46.鹿角坑ｅ濛霧
～德仔～
目睭一下，離開學校叨已經十年！有時瞬想想ｅ，有影仁生短短啊！入校門ｅ時，嘴舌袂輸拍，勢面險險袂落。這嗎來到士林這个市鎮ｅ所在，著青甜ｅ空氣，看著真嫷ｅ光景。心情真爽勢安呢甡，前幾工於瞬呤，校長洶宣佈，後個月欲去鹿角坑做課外考察，是國家公園ｅ上食肉地界。劃做生態保護區，噯特別申請有法度去哩！
時間是三月初二，四界天候袂醜，咱山腳日頭薄薄也，毋知山頂按怎款？車到陽明山地界時瞬，有時烏陰有時出日，逐傢歡喜甲齊聲喚喊，無外久進入去鹿角坑ｅ深山地界，洶洶落起雨白仔，奇怪，差一粒山頭爾爾，按怎溼氣差即贅，尾溜也才知影，鹿角坑親象一个布袋嘴，向對東北方，所以冬尾東北季風帶溼氣入來時，活活灌入來，拄著大屯山小觀音山，磅壁了後，就變大雨！也叨全台北茲ｅ雨水上贅，位好昊出日頭，毋閣茲逐工逐時攏咧落雨，袂輸一个噯哭ｅ姑娘仔仝款！
茲ｅ坑泉，大閣大聲閣青白，嫷甲互汝叫毋敢，茲ｅ植物樣也臹青臹臹大叢安呢。看落心肝頭爽，這个時瞬，霧氣罩倚來矣！無外久中間規ｅ山崎半霧半清，坑崁真深，頂頭ｅ所在，雲霧飄來飄去，有影著心肝嬰仔，看甲吓醉吓茫，直直戇咧，看甲神ｎ神，袂輸一幅山水國畫。淺山爾爾，叨有法度看甲即尼嫷，有影國家公園，叨無咧設假ｅ呢！
雨水繼續咧滴，安呢盪點盪點，噴面皮吓冷冷涼涼，規欲去看水淌，沿路ｅ噹中，溪崁肖犮，水泉亂濺，配合著山霧鳥仔聲，心情涼閣爽，真正醉閣飽，一下頭看對面ｅ山呤，青青霧霧，仝款水氣飄飄，真有氣氛，互我看甲雙腳袂記ｅ行大跬一下！
一下出鹿角坑無外久呤，又閣是日頭赤炎炎，頭拄乍ｅ雲霧雨白仔，袂輸簡那一場眠夢仝款。台北附近ｅ坑崁，叨算茲上介神祕，景色上嫷，雨水上贅，烏樹林上僬，野生動物上，有時仔佇教室咧教冊ｅ時，不時嘛吓去想著，著親象走馬燈佇腦海咧咧，真正讚叨是讚，江山磊斗，茲茲叨有影哩！
-
冬山河透早
宜蘭是咱台灣地上介嫷，靈氣上介讚ｅ好所在，伊山，肖肖（跘），景緻幼秀磊斗，互汝看落吓茫吓醉，盡磅逗搭歡喜ueue，通人攏謳咾甲吓觝舌，尤其是下冬昊仔ｅ早起時瞬，來行一冬山河，有影氣氛臹讚，互汝三工三暝叨念哩！嗯才咱勇伯子咧愛笑，講蕃薯仔，「冬」昊來給行踏，看「山」「河」江，定著是仁生ｅ大心適，天公伯仔欲來，有影福氣到甲毋知！
咱宜蘭平洋，下冬昊仔，互東北季風著，迭嘛烏陰昊，有時仔吓噴一絲仔雨白仔，落寡黃酸仔雨（陰雨）點盪點，清涼清涼叨著啦！毋閣大部份時間，宜蘭所在是袂袂辣無風無雨無日頭安呢甡，這款即讚ｅ氣候，有影世間罕咧拄著。
冬山河佇冬尾早春ｅ透早，若拄著好昊，清涼爽勢，也叨無風雨日頭袂燒袂冷，一透早呤呤，雞未啼狗未吠時瞬，行一畷江墘仔，這時天清地明，江水渺茫曠闊，鴨母船仔恬恬停咧遐，有時看著月眉掛佇昊邊，紅橋紅朱朱，塭田水洸波影，海鳥陣陣，洶洶一瞬冷風灌過來，拍一下仔尻冷損哩，才知影讚叨是讚，ｅ時瞬呤，蕃薯仔做了有起呢！
冬山河，佇冬尾早春ｅ透早，迭迭有噴雨點仔ｅ時瞬，佐汝免煩惱，伊袂潑衫啦！伊，雨白仔，幼綿綿，一絲絲盪點盪點，涼涼冷冷，充滿了詩情畫意，雨水滴落江面，四面霧氣罩來，真正吓醉吓茫，這个時瞬，天蒼地茫，江墘雨冷，上吓來勾起過去悲慘ｅ回憶，想起少年時ｅ…酸甜苦悲，真正目燒鼻酸吓搥心肝，不時怨歎傷悲咧等安呢！呾na行na看，一路逶紅橋行到冬山車頭去，江墘人，著淒涼ｅ心情，來享受著这霧氣沈重ｅ冬瓜山佮冬山江ｅ風情哩！
冬山河，佇冬尾早春ｅ透早，加減一半擺仔吓出日頭，叨閣卡希罕閣卡心適，有時仔十外工嘛拄無一回哩！燒燒和和薄薄ｅ日頭洸，照著宜蘭闊茫茫ｅ塭田，安呢水洸山影，是金光鏘滾！無論山景吊遠，樹影水稻，攏逐工去互雨水洗甲清氣冬冬。哎！這幅冬景春陽，真正嫷叨是嫷，讚ｅ壹庄兮，逶近景到遠山，依次綠色、藍色、紫色、pu色，有影色水分明，雲蕊箍佇昊邊，袂輸歐洲人「早春ｅ日頭」赫尼明亮、溫柔、磊斗，看了心花開，仁生充滿了奮鬥ｅ意志，這聲醉閣飽，互汝爽甲叫毋敢！
宜蘭啊！宜蘭！早春ｅ日頭洶洶探出頭來。朋友啊！咱做夥行，做夥看，做夥唸歌，沿著冬山河，行入去咱夢想ｅ仙界安呢甡！ -
潦落廟街探母親
也叨添福仔，這聲眩倒佇料館媽祖ｅ大殿面頭前，頭殼眩眩茫茫，眾人咧無盈莿莿，冷水給潑互伊醒，老母金蓮，一身軀癩膏爛癆，哪吓恬恬無注文著，逐傢感到奇怪，叨想袂曉哩！置噹是仔，金蓮ｅ雙目已經青瞑囉！稍寡有法度看一絲仔洸爾爾，呾這生ｅ悲慘到茲來矣，有影盡磅搭底矣！添福仔睜神了後大一聲”阿母咁猶活佇世間是毋？“隨後又閣倒落，拍算是甚甚歡喜，去激著心房ｅ款！
身邊茲善士大德，看落臹袂過心，鼻酸目燒做一下給伊傷悲起來，其中有一个號做秀蘭ｅ婦仁人，才咧怨歎”人有父母嗣大，永永袂乖，實在是有好毋捌寶，等到父母無置ｅ時，仔就肩才知，著甚慢矣！總是ga做人以上，叨百行孝為先，今仔日母仔囝吓完滿逗陣，咱叨給歡喜，有影臹好腳手噢，卡停仔e瞬呤，我才扞寡物件來給逗鬧熱一下！“
無外久ｅ中間，添福仔睜神落，目屑，嚎袂出聲，干礁激奚啞口仔聲爾，也叨眾人面前歹勢哩，不而顧叨大人大種矣，噯卡有甡張ｅ，嗯才有志氣，眾人逶添福仔佮母親，扶入去料館媽祖ｅ大殿身邊，去傂（te6）竹椅仔喘哩，經過無半个時辰，拍算連燒二枝香ｅ款，這時秀蘭e瞬呤，安呢趕趨趨，捧一碗豬腳麵線佮一个紅包，欲來給添福仔，祝賀尹母仔囝重逢ｅ好時叨是。
“呾這碗豬腳麵線，著趁燒食落去，吓補運去邪，後日仔財源旺廣，母仔囝食甲百貳歲，另外一層e瞬nia，若是無肖棄嫌者，呾這个紅lok仔，才稍袋哩，嗣大照顧總是食穿方面，噯僎互伊便，若是饑荒錢銀三不便叨醜材呢！呾免細膩啦，稍袋咧…”
這个時瞬，添福仔e瞬呤，叨真正耳清目明，看著秀蘭即尼熱誠，心肝內真感心。自那雙腳跪落塗腳兜，連聲喝喊謝勞力。“在下福仔，有影不起，這世人恩情義理，諒情我無法度報答，我戇福仔，自來叨歹命囝哩，映望逐傢來牽成，佳哉天公疼戇人，互我這幾冬來一四界，過來亦，過去亦尋，吓凍完滿團圓，叨真正歡喜甲袂講了了叨是啦！“
又閣續落”我戇福仔，自來著做人憨直，清水煮白米，絕對無提人一鍼五遴，意到矣叨好，咱这毋臹人，羅漢腳仔爾爾，牽馬穿好衫，無妥當啦！嘛是食菜脯，喫蕃薯卡心安，仁生想欲時，運，命三字全，是袂強求ｅ，有影無簡單，這位大嫂，互汝安呢捙盤，我大人大種好腳好手，臹感到歹勢，絕對毋敢收受！“
添福仔講煞呤，連叩三頭，身邊茲閒人，看落軟心。心肝頭做一下落去，哎！人ｅ運命即薄，依原錢銀噯端臹，咧望昊等時機，社會返捯永遠抱著好情義，少年人氣魄，袂為著小小ｅ風霜來失志，叨無地看哩！ -
禪寺夜色暝半三更
順仔佮眾兄弟、師姑、師姐，仝齊食暗頓，無外久ｅ中間，眾師姑咧做暗課，唸大悲懺，鼓鐘木魚，硞鏗，氣氛真正嚴肅，佛祖面前，香爐內一罩煙，茫茫昏霧，真正哩！無外久經書唸煞，順仔到外面一下仔咧！
心肝內有咧想著，明仔載欲獅仔頭ｅ代誌，外口暗面山貓，無一絲仔洸，順仔大大下喘落，一嘴青冷ｅ風，微微仔桂花，真正舒爽幽雅，自然的心涼脾敨開。
順仔徛佇石頭堆頂，看逶關渡江面去，三二隻拋魚船仔，點幾臭油燈，耳空邊伊伊，一絲仔音色咧，置噹是仔渡船頭有人咧殼仔絃（台式胡琴），曲調叨鄉土味，ｅ時瞬呤，想起本事，菜瓜明仔這枉屈，絕對叨噯”食飯趁燒”，趕緊互好勢，若無者，時間一下久，加減吓手骨軟，鎗籽到叨冷去矣，欲哪有效啦……
彼暝，順仔睏佇禪房，三更暝半呤呤，聽著寺內人聲吵雜，噹是仔，人師姑師姐欲做早課矣，這个時瞬凡間猶睏甲落眠，咱順仔叨好思想哩，趕緊起來”紅目有仔逗鬧熱”一下，師姐手扞燈火行來行去，隔壁廳頭小菩薩搪咧倒燒茶，熱氣蒸煙，白白霧霧，順仔看落，拍一个尻冷損，叨透早暝深風冷霜凍，一嘴燒茶，宛那仁生大享受哩！
無外久呤呤，佛聲起，鐘鼓木魚，師姐師妹，老漢大大細細攏咧唸經，算講順仔這半氏人，猶毋捌見本這齣ｅ，對佛法ｅ莊嚴佮哲學仁生東西，別有一番ｅ感想安呢，若毋是今仔日有要事在身，伊著苦毋講宛那潦落法界，來拜師父渡眾生哩！
這嗎昊色逗逗也洸矣！雞啼狗吠鴨母gaga嚎，行出寺外看落港底，船有咧出入，外口空氣臹涼，千年大樹漢草臹讚，順仔吐一下仔大喟，袂輸青暝兮掠龍過，規身軀僬爽勢，謳咾甲叫毋敢……，中晝ｅ時瞬，順仔有照約束，坐船到渡船頭，沿路壹直咧探頭探耳，察看三條江路ｅ流水款勢，頂司所交待ｅ空課，看有法度”水清魚現”來完成？心肝內猶咧思念，昨暝佇慈航寺ｅ禪房，暝半透早，眾師姑做早課ｅ莊嚴法威安呢甡。 -
少年，衝互伊起
少年啊！衝互伊起！
仁生勇敢頭一層，失志下消上漏喟！
少年汝若袂曉想，食老卡加毋臹樣！
少年兮啊！衝互伊起喟！
疲勞厭懶吓笑，欲死動仙毋，
不時哈肺流目油，定著汝嘛衰咧等！
少年啊！衝互伊起喟！
日頭浮起人精英，神魂志揚氣魄讚！
落，落，搭底，材情甡張好肉本！
少年兮啊！衝互伊起喟！
拳頭捏甲欲出汗，吞銅食鐵忍搭底！
艱苦坐卦汝叨，風頭水尾潦落拂！
著啊！拚落去！鏘落去！落去！亥落去！
茲茲叨是咱少年兮！卡講嘛是咱少年！ -
成仔寮魂天
咱人十月二十，這工是大麵發仔欲老骨ｅ好日子，規陣人親戚五十（雜）朋友四十，連公水仔、土公仔……含挖壙ｅ傢俬頭仔、佛公、祭品……種種東西，攏好勢，透早昊袂(光)呤，雞袂啼狗袂ｅ時瞬，規陣人到媽祖廟，等欲坐渡船過對面成仔寮。
也叨下冬仔，日頭若短，昊欲洸矣，江風一瞬一瞬透來真正青冷，閣吓拍尻冷損安呢，話頭咧講吓哈白霧，地冷一四界露水，逐傢精神臹好哩，無外久ｅ噹中，渡船枝仔來矣。
但逐傢腳手著卡敏掠ｅ，噯趕這流流水，落卡吓輕可，抑無這大陣人，一綰簡那粽le，摯載袂稠是稍寡代誌，叨延吉時才是害呢！逐傢聽了雙手合齊，給媽祖婆拜三拜，祈求保庇順序，嗯才ｅ時瞬呤，行去渡船頭，坐船過對面獅仔頭崁。
這台渡船，攏總坐六个大人，卦一仙祖一聖王公（泉州廣澤尊王），規船坐甲沈斗沈斗，食水不止也深，渡船枝仔靠勢經驗讚，一路橫長直破siasia叫，船身頭尾，水湧嘓嘓拍來，強強欲逶船沖落滬尾，咱大麵發仔是驚甲搦，好的佳哉，尾溜仔於瞬呤，船身才臹位過來，有影驚一下拳頭母僬出汗，這个所在，是三條江路交接ｅ好位，三江六景，濛濛霧霧，有影看落吓醉吓茫安呢！
大麵發仔手恭奉聖王公，司公水仔咧拍仔，船漸漸來倚獅仔頭囉，拄好頂有一陣水鴨（飛）過，互人想起過年這欲到矣，人咧講「水鴨一聲，散人一驚」，發仔不止也感慨，江邊ｅ水湧，一瞬一瞬拍過來，有特別ｅ氣味叨著，ｅ時瞬呤，規陣人落船了後，遠遠霧霧倚海口ｅ所在，奚叨是滬尾（淡水）这時瞬一青冷ｅ海風吹來，人講欲起冬尾矣！（東北季風）呾起風無要緊，毋倘落雨叨好，現主時佇獅仔頭ｅ崁腳，一下目睭看對頂頭！哎！俺母le！即尼！頂頭ｅ絕壁天公崎，是欲到致時？想落腳尾僬冷有影！
大麵發仔，na行心情na沈重，哎！時間過了臹緊，阿爸已經過身十年矣！想起做囡仔時代誌，有影是目燒鼻酸，目屑遴遴擱，今仔日不孝囝發仔，有照約束著親友，司公，聖王公規陣人，欲來搬請阿爸到福地好位去，阿爸汝叨毋倘棄嫌呢！汝叨噯歡喜呢！这時瞬昊稍寡噴雨點仔，時含悲，真正人ｅ運命，有時叨袂講ｅ！
茄苳出版社（專門台語書籍）
(02)28911432‧28928749
台北市北投區中和街309號
〔出版品介紹〕 （歡迎試看、試聽）
著者：黃元興
台語華語2500句對照典（830頁） 1000元
（書830頁＋16支音帶×1小時） 3000元
〔台語文學〕關渡地頭（約15萬字） 350元
（書＋16支音帶×1小時） 2000元
〔台語文學〕彰化媽祖（約14萬字） 350元
（書＋16支音帶×1小時） 2000元
[台語文學]台北杜聰明…(16萬字)…………………350 元
福台語音標與用字教學理論………………….350 元
台語漢字書寫法（書…）…………………….300 元
台語TTS簡拼字 （約250頁）300元
茄苳台文雜誌合訂本（民84.5～民87.1共22期）( 另訂價 )
本書 ( 散文集 ) 350元
黃元興
台語散文集
〔附中文註釋〕
黃元興 寫
1999 台北
作者：黃元興，台北關渡人，1949年生，台大牙醫系畢業，終身奉獻台語研究，曾任陽明山教師中心母語老師、教育局中學組台語演講比賽評審、茄苳台文雜誌發行人、義方國小母語老師、台語文推展協會副會長，著作詳見書後頁。
黃元興台語散文集
黃元興 著 1999 茄苳
ISBN 957-98383-3-x
黃元興台語散文集
～‧～‧～‧～‧～‧～‧～‧～‧～‧～‧～‧～
著 者：黃 元 興
策 劃：台閩語系研究室、台語研究會
指 導：吳國安、阮德中、吳崑松
出 版：茄苳出版社
發行人：黃 元 興
地 址：台北市北投區中和街309號
電 話：(02)28911432、28928749
定 價：350元
日 期：民國88年2月14日 初版
編 打：詠絮打字有限公司 1999
～版權所有‧翻印必究～