八 天時梟悻, 彰化公堂暗算文明仙
(67) 這嗎是同治九年三月16暗時仔,阿罩霧宮保第e林家,佮
彰化縣衙白沙書院,二个所在攏是燈火通明,干礁偆今暗爾爾,叨無
十外點鐘,文明仙這派佮凌王爺官府派,著欲決戰矣,雙爿e「沙盤推演
」按怎款,真正要緊,這嗎給分二爿來說明,看尹按怎來應付明仔載e危
機?
A. 第壹部分,先講對官府這爿,以凌定國委員為掣頭,另外王縣令
、楊總兵、黎道台配合料理li,凌王爺是英桂總督e「爪耙仔」兼走狗
,這擺來台員辦案,號名是欲處理文明仙佮族敵e田產糾紛,實際上是欲
「借刀殺仁」, 逶文明仙給sut掉,以減少地方勢力揚浮。規班仁馬踮
佇縣衙研究對策。
凌王爺這班奸臣, 佇 16日已經訂出這棚「掠虎專家」e戲齣,伊e
步數,照頭前e連環計差不多。第壹步,尹這批當權派,接著英桂總督e
密令, 噯剷(tio6)除林文明這款開天勇e勢力, 安呢才袂踮地方大尾,
重閣拄著太平天國e大艱苦li, 毋閣欲逶文明仙給連根挽起來,恐驚也
真正硬斗費氣li, 毋na講伊現主時有真贅武力財力,大尾溜溜,強壓落
底恐驚吓動刀兵,另外林家「功在黨國」,尹家族為清朝作戰太平軍犧
牲重大,歹勢恩將仇報來打擊li。
閣一點清朝律令,大官欲定罪噯先解除職務才吓使處理li,所以欲
來打擊殺滅文明,有影真正為難歹紡,退一步來講,文明仙亦無犯啥乜
天條大罪,恐驚也「師出無名」,害下腳手仔真歹扭搦li, 嗯才e瞬
呤,對付文明仙,噯用軟步e,寬寬也(慢慢地)給捃起來,真拄好今年
文明仙做南瑤宮e爐主,有欲落北港進香安呢甡。
吓使對社會一四界來廣告,自來宗教活動,民氣旺盛敖(gau3)抾和
,萬千仁馬,一聲若biak,著袂收山e,上介容易發生叛變圍城事變(親象
白蓮教佮回變著是明例,這擺南瑤宮下進香,十外萬人),萬壹有奸仁來
使弄、來挑撥,「勢必血流百里生靈塗炭」,為著國家e安全,保障百姓
性命活路,縣衙對這方面真正「關心」、真正「煩惱」,食力e時瞬官
廳無潦袂煞li。
第貳步, 佇進香幾工進前,由縣衙宣佈戒嚴令,雖然無指明文明仙
, 毋閣吓逼文明仙來表態,來擁護咱戒嚴令li,假使文明仙反對戒嚴令,
著表示伊可能是煽動香客來暴動e挑撥者,官府自然隨時吓使給嚴辦
li,假使文明若接受戒嚴令,這聲著噯得罪十外萬香客(百年習俗民氣
旺盛)閣卡吓暴動,致使文明仙做石磨仔心,雙頭為難li,所以不管文明
仙接受抑是毋接受,攏是臹梟悻li,這聲官廳卯贏li,蹺腳捻嘴鬚,僎便
便咧等伊,欲叫伊大船入港叨著。
第三步,根據戒嚴令,馬上扣押彰化媽祖(神像)踮觀音亭,直接莿
cak茲香客,激茲道友大眾,來夯懸尹衝磅火焯,主要e目的,是欲逼文明
仙無條件投降,來完全接受縣衙當權派e要求,文明仙尻倉搢(zii6)大
砲, ga欲接著戒嚴令以上,為著驚香客暴動,僅干礁叨完全接受官方e
條件li,同意解除武裝,甘願佇三月17日,親身赴縣衙公堂拍官司安呢,
這聲凌王爺當權派大大歡喜,這步「調虎離山」e計策成功矣,武力強盛
e文明仙,壹旦ga離開故鄉入縣衙以上,勢單力薄,一尾魚落鼎由在人煎
,壹切互官府派掠死死,袂凍來矯全局li。
(68) 第四步,得著黎道台、楊總兵e協助,官府派早著密令嘉
義城方面e兵力,鹿港方面e水師,暗中調派大量兵力,入彰化地頭埋伏
li,頻若文明仙有一絲風吹草動呤,著絕對嚴厲制裁給擊殺,以叛國定
罪,絕無寬貸諒情li。彰化媽祖雖然扣押觀音亭,文明仙互人逼到完全
接受官方條件, 毋閣文明仙佇阿罩霧彼枝勇猛e兵隊, 宛那隨時有反叛
e可能li。
官府這陣老奸臣,早著料準準文明仙吓「假降」這步li, 嗯才 e瞬呤
,凌王爺當權派,除了向楊總兵調兵隊以外,另外派人去暗中聯絡文
明e族敵洪欉家族、林應時家族、戴潮春餘黨……,頻若文明仙發兵攻
彰化城時,尹茲族敵著馬上「趁空虛攻入阿罩霧下厝,以報前仇刷恥,
討返來田園」li。
當權派「裡應外合」了後,這聲殘殘脆脆來逼文明仙拚du3,著假
好衰真正客氣來搬請文明仙, 佇三月17申時(下晡三點左右)來縣衙公
堂審問「林應時官司」e田園問題, 也叨官府派按算有二種可能,其壹
是文明仙若臨時起兵反叛,尹早著佇要點埋伏重兵僎便便咧搪等,另外
洪欉族敵亦吓內應li,馬上殺之,昭告天下「戒嚴時期」,假借進香,聚
眾叛國圍城,罪大惡極,萬死不足赦罪li。
另外一種可能,是文明仙甘願到縣衙公堂,這聲「調虎離山」計策
成功,枉費文明有真贅兵馬嘛無卡擢li,吓使踮公堂外埋伏暗殺手五十
名,一聲令下,給擊殺成傷或者摋死安呢,吓使對外講『文明仙隨從三
人先發難,引起規陣肖摋,文明不幸意外傷亡亂局之下,真正遺憾叨著
!』來瞞生人目叨著。這遍定著心肝噯掠橫,才袂錯過天機, 毋管按怎,
頂司交待e任務, 噯完成li,「食人e飯,患人e問」, 也叨江湖潦落身不
由己亦是姑不貳三衷安呢,逗底按怎發展,逐傢來給臆(ir4)看覓咧!
第五步,假使文明仙中計受傷或者死亡,這聲定著吓引起阿罩霧林
家e報復,林家絕對吓派兵勇軍士,來進攻彰化縣衙,盡殺官員洩恨來矯
鋩角li,所以咱官府派e人,著噯派重兵佇半途埋伏,請林家兵丁來「大
船入港」,壹旦ga林家兵軍進攻縣衙以上,馬上宣佈『文明仙聚眾圍城
謀反』,依案件將林家抄家滅族, 逶霧峰林家規族仁馬,給摋甲無人
燒香點火, 互伊永遠絕種袂超生。
第六步,第貳回暗中聯絡林文明家族e族敵,包括戴潮春、洪欉、
林應時……,頻若文明敗亡,阿罩霧林家興兵攻城時,伊著趕緊趁空虛
攻入林家田庄,一方面報冤仇,一方面亦吓使來討返來田園,一方面功
在清室,共除叛逆,到時瞬論功勞,討一碗泔糜仔食宛那有啦!人講「一
空掠三尾」,真正e!政治鬥爭無情,喚變面著變面,叨陰險酷行梟悻li,
嗯才後出氏人咧怨嘆,政海惡毒,無三二步七仔,著毋倘沐著呢!
咱彰化地界e凌定國王爺、王縣令, 佇府城黎道台、楊總兵,省城
英桂總督e支援下, 搪咧一步一步來創造危機,一步一步來壓迫著文明
仙e性命,文明仙壹生功在黨國,食老宛那梟悻,唉!有影臹歹失德矣 he
(真沮喪啊!)毋閣「狗急跳牆」,到時「官逼民反」,萬不利文明仙若夯
狂反叛,港潦落興兵鏘到底,兵災血影滿四界,安呢嘛是大慘呢!
各位鄉親道友,逗底文明仙吓一步一步踏入官方e陷阱否?文明仙
是毋是吓受害?伊e黨徒吓興兵報復否?官方藉彰化媽祖進香戒嚴e理
由,是毋是有法度瞞生人目是毋?咁講文明仙e部下赫尼飯桶是毋?所有
e空縫長短, 也叨明仔載著知輸嬴a矣he!定著吓「水清魚現」li。
(69) B. 第貳部分,閣再來講到文明仙這爿面,逗底文明仙按
怎來應付明仔載三月17 e危機呢?林文明將軍,官拜貳品,財源豐富,伊
咁知影自身危機是毋?文明仙「壹身心在黨國,以國家興亡為己任,置个
仁死生於度外」,比現主時邱創範閣卡愛國li,咱給看, 佇這款流擺到
地也,伊咁矯吓落來?伊咁臹實有材調來避過這場劫數?
三月16,阿罩霧下厝e宮保第,氣氛真正沉重li,文明仙佇大廳堂是
行過來閣行過去,一个心肝mi3鼓pokpok彩,叨心情掠袂定安呢,下腳手仔
,茲軍師參謀, 宛那真正緊張,大氣喘袂離,下厝方面e敖人,壹直想袂
曉,到底官廳是欲掠文明仙按怎來款待?這擺文明仙入縣衙,來應訊官
司,是普通純官司?抑是欲給扣押關起來?抑是欲給拍傷給教示一下?抑
是欲給摋死?这中間輕重e矯摵,代誌長短判斷,差別真大,差甲叨有影
七里天外li, 毋閣官廳方面有欲落戒嚴令,來禁止北港進香,这算是歹
吉兆li,代誌歹紡, 宛那 互汝袂鐵齒e叨著!
文明仙佮伊左右軍師, 也叨智識佮環境e關係,袂了解政治e烏暗、
無情,掠做講咱若對人好,仈人定著亦吓對咱好,唉!真正番薯仔忠厚人
,叨無地講起li,天地幾斤動毋知影,事實上佇外來政權統治以上,汝割
肉互人食,人猶嫌汝臭臊咧!壓迫佮屠殺,對統治者來講,叨簡那捏死一
隻蚼蟻仝款,文明仙按怎叨想袂到,以尹家族e犧牲貢獻,人宛那欲取伊
e性命li,做兵仔人戇戇倯倯,外來政權殖民政治e毒步,伊宛那捌袂透
安呢。
文明仙咧想,明仔載欲落縣衙應訊,官府對付伊,有三款可能,頭一
款著是單純e地方官司糾紛爾爾,用錢講講e著無代誌矣,人講見面三
分情以上, 呾平平在地兮,矯矯e著吓好勢,後回仔卡細膩著好啦,第貳
款情形,可能是官場恩怨「私仇公報」安呢,像凌王爺,倚勢惼人到到,
知府總兵e錢銀需求「勒索」,做官貪污食錢,雖然是中國官e通病,毋
閣憑家己e官位佮財產,照理是應付吓落來才著,若是情形甚惡質, 呾
竭竭是辭官告老還鄉爾爾, 形貌帶衰準拄好啦!
第三款情形,可能是政治迫害,或者是謀殺,若是變做政治事件,
呾這聲叨大歹紡矣,官廳用「調虎離山」e計策,引蛇出洞,續落互汝「
好勢」(擊殺), 毋管是殘廢破相或者死亡,攏真費氣,雖然事後吓凍興
兵報仇, 毋閣潦落捙拚刀光血影,恐驚吓亡族滅種,永遠香爐無人捧,
安呢嘛毋是頭路li。
文明仙這幾工來,想閣再想,想甲一粒「頭殼碗公」著欲biak5去,
宛那掠無摠 li,文明仙認定講,這三項可能當中,以頭一款上有可能
li,拍算(可能)是壹般e官司小糾紛爾爾,開淡薄仔錢仙,叨吓好勢溜
溜,免煩惱啦!世界赫尼大,佐汝安啦,定著有人吓給汝捍好勢,鋩角壹
定矯吓返來li。
上無可能發生e,大概著是第三項政治謀殺e款, 也叨阮下厝林家自
來「忠黨愛國」,效忠清室犧牲重大,清朝無來感恩叨咧慘了矣,卡有閣
「吊脰搶後腳」恩將仇報來殺恩情人?若安呢,請問後回仔,佗一个台員
人敢來效忠清室?所以這層政治謀殺,應該是上無可能e代誌,唉!睏卡
有眠e,家己毋倘烏白亂想,做人噯互相信任,上介要緊叨著。
(70) 話是安呢講, 毋閣文明仙心肝頭宛那稍可袂定著,分分仔
不安,腳手肉「搐(cua4)」兮咧等, 也叨有寡問題空縫,伊確實想袂曉,若準是
壹般官司爾,按怎著噯踮北港進香e流擺來矯摵?按怎噯發佈戒嚴令來
驚倒人?按怎噯冒著千千萬萬香客暴動流血,來完成這款官司?這款代
誌無急迫性,等北港進香返來, 才處理叨好勢矣嘛!
普通時e稍寡代誌爾,按怎變甲即尼恐怖?唉!無定著官府派,正經有
欲來收拾謀害我e款哦,想到茲,文明仙腳手僬麻痺,規箍人強欲un落去
,真正歲頭食到三十七, 猶 毋捌拄著這款空頭(難關)li,文明仙壹直咧
想,逗底官府派,是毋是欲借這个機會來擊殺伊?來佔伊田園?來抄滅伊e
家族佮祖公仔墓?
也叨總講一句,無論是北港進香,或者是林應時官司案,攏無必要官
方士紳雙方,拚到這款程度,互相猜忌到這款坎站,文明仙真正矛盾,一
方面是稍寡代誌, 毋驚政府來囉嗦,一方面看勢面無好,又閣驚政府來
給凌治li。
逗底官廳吓來對文明仙不利袂?文明宛那 毋敢放外外, 噯做上歹e
拍算li,假使官府決心欲摋伊來講,伊宛那絕對「先發制仁」,反叛搭
底,因為這時瞬,文明仙手中猶捍(hw3)有二枝王牌,真正官府派大官虎
,哈伊袂倒。
頭一項著是伊擁有強盛e軍兵佮無限e財富錢銀,而且有作戰經驗,
正經欲捙拚,清朝兵勇毋是伊e拚頭,第貳項著是伊是貳品副將,官位真
大,清朝欲治伊e罪,噯先解除職務才有法度li,而且尹兄哥林文察為
國犧牲,清廷虧欠真大,算算e,官府派欲給收拾, 宛那真正硬斗。
毋閣想罔想,驚罔驚,結局文明仙亦是服從清朝官方e命令,伊認定
講,這擺落官府拍官司是稍可代誌爾,竭竭是官位勿做著準煞! 毋免烏白
想政治壓迫赫尼梟悻e代誌叨著, 嗯才 e瞬呤,文明仙決定三月17日
中晝親身到彰化縣衙拍官司,伊飽滇e兵力、仁力、財力,暫時按下佇
厝腳,完全向官方來輸誠好意li。
三月16暗暝,文明仙逶妻兒、叔伯兄弟,叫到大廳,講一寡暫時離
別e話。『賢妻,阿佬e 啊,過柱兄弟,我明仔載欲入去縣城拍官司,號名
是拍官司, 毋閣真正危險li,這嗎 搪咧戒嚴,無去袂煞,萬壹我若有三長
二短,恁噯節哀順變,家兄林文察將軍,為國犧牲死甲真慘,如今我宛那
真正危險li,若是我順序返來,逐傢才來摋豬公大慶祝,萬不利若傷亡
, 毋倘甚傷心,亦毋倘佮官府捙拚,總是人e運命爾,這幾年e戰事,尤其
是戴潮春、洪欉家族e亡魂,亦請恁來諒解,台員人家己拚家己,悲哀永
遠講袂了,茲氏細著毋倘做官啊,切記!』
文明仙講煞呤呤,目 屑四濫垂,心情真正沉重,唉!危險時機最後一
夜e心情,無論閣卡鐵人,汝著摯節袂稠li,眾位汝若有看過彭明敏離開
台員e最後一暝,苦別妻兒彼一幕e回憶錄, 互人感心目箍紅,彭教授掀
開棉被,摸摸囝兒,給量身長,唉!明仔載著欲流浪天涯矣!真正互人看到
鼻酸目燒li。
文明仙續落夯香拜別公媽神主牌,心情感慨無量,唉!明仔載吓變
做按怎,完全袂了解li,為著表現誠意,伊無惜性命,伊完全信任官府來
婁孤帆兮。抑無伊現主時e兵力若叛變,保證雙方壹定大流血,官府e
老奸臣定著吓死甲臹歹看,文明仙放棄叛變e自救機會, 佇生死空縫中
間,伊表現了甚過忠厚安呢甡!
(71) 同治九年三月17日早起(1870大約四月20日左右),林文
明將軍,掣(cua3)著一陣親腹e, 逶阿罩霧下厝,坐馬車到彰化縣衙公堂,準時
赴約,來接受王縣令佮凌定國委員e官司審問,算起來文明仙宛那情理
人,有氣魄叨著,伊放棄武力有照約束就台,單超壹個(gr5)仁 婁孤帆
兮,叨毋驚危險li,親象這款「鴻門宴」性質e集會,有影想落腳尾冷冷
le!
逶阿罩霧下厝到縣城公堂,大約六十外里 (20km ) e款,大陣仁馬到
縣衙公堂時,外口早著有接待仁員來迎佳賓VIP,接待員定著是官府派e
「爪耙仔」, 毋閣為著欲掩勘心機,挑工現出臹好禮、臹客氣來按奈,
一絲叨無各樣(異樣)li,咱文明仙忠直人看落大大e放心,想講我官做
即尼大,尹毋敢按怎拄按怎啦! 嗯才心情落軟一時僬輕鬆li,文明仙解
散衛隊兵馬,叫尹隨人返去阿罩霧下厝,又閣散一寡銀兩來給感謝逐傢
e幫忙安呢甡。
文明仙心肝頭一下想,這擺e官司若拍煞了後,著吓凍來還伊清白,
後回仔平安順序卡「吓食吓睏」咧,做人有本等,來做國家社會e大枝龍
柱li, 互這三年官司告一段落, 宛那袂醜4 li。嗯才 e瞬呤,文明仙
干礁掣四个衛士游捷、戴乞、李祥、李馬爾爾,著行入去彰化縣衙
公堂重地,準備僎欲佮大里杙e應時伯仔拍官司,來解決「霸佔田產」e
土地糾紛li。
文明仙掣四衛士,行入去彰化縣衙公堂,是佇同治九年三月17日未
時,(舊曆三月17下晡一點左右),彼个時瞬,老奸臣這派(王縣令、凌王
爺),早著佇會場佈置「機關」,而且埋伏武士,來應付場面li,老奸臣
給埋伏e武士,約好暗號,欲踮現場逶文明仙給縛起來,必要時給殺傷擊
滅,文明大尾li, 也叨「大船入港」,有影機會千年難逢,若無給捃起來
,後日仔互伊後腳 徛在,擁兵叛變,這聲叨大費氣矣 he!這擺掠縛了後,
吓凍以「進香為名,聚眾叛變」名義給斬滅,來挽起清朝眼中e一枝莿仔
he!代誌臹逼,絕對袂使漏鉤去呢!奸臣派,另外閣聯絡鹿港孫同知派水
師,嘉義何縣令、府城楊總兵e兵員支援,想欲一聲扑倒林家叨著。
眾位鄉親,續落著是彰化縣公堂,審問文明仙佮應時伯仔田產糾紛
e情形, 佇茲稍利用三分鐘e時間,簡單說明庶當時彰化城e官方情形,
互汝吓凍對彼時官廳e做法,加了解淡薄仔。彼時台員猶 未建省,省
城佇福州,府城佇台南,有彰化、嘉義、鳳山三縣爾爾; 彼時行政
權佮司法權合併,縣令同時掌理行政佮司法判決,唉!縣令「球員兼裁
判」壹手遮天,司法咧司法八擺(哪有这回事)e 呢,中國飯桶到這款坎
站,有影梟悻li。
彰化縣衙公堂,新設佇白沙書院(舊時e縣衙,毀佇戴潮春戰火中
,袂赴起好),差不多現主時e孔門路,孔廟附近; 彼時台中市猶未誕
生,全台員中部,彰化市上鬧熱,台中市是後來仔日本人建立e新市鎮,
同治年間猶是水田草埔爾爾,受彰化城界管,彰化城e重要性,有影叨
互汝袂鐵齒e 呢! 彰化城e官員佮兵士,清壹色是大陸派來e外省人,
这是清朝規定e,這批人毋但是食錢腐敗性格青狠爾,無智識、無能力
治民才是食力li; 彰化城官方駐軍干礁幾百名爾爾,這點真容易
sy3(誘)百姓「聚千上萬」e叛變; 官員自上到下,壹律貪污食錢,縣
令任期一年到二年,根本無心內政;拍官司了時了錢真艱苦,行政司
法不分,剝削嚴重,上省城福州公文噯一禮拜,上京城噯一個月以上,完
全無效率安呢甡。呾文明仙吓危險否?請看下腳故事!
(72) 呾 e瞬呤,縣衙公堂(設佇白沙書院),開始審問文明
仙佮應時伯仔 e官司,時間是同治九年三月17日申時(大約下晡三點),
現場e仁員有三組,頭一組是原告「應時伯仔」一行數人,第貳組是被
告「林文明將軍」佮伊e保鏢戴乞、游捷、李祥、李馬攏總五人,第三
組是判官,包括凌王爺委員、縣令王文棨、左右衛士一陣人安呢。彼時
瞬e行政佮司法無分開,行政官有權力來做司法判官安呢甡。
官司開始審問,由省城福州派來e專案委員凌定國開始唸文『查原
告福建省台員府彰化縣大里杙仁士林應時,具狀控告林文明將軍,在同
治六年洪欉戰役,以軍威逼佔原告林應時六十甲田園,拒不規還,今日
當事人雙方,各在庭上,著請對質申辯,令林文明將軍規還林應時田園
為幸,雙方化干戈為玉帛為禱!』
續落e瞬呤,原告林應時說明『這層代誌已經拖沙延cen3三年外
囉,這三年官司纏身,叨艱苦坐卦無地消透,現主時我厝內,連生活叨矯
袂落來,不時嘛乏(ha4))甲米甕摃銅鐘li,文明仙霸佔阮兜田園,應該規還才
是有氣魄li,官司逶同治六年拍到這嗎同治九年, 嘛是應該來結案,
互雙頭來歇喘一下,希望庭上判官老爺,吓凍替小民申冤,主持公道互
正義來起示安呢!』
這嗎換到林文明起來答辯,伊講『同治六年e草屯戰事,兵荒馬亂,
一四界刀兵交cap,梟悻liuliu,我文明咧統領鄉勇,為國剿除叛逆洪欉
,出生入死盡散家財著無咧計較矣,卡吓去欺負一个鄉民霸佔田園呢?这
完全無影無跡,講白e,我毋但無來欺負林應時伯仔,我猶顛倒提錢銀給
買li,而且有地契書類做證據。我庶當時是用三千箍銀來買伊六十甲e
田園,逐傢歡喜甘願e,無肖惼(欺)啦!』
這个時瞬,凌王爺假好衰,問原告林應時有這層代誌否?『有啦, 毋
閣是假影買爾爾,依原是強佔e 啦!』續落e瞬呤,被告林文明將軍
印(回覆)講『六十甲田地確實是我用錢銀買返來e,这茲茲無顛誕li,
若準林應時伯欲討回田園,叨請伊退還我三千銀箍,我同意規還田園。
氣氛愈來愈慪搭(au4da5),心情逐家愈來愈偓促(akzak 13,焦躁),
原告林應時大聲hiu喚『庶當時軍兵包圍,刀銃硬押落底,姑不而衷簽
地契賣伊,實際上我根本無提著錢銀li,這層「表面買賣,實際硬押」e
艱苦,望庭上老爺,明察絲毫來申張正義?』毋閣林文明將軍宛那無退讓
,大聲仝款戽返去『烏白講,我阿罩霧林家,自來忠厚敬民,絕對無這款
代誌……。』
這个時瞬,判官凌王爺、王文棨,假影反覆來審問雙方, 也叨時間
已經過三、四冬矣,各項證據缺欠乏搭li,凌王爺e心情根本無囥佇茲,
干礁空嘴哺舌,叨「嘴唇皮肖款待」爾,按算欲給「準」過去(敷衍一
下)著是啦!
拍官司是瞞生人目爾,加害文明仙才是大齣戲li,無論按怎,這聲
大船入港矣, 噯腳手敏掠現場sut掉, 猶無,縱虎規山, 互伊反叛,這聲
著kue4(啃)骨頭灰a li,千萬千萬絕對袂使顛誕e li,奸臣派ga港潦落
以上,殘殘脆脆叨互汝好勢啊!
(73) 噹時也(原來)奸臣派凌委員,暗中佇壁角e密室,藏有三
十名武士,匿佇內底,聽候奸臣一聲號令呤,著zong2出來,專工欲來款
收文明仙li, 嗯才代誌舞到這个坎站, 雙方王見王「攤牌矣,無爆
(biak3 )袂煞li。
公堂e官司,拍到半站,凌委員大聲弓體詈喚文明仙『可惱啊,汝欺
上瞞下,魚肉鄉民,無惡不作,理當受罰,來仁啊!』凌委員連肖續(連續)
搭堂桌三下,「砰砰砰!」,匿佇密室e武士聽著暗號呤, 自那傱(zong2)出
來,夯刀夯硾, put 逶文明仙這爿來,文明e衛士游捷、戴乞馬上拔刀
迎戰,另外李馬、李祥兩位保鏢,死命圍守文明仙來保護主人,唉!總是
啊,贅人對少人,三十名奸臣爪耙仔,來圍殺二个保鏢,鴨母食塗蚓,大社
惼細社, 嗯才 e瞬呤,保鏢游捷佮戴乞,應聲倒落,身受重傷流血不止
。
續落茲武士又閣圍過來,欲來掠摋文明仙li,文明仙「寡不敵眾
」, 宛那腹肚身受重傷,仝款倒佇公堂li,身邊李馬亦戰死佇身邊,這
个時瞬,凌王爺大喚一聲,眾武士停止攻擊,放保鏢李祥一條生路。
这毋是凌王爺(委員)仁慈,伊是欲照步連環計來行,挑工放李祥一
條生路, 互伊返阿罩霧林家,告知「文明伏誅」身亡e消息,來sy3(誘)
林家報復攻縣城,續落e瞬呤,以「託言進香,聚眾圍城叛變」為名,來
「抄家滅族」, 逶林文明家族給摋互伊絕種, 互伊無人來燒香點火
li。有影真惡毒安呢甡。
規間彰化縣衙公堂,現主時真正離gaga亂紛紛, 也叨目睭金金人傷
重,文明仙流血甚贅, 搪咧一分一秒行入死亡悲慘e世界,變做十九世
紀清朝台員第壹奇案,轟動世界古今中外e政治案件li,这是同治九年
三月17下晡申時(大約四點)e代誌。
唉!阿罩霧林家到茲宛那真悽慘li,亡國滅族e悲情, 佇茲看現現
li,離開大兄將軍殉國才六年爾,離開老父互媽盛和尚拍死亦有貳十
貳年,現主時阿叔林奠國(林獻堂e阿公)又閣互奸臣陷害,關佇福州監
獄,唉!林家啊林家,到茲來宛那盡磅矣、抾角矣 啦!到茲來宛那水流破布
艱苦坐卦!效忠黨國功名利祿一場空夢,後仁歎曰「滿門忠烈為國拚,
鏟平戴洪頭一層,如今中計血肉疼,為國為忠心空凝(嫉恨)」。
呾時間一分一秒過去,文明仙身受重傷血水沐沐流, 佇離開世間
這三、四分鐘,有影是伊這世人,上介艱苦e梟悻,魂魄欲失,忽然間想
起父母e恩情,兄弟e逗陣,一大陣囝兒心適……這嗎文明仙拚凊汗,目
睭前壹片e烏暗,大氣壹直喘袂離,感覺真嘴礁,性命e盡磅,伊流出了將
軍e目 屑, 毋是驚死,亦毋是驚疼,身為武將,早著逶生死放佇褲腳外矣 ,
大丈夫死佇戰場真正求之不得啊,唉!這嗎死佇「同志」手中,死佇家己
黨國手中,有影臹怨嘆、臹下消,身為貳品官員,滿腹熱血互人誤做叛
國,死甲ziani無格,是愈想愈凝,愈想愈逆(qek,恨)!
文明仙想著平定戴潮春起義,平洪欉亂事,返去唐山佮太平天國作
戰……想起押扣媽祖觀音亭,無趁機起義盡殺奸臣真後悔;壹代e英雄
豪傑,台員阿罩霧下厝宮保第e林文明將軍,這嗎安呢恬恬來離開世間
lo,拄好1870,三月17下晡四點,享年三十七歲(1834～1870),留落來肆
兒參女,唉!真正世間叨互汝袂鐵齒咧 安呢甡。
天頂落一絲仔雨霎(sap)仔、雨白仔, 安呢噴噴也, 頓點 頓點,
親象咧為這位台員地大官員,不明不白互人害死,來傷悲仝款,这是歷
史上e大條代誌,皇帝袂了解,官廳亦袂了解,族敵亦袂了解,甚至連親
戚囝兒嘛袂了解這層意義li。
(74) 文明仙e魂魄,離開著肉身,化做一瞬白煙,昇空飛去西
方e仙界,仙界生冷閣遙遠,文明拍一下仔「尻冷損」,魂身安呢茫茫渺
渺,身軀邊一蕊一蕊白雲,冷風咻咻叫逶腳底消失,無外久中間,已經昇
懸十萬里lo ,來到太白金星e仙界,遐蹛真贅台員去e冤魂義魄,逐傢話
語吓通,袂輸死忠兼換帖e,叨真好逗陣li。
文明仙e遊魂,飄入去太白金星e殿堂,顧門仔講『汝欲尋啥乜人?
有身份證否?』文明仙想規晡,印袂出話, 搪噹為難無步e時瞬,文明一
時間看著內面有一个臹面熟e人,心內著驚閣歡喜,無想著這个面熟e人
,煞狠狠行過來,見面逶文明仙搧一个嘴頰,大聲罵『幹××,台奸林文
明,汝吓認e我否? 庶當時仔,同治三年, 互汝害甲悽慘落魄,愈想愈逆(
氣),我已經佇茲 搪等汝臹久矣,台奸宛那吓落坑衰韶互,幹!清朝官服褪
起來!』
一下看,這个人噹時也(原來)著是戴潮春e魂魄li,文明仙大驚,趕
緊繫(he3)失禮, 也叨冤仇人逐著,隨人目睭牽紅絲li, 搪咧講(正在說
)中間,又閣行來一个人,噹時也著是洪欉,這个人同治六年互文明仙摋
死,真正毋願,叨暝日憤慨,一股陰魂纏佇仙界,久久袂消li,……
這个時瞬,太白金星聽著外口hehe33趒(吵雜), 嗯才探頭問『外口
是出啥乜代誌是啦?』洪欉冤魂印講:『著是台奸林文明夭壽仔來矣,逐
傢欲給扑味是 (想揍他), 吵甲乒乓叫,厝蓋強欲夯去li,這个林文明,真
正夭壽骨,同治初年,戴潮春等義士,為著反抗異族統治,無惜性命親身
潦落捙拚, 佇這个上艱苦e坎站,林文明無來幫忙著咧慘了矣, 遂顛倒
「吊脰搶後腳」,幫助敵仁來摋家己人,事後升大官, 逶家己e幸福建
立佇同胞e艱苦血身頂頭,害台員人永遠做異族e奴隸li,這款人惡毒酷
行無給教示,社會正義叨袂凍起示li。』洪欉一下講煞呤 , 著piak
piak 逶文明著給抉(guat3)落去(打耳光),文明仙壹再繫 失禮, 毋敢藏
鬚li,尾溜也太白金星神仙,是真正疼痛百姓而且顧慮著社會e正義紀律
,經過眾人e會議了後,罰文明仙掃便所,掃一百年來贖罪安呢。
文明仙e魂魄佇天庭,這聲大費氣li,清廷方面講伊「聚眾謀反」,
台員方面講伊「勾結異族,台奸巨惡」,這聲「雙頭無一敖」,做石磨
仔心互眾人消毒,逐工心肝偓促袂食袂睏e,唉!想落著心肝來一瞬e絞
滾安呢生甡
呾 e瞬呤,時間過了真緊,文明仙佇天庭拚便所,拚甲真認真,太
白金星真歡喜,知影伊「知錯必改」, 自那迭迭掣著文明仙,透過雲端
天階,來偷看凡間e變化,新聞li,昊一年等於咱五年,所以時間宛那
真緊li。太白金星神仙講『佛說因果關係, 互汝袂鐵齒e,親象汝壹時
失誤,誤殺忠貞台民同胞,落尾也 宛那去互清朝出賣摋死,因果循環,
一報一怨,法輪常轉li,汝給看,凡間變化安呢。
『汝有看著否?清朝做歹代誌來害死恁林家,結果1895輸互日本,
因果報應馬上著到,日本管台員,欺仁甚忝,結果又閣互美國摃倒……
』林文明佮太白金星佇天界,透過雲端,遙看世事,一幕閣一幕,簡那蚼
蟻咧排列行踏le,世事無常,真正吓互汝感受著「因果報應」e大道理
li。
(75) 呾話頭矯返來凡間這爿,這擺文明仙 婁孤帆兮, 入公
堂審案,結局是互凌委員、王縣令一派人給設計去,文明仙不明不白失
去了性命,伊e隨從戴乞、游捷、李馬、李祥, 宛那去夆摋三个,偆
李祥一人活命爾爾。
庶當時凌委員官府派允准文明仙掣保鏢, 毋是忖好意,實在是有計
謀li,尹挑工留李祥做活口,倘返去阿罩霧庄頭,親身講說災難, 安呢
嗯才有法度引蛇出洞,等林家規族來報復時,壹舉滅亡,順續以叛亂圍城
之名來抄家滅族,來完成「連環計」e步數叨著啦,這點真正要緊li。
這聲李祥逃出城門,爬起腳long6,拚返來阿罩霧下厝宮保第,一入門
呤,大喚一聲『主公大悲慘,文明將軍佇縣衙,去互凌王爺、王縣令
摋死矣,死甲真悽慘安呢甡!』隨後規箍人昏倒塗腳,眾人灌冷水給救起
來,厝內厝外,早著嗣大氏細哭聲拄天,嚎甲毋臹聲調li。
李祥睜神,大喚一聲,傷痕必裂血水答答滴,『主公過身,過身, 互
人摋死,大悽慘……嗚……嗚……』也叨代誌凶狂,袂輸青天白日來雷
公熠na3,規个家族亂做一堆, 毋知欲按怎才好?文明仙e老母聽著,規箍
人軟腳,行袂din動,目睭烏暗眩,心肝pokpok趒,身邊大細, 宛那真正
驚惶(hy2)咧給照顧li。
另外官府這爿面,官府派e人摋死文明仙佇縣衙公堂(著是白沙書
院,現主時彰化縣孔廟附近),心肝內真正歡喜,挽去眼中毒莿,減去地
方大尾e威脅,官府連環計初步完成,調虎離山成功,吓使向頂司來請功
li, 毋閣凌王爺是一个真正殘忍,惡毒e歹心行(hing6)官僚,心肝比虎比
獅閣卡毒閣卡烏,伊摋死文明仙猶無準算,順續閣給斬頭斬身,苦毋講
給「碎屍萬段」才甘願li。
唉! 才咧怨嘆講世間有zia尼酷行e官員,叨單單清朝這口灶才有
爾爾,咱有讀過吳鳳e故事,講山地人出草e惡習,無疑講堂堂e大清帝
國,官員宛那有出草e風俗,有影想落叨嚥氣li,佳哉尾溜也日本仔卡有
坎站,有卡收縮安呢甡。
呾文明仙去互官府害死e時間,1870舊曆三月17日下晡申時,差不
多現主時四點e款,無外久,到酉時e時瞬(大約5～6點傍晚 ), 暗頭仔
呤,規个消息傳遍彰化城, 也叨一嘴傳一舌,報馬仔四界宣傳, 嗯才城
內爾,連庄腳嘛 hehe 33趒li。城內e人,消息幾落款,出入真大,實在
这是官府派,挑工派爪耙仔佇城內亂放空氣,來顛倒是非,尹講文明仙
聚眾謀反,欲行刺清官,結局互相du3殺中間,重傷身亡,百姓人忠厚無
智識,真贅人聽信官方e壹面之詞。
毋閣另外有一批人毋相信,尹認定講这是清官有意來屠殺文明仙…
…各方面e消息出入真大,百姓亦互伊舞甲霧霎霎,茫茫踅, 毋知欲聽啥
人e才好li,總講一句,文明仙受害了後彼幾點鐘內,彰化城亂操操離
gaga,造成「仁心惶恐」li,真正有影!
南瑤宮方面e信徒,聽著文明仙歹空呤,眾人善男信女,真正憤慨,
仝齊來消毒官府甚過惡毒梟悻!伊亦欲禁止北港進香,亦欲摋死爐主,
真正食匏仔無留種,鴨母食塗蚓li,茲嗣大氏細心肝頭,有意欲佮官廳兮
拚一斗仔忖辦欲潦搭底, 安呢鋩角才矯吓返來li,雖然官府有一寡「爪
耙仔」佇廟內咧做奸臣, 毋閣茲勇敢e香客, 毋驚著是毋驚,这是宗教
e力量,也是民氣旺盛,憤慨e心情表現li。
(76) 凌王爺這派老奸臣, 呾既然ga 摋死文明仙以上,這
聲叨緊做一寡善後e空課,來掩勘尹e通天罪惡, 嗯才 e瞬呤,代誌才發
生無外久,著緊派「爪耙仔」到城內商郊街市,一四界宣傳文明仙e罪
惡,講官廳為民除害,萬民福氣到li。
另外一方面,亦派人到各庄頭來搭告示,對林文明e遺黨氏細,「寬
大為懷,不究既往」來收買仁心,來he3(降)民間不滿怨嗟e氣氛,上要
緊著是收買南瑤宮內底e廟公執事,恩威僬行, 也叨俑仔標抉落去,免驚
代誌袂好勢li,攏總壹切壹切,叨有照計劃咧行。
彰化縣令王文棨佇城門搭好告示榜,寫安呢:「文明伏誅,脅從罔治
。其兄忠臣,須妥安置,所霸田產,還給原主,諭爾小民,據實稟訴」。
這張告示真正是「放屁安狗心」,食人到到,福佬人互滿仔來管,有影
叨梟悻,甚過hau6韶叨是。
另外有「爪耙仔」手綰著銅鑼,沿路摃沿路喚,身邊有位武士逗陣
e,尹喚著『呾眾位咱茲阿伯阿姆,父老鄉親嗣大,咱彰化地界e「土匪
頭仔」林文明,這箍林慪搭,普通時仔,靠勢伊有錢有勢爾,凌治茲善良
鄉民,霸佔人e財產,鱸鰻人獻,無人敢搧伊e腹堵邊,百姓ce3(恨)甲牙
叨無力去, 毋閣干礁無伊法li。
『這擺縣衙落決心, 逶林慪搭給收拾dan4sak3,來維持社會正義
佮公道,百姓歡喜ueue,萬民祝賀li, 毋閣呢!林慪搭有錢有勢,爪耙仔
仝黨e,一大堆,尹絕對吓等機會來報仇叛變li, 安呢加減吓害著咱茲忠
厚e老百姓li! 嗯才咱返來噯卡張弛e, 噯提高警覺,若發現著林漚搭(
文明)e爪耙仔,欲來擾亂社會時,緊趕緊通報頂司,倘給掠起來治罪…
…,最後祝父老逐傢,身體勇健食百貳,福祿壽三字全,仁生奮了有起,
臹給汝恭喜li』
凌委員、王縣令這班奸臣,來顛倒是非,害死大臣,依原強辭奪理,
白白布欲濡甲烏去,實在有影酷行li,茲百姓心肝頭是ce4(恨)甲無力
去, 毋閣这是仈人e天年,有影想欲cap3(介入)嘛管無路來,心肝內啐(
罵)閣再啐,尹婆仔e客兄公卡好咧!
彰化縣衙,食內騙外,欺上瞞下,一方面來安定彰化仁心,另外一方
面又閣上書同治皇帝,實際上同治皇帝身體已經臹荏( lam4,弱)矣,根本
無法度料理朝政, 猶若台員彰化地這款稍寡代誌,伊完全無cap3叨著,
干礁硃筆稍可卒二下仔, 著準拄好安呢甡,講起來這款代誌,早著由英
桂總督一手導演,家己人免啥乜搬戲啦,知知e 啦!
茲凌王爺上書皇帝是安呢寫:「臣查福建彰化地,貳品副將林文明,
久居阿罩霧,結黨營私,魚肉鄉民,百姓苦不堪言,又自持期武功強捍,
財力氣粗,霸佔田產,辱人婦儒,近日又藉口彰化媽祖下北港進香,聚眾
圍城,意圖叛亂為王,事情緊迫,官府恐有壓制不住之虞,致官紳發生衝
突,械逗之間,不慎身亡意外……」
實在講起來,中國e地尺赫尼i曠闊,百姓代誌赫贅,這款稍寡代誌
爾,皇帝無外注意著。ga有英桂將軍做總督擋撇(dong1pet3,靠山)以
上,下腳手仔嘛是無咧驚啥,老奸臣這派,是計域(計劃)講制壓林家e「
連環計」有法度倘完成否,伊卡注重爾,眾位啊!「連環計」e後一步,
咁有法度來施行?
(77) 根據著官府老奸臣這派e想法,凌王爺欲來滅絕阿罩霧林
家e連環計是安呢(進前有寫過,這嗎閣重覆一遍):第壹步,先宣傳有人
欲利用宗教熱情來「聚眾圍城」,製作氣氛,「風颱欲來 ,烏雲先就山
坪」;第貳步,宣佈戒嚴,禁止今年北港進香,因為有「歹人」欲利用進
香來翩笪,官府姑不而衷來禁止進香;第三步,利用彰化信徒百年風俗,
反對戒嚴來困擾文明仙,這陣「上歹剃頭」e香客,絕對吓逼文明仙出
面;第四步,扣押彰化媽祖佇城內觀音亭(現主時e開化寺),逼文明仙佇
萬民暴動佮擁護戒嚴中間「選擇一項」,文明仙只好無條件投降,達到
尹「引蛇出洞」目的,續落閣再給「甕底掠龜」方式給捃起來li。
第五步, sy3(誘)文明仙入彰化縣衙,解除武裝,在場給殺滅,永除
後患叨著;第六步,按算講文明仙家族吓來報復, 佇半路埋伏重兵給
截殺,而且佇城內掛牌「土匪臨城」告示;第七步,聯絡文明仙e族敵.
戴潮春系統佮草屯洪欉系統配合,全力趁虛反攻,搶尹田園財產;第八
步,等文明仙家族來反攻報復時,馬上書明「聚眾圍城謀反」逶林家「
抄家滅族」,完全殺盡阿罩霧下厝,最後一步,萬壹伊無來攻城,著派爪
耙仔假影香客,聲明為文明報仇,硬逶林家拖落水,來攻縣城。
呾這嗎代誌前幾項已經完成矣,戒嚴亦做矣,文明仙亦入來縣衙,踏
著機會給伊摋死矣,續落來著是欲請林家兵丁「大船入港」,利用尹來
報仇時,控訴「叛變圍城」,抄家滅族著是啦, 嗯才 e瞬呤,老奸臣這
派,挑工放文明仙e保鏢李祥,返來阿罩霧下厝li,欲利用伊親腹e來哭
苦,引起林家「舉族報仇」, 安呢「大船才吓入港」, 毋閣老奸臣凌王
爺, 宛那是真巧e人, 佇擊殺文明仙e進前一工(三月16日),著有調派
大軍,一步一步欲來收拾文明家族e僎步li。
第壹步,凌王爺委員、王縣令,秘密佮台南府城方面聯絡,由黎道
台、楊總兵親身帶兵到彰化埋伏,嘉義縣令亦增援五百步兵相助,另外
鹿港方面e孔同知(鎮長),亦調派一千名水師,入彰化參加戰鬥,彰化鹿
港才四十外華里爾,兵士往來干礁一時辰著到矣,「進退自如」真好調
動li,茲攏總二、三千名e兵士,埋伏佇現主時八卦山e半山坪,掌握制
高點,頻若林家族兵丁來攻,一聲著欲給捏死安呢。
第貳步,秘密派人到林家e族敵,親象戴潮春餘黨,洪欉餘黨e所在,
去暗中聯絡,壹旦ga林文明家族來攻縣城以上,著緊逶後壁給「趁虛攻
入」, 安呢吓凍報前冤仇, 嘛吓凍討回田園(互林家佔去e),這步真正
厲害li。
第三步,趕緊佇城市,搭告示,講「土匪這欲入城」矣,家家戶戶僎
武器糧草,應付危險li;另外儘量撤退官員佮眷屬入庄腳閃匿,另外官
府已經寫好「文明林家聚眾圍城,反叛國家」e罪名,只等攻兵一到,現
著呈報福州縣城,來逶文明規族抄家滅族li。
眾位看倌,老奸臣e心肝真惡毒.林家唅心gap命為清朝,犧牲人,亦
犧牲同胞,結果煞互人變這齣e,有影世間真罕看li。呾這嗎官府e人
僎便便,設好圈套咧 搪等林家來「大船入港」!逗底林家族是毋是吓來
報仇?是毋是吓中著凌王爺e奸計?是毋是吓互人抄家滅族?故事真正食佳
, 呾稍歇喘le,飲一杯茶le,這齣霧峰林家e故事,咱台員囡仔,噯記
互伊稠著是。
第九章 想欲扛轎步步進,無疑牽罟倒退行
(78) 官府派, 佇縣衙公堂,害死文明仙了後,挑工放「活口」
李祥保鏢,返來阿罩霧下厝,按算林家吓引大隊兵馬,來反攻報仇, 安呢
鋩角才矯吓返來,官府派將計就計, sy3(誘)林家兵馬「大船入港」
了後,以伏兵夾擊,順續以「聚眾圍城叛變」欺君大罪全家抄斬;另外
一方面叫族敵趁虛攻入庄安呢,奸臣步設計甲真完滿逗搭,有影「賊仔
狀元才」壹度壹e叨著。
搪噹李祥逶彰化縣城拚返來阿罩霧了後,規厝庄僬著驚,罵聲哭聲
嚎拄天,局勢混亂,為著主公,人人攏欲出來拚生死,欲佮忘恩背義e清
朝官廳e填逗底, 嗯才 e瞬呤,規陣死忠兮,跪佇新嗣大文鳳仙e面頭前
咧嚎li,文鳳仙是林文察將軍e過柱仔,現主時大頭傢、貳頭傢攏梟悻
去矣,文鳳仙姑不而衷潦落做新頭傢,看起來千斤萬擔壓稠e, 毋知矯吓
落來抑袂?好佳哉猶有阿媽(文明母親)佮一陣死士逗捍(hw6),規个家
族有影了然慘溜溜,真正台員人叨梟悻下消li。
『咱林家自來著效忠清室官府,唅心gap命死忠拍拚,內除叛賊,外
收長毛,為著安呢甡,僬得失茲鄉親道友,順續失去文察寶貴e性命,清室
無來感謝叨慘了矣,卡有閣再來吊脰搶後腳,設計害死貳頭傢,唉!這條
冤枉通天勘(kam4)地,絕對噯報仇,鋩角才矯吓返來li,頭傢,阮茲賤民,長
年受恩公疼痛,今仔日有代誌絕對吓挺搭底,大兮,憑汝一句話阮著潦,無
論刀山火鼎,總拚落堀無第貳句。』
『這个清朝官府赫尼夭壽骨,船過水無痕,城過樓著拆赫毀類,
咱抾互伊和(團結壹致), 逶官府給舞甲伊天轟地肉bing4,給教示一下
仔卡有e, 互伊袂收山攬尾e,知影番薯仔e鹹汫, 安呢我心內這腹火才
吓消透le!』……這个時瞬,文鳳仙聽甲目屑流目屑滴,心肝頭冷酸宛那
真正感心。
才開嘴印講『呾家門梟悻,事故變卦悽慘落魄,小弟佇茲萬分感
謝勞力,眾位阿伯阿姆,鄉親嗣大,我文鳳不材,吓點點滴滴恩記心頭,
毋閣講到欲起兵報仇,攻擊官府e代誌,逐傢噯卡冷靜e, 毋倘甚過衝磅,
也叨欲攻拍官府,吓變做反叛清朝,恐驚事後吓抄家滅族,禍延無辜,
摋甲無人燒香點火,吓變做香爐耳無人綰(gw6) li,顛倒中官府个奸
計, 互伊「大船入港」算袂和矣, 猶若興兵報仇e代誌,咱稍等一下欲
來開家族會議,欲戰欲和,到時瞬咱才來參詳一下仔卡有e!』文鳳仙是
一个冷靜e人,伊略略也有覺悟官廳e奸計,拍算無赫簡單li, 嗯才無外
久中間,趕緊集中仁馬,共商大計安呢。
另外, 佇南瑤宮這爿面,茲廟埕e各路英雄好漢,阿伯阿姆,羅漢腳
仔,一下聽著文明仙慘死呤呤,通人憤慨氣putput,苦毋講親身來kue4
伊e骨,焢伊e猴膠li,这亦莫怪 ,原本咱文明仙是今年媽祖甡,欲落北
港進香e爐主安呢,今年袂凍落下港,叨已經是對不住祖先矣,又閣連伊性
命著欲給抾去,唉!清官矣清官!汝實在有夠可惡!有夠壓霸呢!
眾香客感受著爐主身亡,袂輸簡那大軍喪失總司令,唉!彰化人按
怎運命即, 人講「人敖,運命做對頭!」天公欲來創治咱, 真正叨無
伊法li,「想欲扛轎步步進,無疑牽罟倒退行。」咱彰化暢e. 自來硬鼻
民氣旺血性擎,一場天大地大e革命,帶有宗教狂熱e大革命,官逼民反
天神憤慨e大革命,干礁一絲仔火星,著吓馬上爆發官民流血大衝突安呢
甡。
若準這个時瞬,霧峰林家反攻時,尹茲香客,絕對吓潦落捙拚填到
底,忖死忖活叨媽祖聖(sy3)li, ga 互伊激著矣,港無潦袂煞矣! 免講咱
番薯仔外猛,幹,干礁這口烏氣壓惦心頭,汝叨三暝三日吐大腸頭, 互
汝十世人叨做人無甡張li。毋閣悲慘代誌有矣,官府奸臣佇廟埕,派間諜
假冒香客,利用宗教熱情,鼓動香客暴動攻城,表面是欲為文明報仇,實
際上是欲逶林家「強拖下水」,來夯罪送死。
(79) 呾這嗎來講到凌王爺,官府派這爿面e 佈署,凌王爺、
王縣令,自早著有連環計,欲來用計摋死文明仙,續落e瞬呤宣佈戒嚴
,搭(貼)出土匪臨城e告示,設計好「布袋戰術」,等林家兵丁來報仇時
瞬,落入陷阱,請伊「大船入港」,最後告去京城,講林家「聚眾圍城謀
反」,全家抄斬滅族安呢甡,真歹勢,講到官府奸臣派,按怎欲利用彰化
媽祖來計殺文明仙e連環計,頭前已經寫甲真詳細, 佇茲我無欲重覆,
干礁寫出奸臣派, 佇這个流擺遵照計劃,做出四項奸臣步,欲來sy3林
家兵丁潦落這堀,來給斬草除根,吊脰搶後腳li。
第壹步:府城方面,黎道台、楊總兵,早著奉頂司英桂將軍密令,暗
中調派兵丁,協助彰化縣城凌王爺、王縣令,尹逶清兵給集中來使用,
安呢卡有效果叨是,兵源來逶三方面,其壹是彰化縣衙普通時仔所飼e水
師,由參將施某人連暝趕到彰化城,聽候分配佈置安呢,鹿港同知鄭某人
亦全力協助,其三是嘉義方面縣城宛那 婁三、四百外名兵丁 ,暝日
就北,拚對彰化這箍圍仔來集中。
頂頭三股仁馬,攏總千三、四名,分做三隊,埋伏佇縣衙周圍e要道
路衝,佈了天羅地網,恬恬仔等霧峰林家來報仇時, 請尹「大船入港」,
林家仁馬戇戇攻來,定著吓去互埋伏e清兵,給拍甲青尺仔青尺,一方面
亦吓使報去北京,講林家「聚眾謀反圍城」犯著天條大罪, 逶林家抄
家滅族,殘殘脆脆互伊好勢li。
第貳步,暗中聯絡霧峰林家e族敵(世仇宿敵),草屯洪家、大里應
時伯仔,四張犁戴潮春餘黨,茲人卡早e當中,攏受著林家e侮辱攻拍,對
林家抾恨入腹li,定著不時嘛想欲報仇, 安呢鋩角才矯吓返來,凌王爺
茲奸臣派,提一寡銀兩,派人去見林家族敵,講『安呢, 安呢……如此…
…这般……』,族敵聽著呤,歡喜甲袂顧e ,這聲報仇e時機到矣,絕對
潦落拚生死。
嗯才e瞬呤,奸臣派看「民氣可用」, 自那暗中佮林家族敵約束,
逶仁員分派三位來運轉,一位踮八卦山e懸地(制高點),瞭望林家兵丁
反攻e路線,順續佇社口、烏日、王田各地方做「暗探仔」,收集軍情
。
另外一位是佇南瑤宮e現場,暗中派人假影香客,拖嘴(藉口)欲替
爐主文明仙報仇,大力煽動,利用宗教熱情來攻擊官府, 逶霧峰林家硬
拖落水, 到時瞬仁山仁海, 擋亦擋袂稠, 林家著算無意攻官府來講,
宛那「難逃聚眾圍城叛變」e滅族大罪li;上尾一位著是佈置重兵,秘
密佇山界匿藏,派人觀望,壹旦ga林家規族兵丁去攻彰化城以上,著「
趁虛攻入庄」,盡殺林家大細來報仇。總講一句,奸臣派凌王爺是真惡
毒叨著。
第三步,官方奸臣派,馬上宣佈「彰化城全面戒嚴」, 也叨真正堅
心意切,嚴格去執行,袂使有佗一位林家e爪耙仔來返倒li,城內e商店
壹律關門,路頂袂使有人咧行走,百姓儘量疏開到庄腳,來避免血光刀
災,勸趕民士紳加僎寡食糧、清水、葯材,預防土匪燒城,可疑仁物壹
律檢舉,另外派人一四界拍鑼,講「土匪」欲入城開殺戒,致使仁心惶
惶不安,又閣佇城內街路搭告示「土匪欲入城」儘量疏開,避過難關,
互損失吓降到上底線叨著。
第四步, 逶彰化縣城e所有官員佮眷屬,壹律派重兵護送到安全地
界,來保護尹e安全,另外派特務佇各所在,收集「林家聚眾圍城」e證
據,壹旦證據充分,馬上報去福州省城佮北京皇城安呢……,按以上知影
,官府派e老奸臣步數真贅真惡毒,欲逶林家總給kolosok (殺滅)叨著。
(80) 另外彼爿面,來給講到下厝林家這爿, 也叨林文明將軍,
去互清廷官府派刺殺佇縣衙公堂,這款空縫,引起「仁神共憤」,林氏
家族e兵力,叨心狂火焯恨入腹內,逐家壹致欲報仇,盡摋遐奸臣歹黨,
來消透心肝頭一腹火, 安呢鋩角才駛吓到遐,總是矣,佔權者e「恩將仇
報」定著噯做寡交待li。嗯才 e瞬呤,文明仙去夆刺殺e彼暝,亦著是
同治九年三月17日暗時仔,霧峰下厝林家, 宛那仝款宣佈「林厝小戒
嚴」。
一方面派兵丁保護林厝,加強戒備埋伏,來預防官廳奸臣派佮族敵
戴氏、洪氏趁機會來擊殺遺族,貳方面派親腹,拍拚來疏導族仁e火氣
衝磅,「伊是官廳咱是民」,這个流擺噯冷靜思考,絕對毋倘潦落烏白捙
拚, 抑無刀光血影吓閣卡梟悻;三方面緊派人通知族仁e長老嗣大, 佇
另外一个秘密e所在,開「家族緊急會議」,討論文明嗣大慘死e報仇佮
善後問題!
林家真正是姑不而衷,烏仔魚去互濁水激著矣,無潦袂煞,林家內內
外外,氣氛緊張真正嚴肅安呢,有影梟悻坐卦,無地講起li,林家犧牲文
察嗣大,攻滅戴潮春、洪欉叛逆,「功在黨國」,如今恩將仇報無打緊,
遂顛倒連開會嘛驚去互人連根斬絕,有影硬拗落地。
咱這嗎e人,給想起來宛那鼻頭吓酸li,这完全是台員人無路用,做
了爛敗e外來政權殖民統治e結果li, 1870 e時代,世界已經臹進步矣,
歐洲已經發明了發電機、攝影術、硫酸製法、細菌學,日本亦明治維
新矣,台員e馬偕傳教士宛那入來矣(1872),美國已經獨立一百年矣,……
台員地猶發生這款「中古世紀」e悲劇,有影了然矣了然!
徛佇另外一个角度來看,尤其是逶現主時民進黨e思想矯落,講卡
白e, 以洪欉嗣大e立場, 這聲林家叨閣卡衰韶閣卡無品, 叨紅龜皮
liu4liu3 臹無才情,洪欉e冤魂佇太白金星遐搪咧給後來e文明仙咧投
(控訴),汝有聽著否?伊講:『佇外來惡霸,清廷異族來壓迫以上,番薯
仔悽慘坐卦, 搪咧哈搭e當中,洘旱陳雷矣,出現戴氏、洪氏……等反抗
異族e民族英雄,林家無來幫忙遂顛倒家己摋家己,以台制台,番薯仔
撟(giau3)甲牙欲酥去,尹婆客兄公卡好咧。
『全全叨是恁這陣奸臣咧搶後腳,台員人才吓永遠袂出脫li,汝林
家無材調 ,分別是非來倚外族,定著亦吓日後去互外族來反殺,这天公地
道,因果報應,有影少年仔叨袂互汝鐵齒e li!』
文明仙e魂魄, 佇太白金星仙殿內,赧世赧眾,一箍面仔紅枝枝
安呢,頭殼犁犁,暗中咧看著凡間界下厝,林家e家族會議, 搪咧真緊張
真艱苦咧進行li,逗底下厝林家e家族會議,開了按怎,有啥乜好辦法來
替文明報仇否? 互伊鋩角駛了有夠?另外官廳e「趕盡殺絕」佮族仇戴
潮春洪欉遺黨按怎「反報復」?請看下腳!
(81) 現主時,下厝林家家庭會議搪欲召開,時間是1870年舊
曆三月17暗頭仔(傍晚),地點佇秘密地道內底,外口人毋知影,這嗎林家
上驚洪欉餘黨來報冤li。開會仁員有十外人,,包含林母太夫仁,頂厝e
林文鳳(林文明堂兄),林朝棟(文察e孝生),林文彩……,另外又閣有三
名軍師,現場保鏢李祥,過柱本族代表三、四人安呢甡。
會議場e現場,氣氛嚴肅傷悲,隨人面仔青恂恂,講話印話e當中,儘
量輕聲細說, 毋倘夯動肝火呢 haa5, 代誌敗去袂凍冷靜, 安呢著醜
he!空頭舞甲天狂地動,強欲摯節袂稠,著噯吞忍閣吞忍,也叨这關係著
全族e生活死路li。
文明仙慘死,是毋是噯夯規族兵力,奮勇替主公報仇,現場分做主戰
派佮主和派二爿,彼个時瞬,林氏家族e武力真強,絕對有法度佮官府拚
輸嬴,何況彼時清廷拄好互太平天國「大蛇纏身」tau袂開,家己揹黃
金,欲哪給台員看風水?所以主戰派不止也有份量,搦袋仔磅籽dim4dim4
dim3口袋頗有籌碼 )。另外「主和派」方面, 叨提一寡理由,
款勸逐傢噯卡有信用, 庶當時講好勢,甘願得失鄉親嗣大,來放棄百年
風俗,吓使講真正委屈li,尾溜矣為著百姓,又閣答應lau4孤帆e去縣衙
應訊,咱林家壹再忍耐壹再吞忍讓步,官府老奸臣宛那無給咱感謝,甚
至來摋死主公,實在食人甚到矣。
『文明公官拜貳品,若有毋著e所在, 嘛著噯先徹職,才吓使判罪
li,這嗎死佇公堂,可見官方大毋著,事後無來道歉, 宛那真看人衰li,
咱林家應該頂下合齊,唅心gap命佮尹挺搭底……。』
『我反對用兵丁去報仇,逐家噯冷靜, 毋倘甚過衝磅,伊是官廳咱
是民,有影無法度叨是無法度,老奸臣派, ga敢惦堂刺殺主公來講,
定著有頂司皇朝e暗示託頭,才敢安呢做,尹有長期e佈置,咱若烏白
亂舞,恐驚吓中尹奸計,規族閣卡危險li,現主時無定著有洪欉e人佮
奸臣派,佇咱附近等時機欲來害咱le,另外南瑤宮方面e份子真正複
雜,若矯袂好勢, kap袂著恐驚吓造成大災難咧……』
『我宛那贊成以武力來對抗,林家三代功勞赫大,結果恩將仇報,
干礁掠茲奸臣烏官著好, 毋倘給伊摋死,憑咱e武力應該做吓到才著,
咱若毋反抗,茲老奸臣定著吓一步一步,來摋掠林家,叨鴨母隨隻掠li,
掠甲無半隻叨了然,不如先婁武力,一方面對抗奸臣,一方面向省城
福州申訴,看有法度否?……』
『我反對現主時動用武力,代誌真簡單,文明主公被害,彰化城、
烏日、社口彼角勢,對方絕對佈下重兵,咱若輕舉妄動,定著吓互尹以
「假借進香,聚眾圍城謀反」罪名,吓抄家滅族li,不如採取溫和e態度
,另日才拍官司,告逶頂司去,看尹遐奸臣欲按怎處理?另外一點,現時
文明仙e遺體, i矣 佇官府派手中,咱噯稍放卡軟e,後日才有倘隆重,來
做功德(葬儀),……』
眾位鄉親老大哥,主戰派佮主和派,著安呢汝一嘴我一舌,爭論袂煞
,逐傢攏講了真有理,逗底結局欲按怎來料理,清廷皇朝是毋是吓互林家
面子,吓互尹鋩角駛有夠, 呾咱這嗎來看林文鳳(頂厝林奠國後甡)按
怎來做決議!
(82) 呾二派e理由攏真逗搭,中間林文鳳,伊是頂厝林奠國e
大後甡,堅心反對派兵去官府報仇,伊知影大局對林家e嚴重性食力, 毋
是普通人掠吓到e, 也叨奸臣派搪咧設一个暗窟互汝跳,若稍寡矯袂好
勢,真正吓夆抄家滅族,有影摋甲無人燒香點火li。
嗯才e瞬呤,林文鳳以真誠懇e心情,給每一位長老嗣大,說明這个
官民e特殊關係,款勸尹雖然有滿腹e恨火,暫時按下,咱用「文」e方式
, 毋倘好毋好著欲肖摋流血,問題卡好解決,請逐傢卡冷靜e,共同來閃
過這个難關!
文鳳仙雖然是少年家仔人爾, 毋閣頭殼袂醜,最後開會煞e時瞬,
佇會場有做出下腳e決定。第壹點,文明仙e慘死,完全是凌定國、王縣
令一派人e罪惡, 毋是清朝皇城佮省城e錯誤,阮反對凌王爺, 毋閣依原
擁護大清皇朝(簡直放屁);第貳點,阿罩霧林家願意放棄武力,改用「
拍官司」e文鬥方式,來拚鬥凌王爺尹壹般惡官;第三點,為了自衛佮預
防族敵來「趁虛攻擊」,林家e兵丁若是犯過界,超過烏日地界者,林家
甘願受上介嚴厲e處罰;第四點, 猶若彰化媽祖廟南瑤宮e代誌,林家有
權利, 宛那有義務去處理善後,恢復地方秩序li,對北港進香夆阻擋
所夯浮e民怨,佮因為文明仙夆害,所爆發e「宗教熱誠引起叛變」壹
事,全力疏通排解;第五點,林家「滿門忠烈功在黨國」,對遺族應優先
撫恤,今後,阮阿罩霧林家, 宛那仝款來效忠國家安呢甡;第六點,希望
官府吓凍逶文明仙e遺體,入棺入殮,送回林家料理, 毋倘親象文察仙戰
死漳州e時瞬,屍骨無存,真正悲哀li,这是仁生最後e禮數,映望逐傢拜
託e!
以上e結論,文鳳馬上派人寫好,數日了後,等代誌平順,才分送彰
化縣衙奸臣遐,另外又閣拜託人送去台南府城,又閣拜託人坐船送到福
州省城, 佇當中,文鳳壹直保守處理,儘量減少衝突,文鳳仙確實是一
位有學問、有智慧e仁才,伊先決意無欲攻縣衙,表示伊無噯叛變暴力
模式。
又閣自衛性e出兵到烏日, 宛那 互主戰派e鋩角駛有夠(給……很
有面子),連上歹剃頭e南瑤宮彼爿, 宛那表示甘願潦落,給眾香客下失
禮講原由,姑不而衷,心苦病疼ia4ia3 (挖)出來安呢,這嗎咱知影佇專
制外來政權e壓迫,干礁倘安呢委屈求全,一杠目屑鼻酸目燒安呢 爾爾
。
(83) 毋閣「搬戲e欲煞,看戲e 毋煞」,人佇江湖,叨身不由己
li,文鳳仙雖然無噯武力進攻彰化縣衙(改用法律e文鬥), 毋閣眾香客e
宗教熱情強爆爆(biak3),尹甘願拍死亦欲佮官府派大戰一斗仔,主公互
人侮辱害死,壹定噯報仇,死嘛欲死仝窟li, 呾這聲文鳳仙費氣矣,敵
仁好講話,顛倒家己e親腹e 遂歹返倒,有影尻倉去互椅仔夾著矣,看欲
按怎叨好li, 呾南瑤宮彰化媽e代誌宛那歹剃頭li。
根據家族會議,林家e捍頭林文鳳頭家,主張逶林家兵丁, 婁一
半到烏日附近著好,「示威」一下爾爾,無欲佮清廷官兵決戰叨是
矣,这毋是文鳳仙落軟,亦毋是伊無欲為家族報仇,講起來是互人殖民統
治,这是「人e天年」li,文鳳仙閣卡心堅意切, 嘛無法度阻擋大清帝
國統治番薯仔e事實li,咱天良講,文鳳仙e決定,有影叨真有智慧學問,
这按怎講?第壹, 逶兵力集中到半路烏日附近, 安呢做,吓凍互「主戰
派」一个交待li,總是有發兵,一腹火卡吓消透;第貳,伊發兵到烏日了
後,就地停兵, 毋敢進入彰化城, 安呢著袂中奸臣派e埋伏,又閣袂造成
「圍城叛變」e罪名, 安呢做, 互「主和派」嘛是有一个交待。
第三點,進兵到烏日為止,吓凍來阻擋已經夯狂e南瑤宮眾香客,
猶若無者,香客為著報爐主仇恨,衝磅潦落攻擊官府,林家嘛是噯擔罪
li,林家駐守烏日,吓使強制阻擋尹li;第四點,駐軍烏日了後,吓凍觀
察反制族敵洪欉、戴潮春黨羽e動靜,必要時對族敵反包圍,總講一句,
林家尹攏吓進吓退真好返 捯li。
林家e兵丁佇三月18日透早呤,著集合五百外名勇敢兵丁,逐傢死
忠兼換帖e,無論刀山火鼎喚鏘著鏘、喚潦著潦,大隊兵馬,經過大里杙
,無外久中間,大軍到烏日著停落來,烏日離阿罩霧下厝才十公里爾,
行路二點外鐘著有夠矣,兵士佇烏日設營安搭,觀察看各方反應,主要是
官方、族敵、南瑤宮香客這三方面e暴動情形噯張弛一下。
林文鳳率領兵丁駐守烏日了後,按算三、四工了後,退回阿罩霧,
伊無欲進攻官府來報仇,因為吓夆誤會做叛變li,等幾工了後,各方面
火氣e卡坐(降)卡消透,用卡文雅來處理善後。
為著欲安撫主戰派e聲頭浮夯,文鳳仙駐屯烏日了後,中晝e時瞬,
趕緊派親腹,到彰化縣城調查一番,無外久中間,親腹矣報返來消息。『
報告主公,我阿戇仔逶彰化城,調查結果是安呢,規个彰化城現主時搪咧
戒嚴,街路冷冷清清安呢,一四界有搭示「土匪臨城」e字樣,……』文
鳳聽煞,輕嘆『無毋著,老奸臣方面已經佈了重兵咧搪等,順續閣戒嚴,
又掛土匪陷城,这明明是按算咱林家,吓去進攻e款呢!』
無外久,規个林家兵丁佮下厝宮保第,僬知影官府派e陷阱, 嗯才 e
瞬,主戰派e氣勢卡斂 (liam4 ),大細仝齊同意暫時駐軍烏日,來看後造e
發展li,算講兵亦起動矣,主戰派e鋩角駛了有夠叨著。自那安呢甡無加
講話,續落咱文鳳仙干礁驚南瑤宮暴動爾爾。
(84) 另外佇彰化縣城,老奸臣這派,用心計較設奸巧步,欲來
sy3林家出兵攻城,倘互伊筴去配li,尹按怎埋伏重兵, 實施戒嚴,派特
務入南瑤宮,僎欲上書京城告伊兵變……, 安呢步步奸巧危機重重,規
陣老奸臣,凌王爺、王文棨縣令、黎道台、楊總兵, 佇 1870,三月18
日(舊曆)壹直等「林家出兵」來食釣li,吓凍釣這尾大魚,功勞叨卡大
天li。’
三月18中晝e時分,報馬仔狠狠狂狂,拚入來公堂重地,欲求見凌王
爺li,『報告主公,前線上介新e消息報來,目前阿罩霧林家e兵馬, 搪
咧向彰化方面欲來報仇矣,按算佇下晡時分,叨吓來攻扑彰化縣衙li,
這聲大船入港, 毋na吓中著咱e埋伏,順續來圍城叛變,罪大惡極安呢。
』互凌王爺聽著真歡喜,有影嘴笑目笑li!
目睭金金看著功勞這欲完成矣,真正心涼脾透開, kimo一下qiang,
唸歌閣吓牽絲仔(口水)哦!……毋閣過無外久呤,又閣有報馬仔入來宣
告最新軍情,『報告主公頭傢,代誌無倘好勢呢!林家e大軍,行到烏日
爾,著停止進步,原地釘稠e,看起來是「司公哄鬼」假一个勢爾,無
欲進攻彰化城e款呢,咁講尹知影咱佇沿路有埋伏是毋?』凌定國、王縣
令這陣老奸臣,聽一下驚甲si4si4顫(zun3),咁講陰謀暴露矣是毋?規个
官府派e氣氛無倘好li,茲下腳手仔真正煩惱叨是矣!
毋閣老奸臣卡講嘛是老奸臣,人講「老根節甘蔗頭」li,規頭殼e奸
臣步,贅贅贅,歹心毒行有影叨互汝袂hau6siau2 安呢,當噹逐家咧下消
心情鬱卒e時瞬,忽然間老奸臣凌王爺哈哈大笑『哈哈哈哈哈,……有
影尹娘呢卡好le,文鳳仙啊文鳳仙,老身兮(自稱)險咧坐戇互汝bia3去(
騙去),佳哉猶有淡薄仔身份撇步來徛起, 抑若講著阿罩霧林家,為著
欲報文明仙冤仇,按算吓規族kii3偎來,咱吓使給定罪講伊圍城叛變,
來抄家滅族, 毋閣老身兮,早嘛有按算,萬壹林家若毋敢攻彰化城,欲按怎
叨好?』
又閣續落講:『幹,官場跋nua4(混)赫久矣,「無貳步七仔,著毋敢過
虎尾溪」li,我早著按有絕招撇步,林家欲來攻, 噯總死了了,林家毋來
攻, 宛那仝款噯僬死了了……哈哈哈哈。』奸臣派官府派茲眾部下,
逐家聽甲目色青gingin 14,大嘴開haahaa li,眾位,欲知凌王爺老奸臣
咧變啥韶,有啥好步數,請看下腳e分析。
(85) 噹時仔(原來)凌定國王爺e奸計是安呢『文明仙慘死了
後,林家若舉兵來報仇,我早著秘密派特務,假影香客濫入去南瑤宮,煽
動心狂火焯e眾香客來強攻縣城, 逶林家硬給拖落水,林家仝款噯全族
抄斬li,所以講,無論林家欲來抑是毋來,攏噯斬叨著矣,哈哈哈,恁父老
身矣咧矯空課路,早著想甲僬僬僬, 互汝袂假e 啦!尹俍le,文明仙死
呤,上介傷心e人, 毋是林家族仁,事實上是民氣旺盛e南瑤宮香客,上
歹剃頭li。
尹今年無法度落北港進香,叨一腹火無地透矣,又閣尹爐主夆殺滅
,宗教熱情心狂火燒如排山倒海滾過來,稍寡派人給煽動,尹茲香客絕
對吓暴動來攻縣府報仇li, 安呢著吓凍逶林家硬拖落水(硬拖牛落湳),
林家定著噯坐罪,茲香客堅心媽祖爾,無頭腦li,尹表面欲為林家矯鋩
角, 毋閣吓顛倒害著林家,來死滅叨著矣!』
呾這聲代誌歹紡矣,阿罩霧林家e運命真正悽慘li,規家族為清朝
效命,文明遂顛倒互清官害死,凌定國、王縣令這班歹人,想儘辦法,
欲逶林氏家族全滅, 摋甲伊無人來燒香點火,有影真梟悻li,看來林
家e遺族, 搪咧一步一步行入去世間e尾日,唉!真正台員人啊台員人,天
公伯仔按怎欲來創治咱?「想欲扛轎步步進,無疑牽罟倒退行」,有
影互人看著吓搥心肝li。
林家e運命即尼薄,到時瞬,安撫阻擋族內猶簡單li,上介費氣著
是欲按怎來阻擋眾香客暴動,來攻縣衙?彰化暢e自古叨民氣旺盛,宗教
e熱情若浮夯,袂輸千軍萬馬,是欲按怎阻擋叨好?到時瞬,若有僮乩「
起僮」,假借神意來攻縣府,這陣香客有媽祖附身li,連死叨毋驚,卡吓
驚汝林家文鳳仙? 毋閣出代誌了後,這條罪定著噯林家來擔li。眾位鄉
親阿同兮,逗底阿罩霧林家按怎來化解,這場滅族e危機?這嗎代誌真正
緊急,咧燒倒頭香矣,有影臹替尹煩惱矣 he!
(86) 1870年三月18日下晡差不多二點e款,地點佇彰化媽祖
南瑤宮,廟埕面頭前,一大陣香客,拍算三、四百人e款,唉聲喚喊,隨人
氣putput, 安呢比手劃刀,幹公拄媽,規个場面亂做一堆,離cangcang霧
sasa,規間廟鏘鏘滾叨著,有影厝蓋強欲掀起來,茲勇敢e彰化暢e,咱媽
祖婆e好子弟,為著正義感來拍拚捅鬚,絕對欲替爐主林文明嗣大,來給
報這條冤仇li, 互伊鋩角矯吓返來,有影叨袂堪兮氣咧。
第壹,文明仙、文察仙規口灶,唅心gap命為清朝來跋死忠,清廷無
感恩叨慘了矣,遂顛倒來害死文明仙,有影猙牲啊猙牲!茲香客定著袂
dii4恬恬呢;第貳,文明仙是今年北港進香e爐主,等於是咱眾香客e頭
傢安呢,進香袂成,頭傢互人惼(欺),百年來e風俗矯袂好勢,真正是彰
化人「赧世萬代眾」代誌(奇恥大辱),這聲鋩角駛了無夠,無佮伊挺搭
底叨袂煞戲li。
嗯才e瞬呤, 茲南瑤宮e香客佇「主公受辱,弟子擔命」以上,無
惜性命,有想欲潦落進攻彰化城報仇li。汝看,在場e香客心肝頭砧li,
大聲喚喊『報冤仇!報冤仇!血債血還,絕對毋放伊煞!』『文明頭傢矣,
魂魄返來、返來,過橋、過橋……』眾香客宗教熱情,殘殘脆脆硬欲潦
落,這聲文鳳仙真正煩惱li,真是一粒頭二粒大,看欲按怎來按奈茲香
客,袂凍互尹來進攻縣衙, 安呢吓逶林家「牽牛落湳」,這聲若沐著,林
家定著叨衰甲吓互人掠去liam4頭li,有影腳尾僬冷。
廟埕e群眾,若準發生暴動,这是真食力e代誌,自古以來, 也叨廟埕
e散眾上歹剃頭li,百年了後e今仔日,這款代誌依原真歹料理li,汝給
看現主時e台北龍山寺著好矣,龍山寺內底,不時有一陣老歲仔班,閒閒
叨踮遐咧幵講拆字數,尹講天說地hak3kak3飯lue6,定著吓沐逶政治
li,對統治者e不滿,透過宗教熱誠吓和齊捙拚, 嗯才茲統治者上介著驚
,有一回龍山分局欲蹧躂老歲仔班,老歲仔氣起來,規陣綰三桶屎去潑
局e,茲管區e無伊法叨無伊法,老歲仔歹剃頭,有影老身兮忖配伊e矣,真
正哈伊袂倒li。
這嗎來講到官府派,老奸臣凌王爺這爿面,凌王爺雖然pa6(拋)落
彌天大網,請尹攻城報仇,欲請林家「大船入港」(自投羅網),達到抄
家滅族e目的, 毋閣奸臣仔罔奸臣仔,官場社會咧跋nua4(鬼混)赫久矣,
加減嘛知影行情,咱文鳳仙絕對無赫簡單吓凍互人筴去配li,絕對哺
袂落喉e 啦! 嗯才 e瞬呤,老奸臣早著有料想著,萬壹林家無來進攻,
是欲按怎叨好,到時文明仙死佇咱手頭,有影跳到虎尾溪叨洗袂清li。
老奸臣心肝頭有二步七仔,尹這帆e人,用心計較想出一个辦法,萬
壹林家毋來進攻縣城時,煽動南瑤宮香客勇敢「起義」來攻縣府,硬逶
林家給「牽牛落湳」(硬拖落水),林家沐著衰韶,定著噯哭苦,十个汝
叨無夠死,自古以來,借宗教熱情起事,是真歹阻擋li,逐傢毋驚死,死嘛
噯死仝窟。
三月18透早呤,凌王爺早著派出爪耙仔(奸細),冒充香客,濫入去
南瑤宮,壹旦ga林家無來攻城以上,尹著吓煽動眾香客直攻縣城,來「
嫁禍林家」著是矣,爪耙仔分做三組,第壹組專門是煽動群眾互尹心狂
火焯,叨宗教熱情毋驚死,來為主公報冤仇,這批爪耙仔,隨人口才真好,
面俏忠厚,真正吓瞞生人目li, 互茲戇百姓袂起猜疑無打緊, 遂顛倒
吓謳咾尹有義氣、有公理,唉!有影尹婆仔客兄公卡好!
第貳組是假僮乩,尹規縫人仝款利用宗教熱情,假影「起僮」,天
意欲按怎按怎來壯膽排起,香客報仇之心,番仔火一點現焯,規陣吓進
攻城內,吓變做「壹發不可收拾」,這款代誌,進前文章有講過,彰化民
性硬鼻,有利用僮乩來引發「火燒鄭秀才厝」「施九緞事變」等事件,
總講一句,尹硬欲扭林家潦落火窟叨是啊!
第三批爪耙仔,是身有戰鬥經驗e假香客,耐踢耐tun好肉本,臘武
e, 宛那拳頭siu6出身工夫讚e壹庄,這批腳肖做前鋒,掣頭香客,順續
「軟硬兼施」逼林家兵丁潦落,林家若稍可矯袂好勢,著吓互伊筴去配
安呢。
眾位咱茲阿同兮,老奸臣ia3落天羅地網,咁吓凍逶林家給捃(制服)
起來?林家這爿面,按怎來應付這層危機?文明仙有福氣做南瑤宮e爐主
,致使著今仔日顛倒吓去互彰化媽祖來害,天公咁吓疼戇人是毋? 呾這
條賬欲按怎去算?
(87) 呾同治九年三月18下晡時矣,彰化南瑤宮,規廟埕,心狂
火焯茲眾香客大德,鏘鏘滾熱putput,是鬧甲強欲袂收山攬尾安呢,其中
有善良e媽祖信徒,壹心壹意給文明仙報冤仇矯鋩角, 毋閣宛那有一寡
假香客,由凌王爺奸臣彼爿e第壹組仁馬,暗中來煽動、來夯浮信徒e心
火,好歹人僬濫濫落去,這齣悲劇慪戲,有影臹費氣臹歹紡矣 he!
目睨(ni3)久仔呤(一吓兒工夫),凌王爺暗中佈置e第貳批爪耙仔
,開始表演「跋杯」佮「起僮」e撇步,尹欲假借天公意旨,來發動進攻
官府e目的li,利用「群眾運動」人人衝磅e「盲目心理」,進攻、進攻
、再進攻,鏘落、鏘落、閣再鏘落,欲潦著潦搭底,幹尹祖媽卡好,喚拚
著拚,有代誌我tin3汝,真正奸臣e厲害步,有影互汝袂鐵齒咧。
假做香客e這陣爪耙仔,穿禮服態度溫順好禮,掣頭著佇廟前「跋
聖杯」,身邊圍甲烏kam3kam2,逐傢意氣揚揚心堅意切,欲看阿伯仔來
「維持正義」,有影真正感心叨著。掣頭者手捧聖杯,嘴內唸唸有詞『
彰化大媽,神明在上,弟子阿賜仔,茄苳腳人,身穿禮服,誠心誠意來拜
請媽祖婆,來he3(許願)神明,求國泰民安百姓安和樂業。
『也叨近年天時顛誕,官廳e酷行壓霸, 臹袂拄好li,今年本臹欲落
北港進香,咱頭傢林文明爐主,唅心gap命為民為鄉, 毋閣去互縣衙硬壓
落底,進香取消無打緊,顛倒去互官廳害死公堂,有影天大地大冤屈矣冤
屈。
『北港進香是百年來,咱彰化一年一擺上要緊e民俗,今仔日彰化
父老,去互官廳兮給梟悻,咱茲眾弟子拚身拚命,絕對鏘落填逗底li,現
主時「天怒仁怨」,咱彰化地e頭嘴,苦毋講生剝凌王爺、王縣令e皮,飲
尹e血, kue尹e骨li, 佇茲拜請神明暗助,為國除奸,懇請媽祖婆恩賜
聖杯為荷!』
話一下講煞呤,喉脘(gng4)僬滇(佇i6),目屑四濫垂li,鼻酸目燒,
眾人看甲真感心,等聖杯一下落地了後,眾人喚一聲「讚」,茲茲是好
杯li, 嗯才 e瞬呤,叨安呢,這陣南瑤宮三、四百名e香客,氣氛夯浮報
復心堅意切,決心欲對彰化縣衙報仇,盡殺奸臣無後悔, 毋驚天神惡煞,
死嘛欲死仝窟li。
續落e瞬呤,有一組「僮乩」佇廟內大殿進前,縛紅帶,手
夯鯊魚刀亥(haai4)頭亥尾咧「起僮」,這齣戲仝款是老奸臣凌王爺所
派去e爪耙仔,一手來導演li,身邊仝款圍了真贅人看鬧熱, 也叨鑼聲鼓
聲鏘鏘滾,逐傢看甲臹尼起磅。
僮乩做法事,拍算半點鐘e款,結局佇神桌所在,現出沙盤浮字,來
表示出神明e意旨安呢,僮乩半眩半顛, 佇神桌前歪來cua3去,現出「天
怒仁怒,爐主文明申冤」幾字,童乩唸唸有詞,身軀邊e鄉親大德僬知,
這聲神明e意思,是欲向縣衙討回公道, 逶鋩角矯返來li。
無外久中間,早著有報馬仔入來通報,『咱茲眾善男信女阿同兮啊,
阿罩霧e林家兵丁,大隊仁馬已經婁對彰化彼角勢去, 這嗎欲到烏日
遐e款li,咱茲媽祖婆e子弟,爐主文明仙e親信, 呾叨緊拚對烏日去,
來替文明仙申冤報仇li,趕緊!趕緊!鏘落去!免驚!潦落去!』
群眾e心理生成是盲目衝動e,「人講」綴(佮)「人講」,「人行」
綴「人行」, 搪咧心狂火焯到地矣,袂輸一桶汽油le,稍寡火星點一下
著爆發矣, 嗯才咧講處理群眾運動事件,有影真正歹紡,真正硬斗li,親
象民國45年e台北劉自然事件,仁山仁海警察閣卡按怎叨處理袂離(完
畢) li。咱南瑤宮e代誌, 佇有心仁e煽動,僮乩e神旨舞弄以上,真正
規陣人,簡那中邪仝款,意氣揚揚拚對烏日來,投靠林家兵力,僎欲去佮
縣府捙拚一斗仔,宗教e熱情,群眾e衝磅,真正互汝皮著繃卡an2(緊)e
呢!
進前有寫過, 庶當時南瑤宮e「火燒鄭秀才厝」,藉僮乩所得e神
意(事先套好),欲燒鄭厝,結局隨人一把金紙點火,利用群眾心理來夯
好膽,一聲著逶鄭家燒甲離離,可見宗教佮群眾力量e偉大,真正互汝袂
hausiau62 e,眾位大德,逗底南瑤宮e信徒,規陣拚去烏日欲投靠林家
兵丁,後造結局按怎?咁吓舞甲袂收山攬尾是毋? 呾續落拜託呢!
(88) 呾三月18下晡二點外,彰化媽祖南瑤宮e信徒大德,心
狂火焯報復心堅,規陣拚逶烏日e林家兵丁司令部來,規陣信徒,圖著宗
教熱情,跪佇林家司令部頭前,堅不起身,目屑四濫垂,求欲決壹死戰,
由林文鳳領隊,出來迎見。
文鳳仙一下看著呤,一方面亦歡喜,一方面亦驚惶(hy2),大敵當
前,如今「節外生枝」,慘le,代誌好勢好勢,叨毋倘安呢「加水加豆腐」
,「贅囝贅新婦」,「無事請祖師」li,對方毋知熊抑是虎li,咁吓敵仁
挑工派來e奸臣紕( pe) 仔,「兵不厭詐」, 噯張弛li, 毋倘一時
心軟夆灌甜湯,致使要緊坎站, 互人筴去配, 安呢著醜材 he!
頭傢文鳳仙,心肝頭一瞬e心酸,心酸e緣由, 毋是感心這陣毋驚死e
忠直義氣鄉親,實在是怨嘆運命即薄,代誌一層又閣一層li,原本文明
仙互人「計殺公堂」,文鳳仙唅著目屑,真無簡單才說服族仁, 勿用
武力報復,改用拍官司文鬥方式,免去因攻官府e「抄家滅族」大災難,
毋閣天算不如仁算,老奸臣確實叨步數規腹肚,又閣暗中派人煽動茲香
客,弄香客欲硬攻官府, 逶文鳳仙林家硬拖落水來擔罪。
唉!茲香客攏忠厚人,媽祖婆信甲熱熱熱,尹叫是(以為)安呢做是咧
為爐主矯鋩角, 毋知顛倒吓去害著林家li, 政治e烏暗,有影互汝袂講e,
這聲文鳳仙屯兵烏日,採用守勢e政策強欲守袂稠,文鳳仙所面對e敵仁
,除了官府派e伏兵,林家內部主戰派,族敵洪欉、戴潮春餘黨僎便便咧
等以外,這嗎閣再加一條「南瑤宮火氣旺盛e香客,欲效忠林家,強攻官
衙來報仇li」,一个人欲對付四方面e仁馬,有影有卡硬斗叨著,這聲文
鳳仙尻倉去互椅仔夾著矣,歹紡矣, 嗯才文鳳仙佇營內行來行去,想對付e
好法度!
外口e香客,跪佇林家兵營面頭前,求欲決戰無噯起身,茲香客認定
講「林家出兵,定著是進攻報仇li」,尹無想著戰爭有攻有守,採取守
勢用威脅,有時顛倒卡猛,尹根本袂了解林家e苦衷,這个時瞬,文鳳仙
派親信來給安撫。
『眾位咱茲鄉親阿同兮,真正感謝恁佇林家上介危險e坎站,無惜性
命潦落捙拚,真正彰化勇e無咧做假e。
『毋閣現時官府恐驚有埋伏,恁衝磅潦落恐驚中計,白白送死無價
值,林家暫時駐軍佇茲,採取守勢,慢慢佮官廳講和, 安呢卡有長啦,
呾歹勢,請咱茲親堂e眾人起身,接受奉茶……。』
毋閣茲香客心堅意切,無人欲妥協落軟li,逐傢意氣揚揚,跋氣魄組
e『大兮,憑汝一句話阮著潦,無論刀山火窟總tin3搭底,絕對無第貳句,老
奸臣實在夭壽骨,無給料理袂煞,這陣唐山奧官,駛尹娘卡好,無稍教示
e袂使li, 才知影彰化地頭有人li。』文鳳仙雖然有意來降he3戰事氣
氛, 毋閣這陣香客宗教氣氛致重,強欲潦落,事實互,中間有爪耙仔咧弄
狗肖咬,尹拍算毋知e款li,文鳳仙暗暗叫苦,這陣香客死忠e,吓給硬拖
落水,害伊圍城叛國全家滅絕li。
林家無欲攻彰化城, 毋閣南瑤宮這陣香客死硬欲進攻報仇,致使講
「搬戲e欲煞,看戲e 毋煞」,真食力,無外久,這陣香客,隨人夯著刀銃
武器,規陣蹌(zong3) 逶彰化城去,欲去摋老奸臣攻官衙矣,文鳳仙得報
,驚甲面仔青恂恂,趕緊拚出去阻擋,抑無叛國抄家叨有汝e份呢! 毋閣
這陣忠義香客,心狂火焯,「視死如規」,親象猛虎出稠,阻擋袂了,文
鳳仙氣甲強欲昏倒,眾位,這聲大費氣lo,香客夯武器借林家聲勢硬欲
攻官府,欲知後果按怎?請看下腳說明。
第十章 老奸臣, 家己燒香無講歹話
(89) 文明仙慘死,林文鳳e兵馬,進到烏日來停止,落營觀望
採取守勢,一方面伊無攻官府無欲叛變,一方面 互家族中「主戰派」有
交待,一方面防止洪欉族敵趁虛進攻,步數袂醜, 毋閣中間忽然來一批
,南瑤宮e彊(kiang4)腳香客,硬欲進攻,欲 逶林家給「牽牛落湳」,硬拖
落水li,現主時氣氛臹醜,茲香客已經開始進攻官府,代誌歹紡, 毋但
是吓中著埋伏冤死,顛倒吓 互老奸臣上書北京,講「林家聚眾圍城謀反
」,恐驚滅族li。
嗯才e瞬呤,「尻倉搢(zii6)大砲」矣,文鳳仙馬上決定,無論按怎
,絕對著阻擋香客進攻官衙安呢,必要e時瞬,甚至先殺害香客宛那姑不
而衷li,雖然茲香客,絕對是對林家死忠安呢,講起來宛那不忍心無sy勢
li, 毋閣代誌夯到頭殼尾頂仔,咁正實猶放外外是毋?咁講「目睭金金人
傷重」,林家著噯 互人安「反叛」e罪名才來反悔是毋?這聲文鳳仙真
正想氣,趕緊下令『無論啥乜人攏袂使進攻彰化衙門,違者斬首,这是
無法度e代誌,映望茲鄉親大德 互我拜託一下。』講煞呤,氣putput,
雞母跳破卵, 強欲夯狂安呢。
另外這爿面老奸臣凌王爺(定國)、王縣令, 佇縣府埋伏大軍,僎
規晡等無人,搪咧懊惱e時瞬,一下聽著烏日方面e林軍群眾,有人來進
攻官衙,叨真正歡喜li,心肝內按算,這聲林家死路到矣,,死棋定定定,
互伊袂假痟e。
凌王爺一下想到茲呤,真正爽勢,心涼脾透開li,這嗎干礁等「欲
收網」著好,大船欲入港矣 he! 嗯才 e瞬呤,夯起蛇皮絃仔(胡琴類),
挨甲咦咦彎彎,唱歌納曲安呢,暢甲講話嘴瀾吓牽絲li,有影日子叨好空li。
呾咱凌老爺 搪咧歡喜e空縫,忽然間來 逶前線e「報馬仔」,回報
最新戰情到本部。『秉報縣爺,代誌歹紡矣,原本一路攻來e林家兵丁,
遂踮烏日彼箍圍仔停落來,無欲進攻咱彰化城e款,後面又閣綴一陣彰
化媽e香客信眾,隨人夯硾夯磅,有佮林家兵丁扭扭搦搦,林家掣頭 搪咧
化解長短。
『咁講咱官府派e連環計謀,去 互林家知影是毋?林家駐軍停
位烏日,「進吓使攻,退吓使守」,咁講有敖人來指點e款是毋?』報
馬仔講煞呤,凌王爺大驚,規面青恂恂,趕緊來問『此事當真?汝吓凍
確定林家無欲來攻?』『無毋著,咱e線民看甲臹斟酌(仔細),絕對無
顛誕,下厝林家e兵丁,確實停駐烏日,無欲來攻彰化li。』
『內底咁是咱官府派e義民,假影香客濫入群眾,來煽動尹硬欲來
攻彰化城,尹是毋是無效,抑是去互人看破腳手,掠起來haa2?』『咱茲
假影香客e義民,完全無效,拍算對方已經張弛矣,無定著咱e人,去互伊
掠去,審判奸細,偷夯古井嘛著認,恐驚仔咱e連環計,已經去互林家知
影矣……』
『前線e情報知影,林家掣頭兮,已經宣佈戒嚴,「格殺無論」,絕對
無欲攻彰化城來中咱e計策li, 嗯才咱埋伏e義民,無法度來給掠安呢,看
起來這欲衰韶a he!』
『啥乜?代誌即尼梟悻,唉!「天亡我啊」!』凌王爺一下聽著安呢
呤呤,忽然間目跳金星,一瞬烏暗眩,規箍人昏昏死死去,下腳手仔趕
緊提薑湯、烏糖來急救,……這聲老奸臣凌老爺一下聽著事機敗爛
呤,親象萬箭gng3心(穿心)赫尼艱苦,唉!政治啊政治!汝ta吓赫尼烏
暗啦!後果按怎,請看下腳。
(90)呾凌王爺昏去矣, 眩茫茫,下腳手趕緊來救, 順續調大夫
診查,這聲老爺面烏半爿,血壓擎到二百三,真正著驚, 嗯才有人掠龍心
臟,有人給灌酸素……(講耍笑啦!)無外久伊睜神矣,左右仔心肝才卡定
著。『唉!老爺保重,對付林家兵丁,稍寡代誌爾, 毋免赫驚啦!咱佇
縣城四周圍,所埋伏e兵丁,比林家加三、五倍猶袂拗蠻li,咱絕對袂拚
輸尹啦!驚啥韶?』
這個時瞬,凌王爺才溫撩也講:『代誌真正歹紡,恁眾人有所不知!
』唉!凌王爺是老奸臣出身e,代誌空縫長短生死門,伊ta吓毋知影?政治
e力量,絕對比部分戰事失利,閣卡食力叨著,伊續落分析,茲左右仔隨
人聽甲面仔青恂恂,真正煩惱li,有影代誌噯矯互伊好勢呢!
『頂司 逶福建派我來台「辦案」,欲逶猙狌毀類e奸臣林文明將
軍,給解決掉,來為民除害, 嗯才設計連環計欲來殺盡林家,呾這嗎林
家無欲攻擊縣府,文明仙是我摋 e,我欲按怎來交待?來收山攬尾? 噯
知影,今仔日清廷吓凍來摋文明仙,著仝款吓凍來摋我凌某人li,為
著政治目的这 互汝袂假仙e!林家規族為清廷犧牲重大恩重如山,
猶閣 互人摋死,文明是我害e,無掠我來摋,是欲摋啥乜人?咁講欲掠
同治皇帝來拄罪是毋?我絕對吓夆「掠水鬼去窒(tat4)涵空」li,可憐
我若死了後, 毋na鋩角矯袂返來爾,顛倒千秋萬世吓 夆罵我『錯
殺忠臣心狠手辣」li,皇上為著欲安撫全國,壹定吓掠我拄賬來解天
下之怨啊!想到茲,真正是心肝威威鑽,目屑四濫垂li。』
凌王爺叨老奸臣真正做了有起,文明仙若kiau去(死去),定著吓掠
凌王爺來摋,一方面替林家報仇, 互尹鋩角駛了有夠,一方面吓減少
清官e罪惡感,為著達到政治目的,伊吓 逶「剷除地方勢力坐大」給
tu4cau2做「官員中間互殺意外事件」爾爾,凌王爺吓夆拍入阿鼻
地獄,永遠袂超生li。
這款戲齣,最近1980年代宛那有咧搬叨著,現時三十歲以上e人,定
著猶有印象li,1984年,美國有一個台員去e作家,名號做「江北」,憨
(kam)甲欲跁壁去,仈人毋寫,僅干礁欲給「阿國仔」天公爺寫傳記,人咧
講「王爺尻倉袂摸e」,伊遂顛倒「欲給搧腹肚邊 互汝看」。唉!人
赫有志氣實在叨無地看li, 嗯才 e瞬呤,台員這爿岸頭e,看了臹袂慣
習,自那婁「腳siau3」陳啥乜禮等三人,到美國去給 ii3 uaaikolo
sok sa3(做掉)。
唉! 臹歹運矣he,「牛鼻去拄著賊手」,阿禮仔註死毋死,去互阿啄
仔警方摠著,這聲天大地大, 全世界攏知影, 台員官廳兮,強欲hut
甲袂收山攬尾e,到尾溜也,姑不而衷, 自那掠功臣陳啥乜來拄數,給判
「無期徒刑」 互全世界看,差一絲仔著死刑li,阿禮仔驚一下瘦十外斤
安呢,各位,「人」是阿禮撩e,無掠阿禮仔,咁講是欲掠頂司是毋?
这著是政治,抑是烏社會e梟悻攏仝款,一個人替頂司行凶了後,真
可能無外久,家己宛那吓 互人來摋死(以滅口li),總講一句,今仔日凌
老爺真正危險li ,吓使講規世人上第壹了然乏搭款叨著,公堂擊殺文
明仙e代誌,若矯袂好勢,恐驚吓 互人掠水鬼去塞涵空安呢甡。卡早文明
仙平定戴潮春、洪欉,結局吓 互清朝摋死,今仔日凌王爺摋死文明,
仝款亦吓 互人來收拾叨著,这報來報去臹害呢!
(91) 隔返工, 同治九年三月19日下晝, 呾 這嗎兩爿攏真正
危險li,林家這爿文鳳仙佇香客特務e使弄挑撥,假使局面矯袂好勢,衝
磅攻縣衙,絕對吓殺身之禍抄家滅族li, 毋閣,王爺這爿官府派若應付
了顛誕,仝款嘛有幾落粒e人頭吓落地li,清廷絕對吓摋伊,來平定文
明冤殺e民怨啊!凌王爺袂死佇林家兵丁,顛倒吓互頂司來殘害,做官做
甲赫梟悻,有影叨怨嘆, 宛那真正吓夆同情叨著。
眾位看倌,為著欲攻城抑是毋攻城,二爿當中最少噯死一名勇將(或
大官),欲攻,著死文鳳仙, 毋攻,著死凌王爺、王縣令,代誌變到茲來,
雙爿攏無退路,有影臹歹紡矣 he ,雙爿主將為著欲致性命(保有生命
),絕對吓唅心gap命用心計較僬拚搭底,这是「生死存亡」之戰,袂使
有一絲仔e顛誕,雙爿「腎上腺」來擎夯,看欲死豬哥抑死豬母li。
目前e戰略是安呢,阿罩霧林家,林文鳳先 逶兵丁調到烏日,一方面
吓凍來安撫主戰派,順續倘預防族敵e攻擊,算講監視叨著,另外伊兵停
烏日,無欲進攻縣城, 安呢才袂中著官府派e「圍城謀反」奸計,等一暫
仔了後,代誌安定,才全力告 逶京城去, 逶這陣奸臣凌王爺、王縣令攏
總處死坐罪, 安呢鋩角才矯吓返來。
另外佇凌王爺官府派,尹著噯「全力防守」,照按算e連環計去執
行安呢, 摋死文明仙了後,埋伏重兵,叫林家來「自投羅網」,大船入
港,另外派間諜假影香客,煽動香客來報復進攻縣城,硬給林家安一個
叛變e罪名li,萬壹林家若毋來……。
這聲大費氣,變做講林文鳳佮凌王爺咧決鬥li, 也叨文鳳仙無欲進
攻縣衙e關係,凌王爺卡佔輸勢li,壹旦林家無欲來報仇攻城,凌王爺只
好潦落擔這個殺仁罪(殺文明),命配命合應該,好好人舞這齣有影袂和
li,凌王爺愈來愈毋甘, 互人來利用,真正後悔li……林家這爿,暫時隱
忍,田螺gam3水過冬,到時瞬「告狀攏入去京城,告到皇帝遐,這陣
老奸臣定著噯殺頭,干干礁安呢 爾,無啥乜好法度啦!
嗯才e瞬呤,這聲凌王爺尻倉去 互椅仔夾著矣,面仔青恂恂, 也
叨生死門噯矯互伊好勢, 猶無恐驚仔命著吓休去呢,老爺愈想愈驚,尹
婆仔卡好le,一世人嘛 毋捌即溜尾,自那趕緊招左右仔來暗中參詳,看欲
按怎摃倒林家來取贏面叨著,秘密會議才開無點外鐘呤,凌王爺心肝
頭著有按算矣, 佇現主時真正危險緊急e坎站,港無潦袂直li。
伊e鐵血決定是安呢:「組織決死隊,濫入香客民眾,強 逶林家兵隊
拖落湳,來攻擊官衙,無惜壹切代價li。」這項緊急決議,唅心gap命,
真正硬斗歹紡,咧夯倒頭香矣,絕對吓使成功袂使敗去,「生死存亡在此
壹戰」li。
三月19,下晡午時(二點外),凌王爺暗中所派e決死隊,已經拚到烏
日林家兵丁總部,假影做香客濫入群眾當中,意氣揚揚,講欲替文明仙
報仇,林家守兵一時失覺察,大敵當前,無給掠起來審問叨慘了矣,遂
顛倒咧給講好話安撫心情li,汝愈給好衰,愈給奉承,尹叨愈僥擺愈
擎ia3ia6,真拍損,林家兵力無啥了解代誌e內情,這批假香客決死隊,
ga 毋驚死到地也,絕對吓來使弄茲百姓攻擊官衙,為文明仙來矯鋩角,林
家是毋是吓中計呢?这真正要緊li。請看下腳e說明。
(92) 到底林文鳳吓贏?抑是凌王爺吓贏?雙頭捙拚袂輸「陳
皮蘇黨」臹有bii叨是,呾這嗎官府派大官凌王爺,伊所暗派e爪耙仔
,濫入去林家兵丁e民眾香客當中,欲來給翩笪,硬欲逼林家兵力去攻縣
衙,來給牽牛落湳li,茲爪耙仔,隨人腳手敏cy4 ,雙蕊目睭qin3虎虎,
頭殼清明, 毋閣外表溫順客氣,嘴叫阿伯阿姆真好禮,無人想吓到尹
宛那忖死忖活,歹心烏腸肚e腳siau3 li。
毋閣當噹這陣毋驚死e爪耙仔拚到烏日e時瞬,才知影代誌歹紡矣,看
落腳手僬攏冷去有影!噹時也(原來)兵頭林文鳳早著宣佈戒嚴,無論啥
乜人,尤其香客攏袂使進攻縣衙,連我講攏袂使煽動安呢甡,違反規定者
,壹律處死絕無諒情li。今仔日林文鳳港潦落矣,殘殘 互汝好勢,「格殺
無論」這帖猛葯,毋但吓凍來救著林家規族e性命,顛倒猶吓來治大官
虎罪狀梟悻,替先仁報仇li。
呾凌王爺派來e決死隊爪耙仔,一下知影駐軍地區戒嚴了後,心內
著驚叨大粒汗細粒汗, 毋知欲按怎才好,空有滿腹工夫才情,有影「英
雄叨無用武之地」li, 毋閣代誌真正緊迫,頂司交待e任務矯袂好勢,定
著返去宛那死路一條li,茲爪耙仔壹定噯殺出一條生路,欲鏘著鏘搭底
,看有倘立大功,來享功名萬世否?
呾是按怎講,林文鳳兵頭, 壹定噯執行這條戒嚴令? 因為伊知影代
誌真正嚴重食力, 毋是壹般稍寡Case著倘比憑li,原因是安呢,透早派出
去e三組探馬仔,返來攏反應講,彰化城內已經遍搭(貼)「土匪臨城」e
告示,百姓是驚甲siam4尿,隨人門戶關甲va2va3va6,文鳳仙ga接著這
款消息以上,著知影兵丁在地停留,絕對毋倘攻城佔府li,以免犯上來抄
家叨著。这是同治九年三月19差不多中晝所下令e。
爪耙仔一下知影文鳳仙落戒嚴令,呾這聲猴免弄矣, 毋閣為著保
護頭家凌王爺e性命爾,尹絕對噯潦落死潦落拚, 嘛袂使倒退li,唉!
这著是古早運命悲哀e所在,人活佇世間真正脆命, 毋管伊人懸漢大高
鏘磊斗,宛那是「耐拍耐tun好肉本」,一身銅身鐵骨,干礁赴潦落江
湖作肉餅 (砲灰) 爾爾。
嗯才e瞬呤,這陣掣頭e,趕緊下令,絕對噯鬧噯翩叨是,佮戒嚴令
拚注(du3挑戰),橫直死嘛死仝窟無要緊啦!
這陣毋驚死e假香客, ga欲翩撇戒嚴令以上,呾這聲叨「衝突難
免」,流血流滴 互人鼻管軟痠e代誌,叨吓姑不而衷來浮夯li,唉!給汝
講有影苦齣e,悲劇e,茲茲安呢甡。
(93)呾這嗎潦落去矣,這十捅個凌王爺爪耙仔 ,暗中聯絡十
外個香客,攏總貳十外人,規陣跪佇林文鳳兵營e面頭前,欲求見文鳳頭
家,為著欲替文明仙報仇,逐傢無惜性命捙拚搭底,欲去彰化縣衙生剝
凌奸臣e老皮,給碎屍萬段li,這陣「香客」態度堅決好禮,有義氣有氣
魄,事事項項欲為林家拍拚以上,這聲文鳳雖然滿腹無歡喜, 毋閣表面
上宛那笑笑也來給應付li,來給安慰li。
這聲林家一下落軟來款勸「香客」呤,「眾香客」看「有機可趁
」,規陣自那夯狠爬起腳long6,夯起血旗大聲喚喊,強欲殺 逶彰化城去,
林家兵丁大驚,馬上執行戒嚴鐵血政策,夯長槍, 逶其中一個「香客」
刺殺倒地,滿塗腳流血li,絕對無客氣叨是, 呾這聲歹紡矣 , 眾「香客
」一下看著紅血呤,趕緊「落軟」下跪誠服,假影大哭。
目屑四濫垂,喚『吾等香客,身份雖賤, 毋閣忠直義氣,阮勇敢忖死
去掠凌賊,死叨毋驚,ta吓驚恁茲林家兵來莿棘?今仔日阮跪求, 毋是驚
死,實在是壹心欲替主公文明來「報仇心切」爾,死噯死佇敵仁才甘
願, 互家己人殺死無意思叨著啦,吾等賤民,含心gap命為林家死忠,無
來領功叨咧慘矣,ta吓顛倒來翩手底肉(同室操戈),……嗚……嗚……
』林家兵丁看落臹袂過心,仝款目屑輦(lin3)落來,唉!講起來平平家
己人呢!庄腳人忠厚有情,想落叨吓鼻酸目燒li,有影le!欲摋凌賊,死
叨毋驚矣,ta吓驚咱e戒嚴令?
嗯才e瞬呤,當噹林家兵丁,來搶救彼位受傷e「香客」時,這聲天
大地大e事變發生矣,因為這陣「香客」,自本著是凌王爺派來e爪耙仔,
毋閣軍威森嚴,壹直無法度接近林軍,這嗎趁林家救治受傷香客e時機,
真正「天機難逢」li,著趕緊 逶其中二位家臣仔(林家幹部),用綁票e
方式硬押出去,用刀ci3踮頷頸,押出去五十公尺呤,這聲林家兵丁大
著驚,心頭亂紛紛,無想著對方吓舞這齣e。
仝這個時瞬,規陣「香客」仝款跪佇塗腳兜,目屑linlin擱大聲哭
嚎『林家兵丁文鳳仙,請恁諒情,阮這陣不黨,攏是林家上介親腹上介
死忠兮,今仔日林家唅心gap命,為清廷犧牲即尼大,結局遂 互清廷害
死,恩將仇報,這層代誌無料理袂煞, 猶無世間著無天理li,不材無惜
性命,衝磅潦落為咱文明仙矯鋩角,映望咱茲兄弟吓凍抾和來捙拚報仇
……』
這陣凌王爺e爪耙仔假好衰,硬欲 逶林文鳳牽牛落湳來進攻官府,
一枝嘴講到好聽溜溜, 毋閣心肝內歹心烏腸肚li,這款代誌,文鳳仙
宛那看吓出來叨著,心內真正想氣, 毋閣仁質互掠佇手頭,恐驚有危險,
叨毋敢甚假仙li,這陣「香客」忖死忖活無硾無硾,到時若發生命案著
醜材矣 he,嗯才e瞬呤,咱文鳳仙真正為難,踮遐咧吐大氣,矯袂拄好li。
佳哉軍師木火仔有妙計,伊向文鳳仙進計『……如此……如此…
…』文鳳仙聽了大大歡喜,稍寡減少伊e壓力,眾位鄉親道友,文鳳仙按
怎來閃這層空縫?按怎來解救仁質,閣有倘來防止奸仁e使弄來進攻縣
城?請看下腳e分析。
(94) 這嗎是同治九年三月19下晡時仔,地點佇 烏日彼箍圍仔
,氣氛真正緊張硬斗,有影拳頭母捏甲強欲出油去,軍師木火仔有妙計,
伊給文鳳仙講『照這瞬这扮勢來看,恐驚官府派有婁奸臣來煽動使
弄e款!無定著這陣欲為文明仙報冤仇e香客,著是爪耙仔le!呾這嗎
免驚,代誌鏘採(自然是)矯吓好勢, 抑無「頭人」咧做假e是毋?
『第壹步,先假影允准,有欲進攻官府e款, 互二爿e氣氛卡「坐」
(降溫),真好禮真好嘴,款勸這陣香客嗣大,拜託尹毋倘為難茲仁質,雖
然恁毋驚死來講, 毋閣摋茲仁質宛那「於事無補」,橫直對恁嘛是無倘
好空li,寧可隨人手se夯卡懸le, 各退一步, 毋倘家己厝內矯袂直,人
咧講「鳥仔肖咬, 毋驚人看」, 安呢 醜材矣 he !我想,這個時瞬,爪耙
仔閣卡歹款來講, 宛那無落軟袂煞li。
『第貳步,提出「以毒攻毒」e老撇步, 也叨一坎還一坎li,今仔日
奸臣吓凍派爪耙仔,假影僮乩「起僮」,借天意來攻縣衙,咱嘛吓凍假
借童乩法力來反制伊,講神明反對攻擊官衙, 安呢著好勢矣 li,這嗎噯
夯出彰化媽祖這枝天霸王e,隨人卡吓遵循,咱「彰化媽」甚過靈聖,
嗯才民氣勇猛有氣魄,親象火燒鄭秀才厝, 嘛是暗用這步li!
『第三步,暗中派親腹仁馬,穿著敵仁服裝,抑是假影族敵打扮,埋
伏佇前線要道三角窗,萬壹這陣爪耙仔硬欲進攻時,著用武力,硬給殺
滅,執行「鐵血政策」,一絲叨無諒情。也叨「非常時期」,為著大局,
姑不而衷安呢做爾爾。
『第四步,利用仁性e弱點,用金銀財寶來收編這陣敵仁e爪耙仔,
逼尹「龜腳」脞出來,來壓滅尹e銳氣,辦法是安呢:主公厚禮來款待這
陣爪耙仔,這個中間,來表示真欣賞尹e才能氣魄,有意欲重金禮聘做軍
師「幹部」,名為禮聘,實為收編監視,尹若接受,著表示「反叛凌王爺
主公」,尹若毋接受,著表示有「間諜」e嫌疑,這聲逼落去,「鼓佇內,
聲佇外」,自然龜腳著脞出來矣,爪耙仔左右為難做石磨仔心,定著吓稍
可落軟li, 安呢做吓間接來殺滅尹e威風,減少衝突戰事e可能性叨著…
…』
文鳳仙一下聽煞軍師木火仔e計策呤,真正爽勢歡喜,著趕緊差派
一陣親腹e,化裝敵裝埋伏佇前方來防止意外,另外又閣派人化裝做僮
乩,準備做法事,这定著攏事先套好勢叨是,尾溜也伊親身統領三十外位
兄弟,真正好禮真正客氣,來佮這陣「主戰派」e「香客」逗參詳安呢。
烏日林軍附近e大埕,香客人群搢甲滇滇滇,當噹這陣爪耙仔咧大
聲喚喊,欲進攻縣衙欲替文明仙報仇e時瞬,「拄好」亦有一陣香客行
倚來,反對進攻縣衙,尹主張噯冷靜,毋倘中官府毒計(這陣「香客」是
啥乜人派來,用腳頭u(膝蓋)想嘛知), 嗯才 e瞬呤,無外久中間,這陣
「主戰派」e香客,佮「主和派」e香客,起冤家起衝突,二爿相拍味是
。
搪咧心狂火焯鋒火頭e時瞬,主公文鳳仙亦「拄好」倚來,欲來排
解「糾紛」li,大聲嚷喚 ,『雙方冷靜,袂使起冤家肖拍,』爪耙仔這
陣一下看著文鳳仙出來排解呤,遂顛倒歡喜,尹想講『壹旦現時衝
突顛倒誤大事,不如先給延cen2,用he麻薯步兮,罔佮伊haau2(虛與蛇委
),這聲文鳳仙來解救,真正大船入港, 臹合我意li。』唉!解救啥乜碗
膏?这原本著是文鳳仙e計策啊!
(95) 這嗎,主戰派e「香客」,佮主和派「香客」, 隨人坐定
著了後,文鳳仙嗣大,才溫撩仔講『呾平平攏是家己e人,隔壁親傢
爾,叨毋倘安呢冤家讓債,「鳥仔肖咬, 毋驚人笑」,目前「大敵當前」,
冤仇未報,逐傢心肝頭攏真鬱卒,这我完全知影,毋閣眼前奸臣派搪咧
設一個暗窟,欲 互咱潦落帶(dai4)衰,咱絕對噯張弛, 毋倘潦落中計呢!
『若講到是毋是欲發兵攻擊官府報仇,这無的確啦!我宛那贊成li,
毋閣这噯閣看神明e意思,咱茲眾香客卡有甡張牽挽(執著)li,呾咱茲
主戰派e仁質稍給放一下,互伊透一下氣啦,時機梟悻,咱逐傢噯抾和
來捙拚才好……』
咱文鳳仙畫虎畫lan6到地也,逐傢亦無閣加講話,主戰派e爪耙仔,
一時歹勢,自那放出仁質,順續繫(he3)失禮安呢甡,解除一場e危機,講
實在e,橫直摋死茲仁質嘛是無卡擢啦,掠這條來牽拖, 宛那變無魍
啦!
無外久,逐傢 搪咧聽文鳳仙說教,聽甲耳空kapkapkap,真「拄好」
,看著一陣香客綴著僮乩佮陣頭, 佇遐咧「起僮」做法,欲聽神明e意
思,看是欲攻縣城抑無?這陣陣頭,腳手僬,精神充足有甡張,鑼鼓大吹
是奏甲真叉操,乒乒乓乓,真正鬧熱逗搭,彼位僮乩跳跳蹌蹌(zong2),嘴
內sapsap唸安呢,過目睨(ni)久呤,神明來回消息,神明e意思講『千萬
袂使攻拍官衙, 才袂來中官府個奸計li』,文鳳仙聽著才dim4頭歡喜,
趕緊傳令落去,給眾香客說明咱神明e意向安呢。
這聲,這爿爪耙仔e「主戰派香客」真正驚惶li,尹亦知影林家有
欲硬壓落底e意思li,若這聲去互伊拗落,是欲按怎返去見凌王爺叨好?
萬不利若任務袂凍完成,代誌空縫矯袂好勢,恐驚也「狗死,狗蝨嘛無
性命」li, 嗯才自安呢欲決心掠狠(hiong2),硬欲給拗返來,自那殘殘脆
脆互伊做二塊,起義作反啦!人講『先拚先贏,卡袂叫阿俍』(先下手為
強),這陣爪耙仔香客硬欲進攻叨著,無cap林家e警告安呢甡,呾代誌
歹紡,雙爿是毋是吓閣起「拚du5」抑袂?(吓衝突再起嗎?)
這個時瞬,文鳳仙老神在在,好禮來給款勸li,伊欲給禮聘賢材
,逼尹漏氣龜腳脞出來li, na軟索咧牽豬le,一步一步來,文鳳仙放
言『眾位香客有欲攻擊縣衙,這款仁才我真正感心,咱林家兵丁雖然今
仔日.無欲進攻縣衙, 毋閣部隊開出來,過三、五工定著噯壹戰決江山
li,現主時營內真缺(ke4)欠恁這款e仁才,想欲重金禮聘入幕, 毋知我
文鳳仙有這個榮幸抑無?』
呾這聲歹剃頭矣,爪耙仔香客聽了,大驚一趒心肝ce4三下,險e昏
倒,真正是「一面溝一面圳」,左右為難做石磨仔心li,爪耙仔若準答
應做林家e謀士,雖然吓金錢財帛, 毋閣三工五工攏吓互人監視稠e,早
慢龜腳吓脞出來,而且日子久了,吓 互凌王爺誤吓做叛變主人,「雙頭
無一敖」,絕對了然敗德li , 毋閣若是無噯答應林家e聘請,這聲表示
看袂起林家,林家重金聘請, 猶無這個榮幸,林家絕對見羞返想氣,隨
時吓給安「特務」罪名,藉機處斬, 安呢閣卡危險li。
唉!這陣凌王爺e走狗走豬仔,恁實在梟悻呢,有影叨替恁可憐li,答
應亦袂使,無答應嘛袂使,逗底尹是欲按怎來逃出這場風颱尾?按怎來應
付這個局面?尹e身份是毋是吓暴露現身?呾請看下腳e說明。
(96) 這個時瞬,大概是同治九年三月19下晡三、四點e坎站,
文鳳仙採用軍師木火仔e妙計,利用心理戰術,崩解尹e心防,知影爪耙
仔香客已經落軟也, 毋閣伊宛那無噯甚超過份li,北京話講「窮寇莫追,
狗急跳牆」,文鳳仙宛那提出妙計, 互尹茲爪耙仔有樓梯倘落來,放尹
一條生路,無噯甚過給逼, 嗯才e瞬呤,文鳳仙真正好禮給尹姑臹
(go6zy2,請求)li,害茲爪耙仔遂真正歹勢li。
文鳳仙安呢講:『恁攏是阮林家上介死忠兼換帖e,有人誤會講恁是
爪耙仔,这絕對無影,恁e功勞,林家十世人做牛做馬叨給恁叩頭,我自
早知影恁攏是仁格者,無噯金銀財帛,在下佇茲給恁行禮尊敬,我知影
咱攏是彰化媽祖,上介誠心e信徒, 抑無安呢 啦!我提淡薄仔所費互恁
去南瑤宮燒香跋杯咧,看神明有杯來贊成恁就任林家軍師否? 才閣做
定奪宛那袂慢啦! 呾一絲仔禮數叨毋倘棄嫌呢,叨毋臹敬意,多多包涵
。』
續落e瞬呤,文鳳仙提出寡銀兩,隨人分著貳十箍銀,茲爪耙仔真
正歡喜,今仔日吓凍脫離困境無打緊,閣顛倒有錢銀倘提,閣洗刷間諜e
罪名,唉!文鳳仙對咱即尼好,挑工放樓梯 互咱落來,家己愈想愈歹勢,
也叨鋩角駛了有夠, 嗯才隨人鼻仔摸咧,謝勞力,趕緊踉港辿走,zong3返
去南瑤宮這角勢來,假影求神拜佛燒香跋杯……開始「逃亡」走路li,
這爿按下不表。
呾這嗎輕鬆矣,文鳳仙一下看著這陣爪耙仔離開了後,一時心涼脾
透開,唸歌閣吓呼(ko6)絲仔(口哨),唉!險險e去 互這陣「毋臹囡仔」筴
去配,尹婆仔e卡好咧!
呾這嗎文鳳仙,上介要緊e代誌,著是緊處理善後空課, 安撫五路
仁馬e欠點空隙(ke5), 噯有四爿面安搭互伊好勢li,一爿是林家族內e
忠直仁士,一爿是南瑤宮有欲報仇e香客,一爿是族敵洪欉家族、戴潮
春餘黨,尹攏目睭瞵(qin3)虎虎,不時嘛數想咧等,一爿是老奸臣凌王
爺佮尹爪耙仔,犀牛仔借角,这哪著噯閣講!
文鳳仙統領兵丁,真正壯材敏cy4,細膩閣張弛,軍紀嚴明知仁善任
,不時嘛二蕊目睭溜溜秋秋,有影無人哈伊吓倒,茲鱸鰻蝦仔,宛那無
人敢搧伊e腹堵邊li, 嗯才 e瞬呤,無外久e中間,代誌矯甲真su4si6,
真完滿逗搭, 呾文鳳仙暫時撤兵, 返回阿罩霧庄腳祖厝, 續落欲做另
外一階段e抗爭手段,來為咱文明仙報仇,來剝彼陣奸臣慪官e皮,飲尹e
血,鋩角才矯吓返來。
文明仙慘死,林家放棄「武鬥」,改用「文鬥」,步數實在有幼秀,
後世人臹給謳咾,真正林家矯了有s ui4(媄)叨著,林家僎欲拍官司,給
告到皇帝遐去, 互這陣奸臣教示一下,按算欲 逶這陣老奸臣給電甲金
金金,無死嘛欲給「liu4」尹半條命,來安慰文明仙在天之靈,眾位咱
茲鄉親道友啊, 百外冬前,交通不便,台員北京吊遠六千華里,是欲按怎
告啦?而且話語袂通,是欲按怎矯啦?欲按怎翩啦?唉!真正硬斗li。
(97)呾咱話分二爿來矯,駐守佇彰化某秘密基地e奸臣凌王
爺(定國)、王文棨縣令……規陣人,自從派出爪耙仔,假影香客,忖死
忖活,欲鬧林家兵丁來攻官府, 互官府有名義以「聚眾圍城謀反」名
義來抄家滅族, 毋閣林家真正細膩,自從派奸細入城,知影城內貼有「
土匪臨城」e宣告時,尹著決意毋敢來攻縣衙li,致使講這擺變咱凌王爺
真正驚惶, pipi搐,伊知影萬不利林家改用文鬥,無欲來進攻e時,到時
瞬告狀告到京城,皇帝為著「平息眾怒」,定著吓掠伊起來做水鬼塞
(tat)涵空li,犧牲伊來保全皇室e名聲li。
以林家功在清室,仝款互人害死,我凌定國是算幾分e螺絲?想到茲
凌王爺大驚,伊可能是後一個犧牲者li, 嗯才趕緊派決死隊,暗中濫入
去彰化媽e香客當中,硬欲弄林家兵丁來攻縣衙,潦落這堀, 毋閣「人算
不如天算」,因果循環 互恁袂鐵齒咧。
結局,凌王爺等啊等,欲等林家引兵來攻衙門,等規晡,等久著臭殕
(pu4),等到規箍人偓促夯狠,心狂火焯,大聲叫苦『天亡我也!』凌王
爺知影事機失敗,心肝頭不止也後悔,凌王爺啊凌定國,汝定啥乜國,汝
敗國有爾爾!
凌王爺所煩惱e代誌猶 毋但「林家無來攻城」爾,上介食力e,著
是「所派去假影香客e爪耙仔,咁吓 互 (敵仁)林家看破腳手掠去審問,
總是用刑硬弓,偷夯古井嘛著認li,到時瞬林家告 逶京城去,仁證物證
充分,恐驚我十粒頭殼叨無地賠li,」凌王爺愈想愈驚,尹這陣人十外
個,無定吓敗甲塗塗塗,自那倒佇勾椅吐大氣,「qen3qen6袂消gen6」
,唉!實在叨有影li。
當噹凌王爺艱苦坐卦,想甲頭殼強欲爆(biak3)破e時瞬,忽然間身
邊行來一位軍師,『哈哈哈,袂要緊啦 !頂司早著有仙丹妙法來應付,
免驚免驚……』凌王爺大歡喜,趕緊ci3偎來問『有啥乜妙計,呾 嘛
緊講來鼻芳咧!』
『哈哈哈,緊傳喚庶當時三月17公堂訴案e原告應時伯到案,命令
伊自我摋傷,傷痕愈贅愈好,續落e瞬呤,對外宣稱是林文明佮應時伯
,原告被告肖ken肖拍,一時失手,無注意受傷致死,是意外死去叨著, 毋
是挑工欲陷害!』凌王爺聽煞,真正歡喜, 逶官場e謀殺,解說做原告被
告中間,一時氣憤,失手拍人致死,有影好步!好步!無論啥乜人嘛講吓
通叨著,橫直大條變細條,稍矯一下著好勢a!
嗯才e瞬呤,凌王爺、王文棨縣令這派官府派,趕緊叫原告(三月
17文明公堂被害彼工)林應時伯,家己夯刀, 逶身軀、腳、手,家己摋
甲流血流滴,講起來宛那真正了然li,「腳踏人e地,頭戴人e天」,有影
姑不而衷無法度li,逐家套好勢,後日仔,應時伯噯出來作證,講文明仙
互人摋死,是因為二人互相打鬥,不幸失手死亡, 毋是政治案件叨著。
這聲老奸臣凌王爺心肝掠好勢了後,著安呢假好衰,挑工派人去佮
阿罩霧林家講和,一方面願意給林家繫(he3)失禮,順續仇家應時伯甘
願來出錢賠償,來化解著文明仙死亡e怨恨,好嘴解說,實在是一時失手
「殺仁致死」,希望大事化細, 毋倘引起雙方大捙拚大屠殺安呢,總是噯
和解叨著。另外一方面, 宛那願意將文明仙禮葬,規還屍身,表示誠意
,呾人死叨死矣,儘量吓凍做卡鬧熱e,勸尹節哀順變叨是。
來給講到林文明家屬這爿面,文鳳仙一下退兵返阿罩霧下厝了後,
暫時化解雙方大衝突e危機,無外久中間,接著官府凌王爺e好禮書文,
文鳳氣一下噗噗跳,血壓擎到二百貳,順手 逶書文裂(lia4)甲碎碎碎,
幹公拄媽,叨罵甲無一塊li,這個流擺猶咧假好衰,有影袂講兮氣li。
嗯才阿罩霧林家,決心欲採用「文鬥」 ,無欲用「武鬥」,林家欲
告訴到頂司京城遐, 互皇上來處分這批奸臣凌王爺、王縣令、黎道台
……。林家佇 1871～1880年間,四擺上訴到京城,眾位咱茲鄉親道友,
逗底京城是欲順勢摋凌王爺壹班奸臣,來暗勘家己罪行,或者是 逶林
家硬拗落底,想法度用「文字獄」害死林家,來「斬草除根」!故事真
正心適,請看下腳分析, 噯注意,林家就京控訴這段時間,拄好台北方
面馬偕博士來傳教,伊帶入來醫術、微積分、物理、化學,佮清朝e爛
敗拄好形成強烈e對比,清朝啊清朝,汝是吓堪咧孝孤拄e抑袂?
第十一章 就京告訴填搭底, 林家潦落真可憐
(98) 同治九年三月17日,阿罩霧林文明將軍,去互奸臣凌王爺害
死,这是清朝台員地三百年來,上第壹冤枉 e代誌,咱佇茲以客觀e立場
,來給分析其中e 奧妙,一方面是清朝官方(加害者)e,一方面是歷史家 e
忠實文獻, 呾這嗎叨給僎落來。
第壹方面,清朝e官方文獻,有影是「老奸臣,家己燒香無講歹話
」,全全痟入無痟出li。咸豐年間,唐山地頭,太平天國起義反叛清廷
政權,人講「長毛賊」li,禍延十外省,勢面鏘鏘滾,清廷魯氣趒命,舞
甲悽慘落魄,滿面全豆花,尾溜也同治年間,雖然有卡定著來講,毋閣國
家「兵疲財虛」,元氣大傷li。
清廷雖然利用霧峰林家,來平定福建佮台員e戴亂洪亂, 毋閣
宛那互林家富裕大尾溜溜,真歹扭搦,清朝看著草索當做蛇,心肝內
驚咧等 安呢,叨趕緊想法度來鏟(tio6)平地方勢力,才袂來礙著政權 e
「安定」叨著。
毋 閣 呢,林家有錢有勢又閣有戰鬥經驗,官拜副將貳品大官虎,
依清律, 噯先奏請革職,再起訴,再判刑,再殺滅, 也 叨「夜長夢多」
、「銃子拍到遐著冷去矣」, 嗯才 e瞬呤,官方煩惱 吓給「拍青驚著
」(恐打草驚蛇),(閣再講,拍官司嘛無定著 吓贏), 自那心掠坦橫 ,殘
殘脆脆做二塊, 互汝好勢矣,「先摋先贏,卡袂叫阿俍」, 嗯才利用三
月16日,南瑤宮信徒落北港進香呤, sy3(誘)文明仙入城給刺殺, 遂
牽拖講伊是「利用媽祖進香,聚眾圍城謀反」,這款「速辦速結,剷除
異己」有影真正梟悻 (不幸) li。
同治九年四月,閩浙總督英桂,呈奏摺 互同治皇帝,奏文是安呢 :
{{查林文明由軍功保舉花翎副將,與其兄均已渥受厚恩,文察歿於王事
又蒙優卹,文明該副將宜何如感奮報國,乃竟結黨妄為,無惡不作,跡其
凶暴擄殺之罪,罄竹難書,迨經委員查辦,猶復不知悔悟,輒於隘口多築
砲台,意圖憑險負嵎,並散佈謠言,妄行煸惑。茲又假名進香,率黨入城
滋事,實屬形同叛逆,法無可寬,凌定國將林文明格傷後,就地取斬,洵
足彰國法而快人心。}}
另外,同治九年 正月16日,台員府黎道台、楊總兵,奉英桂密令,發
批互凌定國(王爺),批文是 安呢 : {{台澎總鎮楊,為照會密速拏辦事,
本鎮閱營伍,訪悉彰屬惡紳林文明,經督憲諭令自新,猶然愍不畏死,仍
敢招集無賴千數百人,持械出入,橫行鄉里,戕殺良弱,佔人田土……意
存叵測,實為叛逆無異,若不設法拏辦,何以遏亂萌而安海甸?…… 會同
地方文武,設法密速拘拏,如事機急切,請這就拏獲地方,先行正法,一
面飭縣出示招告……}}
現主時(1993)咱台員,有一位歷史教授黃富三,對林家真有研究,
這嗎所得著e資料,真贅是伊費盡苦心來整理,咱真給感心謝勞力,黃
教授有分析講,官方刺殺文明仙 e理由,一四界漏鉤袂逗搭,袂肖食穿
所在真贅,看來,北京話講「欲加之罪,何患無詞」,咱文明仙去磅著這
空,有影梟悻li, 呾逗底官方e說法,有啥乜疑問 呢?請看下腳。
(99) 官方說詞 e疑問真贅,家己燒香無歹話, 是 欲na搔 吓圓啦?
第壹點:辦案e仁選有顛誕,这拍算官方挑工設計e款,道理上來矯,凌王
爺(定國)ga自來是文明仙e死伍ket (死對頭) 以上, 伊著應該迴避辦案
才著, 抑無,仇仁看仇仁,是欲按怎辦 吓落去?頂司英桂將軍梟心反形,
叨看現現li。
第貳點:文明仙佮應時伯 e官司,已經拍三年外,拖拖沙沙延遷(cen2)
壹直無結果li,假使文明有罪來講, 按怎無噯給定罪? 假使講拍三年叨
無法度定罪e案件,按怎講一聲到縣衙公堂,著 吓解決?咁講凌王爺是神
毋?
第三點:就算講文明仙有罪來講,平平官場,按怎無噯呈報頂司去
論罪?這條疑問有影真ham4 古 呢,譬論講軍中來講,部下人叛變翩反,
做頭兄e絕對噯報呈頂司來矯,袂使家己大主大意私下處理,这是普通
常識,按怎凌王爺毋捌?伊何必著來「掠一尾蟲qiaau6尻倉」?私下來
擔這層梟悻?
第四點:尹所講 e「奏摺」「叛逆」「惡行惡狀」,干礁是一小撮
人,「小圈圈」家己人仝款e言辭爾,無客觀 e標準,英桂奏摺,根據黎
道台、楊總兵 e奏文,黎、楊又閣根據凌王爺「辦案委員」佮王縣令e
報告,毋 閣凌王爺又閣顛倒是英桂派來e親腹, 事先定著套好勢li,
嗯才講來講去,全全「隔壁親家」,攏是仝黨e人咧揙猴弄爾爾,外口
其它意見無法度入耳li。
第五點:依照大清律令, 欲法辦大官,除了噯有充分證據以外,上介
要緊著是噯先給免職,才 吓使提出上訴,今仔日文明仙身就貳品官,慘
死公堂,有影互人真正著驚,逗底是啥乜人有即尼大膽 呢?代誌強強
欲爆矣 咁 毋是?
第六點:地方官吏越權處理,是「未審先判」, 毋閣地方官若是發
生錯誤顛誕,地方官自然著噯擔責任li,請問? 地方官王縣令凌王爺…
…一班人摋死文明了後,無坐罪叨咧慘了矣,閣顛倒僥擺 ueue,請問这
是啥人來寵盛 咧?
第七點:文明佇公堂問案佮擊殺是三月17日申時, 毋閣凌王爺黎
道台所發e「印示張貼」是三月16日叨事先印好搭(貼)出來矣,假使 毋
是謀殺,按怎 吓知影大官 e死期?這張告示寫安呢 :{{文明伏誅,脅從罔
治,其兄忠臣,須安安置,所霸田產,給還原主,諭爾小民,據實稟訴。}}
第八點:官府向頂司 e奏摺,正經有影「證據不足」li,奏文所寫
e,「怙惡不悛」「撗行鄉里」「倚勢霸頭」「強佔民女」「作惡多端
」……欠缺明顯證據,應該噯表明時間地點仁物事由,袂使秤秤彩彩,
一句話著準過去,甚ham3 啦!
第九點:呈文內底,竹篙逗菜刀,七e逗八e ,真正「張冠李戴」烏
白sam來叨著,文中所寫,文明仙利用香客 e 宗教熱忱,假影進香,「聚
眾圍城」來反叛天朝, 嗯才 互人殺死公堂,完全是錯誤主觀li,因為眾
香客聚眾是三月15日,離文明仙慘死三月17日差48小時li,話頭袂肖食
穿矯袂倚啦!
第十點: 文明仙一下過身呤, 彰化城內城外, 著一四界遍搭 (貼)
「土匪臨城」e告示,請問茲奸臣派e兄哥,恁按怎事先 吓知影「土匪」
吓「臨城」?土匪是啥乜人?假如是單純e意外事件爾,按怎著噯頒佈
戒嚴,袂輸大戰仝款?
第十壹點:文明仙慘死公堂是三月17日,按怎赫拄好,王文棨縣
令佇三月24著調去宜蘭廳 安呢,由李時英來接任,有啥苦衷是毋?
第十貳點:時間錯誤,三月15日福州呈供,為何三月17日就彰化正
法?速度甚ham3 li!龜腳盡脞出來,另外前後稟自相矛盾,前稟講:{{文
明十七日酉刻率黨入縣署}}, 毋閣後稟說明:{{本月17日拏到林文明
}},既然申時下哺三時已被掠,按怎酉時下哺五時 吓率眾入來,可見奏
文是事後烏白亂編 e。
(100) 由頂頭所講e理由知影,文明仙完全是冤枉被殺,阿罩霧林
家,規族掩護清室,為甲即忝,連性命叨犧牲去,清廷無來感謝著咧慘
了矣, 遂顛倒來害死文明仙,有影天地倒翩,豬狗猙狌矣 he!林家隱忍
千刀萬撩,「啞口仔砥(de4)死囝」,姑不而衷放棄兵丁報復,改用「文
鬥」用法律來控告凌王爺違法失職。
凌王爺一批人害性害命,定著 噯賠命, 安呢鋩角才矯 吓返來,世間
才有公理叨著。林家絕對噯反攻,絕對噯就凌王爺這箍奸臣面e,摃甲
尹mimimaumau, 安呢來著,一方面 吓凍來替文明仙報仇,一方面亦 吓凍
平反「叛亂」,恢復林家「忠貞愛國」e 優良事蹟li, 呾林家這聲港
潦落矣,無拚袂煞矣,講起來,这毋是阿罩霧下厝一家人e悲哀爾爾,
宛那是所有全台員人三百年來,上悲哀叨著。
毋閣鋩角 欲矯互伊直, 宛那無赫好勢軟弱li,對手清朝政府,爛敗
離經,飯桶掛車輦(len4),通人嘛知影li,規百年 e官味臭獻又閣「江
山萬里國」,地尺赫闊,咱細腳隻仔e阿罩霧林家,是 欲按怎矯 吓落
來啦,卡加汝嘛衰咧等,一聲嘛 互人筴去配安呢甡。
清朝到同治年間,民散國虛,真正袂堪 e叨著,一四界變做「無政
府」狀況,親象漳泉拚,官員食錢毀類,羅漢腳梟悻……,其中上袂孝孤
拄 e著是司法問題, 欲拍官司行法律,對百姓來講真正食力li。
致使講林家 欲告官府, 宛那 是腊腊hiu,是真硬斗,王爺尻倉敢摸
,叨無咧給天公借膽gr?第壹項,清朝 e「行政及司法不分」,縣令道台
,尹本身著是法官(兼縣省長),汝若 欲告伊,叨簡那北京話「與虎謀皮
」仝款 啊!絕對偃(en)伊袂倒(扳不倒他) , 欲告,有影 欲告八擺e 呢!
第貳項, 也 叨教育無發達, 欲認壹般漢字叨真困難,ta有閣再法律知捌
e空縫啦? 百姓無智識,壹切免講。
第三項,拍官司e所費甚過了傷重,交通來往,食穿……東西, 毋但
是普通人無法度,連有錢人久來舞著嘛摯節袂稠li!第四項,語言問題,
ga話語袂通以上,偆 e著霧霎霎,台員人講台語,官方以京語為準,逗底
是幾个人有材調啦!
眾位鄉親道友,林家已經下消落坑矣,文察戰死,文明冤死,阿叔奠
國落獄佇福州,親象即尼衰韶e家族,咁有法度來告贏大官虎凌定國?
噯知影這位凌王爺伊是英桂總督 e愛將叨是啦,可比這嗎講李登輝咧
做總統,咱黃信介欲告連戰,咁告吓贏是毋?嗯才 e瞬呤,無法度真正無
法度。
林家最後決定拍官司拍到北京皇帝遐,歷史上叫做「京控」(這嗎
叫「上訴最高法院」), 欲利用皇帝來審判凌王爺,林家心肝內有按算,
雖然皇權暗中掩護凌王爺, 毋閣「害人證據充分」到地也 ,無定著皇
帝吓犧牲凌王爺,以解天下民怨,若安呢到地a,林家自然著目的達成矣,
毋但替文明仙報仇,順續亦 吓恢復家族 e「清譽」來平反安呢甡,卡袂互
人安一个「叛變」e惡名li。所以講林家唅心gap命,無論按怎著噯拚
搭底,路頭遠開真贅錢攏無怨歎。
毋閣踮「京控」當中,想 欲告贏e機會,吓使講真尐真尐,尤其是政
治案件, 奚叨閣卡無法度li,这話按怎講?叨政治問題互汝袂假仙 e
li, 欲做甲「政治凡政治,法律凡法律」有影真為難li,譬如講陳文成
教授, 文成仙冤死, 尹老父 欲告警總叨無卡擢 li 免講告到最高
法院無路用, 著算講, 告到蔣總統尹阿媽遐, 宛那無噓亥(hii6haai)
著li,蚊仔釘牛角干干礁無伊法叨著, 嗯才咧講文明仙e 家族頭殼有
一絲仔阿搭,卡毋捌政治 e 烏暗面,唉!準拄好啦!汝食卡醜 e 啦,官
廳 兮無倘互汝筴去配啦! 佐汝卡早睏卡有眠e 啦!
(101) 官紳就北京皇城拍官司「京控」,尤其是規身軀爛糊糊 e
光緒年代,閣卡硬斗歹行,真奧成功,第壹點:「京控」這步 e,號名是
「官司告到皇帝遐」,實在是嘴唇皮肖款待,暪生人目爾爾,做皇帝
e人,「吃喝玩樂」叨咧無時間矣,ta有閒工來cap(睬)茲凡間e雜事
啦?所以講規尾也是秤秤彩彩,烏白卒卒 e 「虛幌一招」爾爾,無法
度怎樣來主持正義li。
嘉慶乾隆時期,京訟卡少,加減猶有辦淡薄仔, 毋閣到尾代王朝光
緒年間,案件增加,社會複雜到地 a,仁力物力攏負荷袂起,案件積累,
結局嘛是發回省政府級重新審核,算講踢來踢去,逐傢加了戇工叨是
啦!就算講皇城有人辦來講, 毋閣中國地尺甚闊,南北三、四千公里,
東西四、五千公里,各地民族風俗複雜,交通無利便科學落伍,免講爛
敗 e清廷無法度,我看連阿啄仔(美國人), 即尼好額進步嘛矯袂落來
li。
第貳點,訟案壹旦ga 逶京城發回省城府城,重新界判以上,省官府
官定著 吓「心生不滿」歪心來處理,以報越級申訴e 齧鼠仔冤, 嗯才
咧講到尾溜仔,亦定著「官官相衛(護)」訟家自然dek暗虧連連,抑若
無者, 吓變做大官小官 吓連帶處分 呢,世間ga赫戇, 欲掠一尾蟲來
qiaau6尻倉?
第三點,清代司法佮行政無分,食錢烏西 e風氣真流行,判官又閣
缺欠知識規大拖,萬不利若官司拍輸,對方絕對 吓含怨來報復, 安呢來
者,叨 吓變做「第貳次冤案」 e可能li,有時仔算算e,恐驚袂啥妥當叨
著,( 毋是家己無理,實在是制度無好,叨「啞口仔砥(de4)死囝」真食
力)。
第四點,壹旦ga長期拍官司以上, 著 吓來連累真贅親戚朋友,
為案暫時來失去生活上 e自由方便,尹嘛著噯趁錢來飼嫫囝 呢,百外年
前又閣衛生無好,恐驚 吓破病帶衰嘛無的確,所以講「石獅嘛驚人告」
拍官司 吓避免著避免,了時了力了精神有影哈甲看現現li,現主時1993
年,有真贅人到中國大陸做生理, 嘛是真驚拍官司,大部分攏看破,了錢
拄好叨是啦!因為壹旦官司潦落,叨禁止離開大陸,關佇大陸linlong踅,
時間久久, 毋知何時 吓煞, 宛那真歹返捯li。精神上鬱卒,恐驚也摯
節袂稠li。
第五點,交通、語言、安全、體能e問題, 宛那 真歹剃頭,北京吊
遠鹿港7500 華里(2500公里),坐一擺船,連中途補給歇睏, 噯半個月
左右,是幾个人「節 吓稠」?另外北京講北京話,柴柴袂肖逗搭啦!另外
,身懷銀兩,安全問題 欲按怎?另外萬不利水土不服、「勞塞」頭殼痛,
有急病 欲按怎?……。
(102) 雖然「京控」,有頂頭講e 赫贅困難, 毋閣咱阿罩霧林家,
真正有志氣,真正咧跋氣魄組兮,「報復心切,平反心切」,無論開外贅
鍼頭,了外贅時間仁力,絕對唅心gap命, 噯給pii2返來, 鋩角噯給矯
返來, 安呢 做人才 吓心適叨著,唉!咱這嗎給想起來,林家啊林家,汝實
在有夠古意 呢!講卡歹聽e,汝實在有夠戇倯呢,有夠ham4古
呢,有影痟甲有偆去 呢,鼻屑大e林家是 欲na去對付大清帝國啦!有影
鴨卵咧硞石車,清廷閣卡下消來講, 毋閣伊江山萬里,頭嘴七八億, 欲
對付汝林家宛那是涼勢也涼勢,無噓亥(hii6haai1)著(沒礙著)啦! 抑
無,清朝咧做假e呢,唉!戇有影戇,政治案件叫是仇殺財情 e 壹般案
件咧!
嗯 才e 瞬呤,阿罩霧林家 e 遺族,決意 欲就北京「京控」,拍官
司告到皇帝遐,逶凌王爺,王縣令這批奸臣大官虎,給摋摋hiisak45, 為
文明仙報仇,順續平反林家叛變大罪,北京離台員真遠,定著噯開大條
e錢,林家 毋驚叨是毋驚, 欲鏘叨鏘搭底,幹!咱坐理端正咧驚啥韶?
文明仙死佇 1870年三月17日,三個月了後,林家決定就京控訴,林
家有一个家臣號做土龍師,不時佇鹿港地咧跋 nua4(來往混日子)兼做
寡細項生理,一下聽著林家有 欲就京控訴呤, 真熱誠來逗三仝,土龍
師淡薄仔 吓曉北京官話, 也叨社會有咧 餾 ,卡有咧出入 安呢, 伊「
自告奮勇」 欲替林家到北京,去討公道矯鋩角,伊朋友贅, 吓使做林家
就京 e 顧問li。
嗯才林家新頭兄林文鳳,文明仙母親林戴氏,文察大後甡生林朝棟,
家臣土龍師、林秋……一行人佇六月尾,就南瑤官燒香跋杯,來決定京
城告訴 e就北空課,林家備辦參牲伍禮,古禮古裝,真正虔心咧姑 zy 2
(請求)媽祖來繫(he3)指示,禮數繁雜叨舞規晡久安呢,仝款台員禮僬僬,
請神問神送神真正幼秀逗搭,也叨林家捌做南瑤宮e爐主,壹心壹意為
媽祖婆li, 嗯才旁觀道友鄉親,隨人看甲目箍僬紅真感心叨是。
這擺求媽祖e結果,決定佇一年了後,赴北京都察院提出告訴,控
告凌王爺(定國),黎兆棠(道台),王縣令……,設計挑工陷害文明仙,公
堂殺仁,造成冤枉 安呢,尹決定一年了後才 欲就京控訴,可能是軍師土
龍師 e 計謀安呢,第壹,現主時,逐傢坐佇風火頭,卡 吓意氣用事,恐驚
食緊long4破碗, 安呢著醜材矣 he,第貳,現主時老奸臣凌王爺、黎道台
、王縣令這班人猶咧執政, 欲就京控告,確實無方便,寧可等一年了後,
尹若撤職搬走,卡袂膏膏纏,卡有贏面 e 機會。第三,著緊走尋北京方
面e資料, 抑無,規陣台員青暝牛(文盲)是 欲na舞有路來啦?譬如講大
清律令,北京地頭地理民俗,上介要緊著是緊訓練簡單 e北京官話, 抑
無,到時連見面叨袂逗搭,是 欲按怎拍官司 呢!
佇土龍師真拍拚來牽教以上,林家決定同治十年七月28日進京控
訴,由家臣林秋率領一班人,先逶鹿港坐船到廈門, 才閣盤火船到天津
就京,这著是歷史上霧峰林家第壹擺進京控訴,後面猶有三擺,這四擺e
「京控」, 吓使講台員四百年來上大條 e官司安呢著是啦!
(103) 呾林家親腹 e 家臣林秋伯仔 ,抱著告狀, 佇 1871 年七
月28日坐著大船離開鹿港,先到廈門,才閣換火輪(輪船)、經寧波、溫
州、山東、按算八月12日到天津港,續落才就北京li。
林秋掣著保鏢三人,含心 gap命,心堅意切,揮別港邊 e林家鄉親,
壹時間千斤萬重e笪頭, la k 佇肩胛頭,一滴一滴e目油,真正摯節袂稠
遂來滴落來,阿秋這遍就北京控訴奸臣,「只准成功,袂使顛誕」身體
噯顧互伊勇,任務噯完成,阿秋一下回想起卡早文明仙e 恩情 ,一景
閣一景,親象走馬燈仝款……唉!頭傢啊 頭傢,汝na 吓赫梟悻啦?人講
「人敖,運命做對頭」想落叨心酸……,船行閣行,忍著青冷冷大海,真
正怨歎閣怨歎……嚎甲鼻水雙杠流,強咧激啞口仔聲li。互身邊 e保
鏢, 宛那看到鼻酸目燒,真正摯節袂稠叨是。
阿秋伯仔才輕聲「 呾 咱這嗎是出外人,身體噯顧互伊勇,收起悲
傷,衝互伊起氣,卡有氣魄e,恁目睭卡注意e,恐驚敵方 吓派爪耙仔給咱
暗殺 呢!」三个隨從,一時清醒過來,目睭瞵(qin3)虎虎,目神一直掠船
頭船尾 sut3, 看有各樣否。 這嗎秋伯仔收起目屑, 心肝內大聲咒
詛,「恁父秋仔這條命忖配汝e 矣 ,為著主公,為著頭傢絕對潦搭底,無
論刀山火窟,總拚甲到……)。
十外工e船頂生活,真正硬斗艱苦li,跋著為主公文明仙e冤枉,閣
卡忝命嘴齒筋嘛 噯咬稠e,叨安呢 海天壹色,一工過一工,八月12日早
起 e時瞬,火輪到天津港。
一下落船呤,天時作冷,拍一下仔尻冷損, 才知影北國中秋已經
到矣,這迣(zua3)船算講亦平平安安, 無拄著風颱大湧, 亦無拄著
歹人東西,身體宛那節 吓稠,隨人ta3(加)一領衫,著緊請一台馬車,暝
日拚逶北京城內去,按算佇暗頭仔 e時刻噯入城內, 抑無,仁地生疏,
恐驚 吓 臹費氣 呢!
天津港離北京城東門,有一百四十華里,尹一行人毋敢怠慢,真正
佇暗頭仔呤著拚到京城,真正是「日來受雨,暝來凍露,有影真給感
心安呢,真給謳咾安呢。
(104) 同治十年,1871年八月13日, 逶台員島彰化縣來 e控告團,
正式向北京皇城都察院提出「京控」案,由京城 e左都御史,親身來接
案,這條案, 逶7500華里外 e海中島送來,北京方面宛那感到真奇卡,
好士松逐家加減嘛吓。
呾 北京皇城,都察院所接 e 案是安呢,(以下官話) {{
[案由:]「福建省台灣府彰化縣,貳品官林文明副將,被凌定國、
黎道台……一行人,於公堂謀害刺殺,林文明冤死,敬請查明,嚴辦凌定
國一行人,並還我林家清白平反冤屈。」[控告人:]苦主林戴氏(文明
仙母親,今年六十八歲)由抱告,林秋提告訴,時間同治十年八月中旬。
[京控呈詞:]
[]洪和簡,林應時……等鄰族鄉人嫌
誣告霸產,查1862～1866年間,文察文明參與
剿逆,得罪鄰族洪和簡、林應時,因田產問題
挾恨,產生誣告,請庭上明察。
[]凌定國(王爺)勒索未成,謀害林文明
,大意是同治八年,凌定國強索洋銀八千圓,未依
,隔年三月十六日持台澎道預廢「文明伏誅,
脅從罔治」前來恐嚇詐財。
[]凌定國違法在縣衙公堂斬死文明,
查縣府公堂,並非戮人之地,文明縱有差錯,係二品
武官,必先奏草訊明,治以應得之罪……(以下略)。
[]黎道台以「謀反」罪名謊報林文明 臹法
事件,架陷林家叛逆大罪(詳細內容省略,前文已詳細。)
[物證兩種:]附上台澎道印示二紙,顯示地方官
謀刺文明之證據……。
}}
呾「京控呈詞」攏入去都察院了後,逐傢著恬恬等官方e 反
應,這个時瞬,光緒皇帝搪咧「內憂外患」,宮庭內權利矯袂平,對外又
閣戰事連肖續失敗, 嗯才 e瞬呤,咱偉大e「光」總統,民族 e 救星,
手干礁et(招)一下,代誌叨給qet lau4捙畚斗矣( 伸个手勢就把本案踢
出去了,根本懶得理)!心內 才咧想『幹!我做皇帝 e人,干礁「吃喝嫖
賭」叨咧無閒矣,ta有奚美國時間去cap1(睬)遐台員島「蠻夷之鄉」e
腳騷(sau6)代誌!出去!出去!
『實在講起來,設「都察院」來辦「京控」原本干礁是「騙食騙
食」瞞生人目爾, 欲na 吓使來認真e啦, 抑無,全國五億人攏來申冤,
我做皇帝e人,十付身體嘛袂赴潦落死安呢,尹俍卡好咧!』
都察院佇九月初,批回本案,退回省城福州審理,而且亦無 欲派欽
差大臣去查訪, 呾這聲代誌歹紡矣,因為庶當時 欲千里迢迢來北京告
訴,著是 欲告福州省城佮台南咱府城e 貪官,這嗎發回省城審理,著等
於「重入虎口」,絕對 吓互省城官城報復,造成二擺傷害li,著算講省
城新官公道來處理, 毋閣「官官相衛」尹官員頂下 吓連帶坐罪li,到時
仝款「難保差錯」來發生顛誕li,唉!林家 啊林家,汝實在真悲哀 呢!
好佳哉,原任e福州總督佮巡撫調走矣,新來 e文煜總督,有卡公正
一絲仔,咱講「世間有人放符仔,亦有人收符仔」原案交彰化典史許其
芬調查,許典史庶當時文明仙被害時,伊拄好做細粒官,伊有卡老實,無
噯掩護奸臣凌王爺,伊調查e 結果,證明凌爺犯法,陷害文明仙,而且證
明三月16日「聚眾圍城」, 毋是土匪,是單純 e 南瑤宮香客爾爾。
代誌e發展,對霧峰林家漸漸有利叨著。
無想著,統管台員地 e新頭傢周懋奇知府,又閣心肝歪一爿,拍算
是提著凌王爺e「俑仔標(鈔票」」e款, 遂一路來倚凌這爿,致使講許典史
辛苦所調查e資料,壹直冰le,無 欲現出, 呾這聲林家又閣梟悻矣,可能
閣有代誌矣 , 搪咧這个不幸 e坎站,另外一層災難又閣綴來矣,真正是
「厝頂漏,僅干礁連暝風颱雨」林家「雪上加霜」真正衰甲無聲無勢,
是逗底啥代誌。
噹時也(原來)是黎道台換夏道台(最高行政長官),凌王爺庶當時是
夏道台提拔 e,這聲夏道台做「台員省長」,定著袂來加害凌王爺, 抑無
麼提拔者老夏嘛是有連帶罪li,這聲林家大碗矣, 欲知後果按怎,請看下
腳說明。
(105) 話頭分兩爿來矯,文明佇公堂梟悻了後,到目前許典史調查
林家實案,已經兩年搭搭(1870.3～1872.2),這兩年e中間,林家壹直上
訴要求平反, 毋閣 佇凌王爺這爿,奸臣罔奸臣, 宛那袂來戇倯dii4(裝
)恬恬,伊宛那 吓想真贅辦法來預防林家 e反攻,所有e法度內底,上簡
單e,著是去拜訪「昔日長官老營長」,燒酒綰兩罐,飲一下卡爽 咧,
定著話頭 吓逗搭li。
續落開始搬戲 矣,「一把鼻涕一把眼屑只有老長官才有辦法」這
个時瞬,老長官一下鋩角駛了有夠熱putput,定著 吓搭胸坎咒重詛「唉
!稍寡代誌爾,請汝免煩惱,絕對憑汝甲到啦! 抑無,朋友咧做假 e 是
m?幹!來一杯,飲互伊醉,这透海 e……」。
所以講夏道台佇文明仙命案了後兩年來出現,这宛那真平常啦, 毋
是逗空兮啦,恁林家 吓曉拚,咁講阮做官 e 著下消是毋?這嗎凌王爺拄
著夏道台了後,案件又閣恬恬 也。
1872年貳月,夏道台 正式總理台員地政務,無外久e中間,叨簡那吸
鐵仝款,凌王爺著來拜訪矣,來開講拆字數,「老長官」真久無見面矣,
呾著講一下仔卡有 咧。
『頭傢啊, 呾汝這嗎當管台員地矣,喚起喚落真揚 呢,台員地e奇
卡特殊, 呾 嘛講一寡心適來逗鼻芳咧。』
『哈哈哈哈!若台員 e代誌,汝顛倒叨比我卡內行e 呢,幹,有閒卡
踥來坐坐e 啦,中原鬧長毛 (太平天國) 十外年, 局勢袂定著國
家元氣大損,佳哉台員地猶袂醜 , 逆叛林文明已經 正法,台員地大概
局面好勢 e 款ni!』
『普通啦,傍汝e福氣來相疼痛,相促助,有影勞力he,著啦,林家
上訴京城e代誌汝知否?代誌舞甲按怎款?哈哈,聽e講 欲來治我
凌某人e罪, 欲來取我e性命 呢!尹娘卡好le!我凌某人為國為民除
敗類,恁父吃凊糜咧等le!』『哈哈哈!有我致 e,佐汝免驚啦,阿罩霧林
家,算幾分 e螺絲a?尹想 欲給汝偃(en)倒, ga 赫簡單,無赫涼勢啦,免
三二e手叨給摃甲倒倒倒, 互伊 吓藏鬚e是毋?』
二人幵講一睏仔,續落夏道台分析官廳 e步數互凌王爺聽,王爺e
心情 才有卡定著一絲仔,唉!潦落這窟叨艱苦li。『凌爺啊,汝佐汝放一
百粒心,林文明e代誌,根本是政治案件, 毋是壹般e法律案件, 欲告有
影 欲告八擺e 呢!(告个屁用)告到北京宛那仝款無效啦,尹茲庄腳人,
無一點智識,軍國大事尹知一箍竽仔蕃薯是毋?咱大清國,這十外年內,
受著太平天國e毀類,上驚地方勢力 e坐大,尹若反叛,政權著 吓不安,
親象林文明勢力即尼大尾,兵強人富,清廷定著pipi搐咧等,這款
人這嗎無給款起來,咁講著等伊叛變才閣派兵, 奚著甚慢a he!
『今仔日汝凌大仁為國除害,清廷感激叨咧袂離矣, ta吓閣來掠汝
治罪是毋?清國爛敗罔爛敗,亦絕對袂掠汝來「恩將仇報」治罪li,人
見怪叨怪台員人下消無路用爾,免咧怨嘆清朝佮汝我官員啊!』
夏道台續落閣再講『汝凌定國絕對免驚,官廳若敢治汝 e罪,汝給
弓落去,到時瞬英桂大將軍嘛有罪,若挽瓜就滕牽落去,泛勢皇
帝嘛有罪,親象阮這款細粒官猶無夠看 呢!所以講林家官司必敗,汝凌
某絕對安啦!若 欲治汝 e 罪, 庶當時叨袂去害文明矣,这真簡單咧!
『總講一句,清朝ga欲統治台員以上,這齣慪戲叨閃袂離he!咱
干礁是咧搬戲爾爾, 有影身不由己姑不而衷 li,林文明人受難亦是無
法度li,汝講伊可憐,拜託li,咁講戴潮春,洪欉互人害甲絕種,叨無可
憐是毋?』
凌定國這箍老奸臣, 一下聽煞嘛,哈哈哈哈精神元氣僬到,反身
才問夏道台講『汝講甲 臹有理,講到安呢 siasia叫嘴角全波,毋閣現
主時,痟狗母仔咧告官廳(文明母親京控),強 欲掠我來剝皮,这 欲按怎
矯才 吓好勢 呢?咁講 安呢 目睭金金人傷重,我安呢蹌起跳落互人
逼來sak3(推)去,真正可憐 呢!
『哈哈!早叨僎(cuan3)便便咧等, ga赫下消,林家京控案已經半
年矣,官廳咁攏無法度是毋?早叨好勢矣,這條法度保證汝聽落到地, 吓謳
咾甲三暝三日叨siau4想li』『即尼好空e代誌,呾嗯著緊講
一下仔來鼻芳le,耶 麼我官司若拍輸,強 欲互人掠去摋頭割肉塊仔
呢。』眾位咱茲鄉親道友, 毋知夏道台這个「台員總統」有啥乜撇步
欲婁出來,請看下腳 e 說明,唉!老奸臣真正抾規班 呢!
(106) 噹時也(原來)夏道台,為著 欲對付林家京控官司,特別派人
去查林文明家族 e空空縫縫, 逶尹祖公十八代,查互伊清楚,看有啥乜誕
顛,尤其是害人害命 e糾紛,就算講「生一个影, bu4一个囝」,稍寡
一絲仔空縫,我夏道台叨有法度來弄甲天大地大, ga林家捙拚一斗仔。
嗯 才e瞬呤,夏道台尋亦尋,翩亦翩,真正好狗字運,尋著一條貳十
年e 前舊案,這條舊案,仁物案件,袂清亦袂明,北京話講「到處牽強附
吓張冠李戴」也 叨代誌離離糊糊,竹篙逗菜刀烏白變,而且原稿公文散
失破爛,本來無合訴訟, 毋閣咱夏道台,奸臣做了有起,掠著空縫, pe6
性命添油加味素,真正互伊舞甲天大地大binbiang叫。
這條案叫做「黃連蒲案」,夏道台單方面e 說辭是安呢:「咸豐三
年十月3日,霧峰林家佮大里杙和簡盛仔起冤家,兩爿相拍心狂火焯,互
相抾怨,真拄好,彰化柳樹湳庄有一位黃連蒲者,和簡盛e 一袋衣物囥
佇尹兜,去互林家ciau著(搜到),誤會衝突之間, 雙方夯刀肖摋, 林家
兵丁真贅「逶黃家連殺十貳人,婦孺老幼盡死,甚過無仁道甚殘忍安呢
叨著。」
呾這个案離現主時1874年已經貳十年矣,夏道台想法度秤彩給安
一个罪名,仝款來控告阿罩霧林家,變做林家控告凌定國,仝款黃家宛那
控告林家,雙方互控,仝拍官司愈纏愈離愈亂愈讚安呢,人講『混水摸魚
』加減倘卯一塊仔, 來壓制林家僥擺 e 氣勢安呢。
呾 夏道台一下尋著空縫呤,叨緊起訴林家,倘給凌王爺減少壓力
li,唉!實在講起來,黃連蒲案,離離落落,竹篙逗菜刀,『破錠百出』毋但時
間已經吊久,仁物、時瞬……攏有錯誤顛誕, 嗯才對手林家一下聽著這
个消息呤,有影氣甲規仙人僬戇去,大喚「世間根本無這个代誌,根本是
欲安一个窟仔叫我跳爾。」
嗯才 e 瞬呤1875年4月間,黃連蒲向福州省衙提出控告, 欲告林
文明佮林朝棟,冤殺尹祖孫十貳條人命 e代誌,唉!这定著是官方安排e
代誌,因為該案發生 佇咸豐初年,離現主時已經貳十捅年,缺欠證據證
仁無打緊,著準講尹兩人有罪來講, 毋閣文明「伏誅」,人死債爛無地
追究矣,朝棟(文察後甡),彼時才三歲爾,閣卡無責任li,所以這款官司
,叨七e逗八e,烏白sa毋傾(羅織) ,真正是歹心烏腸肚,烏魯木齊唉!實
在有影,奸臣 啊奸臣, 欲告是 欲告八擺 e 是毋?這層官司,有影真正
奇卡,叨想袂曉li。
光緒元年,1875年七月15日,福州省城, 正式開庭審判黃案,主文是
控告林家佇咸豐三年(1853),無理斬殺黃家祖孫十貳條人命「罪惡滔
天,無法度饒赦」安呢, 毋閣被告林朝棟身在台員,無出庭叨著,由家臣
代理,另外文明仙亦已經做鬼矣,定著無法度來答辯 li,開庭 e 時瞬,
「黃氏十貳命案」,講到有條有段坎天坎地,講到一字捌咧,而且有證
仁盧貴佮蔡興來做證。
毋 閣被告林家方面宛那提出真贅反證,上主要是資料文獻已經缺
欠,秤彩掠二个來做偽證,「人命關天」袂使 赫尼大主大意給人安罪
名li,林家順續指出盧貴蔡興絕對是假bau2證仁,……氣甲有影叨袂講
了了。
唉!眾位咱茲鄉親道友,這棚戲互恁看甲霧霎霎花洛洛 ,本臹是
林家就北京來「京控」,按怎 吓顛倒官府來控告林家, 呾是咧食著蕃
雞卵是毋?有影ham4甲有偆去,林家這聲去踏著牛屎,有影叨 臹歹紡矣
he,實在講起來,文明仙被殺公堂,既然ga是政治案件以上,林家著 噯
「四兩ng 仔稍除e」,家己準節 e, 抑無,鴨卵硞石車,定著 毋是拚路
li,這擺e「京控」,看來硬斗食力,恐驚無倘suikui 13 ,真正矯袂落來,
臹害 呢!
著安呢,1875年,福州省城仝時間審判著兩件案件,一件是林家 欲告
凌王爺(定國)殺害文明仙,另外一件是官府方面,駛黃連蒲來告林家 e
「十貳命案」二案拖拖沙沙攏無啥乜進展,拍算官府派是咧「嘴唇皮
相款待nia」,用奚麻薯步e,延延遷遷欲準過去叨著,(虛應故事混過去)。
假使「凌王爺案」逼了甚 an2時,官府仝款逶「十貳命案」提高
案情,假使凌案卡恬時,官府 e「十貳命案」宛那相對落軟,想來咱官
廳方面是 欲用「十貳命案」來牽制凌案,官府 e目的是 欲逼林家放棄
「京控」,撤回京控, 安呢官府方面宛那 吓來補償尹e損失,只是 呢,表
面上歹勢講出來爾爾。
1875年秋天,福州e消息,一下傳返來彰化南瑤宮呤茲忠厚e庄民
善信,逐傢攏 臹憤概安呢。阿罩霧林家閣卡是「雞母跳破卵」,頭殼擎
煙僬夯狂li,唉!文明仙冤死,告到京城官廳無來打節叨慘了矣,遂顛倒退
回省城審理,如今又閣bu4一條外案來肖惼(欺),有影氣落叨半條命安呢。
事實來講,林家京控 e目的,是 欲掠凌王爺來對質,干礁 欲互伊認
罪判刑著好爾爾,要求無贅, 呾這嗎官廳舞這齣慪戲 , 林家佮香客
鄉親,這聲逼著矣,港無潦袂煞, 嗯才年尾 e時瞬,有一陣激烈e 林家子
弟,主張「文鬥無效,改用武鬥」,決心 欲派決死隊,執行暗殺官員來報
仇,來矯鋩角, 互頂頭知影蕃薯仔厲害。眾位,阿罩霧子弟 欲行武鬥來
暗殺清官,咁 吓好勢?請看下腳分析。