪頂本身是高原地界，四箍遴返攏是山崙，伊親象宜蘭雙連埤仝款，深山內有這款平地，蹛二、三个庄頭，有影無簡單安呢。
民46年彼擺迓尪公大拜拜，真正鬧熱，佇”香埔”有比賽扛轎（目前國華golf場停車場），最後結局時，有一項真正有仁情味ｅ齣頭，著是”香埔大會餐”，茲張姓ｅ後代囝孫，提供各種點心、包子、肉粽、麻油雞、水果、米粉，無條件互現場ｅ觀眾，自由取食，汝食我ｅ，我食汝ｅ，真正趣味哩，彼噹時物質客欠，吓使食免費ｅ點心，逐傢宛那真正歡喜感恩叨著，這擺ｅ迓尪公大典，互我印相臹深刻。
9年了後，亦著是民國55年，彼時瞬我讀建國中學，無法度返回參加祭典，真是遺憾，又閣9年了後，民國64年春天，我搪佇宜蘭鴨母寮做兵，歹勢為這款民俗請假，又閣耽誤去矣，壹直到民國73年（又9年過去）我已36歲了成家立業，結婚甡囝，才有機會參加这9年一擺ｅ盛典，距離頂回民國46年，足足有27年之久，汝看想落吓捶心肝抑？
這嗎（1993〔民82年〕2月），我夯筆寫本文ｅ時，尪公欲閣迓鬧熱矣，我已經45歲矣，後回閣再出來時是西元2002年，我已經54歲囉，閣再15工以後尪公出迎，我吓盡壹切力量去參加，回想頂回民國73年以來這9年ｅ生活，做寡檢討，來感受時間流失ｅ驚惶安呢。
頂回民國73年3月8日（舊曆2月初）尪公出來ｅ時瞬，我落齒科業務，親身到現場去逗鬧熱，以36歲ｅ經驗（9年前），吓使講看透天下大細項陣頭迎神，毋閣單單彼工迓尪公我心情上介緊張亦歡迎，目的著是欲27年前（8歲）ｅ迎尪公ｅ片碎記憶，一絲一縫，看吓凍回想起”做囡仔時瞬”ｅ記池？咱人做事頭一回ｅ印相上深，彼擺迎尪公ｅ深刻印象，是竄筋入骨威威鑽，一氏人記稠哩。
民國73年彼擺ｅ迎尪公，佮我細漢印象差不多，因為場所卡，賽轎改佇路中央舉辦。另外”食點心”改做辦桌，這擺我有攝錄影帶做紀念安呢，總講一句，一項民俗，經過27年了後，重閣回想，是仁生當中真正心酸ｅ代誌，真正是現場心肝頭鏘滾安呢。
如今，9年後ｅ今仔日，閣再十工，亦著是民82年2月26日，尪公又閣出迎矣，上歡喜著是阮阿媽（祖母），頂回民國73年彼擺，伊已經77歲，有怨歎「下回尪公出來，86歲矣，恐驚也無佇世間矣」，事實上9年過去矣，阮阿媽活甲臹好勢，後禮拜我猶按算欲用車載去看熱鬧呢！庶當時民國46年出尪公時，阿媽50歲，如今82年出尪公，連我嘛45歲囉！
咱跋白ｅ，張尪公9年出一遍，實在無妥當，每擺出尪公攏吓變一批老人ｅ消失，迎尪公摋豬公請人客，袂輸咧開”決別會”，有影臹悲哀叨著，少年朋友，壹旦錯過機會，著ai 18年或者27年才會再見著，簡那咧看哈雷慧星仝款，所以講”迓尪公”，表面上臹歡喜，實在心肝內真正驚惶，家己老矣無打緊，厝邊嗣大”無置ｅ”才是大條哩，嗯才我建議9年出一擺ｅ張尪公，應改做三年一擺卡妥當，互這場「小坪頂高原」ｅ旅愁量早落！（下降）（1993年2月） -
不分區代表
1992年12月19日，台灣地舉辦第”二”屆立法委員，擺捙拚，民進仔”含心gap命tin 6搭底”，一睏仔提36巴仙，選甲鏘滾安呢，算講有磊斗有敖有勝利，這聲破草笠出頭昊，蕃薯仔暢ｅ，是看夠歡喜落斗心花僬（全）開矣，老Ｋ一个面仔遼，夆電甲工夫工夫有影。
是按怎講民進仔得36巴仙算成功，老Ｋ得60巴仙算下消，因為選舉本來著先天選舉本來著先天不公平，人ｅ本性，甡成西瓜倚大倚執政黨哩，又閣先天著”貪財驚死”買票流行，真尐吓倚在野黨，閣再執政者百利用電視人力公家資源全力助選，致使著世界ｅ在野黨，通人嘛衰簡那梨仔ｅ，親象日本赫尼民主，伊ｅ在野黨自來著毋捌超過三成，今仔日台灣佇真正不利ｅ環境下，樣也吓凍三成六，實在有影lau4，老Ｋ得六成，毋閣扣除無政治意識ｅ派系支持，軍公教鐵票，壹切公家有關人力、電視、報刊、賄選……，老Ｋ實在得票應該無超過三成安呢。
民進ｅ不分區代表，這聲趁這个機會加卯三位，本來按算8位爾，最後結局有十一位安呢，也叨嘴笑目笑哩，毋閣小弟佇茲徛佇愛護民進仔ｅ立場，給民進黨ｅ「不分區代表」潑一桶冷水，這方面民進黨中央，確實有辜負著伊ｅ三百萬清氣ｅ支持者，想落著心酸安呢甡。
不分區代表ｅ意思，著是講「某一寡財力淺薄，或者是宣傳ｅ學者，無適合選舉，這批仁材咱互各政黨家己決定，免選舉著吓使做立法委員」，伊ｅ用意即尼好勢，咱民進黨是一个充滿正義公平ｅ組織，按怎做袂到，互全國百姓來看？
這擺不分區ｅ產生，採用黨員投票，表面上看真公道，毋閣實際上真正，看起來民進黨，噯吓凍大場面，抑無後日仔國民黨稱彩撣（丟）幾枝骨頭互汝，恁內部逐擺著起怨傢肖扑，吓辜負三佰萬ｅ支持者！
這回民進黨採黨員投票，干礁1300票著錄取矣，这佮壹般區域立委噯五、六萬ｅ票數，相差甚贅，致使著有人頭票源者著”公權”，真正有內材者，比論講江鵬堅遂來落算，真正無公道，有ｅ當選者平日功德無夠，有影何德何能？有ｅ親象余某某家族，一人選不分區，一人選區域，造成黨內憤憤不平，甲無力著有影哩。
卡好勢ｅ甄選，應該是安呢，「民進黨」按算錄取9个左右，先保障黨主席、超然學者、外省代表、民主前輩者共4名。續落去,以黨員先選出15名，再第二次投票選出5名，以免「遺珠之憾」，伊ｅ理由安呢：
黨主席必須為當然代表，也叨這台”民進黨大巴士”是黨主席咧運轉盤呤，行駛佇危險坎苛ｅ歹地頭，若無法佇立法院這个上要緊ｅ所在返捯，叨袂輸司機「瞎仔摸象」，規台車吓真危險叨是，算講黨主席噯去做立委，这是權利，宛那是義務，是無到叨位去啦！
學者代表，學者大部分無錢，又閣無噯潦落政治ｅ烏暗面，尹為著正義挺身出來，叨已經得失著官方矣，咱民進ｅ若是有正義感者，著應該提拔知名學者來參政，這聲吓凍提高咱民進黨ｅ形象，加吸收一寡社會ｅ游離票，承續吓給倒校方行政系（支持官方），造成潛在ｅ校園壓力，所以講提拔學者，完全是「戰略」，真贅好處攏看袂著，佮一般「戰術」性ｅ財閥土霸無仝款叨著，民進黨這回無主動提名學者，是上大ｅ失敗。
外省籍代表，外省同胞占13巴仙，這擺應提名一名卡好勢，假如民進黨無法度包容外省人，致使著「不分區代表」佮「壹般區域代表」完全掛零時，確實有失風度，這擺選完來檢討，民進黨攏總51人，百分之百本省籍，吓互外省人感到真嚥氣（感慨萬千），加減對不住投互民進ｅ外省票安呢，另外一點是，“汝佮既然無提外省人以上，汝叨袂使批評老Ｋ提名一半以上ｅ外省人（多達十數名）“，家己自毀長城，失去攻擊老Ｋ ｅ機會哩，外省人ｅ仁選我想陳師孟教授上介好勢，伊為著民主ｅ，來得失”黨國”，放棄特權，有影互人吓目燒鼻酸哩！
民主先輩，選著卡早為民主犧甡上大ｅ前連，我看林義雄先生上介適當，老實講林先生道德高尚，咱搬請伊出來伊猶無一定吓答應，咱應該好禮給邀請拜託安呢甡。
所以，對這擺民進仔ｅ不分區代表，應先提名黨主席、學者、陳師孟、林義雄，其他名額再由黨員分二擺選舉，互仁材浮現（分二擺，才袂造成親象江鵬堅ｅ遺憾）。
其他「原住民」代表，我感覺用仁員財力支援著好，暫時免占用名額，也叨原住民35萬，有山地山胞佮平地山胞共4名，平均9萬人一名立委，咱一般人噯20萬才一名，老Ｋ欲灌水控制全局，尹原住民家己著毋領情矣，無咧信斗矣，徛佇民進ｅ立場，用仁員財力逗腳手爾，欲提名，後日再討論著是！（1993年2月10日寫） -
謳咾王童導演
天才電影導演王童仙，暫仔完成大作「無言ｅ山丘」，得著金馬獎幾多項，頂月日呤，走去對面戲台，交關哩，逶十點外看到半暝一點捅，hut欲三點鐘，鄉土戲齣真幼秀，搬甲盡磅逗搭，是讚閣再讚，我這个自來著鐵齒ｅ人，宛那看甲感心傷悲，謳咾甲欲逐舌安呢甡。
自來，蕃薯仔文化著受統治者看，想欲用壹切ｅ辦法來tun踏，官方文化佮百姓文化，迭迭咧門扇板逗袂，人講懸低耳大細目，台員人衰簡那Lai仔ｅ，嗯才佇這个流擺，咱阿童仙，以外省人ｅ身份，即尼疼惜愛護這塊土地，為台員ｅ文化投入即贅苦心，有影互人真感心，互人鼻根酸目油燒哩。
進前「看海ｅ日子」、「稻草人」，宛那互人真正欽佩叨著。現主時有ｅ先覺迭迭消毒台灣電影無水準，这著矣，「袂曉睏，眠床歪」，家己噯卡拍拚ｅ，仈人才吓認定汝，親象這嗎三台電視八點檔，全全採用港星來打擊本土演員，安呢按怎文化會根大，一下看了「無言的山丘」呤呤，汝著吓凍了解，萬事認真頭一層，毋倘壹直見怪仈人，噯做、噯試、噯浮頭…，咱ｅ文化，症頭赫重，有影食力呢。好佳哉猶有人咧拚，真正好勢。
毋閣欲從事文化事業，無論一項，攏臹硬斗，尤其電影方面，錢了時了力費神，「燒爐添炭，著力閣歹看」，佇這款艱苦ｅ環境呤呤，咱導演王童仙，嘴齒筋咬咧，含心gap命，艱苦坐卦，一點一du，來tiap這部經典作品，有影這个功利社會，互人真感心叨著，佇茲小弟向王童仙行三个叩頭大禮，表示尊敬，比大頭拇。
平平是仝款踮金瓜石拍ｅ電影，這齣「無言的山丘」，佇感覺ｅ中間，比起另齣「悲情城市」ｅ電影彼場，有卡幼秀，互人感想臹深入，臹盡磅，下腳這四點互我真謳咾。
第一，服裝穿插ｅ古樸佮實在，有影讚甲互汝無話倘講，得著最佳美術獎，也叨飽飽飽在欉，汝若有看著馬偕博ｅ，佇淡水給人挽嘴齒ｅ相片，著有感到真親切感哩，這方面「其他ｅ影片」，簡那文文矣，無注文著，無啥印相安呢甡。
看阿童仙ｅ影戲呤，頭一个感覺著是「場景臹嫷（美）」，尤其是頭一齣「看海的日子」，大部分攏取景宜蘭真正讚ｅ光景，互人耳目一新，正港著是正港，王童正正壹粒壹ｅ！
第二，各種小仁物ｅ描寫，樣也真正幼秀深入盡磅逗搭，是鄉土性人物，像賣麵茶ｅ、福州仔阿西、老娼兮文英，性格鮮活跳傱影面，連派來台灣，食糧投軍ｅ礦警、頭傢宛那真頂真入腹。規ｅ戲齣返捯ｅ中間真順序siapa，簡那「大熱天灌一杯可口可樂」ｅ，冷入心房直透腹腸是竄筋入骨威威鑽，看了臹起磅是爽甲叫毋敢安呢甡。比較起來，其他方面ｅ影片遐，叨安呢拖拖沙沙纏腳絆手，互茲少年仔無噯用頭腦者，心肝沈沈叨煩兮咧等叨著。
第三點，台語ｅ運用佮台灣戲ｅ表演，真正標準真正有聽福叨著啦，小弟是專門咧研究台灣話兮，這場電影有九成攏是台語對話，伊ｅ台灣話真正純真好聽，「在欉，正港ｅ」，這款鄉土性ｅ電影，對語言ｅ要求真要緊，規ｅ影戲ｅ氣氛，佮話語ｅ吞吐返，有絕對ｅ關連，嗯才有人咧講”科學佮法律吓凍翻譯，文學佮戲路是絕對無法度話”，者者叨有影哩，這齣電影假使用北京話來搬時，伊ｅ心適氣氛著吓卡減哩。另外一點，叨是庄腳歌仔戲ｅ演練戲場，小弟毋是戲劇專門兮，毋閣看伊ｅ現場表演了真正有扮趣味，場外ｅ裝插擺設了然寒酸，顯現出台灣人艱苦心酸ｅ一面，这毋是戲台頂披金戴銀吓凍來比論ｅ。
第四點，戲齣前後返捯ｅ中間，感情了真重，真正有仁情世事ｅ心適置ｅ，這款仁性化，為生活拍拚ｅ艱苦實情，描寫了真正盡磅鬥搭，袂輸親象咱做囡仔時瞬，厝邊頭尾彼款淡薄也ｅ悲情仝款，這款連帶有衰尾了然ｅ氣氛毋是現主時都巾人有錢人所體會吓著ｅ。總講一句，佇茲無法度說明入腹，這款有深厚悲情ｅ仁生，噯家己親身去感受體會安呢甡。……咱这「無言ｅ山丘」，這方面表現了真嫷喟，茲嗣大鄉親，吓凍稍給了解淡薄也內含。
即尼壯材成功ｅ影戲，吓使講是近年來，咱台灣地上介歡喜ｅ代誌，頭頭尾尾，形形色色，簡那安平咧迓媽祖哩，一幕一景na走馬燈哩，有影看甲目睭吓肖，連奚上介鐵齒上歹剃頭ｅ先覺，嘛比大頭拇叨有影哩，新時代ｅ腳擻，逐傢食飽穿燒貧惰慣勢矣，算講西瓜倚大爿，坐圓無坐扁，單單有這位戇人王童仙ｅ，甘願潦落無惜壹切，實在互咱臹袂過心，這齣電影讚著是讚，讚甲互汝謳咾甲三暝三日叨舌，王童導演，算講是咱鄉土界ｅ大枝龍柱，互咱台灣文化吓凍閣卡進一步，來生朸勃見光大欉lo。
這齣影戲差不多無欠點，無一絲仔明顯ｅ脫線去，若準強欲”和尚頭尋蝨母”來講，（真要雞蛋挑骨頭的話），茲有三點稍寡建議，不而顧，这無礙著大局ｅ成功佮永遠藝術ｅ價值，加減講加減聽爾爾，免甚過計較，嘴仔紅紅噯講人，罔講罔講。
第一點顛誕著是片名無夠鄉土化，「無言的山丘」照台灣話直譯應是「山崙仔恬恬恬」，是「悲情ｅ山崙仔」、「傷心ｅ九份仔地」，安呢有卡妥當啦！
第二點，互鎗死ｅ黑衫義士，出山時ｅ鼓亭，應該使用哀樂，電影誤用迓媽祖ｅ北管樂。
第三點，對礦區「矽肺症」ｅ死亡患病艱苦，完全無描寫著，離開本題甚過遠去，甚過離經，也叨礦區內底差不多每月日，攏有人因為矽肺症停工，再經過三、四月日了後吓死亡ｅ慘代，這款病欲死進前真艱苦，半暝喘氣喘袂離，ai半坐半扶躺，壹直喘壹直無壹直勼甲完全無死亡，身邊ｅ人真正夯狂，者者仁生大悲慘。
我ｅ老年朋友中，講著九份挖金礦，攏先講矽肺死亡ｅ恐怖，這層代誌，吓使講是礦區真正姑不而衷ｅ「註冊商標」，古早人趁錢真艱苦，雖然有矽肺症ｅ索命符，宛那有臹贅人為著一嘴飯咧拚生死，阮兜隔壁勇伯仔迭迭咧講，福州仔上介合和（團結），一个若肺病死去，另外一个這緊去入做空課，單單為著一碗湆糜仔爾爾，叨前倒後起，講來有影心酸哩！
佇七、八冬前，王童所導ｅ「看海ｅ日子」，互我初擺了解王導演ｅ天才，看伊ｅ電影，感覺風景攏臹嫷，有影替蕃薯仔面皮，臹有甡張叨著啦，這片是宜蘭ｅ故事，前後連貫，真有漢扮，毋閣可惜該片？？角，自電影出名了後，一四界去，走傱內外，真贅擺公共場合，無真重視家己ｅ母語佮鄉土情，互咱茲台灣本土派ｅ，臹給消毒，有影看落臹袂作ｅ，一个人靠鄉土來出名，結局來背祖鄉土，為著巴結某mi人，甘願逶老父教ｅ話給切斷，哎……。
五、六冬前佇國聲戲台看著「稻草人」，這齣鄉土電影，行溫和感恩ｅ仁情片，故事真趣味，演員宛那真認真，互汝逶頭到尾，感到真正清涼，这攏噯感謝著王導演ｅ天才佮拍拚哩。
台灣這幾百年來，文化ｅ運途臹慘，互人甲悽慘落魄，1895年ｅ「國」語推廣佮1949 ｅ「國」語推廣，逗逗搭搭來打擊著本土文化，佮語言ｅ生存權利，現主時有真贅來台四、五十年ｅ老芋仔，甚至連台灣話著袂曉聽，真正悲哀叨是，ga佇這款悲哀ｅ坎站以上，閣有王童即偉大熱愛本土文化ｅ仁格者，有影互人臹給感心。
總講亦是一句話，真勞力王童仙兮，真正感謝！ -
承德路暝
二月日，逐傢又閣無cici，選舉立法委員欲到，咱這區「台北北區」一睏仔有二十外人，欲搶九席ｅ委員，有影臹硬斗，又閣互我想起民國76年，長廷仔腳踏tut去（馬前失碲）ｅ往事，彼暗ｅ情形，互咱選民吓凍看出政治仁物ｅ苦衷、修養，確實咱長廷仔，有影讚著是讚，代誌經過贅年，小弟依原無惜筆墨，來大大謳咾。
一个人，毋倘看伊大成功大僥彼个時瞬，噯看伊落魄下消，失敗困頓，按怎應付時局，按怎tu破草笠出頭昊，講起來長廷仔這擺顛誕，表現了真，有影人才情氣魄叨有夠遐哩，真正是「仁格者」，叨是啦！互人吓循ｅ，互我這个鐵齒銅牙槽ｅ人，宛那感到心肝頭真正酸軟。
1986拍算是12月初ｅ款，舉行立法委員選舉，彼年台北市黨外提名三位，謝長廷、安扁仔嫂、康寧祥，彼噹時，以謝長廷ｅ聲勢上好，一四演講人群洘卒卒，逐傢攏比大頭拇，隱稠兮啦，無問題啦，絕對袂顛誕啦……，因為勢頭甚浮，互逐傢誤會伊臹隱，嗯才票源遂大量流入康寧祥佮安扁仔嫂，選舉這款ｅ代誌，噯看最後開票才知影輸贏，干礁好著無卡擢哩，所以迭迭吓看著聲勢好ｅ，顛倒選袂稠。這款溢來溢去ｅ代誌，選戰時不時吓「爆出冷門」叨著。
事實選舉前一二工，謝長廷著已經透過下腳手仔知影，這擺聲勢衝了甚起，逐傢誤會謝隱稠兮，嗯才有大量票吓移轉互仈人，顛倒謝長廷吓落選哩，嗯才佇選舉進前一暗，謝嗣大聲喚喊，叫謝長廷大危險，毋閣逐傢庫庫，認定講是加減haai爾，致使著長廷仙宛那真正無奈無伊法哩，是按怎下腳手仔知影？無啥困難，逐戶電話去問，全台北市2000人做採樣，才知影空頭好醜叨是。
開票彼暗仔，小弟宛那真關心，差不多六點左右，我行到對面小學彼腳票筒去看呤呤，發現謝長廷ｅ票干礁康寧祥ｅ一半長時，規个人腳尾僬冷去矣，心肝mi鼓樸樸跳，尾溜也自我安慰，可能咱茲阿兵哥卡贅，袂準啦，仈位汝看謝長庭一定讚叨著。經過十五分了後，依原謝只有康ｅ一半，這个時瞬，無法度，才緊拚到承德路謝長廷總部，看各所在票源按怎，彼噹時台北無分區，規台北市箍圍赫尼曠闊，開票ｅ速度臹慢叨著。
長廷仙ｅ總部，設佇承德路佮長安東路ｅ三角窗，佳哉承德路真正闊，半條快車道，攏互洘卒卒ｅ人群圍稠ｅ，內底樣也有人咧賣番麥汽水灌腸東西，有影鬧熱滾滾，逐傢攏欲來看鬧熱叨著。
開票ｅ現場，搭一个足大ｅ柴棚，袂輸歌仔戲棚，頂路寫著各候選人ｅ名牌，下腳著紀錄尹ｅ得票情形，也叨開票ｅ速度實在甚過慢，規ｅ會場ｅ氣氛真正喔哫沈悶，又閣無椅仔倘坐，逐家ut久腳骨閣吓酸哩，尾溜知影雲林ｅ朱高正得高票當場，全場響起一瞬ｅ歡呼聲，民眾ｅ情緒真正高漲，（毋閣六冬後，朱高正背離民進黨，投入老Ｋ，夆給臹怨蹉，政治仁物喚變著變，俍咧卡好哩）。
開票速度慢，嗯才有演講者，隨時就台，講一寡短評或者是笑，來解除無聊做義niu，其中有一我印象臹深，想落著噯笑哩，伊講”民國71年，老Ｋ去天國時，著著孫中山”，問伊「老Ｋ啊，limbe三民主義，汝實行了按怎？」老Ｋ講「真好勢，頭一任總統是我老蔣ｅ」、「真好，第二總統是？」、「第二任是”于右任”」、「真好勢，抑第三任咧？」、「第三任是”吳三連”」、「真好，抑第四任咧？」、「第四任是”趙麗蓮”（英文權威）」、「好啦，第五任咧？」、「第五任是蔣家不幹，嚴家幹」、「第六任咧？」、「第六任是嚴家不幹，小蔣接著幹！」這个時瞬，國父真正想氣，拐仔頭著逶老Ｋ給落，這聲「三民主義」其中「民主」無去矣，摃一下”三義”爾，嗯才民國71年三義吓栽跋一隻波音737叨是安呢來兮。
（註：民國71年確實有一架737佇三義地頭墜落，死百外人）眾人聽甲著心適哩，時間一分一分過去，現場熱烈ｅ氣氛漸漸有顛誕，庶當時我著有預感，拍算謝長廷總部ｅ參謀分析了真，也叨現場開出ｅ康寧祥票甚贅叨著。落尾也我著返來厝內。
返阮了後呤，叩電話互尖白臉，尹卡知影最新ｅ消息，尖白臉講，長廷仔無，真拍損，後日仔才閣拍拚，橫直亦是三冬爾爾，目睭暱一下著到矣，免煩惱啦！話是安呢講無顛誕，毋閣心肝頭真正吓酸軟，上可憐兮著是承德路彼陣死忠ｅ猶戇戇咧等，尹壹直認定講長廷仙絕對吓稠哩，毋知下暗聽著結局欲按怎才好，哎！看著現場趙少康康寧祥赫贅票呤，二个”兮”總卯，安呢嗯才咧（恨得牙癢癢的）。
75年尾這擺ｅ選舉，長廷仙失敗囉，有影臹漏，即尼秀ｅ仁材，安呢拚袂起磅，台員人啊台員人，汝是咧想按怎啦？毋閣咱長廷仙這真正志氣，表現出達觀氣魄吞忍寬容ｅ「仁格者」風度，伊佇失敗了後，過返工，宛那佇原所在舉行謝票大會，其中無怨嫉啥乜人，亦無見怪運途天時，干礁給逐傢謝勞力，另日仔若有機會才閣來一斗仔，真正有氣魄有甡張，做人嘴齒根咬哩有輸贏哩，哎！這个時瞬茲選民才後悔捶心肝哩，有ｅ卡軟心ｅ查某人流出目屑，有影臹袂過心叨是。
這擺黨外三个人攏總二十九萬票，平均每人欲十萬票，吓使講三人總吓稠叨隱篤篤哩，毋閣黨外袂曉配票，變做老康14萬，安扁嫂8萬外，長廷7萬捅，有影臹害，最低票嘛才7萬多著吓朝哩，想落真正拍損，正確ｅ黨外配票應該是安呢：這三个候選人ｅ親戚朋友，上死忠換帖ｅ，每人按一千票無要緊，其他一般ｅ黨外票，照身分證ｅ生時月份，1～4月ｅ人投編號頭前的黨外候選人，5～8月ｅ人投編號中間，9～12月ｅ選民投編號卡尾溜ｅ黨外，安呢著袂差贅，所以講團體行為，是噯有頭殼ｅ人來研究來指揮，卡有效果，家己烏魯木齊sam拚，這聲著塗塗。
謝長廷選立委雖然無稠來講，毋閣伊ｅ心情宛那真曠闊，尾溜也佮趙少康76春天做辯論，這場辯論ｅ錄影帶我有看過，汝吓了解謝長廷ｅ頭殼真正清楚，條理分別，有影正正「職業肖」律師山身兮，人學問確實有夠遐哩，這款人我心肝頭有咧給按，後日仔定著吓浮頭發角，上驚著驚老Ｋ欲給創治，趁伊這擺失敗，硬給落底，互伊無倘東山復起之日，安呢著醜矣！
这聖聖互我掠準準，頂回民國78年底欲選立委時，謝長廷為著稍寡代誌，老Ｋ欲給掠起來，無欲互伊選安呢呤呤，毋閣長廷頭殼袂醜？自那搬去澎湖蹛（住），戶籍徙來徙去，互老Ｋ嘛是無伊法哩，今年（民81），情形開放矣，連施明德、黃信介攏出來競自矣，這个長廷仙，猶算細尾ｅ，自然de無人去給伊膏膏纏叨是。
彼年一下選無稠了後，平平黨外ｅ林某某，來qiu（拖）伊ｅ後腳，長廷仙想落著（感慨萬千），互國民黨掠無話講，按怎連家己民進黨吓來害民進黨？蕃薯仔真正了然哩，平平夆壓迫，猶咧瘦牛肖磅身，手底仔肉互人看？彼年中央黨部決定罷選監委，毋閣林兮無咧給信斗，嗯才十个市議員當中，除了長廷佮戇福仔以外，彼八个為著某種利益，欲來支持林文郎，這八个議員到底外贅？？本人毋敢講，亦無證據，毋閣彼時我親身有聽著某人尹啥乜×××議，di演講場互人給幹公拄媽，有影臹無志氣。
這聲長廷仙立委閣選無稠，閣去得失著土地公，有影前途烏有去矣，毋閣天地冥冥，人咧做天咧看，天公痛戇人，民國78年這場立委選舉，謝長廷ga某乜人又閣死伍ket，結果某人塗去矣，比某女子大學畢業ｅ男候選人卡歹看哩。
人ｅ壹生，叨噯坎坎苛苛，噯拖磨噯考驗，才吓見光大欉，愈磨愈勇，以小弟開齒科店來講，這十幾年著壹直關心茲社會ｅ種種長短，咱人活佇世間，加減噯注意著公共事務，社會嗯才吓愈進步，百姓生活嗯才吓愈輕可，法律愈公道，逐傢da愈有保障，安呢著袂想欲移民去國外。
有一擺文成仙過身亡故欲出山，佇禮堂做式時瞬，黨外仁士大部分攏有行腳到，所以去看做式，等於吓凍比較著每一个角頭老大哥ｅ風範，現場加減有寡仁士，走尋茲黨外議員名士簽名。
大多數是愈簽愈離經，應付應付爾，人咧講嘴唇皮肖款待，會場干礁長廷仙一个人慢慢臹認真咧簽名，做代誌連給一般朋友簽名著即鼎真，嗯才彼當時我著謳咾有著，人奚材情本等有影叨互汝袂講ｅ，这拍算七、八冬前ｅ代誌，順續提起，彼時瞬沈君山佮紀政搪咧熱，佇悼念現場有看著雙人逗陣來參加，心肝內感到真奇卡。
呾今年立法委員欲閣鏘落去矣，閣再二个月著知輸贏，長廷仙ｅ智多星身份，互老Ｋ真正莿棘，伊確實吓凍發揮民主政治ｅ制衡實力，這擺咱台北市北區，老Ｋ提名8人，民進ｅ提名4人，加上周荃、雷渝齊、田文仲等等宛那鬧熱滾滾，這回競爭赫尼激烈，毋知謝長廷吓凍親象頂回赫尼風光來過關？佇茲以萬分熱忱祝福伊佇這回大大勝利！成功！
（1992.10.5選前二个月寫）
-
用議價，卡好勢
，現主時ｅ計程車收費方式，真正無通，車主佮人客二个完全生份ｅ人，就車呤，欲駛到未知ｅ所在，全然無想著種種奇卡ｅ因素，干礁上尾溜也照錶錢著準拄好爾，致使著人客臹驚亦臹氣，運將先生趁無閣嚕蘇，有影想落著ce4哩，款計程車ｅ收費方式，的確噯改進才有合理，才有時代叨是。
欲按怎改進？伊ｅ辦法是安呢，坐車進前，車主佮人客先參詳好勢，按彼噹時”供需情形”，來決定是欲照碼錶，或者是照表二倍、三倍、半倍……，攏吓使哩，講好勢了後才坐車，這个法度洶洶看真麻煩，毋閣伊ｅ作用真好，吓凍互人客嘛滿意，車主嘛吓和，雙頭歡喜落斗叨著。
咱講白的，車主是追求服務ｅ利純爾，人客是”有車倘坐上要緊”，生理咧交關坎站，是車主佮人客二人ｅ關係爾，佮交通部完全無工礙，這二人若攏講好勢矣，安呢著皆大歡喜哩，毋閣現主時交通部ｅ規定，壹律照碼錶，完全無考慮著天雨因素，車因素，三重永和等人贅因素……，致使著司機老大，無qen4駛茲車班，也叨無利純矣，無人赫戇哩，這个時瞬另外一方面人客倌徛踮遐，目睭nini看，看甲雙目強欲肖，嘛看無一隻車影，真正著急閣懊惱，若準講甘願加幵二倍、三倍ｅ價，嘛請無車來載，若是有急病急診ｅ人閣卡梟悻，人講目睭金金人傷重。唉！交通部ｅ一紙命令，真正飯桶，害死茲眾生塗塗塗汝看有影？
所以講欲解決這个問題，壹定噯採用「坐車進前先參詳講價」ｅ辦法，也叨每一台計程車，佇某一个時段某一个地點載某一个人客，伊ｅ”市場需求量”攏無仝款，这簡那股票仝款，一个時間有一个時間ｅ行情，起起落落，才是正常，看市場ｅ需要量，逐傢歡喜甘願ｅ，叨無地講个人客肖爭叫，這時瞬車價應該起價，互上需要ｅ人客先坐，安呢人客好司嘛好，道理真簡單，仝款道理。欲去三重埔永和ｅ計程車，噯比欲去北投卡貴二倍、三倍，这應該兮，因為窒車了時，回返無人坐種種因素ｅ關係，毋閣汝亦免煩惱講價錢甚過貴，也叨價錢起甲一个程度了後，仈台計程車嘛吓加入競爭生理，致使結局到尾也，某時某地著有一个行情出來。安呢每一个所在，一四界無論閣卡偏僻ｅ，樣也有車吓入去，也叨車咧捸行情行，每一个國民，無論雨來，壞天，人贅急診，攏坐有車，規个社會著吓閣卡進步哩。
所以講佇茲，小弟北投暢仔，來建議咱大有為政府ｅ交通部，咱簡又新嗣大，計程車ｅ收費方式，應該採用”事先講價約束”ｅ制度，互每一位人客攏真容易搭著車，亦加減吓互司機老大加一絲仔收入，閣下吓互僻遠路段，卡有車欲駛入去，逐傢卡逗搭叨著。
這款做法，有續落幾項好空兮。（好處）
第一項，伊吓凍互車主佮人客中間，先互相”過濾”一下（先篩選），車主若是嫌人容癩膏爛癆或者是路頭甚偏遠，伊著吓使藉提高價賬，來達到篩選ｅ目的，這時雙方攏有退路，才袂有趕人客或是攽粉鳥ｅ乏搭場面（尷尬場面），講倒返來，人客若是嫌車主醜或者是車舊形銅筒仔，嘛吓使藉降低來拒絕這生理ｅ交關哩，安呢了後規ｅ社會吓卡和氣溫順，雙方攏有落樓梯ｅ機會。
第二項，乘客坐車ｅ權利，卡有倘保障，因為採取事先約束講價，致使著有一寡困難地區，卡有司機欲駛，譬論講上班下班，永和三重，山頂尾溜，或者是中風急診外傷……，逐傢著卡袂看司機老大ｅ面尺哩！
第三項，司機老大收入卡好，會主動去”艱苦地區”行行ｅ，也叨愈苦價賬愈懸，吓凍增加司機老大ｅ收入，逐傢錢銀洘洘洘，這行嗯才吓興吓旺，才吓吸引卡贅英雄好漢潦落去，發揮交通事業光榮ｅ一面。
第四項，吓凍互社會資源，做上合理ｅ運用，因為採用議價制度，每一台車攏吓互上介需要ｅ人優先使用，若是四股票制度ｅ”當時行情”，安呢每一台計程車吓凍發揮伊佇社會上最大ｅ運用價值，比喻講一台車連，趕緊時有四个人客，伊載著三倍碼表ｅ人客，彼个人客有十倍ｅ生理趕場，變收雙方攏趁錢，工業時代互助互利，吓凍製作社會閣卡贅ｅ財富價值叨著。 -
王
來給講到台員話這字”鐵齒”，真正奧妙，伊ｅ意思參北京話”偏不信邪，拗不過他，固執己見”差不多，形容部長王某某鐵齒銅牙槽，有影用詞嫷，盡磅逗搭，王部長做人直閣義氣，為官清廉食飯噯攪鹽，代誌返捯中間，心堅意切，互人印相袂外醜哩。
毋閣台員社會ｅ環境歹紡，這回腳踏tut去，去互風颱尾掃著，一爿驚年底選輸一爿驚財政，雙方面得失，嗯才姑不而衷心肝掠橫，殘殘脆脆互汝好勢，引官去職無欲為五斗米來勢，佮赫下消，講行著行，宛那表現出做官人氣魄，衝吓起哩！
本臹鐵齒仔長ｅ意思，是講有所得著噯稅金，天公地道ｅ，為著三民主義ｅ平均地權，為著社會正義，為著防止弄炒地皮，逶買賣中間利純抽六成歸公家，宛那無到佗位去哩，毋閣實在分析，这是天大地大ｅ顛誕，汝若欲抽稅，真簡單啊，逐年給提高公告現值叨好勢矣，na著噯冒犯天下怨氣，按實價徵收？主要ｅ空縫著是，官廳一方面噯吸百姓ｅ實價徵收稅金，一方面欲照原公告價低價來徵收公共設施，干礁痟入，有入無出叨著。
這款情形之下，占87% ｅ台員人自然心肝頭，一擺ｅ交易，財產叨毀去一半卡加，想起祖公仔留落來ｅ土地，過咱這代呤，叨偆無一半價值時，自然de心狂火焯，幹公拄媽，尹婆仔ｅ客兄公卡好，汝欲逼我ｅ傢伙，恁父蕃薯仔暢仔忖配汝兮，佮汝填到底有影！嗯才於是呤，這回來自民間ｅ反應真正激烈，各議會紛紛休會抗議，有影舞甲強欲袂收山攬尾ｅ，叨臹害哩。
這時瞬吳伯雄部長，知影台員暢仔歹剃頭呤，叨趕緊擋哩，腳擋車擋牛車擋僬擋哩，毋閣鐵齒長仔，老神掠在在，無咧信斗，欲拚逐傢來鏘一斗仔透底ｅ，拚一下仔看豬母肉攔抑脆，干干礁堅持照實價抽稅，另外閣有一批以唐山籍為主ｅ學者，紛紛簽名支持伊，欲佮社會來大拚斗哩，這聲引起蕃薯仔真大ｅ憤慨，佇報紙提起「清算農民」、「外省壓迫本省」、「搶本省人財產」種種真正歹聽ｅ字詞，總出來，這聲逐傢, 港潦落矣，雙方遂面捋落，無講一下仔透枝袂煞戲哩！漲價歸公，等於互外省軍公教大卯…。
二爿無欲勼落，黨外仁士歡喜好戲就場矣，這聲鐵齒長仔，幔著公平正義ｅ外衫，怨歎百姓有好毋捌寶，這聲恁父直直辭職準拄好，無愛做官，汝看我pupu也，我嘛看汝霧霧也，寧箍走路卡有氣魄，抑無到時選舉若顛誕呤，欲叫我負責任，我著衰簡那梨仔ｅ，不如趁這嗎名聲搪揚ｅ時瞬辭辭ｅ，太子爺起腳，阿匏踉港矣，互人知影我鐵齒長仔有氣魄。
這擺真值得咱給注意，叨是有人佇報紙提出，「照實價徵收，變做××人咧搶△△人ｅ財產」，咁講台灣ｅ省籍問題有赫食力是毋？我看这是無的確哩，一四界，尤其是台北市以外ｅ地區，頻若有歲ｅ老大人，kimo袂qiang，迭迭嘛怨歎”人奚××ｅ，逐月日領兩三萬，看病閣免，讀冊亦優待，水電亦半價，福利臹好，親象阮這款老歲仔人，無人疼惜，欲死動haai，老柴皮仔無路用，一工到暗衰兮等，真正吓死甲無人燒香點火哩！”
這擺鐵齒長仔，無張無弛去著牛屎，衰甲叫毋敢，按怎講風颱尾掃著赫尼厲害？这著是鐵齒仔毋知咱蕃薯仔性，袂曉駛撇步，錢ｅ代誌，噯有耐心，等閣再閣，心平氣順，用麻糬步ｅ，罔佮伊haau2，等到好ｅ時機空縫，才殘殘給潦落，一聲著好勢，總是噯掠時瞬準噯好，互逐傢吓嫷喟吓歡喜落斗叨著，噯用軟仔，軟索牽豬，用水治火，絕對袂使起性地，弄甲天大地大，強欲袂收山攬尾ｅ，卡加汝嘛滿面全豆花，安呢著醜材矣he！
所以一開始呤，咱鐵齒長仔，若看著毋是勢，著趕緊攽軟，以退為進，仝彼个時瞬，吳伯雄著知影代誌歹紡矣，趕緊閃西風報頭，提另案來檢討，毋閣咱鐵齒長仔，一開始後腳徛袂在，叨咧慘矣，閣偏偏欲掠狠硬拗落底，伊毋知影，蕃薯仔普通時仔，互人欺侮拗蠻忍耐性真強，毋閣財產了一半，轉入外省公家時ｅ仇恨。
若是間接稅無打緊，干礁這項土地增值稅才是大費氣，賣一千萬抽六百萬，一世人ｅ財產攏烏有去去，這聲雞母跳跛卵，起番起痟，莫怪咱鐵齒長仔，一四界有人叫做”Hongansuan”有影叨害！
這擺ｅ大風波，主要是逶下港先起致，先是高雄市會休會二工來抗議，續落於瞬呤，省議會亦起來，台北方面，雖然外省人卡有權，毋閣茲蕃薯仔宛那看了臹袂作ｅ，張秋雄掣頭來簽名，聽兮講嘛超過一半人哩，嗯才這聲頂頭中央，真正著驚，趕緊召集「殿前會議」，可見這擺ｅ空頭轟動武林驚倒萬教叨有影哩，這款代誌若袂好勢，泛勢連大位嘛坐袂稠叨無的確哩。
根據報紙一篇文章統計，目前人口占87% ｅ台灣人，捍有 93% ｅ私有土地，嗯才這聲吓互人誤會是政府官廳兮，咧清算台灣人ｅ財產，咱蕃薯仔自來著真看重土地，講土地著是生命根，者者叨有影哩，蕃薯仔上第一見羞ｅ代誌，著是出賣祖產去去，這聲汝欲搶伊ｅ財產，卡加伊著雙手佮汝拚老命，叨老身兮忖配汝ｅ凊肉笪哩。
這擺ｅ代誌，互咱執政黨佮在野黨，一个真好ｅ教育題材，表面給看是經濟問題，實際上是政治問題宛那有著哩，欲kue百姓噯有一个站節才好！
王仔頭傢，鐵齒罔鐵齒，毋閣宛那有氣魄啦，做袂好勢，看毋是頭路呤，鼻仔摸ｅ踉港矣，來著來，喚著走，做人阿沙利，真siapa，無親象許××、簡××、張××，掄頭掄尾，拖拖沙沙，毋甘diudiu，坦白講，這點實在是仈位大官應該學習才著，大官好位榮華富貴，隨人攏愛享用，毋閣做了噯有起，衝了有嫷，才袂互人給汝稱斤兩，萬一袂好勢，著噯殘殘脆脆做二塊，緊”急流湧退”，毋倘懷念富貴，卡有氣魄ｅ，安呢咱茲百姓嗣大才袂來消毒汝啦。 （民國83年春節） -
土公仔
佇蕃薯仔ｅ社會內底，宛那有伊ｅ行情哩，算講亦有貳步七仔，咱做人逶紅嬰仔出氏，到踏入棺柴為止，土公仔這路ｅ，叨互汝袂假仙ｅ，無論汝外鐵齒外鐵齒，土公仔在在在，絕對hy4伊袂倒，到仁生ｅ尾日呤呤，乖乖也無互伊料理叨袂煞。
壹般人看土公仔猴猴，看人無點，抑毋閣翻返頭給看，宛那額佮伊無du（鬥不過他），“汝看我pu pu，我看汝瞴”，欲鏘逐傢叨來拚一斗，土公仔佇本土文化內底，定著有伊ｅ徛牌坐位，毋倘消毒叨是！
嗯才講到現主時茲少年朋友，尤其是蹛佇城內咱茲斯文仔，對仁情世事，種種禮數做式卡無咧注意，有影毋捌一箍芋仔蕃薯哩，台灣人毋捌家己ｅ文化，講落到地吓心酸目燒，親象頂頭所寫遐文句，無定著有一寡人叨看無矣！閣卡食力ｅ，泛勢連標題「土公仔」三字意思叨認無路來，安呢大拇人大拇種仔，歲頭吃到三十外，猶激怢哩，有影臹了然叨是，這嗎想起來，宛那感到臹無甡張，真正毋是頭路啦！
土公仔，叨是負責土葬喪儀ｅ司傅，伊接受喪家ｅ委託，墓地尋地理仙做墓地，連絡司公壽器行、樂隊、出山抾骨寄金……等等東西，現主時，時行用火葬，也叨鯽仔魚食過港，加減嘛吓卯寡火葬ｅ空課，吓使講土火不分叨是啦！
土公仔，有時仔稱呼""、“風水仙兮”、“司傅”……看各所在ｅ慣勢來決定，也叨這款行業ｅ人，互人看做怪怪，總是也，認定講伊安呢癩爛癆，死人湯答答滴，真正了然無衛生，人看無到重，社會無地位呤呤，閣卡食力ｅ時瞬，風聲講尹吓掠糊（騙）人客，加收紅包加收司公壇東西，有影互人吓倒彈哩，嗯才普通時仔，頻若聽著土公仔，叨逐傢甲褲腳摛（裂），神魂攏散到十三昊外矣！
實在講起來，这是大毋著，論真看，咱這个社會，若無土公仔ｅ功勞，真贅代誌叨無法度，親象講厝內若有喪，壽板赫尼重，汝咁扛有法ｅ是毋？也叨人ｅ運命歹哩，若有顛誕，噯給人講好話，無論風俗按怎簡化，茲仁情世事，鏘在是噯總甲到哩，祖公若有卡好ｅ坐位，定著囝孫叨致蔭會著，敢互人燒香叨毋驚糕仔倘食，這款百年歲後ｅ代誌，樣也袂使鐵齒ｅ！
小弟我本人，佇四冬前有寫過一本「關渡媽祖」ｅ長篇文學，內底有一段描寫著，普通人對土公仔ｅ看法，逶土公仔ｅ心苦病疼甲（諷刺）盡磅逗搭，叨臹工夫哩。嗯才佇茲奉勸咱茲鄉親嗣大，逐傢手勢夯卡懸哩，多多來尊重人ｅ生存權，平平是父母甡晟ｅ，卡一下，下腳著是這篇文章ｅ寫法。
“庶當時佇關渡部落”ｅ（這嗎關渡國中對面），有一位土公仔，號作”阿猛司”（sai），專門咧風水，叨頻若風水互伊有著，通人嘛家旺丁發，財源豐富哩，这抾風水，抾甲吓出名，逐傢臹給尊循。
這个阿猛司傅，歲頭卡五十，毋閣看起來，袂輸七十外ｅ款，做人安呢沈斗沈斗，kiaugu 61閣細漢，安呢是癩爛癆，彼領衫看著油金滑，迭摋狗亦彼身軀，拜佛亦彼身軀，人一个膻（hen 3）安呢，有影臭臊鼻，臹醜材矣！拍算透暝透日咧徙風水，去互陰氣給煞著，抑是死人湯去激著，这竄筋入骨撝撝鑽，年久月深顛誕去，有影無影，这叨無，毋閣講罔講，宛那無人敢ha伊。
土公仔是一款真正艱苦ｅ頭路，真正可怕ｅ行業，伊ｅ任務粗重硬斗，若無力，宛那食袂倒哩，伊來發落咱人ｅ生老病死，確實功勞看現現，看為著幾錢仔爾，做戇工又閣坐戇夆看衰，有影「燒爐添炭，著力兼歹看」！
佇茲真正感慨，由二十外冬前ｅ一層代誌來提起，互我實在感心，對茲社會ｅ勞動兄弟，致心頭上介大ｅ敬意！這款代誌呤呤，有影若無親目互汝看著，汝叨毋知心肝酸哩，這陣同胞ｅ梟悻，絕對毋是咱茲食飽穿燒ｅ都市人，有法度想吓到哩，下腳ｅ故事，叨是二十外年前，阮親人過身時瞬，土公仔階層ｅ大艱苦，來給回想一下。
彼年徛973下冬天仔，阮外媽過身去矣！出山彼工，我咧病院實習”根管治療”，給藍醫師請假，阮外媽食到八十四，算講亦真好命叨著，細漢做囡仔呤呤，蹛佇杜聰明ｅ隔壁（也叨平平三芝北新庄人），伊杜有著，尾溜也杜聰明得著台灣第一个醫學博士，大尾溜溜，一名透京城，彼時阮外媽已經嫁到十八份（現時石壇路一帶），二次大戰末期呤，杜聰明嫌北新庄路頭遠，嗯才不時去十八份空襲，算講仁情宛那臹深叨著啦！
阮外媽蹛ｅ十八份，拄好是陽明山第一公墓ｅ對面，囝孫決議，定著噯踮第一公墓卡好勢，毋閣第一公墓是全台灣上介貴ｅ墓園，尾溜也嘛是嘴齒筋咬哩，硬集出七十外萬創好勢，彼時七十外萬，現主時一千萬到一千五百萬中間，算講囝孫宛那大出手叨著！泉州人後代上介注重喪事，人ｅ福祿壽三全，定著甲鬧熱叉操安呢甡！
出山彼工呤，稍寡落雨白仔，一四界塗腳真湳叨著，陽明山第一公墓，倚頭前卡”食肉ｅ所在”，早著互好額人大官虎占了了，輪到阮外媽ｅ福地ｅ時瞬，已經排甲真偏僻ｅ崎地山崁，小路灣灣斡，懸低石qim2，真歹行踏，臹無利便安呢甡，也叨無法度哩，有影「生理」甚佳！
彼時小弟（我）才二十捅歲爾爾，叨安呢一手夯雨傘，一手樹枝，真正來腳行湳塗，真驚跋倒龜，若無好跋甲規身軀土膏粥，安呢著歹勢矣he！嘛吓夆笑甲下頦哩，……行差不多半點外鐘，才顛顛歪歪，行到福地，佇遐稍歇喘哩！
這个時瞬，斡頭看倒返去原頭來ｅ所在，才知影代誌大條矣！干礁用行路兮，階落坎叨行甲欲烏暗去矣！借問彼陣扛壽板ｅ土公仔，是欲按怎忍受艱苦行過來？
尹絕對噯忍著四項大艱苦，叨無法度來完成任務哩。第壹，規副壽板赫尼重，欲按怎來承受重量？（有錢好額人，特別註文大門柴板，閣重閣長閣厚），有影扛肩胛頭強欲崩去！第貳，塗腳真湳呢！路滑天落雨，按怎才袂跋倒？这著噯（提吊）腳力，閣卡拍隕體力哩。第三、路途懸懸低低，有時瞬簡那跁樓梯，有時簡那落樓梯哩，若是跁崎猶無要緊，這聲若落崎，奚才是大哭苦哩「險象環生」，規副大壽安呢頭尾，腳步僬亂僬離，看落心肝驚兮咧等，真正互汝毋敢看安呢。
第四，眾土公仔扛板司傅，逐傢欲按怎來仝時間抾和出力？叨仝腳步仝出力，真正害叨著！真歹旨揮叨是，所以講這款空課，叨噯出力兼技術，这不比厝內咧搬一台piano赫尼簡單呢，逐傢步調仝款，壹出壹入，有影夆臹謳咾叨著。
我徛踮墓地，遠遠給看去呤，落雨昊咧扛壽板，十外个人嘴齒筋咬哩，扛甲艱苦坐卦，一步一步壹直得倚來，也叨有時起崎，有時落崎，袂輸簡那螞蟻哩，起起落落真梟悻！雨白仔噴過來，濛濛霧霧，……。
我目睭閣再瞋，看甲雙目強欲（相纏），心肝頭咧等，雙手緊張，拳頭毋捏甲吓出汗哩，經過臹尼久呤，大陣ｅ仁馬才拚到位，規陣十外人，大聲咻喚，「hesion hesion」、「閃啦閃啦！」，真艱苦真拚路，莿腳lak3手，甲欲拖屎連去，才知影隨人腳穿草鞋，雖然有雨，規身軀宛那噴甲爛膏粥仔搭搭搭！
這个時瞬呤呤，我真正感心，目屑真正吓蹸落來，知影仁生ｅ艱苦，土公仔ｅ偉大，想著卡早遐老法統欲死動亥，“食袂老，死袂臭”，月日領十外萬，哎！心肝頭一瞬ｅ滾。自那目燒鼻酸，怢怢（qang）徛佇雨中，沃著毋知哩。 -
辜顯榮
清朝尾年坎站，台灣地出名人辜顯榮，到底伊是台奸？或者是英雄？隨人講一款，逐傢霧霎霎，現主時，講起鹿港辜家，佰冬進前，引日本兵入台北城ｅ代誌，著有人吓氣搐？通人臹袂喘ｅ，給（ga5）消毒甲無一塊，這層代誌咱蕃薯仔（台灣人），自本著心肝頭總是給作是一款出賣民族，來求個人高官卯錢ｅ夭壽代哩。
不而顧，代誌恐驚也無赫（hia）簡單，咱人嘴仔紅紅愛講人，一枝嘴”唃”，代誌有看針鼻無看著城門，歷史ｅ紀錄，有時仔吓來人，絕對噯張弛，毋倘目睭花花匏仔看做菜瓜，咱这紀錄實情，迭袂食穿（不吻合），主要ｅ坎站，全全嘛作者ｅ立場看法著ｅ，嗯才於瞬（於是乎）千千萬萬ｅ讀者，一時失覺察，著吓互作者一人ｅ觀點，給牽咧罔罔，舞一下衰甲叫毋敢，所以講人ｅ立場背景爾，隨人看昊月無，起腳落手ｅ中間，角度若袂好勢，著吓袂逗，判斷自然著顛誕（差錯）。
咱篇文章ｅ目的，著是欲分析辜氏事跡ｅ真正意義，紹介互逐傢知影，咱蕃薯仔宛那有即特別ｅ仁物叨著。
毋閣本文所寫所論，不而顧是私人見解爾，好歹無一定正確，若有失禮ｅ所在，才拜託咱茲氐大，手勢卡懸ｅ，稍諒情ｅ，算來講古講古，罔聽罔聽心適著好，好朋友逐傢品無掠包，當作一款時間外ｅ娛樂，閒閒做義，安呢著是啦。
辜顯榮佮尹囝孫，分別佇日本時代佮現主時，做大官趁大錢，勢面臹貓，甲掠袂，互人看甲目空赤，臹袂作ｅ，毋閣这是事後ｅ代誌，佮進前為著欲救全台北市民，潦落犧牲ｅ氣魄，完全是二回事，这魚凡魚，蝦凡蝦，袂使肖濫來議論ｅ。
辜氏後代榮華富貴，絕對吓使議論無顛誕，對伊救台北城，無來給謳咾宛那無要緊，毋閣毋倘罵人台奸，講一句卡公道ｅ，若講著日本兵入城ｅ代誌，伊無毋著，伊宛那是氣魄組，有影咱蕃薯仔ｅ大色貨，讚著是讚，互汝袂鐵齒ｅ。
1895年ｅ冬尾，馬關條約了後，日本兵登陸澳底基隆，侵入來水返腳（汐止），漸漸來逼近台北城，清朝ｅ守軍大亂，嗯才市內市外ｅ紳商，真正驚，一方面驚日本兵起歹面大屠殺，一方面閣卡驚潰散ｅ清兵，趁機槍劫燒殺，為著生存才姑不而衷佮阿本仔講和，來依持社會ｅ序，毋倘（不要）互小百姓規世人ｅ粒積，一聲攏去了了。
毋閣講罔講，欲按怎去講和，這聲才是頭大面四方，臹歹扭搦哩（大傷腦筋），咧汝看我，我看汝，著驚ｅ時瞬……，這時辜顯榮捅鬚出來，為著眾生甘願潦落無怨歎，家己婁孤帆兮，行到水返腳，去佮日本兵講通和哩。等到代誌完滿了後，這時瞬台北人已經閃過性命ｅ危險，人講”水過喉袂”城過樓拆，無人給勞力無打緊，顛倒來吊脰搶後腳，罵伊是台奸，袂輸吳三桂引清兵仝款，有影無公平，仝款著無仝師傅，一个火炭伕仔，是欲按怎”引大軍”啦？引八擺ene，講尹阿媽十八歲？
萬國ｅ局勢，肖爭肖占，怨傢讓債，規尾總是大社細社爾，提去食，強國食弱國夠夠哩，四海之內一四界仝款，若卡歹失德ｅ（倒霉者），小國夾佇二个大國中間，著吞銅吃鐵，悽慘坐卦苦袂了，新婦仔丹是食凊糜ｅ份爾，福氣欲那捸汝吓稠？不時嘛衰兮咧等！
親象歐洲彼角勢ｅ波蘭，佇德、俄二仙天霸王中間，真歹返捯，一面溝一面圳，不時嘛夆給摃到無鼻落管，衰簡那梨仔哩。咱亞洲這爿，咱這族福佬暢仔，註死毋死，去互風颱尾掃著，勢面閣卡悽慘，有影真歹徛起，咱夾佇東京話系佮北京話系中間，去夆hip死死，嗯才茲蕃薯仔大梟悻哩，鼻仔不時會去kap著人的嘴，幾百冬以來做牛做馬，夆落底大哭苦，眾人互伊甲心狂火，有影著無伊法哩。
這擺1895的甲午戰爭，講北京族去互東京話族群，給起來，掠福佬來出水，有影臹害，原本這場戰事叨佮咱蕃薯仔無治代哩，有影青天白日，去互雷公sina 著，衰甲叫毋敢。這个北京方面拍輸顛誕，見羞起慪邵面，嗯才火燒厝過間，掠水鬼來窒am空，殘殘脆脆逶仈款語族ｅ人，割互日本仔去遭躂去統治，仈人ｅ囝死袂了，家己遂踮邊仔秋，有影尹婆仔ｅ客兄公卡好，叨愈想愈qek哩。福佬人真衰，有影衰甲種匏仔菜瓜。
Iam好日本仔，宛那世界ｅ強國，有壓迫來講，毋閣加減嘛有建設，亦有來依持社會ｅ秩序，像後滕新平扮，身邊宛那有二步七仔，蕃薯仔歹船拄著好港路，算講亦挺咱會起著是啦！
嗯才講咱茲鄉親阿同仔，毋倘怨東嗟西，天良講，咱家己飯桶下消做得來，噯輸贏，噯拍拚棉爛做，衝互伊起，卡有氣魄ｅ，这咱跋白講，噯破草笠出頭，依持家己ｅ自尊甡張上要緊，毋倘好毋好著欲罵東罵西，阿本仔醜罔醜，亦勿甚給人按怎拄按怎！日本仔是異族，咁講滿州仔是仝族是毋？現主時真贅人移民去美國，咁講阿啄仔亦仝族是毋？
我看有仝族無仝族，佮好歹無啥顛誕，世間代有時瞬家己人摋家己人閣卡青狠有影，親兄弟分財產著肖摋矣，免想甚贅，咱蕃薯仔做，互異族阿滿仔賣互異族阿日仔，無啦！舊老娼換新老娼爾，毋做, 仝款入土間，樣也永遠袂超生哩。
日本管台灣五十冬，亦著是唐山上介戰亂ｅ五十冬，想起來吓驚，所以講評論辜家ｅ代誌，噯徛佇蕃薯仔ｅ立場才合理，順續，於瞬呤，對東京佮北京這二位大頭傢，（心肝頭qek罔qek），表面上接，噯平平好禮ｅ，平平客氣ｅ，得失其中一方面才好。
研究歷史有一點趣味，著是庶當時ｅ感覺，佮後世ｅ人ｅ感覺倒翩（相反），佇茲所講，辜顯榮1895是英雄，毋閣1995是狗熊是一个例，另外「東北918事變」宛那款是一个例，卡早咱讀冊，說明「918發生，全國大官知識份子逐傢臹憤慨」，實際上根本著膨風，挲咧雞規烏白彈。
也叨尾溜也我有看著918仝年代ｅ老記者龔德柏回憶錄，才知影當時仔，廣東方面欲佮上海方面大捙拚大決戰，好佳哉918發生，雙方才停兵共同對外，減少了內戰大損失，茲大官虎表面上激甲臹想氣，毋閣心肝頭遂顛倒歡喜咧等，有影甲有偆去。「要是918延遲一个月再發生，等國內糜爛後才拚，那將不堪設想！」
是按怎講辜顯榮仙毋是台奸？理由排佇佗位？阿本仔欲入來台北，这是根據馬關條約，佮辜氏完全無治代，咁講辜氏毋去，阿本仔著袂來是毋？辜氏根本著無資格來引領日兵入台北，軍國大事，毋是咧辦公伙仔，欲叫誰來著來，辜氏想欲做台奸無資格哩！辜氏庶當時不而顧是干礁賣火炭ｅ破少年爾，根本毋是台北市長，毋是方面大將軍，毋是巡撫……，伊絕對無吳三桂彼个扮勢，欲掣日本兵是甲欲掣八擺ｅ呢！所以講欲去掣日本兵，根本著是貓食鹽忖欲赴死ｅ，或者是夆逼著梁山，定著毋是本意著是啦。
著算講辜氏欲引日兵入城，毋閣日本方面，根本嘛無義務去接見伊，因為兩軍對抗，上驚特務，衝磅走出一个份人，毋知熊亦虎哩，阿本仔無給汝摋掉著袂醜矣欲na可能互汝來指引入城？萬不二若中伏欲按怎？庶當時，清兵潰散，殺人放火，社會敗類羅漢腳仔，趁機搶劫毀累，日本兵又閣血海刀光，蕃薯仔夾佇三項災難當中，受盡壓迫，無人出來捅鬚，是欲叫啥人出來收山攬尾？辜氏毋捌日本話，是欲na？这無赫簡單啦！
也叨頂頭所講ｅ道理，嗯才知影，欲評論欲消毒一項眾人ｅ代誌，實在無，無張弛著顛誕去矢，咱普普也掠，顯榮仙，毋是無噯做台奸來卯錢求名，實在是伊根本著無資格來做台奸，咱欲做奸臣嘛著噯一把仔頭殼呢！欲做台奸，佮赫涼勢！若是無錢無勢無地位無學問，奚著絕對袂過手呢！幾多年前，普通人想欲互李敖給罵，比欲求見總統閣卡困難，互李敖罵叨噯排列，剃頭照輸扮，“配額”有限啦，若無夠資格，伊猶無欲拍損筆墨ｅ呢！
咱茲鄉親看有？欲做歹人，尤其是大歹人，無倘赫簡單著是啦！小仁物絕對無人給汝信斗，欲叫人罵，人著猶嫌了嘴渃哩，衝衝磅磅著欲潦落引大軍入城，汝食卡醜ｅ！叨有影哩！
這擺ｅ甲午戰爭，北京方面失敗，心肝頭惦，臹毋甘願，不時咧陷眠想，棉被內拍手槍，辦台灣ｅ義民抗日份仔吓大反撲，有法度給日本仔修理甲青尺青尺，安呢鋩角da""吓返來（面子板回來）。心肝頭才吓爽哩，根本著無考慮庶當時仔台北百姓，搪咧（正在）仝時瞬受著日本兵佮清朝潰兵，雙方面擊大屠殺ｅ危機否？
若稍寡處理袂好勢，馬上汝著血流成江，屍堆成山ｅ恐怖枉死城，這款ｅ悲慘，毋是北京方面、東京方面，甚至講現主時ｅ福佬後代，吓凍來體會了解哩，逐傢干礁吓曉徛懸山看馬肖踢爾，仈人ｅ囝死袂了，管待伊去死，家己有飯倘孝孤著好啦！
阿本仔逶澳底就陸了後，經瑞芳水返腳，漸漸來逼近了台北城，台北暢仔驚互日兵佮清兵屠殺，甲屎屎僬出來，這聲無退路哩，規陣活活欲等死爾，前途烏有，毋知欲怎樣才有生路，咱這嗎給想起來，有影（冷）頭汗一粒斤外重，腳尾僬冷去矣。佇這个九死一生千鈞一髮ｅ空縫，忽然間蕃薯仔ｅ救星出現哩，伊者者著是辜顯榮仙，氣魄組兮，有影讚著是讚，伊無惜家己，為著全台北ｅ頭嘴，甘願潦落犧牲甡命去求和，好佳哉天公疼戇人，風颱做了返回南矣，台北城逃過一場刀光血海哩。
咱顯榮仙一枝雨傘，逶大稻埕孤帆，行到水返腳日本軍部，日本軍官懷疑伊是特務，為著欲試驗伊ｅ忠誠，忽然間拔出劍，假仙欲刺辜氏腹堵，看伊吓反抗？這个時瞬顯榮仙心情平和，決心求死成仁，由在軍官欲摋欲，這聲軍官才真正感心，知伊有誠意，嗯才接見顯榮仙，知影台北城ｅ長短艱苦……。落尾仔日本兵入台北時，無啥顛誕，干礁闌珊ｅ衝突爾，大概給看，社會秩序猶袂醜，換頭傢管，換天公爾，百姓佳哉無流外贅血哩。
眾位阿同兮，这毋是蕃薯仔（台灣人）來下消落軟，實在是姑不而衷，水淹到頸仔，講北京話這位”礁傢”押講台灣話這位simbua去暗間仔卯（賺），講東京話這位老娼頭依”合約”接收呤，四箍遴返鱸鰻人，（舉）硾夯，（四周保鏢環立嚴刑伺侯），咱做simbua仔，一尾魚落鼎，在人料理無伊法，嗯才蕃薯仔著目屑吞銅食鐵，為著生存湠衍後代，互人糟躂侮辱，硬拗落底，咱茲現主時ｅ少年傢仔，尤其台北人ｅ囝囝孫孫，絕對毋倘甚鐵齒，若毋是有人捅鬚，出來犧牲命，咱ｅ祖先有法度活落ma無的確，欲na有法度倘傳到這嗎！人講食果籽拜樹頭，咱無給人感謝無要緊，毋閣勿弓詈人按怎拄按怎。
台員地頭歷史當中，辜顯榮少年時ｅ做人佮苦心有影讚，逐傢攏情理人，溜溜秋秋食二蕊目睭，稍影哩，著看現現哩，人奚精神氣魄，確實排有著等，人奚才情心胸，確實著有夠遐哩。咱噯知影百姓上驚亂世無飯倘食，百姓痛恨軍紀敗壞ｅ清兵佮趁亂打劫ｅ羅漢腳仔，絕對袂輸日本兵之下，咱人處身生死活命中間，將心比心，宛那噯稍給人考慮一下！事變進前ｅ潦落艱苦，佮事變了後榮華好命，这是二回事，这魚凡魚，蝦凡蝦，水龜袂凍濫田螺呢！
講起來，辜顯榮宛那一世人有辛苦有志揚，真正特別，伊少年ｅ時瞬，逶伊佮本叨無資格做台奸，變做夆誤會做台奸，一直到過身七、八十年了後，由我这个青份人逶台奸給平反做毋是台奸，出出入入，坎坎苛苛簡那一棚戲齣咧，互後世ｅ台灣人吓感到足驚奇叨著。