,
第四章 南瑤宮民氣興旺有甡張
(37) 同治年間,彰化南瑤宮(彰化媽祖)e香火真正興旺,廟厝
e扮勢真正浮頭夯起,信徒千千萬萬,有影擎甲掠袂稠,普通時仔,燒香e
著袂少矣,若是拄著年仔節仔, 奚著人群佳繹鏘鏘滾,規條街仔是窒倒
車路滇滇滇(滿), kue4(擠)甲吓出油安呢甡,鬧熱擺收e香火錢,飽滇
zatzat漲漲漲, 互汝綰甲叫毋敢。
致使講咱地方上茲頭兄,攏吓真正來注重媽祖婆e奉威伏祀,來收
挽民心,發揮政治仁物佇地方上e影響力, 互伊喚水吓堅凍,仈人定著
吓來叫阿伯, 毋敢來搧伊e腹堵邊li,这著是清朝年代,地方士紳壹再出
錢出力,唅心gap命來迓媽祖,來做爐主e因緣,台員人雖然毋是宗教國家
, 毋閣百姓「痟媽祖」,叨一四界仝款li, 嗯才大粒官大粒建,文武百官
臭豆干,也叨這堀深深,無潦袂煞li。
1861～1865年中間,阿罩霧e林文明將軍,南征北戰e結局,粒積了
袂少e軍功,升官發財是大富大貴好八字li,伊e田園,全省第壹贅,佮台
北板橋e林家花園豪族有bii(對抗)著是啦,二爿陳皮蘇黨,半斤對八兩
有鏘li,伊e錢財全台員排第壹坎第貳坎嘛無問題。
人講「富可敵國」,親象孔祥熙佮這嗎蔡萬霖安呢甡叨著啦,算起
來这攏闌珊兮爾,上第壹厲害林文明將軍,伊有真豐富e軍事作戰經驗
,這點無人敢佮伊假仙,連清朝方面叨哈伊袂倒, 毋閣尾溜仔檢討起來,
这毋是好空頭,勢力甚僥擺浮頭,吓互官廳兮目空赤,這空縫對文明來
講,定著是袂好勢li,林文明拍算稍寡有覺悟e款, 嗯才(mzia31) e瞬呤,一方面
儘量卡收縮e(收斂), 毋倘甚捅頭,另外一方面儘量來做公益事業,尤其
是眾人注目e宗教事務,看吓凍來減退現時對伊e消毒(批判)袂?來突破
草笠出頭天, 互面腔鼻目嘴卡有甡張一下。林文明將軍宛那情理人
le,算算le,潦落媽祖祭典,上介好逗陣e款,逐家品無掠包e,佮百姓e「
吊遠」來縮短, 嗯才逐家gap做一个,吓盡磅逗搭,做大好人安呢。
總是啊,這七、八冬e當中,台員中部發生動亂梟悻,袂少人e性命財
源攏臭礁去矣,林文明戰贏戴潮春佮洪欉豪族了後,戰贏罔戰贏, 毋閣得
罪真贅蒼生百姓,添加了袂少e冤鬼,自然dek,一股陰氣茫茫渺渺,是毋
是吓來尋林文明算帳?
欲消除這味凶煞之氣,上好是採用媽祖婆這項慈悲e愛心來化解,
互眾生大德佇香煙浮夯e當中,來降福造福, 互後世永遠e人, 毋倘閣來
受著戰事肖摋 e拖磨艱苦,林文明海內外轉戰各所在,肖摋無數,閣
卡吓凍了解仁生e意義,性命e尊嚴安呢,致使著伊宛那真有誠心來接著
媽祖祭拜,做頭兄爐主出錢出力,擔這个重任li。
ga有天時地利仁和,種種先天有利e款勢以上,台員中部第壹豪族
林文明,自那擔起了南瑤宮e頭人責任,亦負起仁力佮財力e義務,咱文
明兄仔,這聲欲潦宗教矣,收腳洗手做善士,暫時收縮起軍漢e威儀,專心
唸經,阿彌陀佛,排解世間艱苦……(唉!無想著林文明潦落媽祖這堀了
後,顛倒引起閣卡大e天大地大e代誌, hut甲強欲袂收山纜尾e,真正食
力li,文明啊文明,一波未煞,另波又起,汝na吓八字赫薄,運途慘醜,
實在有影吓搥心肝li。)
(38) 是按怎拜媽祖,吓拜甲出代誌?吓出人命?咁講慈悲為懷
宛那有罪是毋?咱这著噯逶媽祖e故事來講起,媽祖婆,叫林默娘,福建
蒲田湄州島仁氏,一世人慈悲為懷是救苦救難, 佇西元987年宋朝時間
,得道升天,後日仔佇福建廣東沿海地區,保護茲漁民討海人安全, 互
百姓真正給擁護安呢,這一千年e當中,北至山東省,南至澳門,攏真正崇
拜媽祖婆這尊神叨著。
毋閣咱給土想,媽祖婆若準是傳入台員來講,竭竭(頂多)嘛是一尊
細粒神爾爾,為按怎吓變做全省上第壹興旺、第壹壓倒性e神明?按
怎「三月痟媽祖」全省僬鬧熱,袂去「三月痟祖師公」或者「痟土地
公」?甚至講連觀音佛祖,如來佛這尼大仙出名e神,亦拚袂過媽祖
婆,这著奇矣,相信講,到今仔日, 宛那有真贅人(尤其是台北e外省同胞
)壹直想袂曉li,若欲講破這層奧妙,这佮政治宛那有淡薄仔牽連致e。
台員地,中、北部時行拜媽祖, 毋閣佇台南高雄彼角勢,拜王爺e習
俗袂輸媽祖婆,吓使講臹興叨著,这有歷史e因緣安呢, 1683年清康熙派
施琅攻台員,鄭氏政權投降,清廷占有台員了後,對「反清復明」e政治
思想,真正警覺敏感,叨頻若佮政治有關係e宗教行為,毋是大力推廣,
著是全力壓制。
尤其是有反抗清朝思想者,壹定噯斬殺無赦, 摋甲無半隻,互伊
食匏仔無留種,袂使有一絲一縫漏鉤去,「王爺」尤其是其中e「池王
爺」,伊e發音佮「鄭王爺」肖接近,暗示「鄭成功國姓爺」, 嗯才 e瞬
呤,清廷kimo 臹醜,看甲臹袂做e,這聲全力扶「媽祖婆」來達到壓
制王爺廟e目的。
真拄好,台員是一粒海島,一四界漁港贅,討海人贅,媽祖婆欲興卡
簡單叨著,一項宗教活動, ga有官方全力推廣以上, 嗯才無外久全省著
鏘鏘滾,叨擎甲掠袂稠安呢甡,清廷e鼓勵,各所在四界設「天后宮」,由
縣衙門官方來祭祀,壹般非官方冊封e著叫「媽祖宮」安呢,這二百年來
官民全力推廣,媽祖婆e行情壹直夯懸, 呾這嗎一四界媽祖宮攏嘛 臹
出名li。另外一方面, 也叨官方排斥e結果,伍府王爺e勢力,壹直夆釘
佇台南高雄屏東彼箍圍仔爾爾。
媽祖宮e背景, ga 佇官方民方雙杠拍拚以上,這聲全台員擎iaia,
四界流傳,庄腳山坪僬入,竄根入骨是威威鑽,年久月深是一路發發發,
發甲互汝叫毋敢叨著,尤其是一寡卡保守卡排外e客人庄, 宛那 臹興臹
贅人拜,變做講伊是全台員所在,共同e宗教信仰無毋著。
(39) e瞬呤,拜媽祖ga變做全台員風俗e主流以上,這聲定著
吓發展一套,充滿台員氣味e幼秀精緻e宗教禮俗,所以講,咱茲少年仔
互汝袂鐵齒e,一个國家上要緊e, 毋是銃砲,是文化叨著,汝看聯合國咧
表現尹烏人e歌舞民俗時,逐家攏嘛謳咾甲吓触舌。
所以現主時咱茲少年家仔,對台員人宗教e主流「媽祖祭典」, 噯
卡注意看e,細膩來欣賞品味,無論是神像、廟景、文物、戲曲……攏
噯認真給看一下仔卡有e,因為奚是咱祖先,千辛萬苦留落來e血脈文化
,尊重民俗文物,著是尊敬咱e嗣大祖先仝款li。
經過了規百冬e發展佮改進,台員人e主流宗教,拜媽祖婆這字項,
已經發展成精緻幼秀e文化,伊包羅真贅項目,無法度逐條寫出來,其中
有幾落項卡要緊e, 佇茲稍可寫一下,因為這佮林文明「鬥清官」e故
事有關係li。
(壹) 「媽祖甡」迓媽祖,媽祖婆e甡日是(舊曆)三月23 ,台員南
北二路各鄉鎮,攏吓出陣頭弄獅鼓亭來迎鬧熱,一四界砲仔放甲乒乓叫
安呢甡,有換香、隨香、祭拜……東西。
(貳) 搬戲佮辦桌請人客,熱情e香客佮誠心e百姓,普通時仔是儉
腸筴肚,十貳月凍霜, 毋閣拄著拜拜e日子, 奚著大魚大肉,苦毋講人客
盡拚盡hut,補一下仔油臊, 互汝暢甲叫毋敢, 安呢 嗯才有誠意叨著。辦
桌請人客了後,卡有鍼頭e人,吓請一陣北管來歕吹拍鑼,壹般人嘛吓凍
來廟埕,看南管戲或者是北管戲,增加節目e氣氛安呢,咱e祖先著是安呢
活過來e, 安呢艱苦濫快活拚過來e!
(三) 長途到北港去進香,往回有七、八工,有八、九工,路程艱苦
硬斗, 毋閣茲信徒真正有耐性誠心, ga有媽祖婆來保庇以上, 呾欲鏘
著鏘一下仔卡有e,展一下仔氣魄le, 嗯才有甡張,這款e代誌到今仔日,
猶有大甲媽進香新港,白沙屯媽祖入北港e民俗安呢甡。
(四) 媽祖會e成立,各所在e同志者,仝坐船e,仝做生理e,逐傢來
結拜,共同伏祀媽祖婆,一年食一擺會,聯絡感情互相幫忙,食媽祖會,
这是民間半公開e結拜組織,佮食觀音媽會、食聖公會仝性質li, 毋倘
看伊「細腳會」爾,外來e統治者,上介驚這味兮!
(40) 咱彰化地頭,坐位佇台員地南北二路e半中指, 佇清朝
同治年間1860～1870,自然dek亦發展出家己e媽祖文化,這个拜媽祖e
文化,真正幼秀逗搭, 互茲百姓眾生,逐傢攏意氣揚揚真正熱誠li。
彰化e南瑤宮,人講外媽祖,自然變成彼時瞬「彰化縣」上出名e媽
祖宮安呢,同治年代e彰化縣,包含現主時e彰化、南投、台中縣市,地尺
真曠闊,物產豐富,全台員地e穀倉無hau6韶。
南瑤宮e文化價值,壹般人無啥了解,尤其首府地咱茲台北暢e,閣
卡毋知伊e輕重,台北人包括我家己,攏去互官方宣傳, 毋閣宗教e代誌互
汝袂鐵齒e,設備佮文化,內行人現看著現輸嬴矣, na著閣再辯解?
現主時這二間廟,我攏有專工去研究,鹿港天后宮裝叉真嫷真壯觀,
簡那觀光飯店le,代表古早鹿港有錢人e「玩意兒」, 毋閣咱南瑤宮,真
正古樸實在,物件逐項烏金烏金,入廟內時袂輸時光倒流一百年,真有古
蹟e風味叨著啦 !
總講一句,南瑤宮真有文化價值,行踏一迣(zua5,趟)袂了錢啦!…
…咱南瑤宮佇清朝同治年間, ga有香火上旺e氣勢來講,這聲啥人來主
持廟務,啥人來做董事長,定著是變做四方仁士敖人,來競爭捙拚e目標
li。
同治五年1866,林文明將軍平定戴潮春之亂、洪欉叛亂了後,官勢
臹擎,後壁山臹崎,致使著南瑤宮e主持,落佇林文明將軍e手頭,林文明
有錢有勢有人,俑仔標僎便便,嗣大氏細喚潦著潦,全台員比大頭拇頭
一粒,有影喚水吓堅凍li。
林文明ga做媽祖宮e頭兄以上,這聲心涼脾透開矣,借宗教拜神e力
量,吓凍來摯接地方上e感情,亦吓凍來化解各地頭冤族e不平氣氛,總
是a時間一工一工對咱文明仔將軍來講,不止有利叨著呢!文明仔心肝頭
有卡定著矣,唉,林家犧牲林文察阿兄、奠國阿叔,才有今仔日這个場面
,林文明將軍, 噯顧互伊稠,永遠維持,為林家孖孫萬年興旺來拍算li
。
南瑤宮一年一度,上介大條e代誌,著是掣茲信徒,遠路頭去笨港進
香,往回六、七工e款。茲媽祖婆e忠實信徒,抱著艱苦坐卦,唅心gap命
, 安呢一步一步,行遠路到北港媽祖廟進香,代誌煞了後,才閣行返來彰
化市,仝款是一步一步行返來,這款毋驚艱苦e「苦行僧精神」,真正吓
互汝了解宗教對仁生教化e意義安呢甡。
現主時(1993),南瑤宮進香北港媽祖已經落坑溜尾矣, 毋閣台中縣
大甲媽半暝欲起駕去北港進香時,台員電視公司有現場轉播, 逶十貳
點轉播到二點,小弟守佇電視邊仔,看到真爽勢,有影盡磅逗搭,謳咾甲
叫毋敢著吓哦!
佇今仔日(1993),大甲媽到新港進香,是一層真正歡喜,通人贊助e
喜事, 毋閣佇同治九年1870,彼時逶南瑤宮到笨港e進香, 遂發生一場
官紳肖鬥肖摋 e流血悲劇,唉!台員人活佇滿族外來政權生活,叨真正
梟悻衰韶,連天大e喜事,亦吓變悲劇,講起來有影ham4甲有偆去li 安呢
。
(41) 同治八年左右(1869),彰化地頭,信仰媽祖婆e風氣,真
興真聖,嗯才佇民間有組織各種「媽祖會」,伊e性質佮結拜會差不多
,一方面來聯絡感情,分享媽祖婆e恩澤,另外一方面吓凍來保持家己e
安全,這款代誌,佇彼時治安真醜政治爛敗,無法無天e社會,不止也
要緊,有影看現現li,這款秘密結社,對番薯仔來講,真正吓乙著li,算
講無潦袂煞,茲阿伯阿姆攏信這斗, 互汝袂鐵齒e!
台員人佇前清年代,有四款宗教性e結社活動。第壹項著是「神明
會」,譬如講讀冊同窗e、仝齊做生理e、仝故鄉血跡地e、仝政治思想
、做兵仝連e……,尹吓共同伏祀一仙神明,來定期辦桌食會,互相激感
情,互相來保護安全,有土地公會,聖王公會、觀音媽會、媽祖會……
。
第貳項著是「宗親會」,仝字姓有一个意念交合e中心,譬如陳祖
厝、吳祖厝……。第三項是祭祀公業,仝一个祖先,後傳真贅囝孫,提
一部分祖產做公錢,配合宗教性儀式,來祭祖緬懷祖公安呢。第四項著
是「摋豬公」,三、五年一擺或者是七、八年一擺,仝庄頭e人來共同
伏祀一仙神明,到時家家戶戶摋豬公大鬧熱,來宴請人客著是啦 ! 譬
如現時三芝鄉佇大道公摋豬公,各庄頭輪流舉辦安呢甡。
佇彰化地區,「媽祖會」這款e「神明會」上介興,干礁佮南瑤宮
有關係者,著有十外个媽祖會,分別逶各所在各角勢來安呢,有e是彰化
來e、有e是北沙屯來e、有e是大甲媽方面……算講旗號臹贅臹鬧熱叨
著啦 !歷史上有記錄,本宮媽祖吓有老大媽會、新大媽會、老貳媽會
、興貳媽會、聖三媽會、新三媽會、老四媽會、聖四媽會、老五媽會
、老六媽會……。
1870年初,霧峰林文明將軍,吓使講是全台員島,上介有名聲、有
錢銀、有人緣e頭號仁物,伊效忠清室,得著官方e靠勢,後壁山臹崎,伊
二擺e省內戰爭,得著袂少e田園水源房厝,伊做人真正慷慨,對茲散赤
人、羅漢腳仔攏真正有照顧, 互茲艱苦人仔,暫時有甡張有一碗糜倘
吞li。
伊真誠心來敬媽祖,禮神佛,得著百姓真熱誠來扶伊做嗣大,叫伊
阿伯,是逶心肝芛仔bu3出來,無外久e中間,咱林文明將軍,袂輸是「民
族的救星,時代的舵手,世界的偉人」安呢甡。
好人、忠厚人謳咾伊敖做人,伊笑笑無咧客氣,卡歹剃頭e人,罵伊
臭屁臭逐(da k5),伊宛那老神在在,無咧給信斗安呢,林文明有影擎甲掠
袂稠叨著,無論大尾細尾、大粒官細粒建,伊攏恬恬無欲扶taa4, 也叨
人大、錢大、勢大li,講罔講, 宛那無人敢搧伊e腹堵邊安呢。
總講一句,彼个時瞬e林文明, 毋管是佇中部地頭亦好,或者是全台
員島來講,攏是壹粒壹e大仁物,伊集中政治才子、軍事才子、農牧才
子、宗教才子、警政才子、文化才子……規身軀攏是寶寶寶。
彼時1870年,美國早已經獨立100冬矣,選過貳十外位總統,林文明
若準出世佇美國或者英國,無定著吓選稠總統嘛無的確li,總是啊,林家
經過重大e捙拚佮犧牲,今仔日林文明有法度得著中部地區e總君頭,尤
其彰化媽祖南瑤宮, 這尼偉大e廟宮,咱林文明將軍宛那得著絕對e頭
兄, 互人擁護尊重,順續夆推做三月廿三日北港進香e總領導,實在有
影無簡單,真正「無二步七仔, 毋敢過虎尾溪」li。
(42) 林文明將軍,得著彰化媽祖南瑤宮e總領導權,这有啥乜
大意義否?有,茲茲(確實真有)真有扮勢li,因為南瑤宮e信徒自來民氣
旺盛,熱情噴火,氣魄拄天毋驚生死,捍頭(主持)e人無三二步七仔,絕對
摯節袂稠li, 佇茲有二條故事,講咱南瑤宮e民氣夯浮旺火熱燒, 互汝
袂凍鐵齒咧!
第壹層著是「火燒鄭秀才大厝」e代誌,說明百姓合作,對抗公權
力e「自力救濟」,咱茲彰化暢e老歲仔,頻若講起火燒鄭秀才大厝,隨
人著嘴笑目笑,大喟忍袂稠,活欲噴飯味是(的樣子),有影愈想愈心適,
對彼陣特權份子,普通時仔食百姓到到, 僥擺 ueue,茲忠厚e庄腳人
驚伊e權勢,不時躡e咧等,敢恨毋敢講, 毋閣時機來e時瞬,欲給翩笪li,
逐家吓想一寡步數給電甲青尺仔青尺, 互特權者食了暗虧, 毋敢haai
一聲安呢,給教示教示,後擺仔,茲夭壽特權看吓卡收縮一絲仔否?
佇茲我一時想著,三十冬以前,高玉樹佮周百練咧捙拚台北市長e
時瞬,高玉樹佇淡水河水門(大稻埕附近),做競選政見演講,講到搪好
勢搪 siakpa,下腳鏘鏘滾聽到盡磅逗搭,「欲罷不能」真讚e時瞬,忽
然間監察員來撥一桶冷水,講「十點已經到矣,袂使閣再講續落, 抑無,
吓違反選罷法呢!」下腳茲群眾「啐幹力撟」喧甲袂講了了。
這个時瞬,有一个先覺,暗暗仔獻計互高玉樹,欲給監察員糊一pu
屎li, 嗯才 e瞬呤,高玉樹當眾說明「呾歹勢哦!我手錶一時故障矣,
毋知這嗎十點到矣抑未?」下腳茲群眾知影高玉樹e暗示,趕緊眾人合齊
印講「猶未十點啦, 猶差貳十分e款li」續落群眾包圍監察員,監察員
干礁無伊法, 互伊加講貳十分,這著是群眾e力量,來對抗無合理e公
權力,所採取真正姑不衷e「自力救濟」法度li。
光緒初年,南瑤宮對面蹛一位鄭梅臣秀才,做人惡毒歹癖,靠勢伊
有錢有勢爾,不時叨勾結官府來凌治茲百姓 ,毋但是霸佔別人田地
爾,專門包司法人命案件,卯趁大錢,百姓是「敢怒不敢言」,民間積
怨真深, 毋閣講罔講,王爺尻倉無人敢摸,閣卡怨嗟, 宛那無人敢搧伊e
腹肚邊,真正哈伊袂倒叨著啦,有影無伊法著無伊法!
庶當時,咱茲百姓相信,南瑤宮香火興旺,聖甲吓食糕仔, ,完全是
好地理「美仁照鏡」致蔭著e,這聲鄭梅臣秀才佇廟前砌大厝,吓掩遮
著南瑤宮山川門e一半,破壞著廟e好地理li。
鄉親道友,透過真贅管道線路,去交涉、去款勸,參詳鄭秀才「手
下留情」,手se夯卡懸e, 勿來傷著真地理害著廟運, 毋閣鄭秀才有
錢有勢,大尾溜溜,叨無咧給信斗,咱茲村民庄內嗣大,逐傢氣跳跳,心
肝頭一腹火咧無地透,想法度來「自力救濟」,對抗爛敗無能e公權力,
安呢鋩角才矯吓返來(這樣才能討回公道)。
拄搪有一回,十外萬人e隊伍,行路到北港進香,回鑾e時瞬,眾百姓
計域(計劃)欲給鄭秀才輦一斗仔, 互伊知影鹹汫le,十外萬信徒回返南
瑤宮時,舊曆三月21日,進莿桐老廟口,「忽然」間有童乩「起童」矣,
閣跳閣喚,規晡久接著太君神令密示「噯燒掉鄭秀才e大厝,彰化媽才
吓起運,吓真聖來保庇眾生……」,这自然是事先套好好致e, 嗯才 e
瞬呤 ,每一位信徒攏提一只大把壽金,引火欲去燒大厝。
另外彼爿面鄭秀才e人, 宛那得著消息,趕緊向彰化縣衙要求保護
,知縣嗯才派出一百名官兵去尹兜保護li, 毋閣進香e人,仁山仁海,
hehe33趒鏘鏘滾,人贅勢面貓,親象山崩海水灌仝款,百外名e官軍,對
付十外萬進香客,摯節袂稠,官兵毋敢din動,落尾也`「不了了之」,親象
高玉樹e監察員,「哈」觀眾聽眾袂倒仝意思li。
結局鄭梅臣秀才e大厝,自安呢去互眾百姓燒了了,以邪制邪,鄭秀
才一个面簡那gen6 le,咱南瑤宮e風水地理廟運, 宛那閣再夯興li。
互汝知影咱彰化暢e,媽祖信徒e偉大力量,讚著是讚,敖著是敖,民意旺
盛火氣滇,真正互汝袂鐵齒e 安呢。
(43) 第貳層故事著是「施九緞事變」,發生佇清光緒十三年
,1887,清朝這欲倒閣e年代.巡撫劉銘傳為著欲傾(king2)集建設費用,
命令全省土地重新測量抽取重稅,來應付官府e大條開銷,這聲引起眾
百姓大反感來武裝反抗,險e造成悲劇,咱茲南瑤宮e彰化暢e,實在叨有
影勇敢li。
這款代誌,現主時台員宛那有發生li,有影攏是仝公司出品叨著
,1992夏,國民黨財政部長王建愃,為著欲替老Ｋ拭尻倉,彌補龐大e財
政赤字,按算欲掠茲眾地主來剝皮,掠水鬼窒涵空,規定土地買賣噯抽
重稅(利益六成),規入公庫來掠平,引起台員人真大e憤慨,一四界幹公
賭媽鏘鏘滾,結局佇民意強大e壓力以上,鼻仔摸le暗然落台謝罪,伊是
外省人,真袂了解台員人愛塗惜塗e傳統觀念。
台員人唅心gap命捙拚規氏人,主要著是為著這塊土地爾 ,所有
財產盡看嘛看這塊地著是啦,若照新法,這聲納稅金,財產欲給掘去一
半,莫怪咱茲台員暢e吓這尼憤慨安呢甡,是ce4(恨)王建愃到搭底, 毋
叫伊「Or Gen Suan」改叫做「夆 Gan Suan」,有影歹聽溜溜,該也簡
單互汝筴去配!可見土地來抾重稅e齣頭,吓夆翩笪, 佇台員地是袂時
行e 啦,卡加汝嘛夆給汝撼(ham)甲大空細裂安呢甡。
光緒十三年,頭傢劉銘傳,為著傾建設財源,下令全省田園重新測
量,啟徵新稅,本臹這亦是一步好法度, 毋閣清朝e官吏,自來腐敗食錢,
貪污慪搭,利用這擺丈量土地e機會,來壓迫酷橫來蹧躂茲百姓,好土地
水源讚e,伊挑工給報細塊,抑若奚醜地沙埔石粒地,伊顛倒給報大
塊地來納重稅。總是啊,好歹大細隨在尹官僚去舞,無公平無客觀叨著
啦。
甚且有e清官袂曉算術,土地面積袂曉劃做幾个三角形來算,連三
角形是底×高÷２ 嘛 毋知一箍芋仔番薯,直直用「目測」,省時省工
卡袂流汗安呢,致使講無公平、梟悻e代誌一大拖,無外久中間,全省一
四界「啐幹力撟」,風聲喚喊(hua4han4)鏘鏘滾,百姓溢溢ci3倚來,「
官逼民反」咱茲忠厚e番薯仔拚身拚命,為著田園財產,夯硾夯biang5,欲
來佮官廳仔輸嬴一斗仔, 恁父老皮配汝e凊肉笪,佮汝挺搭底,看豬母肉
爛抑是脆,尹娘客兄公卡好!
官廳欲強逼重稅,彰化縣(台員中部)e作穡人,食穿乏搭,強欲袂生
活叨著,百姓對食錢官宛那看甲臹袂做e矣,忍甲頭殼擎(cing 4)煙挽搐
搐,咱講烏仔魚袂堪得濁水激,幹, ga 互伊逼著以上, 呾這聲港無潦
落袂煞,嗯才茲農民規庄規陣,夯鋤頭扁擔集中佇信仰中心南瑤宮,僎
欲包圍官衙彰化縣府,這場官民衝突肖摋相戰,可能吓爆發流血事件e
款。
光緒十四年七月,彰化縣e百姓已經摯節袂稠矣,新丈量了後e土地,
噯徵收大量e稅金,逐家腹肚著噯 ha2起來矣,「施九緞事變」著安呢發
生矣,事變e模式, 宛那是比照「火燒鄭秀才」,利用宗教信仰e力量,來
團結住民發揮無比e威力,達到政治目的。
八月29彰化城內外,謠言傳來,有心人著入去城內分發黃布條做內
應,第貳工,施九緞身入神轎了後,「忽然」間「媽祖」來起示,童乩發
揮,講天意欲燒燬丈單,大旗寫明「官逼民變」,無一二工e中間,大批e
鄉民ci3倚來,人群佳繹鏘鏘滾,搢(,擠)甲欲出油去。
九千人來包圍彰化城,彼時總指揮站設佇南瑤宮,南瑤宮因為是宗
教地,政府官廳真歹處理,神e問題歹講,若矯袂好勢,無定著吓引起另
外e災難嘛無的確li,可比現主時e台北龍山寺仝款,雖然老Ｋ「恨伊入
骨」, 宛那 毋敢搧伊e腹肚邊li。
九千人圍彰化城,西門南門強強欲互人扛去,佳哉後援e清兵好嘴
苦勸,半逼半講, na軟索咧牽豬,經過三工了後,代誌才解決,茲庄民亦
慢慢散去,掣頭人辿走,官廳亦無閣追究。
總講一句,彰化媽祖真興真聖,聖甲吓食糕仔,民氣赫尼旺盛,假
使百姓若假影「拜神」「天意」「起童乩」(親象火燒鄭秀才模式),
眾人合齊來攻打清朝,結果吓按怎?是民間吓成功,抑是統治者吓成功?
這真正心適li,下腳e故事著是這二款力鬥爭e經過,看逗底叨一爿吓贏
安呢甡。
第五章 文明仙「功高震主」, 猶放外外
(44) 阿啄仔猴(洋鬼子)有一句好話咧講『智識著是權力,健
康著是家伙!(財富)』ga出氏做人以上, 佇社會徛起返捯中間,上要緊这學問
智識頭一層li,頻若咱茲赤腳仔番薯仔,有影皮著噯繃卡拫(an2,緊)e,
若是倒吊無墨水,無一絲仔腹內,一个安呢倥倥戇戇夆裝痟咧,不時汝嘛
衰e咧等,卡加嘛 互人惼甲無卸無示,人講「戇面袂曉看三色,社會返捯
無半撇」,全全嘛「學問」著e,有影互汝袂鐵齒e 安呢甡。
尤其咱茲大官虎仔,汝著噯卡張弛e,官場烏暗,政治惡毒,青狠酷
橫,到甲袂講兮醜 e坎站,有影臹歹失德矣 奚!學問若無到,稍寡
矯(處理)袂好勢,腳踏tut去顛誕,舞甲袂收山攬尾時,這聲著害溜溜
安呢。
症頭卡細e,弄傢散災(ze),田園盡了,这猶無打緊,若症頭致卡大
條e,無定著性命休去,殘殘脆脆互汝好勢,一人三條命汝嘛袂赴死,死
甲互汝無人燒香點火著吓哦,政治烏暗無情,有影汝想落著腳尾僬冷去
安呢。
話頭給講返來,1870年左右e霧峰林文明將軍,是毋是有材調來應付
官場e烏暗sam來?伊e學問智識按怎款?伊到底是一个文武全才e腳
siau3,無論做文兮、擸武e,攏真在腹內行,知所進退應付有方,或者干礁
是「一介武夫」爾爾,無半路撇,這攏真正要緊,目前林文明將軍e處境真
正乏搭,袂輸吊佇半天行鋼索,稍寡無細膩,汝著吓跋甲粉身碎骨,永遠
袂超生e!
經過1861～1866幾落擺e戰事,霧峰林文明將軍,平定了戴潮春e叛
亂事件,順續擊殺草屯豪族洪氏家族,解除清室政權e心腹大害,功勞真
大, 嗯才(mzia 31於是乎) e瞬呤,一路升官發財,擎iaia,閣再踏著時機,趁
戰事佔買大量族敵e田園,致使講林家一聲變做全台員地,上介好額、上
介有官勢e大家族。
毋閣表面上看起來真正風光,真正僥擺, 奚是無法度來減少林文
明心肝頭e不滿佮遺憾,林將軍內心深處,規粒「心肝芛仔」是酸苦悲
慘,象針咧刺仝款,竄根入骨威威鑽安呢,林家滿門忠烈為國拍拚,犧牲
一个兄哥,另外阿叔亦關佇櫳仔內(監獄內),另外又閣盡散家財,互財
政真正困頓e清廷官廳e稍敨(tau1)一口氣le。
林家為清室盡忠盡甲即尼歹命, 即尼硬斗,映望清朝吓凍稍互
伊笑面le,若準無法度答謝林家來講,上起碼嘛袂使閣來樛苦
(kiau3ko4,故意為難)林家,來加添著林家物質上、精神上e笪頭,做人
總是噯論氣魄論英雄安呢甡呢,看看咧,到茲來矣,林文明將軍滿腹e心酸,
有影叨無地倘消透,壹切由天安排,「人咧做,天咧看」,天公吓疼戇人
啦!
(45) 政治鬥爭是無情,派系咧肖犮(pua4)閣卡青狠酷橫,無血無目
屑li,官場若靠勢著du5(押對寶),有當權派做擋撇,這聲著財源豐富,
萬項順序來無往不利, 毋閣若是派系鬥爭輸勢,抑是換人換朝代,這聲
汝著害溜溜,有影腳手僬麻痺矣,症頭致輕e,落官失財是稍寡代,若症頭
食力e時瞬,泛勢連性命著休去嘛無的確li,所以講政治臹烏暗,親象李
鴻章做赫尼大e官員, 嘛是警戒尹囝孫,絕對毋倘潦落官場,來保身保
命li。
1870,霧峰林文明將軍,衰韶兼下消,伊e後壁山總督左宗棠,漸漸
失勢,欲調去陝西做官,致使敵對派系e英桂將軍,對林文明閣卡苦毒,
食伊到到,不時嘛設計欲給翩笪害慘,迭迭欲挖一堀仔引伊來跳,掠伊
來「大船入港」,這个代誌空縫危機,林文明將軍宛那真正清楚,這聲
紅龜皮liuliu,不時嘛驚e咧等。
咱文明仙,今仔日徛台員地吓凍來出名,財權肖ta,全然是咱左宗
棠總督一路提拔e結果li, 嗯才 e瞬呤,咱文明仙仔,感恩閣感慨,有時
瞬想著目屑叨吓滴,唉!英桂啊英桂!汝這隻滿州老奸臣,阮阿罩霧林家,
滿門忠烈,壹心效忠清朝皇室,為著皇清,阮林家無惜萬貫家財,錢大佰
人著無肉,替清廷出糧出兵,為著皇清,阮林家無惜家己性命,犧牲兄哥
林文察將軍一命,吞銅食鐵目屑暗流安呢甡,為著皇清,阮林家出兵攻擊
仝是親堂e戴潮春佮洪欉家族, 互後世台員人罵阮是台奸。
我今仔日林文明,下消罔下消,宛那是有自尊有仁格e人,阮來為
皇清為甲即忝(累),為皇清流血流汗,這嗎清廷無來感謝叨咧慘矣,卡
有閣再「恩將仇報」來吊脰搶後腳是毋?
總是啊,人e忍耐性是有限度li,我文明仙仔,這世人上第壹氣人「
忘恩背義」,到時瞬汝若逼了甚忝,我宛那吓「猛虎反撲背水一戰」,
也叨貓食鹽忖死e矣,港潦落去來佮清兵大捙拚一斗仔,看欲死豬哥抑是
豬母?尹俍客兄公卡好le! 這毋是反叛清朝,這是「官逼民反」, 互全
世界來評論道理,看我林家是毋是「仁至義盡」,仁情義理僬排盡磅逗
搭安呢,到茲來矣,欲鏘著鏘一斗仔卡工夫咧,恁父僎便便咧等,老皮配汝
e凊肉笪安呢。
眾位看官,萬不利林文明將軍,若是心肝掠坦橫, 佇「官逼民反」
e勢面下,姑不而衷來興兵謀反清室,咁吓成功?我看这真歹按算li,咱
普普也給掠,應該是有贏面才著,第壹,清朝兵完全是講外省話,尹孤軍
深入台員地,逐項生疏,佮百姓袂逗搭,「軍民袂凍抾肖食穿」安呢真食
力li,文明這方面吓凍用宗教聚眾;第貳,滿清拄拄處理好太平天國,內
部伍勞七傷,元氣大ce3,無氣力閣再作戰;第三,台員海峽風湧險毒,路
遙弄曠「鞭長莫及」,銃子拍遐叨冷去矣,軍兵運動硬斗li;第四,霧峰
林家財力豐富,有法度挺搭底。
而且人氣僬僬,黨羽密布,進退順序;第五點上介要緊,著是林文明
身為戰將,無論福建地亦好、台員地亦好,一四界肖摋,有真豐富e作
戰經驗,這硬拄硬,草蓆捲針把,佮壹般秀才造反無仝款,伊是武將, 佇
台員地欲尋清將來壓服,這聲有影歹紡li。
自以上e理由,假使清廷欲壓迫林文明,或者欲摋文明,攏無奚簡
單li,泛勢互文明仙先發制仁,清朝塗塗塗嘛無的確li,所以講一个富
強材情e文明仙,欲佮腐敗e清兵相拚, 宛那是陳皮蘇黨,半斤八兩e扮
勢li,清廷官廳仔毋免歡喜了甚早安呢甡。
(46) 毋閣講罔講, ga欲求功名來服嗣清室異族以上,文明仙
徛位宛那是卡輸勢li,巴結頂司叨咧袂離矣,卡有講顛倒來翩笪?以清室
e立場, 也叨虎毋驚狗li,懸懸在上食汝到到啦,伊才無咧給信斗le!人講
「王爺尻倉無人敢摸」,清朝閣卡下消飯桶來講,茲番薯仔宛那隨人食
屎,叨無人敢搧伊e腹堵邊li,有影尹婆仔e客兄公卡好le,台員人做甲
這無格,割手肚肉互人食,人猶嫌臭臊,真正了然互人啼笑,汝看欲按
怎講li?
嗯才e瞬呤,同治年間e阿罩霧捍頭(掌門仁),咱林文明將軍啊,汝
號名是將軍, 毋閣汝e運命卡毋值一條樹仔根安呢 ,汝雖然犧牲家財,奉
獻庄頭,甚至兄哥林文察將軍亦命賣清廷, 毋閣清廷毋na無給汝感謝,顛
倒吊脰搶後腳欲「恩將仇報」拍算欲給汝迫害li,汝知否?無論是京城
方面,或者是地方族敵,攏總真正怨恨汝,汝衰簡那laiah25 e,汝互人做石
磨仔咁毋知是毋?這款代誌佇現主時民進黨e看法,吓感覺鼻酸目燒真悲
哀li。
外來滿族e殖民統治,以台制台互汝家己拚家己,落尾也無利用價值
,一聲著變面,效果總卯,來割稻仔尾(坐享其成)仝款e代誌,親象明太
祖大殺功臣,岳飛互人陷害,叨滿四界安呢甡,咱文明仙仔, 猶戇硾溜溜
, 毋捌官場烏暗,當咧一步一步行入敗亡e境界,叨「大船入港」猶 毋知
一箍hoo!文明仙e功高震主猶放外外咧!
(47) 第壹點,京城方面,對文明仙真正憤慨,迭迭想欲借機會
來給排斥掉,給摃互伊臭安呢,咱文明仔無警戒心,顛倒猶掠做家己功在
黨國揚papa,台員人戇到這形e,有影叨大悲哀li。……佇 1850～1860
年代,全中國發生太平天國革命,清朝險兮 互洪秀全翩笪,清朝貪污食
錢歪哥ci3cua,發生事變,無法度應付,落尾也由曾國藩佮阿啄仔逗三
仝,勉強「平亂」, 毋閣亦自安呢驚破膽矣,看草索掠做(以為)蛇, 嗯才 e
瞬呤,清室京城,頻若看著地方勢力夯浮,叨真正驚惶,驚甲搐青屎真
正腳手僬麻痺去, 佇台員地, 庶當時戴潮春「叛亂」時,著舞甲青頭
紅目強欲袂喘e,真無簡單才ket掉這个心腹大患,到時瞬若準林文明閣
叛亂,聲勢加幾落倍,清室爛敗e兵丁,絕對無法度去平定文明仙e叛局
li。
清室愈想愈驚,眾位看倌,清朝是咧驚啥乜?財源豐富江山萬里e帝
國,按怎吓來煩惱海外這粒小島?實在講起來,清朝傳到咸豐、同治,爛
敗離經漸漸來浮頭囉,伊家己對家己臹無信心安呢, 毋但是政治腐敗,而
且國庫空虛假大肥,兵丁飯桶,竹篙逗菜刀,而且海峽風湧透,鞭長莫及
安呢管顧袂著,霧峰林家兵強財足,文明仙作戰經驗足豐富e,清廷有影
驚甲褲底僬霑去。
親象乾隆尾期,來「平定」林爽文革命時,清廷一睏仔用十萬兩銀
, 呾這嗎政府真爛敗,閣卡無法度li,以上茲情形,派佇福州省城e英
桂將軍(滿族特務長),看甲真清楚,為著大清帝國e江山,恐驚噯量早逶
文明仙給sut掉, 猶無這聲若互伊大尾,著歹紡矣,歹剃頭矣 , 佇茲咱講
天良兮,文明仙應該是袂背叛清朝才著,伊e程度是个人榮華富貴爾,佮
現主時e台獨思想民族自決完全無仝li。
英桂將軍這箍滿族特務頭, ga欲監視文明仙以上,著親象警備總
部欲掠黃信介仝款,這場悲劇是絕對閃袂離安呢甡,英桂向京城講歹話,
京城定著起拗蠻來釘文明仙,這聲文明仙算講無欲cap政治來講, 毋閣
政治吓反倒返來莿文明仙li, 1870 e政治安呢, 1990 嘛是安呢,这定著
e叨是啦!所以講這嗎猶有阿西講『對政治無興趣』,這款人噯檢討檢
討!
(48) 第貳點,省城方面, 宛那對文明仙真正憤慨,同治九年
,1870年代,台員猶未建省,伊屬福建省來界管,台員地e省城佇福州。
阿罩霧e林家,平定戴潮春「叛亂」,擊殺草屯「洪家」,雖然唐山戰役
折損林文察大將, 毋閣林文明將軍一路升官,揚papa, 宛那贅少吓互省
城福州e大官虎,來給目空赤,真正甕肚(忌妒)看落臹袂做咧。
咱普普也給掠,这宛那定著e代誌,細腳粒e台員府庄腳散庄,出一
个碗膏兵將,步步高陞,自然吓逶滿朝文武官員比落坑li,咱阿明仙「
擋住人家陽光,擋住人家財路官路」,莫怪眾人是ce4甲無力去, 佇這
款坎站勢面之下,咱文明仙袂曉提銀兩,去巴結ose(賄賂)滿朝官虎叨
咧慘矣,上介食力著是,伊顛倒靠勢家己功在清室,而且折損兄哥,根本
看袂起遐貪生驚死e大官虎,有影做兵仔人知一箍芋仔番薯咧。
嗯才e瞬呤,咱文明仙佮福州城e大官虎,柴柴袂逗搭,二爿咧袂肖
食穿,門扇板咧逗袂峇,有影臹害矣he!無外久中間,福州省城來發生著
政壇派系糾紛,總督左宗棠,佮林文明仝派,滿族英桂大將軍佮凌定國
丁曰健仝國li。
同治八年,1869,左宗棠調職,出任陝甘總督,這聲林文明失去後壁
山倘倚靠,註定日後大悲慘e運命安呢,英桂大將軍暗中給翩笪,文明仙
猶呆呆毋捌半項,有影戇牛毋知死,做兵仔人卡土直叨有影li。
(49) 第三點,彰化縣城,仝款真怨嗟林文明將軍,主要e 原因
著是,文明仙搶著縣城當權派,丁曰健佮凌定國e戰功,另外一條是文明
仙甘願開大條錢去支付軍費, 毋閣無噯提錢去巴結縣衙當權派。嗯才 e
瞬呤,雙爿互相寄恨死伍ket結死冤,文明仙毋知官場安呢,烏暗陰險,註
定噯了然,一路下消搭底安呢甡。
是按怎講丁曰健搶著文明仙e戰功呢?代誌發生佇同治五年1866,
彼時縣衙丁曰健兵隊佮林文明e聯軍,拄好當咧攻殺草屯洪欉家族,彼
時e「萬斗六戰役」,雙方聯軍殺滅洪家,立了大功, 毋閣向清廷報軍功
時,功勞遂 互丁曰健提去,致使文明仙心肝頭咧彈琵琶,真正袂爽心
僬糟叨著。
尾溜也代誌漏鉤去,頂司清廷佮總督左宗棠明白真象,給丁曰健責
備,害丁曰健足無面子, 佇縣衙內底強欲袂收山攬尾,致使講為著這層
,丁曰健見羞咧起慪韶面,烏仔魚去互濁水激著矣,這聲殘殘脆脆港無潦
袂煞, 自那唅心gap命,欲來佮文明仙捙拚搭底,壹定欲給文明仙鬧甲
弄家散災, 安呢才吓消除心中怒火。
總講一句,文明仙舞著這注(du5)e,有影著衰簡那來仔 li,不時嘛驚e咧
等!另外一條著是,文明無噯 ose(賄賂)頂司大官,伊甘願提錢銀去戰
爭,叨無qen4 撣一屑仔錢互大官li,这著犯著「兵家大忌」矣,因為
清朝e大官壹定噯對外省派來,千里迢迢渡海來台,主要e目的著是欲貪
污食錢li, 猶無做官咧做歹命e是毋?咧做心酸e是毋?
这是清朝中國官e基本理念,有複雜e背景致e,咱免講甚贅叨著
li,這嗎咱文明仙毋知「孝敬」頂司,等於講切斷頂司e財路, 安呢亦吓
活?卡加貪官丁曰健,絕對欲給汝文明仙,凌治甲悽慘溜溜,錢e問題想
落著「心狂火焯」,規粒頭殼鏘鏘滾li。也叨新仇舊恨,攏總合合做一
斗, 嗯才 1870左右e彰化縣城,註定噯悽慘,這棚戲著無caa6袂煞li。
(50) 第四點,文明仙噯應付族敵e反攻,若是講到省城或者是
縣城e食錢官,这猶好剃頭li,結結是(頂多是)給下失禮,另外閣巴結銀
兩著煞戲矣,過一段時間,官虎調走,定著吓無代誌,這嗎上歹剃頭,著
是地方上e族敵問題。
因為永遠蹛仝隔壁庄, 嗯才冤仇永遠吓留落來,其中參雜殺仁e人
命問題,閣卡硬斗歹紡,無法度簡單用錢銀來消災li。佇 1870左右,文
明仙需要應付e族敵大概有三方面,這聲嗯才咧頭大面肆方,實在真歹
扭搦li。第壹方面族敵是1862～1863同治初年平定戴潮春,戴氏e黨羽
部下,暗中匿佇各所在,隨時吓反攻文明仙報冤仇li;第貳方面是草湖
方面e林應時系統,仁員無贅, 毋閣戰鬥性特強,文拄武拄總拚甲到,文
明仙真正頭疼li。
第三方面上介歹剃頭,伊著是草屯洪欉家族e散黨,尹遍佈各所在,
山頭kok尾,一四界斟酌,若是踏著機會,絕對吓唅心gap命拚透底, 逶
林文明一家人給摋甲無半隻, 摋甲無人燒香點火,來報復1866年洪
家互人滅族e仇恨, 安呢鋩角才矯吓返來li,算起來地方交界e冤仇,上
歹解決,这叨搭搭有影li。
逶頭前看來,文明仙實在真危險li, 毋閣伊宛那有二步七仔,伊財
力有, 人群僬,有作戰經驗,腐敗飯桶e清室, 宛那 haa4伊袂倒啦!二爿
陳皮蘇黨平平勇,假使清朝真正欲掠殺文明,文明絕對有能力報復搭底
, 互清朝滿面全豆花li,咱講草蓆捲針把,清朝無壹定佔優勢啦。
第六章 阿山阿海, 門扇板逗袂峇
(51) 抑若講到滿州仔,這箍夭壽骨外來政權,有影腹堵內一
堆火,叨強強欲biak3 li,真正氣落汝著半條命,滿州仔猴為著驚番薯
仔來翩撇(反叛),挑工設定「台員e縣官兵力,壹律噯用外省人」,利用
外省人佮台員人e矛盾,互相牽制,來達成皇權e統治, 嗯才這步「猴管
豬哥,豬哥管猴」e撇步,害台員人二百外年袂翻身徛起e, 滿州仔e幸福
建立佇台員人e艱苦頂頭,番薯仔氣心魯命,有影尹婆仔客兄公卡好,想
落叨吐大腸頭li。
1870年,同治九年,有一陣逶唐山來e統治官員, 搪咧凌治著咱番
薯仔,尹講外省官話,食牛羊肉番薑(辣椒),佮咱講福佬話,食魚蛤泔糜
,拜媽祖婆e番薯仔無仝款啦,純然袂逗搭叨柴柴柴,硬硬硬,安呢
咧門扇板逗袂峇,無法度叨無法度安呢甡。
這批阿山仔官吏是安呢,彰化縣令王文棨,台員總兵楊在元,台員道
台(行政長)黎兆棠,閩浙總督英桂,人人著驚e特務頭凌定國專員,彼當
時台員猶未建省,受福建e統治,所以省城佇福州,這陣外來政權e統治
者, 搪咧施展凶霸惡毒e殖民血腥手段,來創治壓迫茲忠厚e台員人,台
員人無論官無論民, 搪咧一步一步行入悽慘運命e枉死城li,咱阿罩霧
林家, 宛那甕底掠龜,這聲歹紡矣,財歪矣!代誌顛誕梟悻,有影叨互汝袂
鐵齒e li。
佇 1865～1870同治年間,台員地(連福州省城) e官場有二派,一
派是親林文明、林文察,尹是總督左宗棠,道台吳大廷,總兵劉明燈,另
外一派是反林文明,尹是總督滿州將軍英桂,道台丁曰健,楊在元總兵,
凌定國省府委員。這个中間,以凌定國上介惡毒酷橫, 佇 1864年做過
彰化縣令,咱庄頭人叫伊「凌王爺」,伊佮林文明將軍結死冤,死伍
ket,二人袂肖食穿,有「不共戴天之仇」安呢。
結死冤e原因,著是1864～1865年中間,為著攻打草屯洪欉家族,「
勞」佮「苦」矯袂好勢,功勞人人愛,艱苦閃代先,同治四年,丁曰健佮
凌王爺e清兵,結合林文明e鄉勇,來屠殺洪家時瞬,文明出力唅心gap命
挺搭底,犧牲人命,傢伙盡散,結局功勞遂互丁曰健、凌王爺總kat3
去,林文明心肝頭砧,嗯才心肝biak甲一腹火,鏘鏘滾袂逗搭li。
另外一爿,凌王爺丁曰健這陣外省官, 互人戽來邊疆地台員,心內
莿cak咧等矣,一心一意干礁想欲卯大錢爾 ,看有倘大卯一塊仔,過二、
三年仔返唐山了後,光宗耀祖揚papa 安呢甡,結局才知影林家是竭仔哥
(吝嗇鬼),仁財兩失,啐甲無力去叨著。
民間有咧傳說,有一擺凌王爺做縣長時,落庄腳行鄉出巡,經過阿
罩霧時瞬,伊無落車來給林家探頭le,致使著文明仙真正想氣,認定講
小小e縣爺甚過拗蠻無禮,對官大勢揚e林家真無面子,嗯才林家心肝頭
砧,想欲設計空縫報復, 安呢鋩角才矯吓返來。
拄好有一擺,註死毋死,凌王爺e老父犯著kia(罪條) 互人摠(zang )
著,文明仙使弄人給摃甲青尺青尺,前怨後恨仝齊diak,九領牛皮做一
下趕,凌父受辱,凌王爺氣甲嘴歪目cua, 頓椅頓桌,精差無唅血霧
天爾爾 ,叨這聲ce4(恨)搭底矣,忖辦欲佮伊填(tun3)到底,欲鏘一下
卡有額e。
嗯才無外久e瞬呤,凌王爺宛那掠著文明仙e空縫(把柄),噹時也(原
來)最近文明仙有錢到地a,娶一房細姨,拍算身家調查做無好勢e款,好
死毋死,去耍著戴潮春「叛逆」e過柱小妹,這聲大歹紡矣,若準告狀對頂
司攏落去,卡加汝嘛皮liu3 li,嗯才文明仙驚到腳尾僬冷去矣,姑不
而衷到地也, 自那僎二千箍銀去給凌王爺請罪下失禮,事後心肝頭砧,
看甲臹袂做e 矣,定著噯尋空縫給cak ,看鋩角矯吓返來否?
(52) 同治五年返春e時瞬,咱文明仙掠著扮勢踏著機會,趁返
福州省城述職,見著閩浙總督左宗棠,著給左宗棠大大來哭苦,講凌王
爺、丁曰健按怎食伊夠夠,講凌王爺來壓迫忠良酷橫百姓,惡cici毒角
角……等等東西。
左宗棠聽了真正憤慨,對凌王爺、丁曰健真正袂諒解,嗯才左宗棠
當面來安慰文明仙:『今仔日恁台員地阿罩霧林家,「滿門忠烈功在黨
國」,尤其林文察將軍,為國犧牲,真正互人感心,凌縣令、丁曰健道台
,無來扶持林家著咧慘了矣,卡有閣來吊脰搶後腳,來陷害忠良啦?免驚,
我左大仁互汝做擋撇,絕對主持正義憑汝甲到,絕對佮伊潦到底安呢,世
間若無法度保護忠厚人,是啥人肯為國犧牲拍拚?……』
左宗棠總督一番話頭了後,下令停止凌王爺e彰化縣令職位,另外
派李時英接任縣令。毋閣這个時瞬,官場氣氛真正險毒,一波造一波,閣
卡猛烈e政治風暴, 猶 搪咧(正在)造成中,凌王爺聯合丁曰健,幕後搬
請出特務頭仔英桂將軍,來對押左宗棠,王見王,無咧驚拚du3(挑戰)著
是啦!
同治五～八年中間,左宗棠總督、吳大廷道台、劉明燈總兵、林
家這派人, 搪咧佮另外一派英桂將軍、凌定國、丁曰健、楊在元總兵
,做慘烈e政治鬥爭,咱文明仙夾佇中間,依原七月半鴨毋知死,戇戇拄拄
罔罔過日子,艱苦佮不幸搪咧一步一步來逼近文明仙。
文明仙激恬恬, 猶顛倒咧眠夢,掠做功在朝廷,清朝搪欲補償伊e
名譽財產le!唉!實在有影叨ham3 啦 !來講到同治五年1866,凌王爺撤
去縣令了後,大報復馬上進行,壹定噯逶文明仙給摃到悽慘落魄,才吓
凍消去心頭積恨!所以講政治烏暗,款勸咱茲先覺後進,政治堅心毋倘潦
,仁生才袂烏有去,尤其是遐頭殼尖尖衰八字e人,閣卡毋倘沐(vak3),這
互汝袂鐵齒e叨著。
呾這嗎凌王爺聯合英桂將軍、楊在元總兵、前任道台丁曰健,全
力反攻林文明,新仇舊恨,絕對報復潦搭底,咱文明仙雖然是官大財富,
銀兩考考考(形容飽滿),舞著這齣有影叨大費氣安呢甡。
凌王爺e報冤,第壹條佇 1866,先使弄(唆使)族仇洪欉家族遺族,
來控告文明仙佇 1864萬斗六戰役時,趁機會吞併洪家e田園,這聲叫文
明仙規還財產田園,倘來耕作維持食穿li,縣令李時英,心肝偏倚凌王
爺佮幕後頭家英桂(滿族),雙方拍官司,雖然文明仙無規還田園, 毋閣
已經造成打擊文明仙聲望, 互眾百姓認定伊是無血無目屑e惡霸,自然
文明仙身受重擊,叨看現現li。
另外又閣有法度夯起洪氏家族e仇恨, 嗯才凌王爺一空掠二尾,文
明仙真正是袂食袂睏e,腳手僬麻痺去矣。續落第貳條, 佇過返年(第二
年)1867年,又閣使弄大里杙e仝族林應時來控告文明仙,叫伊規還被霸
佔e田園,因為戰亂時機互人強迫併吞,現主時太平矣,照道理噯還人,这
是天公地道e,咱文明仙真客氣真誠意給印(回答), su當時是用銀兩買
落,契約買據原在,若噯規還,請汝退還銀兩嘛吓使啦,林應時起拗蠻,
無噯退錢干礁要求退田園安呢,這聲文明仙血壓擎到二百貳,心肝內啐
甲無力去,有影去沓著牛屎濾袂清li,愈想愈逆(qek,不滿),尹婆仔e 客
兄公卡好le,世界卡有這尼橫霸面e?
閣來第三條,凌王爺佮幕後滿族英桂將軍,設計楊在元總兵,來壓
制來凌遲文明仙,代誌佮頂頭所講e差不多, 宛那是利用地方派系e矛
盾恩怨,告來告去,挑工來打擊文明仙, 互伊製造閣卡贅e敵仁, 互文
明仙無法度徛起,無法度收山攬尾安呢甡。
這項打擊, 佇 1867～1869這二冬中間,連肖續壹直堀落,橫直政
治是無情兮, ga有權勢以上,欲害一个人是真簡單,秤彩提一項名義著
吓凍硬拗落底著是啦。
親象現時澎湖縣長聲勢好,老Ｋ著緊製作伊貪污五千箍e官司給纏
稠e,這佮十八標十八億變三十五億來比,有影吓互人看破腳手li,總講
一句,文明仙自擊滅洪欉、戴潮春了後,衰運壹直連番再次坎稠e,
1866～1869中間官司連連,雖然是大官來講, 宛那遭受著無情e政治壓
迫li。
文明仙真正怨嘆,清朝這所e,有影噯給bing撇才著,逗底文明仙佮凌
王爺e政治鬥爭按怎?請看後面結果(注意,這時e文明仙雖然備受壓迫,
毋閣手中uana掌有絕對e武力佮財力來反抗清朝e苦害li,代誌無赫尼
簡單,雙爿有bii叨著啦!)
(53) 同治七年(1868),中秋過無外久呤,彰化縣城佮福州省城,
發生政治大地動,乒乓叫舞甲天翻地肉翩,原本親近文明仙e左宗棠總
督,調去做陜甘總督,這聲猴頭一下掠,猴囝走了了,仝派e台員道台吳
大廷、總兵劉明燈,攏總落台安呢甡,現主時政權交互「反文明仙」e英
桂、凌王爺、總兵楊在元、丁曰健手中,這聲文明仙尻倉逗柄,日子歹
過矣。
台員地e政治罩著一延不安e氣氛,貳虎肖爭必有壹傷,台員鄉親定
著噯受著兵災血影,人講「一年動刀兵,十年袂太平」,吓潦落這堀,有
影姑不而衷li。這棚外省大官,聯合來壓制番薯仔士紳e漚戲, 搪欲排
仙就場矣he!
左宗棠唗了後,換英桂來做總督,滿人英桂,原本是皇帝安排來南
方e「第五縱隊」,人人驚惶e特務頭安呢,英桂坐位了後,上介要緊e代
誌,著是欲按怎來維護滿族政權e安定,為著太平天國事變,滿清驚落底
矣,看著草索無疑是蛇,一工到暗,雞台雞逐神(神經兮兮)安呢,嗯才 e瞬
呤,同治年間,皇清上介驚地方勢力e坐大,地方大尾了後萬壹叛變,腐
敗e清朝無法度鎮壓,定著噯礙著政權e「安定」,所以這款甚大尾e地
方勢力壹定噯「sut」掉, 猶無後日仔,閣設一百間警備總部嘛是無卡
擢(zua4) 啦!
毋閣,同治年代e台員猶未建省,英桂坐鎮佇福州省城,指揮台員,
噯跳過台員海峽,執行特務諸事袂利便袂逗搭順辦,人講『銃子拍到遐
著冷去矣(鞭長莫佮)』,嗯才 e瞬呤 ,伊噯指派一个親腹,來台員執行
「除奸」,伊這箍老奸臣,才匿佇後面暗中矯摵(佈置),安呢萬不利若
代誌biak3,茲下腳手仔嘛倘擔罪叨著,伊這箍藏鏡仁匿佇暗位卡袂暴
露li。
嗯才佇同治八年八月中旬(1869,約十月),福州省城,英桂總督下
令凌定國為專案委員(監察委員),派來彰化地,調查文明仙e是非罪功,
这定著是臹無公平li,因為凌王爺自來著是文明仙e死伍ket(死對頭),
雙人積怨真深安呢(照理應該迴避才著),這嗎英桂總督派凌王爺來調查
文明仙,著表明欲來蹧躂文明仙,有影看現現li,文明仙這聲真正歹紡
矣,所以講政治鬥爭烏暗, 互汝袂假仙咧!
1869,中秋過無外久呤,凌王爺這位「監察委員」,帶著五、六个隨
從, 逶福州坐帆船到鹿港,準備會合彰化縣佮台員府e官員,共同來調
查審判文明仙e「罪行」,欲就船進前,英桂總督連番再次,給伊暗示噯
救國家救民族,皇恩浩蕩,全力維護清室e安全, 噯消滅叛亂,擁護大清
帝國江山,凌王爺叩謝,『免驚啦,稍可代誌爾,絕對欲給電甲金金!』
這款心情親象戴笠咧體卹蔣介石苦心仝款,絕對袂顛誕li……。
凌王爺坐船,行過真危險e台員海溝,水色青烏風湧急,想著坐這危
險船來異鄉外地,無卯財銀叨慘了矣,閣冤家讓債,舞甲滿面全豆花,心
肝頭愈想愈砧,想著佇台員地互文明仙給蹧躂侮辱,滿腹火焯,這聲派
去台員調查仇仁,報復e時機到囉,絕對欲給(借公權力)變甲悽慘落魄,
互伊袂收山攬尾e, 安呢一方面吓凍來抾消清朝地方坐大e危機,一方面
亦吓凍解破私怨, 猶無我這个監察委員咧做假e是毋?
總是啊,為國為民,仁生真正有意義li!……寫到這位,有影手骨吓
軟,想落叨心酸安呢,一个監察委員,無法度清廉公證鐵面無私, 遂來
梟心利用職權害人,清朝政治e腐敗臭爛,有影臹袂孝孤拄咧。
(54) 佇茲我想起三十外冬前,監委陶百川調查余登發縣長食
錢e往事,代誌發生佇民國五十壹年左右,彼噹時仔戒嚴時期白色恐怖,
介石仔siasia叫,無人敢搧伊e腹堵邊li,假使是一个卡奸臣者,定著吓
逶黨外異己余登發給批鬥互伊臭,順續掠去籠仔內關安呢, 毋閣咱陶百
川,確實是一个清廉忠直e御史,奉命落高雄調查余縣長貪污e輕重。
咱陶百川無給拍青驚,暗中坐火車落下港, 直透婁到余家厝內,
見面著驚一趒,余登發佮尹老牽手,二人搪咧掃豬稠拚豬屎,大粒汗細
粒汗答答滴,規身軀臭獻li3dua3(瀰漫狀)足狼狽e叨著啦,百川看著目
屑輦落來,真正感心li, 嗯才大大感歎『這款人絕對袂貪污啦!』越頭
著緊閣返來台北,連調查叨免調查,因為事先無通知,咱登發仙壹直到
陶百川返台北, 猶 毋知彼个「老芋仔」著是掠伊生死門e大大委員呢!
抑若同治八年e這个監察委員凌定國, 奚著大大e顛誕,這箍唐山
派來e官虎,食錢腐敗歹銃銃,專門虐茲番薯仔到到,激甲一塊足大塊e,
袂輸尹婆仔e客兄公卡好,咱文明仙,醜罔醜, 宛那 猶有坎站,袂講
外濫糝, 毋閣拄著這隻凌王爺食錢虎,這聲著悽慘落ze,塗塗塗,有影無
伊法著無伊法安呢。
下腳是說明英桂、凌定國、丁曰健這陣外來官虎,按怎耍dng3(奴
役)台員人,凌治台員人e悲慘史實,看著汝吓嗆毛脘(gng4)空,看著汝雞
母皮吓夯三寸外懸,看著汝吓吐血搥心肝,外來政權e殖民統治,即尼
可惡,有影互汝吓了解,政治毋倘放外外li,這互汝袂鐵齒e 安呢甡
,看了後卡停仔民進黨員,吓增加規百人嘛無的確li。
另外e瞬呤,講到文明仙這爿面,宛那是一腹堵e苦湯,叨規粒頭
殼pong3pong3英li,人講「燒爐添炭,著力閣歹看」,自從同治四年1865,
替清朝消滅「叛逆」洪欉家族了後,這四、五年中間,清廷無來感謝無
打緊, 遂顛倒來尋空縫尋麻煩,茲外省官員,歹心烏腸肚,弄狗肖咬,
使弄一批一批族敵內奸,挑工來拍官司。
文明仙了傢伙,財產總臭礁去矣,这亦無打緊,上介食力,著是造成
族群中間e矛盾佮仇恨,看欲按怎來收山攬尾著好?文明仙真正後悔,滿
清異族來凌治台員,無合力來抗滿清叨慘了矣,遂顛倒幫忙異族來攻
殺家己同胞---抗滿份子戴潮春、洪欉,家己潦落做台奸,囝孫幾百代
欲na見人啦? 呾現主時清官閣來攻擊壓迫,文明仙雙爿了然,咧做石
磨仔心夆蹧躂li,有影一面溝一面圳真慘勢,文明仙內歉真深,目屑輦
輦gr2,尤其想著文察兄哥,為清朝犧牲,有影閣卡搥心肝,摯節袂稠li
。
毋閣講罔講,港ga欲潦著潦到底,殘殘脆脆互汝好勢,橫直頭剃落無
洗亦袂煞,做台奸著台奸驚啥韶,清朝定著噯倚清朝,才有倘榮華富貴
li,雖然清廷對伊是恩將仇報,城過樓拆, 毋閣文明仙對清朝真正忠誠,
想講「阮家族對皇清這死忠,無功勞嘛有苦勞」,暫時e顛誕無要緊
啦,稍吞忍e 啦!後日仔「雨過返好天」著好勢啦!
不而過呢,萬壹若清朝心肝掠坦橫,欲來攻殺文明仙,以絕後患,这
欲按怎才好?文明仙想到這位,真正腳手僬麻痺去, 毋閣心內想,袂啦,
家己是大官,功在清室,結結是辭官爾爾,絕對無性命e危險安呢甡,若
準清朝壹定欲逶伊摋死,伊彼時才來叛亂猶未慢le,憑咱阿罩霧e少爺
,文明仙有錢有人猶稍寡代誌,上介讚著是伊豐富e作戰經驗,清兵遐軟
腳蝦奧腳肖,萬萬毋是伊e對手啦,免驚啦,上加是官司纏身爾,無要緊
啦!
唉!文明仙,汝甚過古意啦,講卡歹聽le,阿兵哥毋捌政治烏暗啦,人
自然有法度來收拾汝,汝免暢(歡喜)了甚早,世間代真歹講,走筆到茲,
知影趙少康、周荃、郁慕明……等近日組新黨,有影真正互汝料想袂
到,叨天下事研究互汝掠袂著li。
(55 )同治九年(1870),正月十四日 (彼時採用農曆), 佇台南
府城,台員最高行政官黎兆棠道台,約見彰化縣令王文棨這篇記錄日後
有稟告皇上,文獻是安呢:黎道台問『咱彰化這角勢,有親腹e士紳頭人
否?』王縣令答『真正費氣呢,官紳中間迭迭咧門扇板逗袂峇, 安呢袂
逗搭。』這時瞬黎道台自那,叫退隨從者,秘密吩咐『這阿罩霧這箍死
囡仔林文明,結黨營私,殺仁放火,霸佔官民田產,罪惡昭彰,有影死無
人哭,按怎無噯給嚴辦?』
王縣令答『我新就任呤,地方猶捌袂透, 待念著尹大兄林文察為
國犧牲,而且伊是貳品官職,大官虎無先革職無法度辦li,另外一方面
戴潮春佮洪欉叛逆餘黨袂清,匿入山內, 宛那有需要林文明將軍e幫忙
li……』
黎道台又閣暗示『林文明凶殘成性,彰化紳民恨伊入骨,苦毋講食
伊e肉, kue4伊e骨安呢,若閣再姑息養奸,後日仔叛亂,恐驚為害社會
li,咱攏是國家e官員,應該為百姓除害才著,絕對袂使驚死驚逐來飼虎
害民?』,王縣令聽了,知影長官e意思,趕緊印『是,是,文明將軍,為害
鄉民,理該嚴辦,本官絕對配合,叨除惡霸為民除害,小官萬死不辭,絕
對潦到底無第貳句,無論刀山火山總憑汝甲到。』
拄好講話e中間,台員最高軍事長官楊在元總兵入來拜會黎道台,
這時瞬王縣令本來欲迴避, 毋閣黎道台喚一聲『免唗啦,拄好三个人來
逗陣參詳代誌,定著卡吓詳細逗搭。』楊總兵這時問王縣令『舊年交
待欲處分e人(林文明),代誌矯吓落手否?』黎道台答『拄好咧參詳這
條啦!』
黎道台趁這个機會,真憤慨給王縣令講『林文明罪惡深重,人人攏
想給摋, 毋閣人人亦攏知影,無法度照壹般法律處理,因為伊大尾溜溜
,官位大有錢有勢,無人敢搧伊腹堵邊安呢,如今之計,定著噯用非常e手
段,才有法度來為民除害,王縣令汝若有法度順應民情立大功勞,後日
仔定著吓升官大葩尾旺廣呢!』
這个時瞬楊總兵亦講話『為著百姓安居樂業,我楊某人官配官絕
對憑搭底,無論刀山火窟總潦,兵員方面無問題啦 ,若準無錢,現主時
道庫猶有五萬儲銀,吓使先提去用……』
總講一句,黎道台、楊總兵佮王縣令,密室參詳,著是欲來嚴辦文
明仙,這幕後e藏鏡仁,完全是閩浙總督英桂將軍,這箍頂司e意思安呢,
茲下腳手仔,「食人e飯患人e問」,定著是遵照辦理,去挲(sr) 去矯
爾,「仁在江湖身不由己」,昊頂無坎嘛著跁去, ga欲食官廳這碗飯
以上,結黨做派, 互汝袂假痟咧。
王文棨縣令返來彰化城了後,佮專案監察員凌王爺吓合,進前有講
過,凌王爺雖然號名是來台員,審理林文明霸佔田地e官司, 抑毋閣實
際上是奉英桂之命來sut掉文明仙e, 嗯才 e瞬呤,王縣令搪著凌定國
委員時,一聲才知影「咱共同e目標」著是噯×掉文明仙,好親象「戴
笠稟承領袖心志,欲ket掉汪精衛」仝款,總是啊,欲嚴辦文明仙e執行工
作,这完全噯靠彰化縣衙門來做,若是省城福州京城北京「鞭長莫及」
做袂倒啦!亦著是講,所有「除奸」e任務,攏噯落佇縣令王文棨身軀頂
,咱王縣令e任務袂輸五百斤e鐵笪真正li。
(56) 1870,同治九年正月尾,彰化衙門內,王縣令、凌定國專
案委員,丁曰健前任道台, 搪咧研究參詳按怎來「變把戲」li,
無論古今中外,欲掠大官虎來審判,這是真正硬斗為難e空課,萬不利若
矯袂好勢,吓顛倒去互大官虎筴(qee4)去配嘛無的確li。
尤其今仔日所面對e,是地方惡霸有錢有勢有兵權e大官,這聲「難
上加難」,困苦重重沓沓,若稍可矯袂好勢,萬壹對方先婁腳siau3「先
拍先贏,卡袂叫阿俍」,恐驚家己性命先休去嘛無的確, 毋閣福州省城e
命令,軍令如山,頂司交待無辦袂煞,昊頂無坎, 嘛著噯爬去,嗯才「前
有追兵,後有猛虎」,王縣令佮凌王爺有影咧做石磨仔心,雙爿在迫,隨
時噯做「砲灰」去夆掠水鬼tap涵空安呢叨著。
王縣令問『欲掠林文明來嚴辦, 毋閣伊是大官虎,官拜貳品,干礁
傳令爾,恐驚仔伊無欲給咱信斗,伊若無欲出現,這聲頂司交待e任務,
恐驚著吓顛誕去呢! 抑若對方心肝夯狠,顛倒派兵來示威,汝想欲按怎
應付才好?』咱王縣令一个面青恂恂, 毋捌剃頭去搪著鬍鬚e,真正歹紡
,福州方面有影「強仁所難」,叫人厝頂蓋發白菜著貓建水雞毛gr?
這个時瞬,老奸臣凌定國專案委員才笑笑也印(回答)伊『王老爺,
免驚啦,人咧講「仙仁自有妙計」,免煩惱,頂司福州省城方面, ga有
吩咐以上,老身兮,定著做人精英目色元氣好,叨老神在在無驚無惶li,
老身兮,身為調查林文明訟案e調查委員,中間定著有真贅撇步倘返捯。
『林文明霸佔田產吓凍引民夯氣,這嗎民間佮官方雙方壓迫, 毋驚
咱文明仙拗落底安呢,現主時欲走掠文明仙,吓使講真正費氣,用「懷柔
政策」, na軟索咧牽豬le,寬寬也(慢慢)來最後以「智取」,千萬袂凍
用「力取」叨著!』
王縣令又閣問『主要e空縫(關鍵)佇佗位?困難佇佗位?欲用啥乜
步數來化解?』這个時瞬,老奸臣凌王爺飲一嘴燒茶,續落來教伊撇步,
『代誌是安呢,欲掠辦筴滅林文明, 噯顧慮三大問題。
『頭一條,清朝律令規定,欲嚴辦處分大官虎, 噯先解除官職,才
吓使掠來摃倒, 毋閣安呢來吓曠延時日,銃子拍到遐著冷去矣,萬壹這个
空縫林文明舉兵反叛,叨梟悻li。
『第貳條,林文明e財產佮仁力佮武裝,現主時大大超過彰化縣城,
我看連府城台南嘛無法度li,台員海峽風湧透,等福州、北京援助到,
早著「鹽到連魚臭矣」(遠水不救近火)。
第三條上介食力,因為林文明,身為武將,有擊殺戴潮春戰爭經驗,
有攻破唐山太平天國浙江福建e經驗,有攻打洪欉e血戰經驗……,台員
地無人比伊卡敖,因為有這三項困難,所以頂司方面真正煩惱,用心計
較來想計策,想規晡,想甲頭殼皮強強欲biak3,阮發現一个妙計,有法
度擊破林文明將軍,干礁一个人爾爾……』
『緊講啦! 勿漲懸價(賣關子)啦,我趕緊來給搬請款待!』『這
个人號做「媽祖婆」安呢甡,政治e代誌,結局宛那著噯用宗教來解決,
咱彰化南瑤宮(現時彰化市南瑤路43號) ,每一年攏噯去北港進香,仁
數十外萬,「浩浩盪盪」鏘鏘滾,人群佳繹偰(kue4,擠)甲吓出油li。
『咱吓使利用政治力量禁止北港進香,利用民氣旺盛無法度禁止,
這聲逼林文明出面,入官府審罪,續落用連環計,事先佈置重兵做陷阱,
先夾滅林文明,利用文明部下報仇時, 互伊稠佇布袋戰術,以圍城叛變
為由,全家抄斬僬摋死,總滅族安呢,死甲互伊無人燒香點火,另外一方
面鼓動伊e族敵洪家,趁空虛攻庄, 逶林文明總消滅安呢叨著啦!』
(57) 王縣令問『連環計e設計書按怎? 呾 嘛提出來稍鼻芳
le!』『無問題,欲辦林文明e連環計,詳細步數攏寫佇茲,其中攏暗號,
來,我說明互汝聽』嗯才 e瞬呤,老奸臣尹規班人所設計e連環計,欲按
怎來消滅阿罩霧林家e祕方,這嗎出現矣,伊e內容是安呢,攏總有七步,
佇茲凌王爺詳細來給解說。為著秘密,其中干礁暗號佮地圖爾,無說
明e字詞叨著。
『第壹步,因為文明官位大,無法度引出來,而且擁兵自重,不止危
險, 噯用頭腦,官廳方面,代先暗中派人,一四界宣傳,風聲講,有心仁
欲利用去北港媽祖進香e機會,聚眾叛變圍城, 逶清廷政權給翩笪推翻
安呢,因為咱一年一擺e南瑤宮落北港進香e群眾,十外萬走袂去,仁山仁
海,真正有可能給彰化衙門翩笪叨著。
佇專制時代,酷行壓霸高壓統治,百姓互伊押甲死死死,叨無人敢
假仙li,單單佇迎神拜拜e流擺仁山仁海,才有法度結合仁心,互相造勢
來對抗官廳兮,逐傢有神明保庇, 宛那卡毋驚死!咱講實e,清朝、明朝幾
落擺e民間起義, 宛那是宗教熱情聚眾叛亂叨有影li,親象四川、廣東
e白蓮教之「亂」,雲南、甘肅e「回亂」,義和團攏是啦!所以講利用
南下北港進香,聚眾圍城是足有可能li ,其中亦暗示咱文明仙是掣頭
e,有給百姓稍tok頭一下。
『第貳步,按算佇同治九年三月16～20中間,宣佈戒嚴,袂使去北
港進香,官方彰化縣衙來佈示,為著治安e考慮,百姓e安全,國家e尊嚴
甡張,所有咱茲彰化地頭e鄉親嗣大,逐家手勢稍夯卡懸le,卡吞忍e,因
為有人欲利用北港進香來圍城叛變,官廳安呢做,有影姑不而衷請諒解
安呢甡,彰化縣衙將欲逶南瑤宮e媽祖婆,暫時給扣留佇觀音亭(現主時
彰化市中華路口開化寺)。
『第三步,按算十外萬進香客,無法度接受停止北港進香e打擊,這
項戒嚴令,吓互規城彰化人火氣擎putput,亂做一堆,群龍無首安呢 li,
百姓大亂到地也,結局宛那著噯靠文明仙來保、來解決,這聲文明仙來
求縣衙,著吓凍來引蛇出洞,續落佇咱官方e手頭控制噹中,伊插翅奧飛
,閣卡千兵萬馬財源豐富嘛無卡擢li, 安呢才有法度來給款起來,收拾
dan4 sat3。
『第四步,萬壹文明仙無噯出來收拾亂局,官廳吓使「弄狗肖咬」
,叫百姓硬給壓迫,因為宗教力量真大,趁局勢混亂仁員傷亡,硬給定罪
,講伊有欲圍城叛變e意思,白白布給濡到烏, 互伊頭尾袂肖食穿,滿面
全豆花li, 安呢彰化縣城才有給擊滅e名義叨著,總講一句,壹定噯仁員
傷亡流血,只要見血,文明仙著袂脫罪咧!
『第五步,假使文明仙願意給彰化媽祖保任,伊著噯來觀音亭(今
開化寺),咱官廳著吓使逼伊入縣衙公堂,審判舊案,由凌王爺主審,文
明無疑有詐,就公堂擊殺以免後患! 毋閣这定著無簡單li, 噯計算好勢
倘請文明仙「大船入港」,總講一句, 噯文明仙佮伊地方武力脫節,引
蛇出洞來縣衙,咱才有法度給sut掉著是啦!
『第六步,文明仙假使佇縣衙公堂互人擊滅了後, 毋管重傷或者是
死亡,定著吓引起部下來報仇圍城,咱吓使聯絡府城楊總兵,調集大兵
製作布袋戰術來埋伏,一方面逶文明仙e部下壹網收盡,一方面使弄洪
欉族敵趁虛攻庄,一方面吓使報呈京城,講文明仙家族,借進香為名,聚
眾圍城叛變,依大清律令,全家抄斬滅族!這聲台員地叨定著矣!
『第七步,萬壹林家知影反攻報仇,吓犯叛亂大罪, 毋敢來攻時,欲
按怎才好?官府派吓事先安排間諜給林家作亂,暗中假影香客,到南瑤
宮,大力搧動香客攻擊縣衙,名義上是欲為爐主林家復仇,事實上是欲
逶林家強制「拖牛落湳」,利用宗教狂熱民情強雄,林家毋管有反攻抑是
無反攻,攏難脫圍城叛亂抄家之罪。』
眾位先覺,凌王爺e連環計確實陰險惡毒,真正酷行歹心烏腸肚,忖
辦欲給阿罩霧林家「趕盡殺絕」,食匏仔無留種,這款外來政權e惡步,
世間罕有!唉!可憐e文明仙,一家人為國為民,為國犧牲,今仔日互人罩
一頂大網欲給陷害,欲請伊大船入港規家滅族,伊猶戇戇li,有影夆看
了臹袂過心。
毋閣咱文明仙, 宛那有掌握著全台員上大e武力系統,伊是毋是乖乖
互人擊滅公堂,順續報仇時規家人夆摋甲無人燒香點火?或者是夯狂
先發制仁,橫直死路一條殘殘潦到底,利用強大武力,攻城殺盡貪官污
吏,真正「官逼民反」,亦是姑不貳三衷安呢,各位,請汝看以下e分析,
故事愈來愈食佳,這部利用媽祖進香來政治鬥爭, 佇世界各國宛那罕
看著!
第七章 彰化媽祖笨港進香矯袂直
(58) 台員人有一个特別e民族性,著是愛「痟媽祖」,人咧講
『三月痟媽祖』,無論是下港、頂港,無論是散庄、街市,無論是客人
、福佬,攏愛興這味li,叨鬧熱滾滾真正鄉土味,台員中部所在,離北港
媽卡近,大間媽祖宮,不時佇媽祖甡(三月23)進前,規庄頭落北港進香e
民俗,十外萬人鏘鏘滾,人群佳繹規路頭窒甲欲出油去,炮仔聲鑼鼓大
吹奏甲真叉操。
百外冬來這款「如詩如夢」e記池,迭迭嘛 佇彰化老歲仔e頭殼內
,親象走馬燈咧踅咧遨(qr2,旋轉),是咱做囡仔時代,上介糖甘蜜甜e回
想li,所以講彰化人對北港進香e感情,是竄筋入骨威威鑽,真正目燒鼻
酸有血有目屑e心情。宗教吓大尾溜溜,宗教吓熱情火焯,真正互汝袂
鐵齒e li。
到現主時1993, 宛那有大甲鎮瀾宮落笨港媽進香習俗,七、八萬
人「浩浩盪盪」,真正壯觀,半暝透過電視台e轉播,看落吓感心,清朝
同治e彰化縣包括現時彰化台中南投,所以現時大甲媽落新港進香,
宛那是舊彰化文化e一部份叨著。
呾咱這嗎講返來,彰化南瑤宮這爿面,同治年間,一年一擺落北港
進香,變做是彰化人上介要緊e代誌,比過年閣卡要緊li,進香e時間,
佇媽祖甡進前五、六工e款,十外萬人用步輾e(徒步)往回北港三百外
里(約110km),1870,同治九年這年嘛仝款照年例, 毋閣這年e媽祖進香,
代誌矯袂好勢,舞甲天大地大,強欲袂收山攬尾e,這齣名揚千古e「彰
化媽祖」大悲劇,著欲「排仙」來給搬落去,來啊!給僎落去!
進前有講過,阿罩霧望族林家,現主時是林文明仙咧捍(hw3)頭,文
明仙經過同治貳年e「戴潮春戰役」,同治四年1865草屯「洪欉戰役」
,另外唐山閩浙對抗太平天國功勞揚papa,升做副將軍,官封貳品,有錢
有勢, 佇彰化縣地頭,喚水吓堅凍,有影無人摯節吓稠,這款大官虎,
佇地方上喚水吓din動, 嗯才 e瞬呤,互眾人給擁護做1870(同治九年
)南瑤宮e爐主,做北港進香大部隊e總指揮官、領導者,咱彰化地壹粒
壹e頭兄。
所以講人e運命八字叨歹講li,真贅代誌有時瞬互汝料想袂著,名
家吳樂天有咧「所說」,人若咧茫茫掠衰,有時干礁飲汽水叨吓去醉著
,這聲文明仙,一腳潦落去北港進香團e爐主,人群名聲擎夯
(cing4qia2),氣勢浮夯強欲掠袂稠有影, 毋閣伊高高在上,另外一陣老
奸臣匿佇暗角, 搪咧設計暗算欲來dng6(捕捉)伊等伊,欲請伊大船入港
,硬欲捙一个天來給坎,汝老皮著繃卡an2(緊)咧!
(59) 同治九年正月初,文明仙佇阿罩霧下厝e宮保第(住家名
稱,今尚存遺),研究今年落北港進香e代誌, 也叨南瑤宮媽祖會方面,扶
文明仙做嗣大, 嗯才 e瞬呤文明仙著噯出錢出力,來擔起這个責任li,
咱文明仔真正有鄉土氣,無論家己,擔輸嬴li,叨安呢唅心gap命挺搭底,
互咱e民俗文化吓凍來起示,鄉親吓心適吓起磅,一年一擺鬧熱歡喜叨
是啦!
佇正月尾,上元過無外久呤,咱文明仙統領著眾位媽祖吓e董事,
踮南瑤宮廟內,神明媽祖面頭前,來跋杯求福,倘決定今年落北港進香e
良時吉日,做頭兄e人「輸人毋輸陣」,欲潦叨潦一下仔卡工夫le, 互眾
人謳咾有著, 安呢才有目地面子吓揚。
文明仙佇大殿媽祖婆面頭前,長袍馬褂大禮服,參牲伍禮滇滇滇,
三枝香夯就手,誠心誠意來迎神『弟子文明, 也叨咱彰化地e阿罩霧下
厝,頂番仔(上回)互庄內鄉親嗣大來扶taa4以上,今年媽祖生,有欲帶
領善信弟子,落北港進香安呢,算來路途吊遠,空課萬般不便, 才拜請媽
祖婆來逗保庇,互茲眾生香客,吓凍順序平安,富貴萬冬li……』
續落e瞬呤,香插好勢, 斟( 倒 )好米酒, 閣再雙手捧杯來求神,
『弟子文明來求媽祖婆,本鄉按算三月16日落北港, 毋知好時抑無?』
文明仙跋杯,結局e瞬呤,是「愛笑杯」,文明仙稍歇睏一絲仔久,續落
繼續閣來跋杯,嘴內唸唸有詞,真正好禮來搬請神明指點安呢。
落尾也跋杯e結果,今年北港進香,設佇(同治九年舊曆)三月17子時
,差不多半暝二點e款,大概仔有十萬人, 逶彰化南瑤宮,用步輾行到北
港進香往回六工,返來拄好是三月23媽祖生,規庄頭鬧熱滾滾安呢甡,求
神結束,最後燒香送神燒金錢qan4神,典禮結束叨著啦。
佇媽祖宮現場,徛佇身邊e眾董事頭兄,一下聽著今年落北港進香e
時辰好位呤,隨人嘴笑目笑心花僬開,有影敬神拜神上歡喜,真正心涼
脾透開,所以講也,這宗教來影響仁生,互汝袂鐵齒e,竄根入骨威威鑽,
攻心入腦是pong3pong3英, 毋管汝大官皇帝叨無給汝信斗li。
過返工(隔天),消息一下放出去呤,規个彰化城鏘鏘滾,逐傢歡迎
ueue,咱彰化暢e,乏(ha4)這齣乏規年矣,袂輸洘旱咧陳雷le,規年迵
(tang4)昊e拍拚,盡望盡倚嘛這齣北港進香爾,想落著歡喜,想落著爽
勢li,簡那現主時「阿公阿婆仔」,組團遊覽美國仝款,暢甲袂顧e叨著
。
(60) 根據著彰化媽祖南瑤宮,今年e爐主林文明將軍,佮尹董
事會e跋杯決議,1870,同治九年,彰化媽欲落北港進香e詳細計域(計劃
)是安呢:
(壹) 時間佮路線:議訂佇同治九年三月17日半暝子時,彰化媽祖
起駕,由文明仙總領隊,陣頭佮隨香大約五萬外人,沿路落茄苳腳(花壇
)、員林、田中央、斗六門、斗南,拍算三月20到北港朝天宮,遊街拜
神見祖了後,仝款沿原路行返來彰化城,大概三月23媽祖生彼工返南瑤
宮,完成一年一擺e見祖大典(以上日期攏是以舊曆為主)。
(貳) 食蹛佮財源:俗話講「吓離門戶,袂離腸肚」, 呾彰化到北
港,一迣(zua3,趟)路車拄昊,五、六萬人e食飯蹛暝,這聲頭兄領導人,
才是頭大面肆方,真正硬斗li, ga欲行遠路以上,大條錢額,鏘採
(ciang3cai3,自然是)是咱文明仙一手來攬,展氣魄e,除了家己身軀邊
紮(帶)一寡糕餅以外,沿途宛那有廟寺菜堂,來逗僎食穿飲水佮蹛暝
安呢,台員地e佛道不分,迭迭吓互相支援逗三仝li,逐家勤儉慣勢矣,袂
乏到佗位啦!
(三) 仁員分配,所有仁員佮香客, 佇三月16暗暝,踮南瑤宮面頭
前集合,僎倘吉時來出發安呢甡。咱茲鄉親道友,分做四款,頭一款是各
領隊、頭兄幹部、爐主、出錢出力e頭傢……,普遍來講,攏是寡喚水
吓堅凍e大粒lu6e6;第貳款是小組長、小幹部、運搬義工腳伕、巡伕
、救護仁員,這方面e人,氣魄組e大多數攏有服務e精神,為著眾人,無
惜艱苦,潦落捙拚,有影互人真正感心li。
第三款人是神職仁員、司公和尚道姑、陣頭藝閣公共婆、樂隊、
捌家將、謝將軍范將軍……;第四款人,著是咱茲忠厚e香客善男善女
安呢,拍算五萬外人e款,鏘鏘滾勢面臹貓li。
眾位咱茲老先覺,南瑤宮落北港進香e代誌,叨也已經煞去百外冬
矣, 佇這位我無法度倘詳細來推測描寫,尤其是帶有神祕色彩真奇巧e
九大媽祖會,閣卡無法度倘真幼秀去探查,不而過呢,現主時佳哉猶有
大甲媽落新港進香e禮俗,規模宛那不止也 僥擺,電視亦有轉播,這
層心適,咱逐傢吓使來給參考看覓e!氣魄佮甡張, 算起來亦tin3咱
吓起啦,讚e壹庄兮,袂漏喟li。
總講一句,由阿罩霧下厝爐主林文明仙,身封貳品武將,按算欲佇
1870,同治九年三月17日,率領五、六萬香客佮真贅e陣頭樂隊,欲經過
茄苳腳、員林、田中央、虎尾、元長到北港朝天宮進香,往回六工,按
算佇三月23媽祖生彼工回鑾返來南瑤宮安呢甡。
毋閣呢,「仁算不如天算」,連孔子公叨毋敢收過暝帖li,文明仙這
擺北港進香,發生意外囉, 毋但無法度完成, 遂顛倒互人陷害放紙虎,
講伊是欲「假借進香之名,聚眾圍城叛變」,唉!單純e北港媽祖進香,
吓變做政治性e天條大罪,這款e顛誕坎站,全世界單單咱台員有爾,彰
化媽祖這篇故事實在真有特別e氣氛,這當中宛那有包含著咱番薯仔e
血屑,佮互人殖民統治壓落底e悲苦。
(61) 同治九年貳月初,文明仙坐佇下厝宮保第e廳堂, na湒
(sip)茶na想。『呾今年我文明來做南瑤宮e爐主,出錢出力無打緊,
毋閣代誌萬百條,複雜纏身,恐驚也矯袂好勢,著赧世赧眾li,尤其若是
官廳兮起歹面,硬將政治壓迫拗落地時,這聲才是頭大面肆方, 毋知欲按
怎才好勢li……, 猶閣有,咱彰化縣地頭曠闊,民氣旺盛,自來為著媽
祖婆,叨無咧信官廳兮按怎?我身為爐主,夾佇官廳惡霸佮民間硬鼻鐵齒
中間,一面溝一面圳,做石磨仔心叨真歹徛起做人li,萬項噯卡細膩e,
毋倘甚過衝磅安呢……
『三月16深暝佇南瑤宮,迓神出遊,先祭拜媽祖婆,續落e瞬呤,由
各所在e媽祖會中間,拚選「頭香」,又閣揀選「貳香」,過子時了後,
大隊仁馬陣頭、香客,沿欲去斗六門e大路起行,報馬仔行進前,後面陣
頭,閣來媽祖轎,隨香e進香客……,一列一列,剃頭照輪扮,浩浩盪盪,
對北港彼个方向,真虔誠真熱心,一步一腳印,完成一年一擺e盛典,叨
誠意食水甜li,逐傢心肝頭熱噗噗,揚papa。』
文明仙na想na歡喜,實在講,這世人活到今仔日三十七歲,總是啊,
無論官場亦好,財源田園亦好,人面世事亦好,佳哉有淡薄也成就粒積,
毋閣文明仙歡喜罔歡喜,後壁e危險猶未解破,尻倉去夆 du3(扎)一空
猶 毋知li。
頭一條著是總督知縣當權派,欲來謀害伊e代誌,伊知是知, 毋閣無
感到赫尼食力(嚴重),認定講是稍寡代誌爾,滿門忠烈為國犧牲,盡
散家財剷(tio6)除叛逆,壹生「忠黨愛國」,佐汝安啦,無人敢搧汝腹
堵邊啦,閣再講,家己有一枝全省上大e兵馬武力,正經官廳欲摋嘛 毋
驚li,所以文明仙袂曉「崁頂收腳」(懸崖勒馬),對身軀邊e危險猶放
外外,唉!實在有影ham 4甲有偆安呢。
第貳條著是,伊對彰化士民香客e宗教決心(民氣)估計了甚低,这
對爐主領導者來講,叨真正危險,大規模e群眾頭嘴,壹旦ga暴動失去控
制,領隊絕對摯節袂稠li,親象現主時政黨示威遊行,警民火氣大衝突
冤家,領隊喚喊無效仝款,所以講若準發生香客暴動以上,這聲文明仙
皮著hiu4 矣,官廳吓使硬講汝「聚眾叛變」,來定罪li,文明仙是條直
人,卡毋知這方面e奸巧空縫,定著吓衰咧等著是啦!
(62) 呾進前有講過,清朝e中央,為著太平天國e代誌,舞甲
青頭紅面悽慘落魄,強欲袂收山攬尾e,致使著對地方勢力e坐大,真正
敏感真正驚惶,不時叨草索仔咧看做蛇,講起來宛那可憐li,尤其是台
員島孤徛海外,盛世叨猶無法征伐,何況目前搪咧下消溜尾,閣卡無法
度li, 嗯才 e瞬呤,清廷對阿罩霧林家漸漸大尾e代誌,真莿棘,心肝
頭pipi搐,不時嘛驚兮咧等安呢。
清廷ga有決心來凌治林家以上,代誌早慢吓sak對爆炸e界線,二爿
陳皮蘇黨,半斤八兩臹有繃li,文明仙這爿,雖然是下官, 毋閣伊有錢有
兵有民氣, 宛那真歹剃頭 ,清朝這个講北京話e外來政權,欲一聲掠
死文明仙,仝款著噯真張弛才好勢, 猶若無者,互文明仙「先發制仁
」,官逼民反來捙拚,清兵爛敗又閣一四界散iaia,絕對毋是文明仙e對
手,所以清官欲按怎來制服文明仙,又閣袂引起文明仙e「叛亂」,這聲
是頭大面肆方,真歹扭搦li。
所以這嗎e戲齣是安呢,到底腐敗無能e外來政權,吓凍來消滅文明
仙勢力,或者是兵強馬壯財源豐富,話語通透e文明仙, 佇「恩將仇報,
官逼民反,真正姑不而衷」之下殘殘潦落,反抗異族統治,求得民族解
放甚至獨立成國?這二款結果,攏有可能發生叨著li,到底佗一爿吓贏,
請看後壁e分析。(因為彼時瞬是1870,美國已經獨立一百冬矣(伊
1776獨立),美國吓凍脫離仝語仝族英國獨立一百冬,台員地頭,著算講
無武力趕滿州e行動, 毋閣有趕走異語異族e想法,絕對有可能li。)
因為文明仙是貳品官,無法度倘治罪,同治九年,1870年初, ga有
英桂總督e授意以上,府城黎道台、楊總兵、彰化縣令王文棨,密謀連
環計,欲來給文明仙創治硬拗落底,挖除文明仙e本土勢力,達著大清帝
國外來政權殖民統治e目標。這批佇台員毀類e當權派,黎道台、楊總
兵、縣令王文棨、專案委員凌王爺,暝日肖尋咧研究,用心計較咧激頭
腦,想看有法度完完全全逶文明仙給ii6 uaai kolosok sa3(殺滅),解決叨著啦。
尹逶月娘起講到月娘落,透暝透日,叨有影盡磅逗搭li,連環計e設
計是安呢,先利用三月16落北港進香e代誌,挑工指名有人欲趁機「聚眾
謀反」,續落e瞬呤宣佈戒嚴,因為進香是百年來稠稠稠e民俗,絕對無
法度取消, 逶媽祖婆扣押,逼文明仙出來保任,這聲叨等於是「引蛇出
洞」li。
閣再來,事先佮楊總兵方面聯絡好勢,文明仙家族,必定來攻縣衙
報復,才閣埋伏重兵壹舉擒之,以「叛國圍城」罪,全家抄斬, 逶文明
仙規家口仔, 摋甲無半隻,甲互伊無人燒香點火,完全滅族li,另
外又閣派間諜冒充香客,到南瑤宮,鼓動香客暴動,表面上是為文明報
仇,實際上是欲逶林家「拖牛落湳」夯罪滅殺, 安呢甡清廷有法度,完
全控制台員人e統治權, 毋閣給算起來,清朝這班大官, 宛那不止也殘
忍,無血無目屑li。
(63) 1870,三月12日,台員府彰化縣衙,正式宣佈『今年赴北
港進香e代誌,暫停一年,無論啥乜人攏袂使藉宗教名義聚眾行動!』清
官e當權派, 婁出頭一齣夭壽步安呢,縣衙e報馬仔佇一四界搭(貼)告
示文。
文是安呢寫法:『眾位咱茲鄉民大德,逐傢年冬平安大順序,伍穀豐
收安身己,咱縣衙官廳e,壹直是為著百姓設想,用心計較咧捙盤返捯,
關係南瑤宮到北港進香e代誌,這是咱彰化人上介光彩僥擺 e歷史傳
統,叨也有百外冬e經驗li。
『嗯才 e瞬呤,官廳e(政府)徛佇寶惜百姓e立場,不時叨咧給支持
佮保護li, 毋閣今年e時機真梟悻,有野心份子歹人,欲利用這擺e北港
進香,暗中聚眾作亂謀反,茲善良百姓恐驚有刀兵之災,縣衙方面為著
欲保護百姓,驚引起流血,兵凶社會袂定著,特別來頒布這个戒嚴令安呢
甡,暫時禁止今年落北港進香活動,等社會定著了後,明年壹定照常舉
辦,希望眾位善男信女,吓凍來體念縣府e苦心,共同合作忍耐,為國為
民,愛鄉愛土e氣魄盡磅逗搭安呢叨著。
『自古以來,百姓欲反抗政府國家,叨真正困難li,單單利用宗教
「聚眾叛變」才有可能li, 也叨宗教e熱情,「仁仁奮不顧身」, 毋閣迭
迭吓互野心份子歹人來利用,譬如四川e白蓮教作亂,雲南甘肅e回兵叛
亂,好佳哉咱縣衙有進前看著這點, 嗯才今年e北港進香禁止,倘減少民
眾e傷亡流血安呢,希望眾位善男信女,吓凍來配合官廳e政策。』
彰化縣衙ga壹旦宣佈戒嚴以上, 呾這聲歹紡矣,規个彰化城,內內
外外安呢鏘鏘滾he3he3趒,強強欲暴亂e款勢,百姓中間心狂火焯,啐幹
力撟,有影叨摯節袂稠li。落北港進香,這是彰化地百年e習俗,咱茲鄉
親嗣大,規年迵天做牛做馬咧虐身命,上要緊嘛是為著拜媽祖誠心爾,
這聲欲剝削尹e拜拜權利,有影比死卡慘li, 嗯才咱茲彰化暢e,上下壹
心,唅心gap命欲tin3神明搭底,絕對無噯遵守戒嚴令,為著敬神,
鏘嘛 噯鏘到底,死嘛欲死仝堀,民氣夯狂,叨互汝袂鐵齒e li。
來給講到文明仙這爿面,伊佇阿罩霧下厝宮保第烞菸(吸煙)e時瞬
,忽然間聽著解嚴令呤,一時間遂 qang6去(愣住),有影驚一下腳尾僬冷
去,一粒頭殼澎澎英,滿昊全金條……, 毋知欲按怎才好!汝給看,
告示文中,講「野心份子」欲借「進香」來「聚眾叛變」,這擺爐主是
文明仙,這暗中著已經講明是專門欲對文明仙爾,莫怪文明仙驚一趒,
腳手僬麻痺。
呾代誌到這个坎站,雙方「攤牌矣,烏仔魚去互濁水激著矣, 嗯才
這聲港無潦落袂續矣,著欲死豬哥抑豬母,殘殘脆脆互汝好勢,這棚官紳
惡鬥真梟悻,台員人互人惼甲即尼無格,有影是真了然li。 林家雖然
唅心gap命為清朝犧牲即贅, 宛那夆給看衰, 佇殖民外來政權下腳
討趁,有影無法度著是無法度li。
文明仙搪咧苦想e當中,忽然間宮保第外口,一陣人he3he3趒,早著
有「顧門仁」入來通報,文明仙一下出去siam6看呤, 才知影有二、三
百鄉民,跪佇門腳口, 大埕邊路頭塗腳兜積規陣人li, 齊聲喚喊,流目
cap滴,大聲啼嚎『咱彰化城官廳搭出告示,欲禁止今年南瑤宮落北港
進香,真正夭壽哦,叨毋知一年一擺落北港進香,是咱彰化地上介要緊e
大代誌,這聲喚禁止著禁止,完全無顧著善男信女e誠心,咁是欲逼咱百
姓潦落造反這堀是毋?阮茲百姓姑不而衷到地矣,來茲跪求爐主文明將軍
出面參詳,看吓凍還阮一下甡張否! 安呢鋩角才矯吓返來li。
『咱e嗣大文明仙,自來愛鄉愛民,出錢出力,為國犧牲拍拚,按怎
吓互人指做「假借進香來集眾圍城反叛」呢?大兮啊,官廳甚過超過,阮
這陣死忠e,絕對互汝做擋撇(做後盾),無論刀山火坑絕對潦落無第貳
句li,咱香客e面子,下厝林家e祖公面子,國家社會e面子,攏噯顧互伊
稠,袂使顛誕li,為著媽祖婆、為著爐主,鏘嘛著鏘搭底。』文明仙聽
煞,真正為難li,彰化暢e自來著硬鼻,為著信仰叨真歹剃頭li,百姓群
眾宛那真歹應付, 呾這聲歹紡矣,文明仙尻倉去互椅仔夾著矣。
一爿是官府e壓迫,一爿是百姓e壓迫,一面是溝一面是圳, 佇安呢
咧做石磨仔心,有影叨歹心啦p命li,眾位看倌啊,逗底文明仙是吓來屈
服官府當權派, 互人凌治侮辱,抑是順應民意,先落手為強,起兵攻伐
官府來自保?(官逼民反叨實情li),人講『先拍先贏, 才袂叫阿俍』,
文明仙想甲頭殼欲biak3去,這棚戲看是欲「委屈求全做烏gui」?或
者是「力拚逗底展氣魄組兮?」……請看下腳分解。
(64) 當文明仙咧參心兩意,「捏驚死放驚飛」,求戰求和心
頭捍袂定e時瞬, 毋閣凌定國、王縣令彼派e人,宛那心肝夯狠,虎頭筴
an2(緊),一步一步欲逶文明仙給筴落,等伊大船入港,叨文明仙真正衰
韶到底矣有影!
同治九年三月15,離北港進香,干礁二工爾爾,彰化縣衙,為著欲
執行(袂使進香e)戒嚴令,縣令王文棨令差役捕快,一行人拚到南瑤宮,
摠 (zang6 ) 著廟公,強逼尹去後殿請出媽祖婆,廟公驚一下目睭青
gingin 14,大嘴開haahaa,規身軀凊汗僬拚,順續褲底加斤外重li,嚨喉
講袂出話中間,規陣差役真正夭壽骨,撞歹門閂,真正硬逶媽祖婆給請
落來。
續落e瞬呤,趕緊三腳趒二腳跳, 逶媽祖婆給請入去彰化城內,安
置佇觀音亭e所在安呢甡。臨走e時瞬,留一張告示互廟方,當做收據li,
告示狀大概仔說明,自古以來,暴民攏有利用宗教信仰,集眾反叛官廳e
代誌,今年氣氛緊張,有人欲利用落北港進香機會夯傢私(動武)集數
萬人來叛變圍城,為著減少雙爿大屠殺大流血,政府方面真正姑不而衷
宣佈戒嚴,「事非得已,尚請諒情」安呢。
清廷逶彰化媽祖給搬押去觀音亭,這个觀音亭現主時猶存在,已經
改名叫「開化寺」,地址佇彰化市中華路134號,因為坐位佇現主時鬧
市三叉路口,真好唗尋li,(若有閒拄搪(剛巧)去彰化市時,稍給參觀這
个古蹟le),為著驚暴民來搶靈聖,官方有派重兵,日夜守護才袂顛誕li
。
佇茲先說明同治年間,彰化縣衙e組織情形,這佮本故事有絕對e牽
連安呢,1870年代, 佇歐洲科學文明已經真正發達矣,微積分已經發明二
百年囉,「氧氣」亦發現欲80冬,電氣翕相術攏出現矣,法國巴斯特亦發
現細菌學佮狂犬役苗, 毋閣佇東方滿清帝國福建省台員府彰化縣e衙門
, 宛那猶真落伍真下消真飯桶叨著, 袂輸中世紀e烏人, 一四界荒荒廢
廢赧示赧眾有影li。
庶當時e彰化縣衙,管理著現主時e彰化、台中、南投三縣市,地尺
不止也曠闊,1724設縣衙佇半線,設知縣,儒學教諭(教育局長),典史(
獄官),陸路布力佈置佇縣城,另外水師佈置佇鹿港,同治年間,縣令下
腳e行政部門內有戶房、吏房、禮房、兵房、刑房、承發房、工房、
庫房,攏總八房(局)來處理壹般行政。
衙門官員大約一百人,無論官員兵力,壹律外省人擔任li,地方上e
戶口實行保佮制度,十戶做一牌,十牌做一甲,十甲做一保安呢,甲長、
保長由秀才、長老、捕快來給推薦,維持地方治安,縣政普遍是腐敗臭
爛,袂孝孤du4 e,官員上下壹律貪污,愈敖貪污,表示愈有學問,地方警
力乏搭民間盜賊毀類,鴨母吞塗蚓li,治安敗經百姓食力li。
1870年著一擺火災,縣衙公堂搬到城內e白沙書院,差不多是現主
時e孔廟孔門路彼箍圍仔,文明仙公堂受害e現場著是佇茲,另外無外遠
e所在著是觀音亭(現時叫開化寺),伊著是這擺扣押南瑤媽祖e所在,
猶若講到南瑤宮,伊坐位佇城外真遠e地頭,壹般人叫「外媽祖」,另外
一間「內媽祖」(現時民樂街),是官方挑工設立來鬧場兮,卡無「生理
」,(親象美國e「台員同鄉會」,另有官方「台員同鄉聯誼會」,「魚
目混珠」安呢)。
(65) 同治九年三月15, 呾南瑤宮媽祖婆,去互官方押去觀
音亭,咱茲彰化暢e鄉親道友,一下聽著這層空頭呤,無外久e中間,一
嘴傳一舌,規个彰化城內內外外僬知, 嗯才 e瞬呤,規陣鄉民善男信女
性地大夯,爬起腳long6,走去觀音亭圍甲烏崁崁,按算欲佮官廳兮輸嬴
le,佮伊捙拚填到底le。
觀音亭守護e百外名兵士,對沿路壹直圍來e信徒二、三千名,真正
為難li,叨食人e頭路有影歹紡啦,圍觀e信徒愈來愈贅,到暗頭仔(傍晚
)e時瞬,強強欲積到五、六千e款,隨人心狂火焯頭殼氣甲欲擎(cing4)
煙,這陣信徒e心情若準疏導袂好勢來講,恐驚也今暗,兵士著吓佮民眾
發生流血衝突li, 安呢來發生拚生拚死,著真正醜矣he!這款扮勢,
袂輸現主時e後勁民眾為包伍輕工廠仝款li。
著安呢,雙爿e仁馬兄弟佇遐,陳皮蘇黨臹有bii,無欲認輸撤退e款,
佇信徒這爿面,認定講:彰化人落北港進香,这是百外冬以來,天公地道
e民間信仰,官廳兮無來促(zak)造叨咧慘了矣,卡有顛倒閣來扣押媽祖為
害眾生?有影愈想愈ce3(恨),強欲摯節袂稠袂稠安呢。
這嗎絕對噯對媽祖婆,給請返來南瑤宮,而且後日e北港進香照常
進行,眾人唅心gap命挺搭底, 安呢鋩角才矯吓返來li。毋閣徛佇官廳這
爿面,當權派e觀點,凌王爺、王縣令,著是欲利用進香事件,互文明仙
來大船入港,挑工設計這齣連環計li, 嗯才 e瞬呤,官府堅持己見,硬
biakbiak li,講啥乜有人欲利用進香,來聚眾圍城叛變安呢, 嗯才 e瞬
呤,香客這爿e群眾佮官方e兵馬,發生衝突,草蓆捲針把,雙頭莿iaia,
攏毋認輸li。
這聲目睭金金人傷重,規个彰化城恐驚也大捙拚大流血著欲爆發矣
li,強強摯節袂稠矣,結局到最後e空縫, 宛那著咱爐主文明仙來料理才
吓使li, 佇千鈞萬重e時辰,咱文明仙為著眾人百姓e性命、香客e安全
,甘願潦落這堀,無外久中間消息傳來,發生大捙拚,號外e新聞來矣文
明仙甘願做觀音亭中「彰化媽祖」e保任仁,同意戒嚴,今年停止南下
進香。
咱跋白e(講實在),这毋是文明仙下消落軟,實在是伊用心計較佰般
思量e理智決策,伊安呢做,一方面減少彰化屠城大沐血e悽慘,另外一方
面是「將計就計」,代誌若爆(biak3)時,暫時e讓步,「時間換空間」,
續落出其不意,先落手為強,用伊強大e武力,「官逼民反」,來殺盡這
批死無人哭e貪官污吏,佮外來政權e走狗,橫直仝款是死路,港欲潦叨
潦卡深le,無的確後出氏e人,顛倒吓來同情嘛真歹講li, 毋閣這是心肝
想爾,無壹定吓做li。
(66) 同治九年,(舊曆)三月16日,這工對爐主文明仙來講,確
實是「最長的一日」,規粒頭殼binbiang叫,比「諾曼地登陸」閣卡硬
斗,逗底對官府凌王爺彼派e當權者,是欲行求和路線,抑是欲行求戰e
路線?文明仙掠無zang4(找不到主見), 安呢「一心欲死,一心欲食米」,
心情矛盾痛苦,真正壹代英雄,珠屑四濫垂,比戰場肖摋卡艱苦。
若欲求和,恐驚一步一步行入官府e布袋嘴,互人設計安呢,若欲
求戰,這聲著噯先出兵,吓變做「反叛」,除了全家抄斬外,這世人所有
功勞總無,又閣早前得失戴潮春、草屯洪家,這聲「叛國」兼「台奸」
,變做「雙頭無一敖」(兩頭落空),算算e, 宛那袂和安呢,想想e ,清朝
e壓迫,拍算是暫時爾,落雨過昊著清,無赫尼龍(hiani)食力叨著啦!免
咧烏白想啦!
三月16日下晡,南瑤宮爐主兼貳品武官林文明仙,正式向官府讓步
,同意下腳幾項約束:(壹)贊成戒嚴令,同意今年無欲落北港進香;(貳)
「百年習俗,勢難阻止」,彰化民氣旺盛,文明仙負責壓落,儘量疏導;(
三)萬壹香客群起暴動時,文明仙絕對負起叛變責任,吓徛佇官府立場
來協助平亂;(四)同意三月17日下晡,前往彰化縣衙,接受發生佇同治
五年e「霸佔田產官司」,並接受凌定國王爺(政敵)e審判調查;(五);
為了表示誠意,三月17赴縣衙出庭官司時,除了隨從四人以外, 逶阿罩
霧到彰化城,完全無掣壹兵壹卒,完全服從官廳e,表示宛那對清朝政府
盡到最大忠心安呢。
人講「誠意食水甜」,清朝台員地,欲出一个即尼死忠兮, 宛那無簡
單li,文明仙為著皇清,無惜犧牲家己身家,順續逶同胞戴潮春、洪欉
殺滅, 安呢唅心gap命剖心肝互人食,人猶嫌臭臊li,這聲為著家己名聲
財源,甘願來犧牲百年習俗媽祖進香,來得罪規彰化城安呢,唉!世間戇
伯也叨單單出伊一个爾爾, 安呢咁算吓和(划得來)是毋?
另外佇官廳這爿面,凌委員、王縣令、楊總兵,黎道台一下聽著文
明仙願意落軟呤,引蛇出洞成功矣,有影歡喜甲袂講了了, 也叨大船入
港,叨心涼脾透開li,頂司閩浙總督英桂交待e神秘任務,這欲完成矣,明
仔載,等文明仙「自投羅網」,大船入港,給伊ii6 uaaikolosok sa3
好勢了後,咱茲阿同e ,隨人升官發財,這na亦著閣講,有影天公欲促造
叨現現li。
毋閣凌王爺彼班奸臣宛那驚文明仙e緩兵之計,萬壹興兵叛變嘛是
食力li, 嗯才 e瞬呤,一方面儘量笑面攻勢來表現誠意,派人給文明仙
講好話,另外一方面緊透暝透日派人去鹿港求救兵,給嘉義方面請兵,
嚴陣以待,萬不利文明仙若婁兵丁攻殺時, 吓凍大力制服給壓落底,
來取著贏面安呢甡。
呾代誌到茲,雙爿已經無抽退e空縫矣,二爿定著唅心gap命捙拚到
底,港潦落摋到汝死我活,看欲死豬哥抑豬母,眾位,到底是文明仙先
發制仁,來革命摋貪官,或者是凌王爺奸臣派來擊滅文明仙呢?到底啥
人吓贏,現主時是1870,三月16日下晡時,貳十四點鐘,答案著知影矣, 頭
前講過,這二十四小時,比諾曼地登陸「最長的一日」閣卡緊張li。