, 台 閩 文 學 ( 同治三年 e 代誌 ,1870 )
( 清朝台灣第一大案 )
彰 化 媽 祖
Zionghua Mazo
黃 元 興 著
頭版 1993 年 , 台 北 北 投 ( 1997 , 2003 ,2007 2020 四次文字修正 , 本文另有單行本 佮錄音帶, 請洽 茄苳出版社 02 28911432 )
頭前
時代咧進步,文化大興,咱鄉土文學宛那仝款咧生枝bu4穎,一步一腳印發展安呢,舊年我有出版台語文學【關渡地頭】,有淡薄仔經驗,另外又閣真感謝熱心e先進,提出寶貴e意見,順續互我這本【彰化媽祖】閣卡有信心來給完成, 佇茲我有這個機會,來寫出咱台員地清朝第壹大案, 宛那感到真榮幸,這是咱e義務,亦是咱e權利安呢。
本冊攏總十三萬五千外字,寫了八個月日,說明有關台灣鎖在1870年代, 霧峰林家重大事件,參考真贅資料佮台語寫法, 其中最要感謝的,是同鄉遠親黃富三教授, 所提供苦心收集的寶貴資料 才有法度來表現母語文學e幼秀內容,這個當中,我嘛真拍拚潦落拚, 無論用字用詞句法分析,攏真認真做, 佇茲真歡喜,母語文學欲進步,定著有一批先覺,恬恬認真,用心計較來促助,了時了力來開墾叨是。
呾好矣 ,寫到茲叨煞矣,這本冊欠點定著真贅, 拜託咱茲關心母語文學e先進,無論是錯誤e所在,或者是有閣卡好e寫法,請恁通告一下,小弟真正感謝勞力叨著。
( 原始序 ) 元興 1993, 12月 台北 新北投 山腳
(02) 2891-1432
\
近kk台語 通用音標系統 36音符
( 1998 ,02,12 北市教育局母語音標方案 )
註 :
[ 1.]本書所謂台語音標是以台灣地區通行為主, 另外在閩南地區, 也有專門的廈門式閩南語音標, 兩系統之間, 非常接近 .
。
[ 2] 通用音標系統,一般音以一音一符號為原則。
- ａ(ㄚ) 哈腳 15. ｏ(ㄛ) 虎補 26. oo 嚶噁
- ｂ(ㄅ) 飽比 16. ｐ(ㄆ) 皮碧 27. uu 張想
- ｃ(ㄘ) 查粗 17. ｑ(濁ｇ) 牛義 & 入聲母音
- ｄ(ㄉ) 桌豬 18. …ｒ 蚵 28. ap 合十
- ｅ(ㄝ) 禮馬 19. ｓ(ㄙ) 蘇洗 29. at 力賊
- ng 釘冰 20. ｔ(ㄊ) 鐵通 30. ak 角六
- ｇ(ㄍ) 狗奇 21. ｕ(ㄨ) 朱舊 31. ip 集吸
- ｈ(ㄏ) 魚福 22. ｖ(濁ｂ) 肉米 32. it 日失
- ｉ(ㄧ) 是麵 (ｗ唸碗) 33. ek 竹克
- z(ㄗ) 早祖 (ｙ唸影) 34. et 別設
- ｋ(ㄎ) 腳開 鼻母音 35. ut 骨卒
- ｌ(ㄌ) / j 路日 23. aa 山看 36. ok 國福
- ｍ(ㄇ) 罵摸 24. ee 挾 (37) 泉 …ur 於
- ｎ(ㄋ) 尼尊 25. ii 錢圓 漳 j…. 儒
台語聲調與注音
台語有六音,國語有五音,除第6音( 市,雨,話..)外,二者視為一樣 .以求簡化. (以前e講法台語有八音,將入聲當做聲調。) 實際詞彙注音採句調, 教羅音標則全採本調.
台1聲 & = & 國1聲 & (清、生、坐)
台2聲 & = &近 國2聲 & (雲、船) ( 起音較灣 )
台3聲 & = & 國3聲 & (睏、性) ( 起音較平 ,取前半音 )
台4聲 & = & 國4聲 & (李、水)
台5聲 & = & 國5聲(輕聲) & (出去)
台6聲 & ( 國語無) (雨、靜、市)
[{ 例}] 「面桶」e台語注音。
[{ 答}] 「面桶」e音標是vin tang ,聲調是台3聲(同國3聲)、台4聲(同國
4聲),所以「面桶」e台語注音是vin tang 34。
[{ 例}] 「金紙」e台語注音。
[{ 答}] 「金紙」e音標是gim zua,聲調是台6聲、台4聲(同國
4聲),所以「金紙」e台語注音是gimzua 64。
[{ 例}] 以下台語注音比較:
& 本書(通用系統) & 教會羅馬字 (聲調符號略)
洗身軀 suesingku 161 su e seng-khu
眩船 hinzun 32 hinchun
青菜 ciicai 63 chhiNchhai
鐵人 tilang 42 thilang
台語漢字說明
( 註: 這個部分請看熟,後面看文章著吓真順 。)
安呢 這樣子
也叨 adr 16 話說
阿啄仔 a6 dok a4 洋人
噯 ai 4 要
按怎 an zw4 如何
an2 緊
甕肚 ang4 do6 忌妒
拗蠻 au van2 傲且蠻橫
慪韶 au siau2 惡劣
翩笪 bing daa3 推翻
貧惰 bin3 dw6 懶
頻若 bin3 na6 只要是
跋杯 bua3 bue 拜拜擲筊
殘殘 can3 can2 豁出去
粟仔 cek a4 穀子
啐幹力撟 cr4 gan4 lat5 giau6 罵人
車輦 cia6 len4 車輪
矯好勢 ciau3 hr se3 處理好
鏘鏘滾 ciang3 ciang3 gun4 熱烈樣
擎 cing3 ,神氣
創治 cong4 di6 欺侮
掣……人 cua3 lang2 帶……人來
僎 cuan2 準備
逗三仝 dau4 saa6 gang6 幫忙
逗搭 dau4 da5 貼切
逐工 dak5 gang 每天
叨著 dr6 dir4 因為……就是啦
佗位 dr ui6 何處
佇 di3 在
顛誕 ding3 daa2 差錯
恬恬 diam3 diam6 靜靜 踮 diam3 在
條直 diau3 dit 正直
滇滇 dii3dii6 飽滿
搪咧 dng6 lit 正在
搪著 遇到
拄好 duhr4 剛好
蹛佗位 dua4 dr ui6 往何處
迭迭 dy3 dy6 經常
e 的
下晡 e3 bo 下午
嚥氣 en4 ki3 很感慨
吓凍 e3 dang3 能
謳咾 r6 lr4 稱讚
家己 ga6 gi6 自己
ga 一旦
干礁 gan6 dea6 只是
佮 ga5 , gap , giau 3 和
食甲,看甲 ……ga ……得
給 ga5 把 ……
簡那 gana 好像
仝款 gang3 kuan4 一樣
咁吓 gam e6 難道會……
揀 ging4 選
閣卡 gr ka 更加
規(歸)工 gui6 gang 整天
乏錢 ha4 zii2 缺錢
奚 he 那
眩 hin2 昏
彼爿 hit bing 2 那一邊
現主時 hen3 zu si2 現今
歇睏 hir4 kun3 休息
梟悻 hiau6 hing6 不幸
互 給 …….ho3
伏祀 hok3 sai3 尊奉……神
喚喊 hua4 han4 喊
猶未 iau4 ve6 尚未
抑無 ia4 vr2 否則
抑是 ia3 si6 /a3 si3 或是
揚papa iang3 pa4 pa3 很神氣
枵 iau ( 餓 ) 空 ,凹下
臆 ir5 猜
早起 zai ki2 早上
紮傢私 za4 ge6 si 帶傢伙
真忝 zin6 tiam4 很疲勞
真贅 zin6 zue6 很多
一四界 zit3si4gue3/ge3 到處
才好 zia hr4 才好
摯節袂稠 zi4 zat vue3 diau2 忍不住
這 , 这 zit3, ze 這 ……,
這嗎 zit ma5 現在
斟酌 zim6 ziok5 仔細
睜神 zing6 sin2 睡醒
僬 ziau2 全
作穡人 zr4 sit lang2 農人 , 工人
子,囝,囡仔 zu4, gy4,qina4 孩子
忖死 cun3 si4 甘願去死
臹 zy2 非常 …….
空課 kang6 ke3/kue3 工作
尻倉 ka6 cng 屁股
徛位 kia3 ui6 居位在……
酷行 kok hing2 殘酷
荏 lam4 弱
la 啦
闌珊 lan3 san 零星
咧 lit/le/de 在…..(在動詞前)
凌治 ling3 di2 虐待
落尾也 lr3 ve4 a5 後來
li 哩
了然 liau len2 真沒面子
汝,恁,伊,尹 | | 你,你們,他,他們
潦落 liau2 lr5 挺身加入
攏吓 long e3 都會
辣天 lua3tii 熱天
嗯才 mzia 31 於是乎
毋捌 m3 bat5 不曾,不懂
鋩角 mi3 gak5 面子 ,重點
毋閣 m3 gr 不過
毋倘 m3 tang6 不要
爾 nia 6 而已,如此
呤 nia 6 ……的時候
拍拚 拍人 pa4 by3 palang 42 奮鬥 打人
敖人 qau3 lang2 才能之士
扭 qiu4 拉
夯起 qia3 ki4 升起
散赤 san4 cia5 貧窮
踅遨 se3 qr2 旋轉
脞落去 sr2 lr 5 ki5 緩爬過去
時瞬 si3 zun6 時候
稍寡 sio gua4 稍微
上介好 siong3 gai4 hr4 最好
甡張 sii6 diuu 尊嚴
甚過 siuu6 ge/gue3 太過
siau4念 siau4 liam6 想著
嫷 sui4 美
衰 sue 倒霉
衰韶 sue6 siau2 倒霉
細膩 sue4 li6 小心
順續 sun3 sua3 順便
煞 sua5 完畢
啥乜 sy me4/mi4 什麼
摋 tai2 殺
提物件 te3mng3gy6 拿東西
捅頭 tong tau2 出頭
倚 ua4 靠
怨嗟 uan4 ce3 含怨責罵
有倘 u3 tang6 能夠
挽 van4 拔起
沐著 vak5 dir5 沾到
卯一塊仔 vau4 zit5 de5 a5 撈筆錢
目屑 vak 3sai4 眼屑
醜 vai 4
欲去 ve4 ki3 要去
無的確 vr3 dek kak5 說不定
匿 vi5 躲
袂曉 vue3 hiau4 不會
看著 (看到) , 看着 (看對)
\
對有爭議e台語漢字,原則是安呢,噯儘量避免破音字,提高讀音e
精確性,我認定講台語破音字最好降到一百字左右著好,愈常用e字,愈
毋倘破音;以現主時e壹般個仁電腦會使拍字為原則,反對新造漢字,
安呢才袂礙著將來推廣;民間已經「根深蒂固」e用字,應該噯尊重,
只要無違反頂面二個原則,著應該大膽來採用,袂使看人無起;親象用
「返」、「到」、「彼」字,民間用法已深,伴唱帶用法差不多百分之
百,絕對噯採用伊,另外「蠓、喙、跤……」我建議用「蚊、嘴、腳…
…」著好勢;台語e借用漢字,若發現音無準、義無準、詞類無準時,
噯勇敢放棄,譬如「毋通欺騙」e「通」字應該改其它字卡好勢;總講一
句,台語未定型e漢字,上好應該以「讀音單壹,意思單壹」為原則,
倘有肖濫e現象發生。
[ (1)] 以下e字見連橫【台灣語典】:佗位、
、下晡、頻若、創治、無的確、攏會、
闌珊……。
[ (2)] 以下e字見歌仔冊南管文學:袂曉、汝、恁、
伊、衰、散赤、、若是、啥乜……。
[ (3)] 以下e字見【番薯詩刊】:這爿、遐、仝款、
、忝、敖、早起、細膩、挽、了然、
……。
[ (4)] 以下e字見教會文體e台語文:e、m、ho、la……。
[ (5)] 古早寫「有通食有通穿」無妥當,本文做「有倘食
有倘穿」卡合理,「有通」唸[u3tong1],是「有道理」
意思, 毋倘濫落,會誤會li;「通」字,聲、義、詞三項攏無
,應該勇敢放棄,「倘」1993.8.7聯合報第41版有用。
[ (6)] 「水、vai4 ,tai2」無妥當,有e音義攏無,有e無法
拍字,暫時用 嫷 ,醜 ,摋代替。
[ (7)] 「趖」是急行,用在緩行e「趖過田岸」無合理,
此詞需再研究
[ (8)] 「梟倖」台語「不幸」之義, 借字借音.
[ (9)] 「傷過」不太合理,暫用「甚」字,「傷」字音義詞
不良,某字典也為文反對。
[ (10)] 「較有理、較好勢」其實用「卡有理、卡好勢」
卡妥當,「較gau3」字是訓讀,另外有輾死e意思。
[ (11)] 「目屎、鐵屎、薰屎」e正字應該是「目屑、
鐵屑、薰屑」,因為僅若是「渣滓」爾, 毋是排泄物, 毋倘
醜化台語 .真正的目屎是指早晨起床後眼角旁之目屎膏. (這眼屎)
[ (12)] 「遮、遐」e正字應該是「茲、遐」,「遮」字若
音lia/jia/zia有三種, 意思是遮雨,是動詞,故音, 義, 詞,三者皆不同.
台南孔廟皇帝匾「斯文在茲」,證明「茲」是「這裡」。
[ (13)] 本書用一、二、三……表示zit1、nng6、saa1
……,用壹、貳、參……表示it3、li6、sam1……
[ (14)] 「序大」壹詞無妥當,用 “嗣大”比較正確,長幼有序指兄弟, 序音 su6,si6。
[ (15)] 「親像」我建議應該是「親象」像字念siang6 ,像款。
[ (16)] 本書遵照壹般台語文寫法, di+名詞, 咧+動詞,
「di」唸第三聲,「咧」唸第壹聲,lit/let/det求文章系統合理化。
[ (17)] 民間已經「根深蒂固」e用字應該尊重,
如腳、人、甲、蚊、嘴、食……
[ (18)] 「人」「仁」仝款意思,「同仁」著是「同人」
,本書「人」讀lang2,「仁」讀lin2。台語 “人材”指外表五官和 “仁材”指內在學問意思不同 .
[ (19)] 「乞食、食飯」也有人寫做「乞者、吃飯」
[ (20)] 「ng望」,【番薯詩刊】前二期寫「映望」,應該
比「向望」合理。
[ (21)] 睡醒叫「精神」無合理,應該是「睜神」才著。
[ (22)] 「鏘鏘滾」「翩笪」,暫用之,等徵求
閣卡好e字詞,以後本書才來改。
[ (23)] 壹般寫「叨位」無妥當,「叨」字用在副詞、虛字
卡好,「佗位」早著已經真普遍用a。
[ (24)] 「熱」讀let, 「辣」讀lua, 吓凍分別;北京
話講「火辣辣的太陽」。
彰 化 媽 祖
1993.年2～10月 黃元興 寫 (同治九年,彰化地頭1870 e 代誌 ,清朝台灣第一大案)
本書非常感謝歷史權威黃富三教授苦心收集的珍貴資料
第壹章 彰化媽祖, 聖甲吓食糕仔
(1) 彰化媽祖,伊是「彰化南瑤宮」,伊坐位佇彰化市南瑤路
43號,砌廟是清朝初期,時間吊遠離現主時,拍算(大約)二百五、六十
冬走袂去,歷史真正悠久安呢甡(這般) ,若是坐公路車欲(要)去員林、
斗六,踮縱貫線身邊「南瑤宮」彼站落車,著尋(找)吓著,外埠頭e人
客,若是坐火車佇彰化站落車時,上好是叫一台仔計程車, 也叨(因
為)路頭不止也遠li,二公里搭搭,行路25分鐘,拚甲青頭紅面pipe33
喘,「路頭夯燈心,路尾擔稱硾」,有影算袂和啦。
小弟興仔,民國80年7月14去彰化參加台語會議時,也叨鐵齒li,用
步輦(len4)e硬行到媽祖宮,規路無樹無蔭,有影六月火燒埔,頭殼戴烘
爐, hut甲滿身重汗,衰甲叫毋敢去。各位咱茲(zia)鄉親道友,卡簡單e
辦法,若去八卦山憩陶e時瞬,落山時,順路加減去給(ga6)看看e,著無
外遠la,伊是古蹟,亦是宗教e聖地,亦是藝術e殿堂,真有價值安呢。
{ ※ 註 ; 漢字系統, 從國語變成閩南台語系統時, 可能會有些落差和陷阱, 故台閩漢字第二規則, 凡是{1聲音,2意思,3詞型}三者皆不同時, 不可同用一漢字, 以免引起系統的混亂 ( 因他原本就包含三個獨立字), 官版 [ zit這款 , ze這是 , zia這尼 ] 方案不妥, 正確建議 [ 這款 这是 即尼 ] 以茲分別, ( 其中zit音 ,早期台語文章寫 [ 即款 職款 jit 款 ] ) .
彰化媽祖e名聲,雖然無北港媽祖、鹿港媽祖、安平媽祖、台北e
關渡媽祖赫興, 毋閣伊真正有歷史意義, 佇這个所在, 1870年左右,
發生清朝台灣地有史以來,上第壹食力第壹嚴重e官紳政治衝突事件。
阿罩霧e望族林家,效忠清廷,結合滿族外來政權,借機會進攻,毀掉
草屯望族洪家、台中豪族戴家,趁戰爭e機會, 毋但(mna33)摋人燒厝,
又閣進一步佔領仈人辛苦開發e田地,有錢有勢了後, 毋知巴結頂司,
毋知言行收縮(歛),一四界揚(神氣)papa, 僥擺 ueue,「戇面袂曉看三色,社
會返倒無半撇」,致使著爛敗e清廷猜忌、無料理袂煞(完畢) ,驚伊來
起兵作反,海湧風險制服袂稠,這聲殘殘脆脆互汝好勢矣,先落手為強給
(ga5)筴(qee4)去配,藉口民眾落北港進香,當做聚眾謀反圍城,引起天
大地大e政治案件安呢,是一條精彩e歷史典故,其中包括有仁性e痟貪、
官場e陰險、智識e作用、宗教e熱誠、外政權e壓迫……等等東西,咱
來給研究、關心叨是啦 !
(2) 彰化城,南瑤宮彼角勢e地理,坐位臹好勢,伊拄好是台中
平洋(平原)、南投平洋、彰化平洋e三角窗食肉地, 毋管是鹿港方面、
台中方面、南投方面e物件,攏吓使佇這个所在集中散發。
台員地中部所在e地頭靈氣,起起落落,差不多1770～1840年, 奚
是鹿港e黃金時代, 1840～1910, 奚是彰化市e天年, 1910～1980變做
台中市e天下,現主時台中市掌握壹切,伊人贅(多),又閣有錢、建設好
,咱彰化零亂落伍袂肖比咧。
同治九年, 1870 ,彼時台中猶未成立,霧峰號做阿罩霧,草屯號做
北投(坐位佇南投e北爿),台員地互幾落擺外來統治,地名改變臹贅,
宛那無伊法li。
彰化媽祖南瑤宮,是漳州系統e移民所擁護,來對抗鹿港媽祖e泉州
系統,地域觀念佇現主時叨卡輕矣, 毋閣百外冬前「漳泉拚」e時代, 噯
淡薄仔張弛一下,這嗎彰化縣大部分是泉州系,南投占大面漳州系,台
中卡混亂,海線大甲清水等泉系,山線漳系或客人,這佮移民先後時間
有差li。
(3) 彼時代e背景,咱這本冊e故事,發生佇清同治九年前後,
西元1870,彼時瞬e彰化地,佮現主時有啥乜無仝款所在否?这噯稍說明
一下,牽牽互伊清楚,咱茲鄉親嗣大看落卡吓盡磅逗搭(貼切
),來做一款時間外e娛樂安呢甡。
Ａ. 1870彼个時代,中部所在,上鬧熱上繁華e城市著是彰化市, 毋
是台中市,這點噯特別注意,才袂顛誕(差錯)去,台中市是東京話統治
者,一手建立e新都市,發展佇 1910以後e代誌,彰化市是台員話被統治
者, 佇 1720年左右建立e,二者相差欲二百年,咱「魚凡魚,蝦凡蝦,水
龜毋倘濫田螺」才好; 1870, 台員西部,除了府城以外,干礁(ganda66只有)淡
水廳、彰化縣、嘉義縣、鳳山縣,攏總四縣爾爾 ,彼時e彰化縣,包
含這嗎e台中南投彰化三所在,汝看清朝外(多麼)古勞(又土又愚)著好
!
雖然仝款是彰化地頭, 毋閣東京話統治者全力經營台中市,來對抗
進前北京話統治者e彰化市,勢面在穩了後,東京方面改名做「台中州
」,佮百冬前北京方面e「彰化縣」,來給「陳皮蘇黨」(勢均力敵)拍
擂台,尹婆仔卡好咧 !其實二款名稱攏是仝款中部三縣叨著,台員地頭
去互人當皮球踢來ue6去,一絲仔甡張尊嚴叨無,有影这是「人e天年」,
干干礁(ganganda661)無伊法安呢。
Ｂ. 1870彼時e彰化地區,伊e「省城」是佇福州, 毋是台北(或者
台南),因為台員猶未建省, 互福建省界管,所以有代誌欲去省城洽辦,這
聲著噯坐大船,過風湧危險e烏水溝,袂輸去南洋探險仝款, 臹無利便,
另外,彼爿(邊, bing2)福州省城e仁員官員, 宛那 臹無噯來台員島服
務就任,袂輸派去新疆,致使著海峽雙方、政治文化攏袂逗搭,自然dek
誤會贅、衝突奕贅,迭迭咧鋩角(mi3gak5,面子)矯(處理)袂好勢安呢,
又閣福州地講福州話,佮台員話無肖仝,想欲思想交流有影講袂偆車(
沒法溝通), 嗯才(mzia31於是乎)講去省城辦代誌比去外國卡食力li。
Ｃ. 語言壓迫e問題;道理上講,每一个語族,攏有伊e文化尊嚴,應
該互相尊敬疼痛(tytang43) 才著, 毋閣為著政治利益、經濟壓迫,人吓心
肝掠坦橫,目睭起濁,致使講大社惼(欺)小社,鴨母吞塗蚓安呢甡。
台員人,比喻講咱彰化暢e(彰化佬),去省城辦代誌, 佇有形無形e
當中,著吓分做四款民族咧矯袂直,壹等國民著是滿族e統治者佮伊e爪
耙仔(爪牙),揚papa ,擎甲掠袂稠安呢;二等國民著是講北京話e各省民
眾, 也叨官話吓通代誌好做,以北京話做工具來壓迫台閩語族。
三等國民,著是講福州話e省城民眾, 宛那 臹激lai4sang6 (很自
負),台員人落福州辦空課,規路福州仔,腳踏人e地,頭戴人e天,袂假仙
咧,伊是省城li,汝台員人是被統治者,台員話衰簡那lai2仔咧,有影尹婆
仔e客兄公卡好l咧!第四等國民,才是咱彰化暢e,講台員話臹袂互人「
×」咧, 互人看無夠重安呢甡。台員人e文化語言無受尊重,心肝愈激愈
大丸,年久月深做一下biak3(爆)出來,閣再清廷貪污腐敗,致使著後來
戴潮春忍甲袂做e,起兵抗暴有影佇彼个時間安呢。
(4) Ｄ. 滿族外來政權e殖民統治心態:滿族,講滿州話,佮蒙
古族、朝鮮族,攏是亞洲北方e民族;另外一方面,福佬人、越南人、廣
東人是南方民族,民族以文化為頭面(象徵),應該互相尊重體諒,毋倘
大社惼(欺)小社,鴨母吞塗蚓。
嗯才e瞬呤,滿州語系e外來政權來統治講台員話e民眾,著親象韓
國人來管越南人仝款,所以講台員人給滿族逗腳手,做爪耙仔來害台員
人,著等於「越奸」幫忙韓國來害越南暢e仝款,这定著(當然)是真正
食力e代誌,出賣家己同胞e利益, 逶祖公e面子踏佇塗腳兜,有影想落
吓捶心肝,看落吓目燒鼻酸真正了然li。
外來政權e殖民統治,普普也算起來有四項特點, 也叨欺仁甚忝(厲
害)li,致使著被壓迫者,含心gap命,著給伊tin3到搭底,這四項是
安呢甡: (壹)高壓統治,鐵血政策,大屠殺大匪類,橫柴夯入灶硬拗落底
,駛奚鱸鰻癖土匪癖, 搕(kap5)袂著就欲摋,好毋好著欲關, 互茲善良e百姓
不時「搐cuah」e 咧等安呢; (二)強迫同化政策,以政治佮武力, 逶弱小民
族e語言、文字、風俗、宗教、藝術,徹底毀滅, 互伊「食匏仔無留種
」,給吸甲礁礁悽慘溜溜,另外閣給改地號名,互伊袂記家己e民族性
安呢。
(三)經濟上壓迫,頻若有價值e、好空e、食肉e,伊攏占水頭卯了
了,偆一絲仔肉幼仔碎骨pe3, 才留互咱孝孤,逐家做甲欲拖屎連去, 毋
閣宛那乏(ha4)乏乏(貧困)。 (四)強迫移民,一方面來發展母國e文化
侵入,竄筋入骨威威鑽,配合政治勢力, 互殖民文化生根勃穎(ii4,芽)
,一方面嘛吓使監視百姓來做「爪耙仔」安呢甡。
台員地互滿族外來政權來管,講台員話去互講滿州話北京話tun踏
,有影了然也了然,台員人講台員話,信仰媽祖婆,食米食魚蝦,性質溫和
, 愛駛船海洋文化, 毋閣滿族仁士,講北京官話(或者是滿族話),無信
媽祖,食牛肉羊毛e游牧民族,愛騎馬袂曉駛船,吓使講完全無相仝e民
族!
佇這款先天認定無仝e環境之下,台員人去互滿族人統治,著註定
悽慘坐卦互人蹧躂酷橫,當做青柴來騎安呢,台員人有影苦袂了,這聲
含著目屑阿鼻地獄, 互人lir2(橫切) 互人割,殘殘脆脆嘴齒根咬咧,
老身仔這條命強欲互伊賣去矣有影。亡國餓奴, 互異族統治e悲慘實在
無地講。
佇1870彼个時代,滿州政府統治台員e政策真正惡毒,彰化城,或
者是別e官廳機關,所有e道台、總兵、縣令,大官小吏、壹兵壹卒、煮
飯e、箍絡(苦力)……,只要是佮官廳有關者,壹律採用外省人,利用外
省人毋捌台員話佮風俗e特性, 互伊佮百姓互相猜疑袂逗搭, 安呢才
袂叛亂,影響清室e「安定」,尹俍咧 ,汝看殖民統治外lin惡毒著好!
另外一點,著是彰化縣e縣令,差不多1～2年著換矣,尻倉坐猶未燒,
著欲踉港(lang4gang4,逃避)矣,汝看縣政是欲na建設著好!續落e瞬呤,
外省派來e官員, 毋捌台員話佮風俗,致使真贅公文空課, 噯透過「買
辦」來完成,一項代誌噯透過第三者來返捯(處理),中間e摯接運轉、
出出入入,加減吓互人歪哥(貪污)抑是變質變形, 嗯才咧講做官e人逐
傢歪篙莿斜(cua4),下腳e人嘛是「有樣照樣,無樣家己想」安呢,致使政治
欲na袂腐敗爛敗la ?
1850～1870中間,彰化縣(代表現主時台中、南投、彰化三縣)吓
變到三年小亂五年大亂,這完全是清廷外來政權,飯桶掛車輦,低路e腳
siau3來得應著e。
也叨(因為)彰化城內e大小官員,壹律採用外省人到地也,致使著彼
時台員e官民對立,省籍恩怨,真正食力真正嚴重li,清朝既然看輕台員
地來講,這聲台員人「紅龜皮」汝著liu4liu4liu3 ,汝看外衰著好,台
員人ga著皮噯繃(bii6)卡拫(緊, an2)以上,有影著噯提心吊膽,不管
時吓去互人出賣e危險性, kia3算講前途袂定性,不時嘛驚兮咧等
安呢甡。
到到互我掠準準, 1895, 嘛才二十捅年呤, 北京政府戰輸東京政
府,真慪搭,伊毋願逶仝是北京話e山東半島割互阿本仔, 自那
逶講福佬話e台員地割互人,尹俍卡好,「仈人e孖死袂了」,外來政權e
毒行恐怖,汝看有影抑無影?
(5) Ｅ. 彰化官僚惡性循環 {註:本文所講e「彰化縣」
壹詞,等於是代表台員中部全部,因為1870年,除了府城外全省西部才
淡水、彰化、嘉義、鳳山四縣爾, 彼時彰化縣佇現時e台中、南投、
彰化三位地號縣名} ,因為官員壹定噯採用外省人,致使吓產生二
項真正梟悻e後果。
第壹,官員來台員, 噯經過風湧危險e海峽,自來文官驚死,所以無
人願意來就任li ,連欲叫伊來貪污卯錢,伊著袂qen4來矣,欲na有心情
來服務處理公文?致使講來台員地e外省清朝官員,素質攏臹慪搭(劣級
),「有清壹朝」除了劉銘傳卡吓看e以外,其他攏是王哥柳哥,全全烏
魯木齊e抾規班安呢 ,這款情形,佮新疆e清朝官仝款,無倘好空啦 !
總講一句,派去邊疆e官員,大部分攏真低路飯桶叨著,其它方面,
語言e顛誕,風俗食蹛e差別, 宛那真頭疼,來台員做官,比去監獄關閣
卡艱苦li ,所以講台員地壹直「叛亂頻繁」,實在是 「其來有自」啊!
家己擔肥毋知臭,滿族外來政權a,卡差不多e 啦 ,尹俍e客兄公卡好,
家己四兩ng仔噯稍除e 啦 !
第二,因為官員佮駐軍攏噯外省人,致使台員人佮外省兵,不時花
閣閣話袂逗搭,軍民不時嘛咧冤家讓債,阿兵哥「秀才拄著兵,有理講
袂清」,自然dek「一四界叛變」安呢叨著啦 ,尤其1896日本兵,依照馬
關條約入台員e時瞬,講廣東話e清兵佮講東京話e日兵,來來去去, 互
咱茲講福佬話台員人,鴨仔聽雷,產生認同上e大問題, 毋知欲倚
(ua)佗一爿卡好li。
也叨以上種種e關係,致使原來台員e清吏,素質真vai4,進一步來
sy3(誘)著台員人革命e可能性,這著是官民之間產生一系列e「惡性循
環」,官吏貪污、民眾散赤、民眾飢餓、民眾反抗、聚眾革命、清兵
大力鎮壓、清官、台奸聯合大屠殺台員人、「局勢」穩定矣、繼續清
官吏貪污、……(以下循環仝款)
佇清兵鎮壓e當中,因為語系袂通,所以「儘量摋, 摋到手軟」,
台員人冤仇壓縮,當做下回仔反抗e酵(gaa4)母,所以講活佇清朝統治
下e台員人,袂輸活佇地獄仝款,無甡張、無前途,一世人「水流破布,
艱苦坐卦」安呢,這个背景對本書e故事發展,真正要緊。
台員人e革命起義,完全是「官逼民反」e結果, 佇茲總講一句,滿
族仁士是一个「四肢發達,頭腦簡單」e低路民族,台灣人拄著魔王,有
影衰lai6仔咧, 嗯才講清朝外來政權e酷橫,有影互汝袂鐵齒咧。
{{(6)}} Ｆ. 清官缺欠智識,是壹切悲劇e根源,清朝官吏e基本智
識,甚過了醜啦 !有影醜甲有偆去,醜甲無聲無示,想落汝吓捶心
肝li ,有影叨干礁無伊法,事變e時瞬是同治九年,西元1870 ,離現
主時真近安呢,彼時世界e文明科學已經真正進步矣, 毋閣咱e清官大老爺
,除了「之乎也者」遐無路用e文以外,對世界e新智識,有影一絲
叨毋捌, 嗯才講互清朝官來管,親象用青瞑牛來駛車,仝款危險安呢甡,有
影叨梟悻(不幸) li。
(壹) {政治智識e乏搭}(ha4da5,貧乏), 毋知三權分立e道理,迭
迭佇行政、司法分袂清,致使官官相為政治腐敗無半瞥安呢, 對國家建
設、教育、治安、經濟發展,完全外行,變無輦(len4) l啦!
(二) {科技智識e乏搭}, 佇 1870 e時代,吊遠 Isac Newton (
牛頓)發明微積分 1670 已經二百年矣,清官一絲叨無警覺,免講代數三
角攏毋知影,拍算連「△面積＝底×高÷２」著袂曉li, 這款e素質欲
佮日本官員比較,一丈差九尺,欲na吓孝孤拄e la !甲午戰爭,北京話
系吓拍輸東京話系,我看佮官員本身e智識水準有關連安呢。
(三) {{民間e交流有困難}}, 也叨(因為)官員攏全外省,致使語言
、文化、公共衛生、藝術、宗教、謀生……種種袂逗搭,見事一層膜,
對民間完全外行,汝是欲按怎去統治著好呢 ?
(四) {中央官員e腐敗},壹直咧鬧笑詼,三十冬前名作家柏楊佇
自立晚報寫散文,有一篇寫到清官腐敗無材調,伊講,有人去歐洲返來,
寫一篇報告上奏,『……臣考察德意志、法蘭西、西班牙……諸國國
政……』,某清官大臣批曰:『若說法蘭西、葡萄牙還有道理,怎麼會有「西班牙」這个東西呢?「西班」會長牙,豈不千古奇聞!』眾位咱
茲鄉親嗣大,這款下消扮e,咁吓孝孤拄e是毋?
{{(7)}} Ｇ. 清廷壹直掠番薯仔(台員人),是一个真正低路e「劣
等民族」,台員島孤軍徛佇太平洋當中,以北京e標準,簡那新疆抑是雲
南,彼款e邊疆低路民族,一个人先天著互頂司看無夠重,後日仔日子欲
na有前途安呢生?滿族是一个北方游牧民族,欲na看食米食魚e民族吓「
就gir 5」li ? 台員人所講,『汝看我pupu 14(灰色) 也 ,我看汝霧霧也』,犀
牛仔照角,迭迭嘛咧矯袂好勢安呢 li。
有一擺台員人揀選土檨仔就北京朝貢,心肝內想, 即尼 (這麼
)好食e物件,壹定吓得著謳咾才著,無想著「割肉互人食,人猶嫌臭臊
」安呢, 北京皇帝批示「知道了,以後不用再獻此物了。」態度真正拗
蠻無禮,台員人舞著這齣e,有影衰甲叫毋敢叨著。
因為北京話e統治者,自來著看輕台員暢e,致使著甲午戰後, 毋願
逶仝款話語e山東半島割讓, 遂(sua) 逶講台員話e台員地割互東京
話新統治者,汝看茲滿州暢e有可惡抑無可惡。……I抑若講到滿州政權
按怎凌治台員人,按怎剝削台員經濟,按怎來破壞台員文化……等等東
西, 佇茲我無噯寫甚贅,橫直逐傢心肝內了解著是啦 !
{{(8)}} 以上幾點給看來,活佇 1870年代e彰化人,有影艱
苦坐卦,真正梟悻歹死德li, 伊噯受著食穿e壓力、受著破病e威脅、
受著土匪e搶劫、受著高山族e反抗、受著惡毒政府e統治、受著台奸e
蹧躂,致使講一个人欲生活, 噯拄著十外款e外來壓迫,這,著是咱e祖
先e乏搭款(困境),這嗎想起來, 宛那真正感慨無量目燒鼻酸,有影li
。
台員人為著欲生存,明明知影面頭前是刀山火窟,這聲逼著矣,姑不
而衷,殘殘脆脆互汝做二塊,港潦落去矣,有影無潦袂煞,致使真贅人變
做冤鬼真拍損li。嗯才講台員人毋是驚死袂曉欲惜命,實在是環境甚(唸
箱)過了歹紡,甚歹剃頭安呢甡,明明知影這坵田有毒蛇,伊嘛認真去開
墾,若是咬死宛那擔輸嬴li,橫直無做嘛是枵死,有做加減有活路,明明
知影治安無好,伊宛那勇敢行落去,死嘛認命甘願安呢,橫直無行嘛是餓
肚,明明知影官廳惡毒,伊宛那認命去作穡納稅,橫直噯飼嫫囝,這口喟
噯吞忍。
明明知影反抗官廳吓悽慘,伊宛那「起義」佮官廳拚到底,毋是毋
驚死,實在無法度,明明知影起義反抗清朝外來政權,吓殺身之禍,伊
宛那潦落去,到時自然有台奸吓來給收拾,白骨一堆, 互人做「功勞」
……,台員人,艱苦啊艱苦,「嘀噹時仔,吓凍食著竹塹餅?」(何時吓凍擺
脫運命枷鎖)
也叨(因為)安呢甡, 嗯才這本冊寫e故事,看起來真正悲哀,台員語族
e人,受著滿族外來政權tun踏,家己摋家己,結局家己又閣互人摋,一
場閣一場e悲劇,來蹧躂台員人e心靈安呢,台員人ga艱苦以上,最後e結
局,著來走尋「神明」解決,神明佇彰化縣,自然dek著是咱彰化媽祖
---南瑤宮li。
南瑤宮吓出名,吓靈聖,聖甲吓食糕仔,著是這陣講福佬話e台員人
,隨人心苦病疼所反應所祈求e結局,南瑤宮香火赫尼興,煙霧罩天,代
表咱族群e傳統精神,伊所包含e歷史意義,真有價值咱去探討。
南瑤宮e廟內裝叉真古僕,真有古蹟藝術價值,真古早e廟味,全台
員地十幾間媽祖宮,我感覺南瑤宮上介有藝術價值,咱現主時所看著e,
宛那保持一百年前e廟貌,真正是壹粒壹e古蹟,小弟心肝內真感心安呢,
佇茲想著咱北部e「關渡媽祖」,壹再改建閣改建,雖然外表「金璧輝
煌」, 毋閣一絲著無古蹟氣氛,有影心肝內著真正酸li。
第貳章 效忠滿族, 翩手底肉互人看
(9) e瞬呤,台員中部這角勢, 佇清朝二百外冬e當中,有一个家族真正興旺,有錢有勢面,伊著是「阿罩霧林家」,咱這嗎去台中佚陶,攏 吓順續去「霧峰林家花園」看看e ,霧峰林家花園,坐位佇台中縣霧峰鄉民生路24號,離台中車頭7公里,省議會彼箍圍仔附近叨著。
規个林家花園分做景薰樓、蓉鏡齋、宮保第、萊園,大規模花園水池,又閣有石匠藝仁e徛(住, kia3)房,規模真 正宏偉曠闊,咱台北板橋e林家花園,無法度佮伊比憑安呢,毋閣真 正拍損, 也叨年久月深到地也,有e樓厝慪爛破相,甡銹臘介,有e厝屋(ok3),無甲意人去參觀,風聲講遊客卡濫糝(放蕩隨便),叨無公德心li,烏白亂sa(拿)破壞古蹟真贅,頭傢這爿面真正哭苦,百姓 宛那無法度, 佇茲寄望有關
單位,動用仁力物力來整修,來保持這个偉大e文化遺產, 安呢才著。
霧峰林家e故事,發生佇咸豐同治年間,大約也1860～1880之間,林家e發展佮林家e落坑(衰敗),攏真正富有戲劇性,這算苦齣e,身為番薯仔(台員人)以上,這款代誌空縫,袂使 毋知叨著,算講台員人有台員人e甡張,歷史親象一座明鏡,其中e心苦病疼生辰百款,咱隨人噯記稠心肝芛仔內底才好。
阿罩霧(霧峰)所在e林氏家族,開基祖大概是乾隆初期1740左右,逶福建省漳州府五寨鄉埔坪村,唐山過台員,「移民」來台員中部討趁,經過四代、五代e拍拚開墾,開山園,闢塭田,宛那粒積有千外甲田園e款,變做中部地區,上第壹好額e家族,經過一百捅年e開發,其中亦是花費真贅苦心,儉腸筴肚做甲艱苦坐卦, hut甲大粒汗細粒汗有影li,對內噯安排族親e生活起居, 互眾人食飽穿燒,對外噯排解漢蕃糾紛,因為蕃族仝款「有嫫囝噯飼」,逐傢為著生活,真正拚勢li。
霧峰林家望族,到清道光年間(約1840左右),規族分做二枝系統,(
壹)下厝e林定邦嗣大,以下有林文察、林文明; (貳)頂厝e林奠國嗣大
,後代有林文鳳、林獻堂……。族民真「合和」(團結), 毋na作穡(農事)
生產真拍拚,對武術拳頭刀槍,閣卡堅心苦練,致使講林家子弟兵,是一
隊做文臘武,戰鬥力臹強大e超強軍隊。
踮中部地區,喚(hua4)水 吓堅凍,揚(神氣)putput,真正「無人敢
搧伊e腹肚邊」,也叨台員島孤徛外海,唐山彼角勢稍可有風聲著,
才咧講「烏矸仔due豆油」叨無地看li。對林家按怎 吓來大尾,壹直想
袂曉li。
(10) 下厝e林定邦嗣大有三个囝,大後甡叫林文察,貳後甡是
林文明,攏是真將才,文武雙全e「大色貨」,仝款「喚水 吓堅凍」安呢
甡。西元1848年,道光28年,阿罩霧林家真破勢,來發生了梟悻,造成傷
亡事件,彼年e瞬呤,林文察十九歲,林文明十七歲,林定邦嗣大掣
(cua3)著林文明,去解決「和尚盛仔來揩油大條錢銀」e代誌。
代誌源頭是安呢甡,阿罩霧e隔壁庄號做草湖庄(現主時草湖芋冰壹
度贊e),有一位林連招互人揩油(勒索)一百兩銀,林家看落臹袂做ea,惱著矣, ga
去互小仁激著以上,這聲港無潦袂煞, 嗯才(mzia31於是乎)「殘殘脆脆做二塊」鏘落去,佮伊拚一斗仔,老皮配伊e凊肉笪安呢。
這聲林定邦嗣大掣林文明,仝齊做伙去尋和尚盛仔理論,逐家面對
面講一个仔透枝e,若欲「花」著「花」一下仔卡有咧,無想著這个和尚
盛仔無甡張, 遂 (sua)來見羞返想氣,起慪韶面安呢歹歹叫,理由講輸人,
自那夯刀逶林定邦嗣大給摋死,另外林文明亦受傷, 互人關佇籠仔內
,這聲代誌大條囉 ! 堂堂e阿罩霧頭兄,林定邦嗣大,竟然 吓去互一个
和尚仔害死,真正「天公翩爿矣,魚溜變龍矣。」有影尹婆仔咧,豈有此理
!
下厝林定邦被害身亡彼年是1848,拄好「鴉片戰爭」後第8年,大
後甡林文察 嘛才(也才)十九歲爾爾,这對霧峰林家豪族來講,是一層
真悽慘e大打擊,林家強強欲摯接袂稠安呢,林文察本來想欲婁(lau4)庄
內兄弟去報父仇, 摋掉和尚盛仔, 安呢鋩角才矯 吓返來(面子才能扳
回來), 毋閣想著小弟林文明, 猶互和尚盛仔押佇籠內,為著小弟e
性命, 嗯才姑不而衷退一步,強忍悲苦,向凶手「和尚盛仔」,好嘴給
(ga6)姑臹(請求) ,退回父屍佮小弟著好啦。
若講著這層代誌壹般書冊, 臹給凶手「和尚盛仔」大罵嚷, 毋閣
咱噯冷靜,和尚盛仔若是有心欲摋死林家,著殘殘脆脆(乾脆)逶林定
邦、林文明全部摋死以斬草除根,是按怎著留林文明活落來? 另外一
點,林家來討「父屍佮文明」e時瞬,和尚盛仔明知壹旦討返去了後,林
家「仁多勢眾」必來報仇,伊宛那毋敢「裹脅仁質」遠走他鄉,目睭金
金人傷重,甘願潦落死路,宛那願放林文明,可見和尚盛仔,拍算無想
像中赫歹。
真正e情形,可能是林定邦佮和尚盛仔扭打,林聲勢甚狠,和尚盛仔
對抗時,失手摃死,這款代誌社會迭迭 吓發生li,現時既然ga發生命案
以上,這聲著天大地大,真歹剃頭也 li,所以世間e代誌,一開始著噯理
智來矯摵處理, 毋倘舞甲「大武公孔」矣,袂收山攬尾時才來哭苦後悔,
咱茲少年仔,毋倘鐵齒呢 !
(11) 林家一時間天災地變,洶洶死去了家長林定邦嗣大,家
道悽慘落魄,這對一个有錢有名聲e大戶來講,有影歹失六德(極慘),身
為大後甡林文察,彼年才19歲爾,有「殺父之仇」li,這聲天內無崁,
嘛著噯跁去,對方和尚盛仔拗蠻鱸鰻人 hen3, ga欲「出注」(挑戰)以上,
宛那港無潦袂煞,絕對噯報仇鏘到底, 安呢鋩角才矯 吓返來,安慰先父
之靈,來伸張社會正義, 抑若無,社會是欲按怎徛起?
清朝年代,这著是做台員人e悲哀,冤冤相報何時了?無外久e中間,
林文察、林文明兄弟,肖招來到彰化縣衙,提出告訴,講和尚盛仔摋死
尹老父,欲申冤安呢甡,彼時e彰化縣衙管現主時e台中、彰化、南投三
縣地頭,清朝道光皇帝身體真虛,欲死動亥(haai3),官府真正敗爛,行政司
法袂清明,社會正義袂凍伸張。
官府一下看,二个破少年仔十外捅歲,就府告訴, 自那「狗咬衰人
」無咧給信斗,『啊!煞煞去啦 ,社`會顛誕袂好勢,死一半个人,無到佗
位去啦!準拄好啦 ,返去返去!』林文察、林文明兄弟, 自那 互人逶
官衙給「qetlau車畚斗」(趕出去),官廳ga無欲處理以上,林定邦一條
命白白了去。
林文察真正夯狂, 掣(帶)著16歲e林文明小弟,行來到彰化城外e
南瑤宮,來媽祖婆面前咒重詛,林文察三枝香點咧, 口中sapsap唸,『
官廳ga無欲主持正義以上,弟子為著伸報父冤,只好咒重詛,絕對噯掠
著凶手以冤報冤,無放伊煞, 互伊激著矣 ,港無潦袂煞,實在是干礁
無伊法,才來行險路,神明在上,望汝保庇……』
1849年,林文察、林文明兄弟,糾合鄉中親族仔,咱茲庄內e子弟兵
,普通時仔練硾比武,夯重牽摩,拚甲一身軀銅身鐵骨,某一日透早呤,
天未光狗未吠e時瞬,林文察一陣人,衝入去和尚盛仔厝內,制服了下腳
手仔,逶和尚盛仔縛到林定邦墓前,刺刀摋死,報了父仇,續落e瞬
呤,林文察自動向官衙投案,無噯連累著仈人……。
這聲林文察噯坐獄,判定「無期徒刑」,一氏人抾角(完蛋)叨著
啦,汝同情亦好,無同情亦好,總是也,老父無端悲慘,死 嘛著噯潦,無死
呤著潦,做人「身不由己」e梟悻艱苦li。
(12) 若是普通仁家,這棚戲搬到茲,著噯散場矣,庄腳人這款
戲齣不時 嘛咧搬,無啥乜稀罕安呢,報仇來報仇去,相信咱茲親愛e鄉親
嗣大, 宛那無噯看li, 毋閣咱林文察、林文明兄弟,確實是天縱英明,
天公伯仔欲晟(cy3)一氣,卡好汝拚斗規世紀,人奚八字靈氣叨有夠遐
li, 抑無我這本小說,著噯收笪縮起來矣,這聲趁無食矣 he!
俗語講『時代創造英雄』,有時福氣若到,有影半暝汝叨閃袂離
安呢。咱林文察拄著好時運, 毋但(na3)獄牢籠仔內e坐罪閃無矣,顛
倒閣再創作戰功,做官封祿,光宗耀祖,今仔日汝去霧峰林家花園,景緻
宏偉兼幼秀,真正風光,啥人 吓想去林文察食無錢飯e過往?
逗底林文察是按怎時來運轉呢 ?天地欲造成,枝草點露,有影有時
叨 吓福運罩頭, 1850年～1851年,道光皇帝e健康是醜甲袂講e 醜 e
坎站,道光過身,咸豐繼位,新皇帝daa2(剛)坐位呤, 無「捍(hw3)頭
」(掌權)e行政經驗,皇宮朝廷不時嘛脫線袂直,鴉片戰爭失敗,國家元
氣臹虛,深宮大內dng 6咧驍悻e流擺,又閣來舞著「太平天國」反
叛e大齣頭,清廷政權險險倒笪唗路,「厝頂漏拄著風颱雨」,清廷扶東
擔西,強欲袂直有影。
彼个時瞬,台員島方面, 宛那厚頭路(多事之秋),台北附近, 毋但是
「漳泉拚」,拚甲天昏地暗,另外有號做「小刀會」e團體,來起義反抗
爛敗e清朝統治, 1854,咸豐四年,清兵苦戰太平天國,曾國藩佮李鴻章
hut甲起散pu3(拚得一身忙) ,清朝國內叨咧欠兵丁肖摋矣, na有法
度閣再派大軍來台平亂?
嗯才e瞬呤,清宮方面e最高指示是安呢 :以台制台,就本地人召集
台勇來滅台亂(小刀 吓之亂) ,等台亂平定了後,才逶台勇徵回大陸,助
清兵來拍太平天國安呢。
清廷這款慪韶(惡劣)步e ,雖然對台員人足不利e, 毋閣對林文察彼
派e人,這聲叨得著暗助,踏著時機欲出頭天矣!論真講起來,林文察著毋
是啥乜歹人li,干礁為著父仇,姑不而衷潦落爾,算起來宛那值得同情安呢甡
。總講一句,時代造英雄,林文察有望矣!
滿清最高e策略,既然是「以台制台」,揀選台奸來摋台員人,
徛欲做「無錢生理」啦 ,用仈人e手骨來掙石獅,阿滿仔坐收「漁翁之利」,滿族啊滿族!汝這个外來政權實在有夠惡毒呢 !汝弄狗肖咬,苦 毋講「仈人e囝死袂了」,家己才匿踮壁後偷笑,實在尹俍客兄公卡好,講落著袂堪兮氣安呢,番薯仔互人蹧躂甲無聲勢,有影心肝內一腹火, 咧鏘鏘滾,想著叨刺cak li。
西元1854年,台北地區發生泉州內部e肖拚摋,艋舺e三邑人,給
同安人佮安溪人,趕到大稻埕,社會袂定著,人講「一年動刀兵,十年袂
太平」,北部所在,一四界梟悻,有一个號做「小刀 會」e神明團體,趁
這个機會起義,仁仁志士,茲羅漢腳仔,各所在響應,紛紛夯狂,來對抗
官廳e腐敗統治。
彼時瞬淡水廳e長官,無法度應付, 自那對府城台南方面,求兵來
平「亂」,庶當時仔,中國大陸dng6 咧太平天國革命, 1854左右,清兵去
互洪秀全攻甲pepe喘,強欲袂收山攬尾咧 ,「家己揹黃金,欲na給人看
風水?」清朝方面致使講台員平「亂」e代誌,著由北路副將曾玉明來負
責,策略佇進前有講過,「以台制台」,掠台員人來翩(翻)手底肉,家己摋
家己,所有e功勞, 才算滿族外來政權,統治者e叨著啦 !
副將曾玉明欲尋(找)一个武功高強e「忠貞愛國份子」,來給清朝
剷亂逗腳手,實在是真正硬斗e代誌,咱講一句卡無輸嬴e,一个人想欲
做台奸,絕對無赫簡單,身軀邊無貳步七仔 猶 無奚資格呢,曾玉明將
軍尋閣尋,最後尋著一个真適當e「仁才」,伊正正著是林文察這位勇
士,咱文察宛那好狗字運,踏著機 會突破草笠出頭天,免關規世人啦,
抑無咱這本【彰化媽祖】恐驚也著寫袂落去矣。
毋閣話頭矯返來,日後林家兄弟一氏人e悲慘了然,恐驚也比入獄卡
慘了,这就是互人利用,做人奴隸、做人走狗e必然悲劇, 佇茲我
宛那真給同情li,林家e梟悻, 毋是尹一家人悲慘爾,是咱全台員人e悲
慘,一个無甡張e族群,是 吓連相續一路衰到底叨著。
清朝北路副將, 吓甲意著獄中e林文察,有四點理由。(壹)林文察
原本著 毋是歹人,是因為殺父之仇, 嗯才姑不而衷潦落做案,有真正不得
已e苦衷,明知 吓一氏人坐獄, 宛那 噯忍受li; (貳)林文察佇阿罩霧
所在,為著抵抗族敵佮青蕃,練武打拳e風氣, 臹熱噗噗,伊e子弟兵戰
逗力臹強安呢。
(三)林文察家族有錢閣有人,喚水 吓堅凍,財源豐富, 吓凍減少官
府e開銷,這點真正要緊,因為「戰爭首重後勤」,無錢無鍼,著無法度
「平亂」;(四)林文察是待罪之身, 毋敢「乞食揹葫蘆」,假仙叨著啦,
這款人卡 吓效忠清室,「將功抵罪」,毋但講摋和尚盛仔e罪 吓取消,
顛倒閣 吓升官發財, 吓大尾好額溜溜。
清朝干礁撣出一二枝肉骨仔,著 吓互林文察這隻狗仔搶閣搶,清
朝一絲叨無損失,遂吓凍換著死忠e勇將來逗捙拚,清朝無論佗一點
來看攏是大卯,台員人無論佗一方面看攏衰韶,汝欲起義,自然著有「
西瓜偎大爿」e人來收拾汝,看汝敢假仙否? 清朝干礁一張紙,來委任
做官做建(做官做胃),汝著拚生拚命,家己摋家己,翩手底肉互人看,
想落著嚥氣。
(14) 有一工,北路副將曾玉明,親身來到地牢,探看林文察,
伊講『文察兄,免驚,亦免禮,小將看透天下英雄志士,叨干礁汝文
察兄上介氣魄、上介磊斗(優秀),這款e仁才囥佇(放在)大牢,真
正拍損li,強強真珠欲囥甲變齧鼠(,老鼠)屎安呢,我有意思欲給
保出來,憑汝kiang4腳e武功,來報效國家,維持社會安定, 毋
知汝有意思抑無 ?』
這聲林文察,一下聽著欲交保放出來呤,歡喜甲袂講了了,辦pe6(
原以為)叫是這氏人抾角無望矣, 老死大牢,這嗎有將軍欲來保釋,恢復
自由, 嗯才續落e瞬呤,屈身跪拜,大聲感恩『真正勞力將軍, 互我這
个自新e機會,在下不黨(but1dong4),若有材調來報效國家,絕對唅心
gap命挺搭底,粉身碎骨肝腦塗地叨甘願li, 噯認真拍拚搰力,來為國
為民謀福,洗清我以早e匪類歹德, ga 互將軍乙著(厚愛)以上,無論吞
銅食鐵艱苦坐卦我著潦,閣卡刀山火海我著跳,小弟雖然飯桶來講,到
茲來a,宛那著跋氣魄組e叨著啦……!』
嗯才e瞬呤,官廳兮北路副將曾玉明,保釋林文察出獄,了後林文察
返去家鄉,招兵買馬,領一枝四、五百人e子弟兵,投靠曾玉明將軍,效
忠大清政權安呢甡。彼年拄好是咸豐四年,大清帝國搪(dng6) 咧為太
平e代誌,舞甲滿面全豆花, 佇台員有倘抾著一枝強兵,宛那袂醜啦 !
咱林文察返來到阿罩霧血跡地(故鄉),規个庄頭he3he3趒,鏘鏘滾
, 也叨公子爺返來矣,這聲轟動武林驚倒萬教矣,厝邊頭尾規庄頭僬(全
)ci3倚來給恭喜,袂輸迎媽祖咧割香, 臹鬧熱,牢獄關四冬, 吓凍互大
官保釋,重入江湖,有影天賜e福氣,林氏家族,下厝佮頂厝系統,僎欲
摋豬公來慶祝一番,去除衰運,林文察佇三、四百鄉親e擁護以上,食
了豬腳麵線另外掛紅彩布,另外倩人看日子,欲去彰化媽祖南瑤宮,燒
一下仔香咧,兼補運兼去邪,順續組織一隊子弟兵,來協助清朝皇室平
「亂」。
因為這嗎清朝搪咧衰韶(倒霉),互太平天國纏腳絆手,腳手展袂
開,趁清室上介危險時來給逗腳手,後回仔升官卡有可能, 安呢著 吓互咱
林家永遠權勢有扮,富貴萬年,以報答林家歷代祖先e福蔭,咱阿罩霧林
家永遠是台員地上第壹優秀e家族。
(15) 1854年,舊曆貳月19日,林氏家族一行人,到南瑤宮就香
,下厝方面,由林文察、林文明兄弟統領,(林定邦已亡,所以缺席),頂
厝方面由林奠國嗣大(林定邦e大兄),統領後甡林文鳳(後來林獻堂e阿
伯),林文彩仝齊就香。林家厝內好額,牲禮四果香燭僎甲真贅,另外又
閣捐獻袂少錢銀互廟方,典禮真正隆重。
也叨彰化媽祖真聖li,聖甲 吓食糕仔,這擺林家有求媽祖婆,主要是
欲救國家平亂,維持社會治安,有欲來效忠清朝皇室e意思,趁現主時皇
室搪咧受著太平天國反叛e大艱苦,來效忠清室,無定著清室 吓感恩,後
日仔咱阿罩霧林家才 吓浮頭, 吓大葩尾旺廣安呢。囝孫萬代富貴,有
勢有權,永享千秋叨著。
求拜媽祖婆,分三層階段,一項一項照步來。頭先是接神,供酒供
茶燒香跋杯,嘴內唸唸有詞,閣再來是求神,仝款步數, 逶汝心肝內e祈
求講出來,若跋有杯著知影神明有歡喜,若跋「愛笑杯」, 噯稍等一絲
仔, 才閣祈求,落尾仔步數是送神、燒金、解籤等等東西,舞前舞後,
cen3欲規个時辰。
這擺求彰化媽祖,得著三項結論,第壹,阿罩霧林家, 佇下厝林文
察、林文明,頂厝林奠國嗣大、林文鳳逐家出錢出人出力,仝齊支持皇
清官廳兮,消除地方叛亂勢力,維持社會治安, 互眾生平順過日安居樂
業安呢甡;第貳,漸漸大漢e林文明,送入去彰化武堂讀冊,培養咱林氏家
族e軍事仁才,有法度來光宗耀祖,大葩尾旺廣;第三,咱林氏家族若有
求著功名, 噯趕緊砌宗廟、砌花園、砌大厝, 互咱林家e名聲財富,流
傳萬世。
拜煞了後,規陣仁馬拚返來阿罩霧, 佇下厝所在摋豬公搬大戲來
慶祝安呢,透暝透日咧唱歌納曲,規庄頭鏘鏘滾,歡喜ueue,茲
親族仔看著頭傢返來,是嘴笑目笑,逐傢暢甲逶心肝芛仔入去,除
了祭拜天公、三界公以外,又閣宴請茲少年仔,飲了三暝三日,逐傢燒
酒灌落,飲甲真起磅真逗搭,魚魚肉肉是推甲叫 毋敢,卯一下仔臹工夫
叨著。
(16) 曾玉明將軍,按算佇1854年中秋了後,出兵台北,平定
小刀會亂事,這聲林文察糾合庄內兄弟,拍算三百外人e款,另外又閣去
外位仔,揀一寡少年傢仔,叨頻若羅漢腳仔,無頭路e,茲鱸鰻人獻歹囡
仔,召集過來參落濫落,差不多五百人e腳兜仔(樣子),分做五營,暝日
操練, 推閣再推,教尹戰事肖摋 e技術,欲給訓練做百戰百勝壹度
勇e步兵安呢甡,這方面e空縫,伊真正有扮有勢真正成功li。
咸豐四年中秋暝(1854),林文察綰一罐燒酒, 婁孤帆兮,單超壹
個人跁到厝後山崙仔頂e涼亭仔,去消涼秋稱,伊無心情賞月食餅東西,
干礁對家族皇權、家己e前途,真正煩惱,是安呢操心扒腹,不時 嘛驚
兮咧等,林文察彼年拄好25歲,想著這五、六冬以來e心苦病疼,有影
是串竄筋入骨威威鑽,真正吓搥心肝安呢。
燒酒一下灌無二嘴呤,規个腹內鏘鏘滾離gaga,親象萬箭攻心,
嗯才目燒鼻酸,心肝頭凝(恨,qing2)閣再凝,是按怎我文察做人運命 吓
即尼薄,八字 吓即衰,衰甲種匏仔生菜瓜安呢,有影天公欲創治人啊創
治人,家族互人惼(欺),阿爹互人摋死,官廳兮大細目,潦落報冤仇,關
獄坐牢,踮籠仔內衰尾……唉!
一棚閣一棚,親象走馬仔燈咧se3遨(qr2,旋轉),平平富貴子弟,按
怎袂凍親象仈人來開跋食穿, sng cua4仁間,我著來坐規氏人e牢獄
,有影愈想愈怨嘆,愈想愈激心li。
老父去夆摋死,才48歲爾, 我做囝兒e,無拚袂煞,這是倫理,
社會ga欲行到地也,這个苦齣e絕對袂使漏喟eli,明明知影報父仇
, 吓換來終身監禁關到頭毛嘴鬚白, ,抑若是死刑一條,宛那刀山
火坑噯潦到底,到時才拍算啦。
「時到時當,無米煮番薯箍湯」,这是無治安、無政府,外來政權
必然e悲劇,怨嘆亦無卡擢安呢, 佳哉曾玉明將軍e疼痛,保釋出來,後日
仔,壹定噯堅心決意,唅心gap命來效勞清朝政權,來報答曾將軍e救命
之恩,重新來發展咱林家e名聲。
1854年冬尾, 佇林文察統領四、五百子弟兵e勢面之下,曾玉明將
軍真緊著, 逶台北彼角勢e「小刀 會」動亂平靜落來,林文察立大功,
曾玉明將軍歡喜ueue,暢甲心涼脾透開,這聲袂坐戇矣,借仈人e拳頭掙
石獅, 也叨台員牛有影好駛li,閣卡按怎戰,橫直是台員人摋台員人
爾,「死道友,無死貧道」。
外省派來e大官,宛那坐甲爽爽爽,提一點仔官位、一絲仔肉幼仔
, 互台員人「嗆」(啃嗑),台員人著乖簡那狗le ,為一絲仔錢銀,台員
e散赤人,著 吓去摋閣卡散赤e台員人,家己「弄狗肖咬」,翩手底仔肉
互人看,根本著 毋知影外來滿族政權陰險毒步,清室先互文察食甜湯, 毋
閣後手有閣卡惡毒e陰謀欲來陷害林文察,清室欲設火窟互林文察跳,
死神搪咧一步一步來逼近林文察li。
文察啊文察,汝身為台員人,真正悲哀li, 佇滿清外來政權,大嘴開
haahaa, 毋但欲kue4汝骨食汝肉,才 吓甘願li,眾位看倌,逗底清朝背後
e陰謀按怎?文察互人怎樣蹧躂,一條命按怎互人掠水鬼去窒(tat)涵
空,做人e「替死鬼」,請看下腳e分析。
{{(17)}} 是按怎講死神一步一步,來接近林文察?是按怎清宮 吓
對伊「恩將仇報」,硬欲給捏死才甘願?眾位,这就是政治真正可怕e所
在,咱人無貳步七仔,著 毋倘cap政治,千萬噯記互伊稠。佇林文察e眼中,
報效清朝、乙著清朝,為清室拍拚,「忠黨愛國」,無第貳句, 毋閣佇清
朝e眼中,林文察不而過是一隻「sut2仔」爾 ,搭搭是欲給利
用到死為止,根本無咧給信斗。
因為咸豐4年,大陸搪咧(正在)太平天國革命,清室震憾強強欲翩
筴,舞甲滿面全豆花,這个時瞬,拄好掠林文察來作戰,做清朝e砲灰,這
个戰場煞(完)換後一个戰場,永遠袂煞戲,毋閣林文察無材調永遠摋
贏, 嗯才 e瞬呤,林文察最後必定「命喪疆場,馬革裹屍」,真冤枉來
為清朝犧牲寶貴e性命!林文察後來派去福建省佮浙江省,戰伐太平天
國兵隊, du6第壹線e, hut甲臹硬斗叨著。
e瞬呤,這嗎林文察歹紡矣,代誌大條矣,清室早慢有意思,欲派伊去
唐山,佮太平天國部隊肖摋,去做炮灰叨著la,去「赴死e」安呢,若是
無照清廷e意思,定著 吓互清廷掠去牢獄, 也叨舊罪照算,本臹著犯無期
徒刑安呢,致使著文察老大e,進退兩難,心情矛盾不止也鬱卒。
「一面是溝,一面是圳」,有去唐山,無去唐山,橫直攏是死路一條
,北京話所講「仁在江湖身不由己」,明知 吓死,宛那著潦落去,叨親
象阿兵哥就前線衝鋒仝款,有進無退,港噯潦著潦到搭底,閣卡「 毋願」
嘛著噯吞忍,田螺含水過冬,加減拚看覓e, 無的確 吓創作戰功,來升
官發財, 互祖公仔大葩尾旺廣呢,宛那無定著li。
文察老大兮,想閣再想,宛那無伊法le,這條命拍算噯賣互清廷才
吓煞戲,落尾e結局,咱老大e,嘴齒筋咬le,貓食鹽忖死e,堅心決意欲來
效勞清廷,唅心gap命挺搭底,來扶助北京政權,看有倘求壹官半職,卯
一塊仔肉幼仔來kue3(啃)否?
百外冬了後e今仔日(1993),咱茲民進黨e嗣大阿同仔, 毋倘甚過怨
嘆文察,講伊效勞滿族外來政權,來殘殺家己台員同胞,講起來伊宛那真
可憐,滿腹苦衷無地透,「前有虎後有江」,無潦袂煞,進前為著報父仇
,姑不衷坐獄終身,這擺為著生存,仝款命賣互清廷,世間zia歹運衰尾
e, 宛那尋無幾个著是啦!有影想落腳尾僬冷, 嗯才咧講人e運命八字,
天公帳簿互汝袂鐵齒e!
(18) 也叨1854年(咸豐4年),林文察e子弟兵,幫忙清朝將軍曾
玉明,「平定」台北地小刀會之亂,功勞真大,曾將軍真 臹謳咾林文察e
軍事材能,大把大把給(ga6)賞賜,林文察,鋩角駛了有夠,真正有面子
li, 逶一个「殺仁重犯」,變成「方面大部將」有影揚(神氣)噗噗,擎
甲掠袂稠, 毋閣滿清政權,真正是下消無材,唐山方面,太平天國愈「造
反」愈大尾,清朝滿面全豆花, 佇 1855～1869 e年代,江南半部江山
僬(全)敗爛,清朝強欲互太平天國翩笪e扮勢。
廣東、廣西、江西、湖南、福建、浙江、江蘇,鋒火連天,清兵塗
塗塗,一路敗到底,「壹朝動刀兵,十冬袂太平」,百姓是虐(受苦)甲艱
苦坐卦,水流破布,一四界流浪枵飢失頓,梟悻了了安呢甡, 呾清朝ga
行到這个了然e坎站,自然dek著 吓派林文察一行人,到唐山去平亂,解
除「太平天國」集團e「作亂」,來維持清廷滿族e政權, 互伊e政權 吓
凍延落去。
嗯才e瞬呤, 佇 1857～1860 e中間,林文察ga決定欲效忠清室來
講,做了下腳四項決定:(壹)對親小弟林文察交代,趕緊去「彰化學武
庠」讀冊,訓練一寡軍事作戰技術,佮帶兵統領e材調,以這嗎e話頭來
矯是安呢:『趕緊去唸陸軍軍官學校,以培養日後指揮將才。』 嗯才 e
瞬呤,林文明佇1856 (咸豐6年)進「彰化學武庠」做學生安呢甡,林
文察按算萬壹家己不幸e時瞬,著有法度由林文明來接續規个家族e財
產名聲。
(貳)對阿爹e靈位佮阿叔林奠國,叔伯阿兄林文鳳,苦心交代,儘量
效忠清廷,替清朝出力,藉官勢來維持規个家族e興旺、大葩尾。
(三)入南瑤宮,求媽祖婆靈聖, 吓凍來保庇林家大細漢平安,尤其
是身負戰務e勇將, 噯請咱彰化媽祖顯聖來掩護,順續乞爐丹,掛金牌
避邪避福安呢, 庶當時來講,無一項神, 吓凍比媽祖婆閣卡靈聖li。
(四)儘量請求清廷官吏, 噯全力撫卹林家遺族安呢。
這擺林文察來效忠清室,除了 吓犧牲寶貴e性命以外,另外猶吓互
人消毒(批判),講伊是台奸勾結滿族,損性命閣了名聲,犧牲真正慘烈,
清朝政府、官廳e,無論按怎著噯真細膩照顧林氏後代,滿門忠烈,絕對
袂使顛誕去!
(19) 後事交代清楚了後,心肝有卡安li,這嗎堅心決意,唅心
gap命來為清朝皇室拍拚,這條性命忖爛e a(豁出去)。人佇江湖,港無
潦袂煞li。嗯才e瞬呤, 咸豐10年(1860),清廷軍機處,正式徵集林
文察集團,內渡福建,去剿除「太平天國」e叛亂,林文察無話倘印伊,
也叨心肝頭早慢有按算li,驚罔驚宛那著噯展氣魄組e 呢!「無驚無驚
食百貳」, 踮兮咧家己燒香,無講歹話咧自我安慰li,心肝頭搔互伊
圓叨著(自圓其說),『現主時清朝搪咧上危險上衰韶e坎站,我林文察
若 吓凍立軍功,必定 吓大葩尾,官大富貴勢面「貓」li,林家永遠萬代
興旺安呢。』逗底林文察統領子弟兵,內渡福建肖摋,兵凶戰危結局按
怎?相信咱茲讀者嗣大,逐家攏真正關心li。
1861年初(咸豐11年),壹切款款好勢了後,咱阿罩霧e林文察老大
佮老貳林文明,帶領著五百名e台員子弟兵, 逶鹿港出發,分坐五隻火
船(輪船),橫過「水路凶險」艱苦坐卦e烏水溝。
這个「台員海峽」,有影真歹剃頭,闊度有二百外公里e款,安呢
haai4頭si m4尾,足足坐二工一暝才到位li , 佇廈門彼角勢就陸e時瞬
,逐家驚甲面仔青恂恂,忝(累)甲虐甲是目箍僬(全)烏去,幹,頭擺入海
,給汝舞這齣e,閣卡勇e壯丁 嘛摯節袂稠。
呾這嗎初入外埠頭,著噯卡準節e、清醒e,萬項細膩頭一層,心肝
內噯掠互伊清,這嗎「腳踏人e地,頭戴人e天」, 毋倘甚假仙,來得失茲
鄉親嗣大,到時瞬矯袂落去,袂凍收山攬尾, 安呢著醜材矣 he! 嗯才講
這聲文察老大e,港潦落去矣,無拚袂使,頭洗落去矣 ,無剃袂煞,欲鏘著鏘搭
底,叨有影硬斗li。
兵凶戰危,一絲叨袂堪得顛誕去,家己e性命,含規家族e名聲前途,
攏噯佇這个異地他鄉,話語無仝e唐山,決壹死戰來出頭天,宛那合應
該,孤島插人群咧捙盤,確實想落鼻頭 吓酸li。
(20) e瞬呤, 1861秋天戰事,林文察佮林文明二兄弟,堅心
決意唅心gap命,大捙拚以上,拍贏了福建汀州、武平e戰役, 逶太平天
國e軍隊給摃甲mimimaumau,功勞真大,這个時瞬,清朝宮廷真正歡喜,
臹給(ga6)謳咾叨著, 嗯才升林文明武生為千總(武官名),大大來獎勵,
講恁茲「台員暢e」,確實有貳步七仔, 臹敖臹壯才。(親象這嗎時代老
Ｋ咧頒獎:『你們二位,功在黨國,連升三級,頒貳等勳章,並榮獲蔣總
統召見。』仝款,真正hiabai,有影擎甲掠袂稠安呢甡。
第貳擺e唐山戰役,是發生佇 1862(同治1年),彼年清兵真正下消,
佇浙江省遂昌縣所在,去互太平天國軍給包圍, 佇勢面真正危險e空縫
,佳哉台員子弟兵,林文察、林文明合軍援助, 逶太平軍拍敗,解救清
兵e危機。
這擺清朝宮廷才是大感心,謳咾搭底, 佇清兵上介艱苦e坎站,解
救官軍,這 毋但是保持戰力爾, 閣卡要緊e,就是保持清室王朝e面子、
尊嚴, 嗯才這擺同治皇帝是謳咾甲有偆,決心欲重用林文察、林文明e
軍事天才,繼續作戰,來保持江山。
另外一方面,亦互太平軍對林家兄弟,恨入骨髓,苦 毋講剝伊e皮,
kue4伊e骨,各位嗣大a!悲劇這欲發生矣,一方面清朝是逼林家去作戰,
一方面太平軍是絕對欲扑死林家兄弟報仇洩恨。
文察、文明,做石磨仔心,叨「一面溝一面圳」li,真正梟悻悽慘,
看來文察、文明,搪咧一步一步行入死亡e悲慘路途,伊若戰死,壹定
吓替清朝去夆給蹧躂, 夆給碎屍萬段,咱現主時給想,著腳尾 吓冷,
仁生若一步行顛誕去,港潦落這聲貓食鹽忖死e,有影「仁在江湖,身不
由己」。
台員人為異族清朝為甲這个程度,犧牲即大,咁有啥乜價值抑無?
眾位先進,這句話問了真著縫,林家為著異族清室犧牲即慘,結局
宛那去互清室出賣甲悽慘落魄,代誌咧發展, 夆看落 吓著驚 吓cang4毛
脘(gng4)空,这著是咱這本【彰化媽祖】故事真食佳(精彩)e所在,若無
這个教訓,咱寫這本冊著無意思a!
呾林文明連肖續二年,佮尹大兄林文察,佇福建、浙江彼箍圍仔
,南征北戰,逐擺攏勝利,替清室舖面皮有甡張li, 清廷為著欲感謝伊,
佇 1862年(同治1年)初夏, 逶林文明升官為「參將」,這對軍仁來講,
是一項真正光榮e代誌,算起來林文明逶彰化武學堂e武生開始,到唐山
連肖續e戰役勝利,連升千總、參將二級。(1864閣因為平戴潮春之「
亂」有功,升做「副將」,變做全台員上介擎e人。)
無外久e中間,徛1862年秋天,林文察、林文明兄弟,奉清朝「閩浙
總督」e命令,班師回台員地平「亂」,台員地搪咧「戴潮春事變」,依
原是「台員版e太平天國」,彰化縣城 夆攻陷落,清官慘死,清朝宛那
舞甲滿面全豆花,強強袂收山攬尾,這時瞬,林文察兄弟,奉命調返來台
員地平「亂」,逗底林家平亂戴家,是啥乜代誌?下腳自有分明。
(21) e瞬呤,清朝咸豐同治年間,台員西部,干礁設四縣
爾爾,伊著是鳳山縣、嘉義縣、彰化縣、淡水廳,盡家伙仔掠掠e,
嘛才四个縣城叨著,其中彰化縣,包含現主時e台中、南投、彰化,縣城
設彰化市,彼時 吓使講是咱中部上介鬧熱e城市安呢。
(台中市是1910左右日本人建立e新都市, 佇清朝時咱台中市宛那
田庄所在爾,現主時1993台中市是中部上興e城市, 奚原在是日本人e
政治勢力全力建成e, 毋是咱福佬人建立e城市。)
1850～1860左右,彰化縣有三族豪族,人旺家發e好額人叨著,第壹
豪族是台中北屯e戴潮春,彼時叫四張犁地頭e人;第貳豪族是霧峰e林
氏家族,彼時叫阿罩霧;第三豪族是草屯e洪氏家族,彼時叫「北投e洪
欉老大」。
也叨台員中部這三个大家族,隨人財源豐富,丁口旺盛,錢銀塞倒車
路,逐家僥擺 ueue擎甲掠袂稠安呢, 毋閣因為肖過界e關係, 佇彼个
無政府、無法律e腐敗政權管顧下,不時 嘛有衝突,流血肖拚e場面。
人講西瓜偎大爿,狠兮筴(qee4)去配,致使卡荏(lam4,弱)e, 互人
惼, 無地投(申訴),嗯才 e瞬呤,豪族e中間, 宛那各懷鬼胎心機,心
肝頭互相鬥爭甕肚,迭迭想看有法度倘逶鄰族,給摃互伊倒,來求本族e
萬年興旺。
唉!夯筆到茲,不止也感慨,台員人袂曉抾和(團結)來抵抗外來政
權,顛倒家己拚家己,翩手底肉互人看, 嗯才有機會互清室,有倘閣施行
伊腐敗e統治,台員人夆拺入火窟,艱苦坐卦無地透,路邊e萬善堂,有
應公仔是愈開愈大間,實在叨有影li, 唉!
北屯e戴潮春,霧峰e林家,草屯e洪欉家族,這三粒大頭,袂輸現主
時e國泰蔡萬霖、新光吳東進、華隆翁大銘,社會上真正大尾,喚水 吓
堅凍安呢生。 毋閣這三个豪族,迭迭咧激頭腦 ,欲來稱霸彰化地頭,逗底
啥人吓突破草笠出頭天呢?天下e諸侯欲規何方神聖來統壹?無情e外來
滿族政權,欲按怎來凌治?……
想欲摃倒敵族,上介好勢e步數,著是聯合官方,借官方e武功,來鏟
除敵族這个「叛亂犯」,自然dek,番薯仔肖摋 ,互相牽制,清朝統治者
佇暗中偷笑,借別人拳頭母掙石獅,叨免了半兩力li !
(22)通世界萬國社會來講, ga 吓來發生「革命」以上,攏是
有尹e心苦病疼,姑不而衷e所在,壹般百姓攏驚死li ,若無真正歹失德
,矯袂落來e苦衷,也絕對港袂潦落,去拚身拚命去流血捙盤li。
致使著咱 吓凍逶武裝革命e前因後果,結局按怎,給探聽一个卡有
e,給研究一个卡僬(全)e,著有法度倘了解社會e病母,才 吓凍來預防
後日e不幸, 也叨歷史是一面明鏡,照古返今,「袂記歷史,歷史定著 吓
閣重浮夯li。」咱絕對噯記稠先輩留落來e經驗佮教訓安呢甡。
1862～1864,彰化戴潮春e抗滿革命,是清朝二百外冬統治期間,上
介大規模e戰爭行為,伊佮大陸e太平天國仝時排演,佇西瓜偎大爿e現
實社會,這陣 毋驚死e台員人好漢,無惜家己性命,敢來佮清廷大國肖摋
肖拚,來摃倒外來政權翩阿滿仔e笪仔,達到台員人主權獨立,自尊生張
e民族精神,實在真正偉大。
咱這嗎民進黨仔,是臹給謳咾,毋閣謳咾e空縫,宛那真正怨嘆,這
款求自尊e戴氏台員人,最後竟然 吓死佇平平台員人林文明e手頭,台員
人滅台員人,看落有影 吓搥心肝,怨嘆講無彩無彩,真正可憐li。
戴潮春e抗滿革命,既然佮林文明、林文察有牽連以上, 呾這聲
挽瓜著就滕查落去,戴氏革命e詳細東西,港無潦袂煞li,試一下仔咱番
薯仔e忠魂義魄,看生了按怎款?咱茲少年仔恬恬給斟酌, 毋倘甚(siuu)
鐵齒呢 !
清朝咸豐年間1850～1860,佮蒙古族肖厝邊e滿州族,這个外來政
權,統治著台員地二百萬講台員話e民眾,真正匪類烏暗,爛敗低路li,
逶台員舞甲花擱擱悽慘落魄,台員人是哀甲叫 毋敢, 庶當時彰化縣e縣
城衙門,設知縣一名,下腳設戶房、吏房、禮房、兵房、刑房、承發房
、工房、庫房,總共八房,大小官員一百人左右,智識低路,效率飯桶,
致使百姓鬱卒下消,佮阿本仔抑是美國仔來比, 奚是綴(跟)人綴袂著,
永遠袂就火車班叨著li。
咱普通人攏是驚死e,卡占大面,有e人真正有影講連摋一隻雞,抑
是lue3死一隻蚼蟻,著做袂落去,叨做人本性慈悲li, 嗯才講社會上, 吓
發生大流血、大革命,定著有官逼民變,姑不而衷港無潦袂煞e苦衷,叨
虎逼著矣 , 生不如死,放著嫫囝,殘殘脆脆做二塊,佮官廳兮拚一下仔搭底
le,求出一條生路來活命袂?想著心肝頭一瞬e酸軟,威威鑽安呢。
咸豐年間清朝, 佇彰化e腐敗低路是安呢 :外來政權e種族大細
目li,滿族統治者,對福佬人、客人……真正拗蠻,實行高壓統治,好 毋
好著欲掠, kap袂著叨欲摋, 逶台員人e語言、宗教、文化、經濟…
…來壓迫、來蹧躂,台員人活著無甡張li, 清朝e官吏,無論大官小官,
掃塗腳e,軍隊無論官將、兵勇,壹律攏用外省人,(太平天國後,因為情
勢不利清廷,才姑不衷暫用台員兵平「亂」。)
這批官軍統治階級,「衰韶」去夆派來台員,過海峽風透湧險,又
閣語言袂通,袂輸去新疆、西藏仝款e心情,致使心頭掠橫性情殘暴,台
員人去互伊凌治甲悽慘了了, diam3落(種下)後日仔報仇報冤e決心。
清朝官吏,無論大官小官,自頂頭到下腳,通人 嘛食錢貪污,本來
古早中國做官食錢,是世界排有著等,抑無做官咧做假e是 毋 ? 台員島
孤徛海外,天懸皇帝遠,大細粒官員踏著機會,隨人攏 嘛卯甲油sese,項
項噯紅包,事事噯銀兩,行政、司法花loklok,百姓苦袂了歷過頭矣,
嗯才民怨親象火山仝款爆發li。
強盜賊偷贅,社會治安臹醜, 也叨(因為)社會普遍散赤li,致
使著「狠兮食荏(lam4) e」,大社惼(欺)小社,鴨母食塗蚓,做官廳ga
無法度來維持治安以上,社會上自然著好人袂出頭,無人qen4粒積家伙
(財產),生產 吓落坑,致使惡性循環,經濟衰敗,百姓火氣閣卡夯,心狂
火焯,隨時 吓爆發革命。
稅賦甚重,本來國民納稅,这是真正光榮有面子e代誌, 毋閣稅金
若甚重,變做官逼民反,百姓褲帶ha2(束)起來,自然著反叛矣, 汝看美
國1776年e獨立戰爭,著是因為英國對茶米稅e「橫征暴斂」所引起e,
所以經濟若崩潰,社會定著噯革命安呢。
清官真噯「大摋大掠,抄家滅族」e統治心態,真正互人看袂做
e,尹無司法e觀念,閣卡無仁權e思想,萬項代誌自作自端,完全看法律
當做屎尿,無咧尊重,一个無法律e世界,袂輸簡那禽獸世界,做老百姓e
人,閣卡忠厚,看落kimo著袂qiang 呢 !
清朝官吏e智識真 臹下消、飯桶,我進前有寫過,清官 吓使講完
全無世界性e智識,像1870年代,Newton(牛頓)微積分已經發明二百年,
伊猶咧 1+1=2 ,干礁規工四書五經,孔子公一箍碗公啦 ,尹俍客兄公
! 滿族原本佮蒙古族仝款是游牧民族,是低路e民族,咱台員人(福
佬人彼時占85%)是海洋民族,是優秀壯才e民族,飯桶e民族欲來管優
秀e民族,自然噯用高壓手段, 安呢來革命必然爆發。
所以講台員人去互滿族來統治是真梟悻,亦是十九世紀世界e大笑
話,滿族確實是無倘外敖,滿州女真族,壹直逶唐宋,一路僥擺千外年
到清朝,版圖有二个中國大, 毋閣現主時,滿族已經滅亡矣,汝無法度聽
著滿州戲(清宮戲例外)、滿州話、滿州民族文化,(立委關中,影星胡
茵夢……恁攏是滿族人,著簡那朝鮮人仝款,恁e文化去互中國人消滅,
汝 毋知見羞 ,遂顛倒來為仇家講話,實在想無li !)
咱台員人番薯仔下消罔下消, 宛那有一位所在倘匿di6 e (窩住著
)慢慢保持家己e文化,所以這嗎想起來,親象滿族這款連家己國土民族
文化,叨保持袂稠e低路仔,竟然有法度來台員地匪類二百冬,真正是天
公無目睭,尹婆仔卡好le!
(23) 咸豐初年,拍算1850～1855之間,彰化e所在治安臹醜
,茲忠厚人,出入社會行踏,不時 吓夆給劫財害命,庄頭羅漢腳仔
上贅, 摋來拚去真正梟悻,官廳腐敗無法度顧著正義,潦落做歹人愈
結愈大黨,善良人艱苦坐卦,袂輸咧吞銅食鐵,有影無伊法干礁無伊
法,結局著參加秘密結社「八卦會」,來保障出入e性命安全。
這个「八卦會」,著是現時台中北屯(四張犁)e豪族戴潮春創立e,
伊糾合五、六十年前乾隆尾期,林爽文「叛亂」時e天地會餘黨,來改
編訓練,變做一枝維持地方治安e私仁武力,這枝武力(等於是警力),名
聲臹浮, 也叨有法度來保障百姓e安全li, 嗯才e瞬呤,參加e人愈來愈
佳繹(多),勢力愈來愈擴大,差不多有規萬人e坎站。
這聲官廳兮 ,摯節袂稠矣,因為官兵 嘛才三、四百名爾,縣府看甲臹
袂做e 矣, 想著乾隆時e天地會林爽文「叛亂」,規身軀僬(全)冷,家己
四兩ng 仔稍除e,清官赫腐敗,若準戴潮春這箍外人 閣來一擺叛亂,知
縣欲na應付 吓離(全)?泛勢講烏紗帽戴袂直嘛無的確li,尤其這嗎唐山搪
咧鬧太平天國長毛賊,燒爐添炭,閣卡食力li。
嗯才e瞬呤,這擺縣官心肝掠坦橫矣,殘殘脆脆給伊做二塊,港潦落
忖死e,佮伊拚看覓e,縣府決定趁戴潮春八卦會勢力猶未大尾進前,先
下手為強來給滅掉,人講「先食先贏, 才袂叫阿俍 。」辦法是安呢,先
藉詞摋死尹e總官,等尹規黨阿同兮, ci3偎來反攻e時瞬,給安一个罪
名:「叛變國家」,給滿門抄斬,總講一句,欲借官勢來欺民叨著,有影
鴨母吞塗蚓li。
看來這場衝突,逐家心狂火焯,事到如今, 吓親象火山爆發仝款,有
影擋袂稠li,官方民方,雙頭索腳len手,拚生拚死鏘一斗仔卡有e。
這粒超級炸彈,稍可點火著爆炸矣, 1862年春天,戴潮春e八卦會黨
羽已經超過一萬人,戴氏佇四張犁地頭,有錢有人有武力有秘密宗教,
彰化知縣無捻袂煞li, 嗯才 e瞬呤, 官方派人逶八卦 會e總理洪教
頭掠起來,秤彩安一个仔罪名,著給摋死,這聲炸彈引爆矣,清朝200年
當中,台員上介大e「叛變」就場搬演lo,清兵佇縣城食便便咧等敵仁,
按算戴潮春e兵勇開到時,決壹死戰,給安一條叛國罪名,等倘滿門抄斬
,永除後患安呢甡。
代誌有影袂直矣,八卦會e總理洪教頭,去互清兵處死e消息傳到四
張犁(台中北屯)e時瞬,茲戴潮春e八卦會同志,逐家氣甲putput跳,苦毋
講生剝清官e皮,來焢伊e猴膠,「有不共戴天之仇」就是啦 ,烏仔魚去
互濁水激著矣,這聲港無潦落袂煞li,「大兮啊 ,憑汝一句話,無論刀山火
窟阮著鏘,閣卡吞銅食鐵,唅心gap命著佮伊挺搭底,潦到底……。』
(24) 1862初夏,同治皇帝登基彼年,台中北屯地頭豪族戴潮
春,正式宣佈「革命」,造兵起義,欲逶清朝這个滿族外來政權給(ga6)
翩倒,拚一下輸嬴le,來求取台員人e尊嚴甡張,戴潮春召集一千个子弟
兵唅羅漢腳仔,先祭祖拜神,聲明這回e起義,實在是互滿清食甲無天無
良,忍到袂做e,姑不而衷港無潦袂煞li, 映望咱祖公仔有聖,佮眾神東
西, 吓凍來保庇戴家子弟兵,趕走茲惡毒酷行e滿州卒仔,有影台員人去
夆蹧躂甲臹忝,叨袂堪兮氣li。
因為清官食人夠夠, 嗯才 e瞬呤,大彰化地區三大家族佮草屯e洪
欉家族贊成起義來抗清,干礁霧峰林家,因受「皇恩」卡重, 搪咧唐山
拍太平天國,卡偎官廳兮 安呢,這款複雜e關係,大大違背著「壹般大企
業財團,攏 吓西瓜倚(ua,靠)大爿來夯順風旗」倚當政者e現實功利心
態,可見著早期e台員人, 宛那足有氣魄li。
另外,因為三家族其中二家族倚「民進黨」,反抗清朝政權,致使
著變做,代先是林文明擊殺戴家,另外一擺林文明擊殺草屯洪家e悲慘
過往,番薯仔翩手底肉互人看,戰事延綿四、五年赫久,百姓死傷食力
,路邊「萬善同歸」有加卡無閒叨著。
1862年秋,戴潮春e兵隊,規陣ci3偎去,進攻彰化縣城,三百外名清
兵, 吓食袂肖咬,抾偎來迎敵作戰,無三二个手呤,著互戴潮春e兵隊筴
去配矣 ,那有倘等到明仔載,戴軍攻破城門,清官孔大仁自殺無人知,「
水火無義,刀兵無情」, ga攻破彰化城以上,一腹怒火無地透,定著也
有摋一寡大小官員來拄數賬{s猶3,},這點 宛那是 毋著啦, 咱講實e,
彼當時叨袂堪兮氣li, 互人硬壓落底, 互人當做青柴來騎,尹俍客兄公
卡好e!戰亂時期,定著好歹字運肖綴,有人 吓衰韶落ze li。
戴潮春e大軍攻陷彰化了後,續落閣再進攻斗六佮嘉義城,毋閣地
頭無熟,情報失利,壹直攻袂落來,拍袂贏叨著啦 ,實在講, 親象清兵
即尼爛敗飯桶, 宛那拍袂贏,這證明戴軍家己材能不足,勢面懵懂,叨
目睭扒袂金li。
1863,戴軍攻嘉義城無結果了後,翻身就北拍大甲鎮彼角勢,無外
久, 逶大甲攻陷,佔領一時e政權, 毋閣代誌宛那無好紡,南北二路e清
兵,展開反攻,無二月日呤,大甲又閣互清兵佔去,自安呢了後1863～
1864這箍圍仔,越來攻去拖拖沙沙e「拉鋸戰」,壹直到福建水師提督,
佮林文明大軍攻來了後,戴軍才消身了然,落坑失敗li。奚是1864年底
e代誌矣。
(25) 台員地發生「大叛亂」e代誌,真緊著傳到北京朝廷e耳
空內,同治皇帝驚甲一个面仔青恂恂,問左右仔講『戴潮春是啥乜碗膏
a啊 !!伊按怎來起兵攻殺大清天朝?』茲左右仔印伊講『台員暢e(佬),
臹是落魄無甡張,食番薯籤簽睏塗角厝爾,自從咱滿州族優秀民族統
治了後,生活水準提懸,這嗎人人駛轎車吹冷氣,國民所得一萬美金,遂
完全是咱滿清政府e功勞啊,這个戴潮春腳肖,無感謝「黨國栽培」著咧
慘矣閣咧偎黨外e,變啥乜主權、革命e 摋頭生理,是 毋是生活甚(唸箱
)富裕,活甲無耐煩咁 毋是?這款人食好做輕可,連天公伯仔亦真正
可惱啊,給掠來勞改一番,袂使放伊煞啦 !』
同治皇帝雖然有想欲發兵攻戴潮春,毋閣心腹大患「太平天國」
搪作亂,清兵連戰連敗,拚甲塗塗塗,清朝連家己「厝內」叨矯(
處理)袂好勢a, na有偆力來出兵海島台員?嗯才 e瞬呤,「啞口砥
(de4)死囝」,姑不貳三衷,忍佇心肝頭真鬱卒,無幾工e中間,有大臣獻
計,講有仙丹妙方來起死回春,同治皇帝聽落真 臹歡喜,趕緊三腳趒二
腳跳去求問大臣妙計,『如此這般安呢……安呢……』同治聽著真心適,
賞伊五百兩龍銀, 毋知妙計如何?請聽下腳故事,叨真正食佳li。
大臣獻計,講互伊透枝:『解決台員e「叛亂」,著噯用「以台制台
」這步撇步上讚,利用台員人內部中間e矛盾, 互尹家己摋家己,來
給「弄狗相咬」,借別人拳頭母來掙石獅,清朝定著得利,矯甲好勢
liuliu 安呢,現主時林文察、林文明兄弟搪福建拚太平天國軍, 吓使
叫伊拚返來台員,來「平亂」來報效「黨國的栽培」,為國家來成大功
立大業,林文明是阿罩霧人,戴潮春是四張犁(台中)人,平平彰化縣仝血
跡地e人,拚了卡 吓起磅卡 吓逗搭li,真正吓愈摋愈拚勢,橫直死貧道
爾,無死道友,對大清皇朝是穩卯贏e叨著……。』
咱同治皇帝聽了心涼脾透開,心肝頭歡喜咧等,『果然妙計無錯。
』 嗯才e瞬呤,緊下令閩浙總督左宗棠,調林文察、林文明,返台員地
來平定叛亂,另外閣加派福建水師提督吳鴻源,派兵協助作戰,這二枝
兵隊佇 1864年初, 逶鹿港登陸了後,戴潮春e抗滿革命,著慢慢仔落坑
失敗矣。
調回林文明拍戴潮春,以霧峰豪族攻殺台中北屯豪族,確實妙計,
叨台員人袂合和, 自私實在有影怨嘆li,林家佮戴家是肖過界e族敵,迭迭
是為著田水園地冤家讓債,種種空縫, ia4甲清清清(挖得一清二楚),
尻倉毛幾枝叨看現現li, 也叨互相了解真 臹詳細逗搭,「知己知彼百戰
百勝」,戰事定著是拚了真順序安呢。總講一句,清朝確實是爛敗貪污,
政治無材調改過, 嗯才用摋人這步高壓統治,世界上排頭等e,這款人
飯桶掛車輪,鐵齒銅牙槽,致使一百年了後,滿州文化完全夆(給)消滅
了了,全世界聽袂著滿州話佮鄉土滿州戲,這个全世界上大e帝國統治
者,落場即尼, 互人想袂曉,有影叨「豬刀利利,趁錢袂過後代」
,因果報應li,少年仔互汝袂鐵齒e。
(26) 來給講到林文明、林文察這爿面,林家兄弟自從佇
1861咸豐10年,奉派返唐山迎戰太平天國,戰功袂醜,尤其是佇福建汀
州之役,佮浙江e遂昌之役,建立了真大e戰功,二擺攏受著清朝官方e賞
賜,武官愈做愈大仙,唅心gap命為國家效命,拚了有起,做人有甡張li
。
這擺聽著講欲「回鄉平亂」呤,心肝頭著歡喜咧等,因為隔壁庄e
冤仇贅,普通時仔欲給拍真歹勢,歹牽拖(借故) ,這擺借著「官方指
派平定叛亂」e名義,千機難逢真正一甲子 嘛拄無一回li, 毋但師出有
名,順續借其他官方e財力物力,「幵公錢來解私怨」,來摃倒敵族,一
方面鏟除叛逆,為國爭光,一方面趁機會消滅敵族, 吓凍霸一寡田地增
加財富。真正愈想愈暢愈有影。一空掠三尾,咱文明、文察兄弟, 嗯才
嘴笑目笑,未前未著心肝頭歡喜咧等。
1863年下半冬,林文明、林文察坐船返台員,佮福建水師提督吳鴻
源e兵勇,仝齊來消滅戴潮春e叛軍,來保障國家e安定,維持社會e秩序,
互眾百姓鄉仔, 吓凍來安居樂業過好日子安呢甡。
毋閣林文明干礁是做兵仔人爾爾, 毋知官場政權e烏暗陰險,閣卡
毋知做被殖民者e心苦病疼,壹直掠做是我功佇國家,效忠清室,必定 吓
榮華富貴,揚papa擎甲掠袂稠,唉,林文明啊,我看汝實在可憐li, 汝食
卡醜 e la!免咧空思夢想矣啦 !做貳等國民永遠是貳等國民,欲na突
破草笠出頭天?北京話講「螳螂在前黃雀在後」,現主時官界借汝e力
來消滅厝邊,等汝大尾了後,有錢有勢了後,清朝著 吓變面仝款來消滅
汝,政治無情,伊絕對袂目睭金金, 互「另外一个閣卡大仙e戴潮春」
出現li。
人e猜疑心, 互汝袂講e, 毋是一句「效忠清室」著 吓解決e,咱挽
瓜著就滕探詳細,主要著是滿、台二族,無論語言、文字、宗教、觀念
、生活方式攏無仝款,一个統治一个夆統治,民族通和,欲通八擺e 呢
!
佇清朝本地駐守e官兵,佮台員囡仔e林文明部隊,佮水師提督吳鴻
源部隊,三路聯軍夾殺之下,戴潮春這枝抗滿e義兵, 自那漸漸來失敗
消身去。唉!台員人對抗外來政權e壓迫著安呢結束囉, 1861～1863 e
起義留互後代台員人真贅思考e條目,台員人死佇外來官兵手頭,亦死
佇家己人林家軍e手頭,真正 毋甘願,真正搥心肝li。
(27) 1862秋天壹直到1864年春天,林文明、林文察兄弟唅心
gap命來效忠政府,堅心決意來拍倒台中豪族戴潮春,這年半當中,攻落
石岡仔客人庄、葫蘆墩(豐原)、四張犁(北屯)、大里杙(大里鄉), 逶
戴氏e「叛軍」,給拍甲歪篙六蔡,對方兵敗如山倒,氣勢大失,是按怎
林文明赫敖肖摋? 我看是佇唐山彼二年當中,太平天國之戰,粒積了
袂少e戰鬥驗著e, 佇他鄉外里叨拍 吓著等矣何況是佇家己e家庄血
跡地,卡加 嘛三二輦半手著給款起來安呢,一聲嘛給筴(qee4)去配,這是
伊e本頂,宛那是伊好狗字運安呢甡。
逶 1861～1864 e當中,政府官廳兮, 三擺頒獎升官互林家, 1861
福建汀州之戰,林文明以武生升做「千總」, 1862文明、文察拍完浙
江之戰,升做「參將」, 1863文察平定戴潮春之亂,升做「副將」,這
个武官官位真正大粒,另外林文明e阿叔林奠國,也因為隨軍戰功佮大
力捐銀,得著「候補知府」e細粒官位。
到1864為止,對霧峰林家來講,宛那是大富大貴,做官e人贅、財
產贅、武力勇,仁丁財源旺盛,變做全台員島上上介有權有勢e家族,鄰
族戴潮春已滅,現主時干礁偆草屯洪欉大家族, 對伊有威脅爾爾, 咱
林家有影是擎甲掠袂稠呢 !
同治3年, 1864年三月,戴潮春兵敗被殺,北屯e家族瓦解消失,毋
閣後世e人攏尊稱伊「戴氏恩公」,設有神位祭拜,戴潮春這位抗滿英
雄過身了後,伊e神魂飛對西方世界去,茫茫渺渺,真 毋甘願叨著,沿路飛
猶沿路罵清朝,『汝這夭壽仔,恁清朝著噯死甲無人燒香點火li。』一
路給咒詛,無外久e中間,戴公e神魂,飛到仙殿, 去搪著(遇著)太白金星
這位神仙,太白金星知影伊e心苦病疼來龍去脈,真正誠心來替伊申冤,
來給安慰。
『呾袂要緊啦,汝無惜家己性命家族,來為台員人捙拚,抵抗外族
侵入,我太白金星真正了解,佐汝免驚,林仔文明這个拖屎連e弄暴屍,
後日仔絕對 吓悽慘落魄,死甲真歹看, 互人利用猶 毋知。台員人
家己翩手底肉互人看,可惱啊惱! 抑若講到滿州人,梟悻代歹失德做了
了,這个民族後日仔必定 吓滅去,免一百冬汝著看無滿州人,這个滿豬仔,
吓先互東京族給摃倒,最後 吓死佇北京族手中……。』
戴公e神魂聽著,真正感心,『唉,人咧做天咧看,公道自在仁心,我
戴氏無夠資格講國事,潦落肖摋姑不而衷, 宛那是壹心壹意為百姓,
看 吓凍過著卡快活未? 映望仙公看著小民苦心以上, 吓凍來主持正義,
互仁情義理 吓起示,我戴氏千刀萬割,肝腦塗地宛那甘願li。』
太白金星直直給安慰,咱給看,太白金星神仙所講e話,宛那有應
驗著,林文明佇 1870衰韶去(倒霉了), 清朝佇 1895輸日本仔, 1930
年代滿州話全滅, 照安呢看來,有寡代誌確實親象佛家所講「因果報應
」 ,茲少年仔, 互汝袂鐵齒咧, 噯卡斟酌e li。
徛佇現主時e民進黨看法,對林家 , 宛那不止也給tu4臭,今仔日滿
族外來政權,來匪類、來爛敗,汝做為台員人e頭兄,無起來為本土拍拚
著咧慘矣煞顛倒幫忙異族來摋家己反抗義士,為著官位趁錢自私, 逶
家己e快樂建立佇同胞e礁骨血屑頂頭,林家啊林家,汝實在有夠酷行、
有夠惡毒呢 ! 親象貳貳八著好,若無人去通風報信做報馬仔, na 吓敖
人夆一个一个掠去摋?
貳次大戰後韓國獨立,有記者訪問韓國文仁,『汝有抾恨日本人否
?』伊應講『我無恨日本人!』記者大驚『按怎講?』『我干礁恨家己
「韓奸」著是啦,逐擺反抗日本欲好勢時,著有韓奸去通風報信,致使
真贅義士失去自由、失去性命!』現主時有臹贅台員人,無惜本土感情
,壹直逶財產外移,無欲教囡仔台員話,家己滅家己,茲攏是奸臣揀有扮
e,攏是仝公司出品e, 佇茲 吓使給弓詈(批判 ginglue 64)講是「林文
明症候群」,猶算對伊無拗蠻li。
:
第三章 霧峰豪族, 擊殺草屯豪族
(28) 同治四年, 1865,「以台制台」,霧峰豪族林家,借官勢
來屠殺草屯豪族洪家,這棚慪(au4)戲又閣就台矣,仝款是「赧示
赧眾」台員人摋台員人,翩手底肉互人看e夭壽大梟悻(不幸)。
霧峰e林家佮草屯e洪欉家族, 佇尾溜仔日本時代時,二族e仁士互
相冤仇,無來往亦無通婚,原因著是林家祖先摋了真贅洪家祖先,這款
「不共戴天」e深仇大恨,壹直延續到後代囝孫,有影遺憾閣怨嘆,講起
來無定(可能)是林家卡輸勢安呢甡。
佇咸豐、同治年間,草屯洪欉e財產,超過霧峰林家真贅,若毋是林
家食官廳e勢面,硬用武力大摋洪家,今仔日百年之後,台中e觀光名勝
,(恐驚仔毋是「林家花園」)真可能是「洪家花園」嘛無的確,因為林
家擊殺洪家了後,大細幹部僬處死,趁機會霸佔財產田園(彼時風俗是
安呢),所以現主時林家花園e厝屋裝叉,可能亦包含著洪家祖先e血屑佇
內底li。
現時林家e祖廟佇台中市國光路55號,洪家e祖廟佇草屯鎮芬草路
81號對面巷內,草屯洪氏e囝孫,卡有志氣e人,是絕對袂qen4給霧峰人
肖借問,洪氏e後代,吓凍忍受林家財富僥擺,亦吓凍忍受林家浮頭做
官,甚至對祖先肖摋 e代誌, 宛那部分吓諒解, 毋閣著單單「引外來
政權,來屠殺家己同胞」這項代誌,無法度來原諒,袂凍著是袂凍e,比
吳三桂引清兵閣卡食力li。
1864,同治三年,林文明、林文察兄弟,攻伐台中北屯e戴潮春戰事
,漸漸來結束矣,中部三个家族,已經倒一柱矣,偆二柱,霧峰林家佮草屯
洪家,逐家咧拚注(du3爭王位),來孤對射e(單挑決鬥)。
同治初年,草屯洪欉家族e地盤角頭, 佇現主時e草屯鎮全部,佮霧
峰鄉e萬斗六地界(萬豐、舊臹、峰谷、六股等村),吓使講這嗎南投縣
內底,烏溪流域全是伊e地頭安呢,洪欉家族e財源田園, 毋但是超過霧峰
林家爾爾,伊閣掌握著水頭水源e優勢,佮番人感情亦袂醜,又閣地
理倚山崙仔溪墘,「易守難攻」,致使講霧峰林家真正驚惶。
假使後擺若洪氏家族大尾了後,水源互伊控制稠e,武力閣摃伊袂
倒,恁父這聲著哭苦矣,隨時吓互洪氏筴去配安呢,林家愈想愈驚,性命索
去互人搦(啦k1)稠e,卡加嘛袂食袂睏e, 嗯才(mzia31於是乎)e瞬呤,想
講,趁現時做官做建,用官廳e武力給摃倒,以絕後患,順續嘛有法度,閣
一絲仔田園水源,到彼時恁父林家著是中部上好額e,全省通掌關矣,囝
孫萬代大富大貴li,這聲港潦落,無創是袂煞li。
真拄好,這个時瞬同治皇帝又閣關心台員地叛亂代誌, 佇戴潮春
抗清勢力消滅了後,伊又閣驚草屯洪欉勢力坐大,到時瞬閣來一擺比戴
潮春卡大e叛亂, 安呢著醜材矣he!, 嗯才佇 1864, 7月18號下諭互閩
浙總督左宗棠,諭文是安呢 :『洪欉等皆著名巨匪,現在逃往何處?裹脅
人眾當亦不少,各摺均未言其下落,著左宗棠,徐宗幹嚴飭曾元福丁曰
健緝拿擄獲,免致再行勾結生事。』
也叨官方、民方,雙方面攏欲攻殺洪欉家族,洪家e八字赫 醜,運
途赫慘,洪家亦是抗滿份子,彼時除了霧峰林家倚靠政府以外,戴家、
洪家攏是徛佇台員人這爿,來反抗異族, 呾這嗎看著戴潮春死無外久
呤,洪欉尹奚大家族欲閣互人吞去,台員人啊台員人,汝實在有夠悲哀,
逐家袂曉團結抾和, 遂互外族來「鴨母隨隻掠」,个个擊破,一傢一
傢掠了了。
汝給想看覓,有啥乜人天生毋驚死,欲來革命?若毋是日子實在忍
甲袂做e,咁有人吓捅頭潦落去是毋?準講伊个人毋驚死來講, 毋閣尹
父母囝兒,欲按怎著好?所以講茲台奸實在有夠可惡梟悻li。
(29) 呾這嗎虎頭筴仔雙頭筴,這聲洪欉家族梟悻矣,官廳兮皇
帝落聖旨,民間林家大目瞵虎虎(qin3,虎視耽耽),我看洪欉閣
卡猛閣卡勇閣卡好額, 宛那牽袂稠li,反抗外來政權e勇士,著安呢恬恬
犧牲去囉, 唉!搰力e台員牛仔,保重咧!
同治三年這个流擺,政治官場上發生微妙e變化,彰化縣e省城福州
(彼時台員猶未設省, 互福建管),政治顛誕去,分為「主流派」,有左
宗棠、曾元福、林文明、林文察,另外有「非主流派」,有台員道台丁
曰健、滿人英桂將軍、縣令凌王爺(凌定國),這个「非主流派」e人,
卡佔贏面(上風),陰險惡毒, 佇台員本土所在,壹直咧排斥林文明、林
文察,驚林家去搶著尹e光彩安呢, 所以台南府城壹直尋機會,欲來蹧躂
林文明兄弟,無噯 互伊坐大升官叨著。
毋閣佇林文明這爿,阿兵哥人條直戇倯,一條腸仔通尻倉, 毋知政治
e烏暗無情, 猶壹直咧擁護清廷,乙著(護衛)官廳兮,這棚政治鬥爭e齣
戲,免講嘛是丁曰健這箍台員道台(行政官)佔贏勢,林家孝呆孝呆,皮
噯繃卡拫(an2,緊)咧 呢 !
「非主流派」e丁曰健、凌王爺這派人勢面卡貓, 佇滿族特務頭
仔英桂e設計之下,計劃派林文察重回福建,平定太平天國軍務,明e理
由是欲「為國平亂」,暗e理由,著是欲削減林文察蹛台員e兵權, 互伊
袂大尾,袂來阻擋丁曰健一派人e利純,若是林文察兵敗戰死, 安呢閣卡
有倘阻擋霧峰林家這个家族e發展,到時瞬,戴潮春死矣,洪欉亦死矣,林
文察若戰死, 安呢清宮內部著喚『安啦!』「高枕無憂」!因為清朝皇
帝上介猜忌台員本土勢力e夯懸(升起), 噯鴨母隨隻捧,才袂礙著北京
皇權e尊嚴。
1864年6月,來逶最高當局e命令是安呢 :(壹)令林文察將軍,率領
兵隊,重回唐山福建地,去抵抗太平天國e作亂; (貳)令林文明將軍佮
台員道台、總兵合作,去攻殺戴潮春e餘黨,佮洪欉e大家族叨著,戰事
二爿同時展開li。
文察仙一下聽著這項消息呤,不止也著驚,知影這是官方e「調虎
離山」之計,不止也惡毒,普普也知影無論地方官抑是中央皇帝,攏無
希望台員人,尤其台員武力甚過浮頭,親象太平天國興兵,佮戴潮春起
兵攏是明例,致使著佇清朝e統治下, 噯卡吞忍e,算講這是伊e天年,做
外來政權e走卒仔,嘴齒根噯咬咧,田螺唅水過冬,映望後日仔好運出
頭天li。
1864年7月,林文察又閣統領軍隊,過海返福建,征戰太平天國e軍
兵,臨走進前,伊了解台員道台丁曰健e陰險,欲切斷林家e勢力, 嗯才做
二項決定。
第壹,給林文明小弟,坦白講出政治鬥爭e烏暗,險路奧行,萬項噯
卡細膩e,兄弟無佇(不在) e時瞬, 噯卡敏醒e,袂使顛誕去呢。
第貳項,伊親身掣著阿叔林奠國,仝齊赴福建,來保護伊e安全,免
受政治壓力e牽連安呢……咱給看,林文察歲頭卡贅,宛那卡吓曉想叨
是啦,順續亦按算,這回去大陸唐山,兵凶戰危,家己來日無贅宛那噯
張弛一下。
林文察暗時仔想閣再想,此去凶多吉少以上, 也叨軍令如山,無潦
亦袂煞li,今年歲頭食到三十五歲,半氏人戰事牽纏,為政府來拍拚,萬
不利若為國犧牲,這條命賣去矣,官廳兮咁吓真給我哀傷表揚?到茲來矣,
無啥乜映望啦,干礁祈求官廳兮,有法度來牽成阮嫫囝小弟,來撫卹表揚
林家e愛國精神著好,絕對袂使「吊脰搶後腳」,恩將仇報,又閣來陷害
阮林氏家族才好呢 !
(30) 著安呢甡,同治三年7月尾,林文察帶領一千名兵士,另外
尹阿叔林奠國,仝齊就唐山,這擺是第貳回返福建作戰,路頭卡熟,進退
中間也卡有經驗,政府方面,派伊佇家己e祖居地---漳州所在,來抵抗
太平天國軍隊e侵入。
林文察將軍,這聲略略也有卡爽勢定著,壹來有榮幸為國家平亂,
功勞在朝廷升官有望;貳來保護家己祖厝e安全,抵抗外族入侵, 安呢戰
爭才吓盡磅逗搭;三來語言風俗方面,佮台員完全仝款,有法度倘佮百
姓和合(合作),軍民壹體,有利戰局安呢叨著啦,總講一句,這擺林文察
派往漳州去拚太平天國長毛賊,對伊來講真正肆配好勢li,人咧講「一
空掠三尾」,叨有影li。
1864年12月,太平天國長毛仔賊,已經攻入福建沿海地區, 佇漳州
、潮州、詔安彼箍圍仔咧出入返倒,官兵方面下消無扮,迭迭咧衰韶失
氣,致使講地方上梟悻,有時仔長毛仔賊攻過來,有時仔官兵拍入去,雙
爿親象咧「扭大索」拉鋸戰,茲百姓艱苦坐卦,水流破布, 互雙爿兵隊
歷甲悽慘落魄,一四界死老亡細,斷糧斷水,親象十殿閻君赫尼梟悻
安呢, 嗯才咧講肖摋大凶事,毀類茲氏細叨歹失德li。
林文察e戰事佇 1864年8月中旬,開始展開,按算欲佇半年以內,
逶漳州外圍e長毛賊,給趕出去外省地區,這項任務定著噯完成才袂夆
笑,講連家己故鄉著顧袂稠,欲佮人做啥乜將軍安呢?
同治三年歲末(1864年12月),太平軍佮林文察e官兵,雙爿佈置佇
漳州第壹險閃e要塞萬松關附近,僎欲決壹死戰,萬松關是漳州欲通對
京城方面e制高要點,是兵家必爭e要塞地,這擺e戰事,若是林文察摋
贏,定著吓閣升官好額,話語仝款地頭閣有熟,「天時地利仁和」攏有
利,看起來這場戰事,是對林文察卡占贏面li。
佇敵仁太平軍方面,茲長毛仔賊,舊年猶參林文察佇浙江遂昌肖摋,
太平軍連肖續食二擺敗戰,對林文察是恨之入骨髓,這擺「仇人見
面分外眼紅」,咒詛欲逶林文察給碎屍萬段,安呢才吓洩心頭之恨,
嗯才 e瞬呤,這回仔太平軍, 佇漳州萬松關e戰事,佈置真正盡磅逗搭,
順續逶別省調兵來援助,按算講佈落「天羅地網」,欲逶林文察生擒,
以報壹箭之仇安呢甡。
安呢看來, 1864年12月中旬這場「萬松關戰役」有影真正激烈真
正危險歹行,雙方攏「志在必得」,一爿是天時地利仁和,一爿是暗中
調大軍,駛奸臣步,設妙計食伊有材調南征北戰經驗li,二爿陳皮蘇黨,
真正有bii叨著啦,這場戰事摋甲激烈拚磅,天翻地肉翩,雙方死傷慘
重,有影梟悻溜溜,到到清廷叨掠甲袂凍倘著li, (大大出乎清廷意料
),按怎稍寡所在爾,有即尼大棚e齣頭咧捙拚? ga 赫奇安呢?
(31) 話頭分做二爿, 搪噹(正在)文察仙佇漳州佮太平軍捙
拚e時瞬,台員方面,尹小弟林文明將軍, 宛那負起征剿洪欉豪族e責任
,草屯洪欉家族,財大氣粗,武力佮防禦工事真堅強,田園包含現時草屯
鎮佮半个霧峰鄉,比林家加臹贅叨是啦,又閣佔有水源水頭,佮番人感
情臹好,這款人若叛變, 奚是比十个戴潮春卡歹扭搦(qiulak,處理
), 嗯才講清朝壹定噯給收拾掉。
文明仙深受強鄰威脅,親象魚莿ge3喉脘(gng4),心肝頭閣卡凝,
這聲借官方力量,殘殘脆脆互汝好勢,欲給摃互伊青尺仔青尺,煩惱伊
啥乜台員人摋台員人,啥乜抗滿民族大義,這咱攏聽無啦!政府官廳兮,
著是天公,天公、三界公上大、上尊貴叨是啦!
也叨洪欉家族e田園甚贅,地尺甚闊(面積遼闊),文明仙佮官兵聯合
,欲逶佗一位進攻, 宛那考慮臹久,最後e結局決定逶北勢湳這个地頭
攻入去,若準戰事順序,才閣進攻洪欉e老巢(siu6),機關贅贅防守堅固
e萬斗六地區,來給徹底消滅li,眾位看官,世間na有即尼惡毒e政府,
來殺滅家己e忠厚子民?單單有滿族外來政權這口灶爾,清官聯合「忠
黨愛國」e文明仙來攻打洪氏豪族,定著噯一个罪名,講伊是「戴潮春e
餘黨」。
眾位啊!這完全是咧瞞生人目瞞騙後代e歷史叨著,現主時連一寡學
者嘛去互伊騙有著li,是按怎講?清官挑工安一條罪名「戴潮春餘黨」
,完全是文字獄,來欺騙世間,騙人e理由是安呢 :
第壹,洪欉e勢力是佇草屯南投這角勢, 毋閣戴潮春e角頭佇台中北
屯,中間隔著仇家「林文明」霧峰林家,講「餘黨」毋「餘黨」這無可
能啦!真歹牽連li, 也叨天南地北隨人坐位無仝,中間是互人切斷,是欲
按怎餘黨起餘黨落。
第貳,「山頭主義」e影響,洪欉家族無論錢銀武力,攏贏戴潮春透
透,汝欲講『洪欉家族來委屈做戴氏e餘黨』,不如講『戴氏是洪氏e餘
黨』有卡差不多li,可見大仁物做小仁物e「餘黨」,這干礁是「牽強
附會」,竹篙逗菜刀來瞞生人目安呢 爾,一聲嘛互人看破腳手li。
第三,世間干礁有聽咧講「戴潮春反叛清朝」,叨無聽著講「洪欉
反叛清朝」li,洪氏家族,一開始著老老實實無動刀兵,忽然間昊頂一
頂大帽「叛亂犯」,洪氏腳軟手搐心肝頭亂紛紛,去互風颱尾掃著有影
臹衰, 猶若無者,按怎講戴氏叛亂時無hii4haai著(動靜),顛倒戴案
平定了後,才來咧喚「戴氏餘黨」?
噯知影林文明仙猶未攻洪氏進前,洪氏e主力並無攻擊清廷啊,
是尾也受著文明攻擊,這聲烏仔魚去互濁水激著矣,港無潦袂煞才姑
不衷鏘落去,總講一句,洪氏是被動爾,這佮戴氏親身起兵攻殺衙門官
吏,完全是二回事,咱魚凡魚、蝦凡蝦,水龜毋倘濫田螺安呢!
第四,彼个時代,清朝官吏爛敗貪污,眾人攏僬(全)知影li, 嗯才除
了效忠清室e林家兄弟外,吓使講攏是佮戴潮春仝款思想e「異議份子
」,既然「逐家攏是反對黨」,著無需要分講啥人是戴氏餘黨,啥人毋是
餘黨,因為規个社會攏總是餘黨a,思想是屬戴黨, 毋閣動刀兵著無屬於
戴黨啊!
(32) 1864年9月初10,台員道台丁曰健e兵丁佮林文明仙e聯
軍,合力攻打洪欉家族e北勢湳地界(現主時草屯鎮北勢、中原二里),
這擺e肖摋戰事,雙爿悽慘激烈,鬼哭神哮,連二千公里外e同治皇帝,
嘛驚甲腳手仔肉六六搐,驚兮咧等。佇官軍丁曰健佮林文明聯軍這方面
,是志在必得, 也叨港已經潦落矣,無贏一斗仔,是欲na對皇室來交待,大
清帝國e面子,是欲夯去佗位藏安呢。
另外佇洪氏家族這爿面, 佇生死存亡e空縫,堅心意志唅心gap命,
著給伊挺搭底,將士用命血肉長城來對抗異族e入侵,前倒後起,唉,實
在互人真正感心, 互人鼻酸目燒感慨無量,這陣勇敢忠厚e作穡人(農
人),無事無白(無緣無故)去互風颱尾掃著帶衰, 互人摋互人割,平
平是番薯仔li。
戰事無外久e中間,雙頭著「堅持不下」,戰事「膠著」無進展li,
洪欉e兵馬毋敢到霧峰林家e地盤,文明仙e兵丁也毋敢冒險到洪欉e地界,
因為洪氏e防守真堅強,有烏溪佮附近山崙磅空做掩護,敵明我暗,進攻
硬斗歹紡, 嗯才 e瞬呤,雙爿堅持二月外日, 逶同治三年9月延遲到11
月,無啥乜進展。
最後清兵提出超級武器---二門大砲來壓陣,對北勢湳e山腰可疑
目標,日夜砲轟,一方面造成仁員傷亡,一方面亦震憾作用消滅洪軍士
氣,這二門大砲,是英國方面提供e,對上海載來e,(美國南北戰爭仝時
代e產品),另外又閣挖地道漸漸來逼近洪欉e司令部安呢,洪家e處境真
正危險,文明仙嘴笑目笑,又替政府除一”叛賊”,立一層大功li,到時封官
賞地,祖德流芳真正光彩li。
12月20號,清軍經過日夜砲擊,地道造成,給洪軍糧食彈葯欠減以
上,發動最大規模e總進攻,地道火葯燃點,刀銃齊放,洪家大敗,兵士一
四界潰散,一部分辿(suan6,逃)入山匿,清兵處理戰場,才發現洪欉已
經中著砲彈死亡,早已入棺埋葬,道台丁曰健青凶殘忍, 逶規具棺挖起
,斬頭示眾, 佇茲我想起這嗎書冊,迭迭講高山族有出草斬頭e惡習,事
實上清朝e官吏, 宛那有這个野蠻作風,龜笑鼊無尾,清朝官員素質,下
消飯桶殘忍惡毒,有影袂hau6韶 e。
北勢湳e戰事結束矣,清軍佮文明仙e部隊,攻破了洪欉家族, 摋死
袂少洪家e敖人,洪氏家族e田園財產真贅,續落逐家來分戰利品,隨人
卯一塊仔無顛誕啦! 洪氏家族e民眾,大部分辿入去山內避免戰禍,麻
竹籬內e塗角厝亦大部分夆燒夆炸,梟悻溜溜有影叨無聲勢li,霧峰
豪族來擊敗草屯豪族,平平番薯仔著毋倘安呢翩手底肉互人看,以台制台
,死攏死平平鄉親阿同e,有應公遐,下暗時吓閣卡大陣li。
這擺北勢湳戰役,林文明將軍貢獻真大,尤其彼門大砲, 宛那是家
己出錢逶海外運搬入來,真正拍拚li,戰後,雖然趁機會佔了袂少洪氏e
田園, 毋閣壹直無升官li,落尾也才知影,是心肝青狠e道台丁曰健凌王
爺一幫人,掩勘(kam4)文明仙e戰功,無欲互伊捅頭(出頭)叨著啦!
文明仙大驚,稍寡有覺悟,才知政治鬥爭e烏暗, 毋是汝戇直
e阿兵哥矯吓落來叨著啦!「吹螺為人賣肉」家己了一身軀e戇力,危險
坐卦,仈人咧好空爽勢,恬恬食三碗公le,尹婆仔e客兄公卡好,世間
真是大細目差赫贅?
毋閣怨嗟罔怨嗟, 宛那干礁無伊法呢!丁曰健伊是台員道台(行
政官),凌王爺等等一幫人, 互汝得失袂起啦,尹欲致(尋求)官名,汝
文明仙若甚浮頭,吓礙著尹e官位呢,汝壹介武夫爾,拚袂倒尹一幫人,
泛勢有「殺身之禍」嘛無的確li。
文明仙有卡巧矣, 宛那無甚計較無甚逼安呢甡,橫直林文明上大e願
望,著是拍倒族亂,永遠囝孫萬代興旺上要緊li,咸豐、同治年間中部
三个豪族,已經拍倒北屯戴潮春,佮目前e草屯洪欉,將軍林文明變成天
霸王,獨強安呢叨著,想著宛那
臹揚(神氣)臹歡喜,有影心涼脾透開li
。
(33) 1864,12月20日,文明仙佮丁曰健e聯軍,正式消滅草屯
望族洪欉e勢力,洪欉死後,伊e靈魂化做一道金光,仝款投逶太白金星
神仙遐去, 佇太白金星仙殿內底,去搪著(遇著)戴潮春e魂魄,戴笑笑也
講『幹, 抑汝亦來茲食茶,咁吓佗位矯袂好勢是毋? 呾平平隔壁親傢,
若有長短,稍講出來參考咧!』
洪欉給印:『這派丁曰健、林文明,有影臹袂夆安呢,台員人去互
滿州豬仔,凌治到悽慘落魄,阮老老實實做田做園,無代無誌遂來攻
摋庄園,文明仙無來反抗清廷著咧慘矣 ,顛倒頭來欺負台員人,有影夭
壽短命噢!』二人愈講愈毋願,壹直給太白金星神仙「投」(申訴)。
神仙尾溜也來給安慰,『因果報應,是吓來到,人咧做天咧看,咱人
若安好心,存天良,規尾宛那吓天公疼戇人li,佐汝免驚!』自那夯起筆
來, 逶一位名字給卒掉(擦去),雙人目尾有sut3著,簡那有一字「林」
e款勢。
五工了後,也著是同治三年,12月28號下晡,咱林文明將軍搪咧哈
鴉片時,一時拄好有差役送批信來,文明看著,忽然間天眩地暗,目跳金
條,血壓擎到二百貳,規箍人昏去,倒佇交椅邊,茲眾左右仔隨從,趕緊
提薑汁來急救,眾位鄉親嗣大,逗底有啥乜代誌天大地大, 互咱林文明
將軍一時昏死死去呢?所以講因果報應,有時仔少年人互汝袂鐵齒e
尼!彼張批信講明『兄哥林文察將軍,伊佇同治三年12月24下晡,踮漳
州萬松關戰役,兵敗戰死,為國犧牲矣!』
好昊咧陳雷公啊,天大地大,轟動全台員e林文察將軍,忽然間來過
身去矣,去唐山嘛才四月日爾爾,著安呢無聲無勢來為國犧牲,折損大
將有影臹無彩呢,這个惡報對文明仙來講,真正是開天梟悻大打擊, 毋
閣政治這款代誌烏暗無情, 搪當林文明將軍佇失志悲傷e時瞬,丁曰健
、凌王爺,這派e非主流派清朝官, 遂顛倒歡喜,笑佇心肝頭。
這擺文察戰死,有法度來削弱林家踮台員地e氣勢,才袂礙著府省
清官e利頭出路,橫直戴潮春死矣,洪欉亦無命矣 ,這聲林家閣再落坑
衰韶,三柱總死矣,清朝對台員e統治權,已經在在在,在biak1biak3免驚
啊!已經穩穩穩,莿yaya ,無人敢搧伊e腹堵邊li。
清廷e惡毒,實在是互汝比憑袂到e, 對林家e打擊是連肖續
無歇li,來給「吊脰搶後腳」,欺負林家是盡磅逗搭,有影太白金星神
仙咧按算,果然無顛誕li,林文察為皇清捙拚來犧牲性命,清廷假好衰,
給追贈三保太子官銜,这單單是「嘴唇皮相款待」爾,無啥乜誠意叨
著,这按怎講呢?
照理講,林文察將軍唅心gap命來為清廷捙拚,失去性命,清廷應該
給尹親族阿叔林奠國(林獻堂e阿公),特別是撫卹優待才著(對), 毋閣
清廷毋但講無給「優待禮遇」, 遂顛倒給落獄掠去關,講伊貪污食錢
,軍糧庫銀顛誕,來給坐罪li,清官e政治烏暗、派系e鬥爭,想落吓著驚
流凊汗li。
林奠國阿叔,自安呢「莫須有」來冤枉落獄,壹直關到光緒五年,病
死為止,總共關16年赫久(1864～1880),算講是無期徒刑叨著啦,到茲
來矣,霧峰林氏家族,失去林文察、林奠國二名大將,江山去了一大半,
後壁e政治風颱猶真贅li,代誌歹紡矣,林文明噯有警覺心, 噯卡張弛咧,
噯不時驚兮咧等,才有甡張, 也叨台員人總是台員人,無倘好互汝食甚好
li,新婦仔(童媳)永遠是食凊飯e份爾爾。
(34) 過無外久e中間,有另外一批親腹e,來通風報信, 也叨一
嘴傳一舌,林文察e過往詳細,傳到文明仙e耳空內,文明仙聽到目屑流
目屑滴,心肝頭一瞬e酸軟,唉,文察為清室為甲即尼忝(累),忠厚土直
唅心gap命肝腦塗地,這條命來賣互清室宛那無怨嘆,文察e死狀真慘,
落尾e結局互太平軍碎屍萬段,燒甲無半絲灰,吓使講「死無葬身之地
」安呢甡叨著啦。
致使講後來林家宗親赴唐山,運返來靈壽大板e時瞬,內面無肉身
遺體,干礁開檀香木雕刻遺身來逗額爾,唉!台員地第壹富貴家族,落
場安呢悲慘實在遺憾,茲後代林家囝孫看到這位,定著吓鼻酸目燒,搥心
肝來哀三聲li,根據唐山返來e下腳手仔講:也叨1881～1862年間林文
察大破太平軍,尤其是1862浙江遂昌之戰, 互太平軍轉勝為敗,「皇金
等到生鬚才綰(提)走」(「皇金」著是「皇金甕」,人死十年了後,抾骨
入骨罐,囥佇路邊抑是山洞邊。 )「功敗垂成」,致使著太平軍抾恨
真重,咒詛欲逶文察給碎屍萬段,排洩心中怨恨。
1864年8月, 搪當林文察統領兵丁,重返回福建,來平定太平天國
軍時,敵方早著得著消息,踮遐僎便便咧等伊,設計好圈套欲請伊大船
入港,設計欺騙誘敵戰術, 互林文察重踏入唐山地了後,著一步一步行
入死棋悽慘e田地安呢甡。
1864年12月24號e腳兜仔,太平軍事先佇漳州通往福州e機關地,要
塞「萬松關」埋伏重兵,續落e瞬呤, sy3 (誘)林軍來攻,太平軍假影
敗, na行na退,等林文察一行「大船入港」了後,伏兵一聲倚來,文察
前後受包,光榮為清廷戰死,漳州「萬松關」自宋朝、明朝以來,著是
漳州上介險閃e關口,真正「壹夫守關,萬軍莫敵」li,林死後,太平軍
恨入骨髓,給伊碎屍萬段閣再燒甲無半絲,唉!台員暢e舞這齣e,世間人
叨有影百百款,真怨嘆li。
呾文察既然捨身為清廷,清廷噯真熱誠來照顧、來撫卹林家e遺
族,林家滿門忠烈,犧牲到呾,咁袂堪得官廳來稍照顧e是毋?官廳順續
噯大力來照顧林氏家族e興旺安全才好勢li,目前林文明將軍,征剿叛
賊洪氏集團e戰事, 猶搪咧(正在)進行當中, 嗯才 e瞬呤收起目屑,
繼續鏘落去、拚到底。
(35) 洪欉家族e地尺丁口,真贅真闊,規个草屯、南投佮一半
霧峰,攏是尹e勢力範圍, 嗯才丁曰健佮林文明聯軍,拍赫久,又閣動用
大砲,洪欉戰死, 安呢 嘛才戰一半爾,致使著老奸臣丁曰健e清兵佮文
明仙e鄉勇,必須著閣再戰一場主力戰, 奚著是鼎鼎有名e「萬斗六
戰役」。
佇這場戰事當中,徹底逶洪氏家族毀滅,連根帶枝給ii3uaai
koloso sa3,洪氏家族真悲哀,伊毋捌起兵攻擊清朝政府,是思想反清
爾,遭受滅族e遺憾,彼時無李鎮源、林山田來反對刑法一百條,保障
言論自由,唉,世界親象這款,由政府來屠殺凌治家己e同胞,真正稀罕
li,洪氏後代e囝孫應該爭一口氣來平反,上好是建一个「洪家花園」,
坪數贅少攏無要緊,一、二百坪嘛好,甚至三、貳十坪嘛吓使),佇遐
給栽le,林家花園這聲著袂食袂睏咧矣 ,尻倉逗柄矣。
這擺由官民合兵,攻擊洪氏家族e第貳次戰役「萬斗六之役」,洪
家損失盡慘,家破仁亡強欲滅族佇港墘(邊緣) ,家丁仁員一四界來離
散流浪,叨水流破布悽慘坐卦,伊e內容大概是安呢 : 「萬斗六戰役」
發生佇同治四年,1865年正月初1到正月15號左右,地點萬斗六
地區,(現主時南投縣省議吓附近,壹直延伸到草屯彼箍圍仔)丁曰健道
台e清兵佮林文明e軍隊聯合,來進攻「叛者」洪氏家族。(洪花、洪和
簡……)
丁曰健、林文明聯軍大約1000～1200兵員,武器用鉛粒步銃、
大刀、大砲、地雷,兵員武器佔優勢, 佇洪氏這爿,完全是守勢自衛性
武器,仁員不明,應該有400～500兵力,有真堅固e碉堡、瞭望台,武器
稍可卡輸勢,總司令是洪花元帥(彼時洪欉已死)。
戰事一開始,林文明佮丁曰健e聯軍,靠勢著仁員、糧草充足,武
器卡讚e優勢, 佇同治四年正月初先攻破洪憨古給摋死,尾後又閣摋
死「細粒e」頭兄洪和簡,最後對洪花發動夜間攻擊,洪花總司令慘死,
尹徒弟仔民眾,四散辿入去山區安呢,這擺e戰事,所有敵仁e領導者,無
論大粒細粒壹律處死,無合著戰爭e武德,這唅日後e日本統治者e作風
無仝,百冬前北京統治者佮東京統治者e文化,真正是有顛誕li,咱番薯
仔去互風颱尾掃著,有影是衰甲叫毋敢。
戰爭結束了後,洪氏家族,喪失大部分e田園、土地、水權,連塗
角厝、竹仔厝嘛去夆燒了了,傢伙損失真是悽慘梟悻安呢甡。文明仙
摃倒族敵,翩笪成功,趁機會併吞,或者是俗買入大量e田園,變做全台
員上第壹好額e家族,洪氏豪族佇中部地頭這聲落坑a,衰尾a,喪失領導
e地位。
(36) 1865年初這場霧峰林文明攻草屯洪家e戰事,著安呢結束
矣,事實來講,林文明佮洪家(洪欉、洪憨古、洪花)攏是「輸爿」,真正
e「贏爿」干礁是清廷政權爾爾, 也叨台員人家己矯袂好勢,欲翩手
底肉互人看,有影萬般無奈無伊法叨著啦!
到1866年為止,台員中部e三个豪族,戴潮春、林家、洪欉,翩笪e
翩笪,死亡e死亡,干礁霧峰林家猶好勢爾爾, 毋閣林家佇唐山折損林
文察將軍,阿叔視大林奠國候補知府,落獄梟悻咧關,對林家來講歡喜
免甚早,後頭顛誕了然才是大費氣、大艱苦,「燒爐添炭,著力閣歹看
」, 佇外來爛敗政權凌治以上,萬項攏衰韶甲種匏仔生菜瓜,有影臹歹
剃頭ahe !
人咧講『天下合久必分,分久必合』, 呾文明仙剿除洪氏家族、
戴潮春餘黨,雖然踏著時機,卯著袂少e田園水源厝地, 毋閣樹大欉興招
風,漸漸來引起清廷方面e猜忌,恐驚也萬不利文明仙若叛變,規模絕對
比戴潮春加十倍,到時是欲叫啥乜人來給平定?清朝身命即荏(lam4,
弱),國勢衰弱下消溜溜,欲na吓堪得啦 ! 清朝這方面愈想愈驚,腳尾
攏僬冷去矣。
拄著台員第壹家族林家,有錢有人無打緊,有作戰經驗這聲才是大
費氣, 嗯才這个時瞬,滿州人英桂將軍佇福州省城,真正著驚,密令丁曰
健收集文明仙e欠點,考核伊e黨性是毋是堅強,後日仔林文明若假仙,欲
給翩笪卡簡單叨著啦 ! 呾這聲文明仙衰矣,尻倉去互椅仔夾著矣,去
夆監視矣,文明仙皮噯繃卡拫(an2,緊)e,若矯袂好勢,隨時dek吓身敗
名裂,悽慘溜溜。
唉,平平是攻洪家e戰友,林文明將軍,佮丁曰健道台併肩作戰,按
怎戰爭才煞呤,著出現分裂袂團結呢?這著是政治e奧妙,文明仙做人
土直,卡毋捌這方面e坎坷空頭,噹時仔(原來),滿族為著驚閩、台二省叛
變,特別派仝是滿州人e「英桂將軍」,來坐鎮,來考核眾官員富紳e政
治思想,看尹是毋是咧罵「蔣總統」、是毋是咧「為匪宣傳」、是毋是咧
「搞台獨」,若是者, 噯掠去唸綠島小夜曲安呢甡,英桂這位滿族e特務
頭仔,既然ga欲尋林文明將軍e麻煩以上,這聲文明仙叨衰韶啦。
閣再「台員道台」丁曰健,普通時宛那看文明仙袂做e, 嗯才講林
文明佮丁曰健這二位大官,門扇枋咧逗袂峇,這聲隨人行一路,潦落雙
爿分裂肖逗肖傾(king2)e局面。
文明仙戰贏洪欉家族,等於是替清朝挽去二枝中部e毒釘,袂使著
林文明變做中部第壹勇e家族,中部百姓雖然大梟悻艱苦,地方糜爛, 毋
閣這聲清廷,亦無欲閣「顧忌」林文明矣,人肉鹹鹹,無咧給臭輦(不怕)
伊叨著啦,文明兄只好家己卡看破e,萬項卡張弛e,老皮繃卡拫(緊)e。
清官ga欲給文明仙翩笪以上,尹使弄洪欉家族來提出訴訟,告林文
明仙佇戰時,趁機會併吞佮俗賣洪家田園e代誌,林文明將軍真正大粒
汗細粒汗,規身軀凊汗僬拚出來li。