9
第十二章 陳皮蘇黨, 雙爿唅心gap命咧矯鋩角
(107) 林家「京控」失利,真正人咧所說,「牛牽到北京 宛那牛」, 嗯才茲家丁家臣,真正憤慨,想欲以暗殺e手段,來對付清官, 毋 閣
林戴氏(文明母親)一下知影了後,趕緊下令禁止,唉!这著是台員人卡軟路 e關係,欲若韓國仔,以色列仔,絕對早叨拚到底,鋩角若駛了無工夫,叨現鏘驚啥韶。
台員人落軟,講卡好聽e,是「仁道寬厚」講卡qet叨是無志氣無路用爾, 嗯才這三百年來袂出脫,真正互人看破腳手叨無拗蠻li,林家摋平平台員人洪欉家族,斬頭破肚真正青狠殘忍, 毋閣佇外族面頭前,叨乖簡那「術仔」咧,對清朝百依百順, 毋敢假痟li。
這款「勇於內鬥,怯於外戰」,有影臹袂夆×e,欲外志氣,欲志氣八擺 e呢,朝鮮仔若講日本話,叨吓夆搧嘴頰(pue4),台員人倒翩,無噯講台員話,逐傢肖爭欲做「三腳仔」猶 互人嫌發音無標準,「割肉互人食,人猶嫌臭臊」这叨是民族性e問題,真下消。
1872～1875,林家「京控」失利了後, 宛那無死心,尹相信「司法」e力量,絕對循法律佮正義,來矯鋩角,這句話,這嗎1993林洋港我看聽落上爽,唉!實在有影。
阿罩霧林家佇頭一擺「京控」官司,遙遙無期倘結案以上,經過十外工e家族會議,絕對欲做「第貳擺e京控」,欲潦著潦搭底,鏘一下仔
卡嫷喟 e,一遍袂教乖,二遍看吓乖否?林家這款「信守國法」e好國民,真正互人想袂到,尹依原是戴潮春洪欉「殺仁如麻」e「勇」將咧。
1876 (光緒貳年)正月20日,林家又閣自京城「都察院」做第貳擺e「京控」,仝款是咧炒冷飯,包括文明仙互凌王爺害死代誌,申冤報仇
安呢甡,給看林家有夠戇面,一擺e經驗抑無夠是毋?伊宛那欲『壹陷再陷,壹錯再錯』,連我這个事後夯筆 e作者,叨真正貧惰來寫咧。
想落叨lan4(懶),世間咁有即尼阿西,伊家己下消無打緊,吓逶全台員三百萬人e面仔赧了了,这才是食力li,我想光緒仝款吓喃(nau3私下自
言自語)『我做皇帝 e人「吃喝嫖賭」無閒cici,卡有閒工來管恁新疆蒙古台員等等蠻夷之 e 邦閒事……』頂回袂解決,這回定著嘛仝款無
卡擢(zua4)啦。
林家這擺 e「第貳擺京控」是派家臣李祥到北京去控告,這位李祥著是文明仙,公堂被殺現場 e四个保鏢之壹,凌王爺挑工留活口, 互
伊拚返去阿罩霧,倘引兵丁來報復攻城來中連環計著是啦!欲互清朝知影,真正「仁證物證」攏僬li。
林家毋驚官廳用「黃連蒲」案,給咬稠e,毋閣文明仙冤死e案壹定噯查互伊明白,凌王爺壹定噯到廷對質說明,規還林家e清白安呢,咱跋
白e,林戴氏卡毋捌政治,汝欲叫仈人來對質猶好勢, 毋 閣欲叫凌王爺來是絕對無法度e代誌,因為凌王爺受頂司英桂總督e暗令,若挽瓜就藤拇落去,連英桂嘛噯連帶坐罪li,这ta有可能啦?用腳頭u(膝蓋) 想嘛知!
第貳擺e京控, 佇清廷官方起了微妙e變化,因為台員林案,拖四年攏袂解決,國內國外攏真歹看,有損「京控」司法威嚴,林家ga有第貳
擺京控以上,清廷宛那有意早早了結,这毋是清廷認輸落軟,實在大人無噯佮囡仔舞甚久,無趣味啦,這款代誌對林家是大悲劇, 毋閣對江山
萬里,頭嘴五億 e 大帝國來講是「芝麻小事」爾爾,死一个文明仙無到佗位啦,著算死一百个文明嘛無噓亥(hiihaai 61,礙著)li,所以清廷方面著想一个辦法, 互雙爿攏有樓梯倘落來,逐傢攏有面子,到時瞬林家若「敬酒毋食食罰酒」再閣嚴辦 宛那袂慢li!
(108) 毋閣佇林家方面,恐驚也無赫尼簡單叨欲放伊煞,尹認定林家「功在滿清,規族忠烈」按怎吓「恩將仇報」?逗底清廷方面欲按
怎矯, 互雙爿好落樓梯?噹時仔清朝方面宛那掠著二項代誌,清廷欲處分(文明仙彼時 e)楊在元總兵佮凌王爺二人,清廷願意讓步,用間接e
方式認毋著,落軟來討好林家,以求京控早日了結安呢。所有e長短,这仝款是福州方面,閩官壹手來擔dak,京城方面才無欲來臭輦伊。
頭一條著是欲處分楊在元總兵,伊佇台南府城咧做兵仔頭 e時瞬,有一擺去犯著kia,藉兵權誤殺著百姓,百姓毋願,投逶頂司去,總督方面
認定伊「有虧職所」,所以給撤消職務,叫伊去做壹般e軍事教練爾爾,清廷挽除楊在元e兵權,楊氏庶當時害文明仙有著, 嗯才e瞬呤辦大官。
第貳條,著是欲來主動處分凌王爺,亦著是「南北二路僬出名」e大官虎凌定國,欲處分凌王爺,这著表示清朝有誠意,欲來處理林家「
京控」案,是挑工欲做互林家來看 爾,搭搭叨有影li,伊用間接e 方式,用踅圓箍e步數,來表示清朝落軟,林家應該看吓出來才對。
毋閣真拍損,林家壹直認定講清朝落軟,是官司拍贏e前兆,袂曉緊落樓梯,叨庄腳人, 毋 捌政治意義,干礁壹心欲報仇, 遂互機會溜過去矣,清朝一下無法度到地也,又閣漸漸來踏硬矣。
凌王爺逗底犯啥乜罪?吓夆掠著空縫來給cak1,大官虎吓落坑宛那叨無簡單li,代誌是安呢:1875年凌王爺負責起造「台南三鯤鯓億
載金城」時,貪污龍銀一萬五千兩, 互頂司摠(zang)著,清廷有意法辦,來給撤職拏查,拄好搪著林家e京控,清廷頂司有意藉這層代誌「法辦
凌定國」來和解li。
也叨同治尾年時間,發生「牡丹社事件」,有漂流e琉球漁民,佇屏東(阿緱)牡丹社所在, 互排灣族給摋死,引起日本方面派兵來「興
師問罪」,要求「懲凶賠款」,彼時清廷國勢荏弱下消,代誌矯袂好勢,堂堂 e天朝大國,吓去互日本仔筴去配,清廷心肝頭砧, 嗯才 特別撥十
貳萬兩銀, 佇台南三鯤鯓附近,建造洋式砲台,強邊防來抵抗異族侵略。
凌定國王爺做捍(hw3)頭,副將周振邦協助,工事佇 1874年九月初動工, 毋閣無外久呤,有人告去丁日昌巡撫遐,講凌王爺「侵吞工料銀
金巨萬情事」,徛講凌王爺食錢歪哥叨著啦,丁日昌恬恬也真祕密,來交待周知府,夏道台孫壽銘,一行人暗中到安平港來調查,噹時也(原來),凌王爺經手十貳萬九千兩龍銀當中,「侵佔工料,浮報人事」,吞銀大約一萬五千兩li,官府大想氣, 嗯才 佇光緒貳年1876年初,上奏貪污情事。
官府噯追回食錢 e銀兩,而且撤職嚴辦li。這層代誌,自然是欲配合「林家京控」,一方面互林家有面子,一方面官府宛那有法度落樓梯,欲用最大e誠意來化解官紳衝突,唉!「政治事件」爾,無法度叨無法度li, 毋知林家吓凍來接受清廷方面e笑意否?請看下腳說明。」
(109) 寫到這位,若講著「億載金城」我著想起九年前 1984 彼年秋天,旅遊台南 e回想,彼年逶安平堡包一台計程車,往回億載金城,
這位滿口山東腔老芋仔司機,載到位了後, 遂放粉鳥,回程我抱著大查某囝,沿路(全部沙埔地)真食力行返來,佳哉拄著一个善心仁士坐伊e 車返安平,差不多四公里 e款, 呾這嗎攏砌大樓厝矣。
佇茲我噯說明,凌王爺確實是一个大歹人大惡棍 安呢甡,伊普通時仔,摋人簡那咧摋雞le,叫伊做工程,又閣貪污12 % e工程款,一萬五千兩銀,彼時瞬一工工錢卡斂半兩,照現主時 1993年,大約有三萬工日 e工錢,大約六千～七千萬台幣,可見中國官家己愛食錢, 互人看袂到位,宛那家己心肝內噯檢討檢討才好勢li。
1876 年五月18日,福州省城總督有派人來佮霧峰林家摯接,有欲講和e意思,省城e代表開嘴講『呾京控e代誌,舞甲官方民方攏真艱苦
,我知影恁阿罩霧林家,壹心忠誠皇清,文察慘死為國犧牲,呾文明仙又閣發生意外,想落真正心酸li,六年前文明仙慘死e代誌,定著楊在元總兵佮凌定國委員,是有一寡責任, 毋 閣 呢!楊在元已經解除職務,凌定國又閣犯貪錢、食料大罪, 搪咧走路安呢,凌定國ga已經互官方處分以上, 呾這口烏氣宛那討返來囉,鋩角駛了有到地也,映望恁林家吓凍手se夯卡懸e,勿(mai4)閣繼續追查落, 也叨手巾搵水雙頭霑(dam濕),……望恁吓凍來諒解……。』
清廷官廳這方面,是真正有誠意欲來和解,毋閣林家方面叨真正為難li,因為林家所要求e二點目標,一絲叨無完成,開赫贅錢,了赫贅時間,凌定國亦無來嚴辦,林家「叛變」e罪名亦無得著洗清, 呾這條官司,吓使講完全拍損去,烏有去矣。叨無卡擢(zua4)li。
嗯才清廷有意落軟來和解e消息,傳返來彰化阿罩霧下厝宮保第e時瞬,林家e捍(hw3)頭林戴氏(林老太太),真正想氣「呾肖告叨猶未有結果, 猶未對質,袂辯論,無宣判……逐項攏放散散, 安呢著欲結案是毋 ?凌王爺佇台南億載金城食錢貪料, 奚佮咱文明冤死是二回事矣,这魚凡魚,蝦凡蝦, 毋倘水龜來濫田螺呢!「人命關天」,奸臣想欲準過這關,这真正惡毒,官廳無來主持正義叨咧慘了矣, 卡有閣來硬逼咱茲善良人潦落艱苦窟li,……唉!清朝官廳e 實在……。」
林戴氏壹心欲報仇,这是做人基本e原則,毋閣庄腳人, 毋捌政治e道理,基本上「文明仙冤死案」这是政治案件, 毋是法律案件,政治案
件叨是「仁治e」, 毋是「法治 e」,現主時清廷稍可讓步,这有伊e苦衷, 毋閣林家遂誤認定是官司勝利e前兆,唉!戇到這形e,實在叨有影
。
叨安呢京控案本來吓和平收幕 e和解機會, 遂自那又閣消失矣,林家ga無欲和解以上,這聲官廳兮,只好提出硬迫e手段來對付,橫直逐
家亦無噯顧面皮叨著,欲鏘逐家著來鏘一下仔卡有 e,这北京話叫做「敬酒不吃,吃罰酒」,總講一句,林家命案,對林家來講是天大地大, 毋閣佇北京來看,干礁是邊疆蠻族e「齧鼠仔冤」爾,無咧給汝信斗叨著。
嗯才e瞬呤,阿罩霧林家,簡那食著符仔路仝款!咧起痟狗目仔li,壹直lui2壹直拚,無論前途按怎,欲閣來做第三回 e「京控」,這擺清廷
方面真正揙面矣,林家衰簡那「gen6」le,一个面攝攝攝(liap3),我吓使建議林家來領一面「最佳參加勇氣獎」!
(110) 1877年十月初貳 ,林戴氏派家臣仔馬生 ,仝款就北京都察院,做第三擺e「京控」告訴, 毋閣官廳方面真正袂爽,嫌尹真正告甲有
續(sua3) e,有影痟咧痟袂滇le,這棚戲搬到茲呤, 呾二頭慪韶步盡展,實在叨赧世赧眾li。
北京皇城一下看著林家,又閣就都察院京控,心肝頭實在臹qet臹「不耐煩」叨著。人咧講「好話三遍,連狗嘛嫌」何況是官司相告,專歹話了了,有影閣卡厭儃(ia4sen6),尤其是這款政治案件,閣有人王爺尻倉敢摸,有影給天公借膽li,皇帝閣卡看袂起邊疆蠻族台員人,呾這嗎清廷有意落軟,林家毋臭輦伊,這聲清廷見羞返慪韶面,林家卡加汝著皮繃(bii6)卡 an2(緊)e!
毋 閣都察院是一个公開e場所,專門是維持正義e最後防線,有人來控告,「生理」就門矣, 宛那激笑笑也, 毋敢甚超過叨著,拄好佇這个時
瞬正義e力量開始夯浮矣,伊著是「輿論界-申報」對林家冤案e強力支持佮同情,台員人就北京「京控三擺」,这毋但驚倒全中國爾,連全
世界 嘛轟動li(彼時,馬偕來台北傳教已經第五年矣),中國有一份真出名e報紙叫「申報」,看著京控三擺,真正感心,可能世間有天大地大枉
屈 e 款呢!
一下斟酌調查,才知影林家有受真大e 冤情,同時也「不齒」凌王爺 e青狠酷行, 嗯才跋氣魄組e,寫文大聲支持林戴氏(林家),林家大爽
,態度閣卡強硬li,「想講」天下 e輿論攏支持我呢,拍拚查落去,絕對吓逶凌王爺老奸臣給拍甲青尺青尺,順續洗刷「叛變」惡名,恢復家族名聲li,唉!想甲頭殼pong3pong3踅,愈想愈有影li。
林家第三擺e京控,最主要e要目的,著是欲提押凌王爺就法庭來審問佮對質,另外一點著是「給皇帝講,省城辦案秤彩,拖拖沙沙,影響苦主 e權利安呢。」
講實e,京控送回省城審理,頭一項著是噯傳凌王爺來審問, 毋閣「官官相衛」到地也,省城 e大官虎壹直咧駛彼麻薯步e,拖拖爛爛,壹直
互凌王爺「消遙法外」,無意向欲給拘提入城受審叨著,三擺京控,前後拖五、六年矣,伊安呢茲匿遐藏,壹直「避不見面」省城e寵盛(tingsing 16,縱容)有影是臹袂孝孤e,吓礙著大清帝國 e名聲呢!
嗯才e瞬呤,這聲清朝福州省城, 自那姑不而衷,硬押凌王爺來公堂審問,順續佮林家對質一下,這款代誌,親象這嗎(1993年)翁大銘咧
告張××le,阿×仔一四界辿(ansu), liame美國liame歐洲,汝無法度干礁叨無法度li。
1878 年八月初九,福州省城開堂審案,提凌王爺就堂詢問---這擺凌王爺第壹擺升堂,離1871年首次京控,差不多七年赫久,這七年e當中,凌王爺毋但是消遙法外爾,顛倒閣有大官倘卯,做台南億載金城e總負責仁,可見清廷欲掩勘包庇逗底,汝宛那無伊法呢!
凌王爺佇三年前,1875年時,興建億載金城時,食錢貪污互人摠(zang)著,貪污一萬五千兩(合現主時6000～7000萬新台幣),「通輯」
在案,叫伊完全噯賠錢吐吐出來。)
1877年夏,官廳欲掠凌王爺來審問e時瞬,凌王爺假影欲還貪污款,辿返去廣東血跡地(故鄉)傾(king3,準備)錢安呢,匿欲規年赫久,尾溜
也代誌爆(biak3),無料理袂煞, 嗯才 佇 1878年辣天(夏天),姑不而衷以「待罪之身」返來台員,無外久,又閣掠到福州省城,正式來應付林
家官司,做審問佮對質 e 空課。
若講著凌王爺,就福州法庭審問 e代誌, 佇茲我免講甚贅,橫直是政治案件爾,官官相衛無卡擢啦,凌王爺註佐安啦,汝絕對無可能坐罪li, 抑若無者,頂司(幕後命令者)英桂將軍,仝款噯坐罪,挽
瓜就藤查落去,連同治皇帝嘛有責任li, 嗯才講這方面,林家罔吠罔吠爾,無啥乜新齣頭啦!
毋 閣,凌王爺雖然是無罪來講,頂司這陣皇族高官, 宛那袂食袂睏e, 也叨責任追求落去,皇族嗯著噯來擔罪,面子吓真歹看,因為1880年
代,世界文明已經僬發達好勢,著算講國內e「申報」壓吓稠來講, 毋閣海外e傳播媒體,是欲na來打節?到時瞬歐美e報紙一下刊出來,講官
廳計殺功臣, 安呢是欲按怎孝孤拄叨好?眾位看倌,清朝最高皇族,按怎來化解危機?請看下腳分說。
(111) 哈哈!這點恁絕對毋免煩惱, 抑無,我老奸臣咁咧做假 e是毋?清室最高當局, 佇林家第貳擺京控,雖然官方落軟,欲處分凌王爺佮
楊總兵,來換取林家和解,毋閣林家拒絕,清室滿面全豆花到地也,自那心肝掠坦橫,忖配汝e矣,殘殘脆脆互伊做二塊,這聲性地夯浮,欲想法度來押林家落地,逼尹投降li!
辦法按怎來矯,噹時也(原來),貳次京控失敗了後,官廳這爿面趕緊挑工弄黃連蒲佮林應時,來到都察院,仝款「京控」反身控告霧峰林
家「殺仁霸田」e 開天大罪,呾這聲費氣矣,林戴氏「京控」控告凌王爺黎道台,毋閣黃連蒲林應時宛那「京控」控告林家凌治善良,二爿「京控」對「京控」,唉!代誌舞到茲來矣,有影臹歹失歹德,有影臹袂孝孤咧叨著!
佇這个時瞬,大約1878～1879年間,清朝官廳 兮, 宛那有互林家最後 e機會,逼伊退出京控訴訟安呢,這條辦法,老K號作「軟硬兼施」,台員話講「亦著糜亦著箠(ce2,打人竹器)」, na軟索咧牽豬le, 互汝袂假痟咧,先試看覓才講。
福州省城方面,無惜林家猶咧拍官司, 自那真好禮真細膩來對待
阿罩霧林家,先是專工表揚林文察為國犧生 e英雄事蹟,欲給起紀念館,又閣欲彌補林家e軍費損失,又閣來「重陽敬老」,用心計較來好禮
林戴氏,叨精差無給文明仙繫(he3)失禮爾爾。
毋 閣林家方面無法度來接受尹e假好衰,代誌嗯才自那歹紡矣,这是「暴風雨e前兆」,林家壹旦ga無欲飲敬酒來講,這聲官廳兮,逼矣,有影無鏘袂煞,無舞袂直,林家喪失了最後和解e機會,真正是變無輦矣,唉!後人看到茲,逐傢嘛哀聲歎怨,這款代誌,可比陳文成老父欲告汪敬熙,欲告,欲告八擺 e 呢!
1878 年初,官方挑工弄黃蓮蒲林應時,來「京控」林家時,台員林家一絲叨毋知影li,唉!彼時無中國時報,亦無三台電視,真正毋知叨毋
知,壹直到十月秋天到矣,官廳兮,忽然間發文來彰化阿罩霧林家時,林戴氏才真正著驚,怨歎講「天地ta吓顛倒翩啦!」
『我去告凌王爺壹直無結果, 遂 顛倒官廳弄人來「京控」我林家,有影「人敖毋值運命做對頭」,天公伯仔按怎欲來創治咱啦……』
林戴氏有影傷心甲袂講了了叨是。呾這聲代誌歹紡, 雙方對做「京控」,林戴氏姑不衷, 嗯才 佇 1879 年光緒五年三月間, 逶鹿港坐船
來福州省城,按算欲告仈人,亦同時欲互仈人來告,唉!有影臹ham3。
(112) 阿罩霧林戴氏, 佇 1879 年大約三月初時瞬,來到福州省衙拍官司,互相控告e「京控」,現主時攏退返來福州審理,呾這嗎林家控告凌定國 e官司,由主告「林戴氏」親身『御甲親征』,場面定著是鬧熱滾滾安呢甡,一个七十外歲 e 阿婆仔,依原為囝兒冤死咧走蹌跳踏,有影看落鼻頭吓酸li, 也 叨帝國政治 e 爛敗, 宛那舞甲阿婆來矯咧,實在真悲哀啦。
三月中旬,福州省城,開始審理京控發回案「林戴氏控告凌定國、黎道台案」主告林戴氏親身到廷,何璟總督猶未來進前,林戴氏壹直咧
回想這十年 e情形,囝兒被冤殺,告官廳告七、八年,拖拖沙沙延延遷遷,……一幕又閣一幕,親象走馬燈咧踅咧遨仝款,林戴氏目箍紅紅,愈
想愈毋甘,為著國家,二个後甡遂來了去,想落叨凝想落心肺叨爆(biak5)。
呾公堂開始審判矣,何璟總督升堂堂高在上,原告林戴氏佮被告凌王爺,分別徛佇公堂雙爿,这是1879年三月尾e代誌,吊遠文明仙 1870
年「被害公堂」,拄好九年矣,世事變化真緊,燃眉雙方攏加臹臭老叨著,逐家面皮攝攝攝(liap3),遼甲吓夾戶蠅仔, 猶老歹命搪咧矯鋩角,捙拚透底li。
這嗎判官何璟總督問凌王爺:『汝身為天朝大臣,按怎來陷害林文明將軍, 互伊慘死公堂,是何道理?』『報告總督大仁,諒小民詳細說
來,九冬前,台員彰化林文明副將,官拜貳品,身受天朝恩澤,榮華富貴。照道理講,應該叨來愛護百姓,忠君謀國才著, 毋閣伊做人拗蠻,身懷惡毒,歹心烏腸肚,普通時仔, 凌治百姓霸人田業,佔妻女,無惡不作,又閣截(za3)人水頭,私設銃櫃(凋堡),發展林家兵團,欲佮政府來捙拚對抗。
『百姓艱苦坐卦,「畏其惡霸淫威,敢想而不敢言」,老百姓活佇刀山火窟真正梟悻li,落尾也又閣兼佔彰化媽南瑤宮 e爐主,掠著宗教
熱忱,利用北港進香機會,欲「聚眾圍城叛變」哉互官廳看破腳手,三月17日佇縣衙公堂時,細故冤家, ga應時伯仔(原告)臨時起衝突,雙方扭拍e中間,失手互兵刀殺傷,流血甚贅遂來過往,外口百姓一聽著文明『伏誅』呤,逐傢嘴笑目笑,慶幸後回仔,免閣互惡霸來凌治呢!……」
凌王爺 猶未講煞呤,林戴氏叨大喚一聲,有影氣甲無力去,失聲辯解『凌王爺這个歹心毒行,全全是烏魯木齊亂講一氣,叨五四三抾規
米藍li,阮厝文明仙,忠勇愛國,剿除叛逆,出生入死為國為民,升為副將官拜貳品,伊壹心效忠天朝,絕對無生異心,親象這款忠臣,國家無來嘉獎叨咧慘矣 ,ta有閣來陷害呢?
『被告凌定國, 佇彰化壹再向林家揩油錢銀八千兩,一下卯袂過手呤,遂見羞返想氣,誣賴忠臣,汝給看,文明著算有罪來講,嘛著噯革職吓使判刑,而且假使有罪,按怎同治6～10年中間,壹直官司無判刑?这根本著是歪案……,凌定國罪該萬死……』
林戴氏愈講愈衝動,後甡冤死,做老母e,按怎袂想氣? 呾眾位咱茲看倌,鄉親道友,講到官司辯論對質e代誌, 佇茲我毋免閣寫,撗直攏
無卡擢啦!這齣猴戲閣做落嘛無意思,官方ga有人拖遷以上,絕對無啥乜結果,是咧瞞生人目爾爾,凌定國若準定罪,伊後壁e「指使者」英桂將軍嘛著噯連帶坐罪li,这完全無可能e代誌啦!
(113) 呾開庭一點外鐘,雙方退堂矣,這聲袂直矣, 天大地天 e代誌又閣夯浮矣,害囉害囉,林戴氏開始起痟(發瘋),大鬧福州城,伊大聲
嚎,大聲詈(lue/le4),詈甲毋臹聲調,詈甲規條街仔慘ueue袂輸孝女阿琴,有影真悲哀!
林戴氏佇省衙公堂, 猶 未審判煞呤,叨開始咻喚『唉呀 ,我命慘也,我苦也,這个凌王爺,這个夭壽骨,這个死無人哭 e路傍屍,汝著死甲
規家伙仔斷半隻。死甲無人燒香點火哦!死甲香爐雙頭無人綰!我囝文明文察,冤枉死哦,汝魂著噯返來,著噯做鬼來給掠凌王爺、黎道台這
班奸臣pe仔 ,我苦哦!慘哦!社會袂定著,官廳來暴逼凌治,真正有嘛地講,無地講,咳……嗚……嗚……。』
林戴氏嚎聲乒乓叫,規e厝蓋強欲掀起來,有影驚死人,邊仔e人宛那看甲面仔攝攝, 也叨老大人起番,真正無人敢惹伊,實在講起來,茲
旁觀者宛那真同情伊li, 毋 閣公堂重地,又閣是政治案件,橫直亦是無人敢cap li。
第貳工透早呤,林戴氏又閣到衙門身邊,大嚎大鬧,身軀頂揹一領白衫,頂頭寫-「冤」字, 也叨鬧熱所在,來去e仁馬真贅,逐傢攏圍咧看,
林戴氏嚎閣再嚎,喉脘(gng4)攏滇矣,激奚啞口仔聲,無外久間,甚過了疲勞,規箍人烏暗眩,跋落土腳兜,身邊 e父老善士,自那扶好勢te(躺)le,給灌冷水灌薑汁。
一絲仔久,睜神好勢,大喚一聲「冤枉啊冤枉」又閣昏倒,身邊茲氏細看落真驚惶,亦真同情li,唉!七十外歲 e老婆仔人, 佇他鄉外里為囝申冤,有影世間大悲哀。而且福州城所在,聽無閩南話,阿婆仔踮遐,喚甲嚶噁大細聲, 宛那無人聽有叨著。
總是啊, 林戴氏親身坐船到福州出庭,結局嘛是離離落落無啥卡擢,想欲討回公道矯鋩角, 宛那真硬斗,閣卡講,文明仙冤死案已經十年左右矣,逐傢嘛是漸漸來放袂記囉!
另外凌王爺這爿面, 也叨「人肉鹹鹹」面皮厚簡那石壁le,干礁無人 cap韶汝,無給汝唏亥著(理你), 抑無,我老奸臣咧做假e是毋?若欲掠,我後面猶有閣卡大隻e,驚啥韶,這條官司拖沙赫久,免閣了精神逐傢加無閒兮 有影。
清朝官方尹 e 態度欲按怎?清室雖然 毋驚林家來告, 毋 閣拖沙甚久, 宛那真歹看面呢, 也叨「申報」這份報紙加減吓寫,外國e報紙
嘛是仝款,清廷若是甚過違反仁權, 宛那吓引起世界各國 e不滿,這幾年來滿清對外戰爭壹直是失敗,南京條約北京條約天津條約,想落叨心
酸驚咧等,所以清朝對林家「京控」案 e處理,已經面對著「爆炸性,攤牌性」e總決戰矣,清朝無第貳條路,逼到無路到地也,只好用沒收田
園,提押林文鳳、林朝棟,來逼林家投降,真拄好,清朝搪欲掠林文鳳、林朝棟,抄林家田園財產e時瞬,夏道台拄好死去,代誌暫時放另(鬆),林家免除一場災難, 奚是1879年年底 e 代誌,官方雖然『暫緩』對林家進一步 e 壓迫, 毋閣問題宛那矯袂直,真正歹紡!
林家毋但無噯接受現實苦衷,閃過大掠大抄 e悲劇,顛倒愈戰愈勇,尹家庭吓議了後,決定欲做第四回 e「京控」,欲佮清廷拚搭底,欲互
全世界看破清廷e酷行爛敗,唉!鴨卵硞石車,林家跋氣魄組e,通世界罕咧看。
第十三章 命底欠水來化解 壹生宛然天公崎
(114) 呾林家夯狂矣, 嗯才佇光緒五年五月26日,仝款到北京都察院,做第四擺 e「京控」,吊遠文明被冤殺,拄好九年搭搭。這聲痟狗撞墓壙,簡那日本兵咧有進無退,有影互人臹給感心,唉!台員第壹家族 e 運命即薄,實在怨歎啊 怨歎。
毋閣這擺e「京控」,林家e「技術」有卡好矣, 也叨控訴十年之久,挨來拺去,北京話加減亦捌淡薄仔, 嗯才 自那早著派林朝棟(彼年三十
歲,林文察後甡),去北京皇城跋 nua4,做「公共關係」活動活動,無外久呤,透過種種仁脈線路,交陪著一位大官虎,名號做何金壽翰林,朝棟仔表現了袂醜, 真有才情氣魄,真有志氣風度,致使講何金壽真正感心,迭
迭謳咾講,這个台員囡仔真正吓交重(可交陪)e ,真正吓重值(值得交往)e,雙人交陪逗搭,踥踥來去,社會咧跋nua,朋友叨真正有夠遐li。
朝棟仔為著欲罟(ko6)這位官虎,定著是開了袂少e銀兩, 毋閣这嘛袂使講是「何金壽來提朝棟 e 錢講伊好話」,何金壽宛那是關心社會
e 冤枉不平,文明仙冤死,現主時變做轟動國內外,何金壽吓來幫忙,宛那亦有伊忠直義氣e一面,閣再講,若毋是文明仙案可憐,金壽仔有錢有勢na著噯港潦落綴(de4)伊帶衰呢?
自然 dek,林朝棟來京城交結大官貴仁,是佇第四擺「京控」進前著已經祕密做臹久矣,以這嗎 e 口氣,著是「國會遊說集團」,這款齣
頭,台員吓曉,阿啄仔嘛吓曉,聯合國嘛吓,壹切叨正常li,袂 hau6韶到佗位啦,問題是出在「遊說有效否?」遊說若無效,大把銀兩定著拍損
去,这咱做媒人e,干礁介紹爾,無給汝包「甡」呢,壹切宛那 噯倚當事人家己拚,家己矯互伊好勢,才有成功叨是啦。
嗯才e瞬呤,第四擺「京控」,壹旦ga告對都察院以上,這聲「遊說團」e功效漸看吓著矣,官府皇城,漸漸有人來同情林家,「輿論界」雖然無一面倒來講, 毋閣文明仙案件確實甚過hau6 韶,官廳方面絕對袂孝孤拄 e啦,汝給看,親象林家安呢效忠清室閣犧牲重大,抑閣受著刺殺,後日仔是啥乜人敢來效忠清廷?
事實來講,清朝爛敗罔爛敗, 毋閣仁才方面定著比省城府城卡贅卡磊斗(好), 嗯才這聲林家申冤 e 機會真大,這擺官司打贏 e機會仝款
好勢,清朝可能吓假影犧牲凌王爺來結案,無論按怎,林家定著猶佔優勢叨著。
佇茲我順續講幾句閒仙話,十五、六年前初開齒科店時,地方e稅務兮臹歹,不時嘛咧嚕囌,毋閣尾溜也,齒科賑(siau4)目改由國稅局(中
央機關)詢查時,不止也講理而且客氣, 互我知影中央級 e素質有影加臹讚安呢,所以講 1879年,何金壽這位中央京城e大官,可能吓來維持正義
幫忙林家,这宛那有可能叨著,毋是干礁友情佮憩陶,著吓凍解說爾爾。
第四擺京控成立了後,有一回朝棟仔(林文察大後甡)去尋何金壽哈燒茶,飲甲搪起磅,話頭真siak1pa3 (投機暢順),金壽仔大官才咧安慰『唉!朝棟兄仔,林家 e代誌,阮已經真了解,亦真正同情, 毋閣是政治案件以上,實在亦是真歹扭搦,若稍寡矯袂好勢,泛勢連我烏紗帽嘛戴袂稠,這款代誌,我吓踮皇城來暗中替汝活動,來維持社會 e正義佮大清帝國e光榮li,汝給想,為國盡忠e 家族汝欲給暗殺, 安呢後回仔絕對無人敢來效忠清室。
『咁講咱清室真實赫無血無目屑是毋?免驚,這條鋩角我絕對噯矯,來,免驚,飲一嘴啊!』朝棟仔聽落真正感心,京城e大官虎,無顧著家己
e危險,欲來暗助我,朝棟仔感動甲目屑四濫垂, 今仔日這氏人朋友叨真正有夠遐li,唉!……眾位咱茲鄉親道友,大官虎何金壽欲來暗助林家, 毋知結果按怎?咁有效是毋?
(115) 嗯才 e瞬呤,翰林院編修何金壽,佇 1879年六月初八日,上奏光緒皇帝,為文明仙申冤,真實e 奏文是安呢 : {{福建林文明誣叛被殺一案,眾口稱冤,乃京控多次,時逾八年不獲申雪,若非袒庇原辦道、府委員,何以歷任督撫不為奏結? 明係冤情顯著,欲斥其曲而不能,欲伸其真而不敢,於是,敕交之案,置之不論不議,專待林文明老母之死而已 }} 這篇何金壽翰林 e 奏摺,寫了袂醜,亦真合道理, 毋閣人肉鹹鹹, 宛那無啥韶路用啦, 也叨「文明仙」冤死e代誌詳細,清廷豈有不知之理,著是因為官廳無法度坐理, 嗯才壹直遷 ,壹直hauu2,用奚麻糬步兮拖沙到呾, 抑無,一條地方案件拖九年之久,茲苦主告落嘛軟手骨吐烏血!唉!實在臹ham3 li。
呾光緒五年(1879)五月28日,文明案仝款佇福州開堂審理,這擺清朝頂司,「kimo臹 醜」,臹不耐煩,壹直趕緊欲結案了事, 毋閣家己無法坐理,又閣年久月深,失散離亂矯袂好勢,逼甲清廷大官夯狂,絕對欲用硬來拗落底,林家這聲梟悻矣,伊定著噯承擔第貳擺 e 家族災難li。
福州 e公堂,由何璟總督親身來審判,眾位咱茲鄉親嗣大,進前已經有三擺 e 京控,控訴 e 內容壹再重複,有影「看久著臭殕(發霉)」,好話三遍,連狗嘛嫌,公堂頂頭一來一往,佮頂擺仝款,佇林戴氏這爿,壹直要求凌定國對質,給判重罪, 毋閣佇官廳這方面,叨講文明仙「奸詐成性死有餘辜」雙爿認定差即尼贅,欲na映望有啥乜結果啦!
福州何總督佮台南夏道台,是這擺執行「林家貳次災難」e 大官,尹二人欲來害林家,著佮早年前凌王爺黎道台來害文明仙仝款e 意思,
何總督佮夏道台參詳幾落擺,決定欲對林家下重手,第壹項打擊,剝削林家e士紳權,第貳項打擊,是剝去尹e田園財產e 經濟權,二項肖刑肖弓(經),林家定著梟悻li,林家到最後壹定噯投降,京控案白然dek收縮叨是。
第壹步,官方秤彩借理由,強押族長林文鳳佮林朝棟落牢獄待審,親象這嗎所講「欲加之罪,何患無辭」,以死亡佮破病來威脅著林家這代 e領導人,因為林家已經有文察文明慘死,現時阿叔林奠國 猶坐獄,踮籠仔內咧唸「思相起」,林家聽著欲掠文鳳佮朝棟爾,定著落軟,毋敢假仙li。
第貳步,官方仝款吓使藉理由剝削林家 e田園財產,尹若無財力,定著代誌叨袂僥擺,規族自然叨散赤無額安呢 ,官廳吓使逶尹e田園,發放互族敵洪欉後代,戴潮春後代,替「尹」報仇,通人嘛歡喜溜溜,林家無投降袂煞戲啦!
各位,清廷何總督夏道台合力欲來陷害林家,逼林家退出京控,步數真正惡毒li, 毋 閣「天公疼戇人」,林家這欲悽慘 e時瞬,忽然間夏道台死亡過身,凌治林家 e空課著暫時停止,林家匿過一場 e 災難,有影好佳哉!好佳哉!
(116) 林家e「死伍ket」(死對頭)夏道台佇 1879 年六月23日,死佇安平,夏道台洶洶死亡,林家暫時逃過災難,各位,夏道台按怎佇這
个要緊空縫(節骨眼)來過身去,唉!这叨是神明 e力量真偉大,咱茲少年仔,有影互汝袂鐵齒e叨著,噹時也咱彰化媽祖真聖,聖甲吓吃糕仔,伊不忍心來看著弟子梟悻,安呢 一擺又閣一擺來受著官廳來侮辱,所以挺身來相救li,另外仙界太白金星宛那有戴潮春魂魄,洪欉魂魄,文明仙嘛佇遐咧掃便所,尹宛那 仝款看甲臹袂做e,聯合起來義助林家安呢
。
夏道台e死因是安呢,清朝北京申報有記載(這部分見黃教授收集),夏道台去福州,佮何總督參詳按怎來毒害林家,回程返來台南府1879年
五月16日佇安平港欲就陸 e 時瞬,忽然間海湧大作,夏道台姑不而衷,自那換「竹排仔靠岸」,竹排仔牽大索到海沙埔,早有船佇咧逗扭逗拖
。
夏道台坐佇竹排仔頂頭 e大腳柴桶內底,因為海湧甚大,海水灌入桶內,髮身全霑糊糊,規身真狼狽,各位,这叨是彰化媽祖咧顯靈顯聖,
欲互夏道台入台南府了後,得著重感冒,七工了後,光緒五年六月23日身亡氣絕,我想是肺炎併發症是啦!太白金星欲來收魂矣,無法度li。
夏道台死亡,林家暫時喘一口喟,清朝暫時無人來毒害林家,林家這爿佮清廷這爿,雙方暫時收兵歇睏,甚忝矣啦,有影揙十外年,舞甲青頭紅面無心適叨著。
佇清朝這方面,夏道台死亡,台南府壹時失去龍頭,伊著噯緊閣再揀選任道台,而且噯互福州方面何總督來指示, 安呢才袂漏喟li,林家京控e代誌欲解決無困難, 毋閣欲矯互伊勢、好看,恐驚無赫軟落,嗯才清廷方面宛那噯稍可忍耐一下, 毋倘「食緊long4破碗」叨醜材矣
!
另外, 佇林家這爿面, 宛那噯真冷靜來考慮考慮,「京控」四擺, 毋但是無效爾爾,泛勢吓變甲「家伙盡了,家丁盡死」e悽慘場面嘛無的確li,致使講阿罩霧e林家, 佇 1880 年左右, 宛那有卡收縮,按算有欲撤回「京控」e款, 抑無,恐驚也『敬酒 毋食食罰酒』,見羞來起慪韶面,林家安呢舞落,早慢吓滅亡叨著,林家行到茲來矣,無落軟袂煞啦!
林家 e家族會議, 佇清光緒六年春天,拍算叨決定欲退出京控案e款, 安呢做定著是真無面子, 毋閣『形勢比人強』無讓步袂煞, 也叨腳
踏清朝地,頭戴清朝天,乖乖也投降叨是。林家e家族大部分主張認輸,抑無,田園沒收,人丁掠去,真正「家破仁亡」叨真悽慘,「汝我是百姓爾,佮伊咁有du是毋?」
自夏道台死了後,清廷有暗示林家認輸準拄好啦!毋 閣林家內部宛那有一寡人無贊成投降清朝,道理真簡單,尹認定講世間甚過無公道,好人袂出頭啦,文察為國犧生性命,文明為國挽戴潮春洪欉毒草,林家出錢力,結果遂去 互清朝來暗殺文明!有影「人敖,運命做對頭」,壹定噯佮清朝拚一下仔清楚咧, 互正義吓凍來起示!
壹直到 1880年,春尾五月,清朝下最後通牒,叫林家徹底認輸,退出京控,清朝吓使保障林家 e 財產佮族民安全, 毋知林家願意否?這時
清朝踏臹硬,林家若無答應,著欲馬上查封財產,絕對報復搭底,袂使有第貳句話。
欲投降, 毋投降,當噹林氏家族意見七嘴八舌e時瞬,忽然間傳來天大地大 e歹消息,林家一下聽了後,逐傢自那「萬念俱灰」痛苦萬分,
嗯才 和齊同意「投降認輸」好啦!逗底是啥乜天大消息,請看下腳分析
。
(117)歹消息原來叨是 1880 年六月初六,林奠國不幸來病死福州牢獄中,真正悲哀,追查歷史, 逶 1865 年隨林文察返福州平定「太平天國」時, 夆放紙虎,講伊貪污食錢, 嗯才逶 1865年關到1880年, 佇牢獄中間關十五年,等於是無期徒刑叨著,林家到茲來,有影真正悲劇,規族人死甲強欲絕種去。
嗯才e瞬呤,林氏家族搪咧為「第四擺京控」是毋是認輸撤退時,忽然間傳來林奠國病死福州牢內,家族真正著驚,吓使講是「萬念俱灰」, 安呢凊心凊搭底,無噯 cap清朝e代誌,投降著投降,管待伊去死,財產顧互伊稠,有飯倘食著好矣,返來厝內唸經,壹心向佛上好勢li。
呾代誌壹直到光緒六年秋天時瞬,林家決心撤回京控案件,無噯閣再舞政治 e代誌,清朝官方一下知影林家落軟呤, 宛那仝款退讓,雙爿攏有收縮,這條代誌自那安呢解決,這个時瞬, 互清廷利用過 e林應時,黃連蒲各案件宛那攏總壹筆勾消,尹仝款無法度提著補償,所以講政治案件著是政治案件,干干礁無伊法li。
1860～1880 年,總是啊,對阿罩霧林家來講,真正是官場一場夢,一場惡夢,林定邦互和尚盛摋死,林文察報仇,林文察入福建戰太平天國,慘死戰場,林文明副將勢大招怨妒, 互人宣佈欲利用媽祖進香反叛,亦慘死公堂,京控告八、九年完全無效,顛倒欲掠林文鳳林朝棟來押解公堂,林家到呾(今),無論頂厝下厝,攏真正悽慘溜溜, 毋知欲按怎才好,佳哉林奠國e後甡林文欽,真敖讀冊,考稠文官進士,算講替林家繃了一擺 e面皮(立一次功勞),文欽e孝後甡獻堂, 宛那 佇日本時代真正活動,有來光耀祖公叨是啦!
林戴氏佮福州省城 e何總督,分別代表雙方和解,撤退京控案件,結束這十年來e官司恩怨,林家雖然損失真慘, 毋閣順從現實, ga無閣
卡好e辦法以上,乖乖也順從官廳保財保人,宛那 猶 有甡張叨是啦,咁毋是?
林家願意讓步是 安呢:撤回「京控案」,這四擺e京控案,放棄再審理,林家無欲閣來計較。對老奸臣凌王爺(凌定國),無欲要求伊死
刑,伊犯著台南億載金城 e食錢案,官廳自然吓嚴辦。這二十年內 e種種恩怨,壹筆勾消,無欲計較。對阿叔林奠國e冤獄,已經人死債爛,無欲要求平反。
清廷方面宛那仝款落軟,對文明仙案件京控案,壹切勾消。林應時,黃連蒲案亦壹切勾消,無欲賠償. 保證林家頂下厝 e田園財產完整。保證林家族長男丁壹律安全,袂去受官廳 e押掠。林文察功佇國家,特別佇漳州故鄉設專祠供奉,並從優撫恤尹後代安呢。
(118) 呾彰化南瑤宮,人群ci3倚來鏘鏘滾安呢,逐傢攏咧討論林家e悲劇,隨人攏真正怨歎li,甚至講有e講甲目箍紅,欲哭欲離,唉!想
落叨軟心li,林家一氏人為清廷為甲即忝,結果文察戰死兵事,文明征服戴氏洪氏, 互清朝基業勇固,結果去互官廳, 兮公然刺殺公堂,京控十年宛那無卡擢啦,林奠國近日又閣慘死, 呾林家這條帳是欲去尋啥人討卡好?鋩角按怎駛才吓工夫呢?
規間南瑤官,香煙渺渺,霧氣重重,無外久中間,檀香 e薰味,茫茫渺渺,引導到太白金星遐e仙界,茲宛那有人關心,太白金星仙界,蹛有戴潮春、洪欉、文明仙……等等魂魄,早著對凡間e 代誌真正清楚,亦真正關心li。
京控案,壹再就北京皇城告訴,天頂仙界早著有人咧注意li,尤其互人罰掃便所 e文明仙(因為伊捌害過洪氏、戴氏)閣卡為家己e 案情
來矯,有影看甲心肝咧彈琵琶,叨真正緊張叨是啦,文明仙看著家己 e官司壹直敗訴,臹袂做e 矣,害凡間 e老母安呢艱苦坐卦,心肝頭臹袂過
心, 嗯才投(訴控)逶太白金星老神仙遐去。
老神真正同情,不而過呢,宛那無啥乜好法度, 也 叨天頂佮凡間無肖仝,相差十億公里,管顧袂著,抑無, 安呢啦!我太白金星吓凍來消除心中e 怨恨li,無外久了後,滿清拍輸日本,台員換新頭家,算講對滿清報一下仔田螺仔冤叨是啦!又閣無外久,清朝滅亡,中華民國成立。啥乜孫公蔣公毛公碗公總起來,事實上,清朝若無來加害林家,太白金星是定著袂來害滿族li,这因果循環,真正互汝袂hau6韶 e!
昊頂e一年,拄咱凡間五十年,文明仙佇天庭咧罰掃便所二年半呤,有一擺搪著新來e魂魄,伊著是鄭南榕勇士,大義凜然真壯才,袂輸忠臣安呢,文明仙真歹勢亦真著驚,鄭南榕笑笑也佮伊開講li,『呾阿明e 啊,罕行罕行,汝e代誌我佇凡間著知影甲真清楚,我本臹蹛台北民生東路,最近才搬來茲,佮汝做厝邊安呢,專工欲來給汝講解「民主政治」這字素。
『拜託阿榕,我 毋捌「民主政治」」啥乜碗膏啦!』『唉!無要緊,我講汝聽, 呾耳空ia4卡銳e,每一个民族族群攏有尹e甡張,生存e地位
逐傢攏平等,毋是我台員人,天性著愛做滿州人e奴隸,一个民族內底上驚「三斑攪家」, li,為著欲得家己 e「榮華富貴」,心肝掠坦橫,去幫助外來政權,來殺滅家己 e 族人, 安呢做上介可惡,親象戴潮春反滿求台員人 e 解脫,汝無來幫忙叨咧慘了矣,閣來顛倒為異族來消滅家己人,汝罪過重大知影否?』
『細 e知罪知罪,請恩師開導!』『另外洪欉家族,自來安份做田,亦無來攻政府官廳e,汝亦給拍甲mimimaumau ,霸佔人 e 田園,有影大
不應該呢,汝逶家己 e 榮華富貴,建立佇同胞 e 血屑艱苦頂頭,咁袂歹勢是 毋?結局呢,連汝嘛互滿州仔摋死,死甲臹歹看。
『縣衙公堂殺仁,全世界干礁汝一个爾爾,有影漏喟漏dak5,真正袂孝孤拄 e啦,實在講,这是外來政權必然 e現象,我叫汝死,汝敢講毋死是毋?後回仔袂使閣來陷害家己人,知否?逐傢噯抾和來扺抗歹人,知否?汝後擺毋倘閣再講恁林家外公忠體國外冤枉可憐,我請問汝,汝文明仙冤死,咁講洪欉規族總死叨無可憐是毋?』
阿榕講到茲呤,文明仙頭犁犁,知影家己大顛誕,大毋著,有影想落叨怨歎li,咱家己氣凌定國, 毋閣洪欉宛那氣咱氣甲胃出血,平平是父
母甡兮,平平有囝有兒,按怎存著家己榮華來害同胞?唉!真正歹失德……彼股南瑤宮 e 香煙又閣返來媽祖宮廟內,廟內宛那鏘鏘滾,逐傢安呢
議論紛紛,事事宛然一場惡夢!
第十四章 彰化媽啊 ! 一場空夢叨怨歎
(119) 台員話,東京話,北京話,林家欲按怎矯互伊直?台員夾佇東京話集團佮北京話集團中間,真歹徛起,簡那波蘭夾佇德國佮蘇聯中間
, 宛那仝款li,東京話統治者佮北京話統治者,攏想欲創治台員話百姓,台員人衰搭底叨有影li,逗底林家按怎來矯?結果是安呢。
林朝棟,佇東京話統治者入台後(1895),挑工搬去北京話 e中國江蘇海州,甘願死佇外位。林獻堂(林奠國之孫), 佇北京話統治者入台後,挑工佇1947搬去東京話 e日本,仝款甘願死佇外位。
林家e悲慘,吓凍逶頂頭這二百字來給推論,總是啊 ,一个人欲看破世事,甘願無噯蹛家鄉來客死異鄉,絕對是仁間上介悲慘安呢,咱台員地這四百年來e歷史當中,以林家故事上介特別,上介悲情,林家自1850～1880這三十年中間, 互人感覺應付環境 e能力,真正乏搭,簡那
大人咧看囡仔辦公伙仔,好醜顛誕吓凍互後世e人做參考咧。
平平是彰化人,鹿港辜顯榮家族著真無仝款,辜氏e眼光頭腦,真正敏醒精光,智識超仁而且氣魄組兮,林家比落到地,確實吓凝吓怨歎,辜顯榮 e仁生,前三十歲是滿族順民,後四十二歲是大和族順民,伊以一个羅漢腳 e下消扮,吓凍社會矯吓好勢,官廳王公貴仁嘛好勢,上介厲害著伊敢佮日本仔,世界第壹強國上有科學智識e國家,伊宛那毋驚伊,佮尹坐平大位,吓使講替台員人爭取光榮,互人吓對講台員話 e民族,產生一絲仔信心佮甡張。
嗯才講林家佮辜家,真正互人吓感慨,平平做人e奴隸,做人e腳架仔,是精差佇佗位?北京話統治者佮東京話統治者, 佇空課路e 捙拚當
中,佗一个卡敖?卡有學問?佗一个對台員人卡有愛心,这攏真值得來研究安呢甡。呾真正歹勢哦, 佇茲對林家後代 e囝孫,若有卡不住,若有
所在講了顛誕,才請汝手se夯卡懸咧,这宛那粗筆加減回回 e爾,請毋倘計較呢!
真正欲竄筋入骨來給研究,真正欲挽瓜就藤來給唗尋,是按怎「林家吓敗,辜家吓興」,我咧看,上介要緊著是「林家 e基本知識,有卡缺欠li」一个人e知識,受環境佮教育影響,配合家己e智慧,肖激肖磅,吓造成一个真複雜 e應變系統,林家咧矯摵代誌,淡薄也「竹篙逗菜刀」e 款勢lili1ak1ak , 無坎無站,我真正懷疑, 是 毋是林家捍門e人甚過了土公,無注重智識學問,致使講所有e「智識」攏佮伊斷路,这真正拍損li。
汝給看,林家連縣城府城e大官虎叨矯袂好勢,卡加汝嘛衰兮咧等,人奚辜顯榮,火炭工仔出身爾,按怎敢佮日本天皇交陪?这講來講去宛那是學問著e,林家無法度按算「啥乜時瞬吓出啥乜代誌」,已經真危險矣,續落又閣毋知出代誌噯按怎收山攬尾,致使講壹錯再錯,下消溜溜,有影臹拍損li。
林家講伊互清官害甲臹慘, 毋閣我請問汝e,林家悽慘,戴潮春、洪欉咁就袂悽慘是毋?林家協助異族來摋同胞, 逶家己 e榮華富貴,建
立佇同胞 e血汗礁骨頂頭,汝咁吓過心是毋?文明仙慘死,明明是政治案件謀殺,汝按怎給矯逶是法律案件?代誌長短離袂清, ga赫 毋擔輸
贏?茲種種e 問題, 噯給當做「歷史是一面境」,研究一下仔卡有咧!
(120) 1882年光緒八年,林家 e官司暫時到一个坎站來歇睏矣,官方 e解說依原是「文明仙罪性惡大,叛國誤國,斬殺無誤,凌定國等官吏無錯」,林家落軟,保持了財產田園,亦免去族仁繼續掠去關 e惡運,唉!
到茲來矣,林家真正慘li,文察戰死,文明冤死,奠國阿叔仔關到死,大粒仔過往一半卡加,有影真梟悻,二年了後,好佳哉好官劉銘傳入主
台員,最後來替林家出一口氣,雖然無法成功來講,毋閣安呢做,宛那互清朝付出慘重 e 代價,林家稍寡「矯」淡薄仔返來。
光緒十年,中國佮法國戰爭,法艦逼近台員海域,清廷姑不而衷到地也,派劉銘傳來台員做頭傢,劉銘傳是台員三百年來,難得壹見e好官
,伊學問飽為人臹派做事認真,佮日本時代e後滕新平差不多,伊派到台員了後,袂親象壹般 e清官, 安呢毀類歹癖想食錢爾,算講真有愛心來
管顧咱台員地叨著。伊是逶安徽省派來e。
劉銘傳一下到台員呤,京控案拄好煞戲矣,林家屈服強權,造成文明仙白白失去一條命 e 慘局,劉銘傳是一个忠直義氣 e 人,看了真正
同情林家, 嗯才 e 瞬呤伊無惜家己e前途,殘殘潦落捅鬚(挺身而出),來kang4清朝e臭頭疕仔(來挖清室之弱點),伊佇 1885 年中法戰爭結
束時,上奏皇上,說明林文仙冤死 e來去東西(來龍去脈), 毋閣結果定著是無啥效果, 抑無,四擺京控咧告訴假 e 是毋?
這擺 e 劉銘傳上奏雪冤,雖然無成功來講, 毋閣亦吓互清朝來背負一个沈重 e冤情,算起來臭名慪聲, 宛那付出司法代價叨著,好佳哉無外久,清朝拍輸日本仔,這聲講是講,「因果報應」無顛誕啦, 毋閣亦漸漸無人去注意這段冤案li。
另外一點,中法戰爭當中,林朝棟軍士仝命, 佇基隆獅球嶺擊敗法軍,劉銘傳感恩來逗三仝宛那有關係啦,不而過呢,一个外省官員吓凍來痛惜台員本土 e冤案,亦是無簡單, 佇茲咱真正給劉銘傳行禮,行三擺禮咧。
林朝棟,壹心效忠中國,雖然老父佇福建漳州戰死,阿叔公林奠國判無期徒刑關到死,阿叔林文明公堂慘死,毋閣無論按怎,伊 宛那效忠北京話統治者le ,真正是死忠兼換貼e,尾溜也,1895年,東京話統治者入來(甲午割台),伊自那出國,遠走北京話統治者 e「江蘇海州」壹直到死,無噯返來台員,这佮頂厝e林獻堂(林奠國之孫), 佇 1947年北京話統治者入來伊宛那一心外出東京到死,拄好倒翩
!
阿罩霧林家有一項真大e欠點,著是武將甚贅,文官甚尐,陸軍官校空軍官校一大堆, 毋閣台大師大無仁才,林家壹直真正想看有倘來得科舉否?佳哉1891年林奠國e第三後甡林文欽考稠「舉人」,為林家得著頭一名文官 安呢,真正是「光宗耀祖」,林家規族歡喜甲袂顧e 矣。
毋閣無外久中間, 日本人佔台員,「舉人」頭銜無卡擢, 林文欽e後甡林獻堂,有甡張li, 毋閣貳貳捌了後,遠避日本壹直到老去。唉!一氏人反日,最後走去日本,客死異鄉,貳貳八中間伊用卡車戴嚴家淦(陳儀副手)去匿,對嚴氏有救命之恩安呢。
(121) 呾眾位咱茲鄉親嗣大,阿伯阿姆仔,阿同仔道友,咱這本台語長篇講古【彰化媽祖】,寫到茲,著漸漸欲來結束矣,这是百外年前e故事,罔聽做義讓(qi3niu6,消遣),做一款時間外e娛樂,順續來體吓一下台語文學,伊 e特殊風味,差不多佇年半進前,我宛那有先試寫一本號做【關渡媽祖】e 台語講古書冊有十四萬字,中間拄著真贅e 困難, 毋閣宛那得著袂尐 e 經驗。
關渡媽祖,彼冊,伊有真贅用字用詞顛誕去 e所在,這嗎閣再寫冊時,有給更改返來, 毋倘互肖仝 e 錯誤壹直咧發生安呢,我有咧想,咱這
嗎這本【彰化媽祖】有卡趣味,看落吓卡心適,卡起磅,卡有連續性叨是,这是咱台員地,實實在在發生 e代誌,看落真正有親切感安呢,我咧
想,這款e故事,全世界單單台員有可能發生爾, 也 叨媽祖婆叨台員地頭上介興li,嗯才伊著有法度來表現出台語文學真正特殊 e 風味安呢
叨是啦!
这二年來,為著欲寫這本【彰化媽祖】, 我有專工婁落下港二回,一擺去台中霧峰彼箍圍仔,大里鄉舊庄佮仇家彼角勢,另外一擺著是去彰化市,看南瑤宮 e佈景神聖,去看百外年前押禁媽祖婆e觀音亭,現主時叫開化寺, 另外看彼時官衙所在地,現時差不多孔廟彼个所在,另外又閣去「八卦山」最後殿大廟,「居高臨下」看看草屯,霧峰彰化市e 連遍景色,心肝內有真贅感想。
不而過呢,咱這本冊e篇幅有限,我佇這位干礁吓使淡薄也紹介爾爾,希望眾位咱茲鄉親道友,尤其是中部仁士,咧觀看這本講古進前,上好吓凍去遐,佮咱【彰化媽祖】故事有關連 e古蹟!
(a) {{霧峰林家花園}}:坐位佇霧峰民生路24號,分做下厝系統(宮保第、林家林家祠堂……),頂厝系統(景薰樓、蓉鏡齊)宮保第是林
文明故厝,景薰樓大部分攏是林獻堂佇日本時代開大條錢重修,原厝已經崩落爛敗安呢。
(b) {{省議吓附近,壹直延伸到草屯 e山崙小溪}},攏給注意le,萬斗六戰後 e舊社庄,坪林甲,北勢湳戰後,中原里、北勢里,御史里。
(c) {{洪氏家廟}}:草屯鎮往芬園 e彰化客運新庄站落,另外洪氏祠堂在「縣界站」落車,循芬草路一段81號前小巷進入,洪欉雖然互人
欺侮臹忝, 毋 閣後代宛那真贅人叨是。
(d) {{台中市林氏家廟}},坐位佇台中市國光路55號,日本時代叨已經建立矣,林氏家府容貌壯觀,真正是壹代富人e派頭,卡斟酌給參觀
一下。
(e) {{台中市中山公園旁合作大樓}}:此地原來是林文察將軍戰死漳州後,滿清佇茲建立專祠來紀念,年代久遠e 關係,尾溜也倒塌,現主時起大樓li。
(f) {{老奸臣丁曰健 e遺墨}}:坐位佇草屯鎮月眉厝龍德廟拜亭頂頭,
丁曰健寫一个扁佇廟內,書寫「刑期無刑」,彼時丁曰健佮林文察合力攻拍北勢湳洪欉勢力,行軍半途,丁曰健所留落 e 古蹟。
(g) {{大里往烏日 e公路邊,大約「樹王公」神木附近}},伊是清朝林氏家族,敵族林應時,攏差不多佇這位做生理 安呢,原生理厝已毀,看看咧 爾。
(h) {{台中市北屯地界}}:四張犁這嗎已經「車水馬龍,十里紅塵」吓使給遙想彼時戴潮春勢力, 僥擺 ueue,戴氏敢來反抗滿族統治,有影臹無簡單li。
(i) {{南瑤宮}}:坐位佇彰化市南瑤路43號,亦著是本書所講e【彰化媽祖】,這間廟吓使講是全台員內底,上第壹古質心適 e廟宇,干礁看伊 安呢烏烏舊舊也,汝著值回票價,真正有影無騙汝e,伊e古樸
佮關渡媽祖e艷麗新裝叉,拄好倒翩,有影互我這个關渡暢e臹無面子矣 he!眾位朋友,請汝專工行一迣(zua5),絕對袂漏喟叨著。
(z) {{觀音亭}}:現主時叫做開化寺, 佇彰化市中心中華路三叉路口1870年,彰化媽祖欲落北港進香,毋閣官方戒嚴硬逶南瑤宮媽祖婆扣押去茲, 互北港進香無法度進行li,道教e神夆請入去佛教寺廟伏祀,有影真特別安呢。
(k) {{八卦山風景區}}:上頂頭大殿上懸樓e左後方(便所附近)由這个 所在,吓凍看著, 逶草屯→霧峰→大里→烏日→彰化所有 e風景, 真正心適li,咱吓凍遙想百年前,兵軍肖摋百姓艱苦坐卦e 實景情形。
(l) 到{{鹿港}}去看看e,尤其是福鹿溪頂頭e福興路橋附近,伊是清朝年代,坐船欲去泉州、福州e碼頭所在,看看e,著吓發思古幽情,遙想昔日京控佮官員來來去去li。
(毋) {{鹿港天后宮}},伊佮咱南瑤宮是「雙雄並立」,雙爿有 bii叨著,林文明佮南瑤宮 e 關係,叨親象辜家佮天后宮 e關係。加減,加減比較, 宛那袂 醜叨是啦,以上十四个古蹟若吓凍事先行一迣(zua5),這聲看文章吓閣卡逗搭叨著啦!
(122) 有一个好朋友,伊問我,按怎欲來寫【彰化媽祖】這篇講古文章?到底我e動機何在?是啥乜人來紹介e?這篇故事有啥乜要緊否?按
怎卡早真少聽著這方面e代誌?汝e資料是逶佗位提來?中間有拄著困難否?
事實上,【彰化媽祖】這篇百年以上 e故事,以我現主時四十五歲年紀來講,無可能無聽過,除非伊對台員文化一絲叨無關心,過去台員戒嚴三十七年赫尼久,本土文化一直互人拗蠻去,台員人衰到地也, 宛那这就是咱教育e失敗,連咱家己蹛 e所在,叨袂了解li
。
抑無,咱吓使問咱茲大台北仁士(現時有六百五十萬人赫贅) ,請問汝「淡水河發源佇佗位?」我看百分之九十以上無法度印li,真贅人吓講坪林或者烏來,正確答案是「武陵農場附 e品田山」可見咱教育部噯卡加油咧!卡本土化一下!
寫這本講古進前, 宛那專工有二迣(zua6)行到相關圖書館研究,又閣參考幾落本e 歷史著作,才敢落筆來書寫,所以講本冊「彰化媽祖
」所講e 故事,八九成以上攏是正經e,袂烏白亂彈,算講宛那有歷史e教育意義li,毋閣其中有寡字句咧消毒林家,算講有淡薄也批評 e喟口,这是「愛之深責之切」,請尹後代手se夯卡懸咧,多多包涵一下
。
今年八月,學生台語社團有來拜訪,幵講一半當中,我有提出【彰化媽祖】文章 e代誌,逐傢攏臹歡喜, 互我真正受著鼓勵叨著,這本冊攏總十三萬七千外字,如果連頭前序文音標佮「台語漢字用法」參落,大約十四萬字, 逶 1993年貳月寫到今仔日十貳月才完成,「年頭寫到年尾」,有人問講,汝對彰化媽祖本書有啥乜化欲講?我講『干礁一句話 爾,叨是:林家 e 悲哀, 毋是尹一傢人爾爾,吓使講是全台員人e悲哀,林家悲哀,咁講洪家叨無悽慘是 毋?今仔日咱吓凍看著林家花園 毋閣看袂著洪家花園 e家景大厝,閣卡拍損li!』
也 叨頂本台語長篇文學【關渡媽祖】,有真贅錯誤,承蒙真贅人來指正,這嗎經驗有卡到熟,本冊【彰化媽祖】希望吓凍閣卡好勢,後回仔
一本比一本卡讚,吓凍逶本土文化給發互伊大葩尾,逶咱荏荏 e母語文化,來給生根bu4穎,見光大欉安呢上介好。
本書e錯誤顛誕e所在,無論用字用詞,前後矛盾 e所在,請各位先進來批指教,或者是電話(02) 2891-1432,小弟 佇茲誠懇拜託安呢甡
。
1993、12月冬至寫 阿興佇台北、新北投 山腳
( 1996 ,2003, 2007 2020四次文字修正 ) 全書結束