-
立法委員
，陣”食袂老，死袂臭”ｅ老賊，隨人款五佰六十外萬台灣人ｅ血汗錢，佐尹踉港去矣，嗯才這擺ｅ立法委員選舉，真正有意義哩，選出161名立委，完全是台灣家己選出來ｅ，無死豬鎮砧彼款老柴皮咧穢世（廢占著），1992年12月19日，選出96席國民黨，50席民進黨，其他樣也有14席，真正順序來完成國會換血ｅ總改選空課。
這擺選舉，老Ｋ表面上有贏，毋閣尻倉後是顛誕liuliu，下消甲看現現哩，動員三台電視，動員一切行政力量，放暇官兵返鄉投票，金牛財團，仁情包國，……，結局選出來ｅ成績，真正了然，台北市來講，提名16个人，落選8个人，南北二區輸甲”僬勻”（很均勻），黨工人員一个面仔攝，簡那哩，心肝頭激規蕾，誶甲無力去。
買票ｅ效果，無倘外好，嗯才有一寡落選ｅ財主，選後欲尋柱仔腳算大條賬哩，人講”水，盤過甌吓消身去”，經一延手著剝一層皮，後手ce ｅ偆甲外贅，有影叨臹無額矣he！茲柱仔腳，有人私吞入腹，致使開無票頭，怨歎亦好，鄙相亦好，總是啊時代無仝，天公咧換人做矣，選民ｅ水準宛那有卡浮頭，互你袂安呢喚起喚落ｅ矣。
由這擺ｅ選情，咱吓凍了解，台灣ｅ二黨政治漸漸來頭，民主競爭ｅ粗胚勻勻仔來完成，先輩含心gap命佮伊tin落去ｅ苦心，漸漸吓來見光大欉開花結果，台灣地位行入去先進國家，排有著等，袂互人看衰叨著啦！
這回選舉大梟悻，阿輝仔尻倉去互椅仔夾著，民進ｅ一睏仔稠五十个，立法院叨歹紡哩，全全歹剃頭兮抾規班，這聲老Ｋ你皮著繃卡，以小弟ｅ看法，老Ｋ無倘好勢ｅ原因，拍算是舊年國代選舉進前「無給制」，選了後變有給制，做人無信用，致使著百姓袂爽，或者是授田證ｅ風波袂好勢，各方面顛誕，嘛無的確哩，總是啊百姓有咧反應叨著，政府噯抾起來思量互伊妥當，才是道理。
咱茲”福利國”思想，加減有弄狗肖咬ｅ淡薄也氣味，弄茲無油無湯ｅ老蕃薯，佮享受終身俸ｅ老芋仔，雙爿咧比憑拚勢，咁講老Ｋ看袂出來是毋？致使今年對茲年歲卡有ｅ芋仔，蕃薯仔看了袂作ｅ，真kue ，咱坦白講，平平是老大人，按怎噯分芋仔蕃薯年金肖pua，茲蕃薯仔氣搐，平平歲頭規大拖，按怎掠豬仔吓卡輸人？
這擺三峽提名ｅ李明興落選，某鎮民代表欲掠忠義山莊ｅ老芋仔起來出水，忠義山莊1200票，按怎講投互李明興才6票爾爾，伊咧怨歎，老芋仔食三峽睏三峽屎三峽，毋閣無投三峽票，佮食果籽袂噯拜樹頭以上，直直給趕出三峽準拄好，代表按算欲掣三、四百人去”討回公道”，安呢才吓返來，袂咧去互伊""，這層代誌逐傢是笑甲婁下頦，另外一篇文章真正咧kue6茲老芋仔，講伊年老番顛，投票呤，安呢歪篙莿，竹篙逗菜刀，lili laklak，安呢牛車逗馬達，臹袂好勢叨著。
某一个榮民站，奉頂頭ｅ命令去頓票，毋閣茲老歲仔人，頭昏昏腦屯屯，雙手又閣pipi，迭迭候選仁看顛誕去，人講「目睭花花匏仔看做菜瓜」，叫伊互丁守中，伊干礁吓記”中”字，到時瞬頓互關中，叫伊毋倘互顏錦福，伊互黃天福，也叨歲頭有矣，食老袂哺塗豆，雙手吓順續目睭花，心肝內想”甲”，結果遂歪去，去著”乙”。
有時仔外口講煞，入去著袂記了了，嗯才於是呤輔導人先提一張樣本，互伊紮入去看，結果脫線脫線，選票無給投入去，彼張樣本遂者，猶閣攏入票筒，氣甲輔選人金星十二條 ,鼻血雙杠流安呢。
最近ｅ選舉，咱台北市北區兩萬一千票叨吓矣，這个數目，若準郭石吉來選呤，一定吓稠，伊干礁士林市議員著有三萬二千外票哩，我看連張秋雄來選嘛吓稠哩，老Ｋ攏總提名八人報增一人，結果四个台灣人完全落選，佇要緊ｅ時瞬，風聲講攏配互仈人，有人臹憤慨安呢甡。
這擺立委選舉，民進黨得票到36%以上，台北市有到四成，这是真大ｅ成功，按怎講？因為親象日本赫尼進步民主ｅ國家，在野黨自來著毋捌超過三成，你看台灣人外kiang著好！因為壹般人攏是西瓜倚大爿，想欲巴結執政黨來取富貴叨咧袂赴矣，na有可能來反伊？而且政府閣有電視行政情結……等力量，反對仁士隨人嘛拚甲烏暗眩去，吞銅食鐵艱苦坐卦安呢甡，在野黨吓凍得著百姓ｅ支持，宛那臹無簡單，毋倘看俺公仔食雞肫脆脆，叨無快活哩。
民進黨有淡薄也欠點，噯稍改進ｅ，第一點，不分區ｅ立委，是專門為著弱勢仁馬、學者來設定ｅ，毋是黨內來「分贓」，所以講袂使用黨員來選舉，這舉中間十个名額，完全是本省人，真正無合理，應該噯有一位保障互內地人，譬如陳師孟或者張忠棟、賀德芬，政治才有平等安呢 ,尤其是陳師孟教授，這个仁格者為著理想無顧家己危險，實在互人臹感心哩。
第二點，公共政策ｅ中間，對文化語言方面無欲注重，互人真正心酸，一个族群干礁有錢毋閣無語文無甡張，活著na有心適呢？三台電視台七點了後一直到半暝一點，真罕咧有本土語系節目，按怎茲立法者攽外外呢？立委ｅ責任是制定國家政策，毋是地方性修橋舖路哩。
第三點，欲防止買賣文化，毋是干礁嘴花咧講講ｅ爾，噯親身去拜訪各所在ｅ里長、鄰長，甚至舊里長、舊鄰長宛那包括在內，給約束尹，請尹手勢夯卡懸ｅ，千萬毋倘買票，若準一定噯買，亦拜託尹買卡尐ｅ，人講見面三分情，無看僧面看佛面，人佮登門拜訪以上呤，赫尼好禮誠意，總是也買票有卡輸勢，vena教育囝孫，做人佮有大尾矣以上，自然de卡毋敢甚假仙叨著。
國民黨方面ｅ欠點，報紙寫了真贅，我無需要佇茲”糊蠅舞屎杯”（多管閒事），一个執政四十外冬ｅ政府，定著是空頭一大堆，相信老Ｋ家己內部比咱卡知影，不而顧呢，由這擺ｅ選擇知影，台灣ｅ民主確實有卡進步，政治若進步，社會自然吓健全，好人定著吓浮頭，東方ｅ國家，欲做到親象英國、美國民主，真正困難，咱台灣無的確做吓到，这拄鏘真歹講啦，象講日本赫優秀ｅ民族宛那做袂到，尹ｅ在野黨毋捌超過三成票，世間欲按怎突破”西瓜倚大爿”ｅ天性，有影叨臹硬斗哩。（民81年底） -
無限大ｅ祕密
本山仁”茄苳仔叔”，一時心花咧，踮這位開壇講經，佮逐傢結一个緣哩，人講”仁生”ｅ哲理真正高深奧妙，有这機會，有這个緣份上介好，咱食好逗肖報，茲邊頭尾，若有興趣ｅ人攏ci3倚來聽，也叨心適著好，品無掠包。
回ｅ講題「無限大ｅ祕密」真正精彩，互你看著吓起磅吓謳咾，三暝三日叨念哩，互你知影世間茫茫闊闊，逐款人貴仁真贅叨著，不而顧，这干礁是講古講經，萬項甚計較，尤其咱茲數學家、物理家，稍諒情哩，手勢夯卡懸ｅ，王祿仔仙罔彈爾爾。
世間ｅ物件，攏總有法度理解，單單有一項是例外，伊著是「無限大」這个問題，「無限大」確實是真正存在ｅ，是只咱無法度倘了解伊ｅ性質爾，無法度看破伊ｅ蘆山真面目哩，無限大ｅ空間，到底是按怎延伸，延伸到佗位為止，伊ｅ外口又閣是按怎ｅ世界？看起來是超過咱人類大腦ｅ了解範圍。
毋閣咱宛那有法度，利用一寡現主時ｅ科學知識，來解破一部份”無限大”ｅ祕密，这定著是一場真正硬斗ｅ苦齣，這場猴弄，揙甲你心肝ut ut ut，互你知影世間真正有即奇卡ｅ現象，互你有機會來看這本冊，來聽這場道場發表，聽甲你嘴笑目笑，心涼脾透開安呢甡。
二十外冬前，小弟本人，一工飽閒閒，干礁 這路爾，不時著一寡線索，來研究到底無限大ｅ部分性質，青瞑摸大象，雖然無法度摸著全身，摸著尾溜嘛袂醜啦。
關於無限大ｅ代誌，彼時有注意著二項事項。（各位先覺，下腳不而顧是講道爾，茲純數學專家請免計較）
（第一）有一个直角三角形
當θ接近90°時瞬，依嘛接近無限大，
所以今仔日欲了解無限大時，
tanθ=a （θ→90°，a→∞）
故tanθ90°→∞
（第二）A方程式 （初中式子）
B方程式 （高中式子）
二隻方程式外觀差不多，毋閣內容差臹贅哩。
(A)解
(B)因
設
解或或
三根 α＋β＋γ＝0（二次項係數0）
所以
目前壹般數學冊，逶”無限大”吓使看做是tan90°的代用品，頻若咱有法度倘了解tan90°附近ｅ性質，咱著吓凍順續”無限大”ｅ性質，（至少一部分性質，嘛好偷笑矣），因為這款ｅ暗示，是毋是佇”無限大”附近，宛那有這个現象，这著是真咧咱去了解ｅ所在，佇（著是無限大），可能有下腳ｅ關係若是有，咱著著矣，若是無，這棚戲著免閣搬落去矣。
為著欲說明利使，“無限大”ｅ代表人暫時用來說明卡方使（原理仝款啦），來探討附近ｅ現象。
（第一系統）因所以尹ｅ結論是安呢甡。
以上ｅ寫法，對了解”無限大”，並無啥乜好空，因為是分式ｅ形態，“無限大”分之”無限大”，宛那霧sasa，所以講欲了解無限大，著噯另外閣再研究。
（第二系統）
咱給斟酌看（第一系統結論）
（第二系統結論）
是按怎吓出現這款雙頭馬車ｅ景象，可比講有一个人到機場歡迎太太，忽然間出現兩人攏是正房太太，事實上這二款形式攏是正港ｅ，無毋著，學問ｅ趣味叨是佇茲。
〔無限大祕密〕，對附近有即尼要緊ｅ性質，互咱有法度來了解其中ｅ性質。
（以上所知）
同 理
（其中0+是極微數，吓凍忽略）
無限大相等於無限大兩倍〔加極微數（可忽略）〕
（結論）佇無限大附近ｅ所在，每一瞬間都是以2倍ｅ速度擴展，是抵好2倍，毋是1.8倍、3.5倍、7……倍，这著是無限大ｅ祕密。
講”無限大”ｅ意義是有存在，咱今仔日袂講空手返來，也叨咱了解一絲仔伊ｅ性質，鼻一絲仔哩，咱吓凍講，佇接近無限大ｅ直線形時，每一瞬間攏是以2倍ｅ速度咧前進，伊是”2”是一个真正吉祥ｅ數字，想著前頁咧捙拚”biak”出這字”2”字，真正是用心計較，費盡一切ｅ苦心叨著啦！
高中三角課本ｅ冊尾函數表，略也給張弛ｅ，差不多接近八十九度時ｅ函數，果然無毋著伊是以2倍ｅ速度飛快跳進，人咧講”鳥飛毛落魚行水濁”看田螺趖有痕，加減吓凍領略著其中ｅ奧妙！
佇彼个遙遠ｅ世界，佇彼个無法度了解ｅ天地，盡量來給解釋，伊是哲學嘛是科學，亦吓使是仁生宗教ｅ一款看法，佇仁生苦短ｅ流擺，多多吸收一寡直情義理，互咱ｅ生活吓凍過著閣卡實在逗搭，人若活了有心適，衝吓起磅，做一个氣魄組ｅ好善信！
“2”這字確實是一个神祕，真特別ｅ字頭！現主時ｅ快速電腦宛那靠2進位，伊是毋是有含有真深ｅ哲學意味在內呢，想閣想，想甲頭殼強欲biak去，叨真心適哩！
-
艋舺暢e
於瞬，艋舺所在，三教九流，地頭複雜，人群佳 he he趒，逶販夫走卒到大好額人，腹zat大學問家，逶剪鈕仔（扒手）乞丐羅漢腳仔，到”仁格者”、政治犯、慈善家、三色人講五色話，起起落落，袂輸社會ｅ萬花鏡（筒），叨真正心適哩。
致使著我關渡暢e，有時瞬無聊到地，加減吓到龍山寺彼箍圍仔，行踏行踏，吓凍吸一寡奇卡，來做義，也叨各階層ｅ仁士，攏吓僬到，流擺，上介吓凍了解台灣人當中，隨人想法按怎？社會ｅ脈動按怎？
阮兜面頭前ｅ公車，有行到艋舺，嗯才於瞬呤，有時瞬到台北，順續到艋舺行行ｅ，彼个所在ｅ物件宛那有卡俗哩，橫直亦袂食虧叨著。
這五、六冬以來，龍山寺漸漸來變做黨外演講ｅ聖地，政治味真重，寺面頭前ｅ大廟，樣也不時嘛有一cok一cok的人群，踮遐咧探頭探耳，講東講西，莿舞莿插，禮拜日ｅ下晡時仔，拍算3～6點，迭迭有政治人物咧大聲演講。
茲基本觀眾，死忠兼換貼ｅ，宛那規埕徛甲滇滇，風聲喚喊，鏘滾安呢，台頂ｅ人講甲指天拄地，莿腳搦手，真正憤慨哩，“以天下為己任”，無論閣卡按怎艱苦，我某某人著含心gap命佮伊tin到底，觀眾逐傢聽甲耳空kapkap，真正嫷喟哩，臹吓起磅，臹吓逗搭。
若準無人演講ｅ時瞬，逐傢著三、五人倚來，互相中間幵冓，交換意見，逶身邊給行過去，不時嘛聽著寡誶幹力撟，給消毒甲工夫哩，這款ｅ流擺，小弟關渡暢e，有聽幾落回，其中有一擺印象上介深，現主時我著給紀錄落來，互逐傢閒時仔做心適做義，互你了解咱艋舺地，“臥虎藏龍”有赫尼優秀ｅ仁材，真正謳咾甲逐舌。
有時仔想想ｅ，心肝頭叨強欲笑起來有影……。这拍算是十月尾或者是十一月初ｅ款，彼暫仔，宰相伯仔柏村仔，不時咧罵台獨者，偏偏龍山寺茲艋舺暢的上介擁護台獨，二爿死五ket怨傢死對頭安呢甡，續落來寫出咱茲奇仁異士，按怎來印宰相ｅ話，順續”kue 6”甲真正嫷喟叨是啦！
這个艋舺暢的，歲頭拍算卡liam五十ｅ款，面紅紅金金，叨細粒籽，一个安呢不吉不吉，下消款下消款，毋閣真敖表演，毋倘看貓兮無點，di遐自說自唱講話時一句北京話（仿老Ｋ），續落一句台灣話（表示伊ｅ看法），佇龍山寺大廟埕，簡那（好像）咧搬戲揙猴弄哩，一句來一句去，真正精彩，伊ｅ口音，正台北腔口無顛誕。
“大家要有國家觀念，要愛國，少數偏激份子不認同國家，这是最要不得的事”（以上國語，仿……）
「著啊，恁父上介有國家觀哩，著是因為欲宣傳國家觀念，嗯才拍拚咧推銷台×國……」（以上台語）
“我國堅持一个中國，不容有一中一台的邪說異議，損害大眾權利”（以上華語……）
「是啊，我嘛堅持一个中國、一國美國、一國日本、一个台灣……」（以上台語）
“絕對不允許分裂國土，做民族的罪人”（以上華語）
「我嘛不允准分裂國土，自來著無贊成以濁水溪分裂做頂港下港，安呢著吃無下港米矣」……逐傢大笑！
“絕對反對台獨暴力，破壞國家安定”（以上華語）
「我嘛絕對反對來拍台灣ｅ暴力行為（指中共）」（以上台語）
“講台獨，共產黨就要打過來，大家都完蛋了”（以上華語）
「台獨有理無理佮台獨吓成功未，魚凡魚，蝦凡蝦，是二回事啦！親象庶當時抗戰，咁講拍袂贏阿本仔，叨印證著抗戰無理是毋？」（以上台語）
“兩岸長期應該統一才好”（以上華語）
「真正著，我贊成八佰冬了後才統著好勢啦！」（以上台語）
現場茲艋舺暢的，逐傢是笑甲婁下頦去，這个時瞬，彼箍演說者，龜龜摸摸，趕緊對人群中間去，無外久著無看著人影矣。
現主時言論自由，實在頂頭茲話語，是無到佗位啦，毋閣佇在場，由仝一个人搬雙簧，一嘴老Ｋ一嘴台兮，講到逐傢吓起愛笑，di一四界嚴肅憤慨ｅ政治性演講中間，實在有影真正奇卡，其中ｅ奧妙實在互你回味無限，簡那咧哺橄欖哩，才咧愛笑講，艋舺所在，奇人奇物，这互你袂鐵齒ｅ。
「戇面袂曉看三色，社會返捯無半撇」親象阮這款阿仔，著袂曉這寡齣頭哩！ -
惜台員，茄苳情
擺籌備會議，決定咱ｅ刊物大名，號作『茄苳台文月刊』，这是真正好勢，茲茲讚叨是讚ｅ代誌，無毋著，蕃薯代表咱台員，茄苳嘛仝款代表台員鄉土ｅ古樸佮熱情，每一个民族，每一个國家，攏有尹家己ｅ代表性文物，汝若看著富士山，叨知影是阿本仔ｅ物件，看著長城叨吓想著阿共仔，看著楓仔樹葉，就定著是canada，嗯才於瞬呤，咱台員人，輸人毋輸陣到地也，自然有咱ｅ代表性齣頭，無論動物植物攏吓使，這款全台員，無論台員頭抑是台員尾，攏管顧吓到ｅ代表物，我想除了蕃薯以外，上介好勢兮，著是茄苳這字素爾爾。
按怎講茄苳這二字，下港頂港，通台員島攏有代表性？福氣到甲家己毋知，咱ｅ祖先，早叨留落來大量ｅ地名”茄苳腳”这茲茲表示，咱ｅ先祖攏有踮大欉茄苳腳，食穿艱苦共同生活ｅ經驗哩，古早台員地，南北一四界攏有真贅茄苳，嗯才於瞬呤，咱是茄苳腳ｅ民族，絕對袂顛誕呢！簡那阿本仔看櫻花，中國仔看梅花，朝鮮人占人參仝款叨著，所以講，茄苳吓凍代表咱台員人，这是咱ｅ福氣，咱ｅ運命，咱真正光榮，真正磊斗ｅ代表物，咱台員人心肝頭歡喜咧等，有影讚叨是讚哩！
茄苳樹ｅ樹形真正嫷，頻若看過大欉茄苳樹，伊樹形樹葉是嫷甲互汝三暝三日叨擻念哩，嗯才咱ｅ祖公仔無愛用別款樹種，干礁一心一意著茄苳爾爾，叨是壹直咧擻念遐磊斗奇巧ｅ情景，才留落來真贅茄苳腳ｅ地號名，（毋閣真拍損，有一寡地名已經被迫改名），基隆、汐止亦有茄苳腳，我本人叨是台北關渡茄苳腳人，苗栗、新竹嘛有，台中閣卡有茄苳神木，民俗家吳樂天嘛新營茄苳腳人，彰化花壇舊時宛那叫茄苳腳，屏東佳冬叨是茄苳啦！恆春ｅ茄苳嘛是臹出名，台東市郊ｅ茄苳腳，豬血湯上介出名，知本風景區有一欉千年大茄苳。
佇茲我使給各位朋友，透露一个小祕密，叨是咱台員現主時，上第壹磊斗ｅ茄苳神木是佇佗位？關於這點，我一睏仔唗尋十外年才有答案，伊ｅ坐位佇台中市上鬧熱ｅ所在，中正路、中港路交界ｅ所在，正確ｅ地址是台中市中港路壹段51巷內，這欉茄苳神木，攏總有祖孫三代（三欉），枝葉茂，真正磊斗，頻若看著ｅ人，隨人攏謳咾甲吓舌，它ｅ喟勢，派頭，真正壯觀偉大，互我久久毋咁來離開，印相真正深刻叨著，各位朋友，恁若有機會到台中ｅ時時瞬，吓使加減去行踏行踏，欣賞一下仔到本ｅ，回想這幾百年來，咱ｅ祖先，安怎佇茄苳樹腳討趁，消涼ｅ情景……，實在講起來，茄苳樹ｅ形勢有影臹讚，尤其伊ｅ樹葉，閣卡幼秀，三葉一簇，心臟形，樹葉密度臹，看落心頭叨爽，咱台北市舊時愛國西路，規排茄苳樹，互咱印相臹讚（現主遷去關渡大渡路），咱跋白ｅ，台員地樟樹應該是比茄苳閣卡贅卡普遍（舊時），毋閣樟樹ｅ氣質，外表，無茄苳赫尼”詩情畫意”，莫怪咱ｅ祖公，赫尼愛用茄苳腳這个地號名，叨茲茲有影哩！
呾這嗎話頭，閣給返來文化這爿面，一个國家是民族，普普也攏有一、二款”標頭”做代表，表示伊文化ｅ特別性，可比講咱一項商品攏有一个商標仝款，安呢來者，頻若看著伊ｅ標頭，叨知影伊是啥乜族國！這項特徵，佇殖民統計ｅ時瞬，上介明顯叨著。茲有二例，咱台北圓山動物圓邊，橫跨基隆河有一板大橋，九十年前，東京話統治者給訂名”明治橋”，互人現看現知影阿本仔ｅ偉大，四十五冬前，北京話統治者來了後，緊改做「中山橋」，意思是講，恁明治大兮揚papa，阮中山大兮，咁吓使下消是毋？各位，若準欲改做台語ｅ地號名，按怎才好勢？
32 .趕緊挽救校園台語生態
語言是一切文化ｅ基本，語言若是互人消滅，个民族，定著是樣也消失，這款苦例真贅，毋免拍隕紙筆來說明，後一个世紀21世紀，全世界ｅ大型語系內底，咱台灣話是上有可能互人（家己）消滅ｅ語系，這款悲慘ｅ結果，真值得咱福佬人ｅ知識份子深思研究，萬項代誌噯事先預防，倘等到悲劇發生時再來追思奚叨袂赴！
咱給看全世界ｅ民族，上介進步佮上介落伍ｅ族群，尹攏去消滅語言，顛倒親象咱這款半進步ｅ國家真正危險，上有可能互人去叨著，这話按怎講？因為強國尹政治文化進步，無可能文化流失，過落伍ｅ烏人國，尹無機會受教育，逐工踮庴內做空課，日日使用母語，袂去互其他強勢語言同化，所以亦無問題，單單咱台灣這款國家上可憐，逶三歲到二十歲，攏咧受老Ｋ教育，遠離母語生態，安呢年久月深，台灣語叨無人講，叨會慢慢來消身滅種矣！
目前有真人，真贅團體，攏咧大聲喊，大力推廣台語，我想效果無外好，因為目前上介食力ｅ因素叨是咱ｅ教育系統做置來，若準教育系統無法度改進來講，真正吓目睭金金人傷重，台語生態可能吓佇三、五十年了後完全消失去，这絕對不是咧笑，絕對袂使外外。
咱人出世來世間，頭一擺ｅ印相上介深，講ｅ叨改袂過來，所以囝仔ｅ初語權上介要緊，壹旦初語權「拱手讓人」，安呢後日仔欲閣返來ｅ機會叨真矣！所以佇茲咱苦勸著咱茲少年父母，做嗣大人教幼囝仔ｅ時瞬，佇2～7歲中間，完全教母語（台語），教其他語言（入學進前半年才教一點仔官北話叨好勢），絕對毋倘教二款話，腳踏二隻船無法度來保護母語，咱坦白，北京話免教，去學校自然吓教，做嗣大人免操心啦！
為著欲挽救咱ｅ台語校園生態，咱欲用啥乜步數來解決？我想噯用四款辦法來做，這四款辦法效果真大，毋閣这是政治問題，欲叫誰去命令落公文，这比想辦法閣卡！卡早咱ｅ想法是映望陳水扁市長來做，事實上效果無好，俺扁仔就任二年，學校無欲教台灣話，遂顛倒教英語，互人臹失望，我想卡好勢ｅ法度，叨是由議員提案，逐傢連署了後，由議會通過，通令各學校實行，安呢才有映望，下腳叨是挽救台語生態ｅ四大方法。
第一步。噯嚴格實行「幼稚園母語化」，幼稚園教育以母語為主，事實來講無稀罕，大陸ｅ內蒙、廣東皆如此，台灣人奴化性格深，家己看家己無點，戇戇袂車安呢！
幼稚園ｅ時期，是一世人言論釘深ｅ關鍵時期，這个時間若講吓好勢，定著規世人無問題，抑若無者，等大漢了後，閣卡改嘛改袂過！咱人活八十歲，其中語言是決定佇這四年內底，其他七十六歲叨無路用哩。
咱現時ｅ教育，幼稚園教北京話，等於囡仔一出甡，著給判語言死刑，等於一隻鳥仔欲學飛，叨翅拗斷，互咱ｅ囝兒一出世叨佮母語斷路，這款殘殺幼童ｅ手段，實在真殘忍，實在講起來，嗣大人並無反對教母語，問題是咱ｅ教育制度，互尹姑不而衷來放棄，因為嗣大人驚囡仔去學校聽無北京話，吓互人欺侮，所以噯先教老Ｋ，才袂食虧安呢…。
囡仔若先教老Ｋ，安呢台語定著叨恬恬來消身矣！所以咱主張幼稚園母語化ｅ時瞬，後擺嗣大人，吓認定校內講台語，安呢嗯才有「誘因」來教來！
第二步。叨是國小國中一學期四个月當中，劃定二个月華語月，二个月台語月。譬如講四月份是台語月，安呢佇這月日ｅ當中，全校師生校長職工，全部台語生態，朝會，廣播，一律台語，台語ｅ同學，你叨吓曉ｅ同學來學習，我想这是上徹底ｅ挽救台語方式，只有透過實際對話ｅ方式呤，台語生態才有效果，有意義，目前ｅ台語教法猶統一，这無要緊，上要緊叨是緊挽救台語生態，这是腳踏火鼎ｅ代誌，早一分急救叨早一分有望！
第三步。國小國中ｅ課程，噯有一部份用台語來教書，我想暫用音樂、美勞、體育，以後再用其他，上課ｅ時瞬用台語，學生回答嘛用台語，互母語自然化入去生活佮教室，这比刻意用教材「碇硞硞」方式有卡好勢。咱遠程ｅ目標是所有科技化ｅ科目，嘛是噯用母語來寫作佮教學安呢，世界上重要ｅ語言攏有家己ｅ科學教育系統，这佮報告新聞用台語有仝款ｅ重要性。
第四步。叨是高中聯考ｅ「國文科200分」改做「語言科200分」，除了吓凍考中國文以外，另外其他種類ｅ台灣語言，嘛吓凍來考，比喻講「南瓜的台語怎麼說？」吓曉講「金瓜」者得5分，袂曉者零分，「絲瓜怎麼講」，答菜瓜者有分，袂曉者零分，另外吓考中文翻台文…等等，也叨台灣話納入去考試ｅ系統，安呢家長叨吓認定台語是一款有學問ｅ科目，逐傢卡欲認真來學來教，这直接間接對保持台語定著有決定性ｅ好處安呢！
眾位，台語生態大艱苦大悽慘，台語伊前途ｅ救，對學校內四佰萬，絕對袂使攽外外，這嗎水已經淹到頷頸矣！噯拚才吓贏！
- 二二八紀念碑文
財團法人二二八基金會
（1997.2.28公布）
（華語版）
一九五四年日本戰敗投降，消息傳來，萬民歡騰，慶幸脫離不公不義之殖民統治。詎料台灣行政長官陳儀，肩負接收治台重任，卻不諳民情，施政偏頗，歧視台民，加以官紀敗壞，產銷失調，物價飛漲，失業嚴重，民眾不滿情緒瀕於沸點。
一九四七年二月二十七日，專賣局人員於台北市延平北路查緝私菸，打傷女販，誤殺路人，激起民憤。次日，台北群眾遊行示威，前往長官公署請求懲兇，不意竟遭槍擊，死傷數人，由是點燃全面抗爭怒火。為解決爭端與消除積怨，各地士紳組成事件處理委員會，居中協調，並提出政治改革要求。
不料陳儀顢頇剛愎，一面協商，一面以上紳為奸匪叛徒，逕向南京請兵卿指揮下登陸基隆，十日，全台戒嚴。警備總司令部參謀長柯遠芬、基隆要塞司令史宏熹、高雄要塞司令彭孟緝及憲兵團長張慕陶等人，在鎮壓清鄉時，株連無辜，數月之間，死傷、失蹤者數以萬計，其中以基隆、台北、嘉義、高雄最為慘重，事稱二二八事件。
斯後近半世紀，台灣長期戒嚴，朝野噤若寒蟬，莫敢觸及此一禁忌。然冤鬱積，終須宣洩，省籍猜忌與統獨爭議，尤屬隱憂。一九八七年解嚴後，各界深感沈痾不治，安和難期，乃有二二八事件之調查研究，國家元首之致歉，受難者與其家屬之補償，以及紀念碑之建立。療癒社會巨創，有賴全民共盡心力。勒石鐫文，旨在告慰亡者在天之靈，平撫受難者及其家屬悲憤之情。並警示國人，引為殷鑑。自今而後，無分你我，凝為一體，互助以愛，相待以誠，化仇恨於無形，肇和平於永恒，天佑寶島，萬古長青。
財團法人二二八事件紀念基金會謹立
中華民國八十六年二月二十八日
（台語版）
一九四五年日本戰敗投降，消息一下傳來，蕃薯仔歡喜咧等，做講吓凍來脫離不平不義ｅ殖民統治。無疑悟台灣行政長官陳儀，雖然身負接收治台ｅ重任，毋閣伊佮社會袂逗搭，施政是離經歪斜，看茲百姓簡那畚圾咧，官員食錢毀累，產業落坑，物件大起價，一四界無頭路，咱茲蕃薯仔，是心狂火焯，強欲摯載袂。
一九四七年二月二七日，專賣局人員，佇台北市法主公對面，查掠烏市ｅ包，拍摥女販，又閣死路人，這聲百姓氣噗噗，互伊激著以上，隔返工台北群眾，規陣拚到長官公署，欲掠凶手倘來矯鋩角，無想著遂顛倒互官廳開槍，彈死彈傷幾多人，這聲全台灣火山暴發，心肺僬爆潦落鏘拚。為著欲解決爭端佮消除積怨，各所在士紳，組成事件處理委員會，做公親來調解，閣提出政治改革要求。
無疑悟陳儀酷行押霸，那協調那報去中央請兵，誣賴茲士紳是土匪叛徒安呢，國民政府主席蔣介石聽著報告，自那派兵來台灣，二十一師師長劉雨卿登陸基隆，初十全台戒嚴，警備司令部參謀長柯遠芬，基隆要塞司令史宏熹，高雄要塞司令彭孟輯佮憲兵團長張慕陶，茲兵頭佇「清鄉」鎮壓ｅ時瞬，死臹贅無辜ｅ民眾，彼幾月中間，死傷失蹤幾多十萬人安呢，其中以基隆、台北、嘉義、高雄，上介食力悽慘，这叨是二二八事變。
了後這五十冬以來，台灣長期戒嚴，逐傢驚落底，嗯才官民攏恬寂寂，無人敢這个禁忌，，冤仇愈絞吓大條，嘛著噯消化解，才是頭路啦！省籍對立佮統獨爭議，閣卡互逐傢煩惱咧等。一九八七解除戒嚴後，各界感覺症頭即大條，無料理袂煞。為著社會安定，嗯才有二二八事件ｅ調查研究，國家元首出來失禮，苦主佮家屬已經補償，佮建立紀念碑，療養這層心苦病疼，这實在噯靠勢逐傢共同來拍拚。
踮茲刻石做文，叨是欲告慰亡者在天之靈，來撫平苦主，佮尹家屬ｅ悲情氣憤，順續來警示國人，毋倘閣再重犯錯誤，自今了後無分你我，逐傢做一个，互相敬愛誠意相待，逶冤仇落江湖大海，建立永久永世ｅ和平，天公伯仔保庇咱寶島，萬年永久和樂叨著。
財團法人228事件紀念基金會謹立
中華民國86年2月28日
- 生日
師父、法師、各位貴賓、各位菩薩、阿彌陀佛！
我是果慈，今仔日於瞬呤，真正感恩師父，佇个聯合祝壽典禮當中，互我這个機會，為家屬講幾句仔心內話。
我ｅ嗣大人，今年歲壽96，吓記置，卡早做壽生日時瞬，阮攏是以一寡通俗ｅ方法，來祝福爾爾，逐年安呢照舊步數，抑麼叨逗陣食一頓仔，耶麼叨出錢拍金仔，或者是包一个紅包爾，簡單叨給準過去叨著。
實在講起來，這嗎ｅ人，食飽穿燒，好命溜溜，叨無咧客欠食穿東西哩，嗯才阮老菩薩（家父），伊有咧講「茲氏細少年仔，毋免安呢破費啦！我若知影，逐傢生活安呢平平安安，有成就叨好勢啦！」我ｅ老菩薩安呢想，定著逐傢老菩薩嘛是安呢想，天下父母心，真是無上感恩哩。
今年，我真正有福報，來阮老菩薩，報名聯合祝壽，这實在是咱法鼓山ｅ一个好ｅ風氣，好ｅ模範。也叨，咱來聯合祝壽，毋但是提倡氏細來盡後道爾爾，閣再吓凍來惜福、培福、節省資源，互咱以上介謙誠ｅ心，來為老菩薩祈福添壽，逐傢安呢歡歡喜喜，認真拍拚，來給感恩祝賀祈福安呢甡。
也呾，这是頭一擺，希望日後咱逐傢，嘛吓凍用這款心情，來推動社會淨化運動，互咱今仔日感恩ｅ心，佇每一工每一个時瞬，來報答父母恩，報答三寶恩，最後祝全體壽星，增福添壽，阿彌陀佛！
本書義務紹介（1950～1980年間）
35. 亞洲版全套舊台語歌CD
身為文化界ｅ一份子，尤其從事台語文推廣工作，咱有一種使命感，按怎逶上介幼秀磊斗ｅ文化ｅ遺產，來互咱ｅ會員知影，本社今年以來上界大條ｅ消息，叨是民國40～70年間，正港ｅ舊台語歌全套CD，已經由原廠（亞洲唱片）重新翻作，100%原版唱腔，（佮一般改唱，翻唱，氣味無仝款）。
本社kia3佇保存文化ｅ立場，佇茲義務給眾會員，真慎重真嚴肅來紹介這套CD，希望逐傢一下，重新來給想三十年前，老Ｋ戒嚴時代ｅ回憶，若是聽了有讚，拜託給您ｅ親友，樣也仝款紹介一下，互文化湠開來上要緊！
名稱：臹港原版台語舊歌CD全集（1950～1980）
發行：亞洲唱片公司 (07)3848088
內容：全套約六十片左右，價格約七千元左右
陳芬蘭 鄭日清 紀露霞
文夏（約300首） 吳晉淮 顏 華
文夏四姊妹 黃三元 郭金發
洪一峰
- 國中ｅ台語比賽
台北市八十五年度，中等學校母語演講比賽，已經86年5月27日踮承德路三段明倫高中，來順序圓滿結束，小弟有福氣身為國中組台語ｅ評審，加減講二句話。
擺由市政府教育局，佮明倫高中合辦，坐捷運火車，到圓山站落車叨，真正利便，比舊年踮內湖高中有卡近叨著，彼一工氣候真辣，明倫ｅ接待幼秀客氣有禮數，真正勞力安呢。
母語講演比賽，粗分做三組，有台語、客語、原住民語、台語方面又閣幼分做白話佮吟詩二組，台語組兵馬上贅，強欲占三分之二，原住民組闌珊爾爾，咱主辦單位，用心計較，宛那夆人感心。阮先佇會議室做簡單ｅ說明，校長，教育官員，承辦老師，逐傢攏真熱誠，心情蘇爽氣氛，共同來完成這項真正有意義ｅ空課。
續落ｅ時瞬，阮行到會場，伊設佇圖書館三樓，場所曠闊，冷氣真涼，椅仔位大塊，有影設備真好勢叨著。在場是國中組ｅ台語比賽，伊ｅ規則是安呢：語音韻占百分之三十，內容結構用詞占百分之三十，流暢占百分之三十，儀態占十分，時間每人約3～4分鐘，長甚短攏噯扣分。
早起場逶九點捅幵始，比賽大安區、文山區、松山區、南港區、內湖區，會場有參加ｅ選手佮指導老師，三位評審，三位承辦老師，攏總五十外人，咱校長先來簡單ｅ致詞了後，比賽自那開始。
頭一位就台，叨是芳和國中ｅ林同學，台風穩健，口才清淅分明，續落去是景尾方面景興國中代表，千中選壹ｅ，定著讚ｅ壹庄叨是，第三位是咱市內金華國中代表，表現優秀盡磅逗搭，有影互我心肝一，老K講「後生可畏」，真正互你袂鐵齒ｅ。在我ｅ想法，金華國中，外省人地界，台語生態上介醜，無啥映望，實際上拄好倒，咱這位阿瑋小姑娘仔，人扮漢草，大漢柳秀，聲斗宏亮清脆甘甜，接詞滑溜，婁甲卸卸叫，真正壹流嫷ｅ，我阿興仔歲頭食甲欲五十矣，謳咾甲欲觝舌去，心肝法有咧想，最近民視拄好欲開播，搪咧尋無台語仁材，有即尼好ｅ天才，若有機會去貢獻，毋知外好咧。
閣再來是木柵國中、磊山、三民、永吉…，各學校中間ｅ水準非常ｅ接近，分數ｅ評審真正為難，今日早起攏總有二十三間學校，下晡宛那仝款，今仔日講ｅ題材我感覺真磊斗真幼秀，大部份攏是強調本土意識，这佇十外冬前是聖聖互汝掠袂到ｅ代誌，時代幵放矣，腳步有卡開矣，（真歹勢，篇幅關係，無法度逐校來紹介。）
十一點左右，比賽完滿來結束，三位評審交出成績單，也叨成績過接近ｅ關係，仁員壹再詳加計算，趁這十外分ｅ空縫時間，評審做一下簡單ｅ講解，其中安和仙講了真心適。「世間變化真大，今仔日ｅ冷門，真可能後擺仔ｅ熱門，台語這張股票壹直咧起價，咱透過這款比賽，雖然真辛苦來講，抑毋閣恁ｅ水準讚，無定著會夆紹介去影視媒體，嘛無哩！」我樣也講二句「恁攏是國中生，後擺吓駛憑这演講獎狀，去申請高中入學甄試，加足方便ｅ，今年頭擺高中入學甄試，就我所知影，叨有一位新民國中ｅ學生以台語演講獎狀，順利進入復興中學甄試，以後恁宛那吓使用這步ｅ！」
評審成績出爐，四位優勝，四位優等，四位特優，各領獎狀獎品，合照留念，十一點半腳兜仔，早起場圓滿結束，毋閣我心內感到真遺憾，二十三人有一半空手返去，这是真殘忍ｅ代誌，仈人客家組原住民組，「幾乎人人有獎，甚至獎比人多」，一个學校幾多千人ｅ太祖牌選手，佇茲落場軟勢，真正怨歎啊心酸啊！
下晡比賽，一點半開始，是北投區、士林區、中山區、中正區、艋舺區，有二十二間學校咧拚，情形佮早起差不多，頭先是長安國中ｅ蘇小妹，伊「唱作俱佳」互人印相深刻，閣來是雙園、大直…，其中五常國中ｅ阿中，仿江湖人員腔口，講豬哥標ｅ故事，袂輸大人，真遴返真滑溜，互汝想袂到，伊依原國中生爾爾，我給拍懸分安呢。
弘道國中宛那叫阿中ｅ選手，伊講白賊七ｅ故事，伊ｅ問候語「」，是今日上下午45間學校唯一正確ｅ講法，其他攏是以國語「你好」、「大家好」準過，雖然無毋著，踮台北地區，曾經有七十外歲ｅ阿伯電話互我, 伊講「你好」，是尹時代「恁娘卡好」ｅ簡稱，好話變歹話，噯稍張弛ｅ。
仝款是篇幅ｅ關係，無法度隨校僬紹介，其中看著北投國中，新民國中，桃源國中，淡薄也親切，尹ｅ水準攏真好勢。另外士林國中佮北安國中，尹聲斗真宏亮，前途定著真讚！
三點十分左右，比賽結束，稍寡，二十分鐘了後頒獎，佮早起場仝款，四優勝，四優等，好酒沈甕底，最後宣佈四特優，相了後，散會離去，外口ｅ日頭赤y3 y3，佮早起場仝款遺憾，樣也有一半空手返去，哎！真正摯載袂哩！
趁尹咧結算分數這二十分鐘內，三位評審有就台稍寡講解一下，看咱茲各學校ｅ精英表現，有啥優點佮缺點？咱跋白ｅ，這回ｅ水準比舊年內湖高中彼擺加臹好勢，無論是內容聲調儀態，攏進步甲看現現，互人真正感心，心肝內咧想，毋知一工咱全民少年傢攏有倘講到即好勢，總講一句，我對尹ｅ表現是謳咾甲有去，以國中生這款台語生態上食力來講，實在無簡單。
若是講到卡無好勢，無逗搭ｅ所在，我私仁ｅ看法有下腳幾多點，「一下到台北，叨…」應該用「一下到台北呤，叨…」卡妥當，台語nia，niania，表示的時候，这是基本文法，「我愛艋舺這塊土地」上好用「我疼惜艋舺這塊土地」，台語的「愛」音，實際上是「噯」，意思如中文「要」，真容易肖濫，台語ｅ「愛」，是恬恬無出聲，無字啦，免字啦！「輕愛姑娘仔」叫「佮意姑娘仔」，「極愛姑娘」叫「著心肝，歃著頂腹蓋」，愛囝兒叫疼囝，愛祖先叫敬祖先，愛大孫叫乙著大孫，愛土地叫疼這塊土地，台語若勉強欲用愛字，拜託用「意愛」卡妥當。
「媽媽」一詞上好用阿母或者是阿，台語媽字宋朝叨已經有「媽祖婆，公媽牌」國語ｅ媽字是民國八年五四運動了後才流行，尹卡早宛那叫「娘啊」，咱看古裝戲叨知影，台語媽是祖母，若叫母親媽媽安呢二代變三代吓亂倫，無好勢啦！
「这是為什麼」建議「这按怎講」、「生活當然艱苦，笑掉嘴齒，更加精彩，只是參加，一面哭一面行…」建議「生活定著艱苦，笑到下，閣卡精彩，干礁參加哪哭哪行…」，另外佇聲調方面，普通有二个欠點，第一，ｍ音迭迭誤做ｎ音，（因學校國語無ｍ音），心肝唸做新肝，評審唸評信，第二點入聲方面，縮音縮了無好勢，如力lat六lak納lap，原因是入聲國語叨無。
這擺中學ｅ台語比賽已經完成，咱來給做檢討，吓凍來做未來改善ｅ參考安呢。以下是我私仁ｅ意見，語系ｅ分組甚過了複雜，包山包海，無形中降低伊ｅ氣氛，伊分台語，客語，原住九族語，台語下腳又分文讀唸詩佮白話演說，客語嘛是仝款，以上又閣綜合分做國中組佮高中組二大類，即尼複雜大ｅ系統，是欲叫主辦者按怎去？
頒獎無公平，台語組人數足贅，原住民客語人數真尐，毋閣獎品平平贅，致使台語組ｅ人，「大半空手而回」，其他組ｅ人「幾乎人人有獎，甚至獎比人多」，安呢是無公平啦，台北市ｅ稅金，咱族群人納大部份呢！
咱ｅ教育系統是壹直咧排斥台語文化，所以有勇氣有材肇ｅ選手、攏是「逆勢而為」ｅ英雄好漢，建議頻若代表學校ｅ選手，攏噯有獎狀，除了優勝、優等、特優以外，其他尾段ｅ人頒互伊佳作獎，尹用這个獎狀，吓使去參加高中入學甄試，安呢叨免考聯考「以資鼓勵」。
對參賽ｅ學生佮指導老師來講，「大熱天苦差事」，除了獎狀以外，希望吓凍向社會人士募捐，不管有無得獎，另外發優厚ｅ獎金獎品，这是表示社會對尹ｅ辛苦一絲仔敬意，意義非凡，這項空課，我私下願意落做，潦落拚。
演講了後ｅ講評，真正要緊，我建議十五分鐘延長到三十分鐘，三位評審每人十分鐘，安呢講卡吓規套，「不會草草了結」，除了吓凍了解比賽者ｅ優劣以外，宛那順續吓凍聽著台語學者「博學多聞」佮校內教育無仝款ｅ一面。
另外一方面，我對教育局方面，宛那有一寡映望，咱知語言是一切文化ｅ根本，母語生態按怎來傳承後代，这是一件真正要緊，危機重重ｅ代誌，今仔日咱上弟壹要緊，叨是趕緊「挽救校園台語生態」，若準學生台語生態無法度恢復來講，安呢閣再辦一百場比賽嘛是無呢！这關係著全族ｅ生死存亡，咱絕對袂使外外叨是！
按怎來恢復校園台語生態，我想方法有四，第一項是幼稚園母語化，3～6歲是學語言的關鍵時期，這个時期若切斷台語的傳授，會造成伊一氏人ｅ失語，袂使鐵齒ｅ，第二項是校園台語月，一學期四个月，台語國語各占二个月，輪著台語月ｅ時瞬，全校上下壹律台語交談廣播，我想这是上實在ｅ台語生態保護，互一个囝仔有機會去講去聽去參加生態，安呢才有路用，第三項叨是學校教材，有一部分用台語教，初期以音樂美勞體育為主，日後再調整安呢，第四項叨是考高中ｅ國文200分，改做語文科200分，考試ｅ內容亦有北京話，亦有台語，互家長知影台語是有市場ｅ項
目，逐傢卡吓注重。
最後我真正感謝教育局佮明倫高中ｅ拍拚，燒辣天流汗流滴，來舉辦這項即尼有意義ｅ空課，希望咱ｅ文化吓凍閣卡大葩尾旺廣安呢甡。